Sunday, May 30, 2010

၂၀၀၈ ဖွဲ့စည်းပုံ အခြေခံဥပဒေ နှင့် အနာဂတ်

“ဟုတ်ကဲ့ … ကျမတို့ အဲဒါတွေ နားမလည်ဘူး။ ဖွဲ့စည်းအုပ်ချုပ်မှုဆိုတာကို မသိဘူး။ အင်း … အရေးတော့ ပါတာပေါ့၊ ဘယ်လိုမျိုး အရေးပါလဲဆိုတော့ အဲလိုကျတော့ ဘယ်လိုပြောရမှန်းကို မသိဘူး၊ နားမလည်ဘူး”

“စိတ်မဝင်စားကြဘူး၊ လူတော်တော်များများက အဲဒါကို၊ အဲဒါကျတော့ မသိဘူးဗျ၊ အခုမှ မဖတ်ကြတာ မဟုတ်ဘူး။ တော်ရုံတန်ရုံ ဘယ်သူမှ သတင်းစာကို ဖတ်ကို မဖတ်ကြည့်တော့တာ”

“အဲ … ဆန္ဒခံယူပွဲအတွက် ဟိုဟာလုပ်ထားတာတွေ ကျမတို့ဘာမှ နားမလည်သေးဘူး လို့”

“မသိဘူးဗျ၊ စာတွေလည်း သိပ်မဖတ်ရတော့ကျ မသိဘူး”

“သိသလားဆိုတော့ မသိကိုမသိတာ။ ဖတ်လည်း မဖတ်ဘူး၊ သွားလည်း မသွားဘူး၊ လူတိုင်း ခံယူချက်ပေါ့နော်”

ဖွဲ့စည်းပုံအခြေခံဥပဒေဆိုတာဘာလဲလို့ လက်လှမ်းမီသလောက် မေးကြည့်ခဲ့တဲ့ မြန်မာနိုင်ငံထဲက လူကြီးလူငယ် အိမ်ရှင်မတွေရဲ့အဖြေကို ကြားခဲ့ကြရတာ ဖြစ်ပါတယ်။ ဖွဲ့စည်းပုံအခြေခံဥပဒေဆိုတာကို ဘယ်လိုအဓိပ္ပာယ် ဖွဲ့ဆိုနိုင်ပါသလဲ။ BLC လို့ခေါ်တဲ့ ပြည်ပအခြေစိုက် မြန်မာနိုင်ငံရှေ့နေများကောင်စီရဲ့ အထွေထွေအတွင်းရေးမှူး ဥပဒေပညာရှင် ဦးအောင်ထူးက အခုလို အဓိပ္ပာယ်ဖွင့်ဆိုပါတယ်။

“ဖွဲ့စည်းပုံအခြေခံဥပဒေဆိုတာ နိုင်ငံသားတွေရဲ့ အခြေခံအခွင့်အရေးတွေကို အားကောင်းကောင်းနဲ့ အာမခံ ပြဋ္ဌာန်းထားတာဖြစ်ပါတယ်၊ နောက်တချက်ကတော့ ဖွဲ့စည်းပုံအခြေခံဥပဒေဆိုတာ တိုင်းပြည်ရဲ့ပင်မဥပဒေ ဖြစ်တယ်၊ အဲဒီ ဥပဒေကနေပြီးတော့ ဥပဒေစိုးမိုးရေးအခြခံကို တည်ဆောက်နိုင်ဖို့ တန်းတူညီမျှမှုကို အာမခံရပါတယ်။

အဲတော့ ဖွဲ့စည်းပုံ အခြေခံဥပဒေဆိုတာက နိုင်ငံသားတွေရဲ့အခွင့်အရေးကို ပြဋ္ဌာန်းရုံနဲ့မရဘဲနဲ့ အဲဒီအခွင့်အရေးကို ကာကွယ်နိုင်ဖို့အတွက် ယန္တယားတွေ တပ်ဆင်ထားပေးရတယ်။ အနည်းဆုံးအားဖြင့်တော့ နိုင်ငံသားတွေရဲ့ အခွင့်အရေးကို ထိပါးလာရင် ကာကွယ်စောင့်ရှောက်နိုင်မယ့် လွတ်လပ်တဲ့ တရားစီရင်ရေးလိုဟာမျိုးတွေကို အားကောင်းကောင်းနဲ့ ပြဋ္ဌာန်းပေးထားတယ်၊ ဒီလို အခြေခံမျိုးနဲ့ ပြင်ဆင်ပြဋ္ဌာန်းပေးထားတဲ့ အရာမျိုးကိုမှသာလျှင် ဖွဲ့စည်းပုံအခြေခံဥပဒေလို့ ခေါ်ပါတယ်”

ဖွဲ့စည်းပုံဆိုင်ရာ အခြေခံဥပဒေကိုကြည့်ရင် ၂ မျိုး ၂ စားတွေ့ရတယ်လို့ ဂျပန်နိုင်ငံ ကန်ဒ တက္ကသိုလ်က သမိုင်းပညာရှင် ဒေါက်တာအေးချမ်းက အခုလို သမိုင်းနောက်ခံနဲ့ ပြောပြပါတယ်။

“Constitutionalism လို့ ခေါ်တဲ့ စည်းမျဉ်းခံအုပ်ချုပ်ရေးစနစ်ရဲ့သမိုင်းကို ပြန်ကြည့်ရင်ပေါ့လေ၊ ဖွဲ့စည်းအုပ်ချုပ်ပုံ အခြေခံဥပဒေဆိုတာ ၂ မျိုး ၂ စား တွေ့ရပါလိမ့်မယ်။ တမျိုးကတော့ အုပ်ချုပ်ခံပြည်သူပေါ့၊ အောက်ခြေထုက အထက်လွှာ သက်ဦးဆံပိုင် အာဏာရှင်တွေ (သို့တည်းမဟုတ်) နိုင်ငံတခုကိုထူထောင်ဖို့အတွက် ကြိုးစားနေတဲ့သူတွေကို အောက်ကနေ တင်ပြပြီးတော့ အတည်ဖြစ်လာတဲ့ အောက်ကနေ အထက်ကိုဆန်တဲ့ ပုံစံပေါ့၊

ဒီပုံစံကို အင်္ဂလန်တို့၊ အမေရိကားတို့၊ ပြင်သစ်တို့ စတဲ့နိုင်ငံတွေမှာ တွေ့ရပါလိမ့်မယ်။ နောက်တမျိုးကတော့ အပေါ်ကအုပ်ချုပ်တဲ့ အာဏာပိုင်တွေက အောက်က အုပ်ချုပ်ခံပြည်သူတွေကို ချပြတဲ့ပုံစံပါ။ ဒီဟာကို သဘောတူသလား၊ မတူသလား ဆိုပြီးတော့ ချပြတဲ့ပုံစံပေါ့လေ။ ဒါကတော့ အပေါ်က အောက်ကို စုန်တဲ့ပုံလို့ ခေါ်နိုင်တာပေါ့။ ဒါကို အာဏာရှင် တိုင်းပြည်တွေမှာ အများဆုံး တွေ့ရပါတယ်။ အခု ဗမာပြည်မှာ အမျိုးသားညီလာခံက ရေးဆွဲလိုက်တဲ့ အခြေခံဥပဒေဟာ ဒုတိယပုံစံသဘော သက်ဝင်နေတယ်ခင်ဗျ”

ဒီလို ဖွဲ့စည်းပုံအခြေခံဥပဒေပုံစံ ၂ မျိုးရှိတဲ့အနက် အောင်မြင်တိုးတက်တဲ့နိုင်ငံတွေမှာ အောက်ခြေကနေ အထက် အုပ်ချုပ်သူတွေကိုတင်ပြပြီး အပြန်အလှန် ဆွေးနွေးရေးဆွဲထားတဲ့ ဖွဲ့စည်းပုံအခြေခံဥပဒေမျိုး ကျင့်သုံးကြတာ တွေ့ရတယ်လို့ ဒေါက်တာ အေးချမ်းက ပြောပါတယ်။

“အောက်ကနေ အပေါ်ကိုဆန်တဲ့ ဖွဲ့စည်းအုပ်ချုပ်ပုံ အခြေခံဥပဒေဆိုတာဟာ ပြည်သူအများစုရဲ့ဆန္ဒကို ထင်ဟပ်ပေါ်လွင် စေတဲ့အတွက် ဒီနိုင်ငံတွေဟာ တိုးတက်တာပါပဲ။ လက်တွေ့ကြည့်လိုက်ပါ။ အင်္ဂလန်၊ အမေရိကန်ပြည်ထောင်စု၊ ပြင်သစ် ဒီနိုင်ငံတွေပါပဲ။ ဂျာမဏီ။ တကယ်တော့ အပေါ်ကနေချလိုက်တဲ့ ဖွဲ့စည်းပုံအခြေခံဥပဒေဟာ ဒုတိယကမ္ဘာစစ် ရှုံးသွားတဲ့ အချိန်မှာ ပျက်စီးသွားပါတယ်။ အခုက အောက်ကနေ အပေါ်ကိုဆန်တဲ့ ဖွဲ့စည်းအုပ်ချုပ်ပုံအခြေခံဥပဒေ ဖြစ်လာတဲ့အခါမှာ တိုးတက်လာတာပါပဲ။ ဒါဟာ ဘယ်လိုမှ ငြင်းလို့မရတဲ့အချက်ပါ”

တခါ အထက်ကနေ အောက်ကိုချပြတဲ့ ဖွဲ့စည်းပုံမျိုးကျင့်သုံးတဲ့ နိုင်ငံတွေမှာ ဘယ်လိုဖြစ်ရပ်တွေနဲ့ တွေ့ဆုံရတယ်ဆိုတာကို ဒေါက်တာအေးချမ်းက အခုလိုပြောပါတယ်။

“ဘယ်လိုတွေ့ရမလဲဆိုလို့ရှိရင်တော့ ရှင်းရှင်လေးပဲလေ။ ၁၉၇၄ မြန်မာနိုင်ငံ ဖွဲ့စည်းအုပ်ချုပ်ပုံအခြေခံဥပဒေကို ကြည့်လိုက်ရင်ပဲ သိတာပေါ့။ ၁၄ နှစ်ပဲ ခံတာပဲ။ ၁၉၈၈ မှာ ပြည်သူက အုံကြွတာပဲ။ ဒီအုပ်ချုပ်ရေးစနစ်ကို မကြိုက်ဘူးဆိုတာကို ပြတာပဲ။ ဒီလိုပဲ ဆိုဗီယက်ပြည်ထောင်စုရဲ့ ဖွဲ့စည်းအုပ်ချုပ်ပုံအခြေခံဥပဒေကလည်း ဒီအတိုင်းပဲလေ။ ပြည်သူတွေက အုံကြွတော်လှန်တာပဲ။ ဒီနေ့ တရုတ်ပြည်သူ့သမတနိုင်ငံမှာ လူထုကြီးတခုလုံးက အုံကြွမှုမရှိသော်လည်းပဲ ဒီဟာကို သဘောမတူဘူးဆိုတာ ဆန့်ကျင်တဲ့ အယူအဆတွေကို ဖော်ထုတ် တင်ပြနေကြတာပဲ။ ဒါကို တွေ့ရမှာပဲ။ ကျနော် ဒီလိုပဲ မြင်ပါတယ်”

အဲဒီလိုအခြေခံတွေနဲ့ ရေးဆွဲခဲ့ကြတဲ့ ဖွဲ့စည်းပုံအခြေခံဥပဒေဟာ နိုင်ငံတနိုင်ငံနဲ့ အဲဒီနိုင်ငံနေ ပြည်သူလူထုအတွက် ဘယ်လောက်ထိအောင် အရေးပါတယ်ဆိုတာကိုတော့ မြန်မာနိုင်ငံရှေ့နေများကောင်စီ အထွေထွေအတွင်းရေးမှူး ဥပဒေပညာရှင် ဦးအောင်ထူးကပဲ ဆက်ပြီးတော့ ရှင်းပြပါတယ်။

“စစ်မှန်တဲ့ ဖွဲ့စည်းပုံအခြေခံတရပ် ပေါ်လာပြီဆိုရင် တိုင်းပြည်မှာ လက်ရှိတည်ဆဲဥပဒေတွေ ရှိတယ်။ အဲဒီ တည်ဆဲဥပဒေတွေဟာ ဖွဲ့စည်းပုံအခြေခံဥပဒေမှာ ထည့်သွင်းပြဋ္ဌာန်းထားတဲ့ နိုင်ငံသားတွေရဲ့အခွင့်အရေးကို ဆန့်ကျင်တဲ့ဥပဒေဆိုရင် ဖွဲ့စည်းပုံအခြေခံဥပဒေ ပေါ်လာတဲ့အချိန်မှာ အဲဒီ ဥပဒေတွေအားလုံးကို ရပ်ဆိုင်း ဖျက်သိမ်းပစ်လို့ ရတယ်၊ ပယ်ဖျက်ပစ်ရတာ ဖြစ်တယ်။

တချိန်တည်းမှာ နောက်ထပ်ဥပဒေသစ်တွေ ပြဋ္ဌာန်းတော့မယ်ဆိုရင်လည်းပဲ ဒီ ဖွဲ့စည်းပုံ အခြေခံဥပဒေနဲ့အညီ အာမခံပြဋ္ဌာန်းပေးထားတဲ့ နိုင်ငံသားတွေရဲ့အခွင့်အရေးကို ဖော်ဆောင်တဲ့ဥပဒေမျိုးကိုသာလျှင် ဆက်လက် ပြဋ္ဌာန်းပေးထားတာ ဖြစ်တယ်။ ဒါကြောင့် ဖွဲ့စည်းပုံအခြေခံဥပဒေဟာ ဥပဒေအားလုံးရဲ့ ပင်မအသက်သွေးကြော အဖြစ်နဲ့ နိုင်ငံသားတွေရဲ့အခြေခံအခွင့်အရေးတွေကို တောက်လျောက် နောက်ထပ်ပေါ်လာတဲ့ဥပဒေတွေက ကာကွယ် စောင့်ရှောက်ပေးရေး အခြေခံကနေပြီးတော့ အင်မတန်ကို အရေးကြီးတာဖြစ်ပါတယ်”

ဒီတော့ကာ ဖွဲ့စည်းပုံအခြေခံဥပဒေဆိုတာ ကိုယ့်ကိုယ်ဘယ်သူတွေက ဘယ်လိုပုံစံမျိုးနဲ့ အုပ်ချုပ်မယ်၊ ကိုယ့်နိုင်ငံရဲ့ အနာဂတ် ကိုယ်ကိုယ်တိုင်နဲ့ ကိုယ့်ရဲ့ သားစဉ်မြေးဆက်အနာဂတ်ကို ပုံဖော်မယ့် စည်းမျဉ်းစည်းကမ်းနဲ့ လုပ်ငန်းစဉ်တွေကို ဖော်ပြရေးဆွဲထားတာဖြစ်တာမို့ အထူးပဲ အရေးကြီးလှပါတယ်။ ဒီတော့ကာ မြန်မာပြည်သူလူထုအနေနဲ့ ကိုယ့်ရဲ့ ဆန္ဒသဘောထားတွေ မဖော်ထုတ်ခင် ဒီအခြေခံဖွဲ့စည်းပုံ ဥပဒေမှာ ဘယ်လိုရေးဆွဲထားတယ်။ ဘာတွေပါတယ်ဆိုတာကို အသေအချာ လေ့လာသင့်ပါကြောင်း တင်ပြလိုက်ရပါတယ် ခင်ဗျာ။

ဦးဘမော် စုစည်းတင်ပြချက်ကို ကောက်နုတ်ဖော်ပြပါတယ်။


Thursday, May 27, 2010

၂၀၁၀ ကြတ်ပြေး ယတြာ (ကာတွန်း စောငို)

ပြည်ထောင်စု ဒီမိုကရေစီပါတီရဲ့ ဒုတိယ ဥက္ကဋ္ဌ ဦးဋ္ဌေး နှင့် ဘီဘီစီ ဆက်သွယ်မေးမြန်းချက်

၂၀၁၀ ရွေးကောက်ပွဲကို မဲမပေးကြဖို့၊ ရွေးကောက်ပွဲကို သပိတ်မှောက်ကြဖို့ ၈၈ မျိုးဆက်ကျောင်းသားများအဖွဲ့၊ ဗမာနိုင်ငံလုံးရာ ကျောင်းသားသမဂ္ဂများအဖွဲ့ချုပ်နဲ့ သံဃာ့တပ်ပေါင်းစုတို့က မနေ့ကတုန်းက ကြေညာချက် ထုတ်ပြန် တိုက်တွန်းခဲ့ပါတယ်။

ပြည်ထောင်စု ဒီမိုကရေစီပါတီကတော့ ဒီတိုက်တွန်းချက်ကို ဒီနေ့မှာ ကန့်ကွက်လိုက်ပါတယ်။ ဘန်ကောက်က ဦးဝင်းမြင့်က တင်ပြပေးမှာဖြစ်ပါတယ်။

၂၀၁၀ ရွေးကောက်ပွဲမှာ မဲသွားမပေးဖို့အတွက် အများပြည်သူတွေကို တိုက်တွန်းနေတာဟာ ဒီမိုကရေစီ လမ်းကြောင်းပေါ်ရောက်အောင် ရွေးကောက်ပွဲကနေဖြတ်သန်းမယ်ဆိုတဲ့ ယုံကြည်ထားတဲ့ ပါတီတွေအတွက်ကတော့ အခက်အခဲတွေရှိလာနိုင်တယ်လို့ UDP ပြည်ထောင်စု ဒီမိုကရေစီပါတီရဲ့ ဒုတိယ ဥက္ကဋ္ဌ ဦးဋ္ဌေးက အခုလို ပြောပါတယ်။

“Boycott လုပ်ရင် ကျနော်တို့မှာ အခက်အခဲရှိတယ်၊ တည်ဆဲအစိုးရကနေ ဖိနှိပ်လို့မဟုတ်ဘဲနဲ့ ဒီမိုကရေစီ အင်အားစုအတွင်းကလာတဲ့ Campaign တွေဖြစ်နေတဲ့အတွက် ပထမဆုံးက ကျနော်တို့ပဲ အခက်အခဲ ဖြစ်တယ်။ ရွေးကောက်ပွဲဝင်တဲ့ ဒီမိုကရေစီအင်အားစုကိုယ်စားလှယ်ကို တိုက်ခိုက်ရာရောက်တဲ့အတွက် ဒီမိုကရေစီအင်အားစုကိုယ်စားလှယ်တွေက ရှုံးဖို့များလာနိုင်တယ်။ ရွေးကောက်ပွဲမှာ အရေးနိမ့်သွားနိုင်တယ် ခေါ်တာပေါ့ဗျာ။

တကယ်တမ်းရလဒ်က တပ်မတော်က Sponsor လုပ်ထားတဲ့ ပါတီတွေနဲ့ ပုဂ္ဂိုလ်တွေပဲ ရွေးကောက်ပွဲမှာ အနိုင်ရဖို့ဖြစ်သွားတယ်။ လက်ရှိတပ်မတော်အစိုးရကပဲ အနိုင်ရပြီးတော့ သူတို့ပဲ အစိုးရမြဲဖို့ သွယ်ဝိုက် ထောက်ခံသလိုဖြစ်နေတယ်လေ”

အဲတော့ အများပြည်သူက မဲသွားမပေးရင် စစ်အစိုးရနဲ့ပတ်သက်နေတဲ့ ပါတီတွေက ဘယ်လိုလုပ်နိုင်လာမလဲ ခင်ဗျ။

“ဘာပဲဖြစ်ဖြစ် သူ့ရွေးကောက်ပွဲက ဆက်လုပ်မှာပဲ။ ရွေးကောက်ပွဲမဲကတော့ လူထုက ထိုက်သင့်တဲ့သူကို ပေးမယ့်သူက ပေးမှာကိုး၊ Majority Vote ရဲ့ သဘောကတော့ မဲအများဆုံးရတဲ့ပါတီက ဘယ်နှမဲပဲနိုင်နိုင် သူက လွှတ်တော်ကိုယ်စားလှယ်ဖြစ်မှာလေ။ ဖွဲ့စည်းပုံဥပဒေအရလည်း ၂၅% သူက ယူထားတယ်။ နောက်ထပ်လည်း နိုင်ဦးမယ်ဆိုရင် သူက အေးအေးဆေးဆေးပဲ၊ လွတ်လွတ်ကျွတ်ကျွတ်ပဲ သူက ပါလီမန်မှာလည်း စိုးမိုးမယ်၊ အုပ်ချုပ်ရေးမှာလည်း စိုးမိုးသွားမှာပေါ့”

အခု ဒီ ရွေးကောက်ပွဲကိုဆန့်ကျင်တဲ့သူတွေပြောတာက အခုဖွဲ့စည်းပုံကိုက ဒီမိုကရေစီမကျဘူး၊ စစ်အာဏာ တည်မြဲရေးအတွက် လုပ်ထားတဲ့ ဖွဲ့စည်းပုံဖြစ်လို့ ဒါကြောင့်မို့ ဒီရွေးကောက်ပွဲကို လက်မခံဘူးလို့ ပြောနေတော့ တကယ်တော့ လက်တွေ့မှာ ပြုပြင်ပြောင်းလဲဖို့ဆိုတာ ဖြစ်နိုင်ဦးမလားခင်ဗျ။

“လက်ရှိဖွဲ့စည်းပုံတို့၊ လက်ရှိရွေးကောက်ပွဲတို့က ကျနော်တို့ ထောက်ခံတာမဟုတ်ဘူးဗျ။ လက်ခံဖို့ ဖြတ်သန်းတာ။ ရွေးကောက်ပွဲက ၁၉၉၀ ပြည့်နှစ်က တခါပေါ်တယ်။ အခုတခါ ပေါ်တယ်ပေါ့ဗျာ။ အဲကျတော့ ပြီးခဲ့တဲ့ ၁၉၉၀ ရလဒ်ကတော့ သူတို့ နှစ် ၂၀ လုပ်ပြီးပြီ။ မဖော်နိုင်တော့ဘူး။ အဲကျတော့ ကျနော်တို့က ဒုတိယ အဆင့်အနေနဲ့ ပြန်ကြိုးပမ်းကြရတာ။ ဒီအခွင့်အလမ်းတွေ ပေါ်လာတဲ့အခါ ကျနော်တို့က နောက်အကြိမ် ကျနော်တို့ အကောင်အထည် ဖော်ကြည့်ပါရစေ အဲဒါပဲ။ အဲဒါအပေါ်မှာတော့ ချင့်ချင့်ချိန်ချိန်နဲ့ တွေးတောဖို့၊ ဆောင်ရွက်ကြဖို့ ကျနော်တို့က အဲဒါကိုတော့ အထူးမေတ္တာရပ်ခံချင်ပါတယ်”

ရွေးကောက်ပွဲကို သပိတ်မှောက်ဖို့အတွက် တိုက်တွန်းနေသူတွေကို ဦးဋ္ဌေးက ကန့်ကွက်ပြောဆိုခဲ့တာ ဖြစ်ပါတယ်။

ရွေးကောက်ပွဲကော်မရှင်မှာ မနေ့တုန်းကအထိ ပါတီမှတ်ပုံတင်ခွင့်လျှောက်လွှာ တင်ထားတဲ့ အဖွဲ့ပေါင်း ၄၁ ဖွဲ့ ရှိပြီးတော့ ၁၄ ဖွဲ့ကိုတော့ ပါတီအဖြစ် အသိအမှတ်ပြုပြီလို့ ရွေးကောက်ပွဲကော်မရှင်က ထုတ်ပြန်ကြေညာထားပါတယ်။

၂၀၁၀ ပြည့်နှစ် မေလ ၂၆ ရက်နေ့ ဘီဘီစီ မြန်မာပိုင်း အစီအစဉ်မှ ကောက်နုတ်ဖော်ပြပါတယ်။


Wednesday, May 26, 2010

မုန်တိုင်းကိုဆန်၍ ပင်လယ်ကိုဖြတ်သောအခါ (၃၉)

နောက်တခု ကျနော် စိုးရိမ်သည့်ကိစ္စတခု ရှိပါသည်။ မုန်တိုင်းကျသော လေတိုက်နှုန်း အလွန်ပြင်းထန်သောကြောင့် ရွက်တိုင်မှာ ကန့်လန်သလိုဖြစ်ပြီး လှေကွဲသွားမှာ၊ လှေပျက်သွားမှာ အလွန်စိုးရိမ်ရပါသည်။ ၃ နာရီခန့်မျှ မုန်တိုင်းထဲတွင်ဖြတ်သန်းပြီးနောက် လှေမှာ တစုံတရာမျှ ချို့ယွင်းပျက်စီးမှုမရှိပါ။

ကျနော်တို့ ၃ ယောက်သည် ကိုယ့်လှေကလေးအပေါ် အတော်ကို ယုံကြည် စိတ်ချသွားပါပြီ။ မိမိကိုယ်တိုင်လည်း မိမိကိုယ်ကို ယုံကြည်မှု ရှိလာပါသည်။ အားလည်း တက်လာပါသည်။ ဖထီးမန်းအောင်ကြည်က မုန်တိုင်းထဲမှ လေသံ လှိုင်းသံ တဝေါဝေါကြားထဲမှ လှမ်းအော်ပြီး ပြောလိုက်ပါသေးသည်။

“ဒီတခါ လှေမပျက်ရင် ကျနော်တို့လှေ မပျက်တော့ဘူး။ ဒီတခါမှ မသေရင် ပင်လယ်ထဲမှာ ဘယ်တော့မှ မသေဘူး”

ဖထီးမန်းစကားကြောင့် ကျနော်တို့ ပိုပြီး အားတက်လာပါသည်။ မုန်တိုင်းထဲမှာတော့ လှေကလေးတစင်းနဲ့ လူ ၃ ယောက် လှိုင်းဒဏ်၊ လေမုန်တိုင်းဒဏ်ကို ရဲရဲရင့်ရင့်အန်တုရင်း မုန်တိုင်းထဲမှာ ဖြတ်သန်းနေဆဲ ဖြစ်ပါသည်။

မနက်လင်းအားကြီးချိန်ရောက်မှ မုန်တိုင်းစဲသွားသည်။ ပင်လယ်ကိုကျော်ဖြတ် မုန်တိုင်းထဲမှာ စမ်းသပ်ခံလိုက်ရသည့် အကျိုးဆက်ကား ကျနော်တို့ ဘဝခရီးတလျှောက်တွင် ကြံခိုင်သော စိတ်ဓာတ်ခွန်အားကို ရရှိစေခဲ့ပါသည်။ ကြမ်းတမ်းကွေ့ကောက်သော ဘဝခရီးတလျှောက်တွင် လူအချို့တို့၏ အောက်တန်းကျ ယုတ်ညံ့သိမ်ဖျင်းစွာ ကျနော့်အား ဂုတ်နှိပ်ခဲ့သော်လည်း ကျနော် ဘယ်တော့မှ ရိုကျိုးဦးညွတ်မသွားခဲ့ပါ။ ပုတ်ချလိုက်သော ဘောလုံးပမာ ပြန်ခုန်တက်လာပါသည်။

ဘုရင်ကို ပလ္လင်ပေါ်က ဆွဲချရဲတယ်

ဘုရင်ကို ပလ္လင်ပေါ်က ဆွဲချရဲသည့်စိတ်ဓာတ်မျိုး အမြဲစိုက်ထူနိုင်ခဲ့ပါသည်။ မုန်တိုင်း၏သဘောကို အတော် သဘောပေါက်လာပါသည်။ မုန်တိုင်းကြောင့် ဖြစ်ပေါ်လာသော လှိုင်းလုံးကြီးများမှာ အလွန်ပင် ပြင်းထန် အားကောင်းပါသည်။ ကျောက်ဆောင်ကြီးကဲ့သို့ အမာခံထုမျိုး၊ ပင်လယ်ကူးသင်္ဘောကြီးကဲ့သို့ ထုထည်မျိုးကို တအားပြေးဆောင့်ပါသည်။ ကျွန်းမှာရှိစဉ်တုန်းက မုန်တိုင်းကျခဲ့ရာ အိုနာစစ် သင်္ဘောကြီးကို လှိုင်းလုံးကြီးများ ပြေးပြေးဆောင့်သည်မှာ ကရိန်းတိုင် ထိပ်ဖျားကိုပင် လှိုင်းညွန့်ကျော်သွားပါသည်။

သည့်အတွက်ကြောင့် ဒေါင်းအိုးဝေ မဂ္ဂဇင်းတွင် ကျနော်ရေးခဲ့သည့် ဆောင်းပါးထဲတွင် ‘မုန်တိုင်းဒဏ်ကြောင့် လှိုင်းခေါင်းဖြူကြီးများကို တောဆင်ရိုင်းအုပ်ကြီးများပမာ အစွယ်နှာမောင်းထောင်၍ ပြေးလွှားလာကြသည်’ ဟု တင်စားခဲ့ပါသည်။

ယခု ကျနော်တို့ကြုံတွေ့ရသော မုန်တိုင်းကြောင့်ဖြစ်ပေါ်လာသည့် လှိုင်းလုံးကြီးများ၏ အရွယ်ပမာဏရော၊ ခွန်အားသည် ကျနော်တို့ လှေကလေးတစင်းနှင့် လူ ၃ ယောက်မှာ လှိုင်းလုံးကြီးအတွက် ဖက်ရွက်သာသာလောက်မျှသာ ရှိပါသည်။ လှိုင်းလုံးကြီး၏ ကျောပေါ်တွင် အသာလေး သယ်ဆောင်သွားပါသည်။ မိုက်မိုက်ကန်းကန်း တအားပြေးဆောင့်ရမည့်အရာမျိုး သူ့အတွက်မဟုတ်ပါ။

မုန်တိုင်းလည်း စဲခဲ့ပြီ။ လှိုင်းအသင့်အတင့်သာ ကျန်ပါတော့သည်။ မုန်တိုင်းထဲတွင် လှိုင်းခေါင်းဖြူကြီးများကို အံတုရင် ပဲ့ကိုင် ရွက်တိုက်ခဲ့သော ဖထီး မန်းအောင်ကြည်သည်လည်း အကောင်းဆုံး မာလိန်မှူးအဖြစ် ကျနော်တို့ ပို၍ အားကိုးယုံကြည်လာရပါသည်။

နောက်တခုက ကျနော်တို့လှေကလေး တဖက်တချက်တွင် တွဲထားသော ဝါးဖောင်ကလေးမှာ အလွန် တန်ဖိုးရှိပါသည်။ လှိုင်းညွန့်ကြီးများသည် လှေကို တိုက်ရိုက်မထိဘဲ ဖောင်ကိုလာလာရိုက်ပြီး လှိုင်းညွန့် ကွဲသွားသည်။ ဖထီးမန်းအောင်ကြည် စိတ်ကူးစိတ်သန်း အလွန်ကောင်းပြီး အမျှော်အမြင် ရှိပါသည်။ ခေါင်းဆောင် ပီသပါပေသည်။

မုန်တိုင်းကစဲခဲ့ပေမယ့် မိုးက တဖွဲဖွဲရွာနေတုန်းပါ။ လေမှာ တိုက်သည်ဆိုရုံမျှ ရှိသည်။ ကျနော်တို့လှေသည် တအိအိသာ ရွေ့သည်ဆိုမျှသာ ဖြစ်သည်။ မိုးငွေ့မိုးဖွဲကြောင့် နေသည် မသာပါ။ အုံ့ဆိုင်းနေသည်။ မိုးသည် ဖွဲဖွဲရွာလိုက်၊ သည်းလိုက်နှင့် တနေကုန်ခဲ့သည်။ မိုးသည် ဖွဲဖွဲရွာလိုက်၊ ပြန်သည်းလိုက်နှင့် ညနေမှောင်လာသည်အထိ ဖြစ်သည်။

ညဦးပိုင်း ၉ နာရီအချိန်လောက်တွင် မီးတွေ ထိန်ထိန်လင်းနေသော ပင်လယ်ကူးသင်္ဘောကြီးတစင်း ကျနော်တို့ဘက်သို့ ဦးတည်မောင်းလာသည်။ ကျနော်တို့လှေက ရှောင်ပေးလိုက်သည်။ ကိုက် တထောင်ကျော်လောက် အကွာအဝေးရှိသည် ထင်သည်။ သင်္ဘောစက်သံ ဆူညံစွာကြားရပြီး သင်္ဘောဒီဇယ်အနံ့သည် ကျနော်တို့ဆီအထိ အနံ့ရပါသည်။

ကျနော်တို့လှေဘေးမှဖြတ်သွားသော သင်္ဘောကြီးအား မီးနှင့်အချက်ပြခြင်း မလုပ်ပါ။ ဤသင်္ဘောသည် မည်သည့်နိုင်ငံ၊ မည်သည့်သင်္ဘောနည်း။ ရန်သူနှင့်နီးစပ်သည့်နိုင်ငံမှ သင်္ဘောဆိုလျှင် ကျနော်တို့ကိုဖမ်းဆီးပြီး ရန်သူဆီပြန်ပို့နိုင်ပါသည်။ ဤအတွက်ကြောင့် အတွေ့မခံခြင်းဖြစ်ပါသည်။

ဆက်လက်ဖော်ပြပါမည်။


Monday, May 24, 2010

မကြာတော့ဘူး။ ကျုပ်တို့လည်း လောင်မီးကျတော့မှာပါ ... (ကာတွန်း စောငို)


မီး

မေလ ၂၄ ရက်။ ၂၀၁၀ ပြည့်နှစ်

ရန်ကုန်မြို့ မင်္ဂလာတောင်ညွန့်မြို့နယ်က မင်္ဂလာဈေးကြီး ဒီမနက် ဈေးစဖွင့်ချိန်မှာ မီးလောင်ပြီး နာရီအတော်ကြာ မီးငြှိမ်းသတ်ခဲ့ပြီး ည ၈ နာရီကျော်အထိ မီးငြှိမ်းလို့ မပြီးသေးဘူးလို့ သိရပါတယ်။

အထည်အလိပ် ဆေးဝါးနဲ့ ကုန်မျိုးစုံ လက္ကားဈေးကြီးဖြစ်တဲ့ မင်္ဂလာဈေးမှာ ဈေးဆိုင်နဲ့ ဆိုင်ခန်းပေါင်း ၄ ထောင်လောက် ရှိပါတယ်။

အထပ် ၅ ထပ်ရှိတဲ့ဈေးကြီးရဲ့ စတုတ္ထထပ်ကနေ မနက် ၉ နာရီလောက်မှာ မီးစလောင်တာ ဖြစ်ပါတယ်။

ထိခိုက်ဒဏ်ရာရတဲ့သူ ရှိမရှိနဲ့ မီးဘာကြောင့်လောင်တာလဲဆိုတာ အတိအကျ မသိရသေးပေမယ့် အပေါ်ဆုံးထပ်မှာ ဘတ္ထီရီအားသွင်းရာကနေ အပူများပြီး ဝါယာရှော့ခ်ဖြစ်ပြီး မီးလောင်တာဖြစ်နိုင်တယ်လို့ ဈေးသူဈေးသားတချို့က ပြောပါတယ်။ (ဘီဘီစီ)

ဓာတ်ပုံ - AP, Reuters, Getty Images


Saturday, May 22, 2010

မုန်တိုင်းကိုဆန်၍ ပင်လယ်ကိုဖြတ်သောအခါ (၃၈)

ကျနော်တို့လှေမှာ တညလုံး၊ တနေ့လုံး လွှင့်လာလိုက်တာ ရေအကျနှင့် ရေတက်ကိုလိုက်ပြီး စုန်ဆန်နေသည့်အတွက် ဘယ်ကိုမှမရောက်သေးဘဲ ဖြစ်နေသည်။ မိုးကလည်း ဖွဲဖွဲရွာနေသည်။ လှိုင်းမူးတာလည်း ပြေပါပြီ။ အနောက်တောင်ဘက်သို့ လှေဦးကို တည့်ပေးလိုက်ပြီး ခပ်သွက်သွက် လှော်ထွက်လာပါသည်။

တော်တော်လေး မှောင်ရီပျိုးစပြီဖြစ်သည့်အတွက် ရွက်တင်လိုက်ပါသည်။ ဦးစွာ လေးထောင့်ရွက်ကြီးတခုကိုသာ တင်ကြည့်ပါသည်။ ကိုကိုးကျွန်းမကြီးလည်း မြင်ကွင်းမှပျောက်သွားပါသည်။ ကျနော်တို့လည်း စိတ်အေးသက်သာရှိသွားကြပါသည်။

မကြာမီတွင် တောင်မြင့်မြင့်နှင့် ကျွန်းကြီးတခုကို လှမ်းမြင်ရပါသည်။ ကျွန်းကြီးမှာ ကြေးစည်ပုံသဏ္ဍာန်ရှိပါသည်။ ကြေးစည်များ၏ နှစ်ဖက်စွန်းတွင် ပြန်လှန်ပြီး အကောက်လေး ချိပ်နေသည့် ပုံအတိုင်းဖြစ်ပါသည်။ နောက်အခါတွင် ပြန်သိရသည်မှာ နာဂိုတန်ကျွန်းဟု သိရသည်။ မြေပုံထဲတွင်ပြန်ကြည့်ရာ နာဂိုတန်ကျွန်းပင် ဖြစ်သည်။

ကျွန်းကြီးမှ တမိုင်ကျော်လောက် အကွာအဝေးမှ ဖြတ်လာခဲ့သည်ဟု ခန့်မှန်းရသည်။ ဤတွင် ထူးဆန်းသော ရေသတ္တဝါတမျိုးကို စတင်တွေ့ရပါသည်။ တလံကျော်လောက်ရှည်သည့် ငါးကြီး ၂ ကောင်သည် ၂ ကောင် ယှဉ်ပြီးသွားလျက် ယှဉ်ပြီးငုတ်သွားသည်။ ယှဉ်ပြီးပြန်ပေါ်လာသည်။ ပြန်ပေါ်လာသည့်အခါတွင် ပါးစပ်ထဲမှ “ဝူး” ဟု အသံနှင့်အတူ ရေကို မှုတ်ထုတ်ပါသည်။ ဖထီးမန်းက ပြောသည်။

“အဲဒါ လင်းပိုင်(လင်းရှူး) ပဲ။ အဖိုနဲ့အမ ၂ ကောင်တွဲသွားတယ်။ လှေ၊ သင်္ဘောတွေကို သူတို့ ၂ ကောင်က ကျောနဲ့ တွန်းတွန်းပြီး ကမ်းခြေကို ပို့ပေးတယ်။ ဒီ လင်းရှူးတွေရှိရင် ငါးမန်း မရှိဘူး။ သူ မှုတ်ထုတ်လိုက်ရင် တခြားငါး မခံနိုင်ဘူး”

ဖထီးမန်းပြောချက်အရ အန္တရာယ်ပေးသည့် ငါးမျိုးမဟုတ်သည့်အတွက် စိုးရိမ်စိတ်မရှိတော့ပါ။ ကျနော်တို့ လှေမှာလည်း ရွက်တင်ထားပြီးဖြစ်သည့်အတွက် လှော်စရာမလိုတော့ပါ။ ဒါပေမယ့် ပုံမှန်အလုပ်တခုကတော့ အမြဲတမ်းရှိနေပါသည်။ စိမ့်ပြီးထွက်လာသောရေကို နာရီဝက်နီးပါးတကြိမ် အမြဲရေခပ်ထုတ်ရပါသည်။

ရေမှာ ရွက်တိုင်အောက်ခြေ ကြက်ခြေခတ်အောက်မှ စိမ့်ထွက်လာသည့်အတွက် ဖထီးမန်းရော၊ ကျနော်ပါ ကြိုးစားပြီး ပွဲညက်နဲ့ ဖာပါသည်။ ရေစိမ့်ထွက်မှုမှာ ဘာမှ မထူးခြားပါ။ မိုးက ချုပ်စပြုလာပါပြီ။ ဖထီးမန်းက ပြောသည်။

“ကဲ … စိတ်ချရပြီ၊ အင်္ဂလိပ်ရွက်တွေပါ တင်မယ်”

အင်္ဂလိပ်ရွက်ကိုတင်ဖို့ ပြင်ဆင်ပါသည်။ အင်္ဂလိပ်ရွက်မှာ အဖျားချွန်ကို ရွက်တိုင်ပေါ်ဆွဲတင်ပြီးနောက် အောက်နားညီမှ အောက်ဖျားစွန်း ၂ ဖက်ကို ဝါးလုံးတလုံးနှင့် ကန့်လန်ထောက်လိုက်ခြင်းအားဖြင့် လေထုအားကို ရပါတော့သည်။

ဗမာရွက်က ရွက်ကြိုး ၄ ချောင်း၊ အင်္ဂလိပ်ရွက်က ရွက်ကြိုးတချောင်းတည်း ဖြစ်ပါသည်။ ရွက် ၃ ဖုံအားနဲ့ဆိုတော့ လေခိုအားကောင်းပြီး လှေသွားနှုန်းလည်း မြန်လာပါသည်။ အေးအေးလူလူနှင့် စိတ်လက်ပေါ့ပါးလာကြပါသည်။

ကျနော်တို့ ညနေစာစားဖို့ ပြင်ဆင်ပါသည်။ လိပ်သားကျပ်တိုက်ခြောက် တယောက် တတုံး၊ ကန်စွန်းဥ တလုံး၊ သခွားသီးတလုံးစီ ဝေပေးလိုက်ပါသည်။ လိပ်သားကျပ်တိုက်ခြောက်ကို ဝါးလိုက်၊ ကန်စွန်းဥ ကိုက်လိုက်၊ သခွားသီးစားလိုက်နှင့် စားလို့ကောင်းပါသည်။

ပင်လယ်လေကလည်း တသုန်သုန်ဖြူးနေပါသည်။ သခွားသီးစားသည့်အတွက် ရေသောက်စရာ မလိုပါ။ ကျနော်တို့မှာ ရေချို ၅ ပုံး ပါသည်။ ပထမပုံးကို ဖောက်သည်။ ဆေးပုလင်းသွင်းသည့်ပိုက် ဆန့်ရုံအပေါက်ကလေး ဖောက်ပြီး ရေကိုသောက်ကြသည်။ အားလုံးသောက်ပြီး ပိုက်ကိုပြန်ထုတ်၊ အပေါက်ကလေးကို ပြန်ပိတ်လိုက်ပါသည်။

မုန်တိုင်းကို ဆန်ပြီ

ညသည် နည်းနည်းမှောင်လာပါသည်။ ရွက်တိုက်ခြင်းနှင့် တက်မကိုင်ခြင်းကို ဖထီးမန်းပဲ ဦးစီးပါသည်။ လေနှင့် လှိုင်းကြောင့် အလိုက်သင့် ခပ်စောင်းစောင်းလေး လှေဦးကို တည့်ထားလိုက်လျှင် အလိုက်သင့် ဖြစ်သွားပါသည်။ ညနည်းနည်း ပိုမှောင်လာတော့ လေက ပိုပြီးထန်လာသည်ကို သတိထားမိသည်။ လှိုင်းလည်း နည်းနည်း ပိုကြီးလာသည်။

ည ၉ နာရီကျော်လောက်တွင် မိုးကောင်းကင်တခုလုံး မဲမှောင်ပြီး လျှပ်စီးလက် မိုးကြိုးပစ်ပါသည်။ မကြာပါချေ၊ ပင်လယ်တခုလုံး တဝေါဝေါနဲ့ မိုးသက်လေပြင်းကျလာပါတော့သည်။ လှိုင်းခေါင်းဖြူကြီးများလည်း ထကြွလာပါတော့သည်။ လှိုင်းခေါင်းဖြူ ကြီးများမှာ ၁၀ ပေကျော် မြင့်မည်ထင်သည်။

မုန်တိုင်းကျလာပါပြီ။ ရွက်ကြိုးများလည်း တင်းတောင့်နေပြီ။ ဖြုတ်လိုက်လို့ မရတော့ပါ။ လှိုင်းခေါင်းဖြူကြီးများမှာ ကျနော်တို့ လှေကလေးကို ဖုံးအုပ်သွားတော့မလား၊ ဖုံးအုပ်သွားတော့မလား စိုးရိမ်ထိတ်လန့်နေရပါသည်။

လှိုင်းခေါင်းဖြူ ကြီးများကို လှေတစောင်းပေးပြီး ခံပါသည်။ လှိုင်ခေါင်းဖြူကြီးများမှာ လှိုင်းညွန့်ကျိုးပြီး လှေကို လာရိုက်ပါသည်။ လှေဘေးတွင် တွဲထားသော ဝါးဖောင်ကလေးကို လှိုင်းကရိုက်ပြီး ဖောင်အောက်ကို ဝင်သွားပါသည်။ ကျနော်တို့လှေကလေးမှာ လှိုင်းခေါင်းဖြူကြီးများပေါ်တွင် ခုန်ပျံတော့မလောက် ပြေးလွှားနေပါသည်။

ရွက်သုံးဖုံအားကြောင့် လှေပြေးနှုန်းမှာ မာနယ်ပလော သောင်ရင်းမြစ်တကြောတွင် မောင်းနှင်နေကြသော စက်လှေကြီးများ၏ သွားနှုန်းနီးပါရှိမည် ထင်ပါသည်။

ကျနော်တို့လည်း အလွန်စိုးရိမ်ပါသည်။ ညနေမိုးချုပ်စကပင် ကွန်တီတီဖောင်မှ လေ့လာထားသော အတွေ့အကြုံအရ ၁၀ တောင်နီးပါးရှည်သော ဝိုင်ယာကြိုးကို ပုခုံးနှင့် ဂျိုင်းအောက်တွင် စလွယ်သိုင်းချည်ပြီး အစကို လှေဝမ်းတွင် ချည်ထားပါသည်။ ဤကြိုးမှာ အသက်ကယ်ကြိုးဖြစ်ပြီး အမိန့်မရလျှင် လုံးဝ ဖြုတ်ခွင့်မရှိပါ။

ဆက်လက်ဖော်ပြပါမည်။


Friday, May 21, 2010

လိုချင်ပေါင်၊ ဆယ်ပါးတည်း ... နည်းသေးတယ် (ကာတွန်း စောငို)

ခွပ်ဒေါင်းအလံတော်အောက်မှ သွေးစည်းကြစို့

တောင်ပေါ်က ရေပဲ သောက် သောက်
တောင်အောက်က ရေပဲ သောက် သောက်
အဓိက လူသားဆန်တဲ့ ကိုယ်ချင်းစာ စိတ်ကလေးရှိဖို့ …

တောင်ပေါ်က ဆန်ပဲ စား စား
တောင်အောက်က ဆန်ပဲ စား စား
အဓိက … လူ့ကျင့်ဝတ်သိက္ခာ ထိန်းသိမ်း
ကိုယ့်လိပ်ပြာ ကိုယ်လုံဖို့ …

တောင်ပေါ်က အဝတ်ပဲ ဝတ် ဝတ်
တောင်အောက်က အဝတ်ပဲ ဝတ် ဝတ်
အဓိက … လူသားအချင်းချင်း
ဝံသာနု ရက္ခိတ တရားရှိဖို့ …

ကျနော်တို့အားလုံး တမိုးအောက်မှာ
တမြေထဲနေ တရေထဲသောက်
တသွေးတည်း တသားတည်း
တစိတ်တည်း တဝမ်းတည်း
တရောင်ထဲ ခြယ် တနွယ်ထဲ ဖွား
သွေးသားရင်းတူ တအူထုံ့ဆင်း
ဆွေမျိုးရင်းခြာ ချစ်ကြည်စွာလက်တွဲ
အမိမြေကို စောင့်ရှောက်
အမိနိုင်ငံကို တည်ဆောက်
ညီညွတ်ရေး လမ်းကို ဖောက်
သွေးသောက်ရဲဘော်ချင်း
ပြည်ထောင်စု ‘မူ’ ကို ကိုင်စွဲ
ငြိမ်းချမ်းစွာ လက်တွဲ လမ်းလျှောက်
ဒီမိုကရေစီ ပန်းတိုင်ရောက်ဖို့ အဓိက မျှော်မှန်းချက် …

“ဗမာက တမျိုး ကရင်က တဖုံ ရှမ်း ကချင် ချင်းတို့က တခြား၊ အကွဲကွဲအပြားပြား လုပ်နေကြရင် အကျိုးရှိမှာ မဟုတ်ပါဘူး၊ စုပေါင်းလုပ်ကြမှ အကျိုးရှိမယ်”

(ပင်လုံမြို့ စော်ဘွားများ ထမင်းစားပွဲတွင် ၁၁-၂-၁၉၄၇)

ဗိုလ်ချုပ်အောင်ဆန်းရဲ့ စကား
လေးစားရိုသေကြမယ်ဆိုရင် …

ဗိုလ်ချုပ်အောင်ဆန်းရဲ့ တရား
အားကိုး ယုံကြည်ကြမယ်ဆိုရင် …

ဗိုလ်ချုပ်အောင်ဆန်းရဲ့ ကျေးဇူး
ဆပ်ဖူးချင်ကြမယ်ဆိုရင် …

ကျနော်တို့အားလုံး အပြုံးမျက်နှာ
မေတ္တာမျက်ဝန်း နှုတ်ခမ်းသကာ
ပျူငှာချိုမြ အလှရွှန်းစို
တယောက်ကို တယောက်ဖက်
တယောက်လက် တယောက်ဆွဲ
အသည်းနှလုံးချင် ဖလှယ်
ငါ ဆိုတဲ့ အတ္တကို ဖယ်ခွာ
အာဃာတတွေ စွန့်ပစ်
အနာဂတ်လမ်းသစ်ကို မျှော်ကြည့်
ကမ္ဘာ့မိသားစုအရေးမှ … မြန်မာ့မိသားစုအရေးသို့
ငါတို့သွေးနဲ့ ညှိနှိုင်း ပန်းတိုင်းပွင့်ပါစေ
ပွင်သောပန်းတိုင်း မွှေးပါစေ
တို့မြေ တို့ရေ အေးချမ်းမှု အမွေ
တို့တွေ ပေးဆပ်ရမယ်လေ …

အမှောင်ထဲက … အလင်းတခေတ်
ဝင်းပြက်ထွန်းဖို့ရာ
စည်လုံးခြင်းသည် အား
ညီညွတ်ခြင်းသည် အား
တောင်ပေါ် မြေပြန့် မခွဲခြား
ပင်လုံစိတ်ဓာတ် အခြေခံထား
ငါတို့ ခြေလက်တွေ ဆန့်တန်းထား
ငါတို့ မျက်စေ့တွေ ဖွင့်လို့ထား
ငါတို့ စိတ်ဓာတ်တွေ နိုးကြားထား

အနာဂတ် မြန်မာနိုင်ငံအတွက် … ခွပ်ဒေါင်းအလံတော်အောက်မှာ
ရဲရဲတောက် သတ္တိတွေ မွေး၊ အရေးကြီးရင်ဖြင့် သွေးနီးရာဆိုသည့်အတိုင်း
ကိုင်း ထထ ကြွကြွနဲ့ ဝိုင်းကြပေးရော့ … အဖိုးမှိုင်းရဲ့စကား
ငါတို့ နှလုံးသားတွေထဲမှာ ခွန်အားသစ်တွေ ထုဆစ်
ပြည်သူချစ်တဲ့ … ရဲရဲတောက် တို့မြန်မာ သတ္တိခဲတွေ
သွေးစည်းကြဖို့ ချိန်တန်ပြီ။
အာဏာရှင်စံနစ် တိုက်ဖျက်ရမည်။ ။

ဖျာပုံနီလုံဦး

အမျိုးသားဒီမိုကရေစီအဖွဲ့ချုပ် နွေဦးအိုးဝေ နံရံကပ် စာစောင် မှ …

သရုပ်ဖော် - အောင်ထက်


Thursday, May 20, 2010

မုန်တိုင်းကိုဆန်၍ ပင်လယ်ကိုဖြတ်သောအခါ (၃၇)

အချိန်မှာ ည ၁၀ နာရီကျော်လောက်ရှိမည် ထင်ပါသည်။ ရေအကျနှင့်မှန်း၍ ထွက်ခဲ့ခြင်းဖြစ်သည်။ ဖထီးမန်းက ထိုးဝါးနှင့် ထိုးထွက်ခိုင်းသည်။ သူကိုယ်တိုင်က ပဲ့ကိုင်နေသည်။ ဆရာဦးအောင်ငွေက အသက်ကယ်အဖြစ် အသုံးပြုမည့် ၁၅ တောင်ခန့်ရှိ ဝါးလုံးခြောက်နှင့် လှေကိုကမ်းမှထွက်နိုင်အောင် ထိုးထွက်နေသည်။

ဆရာဦးအောင်ငွေ လှေထိုးတာ သူ ထိုးသည့် ဝါးလုံးမှာ ရေအောက် ကျောက်သားခံထိ မရောက်ဘဲ ဝါးလုံးမှာ ပြန်ပြန်ပြီး ကန်တက်နေခြင်းဖြစ်သည်။ ကျနော်လှေပေါ် ခုန်တက်လိုက်ပြီး နေသားတကျဖြစ်တော့မှ ထရပ်လိုက်သည်။

“ဟောသလို ထိုးရတယ်၊ ဟောသလို ထိုးရတယ် …”

ပါးစပ်က ပြောပြောဆိုဆို သူ့လက်ထဲမှ ဝါးလုံးကိုယူပြီး ရေထဲသို့ အရှိန်နှင့် တအားထိုးချလိုက်ပါသည်။ ရေအောက် ကျောက်သားလွှာကိုထိပြီး လှေကို ထိုးထွက်လိုက်ပါသည်။ ကျနော် လှေကို ထိုးထွက်ရင်း ထိုးထွက်ရင်းနှင့် ဝါးလုံးမှာ ရေကို မမီတော့ပါ။

ဖထီးမန်းက ခပ်ကွင်းကိုပြင်ပြီး လှေတက်ကို တပ်ပါသည်။ ကျနော်နှင့် ဦးအောင်ငွေကလည်း လှေကို လှော်ထုတ်လျှက် ဖထီးမန်းက ပဲ့ကိုင်ပါသည်။ လှေဦးကို တည့်ထားသည့်လမ်းကြောင်းမှာ အရှေ့တောင်ဘက်စူးစူးသို့ လှေကို ဦးတည်၍ ထွက်မည်။ ဒါမှသာလျှင် မြောက်ဘက်တွင် ရန်သူရေတပ်စခန်း ရှိနေ၍ ၎င်းနှင့်ပို၍ဝေးမည်။ တရက်ခန့် အရှေ့တောင်ဘက် ထိုးထွက်ပြီးနောက်တွင်မှ နဂိုရည်မှန်းထားသော မူလလမ်းကြောင်း အနောက်တောင်ဘက် လှေဦး ပြန်လှည့်မည်။

လှေကို ကျနော်နဲ့ ဦးအောင်ငွေက လှော်ခပ်ကာ ဖထီးမန်းအောင်ကြည်က ပဲ့ကိုင်ပြီး တရွေ့ရွေ့ထွက်လာပါသည်။ ဂျယ်ရီ ကျွန်းလည်းလွန်ရော လှိုင်းနှင့်စတိုးပါ တော့သည်။ စထွက်တုန်းက ကျွန်းရိပ်ကိုခိုပြီး ထွက်လာတာဆိုတော့ ကျွန်းကခံနေသည့်အတွက် လေကွယ်နေပါသည်။ ကျွန်းလွန်သည်နှင့် တပြိုင်နက် လှိုင်းနှင့်စတိုးခြင်းဖြစ်ပါသည်။

လှိုင်းမှာအတော်လေး ကြီးတန်သလောက် ကြီးပါသည်။ ပထမဦးဆုံး လှိုင်းနှင့်စတိုးဖြစ်သည့်အတွက် လှိုင်းအပေါ် လှေက မြောက်သွားလိုက်၊ လှိုင်းပြန်ကျလာလျှင် လှေက ပြန်ကျလိုက်နဲ့ ရင်ထဲမှာ လှိုက်ခနဲ အေးခနဲဖြစ်ပြီး လူက မူးပါတော့သည်။ လှိုင်းမူးသည်မှာ အတော်ခံရခက်ပါသည်။ ရှိသမျှအားတွေ ဆွဲချသလို ခံစားရပြီး လူမှာ နုံးချည့်ပျော့ခွေသွားပါသည်။ အတော်လေးကြာတော့ ပျို့အန်ချင်လာပါသည်။

ဖထီးမန်းက လှမ်းပြောသည်။

“စိတ်ကိုတင်းထား၊ စိတ်လျှော့ထားရင် ပိုပြီးအန်ချင်တယ်”

တဆက်တည်း သူက လှမ်းပြောလိုက်သည်။

“သီချင်းဆိုမယ်၊ သီချင်းဆိုမယ် …”

“တော်လှန်ရေးလမ်းအတိုင်း ရှေ့သို့ချီ သီချင်းဆိုမယ်”

သုံးယောက်သား သီချင်းကို သံပြိုင်ဟစ်၍ ဆိုလိုက်ပါသည်။

သီချင်းကိုဆိုလိုက်တော့ စိတ်ဓာတ် အတော်တက်ကြွလာပါသည်။ လှိုင်းနှင့်တိုးတာ အတော်ကြာသွားပြီဖြစ်သည့်အတွက် လှိုင်းမူးတာလည်း သက်သာသွားပါသည်။

ပင်လယ်ဒီရေအကျ ဆွဲအားကြောင့် ကျနော်တို့ ခပ်မှန်မှန် လှေလှော်ပြီး ထွက်လာကြပါသည်။ လပြည့်ကျော် ၁ ရက်နေ့လ၏ လင်းနေသောအောက်တွင် ကျွန်းရိပ်မဲမဲကို လှမ်းပြီးမြင်နေရသည်။ ကျနော်တို့လှေမှာ လူ ၃ ယောက်နှင့် ရိက္ခာများတင်ထားသည့်တိုင် လှေမှာ အတော်ကြီးကို ပေါ်နေပါသေးသည်။ နောက်ထပ် လူ ၂ ယောက် အေးအေးဆေးဆေး တင်၍ရပါသေးသည်။

ကျနော်တို့ထွက်လာပြီး ၂ နာရီနီးပါးခန့်အကြာတွင် လှေဝမ်းထဲတွင် ရေအတော်ဝင်နေ၍ ခပ်ပြီး ထုတ်ရပါသည်။ ရေဝင်သည့်နေရာကို အပိုဆောင်လာသော ပွဲညက်နှင့် ထပ်၍ဖာပါသည်။ ရေအဝင်နည်းသွားပြီး နည်းနည်း စိမ့်ဝင်နေပါသေးသည်။ နာရီဝက်နီးပါးတကြိမ်လောက် မန်းဝင်းမြင့် လုပ်ပေးလိုက်သည့် ရေဆွဲပုံးဖြင့် လှေဝမ်းထဲမှရေကို မှန်မှန် ခပ်ထုတ်ပေးနေရပါသည်။

ကျနော်တို့လှေမှာ လှေဦးနှင့် လှေပဲ့တွင် အံဖုံးလုပ်ထားပါသည်။ အကယ်၍ လှိုင်းရိုက်သည့်တိုင်အောင် ရေလျှံပြီး ကျသွားစေရန် ဖြစ်သည်။

တညလုံး ရေအကျနှင့် မျှောပြီးလိုက်လာလိုက်တာ မနက်လင်းလာပါသည်။ ကျနော်လှမ်းကြည့်လိုက်ရာ ကိုကိုးကျွန်းမကြီးကိုလည်း မြင်နေရသည်။ ကိုကိုကျွန်းကလေးကိုလည်း လှမ်းပြီးမြင်နေရပါသည်။ ကျွန်း ၂ ကျွန်း၏ တောင်ဘက်ဖျားအဆုံး တွင် ကျနော်တို့လှေမှာ တြိဂံထိပ်ဖျားသဘောမျိုးနေရာတွင် ရောက်နေပါသည်။ ကျနော်က လှမ်းပြောသည်။

“ဖထီးမန်း တညလုံး ကျနော်တို့ထွက်လာလိုက်တာ ဘယ်မှမရောက်သေးဘူး။ ကျွန်း ၂ ကျွန်းရဲ့ထိပ်ဖျားမှာပဲ ရှိနေသေးတယ်”

ကျနော်ပြောသည်ကို သူတို့ ၂ ယောက် မယုံကြ၊ လက်မခံကြပါ။

ရေကလည်း ပြန်တက်လာပါပြီ။ သူတို့ ၂ ယောက်ပြောတာက တခြားတနေရာကို အတော်လေးရောက်လာတာ၊ အခုမြင်နေရတာက အခြားကျွန်းတခုဖြစ်မယ်၊ သူတို့ ၂ ယောက်အမြင်က တခု၊ ကျနော်တယောက်တည်း အမြင်ကတခု ငြင်းကြ ပြောကြသေးသည်။ နှစ်ယောက် တယောက်ဆိုတော့ ကျနော် ဆက်မငြင်းတော့ပါ။ ကျနော် တိတ်တိတ်နေလိုက်သည်။ ရေအတက်နဲ့ လှေကလည်း မျောပြီးလိုက်လာတာ ကျွန်းဘက်ကို အတော်လေးလည်း နီးလာပါပြီ။ ကျနော် ထပ်ပြောသေးတယ်။

“ဖထီးမန်း အခု ကျနော်တို့လှမ်းမြင်နေရတာက ကိုကိုးကျွန်းရဲ့ အနောက်ဘက်ကမ်းခြေပဲ၊ ဟောဟိုက မြင်နေရတဲ့ ပြောင်ပြောင်ဟာ ဂျပန်တောင်ပြောင်နေရာပေါ့၊ ကျနော်တို့ ကျွန်းပေါ်စတက်ခဲ့တဲ့နေရာပဲ”

ဂျပန်တောင်ပြောင်မှာ ဒုတိယ ကမ္ဘာစစ်အတွင်းက ဂျပန်များနေရာယူခဲ့သည်။ ဤတောင်ထိပ်မှ အိန္ဒိယ သမုဒ္ဒရာကိုလှမ်းကြည့်လိုက်လျှင် မြင်ကွင်းကောင်းပြီး အချက်အချာကျသည်။ တောင်မှာ လေတိုက်လွန်း၍ ဆားငန်ငွေ့ရိုက်ပြီး အခြားအပင်များ မပေါက်ပါ။ မြက်ပင်များသာပေါက်သည့်အတွက် ဂျပန်တောင်ပြောင်ဟု ကျနော်တို့က အမည်ပေးထားသည်။

လှေသည် ရေအတက်နှင့် ကျွန်းအရှေ့ဘက်သို့ တရွေ့တရွေ့ လွန်လာပါပြီ။ ကျွန်း၏တောင်ဖျားစွန်းကိုလွန်၍ အရှေ့ဘက် ကမ်းခြေကို ဖြတ်လိုက်ရတော့မှ သူတို့အံအားသင့်ကုန်ကြပါတော့သည်။ အရှေ့ဘက်ကမ်း၊ ကျနော်တို့နေခဲ့သည့် အကျဉ်းစခန်းရှေ့တွင် ထိုးဆိုက်ထားသော အိုနာဆစ်သင်္ဘောကို ထင်ထင်ရှားရှား မြင်လိုက်ရပါသည်။ သူတို့ ၂ ယောက်လည်း တအားလည်း စိုးရိမ်နေပါသည်။ ကျနော်လည်း စိုးရိမ်နေပါသည်။

ဆက်လက်ဖော်ပြပါမည်။


NLD ခေါင်းဆောင် သခင်စိုးမြင့် ကွယ်လွန်

NLD အမျိုးသားဒီမိုကရေစီအဖွဲ့ချုပ်ရဲ့ ရန်ကုန်တိုင်း ဥက္ကဋ္ဌအဖြစ်ရော၊ ဗဟိုကော်မတီဝင်တယောက်အနေနဲ့ပါ တာဝန်ယူခဲ့သူ ဝါရင့်နိုင်ငံရေးသမားကြီး သခင်စိုးမြင့်ဟာ ဒီကနေ့ နေ့လည်ကပဲ ရန်ကုန်မြို့က သူ့ရဲ့နေအိမ်မှာ ကွယ်လွန်သွားခဲ့ပါတယ်။

အသက် ၈၇ နှစ်အရွယ် သခင်စိုးမြင့်ဟာ မနေ့ကအထိ အပြင်ထွက် လှုပ်ရှားသွားလာနေခဲ့တာဖြစ်ပြီး ဒီကနေ့ နေ့လည် ကုလားထိုင်ပေါ်မှာ ထိုင်နေရင်းသေဆုံးနေတာကို နေ့လည်တနာခွဲကမှ တွေ့မြင်သိခဲ့တာလို့ မိသားစုက ပြောပါတယ်။

အသက် ၁၆ နှစ်အရွယ်ကတည်းက မြောင်းမြမြို့ ဒို့ဗမာအစည်းအရုံးမှာ အစောဆုံး သခင်အဖွဲ့ဝင်အဖြစ် နိုင်ငံရေးလောကထဲမှာပါဝင်ခဲ့ပြီး နောက်ပိုင်း မြေအောက် လှုပ်ရှားမှုတွေမှာ ပါဝင်ခဲ့သလို ဆိုရှယ်လစ်ခေတ်၊ ၁၉၈၈ ဒီမိုကရေစီ အရေးတော်ပုံကာလကနေ ဒီကနေ့ ကွယ်လွန်ချိန်အထိ ခေတ်အဆက်ဆက်မှာ သူယုံကြည်တဲ့ နိုင်ငံရေးခံယူချက်အတိုင်း လုပ်ဆောင်သွားခဲ့တယ်လို့ သူ့ရဲ့ နိုင်ငံရေး လုပ်ဖော်ကိုင်ဖက်တွေ၊ သိကျွမ်းခဲ့ဖူးသူတွေက ပြောပါတယ်။

သခင်စိုးမြင့်နဲ့ မိသားစုလိုရင်းနှီးပြီး သူ့ရဲ့နိုင်ငံရေးလုပ်ဆောင်မှုတွေကို လေ့လာနေတဲ့ ရှေ့နေဦးသော်လင်းက သခင်စိုးမြင့်ရဲ့နိုင်ငံရေး ဆောင်ရွက်မှုတွေအကြောင်း အခုလို ပြောပါတယ်။

“လွတ်လပ်ရေးရပြီးနောက်ပိုင်းမှာ ဆိုရှယ်လစ်ပါတီမှာ ထိပ်ပိုင်း ခေါင်းဆောင်အနေနဲ့ ဝင်ဆောင်ရွက်တယ်။ သခင်စိုးမြင့်ရဲ့ အနစ်နာခံတဲ့အပိုင်း ပြောရမယ်ဆိုလို့ရှိရင် တိုင်းပြုပြည်ပြုလွှတ်တော် လုပ်တဲ့အခါမှာ သခင်စိုးမြင့်က အမတ်အနေနဲ့ အရွေးခံဖို့က ပြင်ပြီးသားခင်ဗျ၊ နောက်ကျတော့ သူက နိုင်ငံရေး ဇောက်ချလုပ်မယ်ဆိုပြီးတော့ အမတ်ကနေ ထွက်ပြီးတော့ ဆိုရှယ်လစ်ပါတီမှာ ပါတီတာဝန်ယူပြီးတော့ အဲလို လုပ်တယ်။ တောက်လျှောက်။

နောက် ဆိုရှယ်လစ်ပါတီ သခင်လွင်တို့၊ ဝိဓူရ သခင်ချစ်မောင်တို့ ခွဲထွက်ပြီးထောင်တဲ့အခါမှာ သူ ဒီဘက် ပါသွားတယ်ပေါ့လေ၊ ဦးကျော်ငြိမ်းတို့၊ ဘာတို့ အာဏာ ရနေတဲ့ဘက်မှာမလုပ်ဘဲနဲ့ သူ ဒီဘက်ကို ထွက်တယ်၊ နောက်ပိုင်းမှာတော့ ကျနော်မှတ်မိသလောက် ၅၄-၅၅ လောက်မှာတော့ နိုင်ငံရေးကို နားလိုက်တယ်ပေါ့နော်၊ ၈၈ အရေးအခင်းကာလမှာ သူပြန်ပြီးတော့ နိုင်ငံရေးဆောင်ရွက်ချက်တွေ လုပ်တယ်။ ပထမတော့ သူ သခင်ချစ်မောင်တို့ ပါတီမှာ ဝင်ဆောင်ရွက်တယ်။ CEC အနေနဲ့။ နောက်ကျတော့ NLD ကို ရောက်ပြီး NLD, CEC အနေနဲ့ တောက်လျှောက်ပေါ့လေ။ ဘဝတလျှောက်လုံးမှာ ကိုယ်ကျိုးရှာခဲ့တယ်ဆိုတာ မရှိဘူး”

NLD, CEC အဖြစ် နိုင်ငံရေးတာဝန်တွေထမ်းဆောင်ခဲ့သူ သခင်စိုးမြင့်ဟာ မနေ့ကအထိလည်း နိုင်ငံရေးကိစ္စတွေကို ဆွေးနွေးပြောဆိုခဲ့သေးတယ်လို့ NLD ပြောရေးဆိုခွင့်ရှိသူ ဦးဉာဏ်ဝင်းက ပြောပါတယ်။

“မနေ့က သူ ရုံးကိုလာတယ် (ရွှေဂုံတိုင်)။ ဒီနေ့ညနေပိုင်းကျတော့ အခု သတင်းကြားလို့ အဲဒီကို သွားနေတာ။ မနေ့တုန်းက ရုံးကိုလာတော့ ဦးစိုးမြင့်နဲ့ကျနော် တနာရီလောက်ကြာအောင် စကားပြောဖြစ်တယ်။ နိုင်ငံရေးကိစ္စတွေရော၊ ဘာတွေရောပေါ့၊ ဦးစိုးမြင့်နဲ့ပတ်သက်ပြီးတော့ ကျနော်ပြောနိုင်တာက သူဟာ တော်လှန်ရေးထဲက တောက်လျှောက် ပါလာတဲ့ နိုင်ငံရေးသမားတယောက်ပါ။ နိုင်ငံရေး ဝါရင့်ပုဂ္ဂိုလ်တဦးပေါ့နော်။ သူဟာ နောက်ဆုံးကွယ်လွန်တဲ့အချိန်အထိကို NLD အဖွဲ့ဝင်ထုနဲ့ရော၊ NLD ခေါင်းဆောင်ပိုင်းနဲ့ရော တသားတည်းရပ်တည်သွားတဲ့ ပုဂ္ဂိုလ်တဦးလို့ ပြောရင်ရပါတယ်”

ဟုတ်ကဲ့၊ မနေ့ကအထိ သခင်စိုးမြင့်နဲ့ တွေ့ခဲ့ရတယ်ဆိုတော့ အခုလက်ရှိ မြန်မာ့မျက်မှောက်နိုင်ငံရေးနဲ့ ပတ်သက်ပြီးတော့ကော သခင်စိုးမြင့်အနေနဲ့ ဘယ်လိုယူဆတယ်ဆိုတာကို သိပါသလား။

“အဓိကပြောရရင် သခင်စိုးမြင့်ရဲ့အယူအဆက နိုင်ငံရေးဆိုတာ တွက်တဲ့အတိုင်း ဖြစ်ချင်မှဖြစ်တယ်၊ သို့သော် နိုင်ငံရေးသမားဟာ လုပ်နေဖို့တော့ လိုတယ်။ အဲ့တော့ အခုဆုံးဖြတ်ချက်နဲ့ပတ်သက်ပြီးတော့လည်း သူက အပြည့်အဝ ထောက်ခံတဲ့ ပုဂ္ဂိုလ်တဦးပါ။ မနေ့ကပြောဖြစ်တာကတော့ အဲဒီအကြောင်းတွေ ပြောဖြစ်တာပေါ့ဗျာ”

ဦးဉာဏ်ဝင်းပါရှင်။ သခင်စိုးမြင့်ရဲ့ဈာပနကိုတော့ လာမယ့် စနေနေ့မှာ ရေဝေး သုဿန်မှာ ပြုလုပ်မှာဖြစ်ပါတယ်။

(၂၀၁၀ ပြည့်နှစ်၊ မေလ ၂၀ ရက်နေ့ ဘီဘီစီမြန်မာပိုင်း အစီအစဉ်မှ ကောက်နုတ်ဖော်ပြပါတယ်)


ဦးစိုးမြင့် (ခ) သခင်စိုးမြင့် ၏ ကိုယ်ရေးအကျဉ်း


တောင်ဥက္ကလာပမြို့နယ် မဲဆန္ဒနယ် အမှတ် ၁ မှ အမျိုးသားဒီမိုကရေစီအဖွဲ့ချုပ် ပြည်သူ့လွှတ်တော် ကိုယ်စားလှယ် ဖြစ်သည်။

၁၉၂၃ ခုနှစ် သြဂုတ်လ ၁၆ ရက်နေ့တွင် မွေးဖွားသည်။ အဖ ဦးရှိန်ဖြစ်သည်။ မြောင်းမြမြို့၌ အင်္ဂလိပ်-မြန်မာ ၆ တန်းအထိ ပညာသင်ကြားခဲ့သည်။ မြောင်းမြမြို့နယ် ဒို့ဗမာအစည်းအရုံး အတွင်းရေးမှူး၊ နယ်ချဲ့နှင့် ဖက်ဆစ် တော်လှန်ရေး မြေအောက်ခေါင်းဆောင်၊ ဗမာ့ကာကွယ်ရေးတပ်မတော် - BDA တပ်ရင်းမှူး၊ ပုသိမ်ခရိုင် မြစ်ဝကျွန်းပေါ် တိုင်းစစ်ကော်မတီဝင်၊ ပြည်သူ့ အရေးတော်ပုံပါတီ တည်ထောင်ရာ၌ ပါဝင်ခဲ့ပြီး ဆိုရှယ်လစ်ပါတီ ၌ မြောင်းမြခရိုင် ဥက္ကဋ္ဌနှင့် ဗဟိုဦးစီးအဖွဲ့ဝင် ဖြစ်ခဲ့သည်။ ဖဆပလ ဗဟိုဦးစီးအဖွဲ့ဝင်၊ ဗတလစ ဗဟို အလုပ်အမှုဆောင်အဖွဲ့ဝင်၊ ဆိုရှယ်နီ ဗဟိုကော်မတီဝင်၊ ပြည်သူ့လူငယ်အဖွဲ့ချုပ် ဒုတိယဥက္ကဋ္ဌ၊ ၁၉၅၃ ခုနှစ် ဗီယင်နာ ကမ္ဘာ့လူငယ်ညီလာခံ ကိုယ်စားလှယ်ဖြစ်ပြီး လွတ်လပ်ရေးမော်ကွန်းဝင် ပထမအဆင့် ရခဲ့သည်။

အယ်ဒီတာ၊ စာပြု၊ ၁၇ လိုင်း အုပ်ချုပ်ရေးမှူး စသဖြင့် ဘဝများစွာ ကျင်လည်ခဲ့သည်။

အမျိုးသား ဒီမိုကရေစီအဖွဲ့ချုပ်၊ ဗဟိုအလုပ်အမှုဆောင်၊ ဗဟိုလယ်သမားများအဖွဲ့ ခေါင်းဆောင်၊ ရန်ကုန်တိုင်း စည်းရုံးရေးကော်မတီ ဥက္ကဋ္ဌ တာဝန်ယူခဲ့သည်။

အမျိုးသားဒီမိုကရေစီအဖွဲ့ချုပ်၏ ဂန္ဓီခန်းမ ဆုံးဖြတ်ချက်အတိုင်း နဝတ က လွှတ်တော်ခေါ်ယူခွင့်မပေးလျှင် လုပ်ဆောင်သင့်သည့် နည်းလမ်းသုံးသွယ် စာတမ်းကို ရေးသားပြုစုရာတွင် ပါဝင်ခဲ့သဖြင့် ခေတ္တ ဖမ်းဆီး ထိန်းသိမ်းခံခဲ့ရသည်။ ၁၉၉၁ ခုနှစ် မတ်လ ၂၆ ရက်နေ့တွင် ပြန်လည်ဖွဲ့စည်းသည့် ဗဟိုအလုပ်အမှုဆောင်အဖွဲ့၌ အဖွဲ့ဝင်အဖြစ် တိုးမြှင့် တာဝန်ပေးအပ်ခံခဲ့ရသည်။ ၁၉၉၈ ခုနှစ် စက်တင်္ဘာ ၁၆ ရက်နေ့တွင် ဖွဲ့စည်းခဲ့သည့် ပြည်သူ့လွှတ်တော် ကိုယ်စားပြုကော်မတီ၌ အဖွဲ့ဝင်ဖြစ်လာခဲ့သည်။ ၂ဝဝ၃ ခုနှစ် မေလ ၃ဝ ရက်နေ့တွင် ဖြစ်ပွားသော ဒီပဲယင်း သွေးချောင်းစီး လုပ်ကြံမှုကြီးဖြစ်ပွားစဉ် နေအိမ်အကျယ်ချုပ်ဖြင့် ထိန်းသိမ်းခံခဲ့ရာမှ ၂ဝဝ၃ ခုနှစ်၊ နိုဝင်္ဘာ ၂၃ ရက်နေ့တွင် ပြန်လွတ်သည်။

ဇနီးမှာ ဒေါ်အေးကြွယ်ဖြစ်ပြီး သားသမီးများမှာ ဒေါ်ဆွေဆွေမြင့်၊ ဦးမောင်မောင်မြင့်၊ ဒေါ်သစ်သစ်မြင့်၊ ဒေါ်ချိုချိုမြင့်နှင့် ဒေါ်သင်းသင်းမြင့်တို့ ဖြစ်ကြသည်။

Wednesday, May 19, 2010

တွင်းတူးပြီးတော့ မိုက်တဲ့သူ (ကာတွန်း စောငို)

ကျနော်တို့ခေတ်မှာ ပြူစောထီး၊ ဒီခေတ်မှာ စွမ်းအားရှင် (နိဂုံးပိုင်း)

(၃)

ဒီအချိန်မှာ ‘လူထု’ သတင်းထောက် ကိုထွန်းအောင်တယောက် ဓာတ်ပုံတွေ တပုံပြီးတပုံ လှည့်ရိုက်နေပါတယ်။ ဒါကို တွေ့သွားတော့ ပြူစောထီးလူဆိုးတွေက ဝိုင်းလုပါတယ်။ သူက မပေး … လှည့်ပတ်ထွက်ပြေးတယ်။ သူ့ကိုမိသွားတော့ ဘေးနားမှာရှိတဲ့ကိုကျော်ထွေးလက်ထဲ ကင်မရာ ထိုးထည့်ပေးပြီး …

“ပြေး … ပြေး လွတ်အောင်ပြေး” လို့ အော်ပါတယ်။

ဒီနေရာမှာ ပုံပေါ်အောင် ကိုကျော်ထွေးကြီးအကြောင်း ဖော်ပြချင်ပါတယ်။

အရပ်က ၅ ပေ၊ ၁၁ လက်မခန့် ဗလတောင့်တောင့် အသားညိုညို နှုတ်ခမ်းထူထူ ပြက်ပြက်ထင်ထင် ရုပ်ရည်မျိုး ဖြစ်တယ်။ ကြီးကြီးမားမား ထွားထွားကျိုင်းကျိုင်းကြီးပါ။

“ရှေးခေတ် ဗမာကြီးတွေဟာ ခင်ဗျား ရုပ်ရည် ခင်ဗျား အဆက်အပေါက်မျိုးပဲဗျ၊ ဗန္ဓုလသံချပ်ကာအင်္ကျီ ခင်ဗျားကို စွပ်ပေးလိုက်ရင် အံကျနေမှာပဲ။ နောက်ပြီး ခင်ဗျားက လူနဲ့သိပ်တူတာပဲ။ ကျနော်သာ ရိုဒင်လို ပန်းပုဆရာဖြစ်ရင် ခင်ဗျားကို မော်ဒယ်နေရာမှာထားပြီး ကမ္ဘာကျော်သွားအောင် ထုဆစ်မယ်”

… လို့ ကဗျာဆရာကြည်အောင်က စရန်သတ်ထားသူ ဖြစ်တယ်။

ကျနော်တို့ကတော့ ခံလိုက်ရရင် သူချည်းပဲဖြစ်ဖြစ်နေတာနဲ့ ‘ကံဆိုးသူ မောင်ရှင်’ လို့ နာမည်ပေးထားပါတယ်။ ခုလည်း သဲထဲမှာ လွတ်အောင်မပြေးနိုင်ပါ။ ဝိုင်းမိ ချုပ်မိသွားပါတယ်။ ဝိုင်းကူဆွဲထုတ်ကြပေမယ့် မအောင်မြင်ပါ။ ဒါပေမယ့် သူ့လက်ထဲက ကင်မရာကို ဘယ်သူမှ ရအောင်မလုနိုင်။ လက်ကို မဖြေနိုင်ဖြစ်နေကြပါတယ်။ နောက်ဆုံးတော့ ဉာဏ်ကြီးရှင် ပြူစောထီးတယောက်က ပြောလိုက်တယ်။

“ဒီကောင်ကြီးကို ကလိထိုးကြကွာ” … တဲ့။

ရှေးခေတ် ဗမာကြီး မခံနိုင်တော့ပါ။ တဟီးဟီး တဟားဟားနဲ့ ကင်မရာ ပါသွားပါတော့တယ်။

ဒီဘက်မှာလည်း လောက်စပီကာ ဟွန်းကြီးတွေထဲ သဲတွေအပြည့်လောင်းထားပြီမို့ တရားဟောနေတဲ့သူတွေ အလွတ်အော်ပြီး ဟောနေရပါတယ်။ အသံနာ အသံဝင် ဖြစ်ကုန်ခဲ့ကြပြီ။ ဟောသူလည်း ဝလောက်ပြီ။ ထုကြ နှက်ကြသူတွေလည်း အားရလောက်ပါပြီ။ ဦးမောင်ကိုကလည်း ‘ဆုတ်မိန့်’ ပေးလိုက်ပြီမို့ ကျနော်တို့က သဲတွေခပ်ထုတ်ကာ ကားတွေ တွန်းထုတ်လုပ်ကြရပါတယ်။

တပ်ဆုတ်တာ တွေ့ရတော့ ရွာသူ ရွာသား တချို့က လက်ခုပ်လက်ဝါးတီးပြီး လှောင်ကြ ပြောင်ကြပါတယ်။ အများစုက ခိုင်းလို့လုပ်နေကြရတာပါ။ စိတ်ပါလက်ပါ မရှိကြ။ ရင်ဆိုင်မှုကလည်း ညှိုးသူရန်ဘက်ပုံသဏ္ဍာန် မဆောင်။ သင်္ကြန်ပွဲသာသာ ဖြတ်သန်းလိုက်ကြရတာပါ။ အားမရသေးတဲ့လူတွေက ကားတွေ တွန်းထုတ်နေတဲ့ ကျနော်တို့ ဂုတ် (ကုပ်)ပေါ်ကို သဲပူတွေ လောင်းပေးပါတယ်။

အသဲထိတ်စရာ ကိစ္စတခု ပေါ်ခဲ့တာတော့ရှိတယ်။ ဘယ်သူက အမိန့်ပေးလိုက်တယ် မသိရ။ အမူးသမား ပြူစောထီးတစု ဦးမောင်ကိုဆီ ဝိုင်းလာခဲ့ကြတယ်။ လက်ထဲမှာတော့ ဘာလက်နက်မှ မတွေ့ရ။ ဒါပေမယ့် မျက်နှာထားတွေက သိပ်မကောင်းလှ။ ဆရာ ဦးမောင်ကိုကလည်း လျင်ပါတယ်။ အိတ်ထဲက ပစ္စတိုကို ဆွဲထုတ်ထိုးချိန်လိုက်ပြီး …

“သေချင်တဲ့ကောင် လာခဲ့ …”

လို့ စိန်ခေါ်လိုက်ပါတယ်။ ကျနော်တို့က ဆရာ့ကိုဝိုင်းပြီး အကာအကွယ်ပေးခဲ့ကြတယ်။ ပြူစောထီးတွေ ‘ရှဲ’ခနဲ ဖြစ်ပြီး နောက်ဆုတ်သွားကြပါတယ်။

ဆရာ့ကားကို အလျင်ထွက်စေပြီး ကျနော်တို့လည်း ကတိုက်ကရိုက် သူ့ကား ကိုယ့်ကား မရွေးတော့ဘဲ စက်နှိုးနှင့်တဲ့ ကားပေါ် ခုန်တက်ကြပါတယ်။

ဒီစဉ် (ရုပ်ရှင်ထဲကအတိုင်း) ပိတ်ထားတဲ့ ရွာတံခါးကြီး ၂ ချပ် ပွင့်ထွက်သွားပြီး ကားကြီးတစီး ထိုးထွက်လာပါတယ်။ ကားရှေ့မှာ လောက်စပီကာဟွန်းကြီး တပ်ထားပါတယ်။

“အားနာပါတယ် ဦးမောင်ကို …”

လို့ အစချီပြီး ခနဲ့ပါတော့တယ်။ မနေ့ညက မြို့ပေါ်တက်ပြီး ‘စိန်’ခေါ်သွားတဲ့ ကားကြီးပါပဲ။ ဘေးကလည်း ဝေး … ဝါး … စတဲ့ ပြူစောထီးတွေရဲ့ အော်သံ၊ လှောင်သံတွေ စီစီညံနေပါတယ်။

ဒီလို ရုတ်ရုတ်ရက်ရက်တွေ ဖြစ်နေစဉ် ကိုကျော်ထွေးကြီးကို ဘယ်ကားကမှ လက်မခံ။ ‘မင်းက မောင်ရှင်ပဲ’ လို့ ဝိုင်း စ နေကြတာက ရှိသေးတယ်။ နောက်ဆုံးမှ ကျနော်တို့ ကားပေါ်ရောက်လာတယ်။ ဒါတောင် တယောက်က …

“ခင်ဗျားရော ဆိုရင် ၁၃ ယောက်ဖြစ်နေပြီ။ ဆင်း … ဆင်း …” လို့ နောက်နေပြန်ပါတယ်။

ပြောစရာဖြစ်တာက ဒမိုက်က အောင်မြင်စွာဆုတ်ခွာလာလို့ ဘာမှမကြာခင် လမ်းဘေး ရွာတရွာ ခြံစည်းရိုးပေါ်က နီဝါဝါ အလုံးကြီးတလုံး အမိုးဖွင့် ကျနော်တို့ဂျစ် ကားပေါ် ‘ခွမ်း’ခနဲ ကျကွဲပါတယ်။ ကျလာတာက သောက်ရေအိုးကြီး။ ဂတော (ကတောရွာထွက်) အိုးကြီးဖြစ်ပါတယ်။ ကျတဲ့နေရာက ကိုကျော်ထွေးခေါင်းပေါ်…။

ခေါင်းတော့ မကွဲ။ ကြီးစွာသော ‘ဖု’ ကြီးတဖုပဲ ရောင်ကားတက်လာတာ တွေ့ရတယ်။ အကွဲအစတွေလွှင့်ပစ်မယ် လုပ်တော့ ဆရာက တားပါတယ်။

“ပါအောင်ယူခဲ့ကြ …” တဲ့။

အပြန်ခရီးမှာလည်း တဝါးဝါး တဟားဟားပါပဲ။ မြို့ဝင်ကာနီးတော့ ဆရာက သတိပေးပါတယ်။

“မင်းတို့မျက်နှာတွေ မသာအိမ် မျက်နှာမျိုးထားကြ …” တဲ့။

တကိုယ်လုံးလည်း ဖုံတသောသော ချေးညှော် အထပ်ထပ်နဲ့။ မျက်နှာသေ မျက်နှာငယ်လေးတွေနဲ့ မြို့ထဲ မောင်းဝင်ခဲ့ကြတယ်။

ပထမဆုံး အရေးပိုင် (ခရိုင်ဝန်)အိမ်သွားပြီး တိုင်ကြတောကြပါတယ်။ သက်သေခံပ္စည်းတွေပြပြီး ဂါတ်တဲမှာ အမှုဖွင့်ကြတယ်။ နောက် မြို့ထဲလှည့်ပြီး တရားဟော၊ အိုးခြမ်းကွဲတွေမြှောက်ပြ၊ ကိုကျော်ထွေးခေါင်းပေါ်က ‘ဖု’ ကြီးကို လက်ညှိုးထိုးပြကြတယ်။

နောက်နေ့ လူထုသတင်းစာနဲ့ ဗဟိုစည်သတင်းစာတို့မှာ ဓာတ်ပုံတွေနဲ့တွဲပြီး သတင်းတွေ အကျယ်တဝင့် ပါလာပါတယ်။

အမှုရုံးတင်တော့ ကင်မရာ ပြန်ရခဲ့တယ်။ ထုံးစံအတိုင်း ဖလင်ပြန်မရပါ။ လျော်ကြေး ပေး မပေး မမှတ်မိ၊ ဘယ်လို စီရင်ချက်ချသလဲဆိုတာလည်း မမှတ်မိတော့ပါ။

(၄)

ခေတ် နှစ်ခေတ်ကို ယှဉ်ကြည့်ကြပါစို့။

ဆိုရှယ်လစ်တွေလည်း ပြည်သူတွေကို သတ်ခဲ့ကြပါတယ်။ ဒါပေမယ့် သူ့ခါးပိုက်ဆောင်တပ် လဲဗီး၊ ပြူစောထီးတွေနဲ့ ခိုးကြောင်ခိုးဝှက် သတ်ခဲ့ကြတာပါ။ အသတ်ခံရသူဦးရေကလည်း ဒီခေတ်နဲ့စာရင် နည်းပါတယ်။ သတ်သမျှလည်း ပေါ်တာက များပါတယ်။ အသတ်ခံရသူ အရေအတွက် သိရပါတယ်။ တရားခံ ဘယ်သူဘယ်ဝါဆိုတာ ရှင်းရှင်းလင်းလင်း ရှိပါတယ်။

ရွာလုံးကျွတ်သတ်တာ မတရားပြုကျင့်တာ မီးရှို့တာတွေကိုတော့ စစ်တပ်က လုပ်တာဖြစ်တယ်။ ဒါတွေကတော့ စာရင်းမရှိ အင်းမရှိပဲ။ တပ်မတော် မော်ကွန်းတိုက်ထဲဝင်ရှာလည်း တွေ့ရမှာမဟုတ်ပါ။ ၄၈-၄၉ ခုနှစ်တွေမှစပြီး ၅၈ ခု အိမ်စောင့် အစိုးရ ၆၂ ခုနှစ်နောက်ပိုင်း ပြည်နယ် ပြည်မတွေမှာ စစ်တပ်သတ်သမျှ ဘယ်မှာစာရင်း ရှိလို့လဲ။

ဒီပဲယင်းကိစ္စ ပူပူနွေးနွေးရှိသေးတယ်။ စစ်တပ်က ဝန်းရံပေးထားကာ လက်သုံးတော် လက်မရွံ့ကြံ့/ဖွံ့ စွမ်းအားရှင်တွေကို အရက်ကိုးမောင်းတိုက်ပြီး စိတ်ကြိုက် အသတ်ခိုင်းခဲ့တယ်။ ၄ ယောက်ပဲ သေတာပါလို့ စာရင်းပြတယ်။

အတွေ့အကြုံအရ ပြူစောထီးတွေ ဘယ်လောက်ဆိုးဆိုး ‘စွမ်းအားရှင်’များကိုတော့ သြချကြရမှာပါ။

ပြူစောထီးက ခရမ်းသီး၊ ခရမ်းချဉ်သီး ။

စွမ်းအားရှင်တွေက ချိန်းကြိုး၊ သံချောင်း၊ ဝါးချွန်၊ တုတ်၊ ဓား။

ပြူစောထီးက ဆဲဆိုကြိမ်းမောင်း ခြိမ်းခြောက်ရုံ၊ စွမ်းအားရှင်တွေက ထိုးကြိတ် ရိုက်သတ်၊ ပစ်ခတ်။

ပြူစောထီးက ကင်မရာတလုံးပဲ လုယူခဲ့၊ စွမ်းအားရှင်တွေ လုယူဖျက်ဆီးလိုက်တဲ့တန်ဖိုးက ကြောက်ခမန်းလိလိ။

ဒမိုက်ရွာအစား ကျည်ရွာ ဒီပဲယင်း။ ဖဆ ဆိုရှယ်အစား နဝတ-နအဖ။ ပြူစောထီးနေရာမှာ ကြံ့/ဖွံ့ စွမ်းအားရှင် စသည် အစားထိုးကြည့်လိုက်တော့ … …

ဤစာကိုပင် ကျနော် ရေးနိုင်တော့မည်မဟုတ်ပါ။ ။


ရဲဘော်စိုးချစ်


ရေစီးသံဂျာနယ်
အတွဲ ၇၊ အမှတ် ၈၊ ၉၊ ၁၀
အောက်တိုဘာ၊ နိုဝင်ဘာ၊ ဒီဇင်ဘာ၊ ၂၀၀၃ ခုနှစ်


Tuesday, May 18, 2010

ကျောင်းသား ထောင် တော်လှန်ရေးသမား (နိဂုံးပိုင်း)

အင်တာနေရှင်နယ် (The Internationale)

ထလော့ … အငတ်ဘေး ကျရောက်သူတို့တတွေ
ထလော့ … ကမ္ဘာ့တဝှမ်းက ကျေးကျွန်တွေ
တော်လှန်ကာ ထစ်ချုန်းမြည် ကြွေးကြော်လို့နေ
နောက်ဆုံးပိတ်တိုက်ပွဲ နွှဲဆင်မလေ …။

ရှေးရိုးအစဉ်အလာ အယူအဆစွဲတွေ စွန့်လေ
ကျေးကျွန်တွေ … ထလေ ထကြလေ …
အခြေအနေတွေ ဒို့တော်လှန်ကာသာ ပြောင်းမလေ
အောင်မြင်ဖို့ရာ ရှင်းပစ်စို့လေ …။

(သံပြိုင်) - ရဲဘော်တို့လာ စုရုံး နေ
အဆုံးစစ်ပွဲ နွှဲဆင်မလေ
အင်တာနေရှင်နယ် ကမ္ဘာမှာ အကုန်ညီစေ …။
ရဲဘော်တို့လာ စုရုံးနေ
အဆုံးစစ်ပွဲ နွှဲမယ်လေ
အင်တာနေရှင်နယ် စည်းရုံးစုစည်းကာနေ …။

ကယ်တင်ရှင် ဘယ်သောခါကမှ မရှိပေ
နတ်သိကြားနဲ့ မင်းဘုရား ဒို့မယုံပေ
နှောင်ကြိုးကို ဒို့လက်ရုံးဖြင့် ချိုးဖျက်မလေ
သောက ဗျာပါဒ လောဘကင်းစင်စေ …။

လုယက်ခြင်းမှ မှန်မလွဲပင် ကင်းမလေ
များပြည်သူ တူညီပျော်မြူးကြစေ
အားလုံးက တာဝန်ကိုယ်စီထမ်းမလေ
သံပူခိုက်ဝယ် အားစိုက်ထုနှက်ဟေ …။

(သံပြိုင်)
လယ်သမား လုပ်အားစိုက်ထုတ်သူ အပေါင်းတွေ
ပစ္စည်းမဲ့များနဲ့ ပေါင်းစည်းဟေ …
ညီရင်းအကိုပမာ သစ္စာအဓိဋ္ဌာန်ပြုစို့ဟေ
သွေးစုပ်ကောင်တွေ မောင်းထုတ်ဟေ …။

ဒို့ရဲ့သွေးသား သူတို့ဝါးမြိုစားသလေ
နှစ်ကာလ ရှည်ကြာခံခဲ့ရပေ …။
ကြောက်လန့်စိတ် အကုန်အစင်စွန့်လေ
အရုဏ်ကျင်းကာ အလင်းသို့ရောက်ပြီဟေ …။

(သံပြိုင်)


ကိုကိုးကျွန်းမှာ ကျဆုံးသူ၊ ထွက်ပြေးလွတ်မြောက်သူများ စာရင်း


* ရဲနီတင်ငြိမ်း
အသားဝါရောဂါဖြင့် ကွယ်လွန်။
သူသေဆုံးမှုကို အကြောင်းပြုပြီး ရက် ၄၀ တိုက်ပွဲပေါ်ရ။

* ဦးထွန်းရှိန် (မန္တလေး၊ ကျောင်းဆရာ)
ပင်လယ်ကမ်းစပ်မှာ ခရု၊ ငါး ဟင်းစားရှာရင်း မုန်တိုင်းမိ၊ လှိုင်းထဲ နစ်မြုပ်သေဆုံး။

* ရဲနီမြင့်သိန်း
အုန်းပင်ပေါ်မှ လိမ့်ကျသေဆုံး။

* မန်းအောင်ကြည် (ABKO)
လှေနဲ့ထွက်ပြေးလွတ်မြောက်။ KNU ရောက်ပြီး ရောဂါနဲ့သေဆုံး။

* မန်းငြိမ်းမောင်
လှေနဲ့ထွက်ပြေးလွတ်မြောက်။ ယခု KNU ဗဟိုကော်မတီဝင်။

* ရဲဘော်အောင်ဝေ (ဗမာပြည်ကွန်မြူနစ်ပါတီ)
လှေနဲ့ထွက်ပြေးလွတ်မြောက်။ ပဲခူးရိုးမမှာ ကျဆုံး။

* ရဲနီဗိုလ်ကြူ (မန္တလေးတက္ကသိုလ်၊ ပခုက္ကူ)
အလံနီတွေရဲ့တိုက်ပွဲ ၄၆ ရက်မြောက်မှာ ကျဆုံး။

* ရဲနီနေလင်း (တောင်တွင်းကြီး)
အလံနီတွေရဲ့ ၄၆ ရက်တိုက်ပွဲအပြီး ကျန်းမာရေးဆိုးရွားလို့ ပြည်မပြန်အပို့ သင်္ဘောပေါ်မှာ ဆုံးသွား။

* ရဲဘော်သိန်းကြည်
၅၃ ရက်တိုက်ပွဲ၊ ၃၆ ရက်မြောက်မှာ ကျဆုံး။

* ရဲဘော်အုန်းမော်
၅၃ ရက်တိုက်ပွဲ၊ ၄၆ ရက်မြောက်မှာ ကျဆုံး။

* ရဲဘော်ချစ်ဆွေ (ပြည်ခရိုင်က ဗကသ)
၅၃ ရက်တိုက်ပွဲ၊ ၄၈ ရက်မြောက်မှာ ကျဆုံး။

* ရဲဘော်ထွန်းမြင့် (အစိုးရဝန်ထမ်း၊ ရန်ကုန်)
၅၃ ရက်တိုက်ပွဲ၊ ၄၃ ရက်မြောက်မှာ ကျဆုံး။

* ရဲဘော်စိန်ချင်း (ပခုက္ကူ)
၅၃ ရက်တိုက်ပွဲ၊ ၄၃ ရက်မြောက်မှာ ကျဆုံး။

* ရဲဘော်မောင်မောင်စိုး (ခ) ကိုလတ် (ကျောက်ဆည်သား၊ မန္တလေးတက္ကသိုလ်)
၅၃ ရက်တိုက်ပွဲ၊ ၅၃ ရက်မြောက်မှာ ကျဆုံး။

* ကိုလေးမောင် (ကဗျာဆရာ)
၅၃ ရက်တိုက်ပွဲ၊ ၅၃ ရက်မြောက်မှာ ကျဆုံး။

* ရဲဘော်ထွန်းဝင်း (မြစ်ဝကျွန်းပေါ်သား၊ အစိုးရ လေတပ်က၊ ပဲခူးရိုးမ UG)
၅၃ ရက်တိုက်ပွဲ၊ ၅၃ ရက်မြောက်မှာ အဋ္ဌမမြောက်၊ နောက်ဆုံး ကျဆုံး။

ပြီးပါပြီ။


Monday, May 17, 2010

၂၀၁၀ ပြည်သူ့သဘောထား

ဒေါက်တာသန်းငြိမ်း နှင့် ဘီဘီစီ ဆက်သွယ်မေးမြန်းချက်

မေလ ၆ ရက်နေ့က NLD ပါတီ တရားဝင်ရပ်တည်မှု ရပ်ဆိုင်းသွားပေမယ်လို့ NLD အဖွဲ့ဝင်တချို့က NDF လို့ခေါ်တဲ့ အမျိုးသားဒီမိုကရေစီအင်အားစု ဆိုပြီးတော့ နိုင်ငံရေးပါတီတခုအဖြစ် မှတ်ပုံတင်ဖို့ ကြိုးပမ်းလျှက်ရှိပါတယ်။ NDF အနေနဲ့ ဒီကနေ့ အစည်းအဝေးပြုလုပ်ပြီးတော့ အခုတပတ်အတွင်း နေပြည်တော်မှာ မှတ်ပုံတင်ဖို့ရှိတယ်ဆိုပြီးတော့ ပါတီဖြစ်မြောက်ရေးဆောင်ရွက်နေတဲ့ ဒေါက်တာသန်းငြိမ်းက BBC ကိုပြောပါတယ်။

အဲတော့ NDF ပါတီအဖြစ်တည်ထောင်ရာမှာ ဒီမိုကရေစီ နည်းမကျဘူးဆိုပြီးတော့ ဒေါ်အောင်ဆန်းစုကြည်က ပြောတယ်ဆိုတဲ့သတင်းတွေလည်း ကြားသိရတဲ့အတွက် ဒီကိစ္စကိုရော ဘယ်လိုများပြန်ပြီးတော့ ပြောချင်ပါသလဲ လို့ ဒေါက်တာသန်းငြိမ်းကို ဆက်သွယ် မေးမြန်းကြည့်ပါတယ်။

ဟုတ်ကဲ့၊ ဒေါ်အောင်ဆန်းစုကြည် ဝေဖန်တာ မဝေဖန်တာဆိုတာကတော့ ကျနော်တို့ အထူး ဘာမှ မှတ်ချက် မပေးလိုပါဘူး။ ဒါဟာ ဟုတ်သလား မဟုတ်သလား ကျနော်တို့သေချာလည်း ဘာမှမသိပါဘူး။ ကျနော်ပြောချင်တာကတော့ NLD ပါတီမှာ ၂၉ ရက်နေ့က ဆက်ပြီးတော့ မှတ်ပုံမတင်ဖို့ ဆုံးဖြတ်တယ်ဆိုတာက NLD ပါတီ ဆက်ပြီးမှတ်ပုံမတင်ဖို့ ဆုံးဖြတ်တာ။ အဲတော့ အဲဒီဆုံးဖြတ်ချက်ကို ကျနော်တို့ဘာမှ ကျူးလွန်ဖောက်ဖျက်တာ မရှိဘူး။

အခုဟာက ကျနော်တို့က NLD ပါတီ မရှိတော့လို့ သို့မဟုတ် ပျက်ပြယ်သွားပြီလို့ ယူဆစရာ ဥပဒေကြောင်းအရ ရှိနေလို့သာ သက်သက် ကျနော်တို့က ဒါ ကိုယ့်ရဲ့လုပ်ပိုင်ခွင့်ပေါ့ဗျာ၊ ဆိုလိုတာကတော့ လူတယောက်ရဲ့ အခွင့်အရေးပေါ့၊ Human Rights ပေါ့၊ လူ့အခွင့်အရေးအရ ကျနော်တို့ ဆက်ပြီးတော့ ကိုယ်လုပ်ချင်တဲ့ နိုင်ငံရေးလမ်းကြောင်း ကိုယ်လုပ်တာပဲ ဖြစ်ပါတယ်။ အဲ့တော့ NLD ပါတီကို ကျနော်တို့ ဘာမှသစ္စာဖောက်တယ်တုိ့၊ ဘာတို့ဆိုတာ ဒါ လုံးဝ အဓိပ္ပာယ်မရှိဘူးဆိုတာ ရိုးရိုးလေးစဉ်းစားရင် ရပါတယ်။


တခုကတော့ NLD ပါတီမှာ နောက်ဆုံးအချိန်အထိ ဆွေးနွေးကြတဲ့အခါမှာ အဓိက လက်ရှိရွေးကောက်ပွဲနဲ့ ဆိုင်တဲ့ဥပဒေတွေဟာ တရားမျှတမှု မရှိဘူး၊ လူပုဂ္ဂိုလ် တဦးတယောက်တည်းကိုဖြစ်စေ၊ အဖွဲ့တခုတည်းကိုဖြစ်စေ ရည်ညွှန်းထားတယ်ဆိုပြီးတော့ မကျေနပ်တဲ့သဘောတွေ တွေ့ရတယ်လေ၊ အဲတော့ တကယ်လို့ ရွေးကောက်ပွဲမှာ ပါတီတရပ်အနေနဲ့ ဆက်ပြီးပါမယ်ဆိုရင် ဒီဥပဒေတွေဟာ မျှတမှုမရှိဘူးဆိုရင် ခုနပြောတဲ့ လူ့အခွင့်အရေးရှုထောင့်က ကြည့်ရင်ကော ဒါတွေက ဘာဆက်လုပ်လို့ရမှာလဲ။

မျှတတဲ့ဥပဒေ၊ တရားတဲ့ဥပဒေတွေ မရှိဘူးဆိုတာ ဒါ အသစ်အဆန်းမှ မဟုတ်ပဲဗျာ။ ကျနော်တို့ NLD ပါတီကြီး စပြီးတော့ ဖြစ်လာတာတို့၊ ကျနော်တို့ကိုယ်တိုင် နိုင်ငံရေးထဲဝင်လာတယ်ဆိုတာတွေက အဲဒီလို မျှတမှုမရှိတာတို့ ဒါတွေကိုပြုပြင်ဖို့ ရည်ရွယ်ချက်နဲ့ ဝင်လာတာပဲဗျ၊ အခုမှ ဒါတွေရှိတာမှမဟုတ်တာပဲ။ အဲတော့ ဒီလို မမျှတမှုဆိုတဲ့ ကိစ္စတွေဟာ အခုလိုလုပ်ရင်းနဲ့ လျှော့သွားတာလည်း ဖြစ်ရင်ဖြစ်မယ်၊ တိုးလာတာလည်း ဖြစ်ရင်ဖြစ်မယ်၊ ကျနော်တို့တာဝန်ကတော့ အဲဒါတွေရှိနေသမျှ ဆက်ပြီးတော့ ဒီ မမျှတမှုတွေကို မျှတတဲ့အထိ၊ မကောင်းတာတွေကို ကောင်းသွားတဲ့အထိ၊ မတရားတာတွေကို တရားသွားတဲ့အထိ ဒါတွေကို ဥပဒေဘောင်ထဲကနေပြီးတော့ ဆက်ပြီးတော့ ကြိုးစားသွားမယ်ဆိုတဲ့ ရည်ရွယ်ချက်ပဲ ဒါပဲ အရေးကြီးတာပါ။ ဒါကိုပဲ ကျနော်တို့လုပ်နေတာပါ။

ဒါပေမယ့်လို့ Political Space ဆိုပြီး တချို့က နိုင်ငံရေးအရ လှုပ်ရှားဖို့နယ်ပယ်ကို လေ့လာလိုက်တဲ့အခါမှာ အခုလက်ရှိ စစ်တပ် တမတ်သားအပြင်ပေါ့နော်၊ သူတို့နဲ့မဟာမိတ်ဖွဲ့ထားတဲ့ အင်အားစုတွေ၊ ကြံ့ခိုင်ဖွံ့ဖြိုးရေး အဖွဲ့တွေရှိတဲ့အတွက် ကျန်တဲ့ လွတ်လပ်တဲ့ ဒီမိုကရေစီရေး ဆောင်ရွက်တဲ့အဖွဲ့တွေဟာ လွှတ်တော်မှာ အခြေခံဥပဒေပြင်ဆင်ဖို့ မဆိုထားနဲ့ လွတ်လပ်စွာပြောဆိုဆောင်ရွက်ခွင့်တွေမှ ရပါ့မလားလို့ ဝေဖန်တာတွေလည်းရှိတော့ တကယ်တမ်း လွှတ်တော်တရပ် ပေါ်လာရင်ကော ကိုယ့်ရဲ့ Political Rights ကို လွတ်လွတ်လပ်လပ် လုပ်နိုင်မယ်လို့ မျှော်လင့်သလားခင်ဗျ။

ကျနော်တို့ နိုင်ငံရေးလုပ်နေတာဟာ ရွေးကောက်ပွဲမှာ အောင်မြင်မှုပန်းတိုင်ကို ရောက်မယ်၊ လွှတ်တော်ထဲ ရောက်လို့ရှိရင် ကျနော်တို့ ဒီမိုကရေစီရမယ်လို့ ဒီလိုမျှော်လင့်ချက်နဲ့ ကျနော်တို့လုပ်နေတာ မဟုတ်ပါဘူး။ ဘယ်လောက်မြန်မယ်၊ ဘယ်လောက်ကြာမယ်ဆိုတာက အခြေအနေအရနဲ့ ကျနော်တို့ ဘယ်လောက် လုပ်နိုင်မလဲဆိုတဲ့အပေါ်မှာ မူတည်တယ်လေ။ အဲ့တော့ အရေးကြီးတာကတော့ ဒါကိုမရမချင်း ကိုယ်စွမ်းရှိသလောက်၊ ဉာဏ်စွမ်းရှိသလောက် ပြည်သူအတွက် ဆက်ပြီးတော့ လုပ်သွားဖို့ဆိုတဲ့ ဆုံးဖြတ်ချက်ပဲ အဓိကလို့ ကျနော် ထင်တယ်။

ဒေါက်တာသန်းငြိမ်း ဖြစ်ပါတယ်။

၂၀၁၀ ပြည့်နှစ်၊ မေလ ၁၇ ရက်နေ့ ဘီဘီစီ မြန်မာပိုင်း အစီအစဉ်မှ ကောက်နုတ်ဖော်ပြပါတယ်။

Saturday, May 15, 2010

ကျနော်တို့ခေတ်မှာ ပြူစောထီး၊ ဒီခေတ်မှာ စွမ်းအားရှင် (၁)

ခုသွားရမယ့်ရွာက ကျနော်တို့ မဲဆန္ဒနယ်နဲ့တော့ မဆိုင်။ မြင်းခြံတောင်ပိုင်း မဲဆန္ဒနယ်။ တည်မြဲ ဖဆပလ အမတ်လောင်းက ဦးစံပြည့်။ သူ့အကြောင်းလည်း မိတ်ဆက်ပေးဖို့ လိုပါမယ်။ ဗမာပြည်တဝှမ်း လူသတ်ရာမှာ နာမည်ကြီးခဲ့ကြတဲ့ ဖဆ ဆိုရှယ်တွေ ရှိခဲ့ဖူးတယ်။ အောင်ပင်လယ် သိန်းဖေ၊ လယ်ဝေး သခင်ကြည်ရှိန်၊ မိတ္ထီလာ ဆရာထီ၊ ငါန်းဇွန် ဗိုလ်မှူး တက်မြင့်တို့နဲ့အပြိုင် နာမည်ကြီးသူပါ။

ဆိုရှယ်လစ်တွေအများကြီးထွက်တဲ့ ဗိုလ်ချစ်ခိုင်တို့ရွာ(တောင်သာမြို့နယ် ဝဲလောင်ရွာသစ်ဘက်)သားဖြစ်တယ်။ (တနည်း) စစ်ဘက်နယ်ဘက်မှာ တွင်ကျယ်နေတဲ့သူတွေ အများကြီးထွက်တဲ့ ဒေသသား။ နေတော့ မြင်းခြံမြို့ပေါ်မှာနေတယ်။ သူ့ဆန္ဒ သူ့နှုတ်ထွက်စကားက ဥပဒေဖြစ်နေတဲ့ကာလ …။

နယ်လူထုက သူ့ကို ‘နေထွက်ဘုရင်’။ အိမ်ခြေတထောင်ကျော်ရှိတဲ့ ဒမိုက်ရွာကြီးကို အုပ်ချုပ်နေတဲ့ ဒမိုက်မောင်မောင်နဲ့ သူ့ညီ ကိုဝင်းရှိန်ကိုတော့ ‘နေဝင်ဘုရင်တွေ’ လို့ ခေါ်ကြတယ်။ သူတို့ရွာထဲ သူတို့မှလွဲ၍ ဘယ်သူ့ကိုမှ တရားဟောခွင့်မပြုခဲ့။ ပြိုင်ဘက် အမတ်လောင်းကိုလည်း ထောင်ထဲထည့်ထားလိုက်ပြီ။
ပမညတ အမတ်လောင်းအဖြစ် ကိုသန်း(ပြည်သူ့ရဲဘော် ဗိုလ်ဟိန္ဒက) ပြိုင်မယ်။ သူနဲ့ ဦးမောင်ကိုက ရှားစောင်းစေးနဲ့ မျက်ချေး။ ဒါပေမယ့် ခု သူက ထောင်ထဲမှာ။ သူ့ဘက် မဲဆွယ်ပွဲတွေက ဖရိုဖရဲ ဖြစ်နေလို့ သွားကူကြရမှာပါ။

(၃)

သူငယ်ချင်းတစု ကားပေါ်ထိုင်ပြီး ဒမိုက်ခံတပ်အကြောင်း စကားကောင်းနေပါတယ်။ လောပိတမှာ တအိမ်တည်းနေခဲ့ကြရတဲ့ ဒမိုက်ရွာသားတယောက်ရှိတယ်။ ကိုဝင်းရှိန်က သတ်မှာစိုးလို့ ကယားပြည် နယ်ဘက်ထွက်ပြေးလာပြီး အလုပ်ဝင်လုပ်နေတာပါ။ သူကိုယ်တိုင်က ဆိုရှယ် မလစ် တလစ် … ဒါပေမယ့် တနယ်ထဲသားတွေမို့ အိမ်တအိမ်တည်းထဲ စုနေခဲ့ကြတာပါ။

“ကွန်မြူနစ်အမာခံ ဖမ်းမိလာလို့ကတော့ မသက်သာဘူး မှတ်။ တို့လူတွေက လက်သံသိပ်ပြောင်တာ။ သူတို့စစ်တာ ငါ တခါကြုံဖူးတယ်။ ဘတ်ခွ (လောက်လေးခွ) နဲ့ မျက်နှာကို ပစ်,ပစ်ပြီး စစ်တာကွ။ မင်းတို့ ကြုံဖူးသလား။ အဖုအပိမ့်ကြီးတွေ ထလာတာများ ကြက်သီးထစရာ မျက်လုံးတောင် ကျွတ်ထွက်တယ်။ နောက်တော့ သတ်ပစ်လိုက်တာပါပဲကွာ” … တဲ့။

သူ့စကားကို အစဖော်ပြီး ဒမိုက်ပြူစောထီးတွေ လက်သံပြောင်ပုံ … ဇာတ်စုံခင်းလိုက်တော့ ငိုက်နေတဲ့သူတွေ မျက်လုံးကျယ်လာတယ်။ ဆဲသူက ဆဲတယ်။ သူတို့ကလည်း ကျနော် ပြန်မလာခင် မြို့တဝိုက် ပြူစောထီး သောင်းကျန်းတာတွေ ပြန်ပြောပြကြတယ်။ သန်းကောင်လောက်ကျမှ ထိုင်လျက် အိပ်ပျော်သူ ပျော်။ ငိုက်သူ ငိုက် ဖြစ်ကုန်ကြတယ်။

နံနက် ၅ နာရီလောက်မှာ လိုက်ချင်တဲ့သူတွေ တဖွဲဖွဲရောက်လာကြတယ်။ နံနက်စာကို ဆရာတို့အိမ်က ကျွေးပါတယ်။ ကားတစီး ၁ဝ ယောက်လောက် စီးကြတယ်။ အမတ်လောင်း ဗိုလ်ဟိန္ဒက အိမ်ကလည်း ဂျစ်ကားတစီး လိုက်လာတယ်။ ရန်ကုန် ပြည်သူ့လူငယ်ဌာနချုပ်ကလာကူတဲ့ မောင်လေးအောင်(ကဗျာဆရာ)နဲ့ နှုတ်ခမ်း မွေးစ,စထားတဲ့ ကိုကျော်လှတို့ ပါလာတာ မှတ်မိတယ်။ ကားမဆန့်လို့ ကျန်နေတဲ့သူတွေလည်း ရှိတယ်။

ပထမဆုံး မြို့မြောက်ပိုင်းခရိုင်ဝန်အိမ်ဘက် ကား ၄ စီးမောင်းသွားပြီး တိုင်တည်ပါတယ်။ ဒမိုက်ရွာဘက် ရွေးကောက်ပွဲအတွက် စည်းရုံးရေးခရီး ထွက်မယ်။ မဲဆွယ်တရားပွဲ ကျင်းပမယ်။ တစုံတခုဖြစ်ခဲ့သော် အုပ်ချုပ်ရေးဘက်၏ တာဝန်ဟုယူဆမည့်အကြောင်း ဦးမောင်ကိုကပြောကြားခဲ့ပြီးမှ နောက်ကြောင်းပြန်ကာ ဒမိုက်ရွာဘက် မောင်းထွက်ခဲ့ကြပါတယ်။

ကျနော်တို့ကားကလွဲပြီး ကျန်ကား ၃ စီးပေါ်မှာ အသံချဲ့စက်တွေ တင်လာပါတယ်။ ပြည်တွင်းငြိမ်းချမ်းရေး သီချင်းတွေ အားရပါးရ ဆိုကြတယ်။ တလမ်းလုံး တဝါးဝါး တဟားဟားနဲ့ …၊ အန္တရာယ်ကို မေ့ထားလိုက်ကြတယ်။ ခရီးအဝေးက ၁၂ မိုင်လောက် ရှိမယ်။ လမ်းက မြေလမ်း။ ကျနော် တခါမှမသွားဘူးသေးတဲ့ ခရီး။

(စလေ ဦးပုည စားရတဲ့) ရွာစည်ရွာ၊ ဂျုပ္ပင်၊ ထနောင်းကုန်း၊ ထနောင်းတိုင်ရွာတွေ ဖြတ်သွားရတယ်။ ၆ မိုင်ခရီး ပေါက်ခဲ့ပြီ။ ဒမိုက်ဘက်နီးလာတာနဲ့ နောက်တွေ့ရတဲ့ရွာတွေက ရွာသားတွေရဲ့မျက်နှာတွေက သိပ်မသာယာတော့ပါ။ တချို့က စိုးရိမ်တဲ့မျက်နှာ၊ တချို့က တင်းတင်းမာမာ … ရွာတရွာကတော့ ဆက်မသွားဖို့ တားကြတယ်။

“အားလုံး အဆင်သင့် ပြင်ထားကြပြီ။ ရွာထဲ အဝင်ခံမှာ မဟုတ်ဘူး။ စုထားတဲ့ လူတွေကိုက အများကြီး … ထုမယ့်နှက်မယ့် ပစ္စည်းတွေကလည်း ပုံလို့” … တဲ့။

လှည့်ပြန်မယ့်ကား တစီးမှမရှိ။ ခုန်ချနေရစ်မယ့်လူလည်း တယောက်မှမရှိ။ တတိယမြောက် ကားဒရိုင်ဘာ ဘေးမှာထိုင်နေတဲ့ ဆရာဦးမောင်ကိုရဲ့လှုပ်ရှားမှုကို တွေ့လိုက်ရတယ်။ ဘယ်သူက သတိပေးလိုက်တယ် မသိ။ လက်ကိုင်ပဝါကြီးတထည်နဲ့ သူ့ခေါင်းကိုပတ်ချည်ပြီး ပေါင်းထားလိုက်တယ်။ ထိပ်ပြောင်ကြီးနဲ့သူ့ကို ရုတ်တရက် မမှတ်မိအောင် ရုပ်ဖျက်လိုက်တာလို့ (နောက်မှ) သိရတယ်။

ဒမိုက်ရွာအဝင်မှာ သဲတောကြီးတခု ရှိတယ်။ လှမ်းကြည့်လိုက်တော့ ရွာအဝင် တံခါးပေါက်ရှေ့ကနေပြီး သဲလမ်းကြီးတလျှောက် လူတွေဖွေးလို့၊ ရွာတံခါးကြီးကတော့ ပိတ်လျက်သား …။

ဦးမောင်ကိုက လူအုပ်ကြီးကိုဖြတ်ပြီး ရွာတံခါးအရောက်မောင်းဖို့ အမိန့်ပေးလိုက်တယ်။ ဒါပေမယ့် ခရီးမတွင်။ သဲထုက နက်,နက်လာတယ်။ လူအုပ်ကြားထဲ ရောက်လာခဲ့ပြီ။ သူတို့လက်ထဲက ပစ္စည်းတွေနဲ့ အရန်သင့် အစီအရီချထားတဲ့ ခဲယမ်းတွေကို ခုမှ သတိထားမိကြတယ်။

“ဟာ ပျော်စရာကြီးပါလား”

သူငယ်ချင်းတယောက်ရဲ့အသံထွက်လာတယ်။

ဒေါင်ချာစိုင်းအောင် မူးနေတဲ့ လူတသိုက်က ကားလမ်းပိတ်ပြီး ဆီး, တားနေကြတယ်။ ကားတွေက ကွေ့ရှောင်၊ ပတ်ရှောင် မောင်းရင်းက တတန်းတည်း အနေအထား ပျက်သွားတယ်။ စက်တွေလည်း ရပ်ကုန်တယ်။ နှိုးလိုက် မောင်းလိုက် ရပ်လိုက်ပဲ၊ ကြာတော့ နှိုးမရအောင်ဆိုပြီး ပြူစောထီး အမူးသမားတွေက စက်ခေါင်းဖွင့်ပြီး သဲတွေ လောင်းထည့်ပါတယ်။ လူတွေက ကားပေါ်ကဆင်းလိုက်ကြတဲ့အခါ ကားဘော်ဒီထဲလည်း သဲတွေ လောင်းပါတယ်။

ခုအထိ သူတို့ခဲယမ်းလက်နက်တွေ မသုံးသေး။ လူဆိုးတသိုက် (၁၄-၅ယောက်)ရဲ့ အော်ဟစ်ဆဲဆို ကြိမ်းမောင်းတဲ့အသံတွေပဲ ကြားနေရတယ်။ သူတို့က ခြိမ်းခြောက်တဲ့အနေနဲ့ ပြူးပြ ပြဲပြကြပေမယ့် ကျနော်တို့က ခပ်ပြုံးပြုံး၊ ဘေးက ရွာသူရွာသားတွေ မျက်နှာကလည်း ခပ်ပြုံးပြုံးပါပဲ။ သူတို့လက်ထဲက လက်နက်တွေကြည့်ပြီး ကျနော်တို့ မျက်နှာတွေက ရယ်ဖြဲဖြဲ ဖြစ်လာပါတယ်။

ကားတွေရပ်သွားတာနဲ့ ဦးမောင်ကိုက “စကြတော့” လို့ အမိန့်ပေးပါတယ်။ စပီကာပါတဲ့ကားပေါ်က ရဲဘော်တွေ တရား စဟောကြပါတယ်။ ဗိုလ်ဟိန္ဒက ကားပေါ်ပါလာတဲ့ ကိုလေးအောင်၊ ကားတစီးပေါ်က ကိုအောင်သူတို့ ဟောတာ တွေ့ရတယ်။

ဒီတော့မှ ခဲယမ်းတွေ ပျံတက်လာပြီး ဟောသူရော လက်ခုပ်တီးပေးနေတဲ့ ကျနော်တို့ကိုပါ တဖုန်းဖုန်း တဒိုင်းဒိုင်း မှန်ကုန်ပါတော့တယ်။ ခရမ်းချဉ်သီးတွေ မျက်နှာမှန်လိုက်ရင် ဖြာခနဲ ပေါက်ကွဲထွက်ကုန်ပြီး ခရမ်းသီးကြီးတွေ နံဘေးမှန်လို့ ကတော့ ‘အွတ်’ ခနဲ ‘အင့်’ ခနဲအသံတွေ ထွက်လာပါတယ်။ ဂုတ်(ကုပ်)ကိုဖြိုပြီး ပုံးနဲ့ သဲလောင်းပေးသူက ပေးပါတယ်။ ခရမ်းချဉ်သီးအစေးတွေပေါ် ဖုံကပ်ပြီး ချွေးတွေသဲတွေနဲ့ နေရခက်ပါဘိ။ အနာခံပြီး မိနစ် ၂ဝ-၃ဝ လောက် တွန်းဟောကြပါတယ်။

ရယ်စရာ အဖြစ်အပျက်တခုက ဆရာဦးမောင်ကို မိုက်ခွက်ကိုင်ပြီး တရားဟောနေစဉ် ခရမ်းချဉ်သီးတလုံး ဝဲပျံလာကာ ပါးစပ်ထဲ ဝင်သွားတာပါပဲ။ (သူကတော့ မဝင်ပါဘူး၊ ပါးစပ်ပဲ မှန်တာပါ … လို့ ပြောပါတယ်။ ထွေးထုတ်လိုက်ရတာတော့ အမှန်) ထွီခနဲထွေးထုတ်ပြီး ဆက်ဟောပါတယ်။ သူ့ပေါ်မှာ ဗုံးမိုးစွေနေပါတယ်။ ခဲယမ်းပြတ်သွားမှာ မပူရ။ ခံတောင်းနဲ့ရွက်လာသူတွေ ထမ်းဆိုင်းနဲ့ ထမ်းလာသူတွေ မပြတ်ရှိနေတယ်။

ဆက်လက်ဖော်ပြပါမယ်။