Saturday, September 26, 2009

ခရီးလမ်းတွေလား၊ ဆူးကြမ်းတွေလား

(၁)

လူသားတွေဘဝမှာ အသက်ရှင်နေထိုင်ဖို့ အရေးအကြီးဆုံးအရာဟာ ဘာဖြစ်နိုင်ပါသလဲ။

အခြေအနေအမျိုးမျိုးမှာရှိနေကြတဲ့ လူအမျိုးမျိုးဟာ အဓိပ္ပာယ်အမျိုးမျိုး ဖွင့်ဆိုကြလိမ့်မယ်ထင်ပါတယ်။

ကျမအနေနဲ့ကတော့ လွတ်လပ်စွာ လုပ်ကိုင်နေထိုင်စားသောက်ခွင့်လို့ ပြောချင်တယ်။ ကျမ ဒီလို ဘာကြောင့် ပြောဖြစ်တာလဲဆိုရင် ကျမကိုဒီလိုပြောဖြစ်သွားစေဖို့ လုံလောက်တဲ့အကြောင်းတွေ ကျမ အများကြီးကြုံဆုံခဲ့ရဖူးလို့ ဖြစ်ပါတယ်။

အသက်ရှင်ရပ်တည်နိုင်ဖို့ ခက်ခဲကြမ်းတမ်းစွာ လုပ်ကိုင်စားသောက်နေကြရတဲ့ တောတောင်တွေထဲက မြန်မာဒုက္ခသည် တွေကို မြင်တွေ့ရတော့ ကျမရဲ့အမြင်ဟာ ပိုပြီးမှန်ကန်သွားပြီလို့တောင် ခံစားရတယ်။ အိုးမရှိ အိမ်မရှိ၊ ပြေးလွှားသွားလာ နေရတဲ့ ဒုက္ခသည်တွေကို ကိုယ်တိုင်မြင်တွေ့ရတဲ့အခါ …

ဒီအဖြစ်တွေကို ဘယ်သူ့ကို တိုင်တည်ပြောရမလဲ။

ဒီအဖြစ်ဆိုးတွေဟာ ဘယ်သူ့ကြောင့် ဖြစ်ပေါ်လာရတာလဲ။

ဘာတွေလုပ်ပေးနိုင်ရင် သူတို့ရဲ့ဘဝတွေ တိုးတက်ပြောင်းလဲလာနိုင်မလဲ။

စတဲ့မေးခွန်းတွေမေးချင်လာသလို အသက်ရှင်ရပ်တည်ရေးလေးအတွက်ကိုပဲ သေမတတ်ရုန်းကန်နေရတဲ့ သူတို့ဘဝ တစေ့တစောင်းကို ကျမ သိမှီသမျှကို ဝေမျှပြောပြချင်စိတ်လည်း ဖြစ်ပေါ်မိပါတယ်။

(၂)

တနေ့မှာတော့ အေးချမ်းသာယာလှပတဲ့ရာသီဥတုရဲ့ တောင်တက်လမ်းလေးအတိုင်း တရိပ်ရိပ်ပြေးလွားနေတဲ့ မဲဆောက် - နိုဖိုး လိုင်းကားပေါ်မှာ ကျမတို့သူငယ်ချင်းတစု စကားတွေပြောရင်း လိုက်ပါလာခဲ့ကြပါတယ်။ ကားက ခါတိုင်းနှင့်မတူဘဲ နေရာအနှံ့ကို ရပ်နေတော့တာပါ။ ခရီးသည်တွေကလည်း တက်လိုက်ဆင်းလိုက်နဲ့။ ကျမတို့သူငယ်ချင်းတစုကလည်း စာမေးပွဲဖြေအပြီး အပြန်ခရီးဆိုတော့ အတွေ့အကြုံတွေပြောဆိုလာလိုက်ကြတာ တက္ကသိုလ်တုန်းကထွက်ခဲ့ကြတဲ့ လေ့လာရေးခရီးတွေကိုတောင် သွားပြီးအမှတ်ရမိတယ်။

လေ့လာရေးထွက်ပြီဆို အဖွဲ့ခေါင်းဆောင်ရဲ့စကားကိုလိုက်နာ၊ ပြဿနာဖြစ်ရင် စုပြီးဖြေရှင်း၊ သွားမယ့်ခရီးစဉ်ကို ညှိနှိုင်း အတည်ပြုနှင့် ပျော်စရာလည်းကောင်း ညီညွတ်မှုလည်းရရှိတာကြောင့် အားရှိသလိုခံစားရတယ်။ အခုလည်း ကျမတို့ သူငယ်ချင်းတသိုက်ဟာ တဦးကိုတဦးအားပေးရင်း တစုံတရာတော့ အားရှိနေသလိုပါပဲ။

သူငယ်ချင်းအချို့လည်း ခရီးကြမ်းဒဏ်မခံနိုင်လို့ ကားမူးပြီး အန်ကြတယ်။ ကျမလည်း ပါလာတဲ့ ကားမူးပြေဆေးကို မျှဝေပေးပြီး ကိုယ်ကိုယ်တိုင်လည်း ဆေးကိုကြိုသောက်ထားပါတယ်။ တောင်ကလည်း တောင်တက်လမ်း၊ အကွေ့အကောက်ကလည်း များလွန်းတော့ ကားစီးရတဲ့ဒုက္ခက တော်တော်တော့ကြီးပါတယ်။ ဒီလိုနဲ့ပဲ ခရီးဟာ ရောက်မှန်းမသိ ရောက်လာခဲ့တယ်။ လမ်းမှာလည်း စစ်ဆေးရေးဂိတ်တွေက စစ်လိုက်တာအရမ်းပဲ။ ကျမတို့ကလည်း ထိုင်းစကားမတတ်တော့ စကားမပြောတတ်တဲ့ အ အ တွေလိုပဲ။ Camp ထောက်ခံစားလေးပြပြီး စစ်ဆေးသူတွေရဲ့ မျက်နှာကိုလိုက်ကြည့်နေရတဲ့ အနေအထားမျိုးနဲ့ ဂိတ်တွေကို အသက်အောင့်ပြီး ဖြတ်ခဲ့ကြရပါတယ်။

ဒီလိုနဲ့ တဂိတ်ပြီး တဂိတ်အစစ်ဆေးခံရပြီး ကြောက်စိတ်ပြေရုံရှိသေး နောက်ဂိတ်တခုအရောက်မှာတော့ ဘာကြောင့်မှန်း မသိဘူး။ ကားသမားက ဂိတ်စခန်းထဲကိုဝင်သွားခဲ့တယ်။ ကျမတို့လည်း တထိတ်ထိတ်နဲ့ပေါ့။ ထိုင်းရဲတယောက်ထွက်လာ ပြီး လက်မှတ်လာတောင်းတယ်။ မင်မပျက်သာ နေနေရတယ်။ ရင်ထဲကတော့ တဒိန်းဒိန်းနဲ့လေ။ တော်ပါသေးတယ် ထိုင်းစကားတတ်တဲ့ ကားဆရာက အကျိုးအကြောင်းနဲ့ ရှင်းပြလိုက်တော့ ကားကို ဆက်ပြီးထွက်ခွင့်ပေးပါတယ်။ အဲဒီကျတော့မှပဲ ရင်ထဲကအလုံးကြီး ကျသွားသလို ခံစားရတော့တယ်။ အေးအေးဆေးဆေးရှိသွားလို့ စကားပြောမယ် ဟန်ရေးပြင်တုန်း စစ်ကြောရေးဂိတ်ထဲက အမျိုးသမီး ၂ ဦး၊ အမျိုးသား ၇ ဦး ပြေးထွက်လာပြီး ကားပေါ် အလုအယက် ပြေးတက်ကြတာကို အံ့အားသင့်ရင်း လှမ်းပြီးအကဲခပ်မိကြပါတယ်။

ကျမလည်း သူတို့ ဘာဖြစ်လို့ အပြေးတပိုင်းဖြစ်နေကြတယ်ဆိုတာ သိချင်စိတ်ဖြစ်လာတာနဲ့ ကားလည်းပြန်ထွက်ရော နဘေးက သူငယ်ချင်းကို လက်တို့ပြီး မေးမိတယ်။ သူတို့ကိုကြည့်ရတာ တိုင်းရင်းသားတွေဆိုတာသိနိုင်ပေမယ့် ဘာ လူမျိုးမှန်း အတိအကျတော့ မခန့်မှန်းနိုင်ဘူးပေါ့။ ကျမမိတ်ဆွေက ကရင်လိုစပြီး နှုတ်ဆက်ကြည့်လိုက်တော့ အပြန်အလှန် ပြောလိုက်ကြတာ။ သူတို့ဘယ်လိုအဖမ်းခံရပြီး ဘယ်လိုအနှိပ်စက်ခံရတယ်ဆိုတာ အလုံးစုံ သိလိုက်ရပါတော့တယ်။ ကျမတို့လူသိုက် စိတ်မကောင်းအတော့်ကို ဖြစ်ကုန်ကြတာပေါ့။ ရှိစုမဲ့စု ပိုက်ဆံ အကုန်စုပြီး ဘတ် ၃ဝဝဝ ဒဏ်ငွေအဖြစ် ပေးလိုက်ရတယ်လို့ ပြန်ပြောပြနေတဲ့ အဒေါ်ကြီးရဲ့မျက်နှာမှာလည်း မျက်ရည်တွေနဲ့။ သူတို့အဖို့တော့ ဒီ ဘတ် ၃ဝဝဝ ရဖို့ဆိုတာ အတော့်ကိုခြိုးခြံပြီး စုထားရတာနေမှာပါ။

ဒီလူစုကြည့်ရတာ ဘယ်နှစ်ရက်လောက်အချုပ်ခံခဲ့ရပြီး ဘယ်လောက်ဒုက္ခရောက်ခဲ့ရတယ်ဆိုတာ မေးစရာတောင် မလိုလောက်အောင်ပါပဲ။ အဝတ်တွေကလည်း ညစ်နွမ်းပြီး မျက်တွင်းတွေကလည်း ဟောက်ပက်နဲ့၊ စာနယ်ဇင်းတွေထဲမှာ တွေ့ရတဲ့ အီသီယိုးပီးယား ဒုက္ခသည်တွေလား ထင်ရတယ်။ တဖက်သား ဒုက္ခရောက်တာကို ကိုယ်တိုင်မြင်တွေ့ရပေမယ့် လမ်းခရီးမှာဆိုတော့ ဘာမှထိထိရောက်ရောက် မကူညီနိုင်ကြဘူး။ ဒီအတွက် စိတ်မကောင်း ဖြစ်ကြရတယ်။ မဲဆောက်မှာ ဆို ဘာပဲပြောပြော နှိုင်းယှဉ်ချက်အရ အထိုက်အလျောက်တော့ ကူညီနိုင်ကြမှာပါ။

ကျမထင်တာ သူတို့တတွေဟာ အုန်းဖြန် ဒါမှမဟုတ် နိုဖိုး ဒုက္ခသည်စခန်းကလူတွေပဲလို့ ထင်ခဲ့တာ။

သူတို့ပြောပြမှ တောင်ယာတွေထဲမှာ တနေရာက တနေရာရွှေ့ပြောင်းပြီး ကျဘမ်းလုပ်ကိုင်စားသောက်နေရတဲ့ မြန်မာပြည် က ဒုက္ခသည်တွေဆိုတာ သိလိုက်ရတယ်။ တောင်ယာတခုကနေတခု အလုပ်ရှိရင်ရှိသလို ပြောင်းရွေ့လုပ်ကိုင် စားသောက်ကြရတဲ့ ဂျစ်ပစီလို နေကြရတဲ့လူတွေတဲ့။ လူ့ယဉ်ကျေးမှုတွေ မထွန်းကားသေးခင်ကာလ ကမ္ဘာဦးအစက ရေကြည်ရာမြက်နုရာ ရွှေ့ပြောင်းသွားလာနေရတဲ့ မာနုတို့ ဂူရီးတို့လို ဘဝမျိုးမှာ သူတို့ကို ဘယ်သူက ကျောက်ချထား တာလဲ။

အဲဒီလိုကျမစဉ်းစားနေတုန်း သူငယ်ချင်းက သူတို့အကြောင်းကို ဘာသာပြန်ပြီး ပြောပြပါတယ်။

နေထိုင်ခွင့်လက်မှတ်ရယ်လို့လည်း ဘယ်သူမှမရှိကြတော့ ရဲအဖမ်းခံရတာကလည်း ခဏခဏပဲ တဲ့။ တောထဲမှာ သွားရင်း လာရင်း မသင်္ကာလို့ ရဲက ပစ်သတ်တာမျိုးတွေတောင် ရှိတယ်တဲ့။

နအဖရဲ့ အတင်းအဓမ္မ ခိုင်းစေလို့၊ ရွာမီးရှို့ဖျက်ဆီးခံရလို့ ထွက်ပြေးနေရတဲ့ ကရင်ဒုက္ခသည်တွေဆိုတာလည်း သိခဲ့ရတယ်။

သူတို့လိုပြေးလွှားနေရသူ အများစုဟာ ဒီလိုအဖြစ်ဆိုးတွေနဲ့ တနေ့မဟုတ်တနေ့ တွေ့ကြုံခဲ့ရဖူးတဲ့ လူတွေချည်းပဲ တဲ့။

ကမ္ဘာဦးလူသားကမှ သဘာဝဘေးဒဏ်နဲ့ပဲ တိုက်ပွဲဆင်ရတယ်။ သူတို့မှာတော့ မြန်မာစစ်တပ်လည်းကြောက်ရ၊ ထိုင်းရဲလည်း ကြောက်ရ၊ ရောဂါပေါင်းစုံကိုလည်းကြောက်ရနဲ့ ကမ္ဘာဦးလူသားထက်တောင် ဒုက္ခတွေပိုကြီးနေပါလားလို့ ကျမ တယောက်တည်း စဉ်းစားနေမိပါတယ်။

(၃)

ဒုက္ခသည်တွေဟာ ပိုက်ဆံကုန်လို့ပဲဖြစ်ဖြစ်၊ အကြောင်းကိစ္စကြီးငယ်ရှိလို့ပဲဖြစ်ဖြစ် မဲဆောက်ကို သွားလိုက်ပြန်လိုက်လုပ် ကြရပါတယ်။ တခါတလေ ခွင့်ထောက်ခံစာ မတောင်းနိုင်တော့ဘဲ ကိုယ့်ကိစ္စနဲ့ကိုယ် အရေးပေါ်လာလို့ သွားရတာမျိုးလည်း ရှိတယ်။ အဲဒီလိုမျိုးဆိုရင် ဘာထောက်ခံစာမှ မပါတဲ့အတွက်ကိုပဲ အဖမ်းခံရတတ်ပါတယ်။ အဲဒီအချိန်မျိုးဆို တချို့လည်း ငွေပေးပြီး ဖြေရှင်းလို့ရတယ်။ တချို့လည်း ဖြေရှင်းလို့မရဘူး။ အမျိုးမျိုးပါပဲ။ အစကတော့ လမ်းမှာဖမ်းတယ်ပြောရင် ကျမ မယုံဘူး။ ကိုယ်တိုင်မျက်စိနဲ့မြင်တွေ့ရမှပဲ ကြောက်ရမှန်းသိတော့တယ်။ ကျမတို့ အဖမ်းခံရတုန်းကဆိုရင် အချုပ်ခန်းမှာ ညမအိပ်ရဘဲ တနေ့ထဲနဲ့ဖြေရှင်းလို့ရအောင် ဘတ် ၅ဝဝဝ ပေးလိုက်ရတယ်။ အဲဒီလို မဟုတ်ရင်တော့ လူကယ်ရီမှု၊ မှောင်ခိုမှု စတဲ့ အမှုမျိုးစုံတပ်ပြီး ထောင်ချပစ်နိုင်တယ်။

အချုပ်ခန်းထဲက ပြေးထွက်လာတဲ့ ဒုက္ခသည်တွေကို မြင်လိုက်ရတဲ့အခါ ငါသာ သူတို့လိုအဖြစ်ဆိုးတွေနဲ့ ရင်ဆိုင်ရရင် ဘာဖြစ်မလဲဆိုတာတွေးကြည့်ပြီး အသက်ရှူကြပ်လာတယ်။

ဒီတခေါက်ခရီးစဉ်ဟာ ကျမအဖို့ အတော်စိတ်မကောင်းစရာတွေ၊ သင်ခန်းစာယူဖို့ အတွေ့အကြုံတွေအမျိုးမျိုးနဲ့ ဆက်တိုက်ကြုံ တွေ့ခဲ့ရပါတယ်။

(၄)

လမ်းခရီးက ခေါင်လွန်းတော့ လမ်းခုလပ်တနေရာမှာ၊ တောတောင်တွေထဲက နောက်ထပ်ခရီးကြုံလိုက်မယ့်လူ မရှိတော့ပေဘူးလို့ ထင်ထားတာ၊ နောက်တနေရာလည်းရောက်ရော လူတယောက်ဟာ သစ်ပင်အကွယ်လေးကနေ ကားကို လှမ်းအော်ပြီး တားလိုက်ပါတယ်။ ကားရပ်တယ်ဆိုရင်ဘဲ နောက်ထပ် လူ ၅ ယောက်ဟာ သစ်ပင်ချုံကွယ်တွေ ကြားထဲက အပြေးအလွှားထွက်လာကြပါတယ်။ သူတို့ကိုယ်မှာလည်း အဝတ် ၂ စုံလောက်ကို ပုဆိုးနဲ့ ပတ်လိမ်ပြီး သိုင်းထားလို့။ သူတို့နောက်က ရန်သူလိုက်လာသလိုမျိုး ပြူးပြူးပြာပြာနဲ့ ကားပေါ်ကို အတင်းပြေးတက်ကြပါတယ်။ ကျမ သူငယ်ချင်းက ဒီလမ်းခရီးရဲ့အတွေ့အကြုံရှိသူဆိုတော့ သူကရှင်းပြပါတယ်။ ဒီလူတွေဟာ လက်မှတ်မရှိလို့ ဂိတ်တွေ ကိုရှောင်ပြီး လမ်းလျှောက်လာသူတွေဆိုတာ ကျမ သိခဲ့ရတယ်။ ကျမအဖို့တော့ (Action) ရုပ်ရှင်ကားတကား ကြည့်နေရ သလို သည်းထိပ်ရင်ဖိုဖြစ်လို့။ တခါတလေ အသက်ရှုဖို့တောင် မေ့လျှော့နေခဲ့မိတယ်။

တောင်တက်လမ်းတနေရာမှာ ကားက နောက်တခါ ရပ်သွားပြန်ပါတယ်။ ကားရပ်လို့ ကြည်လိုက်တော့ မိန်းမကြီးတဦးက ကားတားပြီး ကလေးမလေးတယောက်ကို ကားပေါ်တင်ပေးတယ်။ ကားသမားကလည်း ပိုက်ဆံရရင်ပြီးရောဆိုတဲ့စိတ်နဲ့ ထင်ပါရဲ့။ ရတယ် တက်ပါဆိုတာမျိုး ပြောလိုက်တယ်။ ဒါပေမယ့် ကလေးမလေးဟာ ကားပေါ်ဘယ်လိုမှမတက်ဘဲ အတင်းကိုရုန်းကန်နေတော့တာပဲ။

“သမီး မလိုက်ရဲဘူး၊ သမီး ကြောက်တယ်၊ အဖမ်းခံရလိမ့်မယ်”လို့ ငိုရင်းပြောပြနေတဲ့အသံ၊ ထိတ်လန့်နေတဲ့ ကလေးမလေးရဲ့မျက်နှာကို ကျမအိမ်ရောက်တဲ့အထိ ဖျောက်မရအောင် ကြားနေ မြင်နေတော့တယ်။

ကလေးမလေးဟာ ဘာကြောင့် ဒီလောက်အကြောက် အကန်ဖြစ်နေရတာလဲ။

ကားတင်ပေးတဲ့ အဒေါ်ကြီးကလည်း အဲဒီကလေးမလေးနဲ့ ဘယ်လိုတော်စပ်သလဲ။

ကလေးမလေးရဲ့အမေရော ဟုတ်ရဲ့လား။

ကျမမှာ မေးခွန်းတွေနဲ့ အတော်ရှုပ်ကျန်ခဲ့ပါတယ်။ ဒီလောက်တောင် ကြောက်လန့်နေပုံကိုထောက်ရင် ကလေးမလေးရဲ့ သောကကို လူတိုင်းမှန်းဆကြည့်လို့ ရနိုင်မယ်ထင်ပါတယ်။ ဘယ်လိုအဖြစ်ဆိုးတွေနဲ့များ ရင်ဆိုင်ကြုံတွေ့ခဲ့ရတယ် ဆိုတာကိုတော့ ကာယကံရှင် ကလေးမလေးမှပဲ အသိဆုံးဖြစ်မယ် ထင်ပါတယ်။

(၅)

ကျမ စဉ်းစားကြည့်ပါတယ်။

ကျမတို့ မြန်မာနိုင်ငံရဲ့စီးပွားရေးချွတ်ချုံကျမှုကြောင့် တိုင်းရင်းသားပေါင်းစုံ ပြည်သူလူထုတရပ်လုံးဟာ အခက်အခဲ အကြပ်အတည်း အမျိုးမျိုးနဲ့ ရင်ဆိုင်နေရတယ်။ အရင်းစစ်လို့ အမြစ်လှန်လိုက်တော့ ဒီအဖြစ်ဆိုးတွေဟာ တိုင်းပြည်ကို တရားမဝင် မတရားအုပ်ချုပ် မင်းလုပ်နေတဲ့ နအဖ စစ်ဗိုလ်ချုပ်ကြီးတွေကြောင့်ပါပဲ။

ကိုယ့်မြေကိုယ့်ရေမှာ အလုပ်အကိုင်က ရှားပါး၊ ဝင်ငွေနဲ့ ထွက်ငွေက မမျှတ၊ အတင်းအဓမ္မ လုပ်အားပေးခိုင်းစေမှုတွေက လည်း ဆက်ကာဆက်ကာဖြစ်ဆိုတဲ့ ဖိနှိပ်မှုဒဏ်တွေကြောင့် မြန်မာပြည်သူတွေဟာ အိမ်နီးချင်းတိုင်းပြည်တွေကို တရား မဝင်သွားရောက်ကြပြီး ကြုံရာကျဘမ်း လုပ်ကိုင်စားသောက်နေကြရပါတယ်။ ကျမ သိသလောက်ဆိုရင် တရားမဝင် လာရောက်လုပ်ကိုင်နေသူ အရေအတွက်ဟာ ၂ သန်းကျော်ကျော် ရှိတယ်လို့ ဆိုပါတယ်။ ထိုင်းနိုင်ငံကို ရောက်လာတဲ့ အချိန်မှာလည်း ဒုက္ခတွေ၊ အဖြစ်ဆိုးတွေနဲ့ ရင်ဆိုင်ကြရပြန်တယ်။ မဲဆောက်ရဲ့ တနေ့လုပ်ခဟာ ၁၄၃ ဘတ် လို့ ကျမ ကြားဖူးတယ်။ ဒါပေမယ့် ဘယ်မြန်မာအလုပ်သမားမှ သတ်မှတ်ထားတဲ့နေ့စားခကို အပြည့်အဝ မရကြဘူး။ နည်းအမျိုးမျိုးနဲ့ ခေါင်းပုံဖြတ်ခံနေရတယ်ဆိုတာတွေကို နေ့စဉ်နဲ့အမျှ ကြားနေရပါတယ်။

လုပ်ခအတိအကျရရေး တင်ပြတောင်းဆိုမိလို့ အလုပ်ဖြုတ်ခံရတာ၊ အလုပ်သမားလက်မှတ် (ထိုင်းနိုင်ငံအခေါ် ဘတ်) ကို ကိုယ်တိုင် ကိုင်ဆောင်ခွင့်မပေးဘဲ ထိုင်းသူဌေးက ကိုင်ထားတဲ့အတွက် လမ်းမှာရဲနဲ့တွေ့ရင် ရှင်းမရဖြစ်ကြရတာ၊ ဖမ်းပြီး တရားမဝင်လာရောက်သူအဖြစ် သောင်ရင်းတဖက်ကမ်းကို အမှိုက်သွန်သလို သွားအသွန်ခံရတာ၊ အမျိုးမျိုးသော ကံကြမ္မာ ဆိုးတွေကြောင့် ဘယ်တုန်းကမှ စိတ်ကူးထဲမှာတောင် မရှိခဲ့ဖူးတဲ့ မကောင်းတဲ့မိန်းကလေးများအဖြစ်ကို ရောက်သွားရတာ စတဲ့ စတဲ့ ဒုက္ခတွေဟာ ထိုင်းနိုင်ငံရောက် မြန်မာပြည်သူတွေ ကြားမှာ မဆုံးနိုင်တဲ့ ဇာတ်လမ်းတွေ ဖြစ်နေကြရပါတယ်။

အခုလို ဒီမိုကရေစီအထိုက် အလျောက်ရှိတဲ့ နိုင်ငံမှာတောင် မြန်မာပြည်သားတွေဟာ လူ့အခွင့်အရေးမရှိ၊ သက်စွန့်ဆံဖျား လုပ်ကိုင်စားသောက်နေကြရတယ်ဆိုရင် စစ်အာဏာရှင်တွေရဲ့ မတရားဖိနှိပ်အုပ်ချုပ်မှုအောက်မှာ မြန်မာပြည်သူတွေ ဘယ်လိုဒုက္ခတွေများ ခါးစည်းခံနေရမလဲဆိုတာ စဉ်းစားကြည့်လို့ ရနိုင်ပါတယ်။

(၆)

ကျမတို့ ဘာတွေ လုပ်နိုင်မလဲ။

ဒီအဖြစ်ဆိုးတွေကို ဒီလိုပဲ ခေါင်းငုံ့ခံနေကြရမှာလား။

စစ်အာဏာရှင်တွေဟာ ကျမတို့ကို ဒီလိုပဲ အနိုင်ကျင့်ဗိုလ်ကျခွင့်တွေ အမြဲရနေတော့မှာပဲလား။

အဲဒီလို ကျမ မထင်ဘူး။

ကျမတို့ အသေအချာ လွတ်မြောက်လိမ့်မယ်။ အဲဒီလို လွတ်မြောက်ဖို့ဆိုတာကလည်း ဘယ်ကယ်တင်ရှင်မှ မရှိနိုင်ဘူး။

ကျမတို့လွတ်မြောက်ဖို့အတွက် ဆောင်ရွက်နိုင်သူဟာ ကျမတို့ကိုယ်တိုင်ပဲဆိုတာ ကျမ ပိုပြီးလေးနက်လာမိပါတယ်။

ကျမ ရင်ထဲမှာ …

တနေ့တခြားဆိုးဝါးလာတဲ့ လူမျိုးပေါင်းစုံပြည်သူတွေရဲ့ ဒုက္ခတွေ၊ ခံစားမှုတွေကို မြင်တွေ့ ကြုံတွေ့ရတိုင်း ကျမတော့ မြန်မာပြည်ကို ဒီမိုကရေစီ အမြန်ဆုံးရစေချင်တယ်။ မဝေးတော့တဲ့ အခြေနေမှာလည်း ပြုပြင်ပြောင်းလဲမှုတွေ ဖြစ်ပေါ်လာ စေချင်တယ်။

မြန်မာပြည်သူတွေ ကြောင့်ကျမဲ့စွာနဲ့ သူတို့ဘဝတွေ ရှင်သန်ဖွံ့ဖြိုးစေအောင် ဆောင်ရွက်နိုင်ခွင့် လွတ်လွတ်လပ်လပ် ရစေချင်တယ်။

သေချာတယ်။ ကျမတို့ အများကြီး ဆက်ပြီးကြိုးစားကြရလိမ့်မယ်။

အင်ကြင်းမေ

(၁၃-၂-၂ဝဝ၇)


Thursday, September 24, 2009

ကျောင်းသား ထောင် တော်လှန်ရေးသမား (၄)



တပ်ဦးညီလာခံ

အဲဒီတပ်ဦးညီလာခံမမှာ ဥက္ကဋ္ဌက ပဲခူးရိုးမမှာ သေဆုံးသွားတဲ့ ကိုကျော်ခင်၊ အတွင်းရေးမှူးက ပေါင်းလောင်းဘက်မှာ အစိုးရနဲ့တိုက်ပွဲဖြစ်ရင်း ကျသွားတဲ့ ကိုသောင်းရွှေ၊ ကျနော်က တွဲဖက်အတွင်းရေးမှူး။ အဲဒီလိုဖြစ်လာတယ်။ ဒီအမှုဆောင် အဖွဲ့က နောင် သမဂ္ဂရွေးကောက်ပွဲမှာဝင်ဖို့ အားပြင်တဲ့ အဓိပ္ပာယ်ပဲ။

အဲဒီလို ကျနော်တို့ တဖက်က ကိုယ့်အတွင်းစည်းရုံးရေးကိုပြန်လုပ်ပြီးတော့ အပြင်ဘက်မှာလည်း ပြည်တွင်းငြိမ်းချမ်းရေး ဆန္ဒပြပွဲတွေမှာ တက်တက်ကြွကြွ ဝင်ပါကြတယ်။ ကျနော်တို့ ကျောင်းသားသမဂ္ဂ ခေါင်းဆောင်တွေဟာ အဲဒီ ပြည်တွင်း ငြိမ်းချမ်းရေးအဖွဲ့ အလုပ်လုပ်တဲ့နေရာတွေမှာ အောက်ခြေသိမ်းကအစ ကျနော်တို့ ဝင်လုပ်တယ်။

မှတ်မှတ်ရရ ကျနော်ဆိုလို့ရှိရင် ဟို … သုခဝတီပုံနှိပ်တိုက် အနောက်ဘက်က ဦးသန်းဖေအိမ်မှာ အဲ … ညတိုင်း ပိုစတာ ရေးတာ။ ကျနော်ခုနပြောတဲ့ ကိုသောင်းရွှေတို့နဲ့အတူသွားပြီး ညတိုင်း ပိုစတာရေး၊ ကိုယ့်ဟာကိုယ် ကော်တွေကျို၊ အောက်လင်းဓာတ်မီးထွန်း၊ ပြီးတော့ အမရပူရ ပို့၊ မတ္တရာ ပို့၊ မန္တလေးမှာ ၆ ခရိုင်ငြိမ်းချမ်းရေး ဆန္ဒပြပွဲကြီးလုပ်ဖို့ အစီအစဉ် ရှိတာကိုး။ အဲဒီ ဆန္ဒပြပွဲကြီးမှာပါမယ့် ပိုစတာတွေ ပို့ရတယ်။

ကျနော် မှတ်မှတ်ရရ ဒီမှာပြန်ပြောချင်တာက ခုနပြောတဲ့ တပ်ဦးညီလာခံလုပ်တဲ့အခါကျတော့ အရင်တပ်ဦး ကောင်စီဝင် (တပ်ဦးအဖွဲ့ဝင်ပေါ့ဗျာ) အားလုံးတက်ခွင့်ရှိတာဆိုတော့ တက်လာကြတယ်။ တက်တာ မကန့်သတ်ပါဘူး။ မဲပေးတာတော့ တပ်ဦးကောင်စီဝင်တွေမှာ မဲပေးခွင့်ရှိတယ်။ တက်လာကြတဲ့အထဲမှာ မဆလကို ထောက်ခံပြီးတော့ စစ်အစိုးရလုပ်တာ မှန်ပါတယ်ပြောကြတဲ့ အရင်တပ်ဦးဟောင်းတွေလည်း ပါလာတယ်။ သူတို့လည်း လာတက်တယ်။ တက်ခွင့်ရှိတယ်။ လုံးဝမကန့်ကွက်ဘူး၊ တက်ပါ။ သူတို့လည်း အဲဒီမှာ ဝင်ပြော၊ အမှုဆောင်အတွက် သူတို့လူကို တင်တဲ့ အခါကျတော့ တခါတည်း ခွက်ခွက်လန် နှာခေါင်းကျည်ပွေ့တွေ့တာပဲ။

ဟိုမှာကတော့ ယဉ်ယဉ်ကျေးကျေး သိမ်သိမ်မွေ့မွေ့ ဖြစ်ကြတဲ့အတွက် သူတို့ကို ဟားတိုက်တာတို့၊ အော်တာတို့၊ မောင်းထုတ်တာတို့ အဲလိုတော့ မရှိဘူး။ ဒါပေမယ့် အဆုံးအဖြတ်က အညှာအတာကင်းတယ်။ သူတို့ကို ထောက်ခံတဲ့လူက သူတို့လူလေး ၃-၄ ယောက်။ အဲဒါအပြင် နောက်ထပ် ဘယ်သူမှမရှိဘူး။ ကျန်တဲ့ ခန်းမတခုလုံးက သူတို့ကို မသိကျိုးကျွန်ပြုထားလိုက်တာ။ အဲလိုနဲ့ ခွက်ခွက်လန်ပဲ။ သူတို့ကို နောက်ရက်တွေမှာ တွေ့ကိုမတွေ့ရတော့ဘူး။

ဆိုလိုတာက အဲဒီကတည်းက ကျောင်းသားတွေရဲ့စိတ်ထဲမှာကတော့ ပြတ်နေပြီ။ စစ်အစိုးရနဲ့ ပတ်သက်ရင် ကျောင်းသားတွေဘက်က ပြတ်တယ်။ မြင်တယ်။ ဘယ်သူမှ မမြင်တာမဟုတ်ဘူး။ အရင်ခေတ်ကျောင်းသားလှုပ်ရှားမှု လုပ်ရတာနဲ့ကို မတူဘူး။ လူစုဖို့က သိပ်လွယ်တယ်။ အမျိုးသမီးတွေလည်း သိပ်တက်ကြွတယ်။ နောက်ခုနက အဲဒီ မဆလ ကိုထောက်ခံတဲ့သူတွေကလည်း တခါတည်း ခွေးတိုးဝက်ဝင်နေရာလေးလောက်တောင် မရဘဲနဲ့ အဲဒီညီလာခံထဲကနေပြီး တော့ ခေါင်းငုံ့ပြီး ထွက်သွားကြရတာ။ ကျနော် ဒီနေ့အထိ မှတ်မိနေသေးတယ်။ သူတို့နာမည်တွေ မပြောတော့ပါဘူး။ အခုထက်ထိ ရှိနေပါသေးတယ် တချို့က။

ဒီနေရာမှာ ကျနော်ပြောချင်တာက ကျောင်းသားသမဂ္ဂထဲကို ကျနော်တို့ပါလာကြတာဟာ တခုက အခြေအနေ အချိန်အခါက တောင်းဆိုလို့၊ တွန်းပို့လို့ဖြစ်လာတာ။ နောက် ဒုတိယအချက်က ကျနော်တို့ကို အကူအညီပေးတဲ့ (အကူ အညီပေးတယ်ဆိုတာက ဟို … တည့်တည့်ပြောရင် သွန်သင်ဆုံးမသလိုပဲဗျာ) အဲလိုလုပ်ပေးတဲ့ နောင်တော်၊ အမတော် ကျောင်းသားခေါင်းဆောင်တွေ ရှိတယ်။ ကျနော်တို့တတွေ ဒီလို တာဝန်တွေယူလာရတာ။

သူတို့ဆီက ကျနော်တို့ရတာ ဘာတွေလည်းဆိုတော့ တခုက အသိ၊ ကျောင်းသားအရေးဟာ မှန်တယ်ဆိုတာ တင် မလုံလောက်ဘူး။ ဘယ်လိုလုပ်ရမလဲ၊ ဘယ်ဟာမှမှန်တယ်။ တရားအရသိအောင်၊ ဒီဟာတွေကို အတွေးအခေါ် ဖြစ်လာအောင် သူတို့ဆီက လက်ခံရရှိတာ။ နောက်တခုက အဲဒီအတွေးအခေါ်နဲ့ဆက်စပ်တဲ့၊ အတွေးအခေါ်ကနေ ထပ်ပြီးပေးလာတဲ့ သတ္တိ။

ကျနော် ရှင်းအောင်ပြောပါမယ်။ လူတွေမှာ သတ္တိဆိုတာရှိတယ်။ ဒါပေမယ့် သတ္တိဆိုတာ ဘယ်နေရာမှာ သတ္တိရှိ တာလဲ။ ဘာအတွက် သတ္တိရှိတာလဲ။ အဲဒါကျတော့ တယောက်နဲ့တယောက် မတူတော့ဘူး။ အဲ … “လူရိုက်ရဲတယ်ကွာ” အဲဒီသတ္တိဟာ ဆန္ဒပြပွဲမှာ ရှေ့ကအလံကိုင်ပြီး တက်ရဲတဲ့သတ္တိနဲ့ တူပါ့မလား။ မတူပါဘူး။ တခြားစီပါ။ ခုနက အလံကိုင်ပြီးတိုက်တဲ့သတ္တိမျိုးဆိုတာ သာမန်မိုက်စိတ်လောက်နဲ့ ရတာမဟုတ်ဘူး။ သူ့ခေါင်းထဲမှာ၊ သူ့ရင်ထဲမှာ ဒီအရေးတော်ပုံ၊ ဒီဆန္ဒပြပွဲ၊ ဒီတိုက်ပွဲက မှန်ကန်တယ်။

အဲဒီအတွက် အနစ်နာခံရတာ၊ စွန့်လွှတ်ရတာ၊ နောက်ဆုံး အသေခံရတာဟာ မှန်တယ်၊ မြင့်မြတ်တယ်ဆိုတဲ့ အတွေးအခေါ် ခေါင်းထဲကို မြဲမြဲရှိမှ အဲဒီလို လုပ်နိုင်တာ။ အဲဒါမှ တကယ့်သတ္တိ။ အဲဒီလို သတ္တိမျိုး ကျနော်ပြောသလို အဆက်ဆက်က နောင်တော် အမတော်တွေရဲ့ သွန်သင်မှု၊ အဆက်ဆက်က အာဇာနည်တွေရဲ့ ရပ်တည်မှု၊ လှုပ်ရှားမှုတွေကို ကျနော်တို့ ကြည့်ပြီးမှ ကိုယ့်ဟာကိုယ် မွေးယူတည်ဆောက်ခဲ့ရတာ ဖြစ်ပါတယ်။

အဲဒီတော့ ကျနော် ပြန်ဆက်ပြီးပြောမယ်။ ၆၃ ခုနှစ်မှာ အဲ … ဒုတိယ နှစ်ဝက်လောက်ကစပြီးတော့ ပြည်တွင်း ငြိမ်းချမ်းရေး လှုပ်ရှားမှုဟာ အရှိန်မြင့်လာတယ်။ အသေအချာလည်း အကောင်အထည်ပေါ်လာတယ်။ အစိုးရနဲ့ တောတွင်း လက်နက်ကိုင်အဖွဲ့အစည်းတွေနဲ့ ဆွေးနွေးလာတာတွေလည်း များများစားစား လုပ်လာတယ်။ အဲဒီတော့ အဲဒီဟာတွေ များလာတာနဲ့အမျှ ကျနော်တို့ပြည်သူလူထုဘက်ကလည်း လှုပ်ရှားမှုတွေ များလာတယ်။ ပိုပြီးကျယ်ပြန့်လာတယ်။ ပိုပြီးတော့ နက်ရှိုင်းလာတယ်။

အဲဒီအတွက် ကျနော်တို့ကျောင်းသားတွေ အစွမ်းကုန် ပါဝင်ခဲ့တယ်။ ကျောင်းသားတွေ၊ ကျောင်းသူတွေ ဆန္ဒပြပွဲကြီးတွေမှာ ပါတယ်။ အလှူငွေကောက်ခံတဲ့ အဖွဲ့တွေမှာ ကျောင်းသားတွေပဲ။ အဲ … နောက်ပြီး ဒီဟာကို ဝါဒဖြန့်တဲ့နေရာမှာလည်း စာရွက်စာတမ်းတွေ လိုက်ဝေတဲ့နေရာမှာလည်း ကျနော်တို့ ကျောင်းသားတွေ ပါတာပဲ။ တခြားလူ့အလွှာ၊ လူတန်းစားတွေပါ ပါတယ်နော်။ မပါတာမဟုတ်ဘူး။ ကျနော်တို့ကျောင်းသားတွေ တတပ်တအား ပါဝင်တယ်ဆိုတာ ပြောတာပါ။

ဒါပေမယ့် အားလုံးသိတဲ့အတိုင်းပဲ။ ဒီ … တော်လှန်ရေးကောင်စီဆိုတဲ့ အစိုးရဟာ ဒီ … ငြိမ်းချမ်းရေးဆိုတာကို တကယ်လုပ်လာလုပ်လာရင်းနဲ့ နောက်ဆုံးကျတော့ သူ့ဇာတ်သူ မနိုင်တော့ဘူးဆိုတာ သူ သိလာတယ်။ အဲဒီ သူ့ဇာတ်သူ မနိုင်တော့ဘူးဆိုတာ သိလာတဲ့အခါကျတော့ ငြိမ်းချမ်းရေး ဆွေးနွေးပွဲဆိုတာကို တုံးတိကြီး ဖျက်ချတော့တာ။

အဲဒီ ငြိမ်းချမ်းရေး ဆွေးနွေးပွဲဆိုတာလည်း ဖျက်လိုက်ရော၊ တခါတည်း တပြည်လုံးမှာ လူဖမ်းပွဲတွေလုပ်တယ်၊ ဖမ်းတာမှာ ငြိမ်းချမ်းရေးလှုပ်ရှားမှုမှာ တက်တက်ကြွကြွ ပါဝင်တဲ့ လူဆိုလို့ရှိရင် (ဆရာကြီး သခင်ကိုယ်တော်မှိုင်းလို လူလောက်ကို ချန်ပြီးတော့) ကျန်တာတွေ အကုန်လုံးဖမ်းတာပဲ။ အဲဒီနောက် ကျောင်းသားတွေကိုလည်း ဖမ်းတယ်။ သမဂ္ဂနဲ့ပတ်သက်တဲ့ လှုပ်ရှားမှုမှန်သမျှကိုတော့ အကုန်လုံးလိုက်ဖျက်တယ်။ ဟို … ရန်ကုန်တက္ကသိုလ်က သမဂ္ဂဝါးကပ်တဲကြီးလည်း အဖျက်ခံရတယ်။

ဒီအချိန်မှာတော့ စစ်အစိုးရဟာ သူတို့အာဏာသိမ်းခါစကထားတဲ့ ရည်မှန်းချက်ကို အပြတ်အကောင်အထည် ဖော်ခဲ့တယ်။ စောစောကတော့ ကျနော် ခုနက ပြောခဲ့သလိုပဲ အကြောင်းကြောင်းကြောင့် သူတို့က အပြတ်မလုပ်ရဲသေး ဘူး။ မလုပ်ဝံ့သေးဘူး။ လုပ်လို့မရသေးဘူးဖြစ်နေတယ်။ အခုကျတော့ သူတို့ဆုံးဖြတ်လိုက်တယ်။ အဲဒီငြိမ်းချမ်းရေး ဆွေးနွေးပွဲပြီးတဲ့အချိန်ကစပြီး သူတို့က ဗမာပြည်မှာ စစ်တပ်ကလွဲပြီး ဘယ်သူမှ နိုင်ငံရေးလုပ်ခွင့်မရှိစေရဘူးဆိုတဲ့ ဆုံးဖြတ်ချက်ကို ချလိုက်တာပဲ။

ဆက်လက်ဖော်ပြပါမယ်။

Tuesday, September 22, 2009

ကျောင်းသား ထောင် တော်လှန်ရေးသမား (၃)


အဲဒီလိုနဲ့ ၆၃ ခုနှစ် ‘စေ့စပ်ရေး’ မျက်လှည့်ပြပွဲကြီး ရောက်လာရော။ အဲဒီကျတော့ သူတို့လည်း နည်းနည်းပါးပါး ကိုယ်ရှိန် သတ်ထားရတယ်။ ဒါကို အခွင့်ကောင်းယူပြီး ကျနော်တို့ကျောင်းသားသမဂ္ဂတွေက အတင်းဗြောင်လှုပ်ရှားလို့ရအောင် တရားဝင်ပြန်ဖြစ်အောင် ကြိုးစားကြတယ်။ အဲဒီနောက် ကျနော်တို့ရဲ့ အဓိက ဦးတည်ချက် အဓိကရည်မှန်းချက်ဟာ နံပတ်(၁) သမဂ္ဂ တရားဝင်ရပ်တည်ခွင့်ရရေး။ အဲဒီရည်မှန်းချက်နဲ့ လုပ်တာ။

ကျနော် ဒီနေရာမှာ ရှင်းရှင်းပြောမယ်။ ဘယ်ခေတ် ကျောင်းသားပဲဖြစ်ဖြစ် တိုင်းပြည်မှာ ဖိနှိပ်သူ အုပ်စိုးသူရှိနေသမျှ ကာလပတ်လုံး သူတို့ရဲ့ အဓိက နံပါတ်တစ်၊ ပထမခြေလှမ်း အခြေခံအကျဆုံးလုပ်ရမယ့်ဟာက ‘သမဂ္ဂ ဖော်ထုတ်ရေး’ ဖြစ်တယ်။

ကျနော်တို့ ကျောင်းသားသမဂ္ဂ မရှိရင် ဘယ်လုပ်ငန်းမှ စုစုစည်းစည်း၊ ညီညီညွတ်ညွတ်၊ထိထိရောက်ရောက် မလုပ်နိုင်ဘူး။ (တကွဲတပြား ကျနော်တို့ လှုပ်ရှားမှုတွေ၊ အခုလည်း ပေါ်နေတာပဲ။ ထိရောက်သင့်သလောက် မထိရောက်ဘူး။) ကျောင်းသားသမဂ္ဂဟာမျိုးရှိမှ တပြည်လုံးကို ကိုယ်စားပြုတဲ့ တပြည်လုံးက ကျောင်းသားတွေ၊ (တပြည်လုံးဆိုတာ ဟိုး အထက်ဘက် ကချင်ပြည်နယ်ကနေ အောက်ဆုံး တနင်္သာရီအထိ) တပြည်လုံးကို ကိုယ်စားပြုတဲ့ ကျောင်းသားသမဂ္ဂ တွေရှိမှ ကျနော်တို့လုပ်ငန်းတွေဟာ တကယ်ထိရောက်မှာပါ။ ဒါ ခေတ်အဆက်ဆက် ကျောင်းသားတွေရဲ့တာဝန်၊ အရင်က ထမ်းခဲ့တဲ့တာဝန်၊ နောင် ထမ်းရမယ့်တာဝန်လို့ ကျနော်ပြောချင်တယ်။

အဲဒီတော့အခုနကပြောသလိုပဲ အစိုးရရဲ့ စေ့စပ်ဆွေးနွေးပွဲဆိုတဲ့ဟာကြီးကို အခွင့်ကောင်းယူပြီး ကျနော်တို့ သမဂ္ဂတွေ ပြန်ဖွင့်ဖို့လုပ်ကြတဲ့အထဲမှာ ရန်ကုန်မှာဆိုရင် ‘ယာယီသမဂ္ဂအဆောက်အဦ’ ဆိုပြီး ကပ်တဲကြီးတခု ဆောက်ခဲ့တယ်။ အဲဒီ ကပ်တဲကြီးကိုပဲ ဗဟိုပြု၊ အဲဒီထဲမှာပဲ စာလှိမ့်စက်တွေဘာတွေထားပြီးတော့ လှုပ်ရှားခဲ့ကြတယ်။

ကျနော်တို့ မန္တလေးမှာတော့ ငွေရေးကြေးရေးက အဲဒီလောက်အဆင်မပြေတော့ အဆောက်အဦတွေ ဘာတွေ မဆောက်နိုင်ဘူး။ ဒါပေမယ့် ကျနော်တို့ဆီက စီစဉ်ထားတာကလည်း ရန်ကုန်နဲ့ချိန်သားကိုက်ပြီး လှုပ်ရှားတယ်လို့ဆိုရလောက်အောင်ပဲ ရည်မှန်းချက်လည်း အတူတူ တင်ပြချက်လည်း အတူတူ၊ ခံစားမှုလည်းတူတာကိုးဗျ။ အကုန်လုံး အတူတူပဲ လှုပ်ရှားကြတာပါ။

ကျနော်တို့ အဲဒီတုန်းက သမဂ္ဂပေါ်ပေါက်ရေး လုံးပမ်းတယ်။ နောက်တခါ အဲဒီတုန်းကပေါ်နေတဲ့ ပြည်တွင်း ငြိမ်းချမ်းရေး အကောင်အထည်ဖော်ရေး၊ အကောင်အထည်ပေါ်ရေးလှုပ်ရှားမှုမှာ ကျောင်းသားတွေ တက်တက်ကြွကြွပါဝင်ပြီး ကျနော်တို့ လှုပ်ရှားကြပါတယ်။

ကျနော် မှတ်မိသေးတယ်။ ကျနော်တို့ သမဂ္ဂဖော်ထုတ်ရေး အတွက်အစီအစဉ်မှာ ရွေးကောက်ပွဲအတွက် ကျနော်တို့ပြင်ပြီး လုပ်ကြတာ။ ကျနော်တို့ခေါင်းထဲမှာ သမဂ္ဂဖော်ထုတ်ရေးဆိုတာ ပါးစပ်နဲ့ပြောနေတာ မဟုတ်ဘူး။ တကယ်ကို အစီအစဉ်ရှိရှိ လုပ်တာ။ ရွေးကောက်ပွဲအထိ စဉ်းစားထားပြီးသား။

ပထမဆုံးအနေနဲ့ ကျနော်တို့ဘာလုပ်သလဲဆိုရင် အဲဒီတုန်းက မြို့နယ် ဗကသတွေ ဖော်တယ်။ နောက်ပြီးကျတော့ ခရိုင် ဗကသတွေ ဖော်တယ်။ ကျနော်ဆိုရင် မန္တလေး အရှေ့မြောက်မြို့နယ် ဗကသမှာ ကျနော် အတွင်းရေးမှူးဖြစ်တယ်။ အဲဒါက ကျနော်တို့ မန္တလေး လက်ဆည်ကန် အောင်နန်းရိပ်သာအရှေ့ ၅၆၆၊ အကွက် ၁ဝ ဓမ္မာရုံမှာလုပ်တာ။ အဲဒီနားက တိုင်းချစ်တို့၊ နေရှင်နယ်တို့ … အဲဒီကျောင်းက ကျောင်းသားတွေ တက်ကြ တယ်။ အဲဒီကနေ တဆင့်တက်ပြီးတော့ ခရိုင်ဗကသကို ဖွဲ့တယ်၊ ရွေးတယ်။ အဲဒါက ဘယ်မှာလုပ်သလဲဆိုလို့ရှိရင် ရွှေကျီးမြင်ဘုရားထဲမှာ လုပ်တယ်။

အဲဒီမှာ ကျနော်က တွဲဘက်အတွင်းရေးမှူး ဖြစ်တယ်။ ကျနော်မှတ်မိနေတာ ဥက္ကဋ္ဌက ဟို ကဗျာဆရာ ကိုကြည်အောင် (လူနာမည်တော့ ကိုကြည်လင်)ပေါ့ဗျာ။ ကျနော့် အကိုကြီးတယောက်ပါ။ နောက်ပြီးကျတော့ ကဗျာဆရာမ မစိမ်းပင်တို့ (သူ့နာမည်အရင်းက မအေးစန်း)။ သူလည်း သမဂ္ဂလုပ်ငန်းနဲ့ပတ်သက်ရင် ကျနော့်ရဲ့ အမတော်တယောက်လို့ ပြောရမယ့် ဟာ တယောက်ပါ။ ကျနော့်ကို အများကြီးသင်ပေး သတ္တိမွေးပေးခဲ့တဲ့ အမျိုးသမီးတယောက်ပါ။ သူတို့နဲ့အတူ ကျနော်ဟာ ဒီလုပ်ငန်းထဲကို ပါဝင်လာရတာပါ။

ဆိုလိုတာ ကျနော်တို့အစီအစဉ်ရှိရှိ ခြေလှမ်းရှိရှိ လုပ်နေကြတာ။ အဲဒါတွေပြီးတော့ ဘာမှ မကြာဘူး။ ကျနော်တို့ မန္တလေးတက္ကသိုလ် ကျောင်းသားညီညွတ်ရေးတပ်ဦး အမှုဆောင်အဖွဲ့ကိ ပြန်ဖွဲ့တယ်။ ကျောင်းသား ညီညွတ်ရေးတပ်ဦး အမှုဆောင်အဖွဲ့ဆိုတာက အလွယ်တကူ ဖွဲ့လို့မရဘူး။

တပ်ဦးကောင်စီဆိုတာ တပ်ဦးအဖွဲ့ဝင်ဟောင်းတွေ ညီလာခံ ခေါ်ရတယ်။ အဲဒီလိုခေါ်ပြီး ညီလာခံကဖွဲ့မှ ညီလာခံမှာ မဲပေး၊ ဆန္ဒပေးပြီးတော့ရွေးမှ အတည်ဖြစ်တယ်။ ဒီတိုင်း ကိုယ့်ဟာကိုယ် လူတစုကြိတ်ပြီး လုပ်လို့ရတာ မဟုတ်ဘူး။ ဒါကြောင့်မို့ကျနော်တို့ မန္တလေးတက္ကသိုလ်အဝင်မှာ ရှိတဲ့ ပန်းခြံထဲမှာ တပ်ဦးညီလာခံကို ကျနော်တို့ ကျင်းပတယ်။ အလံတွေ တလူလူနဲ့ပေါ့။

ဆက်လက်ဖော်ပြပါမယ်။

Sunday, September 20, 2009

လင်ဆိုး မယား


လူတယောက်ကို

ရိုက်နှက်နှိပ်စက်တာဟာ ရာဇဝတ်မှုဖြစ်တယ် လို့

ဥပဒေမှာ ပြဌာန်းထားပါတယ်။ ယောင်္ကျားတယောက်က

သူ့ရဲ့ဇနီးမယားကို ရိုက်နှက်ညှဉ်းဆဲတယ်ဆိုတာလည်း ရာဇဝတ်မှုတခုပါပဲ။

ဒါပေမယ့်

ဒီလို ရိုက်နှက်ခံရတာကို ရဲသွားတိုင်တဲ့အခါ ဒါမှမဟုတ်၊

ဇနီးဖြစ်သူက ပြန်ပြီးခုခံရင် ဘာဖြစ်လာမယ်ထင်သလဲ။

အဖြေသိချင်ရင်တော့ ကလေး ၃ ယောက်အမေ

စန်းစန်းကိုသာ မေးပေတော့။

သူက လူသတ်မှုနဲ့ တရားစွဲခံထားရတယ်။


“ကျမ သမီးကြီးက ဆယ့်ခြောက်နှစ်ရှိပြီ၊ သူ့ကို မွေးပြီးတဲ့အချိန်ကတည်းက ကျမဟာ ရိုက်တာနှက်တာ ခံခဲ့ရတယ်” လို့ ပြောပြပါတယ်။ စန်းစန်းရဲ့ပုံစံကိုပြောရမယ်ဆိုရင် ထုသားပေသားကျနေတဲ့ ခပ်ဝဝ ထိုင်းအမျိုးသမီးဆိုပါတော့။ နောက်ဘက်မှာ လျော့လျဲလျဲ ထုံးထားတဲ့ မသပ်မရပ် ဆံပင်တွေက သူ့မျက်နှာ နွမ်းလျလျကို အားဖြည့်ပေးထားလေရဲ့။ ကိုယ့်ကိုယ်ကိုယ် ပြင်ဖို့ဆင်ဖို့ သူ့ခမျာ အချိန်လည်းမရှိ၊ ပိုက်ဆံလည်း မရှိ။


“ရဲစခန်းကို တခေါက်တော့ သွားဖူးတယ်၊ အားကိုးမိတာပေါ့လေ။ သူတို့က ဘာပြောလဲ ဆိုတော့ မိသားစုအတွင်းရေးတွေ မှာ ဝင်မပါချင်ဘူးတဲ့။ သူတို့က မကူညီပါဘူး။ ပြောသေးတယ်၊ ပြန်ပြီးမရိုက်နိုင် မခုခံနိုင်ဘူးဆိုရင် ပြေးရင်ပြေး၊ ပုန်းရင်ပုန်းနေပေါ့ တဲ့။ ပြီးတော့ သူ စိတ်ဆိုးပြေတဲ့အထိ စောင့်တဲ့။ ဒါပဲပြောတယ်”


ရဲစခန်းက ပေးလိုက်တဲ့အကြံအတိုင်းတော့ စန်းစန်း လိုက်မလုပ်ခဲ့ပါဘူး။ လင်မယားရန်ပွဲကတော့ ပုံမှန်ဖြစ်နေတယ်။ ယောင်္ကျားက သူ့ကိုရိုက်တယ်၊ သူက ပြန်ခုခံတယ်။ အသက်အန္တရာယ်ရှိတဲ့အထိ အရိုက်ကြမ်းလာရင်တော့ ပြေးတော့ ပုန်းတော့တာပဲ။ ပြဿနာတွေ အဆုံးအစွန်တက်သွားတဲ့ည မတိုင်ခင်အထိတော့ အဲသလို ပြေးခဲ့ပုန်းခဲ့ရတာပေ့ါ။


“သူနဲ့ငြိနေတဲ့ မိန်းမဆီကို မသွားဖို့ ကျမကပြောတော့ သူ တော်တော် ဒေါသထွက်သွားတယ်လေ၊ ဓားကိုင်ပြီး ကျမနောက် ကို လိုက်ခုတ်တာပဲ”


စန်းစန်းက ရန်ဖြစ်ရင်းနဲ့ အနားမှာရှိတဲ့အမေ့အိမ်ထဲ ပြေးသွားတယ် တဲ့။ “အိမ်ထဲက သေနတ်ကို သွားယူပြီး၊ ကျမ ပြန်ထွက်လာတော့ သူက ရပ်စောင့်နေတယ်၊ ဓား တရမ်းရမ်းနဲ့။ ကျမကိုလည်း ခြိမ်းလားခြောက်လားနဲ့။ ကျမလည်း သေနတ်နဲ့ ပစ်ထည့်လိုက်တယ်။ သူ့ ထိ မထိတော့ မသိပါဘူး။ မီးပွင့်သွားတာတွေ့လိုက်ပြီး ကျမလည်း အတော်လေး လန့်သွားတာပဲ၊ ဒါနဲ့ သေနတ်ကို ခြုံပုတ်ထဲ လွှင့်ပစ်လိုက်တယ်၊ သူ ကျမနောက်ကိုလိုက်လာမှာပဲလို့ စဉ်းစားရင်း ကျမ ထွက်ပြေးတယ်။ ဒါပေမယ့် သူ ဘယ်လိုက်လာနိုင်တော့မလဲ”


ခင်ပွန်းဖြစ်သူရဲ့အသုဘပြီးသွားတော့ စန်းစန်းက ရဲစခန်းမှာသွားဝန်ခံဖို့ ဆုံးဖြတ်လိုက်တယ်။ သူ့ယောင်္ကျားကို သေနတ်နဲ့ ပစ်လိုက်တာ သူပါပဲလို့။ “ဖြစ်ခဲ့တာတွေအတွက် အပြစ်မကင်းဘူး၊ မကောင်းဘူးလို့ ကျမ ခံစားမိတယ်” ရဲကတော့ သူ့ကို ကြိုတင်ကြံရွယ်ပြီး လူသတ်မှုကျူးလွန်တယ်လို့ စွဲချက်တင်လိုက်တယ်။ အာမခံငွေကြေးက များလွန်းလို့ မတတ်နိုင်တော့ အမှုရင်ဆိုင်နေရတဲ့တချိန်လုံး ထောင်ထဲမှာပဲ နေခဲ့ရတာပေ့ါ။ အမျိုးသမီးဖောင်ဒေးရှင်းအဖွဲ့(Foundation for Women )က လာကယ်တဲ့အထိ တနှစ်ကျော်ကြာ နေခဲ့ရတယ်။ စန်စန်းကို စောင့်ရှောက်ထားတဲ့ ဒီအဖွဲ့က အကြမ်း ဖက်ခံရတဲ့သူတွေ၊ ရောင်းစားခံရတဲ့သူတွေကို ကူညီတဲ့အဖွဲ့ပါ။


“ကလေးတယောက် လိင်ပိုင်းဆိုင်ရာ မတော်မတရားလုပ်ခံရလို့ဆိုပြီး ကျမတို့ဆီကို ဆရာမတယောက်က အကူအညီလာတောင်းတယ်လေ၊ ဖြစ်ချင်တော့ အဲဒီကလေးက စန်းစန်းရဲ့သမီးဖြစ်နေတယ်။” ဒီအဖွဲ့ရဲ့ တာဝန်ခံ တယောက်က ရှင်းပြတာပါ။ သူက ဆက်ပြီး ပြောပါသေးတယ်။ “ကဲ ကြည့်စမ်းပါဦး၊ မိခင်တွေကို ထောင်ထဲထည့် လိုက်ပြီဆိုရင်၊ သူတို့ကလေးတွေဘာဖြစ်နေမလဲ။ သူတို့ကိုလည်း ကြည့်မယ့်ရှုမယ့်သူ မရှိဘူးဆိုရင်ပေ့ါ”


စန်းစန်းကတော့ သူ ကံသိပ်မဆိုးသေးဘူးလို့ ထင်နေတယ်။ ထောင်ထဲမှာတုန်းက မိန်းမ တော်တော်များများနဲ့ ဆုံခဲ့ရတယ်။ သူလိုပဲ လင်ဆိုးမယားတွေ။ လင်ယောင်္ကျားတွေ နှိပ်စက်အကြမ်းဖက်တာကို ပြန်ခုခံရင်း လူသတ်မှု မတော်တဆ ကျူးလွန်မိတဲ့သူတွေ။


“ဒါပေမယ့်လည်း သူတို့မှာ ရှေ့နေတွေ ဘာတွေ မရှိခဲ့လို့ လူသတ်သမားတွေအဖြစ်နဲ့ ပြစ်ဒဏ်ချခံခဲ့ရတယ်” လို့ စန်းစန်းက ပြန်ပြောပြတယ်။ စန်းစန်းရဲ့အမှုကလည်း မပြတ်သေးပါဘူး၊ မပြတ်သေးပေးမယ့်လည်း စန်းစန်းက သူ့ကိုယ်သူ ယုံကြည်မှု ရှိပုံရတယ်။ အဖွဲ့ကလည်း ဒီလိုအမှုတွေမှာ အတွေ့အကြုံရှိတဲ့ ရှေ့နေတယောက် ငှားထားပေးတယ်။ သူ့ကလေးတွေကို ကူညီဖို့အတွက်တော့ ဘယ်တတ်နိုင်ပါ့မလဲ။ “တချိန်လုံး ကျမကလေးတွေအတွက်ပဲ စိတ်ပူနေရတယ်၊ ကျမ အတွက်တော့ စိတ်မပူပါဘူး” စန်းစန်းရဲ့အသံက ဆို့ဆို့နင့်နင့်။ တုန်နေတဲ့ နှုတ်ခမ်းကိုကိုက်ပြီး ခပ်ဝေးဝေးကို ငေးနေလေရဲ့။


“တကယ့်ကို မတရားတာပဲ၊ ကျမတို့အရိုက်ခံရ၊ နှိပ်စက်ခံရပြီဆိုရင်၊ ရဲတွေက ဖြစ်နေကျပဲလေ၊ ဘာထူးဆန်းလို့လည်းဆိုပြီး အကူအညီပေးတာမဟုတ်ဘူး။ ကျမတို့ တိုင်ချက်ဖွင့်တာကိုတောင် လက်ခံတာမဟုတ်ဘူး။ ဒါပေမယ့် ကျမတို့ခုခံရင်းနဲ့ မတော်တဆ ဖြစ်သွားတဲ့အခါကျရင်တော့ ၊ ဥပဒေ ဆိုတာကြီးနဲ့ ကျမတို့ကို ပြင်းပြင်းထန်ထန် အရေးယူတော့တာပါပဲ”


ဒီလို အနိုင်ကျင့်နှိပ်စက်ခံခဲ့ရတဲ့ အမျိုးသမီးတွေရဲ့အမှုတွေကို လိုက်ပြီးအကျိုးဆောင်ပေးရတာ ပိုက်ဆံ အင်မတန် အကုန်အကျများတယ် တဲ့။ ပထမဆုံး အာမခံနဲ့ အချုပ်ကလွတ်အောင်လုပ်တာနဲ့ စရပါမယ်။ အာမခံငွေက လူတယောက် ကို ဘတ်သုံးသိန်း၊ (မြန်မာငွေနဲ့ဆို ကျပ် သိန်းငါးဆယ်လောက်ပေ့ါ။) အင်မတန်အချိန်ကြာတဲ့ အမှုရင်ဆိုင်ရမယ့် ကာလ အတွင်း ရှေ့နေငှားဖို့ ကုန်ကျစရိတ် ဘယ်လောက်ရှိမလဲဆိုတာ မေးမနေနဲ့တော့။ ခုချိန်ထိတော့ အဖွဲ့အနေနဲ့ စန်းစန်းလိုမျိုး အရိုက်အနှက်ခံရလို့ ပြန်ခုခံရင်း လူသတ်မှုကျူးလွန်မိတဲ့ အမျိုးသမီးလေးယောက်ကို ကူညီနေပါတယ်။ ဒီလို အမျိုး သမီးတွေကို ဥပဒေကြောင်းအရ ပိုပြီးကူညီနိုင်ဖို့ ဒီအဖွဲ့ငယ်လေးက ရန်ပုံငွေရှာနေတယ်လို့ ဆိုတယ်။


ဒီအဖွဲ့နဲ့ ထိုင်းနိုင်ငံ မဟီဒေါတက္ကသိုလ်ရဲ့လေ့လာတွေ့ရှိချက်တခုအရ ယိုးဒယားအမျိုးသမီး ၄၄% လောက်ဟာ သူတို့ရဲ့ ယောင်္ကျားတွေ၊ ဒါမှမဟုတ် ချစ်သူရည်းစားတွေရဲ့ နှိပ်စက်တာကို ခံနေရပါသတဲ့။ စိတ်ပိုင်းဆိုင်ရာ နှိပ်စက်မှုကိုခံနေရတဲ့ အမျိုးသမီးပေါင်း ၂၈% ရှိပြီး၊ ပုံစံမျိုးစုံနဲ့ အကြမ်းဖက်နှိပ်စက်တာ ၂၂%၊ အတင်းအကြပ် လိင်ဆက်ဆံဖို့ နှိပ်စက်တာ ၂၉% စသဖြင့် ရှိနေကြတယ်လို့ လေ့လာတွေ့ရှိရတယ်လို့ ဆိုတယ်။ ဒီလေ့လာမှုကို အသက် ၁၅ နှစ်နဲ့ ၄၉နှစ်အကြားမှာရှိတဲ့ ယိုးဒယားအမျိုးသမီးပေါင်း ၄၀၀၀ ကို မေးမြန်းပြီးပြုလုပ်ခဲ့တာဖြစ်ပါတယ်။ မိသားစုအတွင်း အကြမ်းဖက်နှိပ်စက်မှုတွေကို လေ့လာစူးစမ်းတဲ့ထဲမှာတော့ အပြည့်စုံဆုံး လေ့လာချက်ပါပဲ။


လေ့လာချက်အရ ထပ်သိရတာကတော့ နှိပ်စက်ခံရတဲ့ အမျိုးသမီး ၄၂% ဟာ ကြိတ်မှိတ်ငုံ့ခံနေကြသတဲ့။ ဘယ်သူမှ သူတို့ကို ကူညီနိုင်မှာမဟုတ်ဘူးလို့ ထင်နေပုံရပါတယ်။ “ကျမတို့ယဉ်ကျေးမှုအရ မိန်းမတွေဟာ ခံစားချက်တွေ၊ အနိုင်ကျင့်ခံရတာတွေကို မြိုသိပ်ထားကြတယ်။ မြိုသိပ်ထားတယ်ဆိုတော့ စိတ်ပိုင်းဆိုင်ရာပြဿနာတွေပေါ်လာပြီပေ့ါ” လို့ စိတ်ရောဂါအထူးကုဆရာဝန်တယောက်က ပြောပြပါတယ်။ ဥပဒေပိုင်းအရ ကူညီတာတွေအပြင်၊ စိတ်ပိုင်းဆိုင်ရာအရ လည်း ကူညီဖေးမကြဖို့ သူက အမျိုးသမီးအဖွဲ့အစည်းတွေကို တိုက်တွန်းလိုက်ပါသေးတယ်။


“နှိပ်စက်ခံရတဲ့ အိမ်ထောင်ရှင် အမျိုးသမီးတွေဟာ ကိုယ့်ပြဿနာတွေကို တခြားသူတွေ မမြင်အောင် ဖုံးကွယ်ရင်းနဲ့ အစိုးရိမ်လွန်တာတွေ၊ ညဘက်အိပ်မရတာတွေတိုးပွားလာပြီး စိတ်ပိုင်းဆိုင်ရာ တခြားဝေဒနာတွေ စွဲကပ်လာမှာပဲ” လို့ သူက ရှင်းပြပါတယ်။ “ပြဿနာတွေကိုရှင်းမရတဲ့အဆုံး သေကြောင်းကြံစည်တာနဲ့ ဇာတ်သိမ်းသွားတာတွေ အများကြီးပဲ”

သူ့ရှင်းပြချက်တွေ မှန်ကန်တဲ့အကြောင်းကို အထက်မှာဖော်ပြခဲ့တဲ့ လေ့လာတွေ့ရှိချက်ကလည်း ထောက်ပြနေတယ်။ လေ့လာချက်မှာလည်း ဒီလိုအမျိုးသမီးတွေဟာ စိတ်ကျဝေဒနာ အကြီးအကျယ် ဖြစ်လာတယ်၊ သုံးပုံတပုံလောက်က ကိုယ့်ကိုယ်ကိုသတ်သေကြတယ်၊ နောက် သုံးပုံတပုံကလည်း သတ်သေဖို့ နည်းနာတွေကို လေ့လာခဲ့ဖူးတယ်လို့ ဆိုတယ်။


ကိုယ့်ယောင်္ကျား၊ ကိုယ့်ချစ်သူက နှိပ်စက်တယ်ဆိုရင် ၇% လောက်ကပဲ ရဲသွားတိုင်ပြီး၊ ကျန်တဲ့အတော်များများကတော့ အသက်အန္တရာယ်ရှိလာတဲ့အချိန်အထိ ကြိတ်မှိတ်ခံနေပါသတဲ့။ ၃၉% က ထွက်ပြေးကြတယ်၊ ၄% ကျော်ကျော်ကတော့ ဆယ်ခေါက်ထက်မနည်း ပြေးခဲ့ဖူးပါသတဲ့။


ဘာကြောင့်မို့ ဒီမိန်းမတွေဟာ ဒီလို မတော်မတရား ပြုနှိပ်စက်တာတွေကို ငုံ့ခံနေရတာလဲ။ နိုင်ငံရေးသမားတယောက် ကတော့ ယိုးဒယားယဉ်ကျေးမှုကို အပြစ်တင်ပါတယ်။ ဒီယဉ်ကျေးမှုအရ ယိုးဒယား အမျိုးသမီးတွေကို စိတ်ရှည်သည်းခံတဲ့ ဇနီးသည်တွေအဖြစ် မိခင်လောင်းတွေအဖြစ် သတ်မှတ်ထားပါသတဲ့။ အမျိုးသမီးတွေကို စီးပွားရေးလုပ်ငန်းတွေမှာ အားနည်းအောင်လည်း ဒီလူမှုအသိုင်းအဝိုင်းက လုပ်ထားတာကြောင့် အကြောက်တရားတွေ၊ စိတ်ပိုင်းဆိုင်ရာလုံခြုံမှု ကင်း လာတာတွေ တိုးလာပါသတဲ့။


သူက ထပ်ပြောတာကတော့ ဒီလိုပါ။ “ဘယ်မှသွားလို့မရတော့မှာကို၊ ဘယ်သူ့ကိုမှ အားကိုး လို့ မရတော့မှာကို သူတို့ ကြောက်ကြတယ်။ တော်တော်များများက ဒီအတိုင်းပဲ အနိုင်ကျင့်ခံနေကြတယ်၊ ဘာဖြစ်လို့လဲ ဆိုတော့ ဒီလိုအနိုင်ကျင့်တာကို ငြိမ်ခံမနေဘူးဆုိုရင် ပိုဆိုးလာပြီး၊ အသတ်ခံရမယ်လို့ သူတို့ ထင်နေကြတယ်”


အမျိုးသမီးတွေကို နှိပ်စက်အနိုင်ကျင့်တာကို ငယ်ကတည်းက မြင်နေကြုံနေရတဲ့ ယောင်္ကျားလေးတွေဟာ သူတို့ အရွယ်ရောက်လာတဲ့အခါမှာ အမျိုးသမီးတွေကို နှိပ်စက်အနိုင်ကျင့်လာတတ်ကြတယ်လို့လည်း သူက ဆက်ပြောပါတယ်။


“ဒီလိုဖြစ်နေတာတွေကို ရပ်သွားအောင်လို့ ကျနော်တို့ လုပ်ကြရမှာပဲ။ အမျိုးသမီးတွေကို လေးစားတတ်အောင်လို့ ယောင်္ကျားလေးတွေ ငယ်တုန်းကရင်း သင်ပေးရမယ်”


စန်းစန်းလိုပဲ အမျိုးသမီးအများစုက သူတို့ယောင်္ကျားဆိုးတွေကို ရဲတွေက ထောင်ချလိုက်မှာကိုလည်း မလိုချင်ပြန်ဘူး။ နှိပ်စက်အနိုင်ကျင့်တာတွေ ရပ်သွားရင်ပဲ သူတို့ကျေနပ်နေတတ်တယ်။ ရဲတွေက ဒီလိုအမှုတွေလာတိုင်တဲ့အခါ ဂရုမစိုက် ဥပေက္ခာပြုထားပြန်လေတော့ ရဲတွေပါ အပြစ်မကင်းဘူးပေ့ါ။ နောက်ဆုံး မဖြစ်သင့်တာတွေ မတော်တဆဖြစ်လာလို့ တရားရုံးရောက်ပြန်တော့လည်း ငွေကြေးမတတ်နိုင်တဲ့ အမျိုးသမီးတွေအတွက် အခက်တွေ့ရပြီ။


တရားရုံးက စီစဉ်ပေးတဲ့ ရှေ့နေတွေကလည်း ဒီလို အနိုင်ကျင့်နှိပ်စက်ခံရတာတွေအပေါ် သဘောပေါက်ကျွမ်းကျင်မှု နည်းပါးနေပြန်တယ်။ တရားရုံးမှာ အမှုရင်ဆိုင်နေရတုန်းမှာပဲ အိမ်ကနေပဲ အမှုရင်ဆိုင်တဲ့ အခွင့်အရေးရဖို့ လိုအပ်ပါတယ်။ ဒါမှသာ မိခင်တွေနဲ့ ကလေးတွေနဲ့ အတူတူရှိနေနိုင်မှာပါ။


စန်းစန်းကတော့ အခုလို ရှင်းပြပါတယ်။ “ကျမတို့လို အမျိုးသမီးတွေအတွက် ခုအချိန်မှာ စာနာနားလည်ပေးတာတွေ အကူအညီတွေ လိုအပ်ပါတယ်၊ အခြေအနေတွေ ဆိုးသွားတဲ့အချိန် မရောက်ခင် ကူညီစာနာမှ ဖြစ်မှာပါ။ ကျမတို့ အနိုင်ကျင့်ခံနေရတာ သိပ်ကြာနေပါပြီ။ ကျမတို့ကို တရားဥပဒေကြောင်းအရ ကူညီကြပါ။ ကျမတို့ကလေးတွေနဲ့ ကျမတို့ အတူနေချင်ပါတယ်။ ဒါပေမယ့်လည်း ကျမတို့က ဆင်းရဲတယ်၊ ပြီးတော့ ဘာလုပ်ရမလဲဆိုတာလည်း မသိကြဘူး”


ထိုင်းနိုင်ငံ၊ နေးရှင်းသတင်းစာ (ဇန်နဝါရီ ၂၉၊ ၂ဝဝ၂) ဆောင်းပါးတပုဒ်ကို ဘာသာပြန်ပါတယ်။

နဒီ အမျိုးသမီးရေးရာစာစောင်

မေလ ၂ဝဝ၂ ခုနှစ်။ အတွဲ ၁၊ အမှတ် ၁


Friday, September 18, 2009

လေလွင့်သူရဲ့အိပ်မက်


မုန်းတီးမှုများ

နေ့စဉ်စားသုံးရင်း

ခွန်အားသစ်တွေ ဖြစ်ခဲ့ပြီ။


နှစ်သုံးဆယ်ကြာတဲ့ မီးလျှံများ

လေတိုက်စားလို့ ငြိမ်းခဲ့ပြီ။


လွဲချော်သွားတဲ့ နာရီများအတွက်

အိပ်မက်တွေကို ဖြတ်တိုင်း

အနက်ရှိုင်းဆုံးဆိုတဲ့ သောကများ

ဘုရားတရင်း စိန်ခေါ်ခဲ့ရပြီ။


ဂုဏ်သိက္ခာတွေ ကြွေမွပြီး

စီးထားတဲ့ဖိနပ်အောက်

အမှန်တရားတွေ မှောက်ကျသွားတဲ့အခါ

ဘဝဆိုတာ ကောလဟာလပါပဲ။


ရွှေရှာသူများ

ငွေရှာသူများ

နေရာယူသူများ

အားလုံးတွေရဲ့နောက်မှာ

ငါ … … လေဆာရောင်ခြည်သေနတ်နဲ့

လူသတ်ချင်တယ်။


ဒါပေမယ့်

ဘာတွေမှတွေးမနေနဲ့။


တိမ်တွေရဲ့ကိစ္စ

ရာသီတွေရဲ့ကိစ္စ

လောကကို မတောင်းဆိုလိုက်လေနဲ့

အိနြေ္ဒကြီးတဲ့ကောင်းကင်လိုနေလိုက်ပေါ့။


ဂျုး

၁၉၈၇ ခုနှစ်၊ မတ်လ


Thursday, September 17, 2009

ကျောင်းသား ထောင် တော်လှန်ရေးသမား (၂)


အဲဒီတော့ ခုနက ပြောသလို တက္ကသိုလ်ပရဝုဏ်မှာဖြင့် စစ်တပ်အာဏာသိမ်းမယ်ဆိုတာနဲ့ စပြီးတော့ အဲဒီမုန်တိုင်းအတွက် လေနီကြမ်း စတော့တယ်လို့ ပြောရတော့မယ်။ ဘာကြောင့်လည်းဆိုတော့ မတ်လမှာ အာဏာသိမ်းတယ်၊ ဇွန်လလောက် ကတည်းကစပြီးတော့ တက္ကသိုလ်တွေမှာ ရုတ်ရုတ်ရုတ်ရုတ်၊ လှုပ်လှုပ်လှုပ်လှုပ် စပြီးဖြစ်နေပြီ။

နောက် ဇူလိုင် ၇ ရက် ဆက်ဖြစ်တာပေါ့ဗျာ။ ဇူလိုင် ၇ ရက်ဆိုတော့ ကျနော် ဒီမှာ အကျယ်မပြောတော့ပါဘူး။ ကျနော်တို့ မန္တလေးကလူတွေအနေနဲ့ ဇူလိုင် ၇ ရက်မှာ ရန်ကုန်လို ပြင်းပြင်းထန်ထန် မခံခဲ့ရဘူး။ ကျနော်တို့တတွေ ရေဒီယို နားထောင်၊ သတင်းပလင်းတွေနားထောင်၊ တယ်လီဖုန်းတွေနားထောင်ပြီး တထိတ်ထိတ်နဲ့ မျှော်ခဲ့ရတာ ကျနော် ဘယ်တော့မှ မမေ့ပါဘူး။

ကျနော့်မိဘတွေရော၊ ကျနော်တို့ သမဂ္ဂအတူလုပ်တဲ့ လူတွေရော အဲဒီသတင်းကို မျှော်ပြီးတော့ စိုးရိမ်တာပဲ တတ်နိုင်တယ်။ ဘယ်လိုမှလည်း အဆက်အသွယ်က မရ။ အဲဒီကြားထဲမှာ ပြတ်တောင်းပြတ်တောင်းဝင်လာ တဲ့ ‘တော်လှန်ရေးကောင်စီ’ ဆိုတဲ့ စစ်အစိုးရရဲ့ ကြေညာချက်တွေကလည်း စော်ကားမော်ကား။ အဲဒီနေ့ရက်များဟာ ကျနော့်ဘဝမှာ မမေ့နိုင်တဲ့နေ့ရက်များ ဖြစ်ပါတယ်။

ကျနော် ထပ်ပြောပါမယ်။ ၆၂ ခုနှစ် အာဏာသိမ်းပွဲမှာ ပထမဆုံး အစတေးခံရတာလည်း ကျောင်းသားတယောက်ပါ။ အဲဒါကတော့ အရင် သမတကြီးဟောင်း စဝ်ရွှေသိုက်ရဲ့သား၊ အသက် ၁၇ နှစ်သာရှိသေးတဲ့ စဝ်မီမီသိုက်ဟာ လေသေနတ် လို သေနတ်လေးကိုင်ပြီး ထွက်လာတာကို အောက်က လက်နက်မျိုးစုံတပ်ထားတဲ့ စစ်တပ်ကနေပြီးတော့ တခါတည်း ပစ်ချလိုက်တာ ပွဲချင်းပြီး သေရှာတာပါ။

ဒါကြောင့်မို့လို့ ကျနော့်စိတ်ထဲမှာ ဘယ်တော့မှမမေ့နိုင်အောင် ဒီစစ်အစိုးရဟာ စတက်ကတည်းက ကျောင်းသား ကို သတ်တယ်၊ နောက် တလ နှစ်လပဲရှိသေးတယ် သမဂ္ဂကြီးကို ဖြိုတယ်၊ ကျောင်းသားတွေ အများကြီးကို သတ်တယ် … စကတည်းက ကျောင်းသားသွေးနဲ့ ခြေဆေးပြီးတက်လာတဲ့ စစ်အစိုးရလို့ ကျနော့်ခေါင်းထဲမှာ အမြဲမှတ်မိနေပါတယ်။

၁၉၆၂ ခုနှစ် ဇူလိုင်လ ၇ ရက်နေ့တွင် ဒိုင်းနမိုက်နှင့် ဖြိုခွဲခံခဲ့ရသည့် သမိုင်းဝင် ကျောင်းသားသမဂ္ဂ အဆောက်အဦ

၇ ရက် ဇူလိုင်အပြီး သမဂ္ဂကြီးကိုဖြိုဖျက်တဲ့ကိစ္စမှာ အခုအခါကျမှ စစ်အစိုးရက (ဦးနေဝင်းတို့၊ ဦးအောင်ကြီးတို့ အပါအဝင်) ထမင်းရည်ပူ လျှာလွှဲ၊ ကြောက်ကြောက်လန့်လန့်နဲ့ သူ့ပုံချ ငါ့ပုံချ လုပ်နေကြတာ။ စဖြိုကာစတုန်းက သူတို့ပြောတဲ့ မိန့်ခွန်းတွေ ပြန်စဉ်းစားကြည့်ပါ။ နည်းနည်းလေးမှ နောင်တရတဲ့ လေသံ မပါဘူး။ “သူပစ်တာ သူပစ်တာ” လို့ ပြောဆိုနေပေမယ့် “ငါ ပစ်တာ” လို့ တိုက်ရိုက်မပြောရုံတမယ်၊ ဗိုလ်နေဝင်း အဲဒီတုန်းက ပြောတဲ့မိန့်ခွန်းက …။

အဲဒီတုန်းက စစ်အစိုးရဟာ ဘာကြောင့်မို့ ဒီလောက်သဲကြီးမဲကြီးနဲ့ ကျောင်းသားတွေကို နှိမ်နင်းရသလဲဆိုတဲ့ဟာ သေချာ ပြန်စဉ်းစားကြည့်ဖို့ လိုပါတယ်။ သူတို့ရဲ့ရည်ရွယ်ချက်ဟာ ကျောင်းသားလှုပ်ရှားမှုတွေမှာ တက်ကြွသူ ခေါင်းဆောင်လုပ်ခဲ့သူတွေအားလုံး၊ အားလုံးနော် တယောက်မကျန် ကျောင်းသားပရဝုဏ်ထဲက မောင်းထုတ်ဖို့၊ ဖယ်ပစ်ဖို့ ဒါ့အပြင် မြေပေါ် နိုင်ငံရေးဇာတ်ခုံပေါ်ကနေ ဖယ်ရှားပစ်ဖို့ဆိုတဲ့ ရည်ရွယ်ချက် အဲဒါနဲ့လုပ်တာပါ။

တနည်းပြောရရင် ကျောင်းသားသမဂ္ဂ ကျောင်းသားလှုပ်ရှားမှုအားလုံးကို အငုတ်အမြစ်မကျန်အောင် တူးဖော်ပစ်မယ်ဆိုတဲ့ ရည်ရွယ်ချက်နဲ့ လုပ်ပစ်တာ ကျောင်းသားသမဂ္ဂ အဆောက်အဦကြီးရှိနေသရွေ့ ဒီတသုတ်ဖမ်းလည်း နောက်တသုတ်က တက်ပြီး အဲဒီ ပေါ်မှာ သမဂ္ဂလုပ်နေဦးမှာပဲ။

သူတို့ အဲဒီလိုစဉ်းစားပြီးတော့ ဒီ သမဂ္ဂအဆောက်အဦမရှိမှ အေးမယ်ဆိုပြီး တော့ တမင် သေချာရည်ရွယ်ချက်ရှိရှိ သမဂ္ဂကြီးကို ဖျက်ဆီးပစ်တာပါ။ ဒါပေမယ့် အားလုံးသိကြတဲ့အတိုင်းပဲ ကျောင်းသား တွေဟာ အဲဒီလို ရာနဲ့ချီသတ်လိုက်လို့ ကျောင်းသားသမဂ္ဂကြီးကို မိုက်မိုက်ရိုင်းရိုင်း ရက်ရက်စက်စကဖြိုခွဲပြလိုက်လို့ ငြိမ်မသွားပါဘူး။

ကျနော်တို့မန္တလေးမှာလည်း သမဂ္ဂဖြိုတာမျိုး ကျောင်းသားတွေသတ်တာမျိုး မဖြစ်ပေမယ့်လည်း အကုန်လုံး ဖမ်းပါတယ်။ ကျောင်းသားခေါင်းဆောင်တွေကို။ ကျနော်တို့က အဲဒီတုန်းက ခေါင်းဆောင်ပိုင်းမှာမပါသေးတဲ့ အဆင့်မရောက်သေးတဲ့ အတွက် ကျနော်တို့ အဖမ်းခံရတဲ့အထဲ မပါ ပါဘူး။ မန္တလေးမှာရှိတဲ့ သမဂ္ဂအဆောက်အဦက ကပ်တဲကြီးပါ။ အဲဒီကပ်တဲကြီးလည်း ညကြီးမင်းကြီး လာဖျက်ပြီးတော့ လော်ရီကားကြီးနဲ့ တိုက်ယူသွားတာပဲ။

ဒါပေမယ့် တလလည်းနေရော ဇူလိုင် ၇ ရက် အထိမ်းအမှတ်လှုပ်ရှားမှုတွေ ပေါ်လာတယ်။ ကြိုကြားကြိုကြား ကျောင်းနံရံတွေမှာ ပိုစတာ ကပ်တယ်။ အနည်းဆုံးမြေဖြူခဲနဲ့ ရောင်စုံမြေဖြူခဲနဲ့ ကျောင်းနံရံတွေမှာ ရေးတယ်။ ကျောင်းသား ကျောင်းသူတွေရဲ့ ရင်ဘတ်မှာ အလံနက်ကလေးတွေ တပ်ကြတယ်။

အဲဒီကတဆင့်တက်လာပြီးတော့ ကြိုကြားကြိုကြား ကဗျာစာအုပ်ကလေးတွေ ထုတ်တယ်။ ကဗျာစာအုပ်ကလေးတွေက အစကတော့ ပုန်းလျှိုးကွယ်လျှိုး နောက်ကျတော့ ဗြောင်ပဲ ဆိုင်ပေါ်တင် ရောင်းတယ်။ ဝယ်တဲ့လူလည်း အလုအယက်ဝယ်တယ်။ အမှတ်တရ ခုံခုံမင်မင် သိမ်းဆည်းထားကြတယ်။ တပါတည်းမှာ ကြေညာချက်တွေကလည်း မပြတ်ထွက်နေတာ။

ဆဲဗင်း ဇူလိုင် အထိမ်းအမှတ်အဖြစ် ဒဂုံဆောင် စာဖတ်အသင်းမှ အထူးထုတ်ဝေခဲ့သော ကဗျာစာအုပ်မျက်နှာဖုံး (ဓာတ်ပုံ-ဒီဗွီဘီ)

အဲဒီတုန်းကထွက်ပြေးတဲ့ ကိုအောင်သူတို့ ဘယ်မှာပုန်းနေတာ ကျနော် သိနေတာပဲ။ ကျနော်တို့ ခိုးခိုးပြီး သွားတွေ့တယ်။ အဲဒီ ကိုအောင်သူတို့ကနေပြီး ပုန်းအောင်းနေတဲ့ နေရာကနေပြီး ဒီလှုပ်ရှားမှုကို ဆက်ပြီး လုပ်ဆောင်နေကြတာပါ။ သူတို့က ခေါင်းဆောင်တာပေါ့လေ။ အဲကျနော်တို့ကတော့ သူတို့ခေါင်းဆောင်တဲ့အတိုင်း ညွှန်ကြားတဲ့အတိုင်း လုပ်သင့်လုပ်ထိုက်တဲ့ဟာတွေ ဆက်လုပ်ကြတာပါ။

ဒါပေမယ့် ကျနော်တို့ သတိပြုရမှာက အဲဒါက ၆၂။ အဲဒီအရင် ဘာမှမကြာသေးတဲ့ကာလလေးအတွင်းကပဲ ဗမာပြည်မှာက ဒီမိုကရေစီ အခြေခံရှိနေခဲ့တယ်။ အဲဒီလို ဒီမိုကရေစီ အခြေခံရှိနေတဲ့အတွက် စစ်အစိုးရဟာ အခုလုပ်သလို အပြတ် သူတို့လုပ်ချင်လို့မရသေးဘူး။

ဒါ ပြည်တွင်းရဲ့အာဘော်ပိုင်းမှာရော ပြည်ပအာဘော်ပိုင်းမှာရော အဲဒီလောက်ထိ သူတို့ကို ခွင့်မပြုသေးဘူး။ သူတို့လုပ်နိုင်တဲ့အခြေအနေ မရှိသေးဘူး။ ဒါကြောင့်မို့လို့ သူတို့က အခုနောက်ပိုင်း လုပ်သလောက်ထိ ရက်ရက်စက်စက် မလုပ်သေးတာလို့ ပြောရင်ရမယ် ထင်တယ်။

ဒါ့အပြင် ဗိုလ်ချုပ်နေဝင်းရဲ့ ခေါင်းထဲမှာ စေ့စပ်ဆွေးနွေးရေး မျက်လှည့်ပြပွဲကြီးတခုလုပ်ဖို့မဆလဆိုတဲ့ ဆိုရှယ်လစ်အလိမ်အညာကြီးတခု ဖော်ထုတ်ဖို့ အစီအစဉ်တွေကလည်း ရှိနေသေးတဲ့အခါကျတော့ အားလုံးကို အပြတ်လုပ်ပစ်ဖို့လည်းသူတို့ ဆုံးဖြတ်လို့ မရသေးဘူး ဖြစ်နေသေးတယ်။

အဲဒီတော့ ပထမဆုံး သူတို့ လုပ်တာကတော့ ကျောင်းသားခေါင်းဆောင်တွေ၊ လက်ဝဲသမားတွေ၊ ‘ထောင်ထောင် ထောင်ထောင်ဆိုတဲ့ အကောင်တွေ ထောင်ထဲထည့်’ ဆိုတဲ့ဟာ။ ကျနော်က လက်ဝဲဆိုတော့ (လက်ယာ ခေါင်းဆောင်တွေ လည်း အဲဒီထက် စောတယ်။ ငြိမ်းချမ်းရေးဆွေးနွေးပွဲ လုပ်မယ်။ နီးပြီဆိုတာနဲ့ တခါတည်း အကုန်လုံး၊ ဖဆပလ ခေါင်းဆောင်တွေ အကုန်လုံး ထောင်ထဲရောက်သွားတာပဲ။

အာဏာသိမ်းတုန်းကတော့ လူမျိုးစုခေါင်းဆောင်တွေ အားလုံးကို ထောင်ထဲထည့်တယ်။ အဲဒီနောက် ဆက်လာပြီး သူတို့ မဆလ ကြေညာပြီး ‘ဆိုရှယ်လစ်လမ်းစဉ်’ ကြေညာတော့မယ်။ အဲဒီ ငြိမ်းချမ်းရေးဆွေးနွေးပွဲ အတုအယောင် လုပ်တော့မယ်ဆိုတဲ့အခါကျတော့ ဖဆပလ ခေါင်းဆောင်တွေ၊ လက်ယာ ခေါင်းဆောင်တွေ အကုန်လုံး ထောင်ထဲပို့တယ်။) အဲ … အခုနက ၇ ဇူလိုင် အကြောင်းပြုပြီးတော့ ကျောင်းသားတွေနဲ့ လက်ဝဲသမားတွေ ထောင်ထဲပို့တယ်။ အဲဒီလို တောက်လျှောက်လုပ်တာ။

ဆက်လက်ဖော်ပြပါမယ်။