ဦးကျော်ဇံသာ ။ ။ စိုင်းညွန့်လွင် ခင်ဗျာ။ အခုလောလောဆယ် ထွက်ပေါ်လာတဲ့သတင်းအရ ရှမ်းတိုင်းရင်းသားပါတီတွေဆိုတာထက် နိုင်ငံရေးအင်အားစုတွေအားလုံး ပေါင်းစည်းဖို့ သဘောတူညီမှု ရရှိခဲ့တယ်လို့ သိရတယ်။ ဟုတ်ပါသလား။
စိုင်းညွန့်လွင် ။ ။ ဟုတ်ပါတယ်ခင်ဗျာ။ ကျနော်တို့ ၁၅၊ ၁၆၊ ၁၇ မှာ ညှိနှိုင်းပြီးတော့ ရှမ်းပြည်ငြိမ်းချမ်းရေး ကော်မတီပေါ့ အဲဒါကို ဖွဲ့လိုက်ပါတယ်။
ဦးကျော်ဇံသာ ။ ။ ဆိုတော့ လောလောဆယ်က ညီညွတ်ရေးကော်မတီဆိုတော့ ပေါင်းစည်းဖို့အတွက် စီစဉ်ပေးရမယ့်သဘောပဲ ရှိသေးတာပေါ့။ တပေါင်းတစည်းထဲဖြစ်ပြီလို့တော့ မပြောနိုင်သေးဘူးလား။
စိုင်းညွှန့်လွင် ။ ။ အဲဒီလိုတော့လည်း ပြောလို့မရဘူး။ ပေါင်းဖို့က ချက်ချင်းကျတော့ ခက်တယ်။ ဥပမာအားဖြင့် လက်နက်ကိုင်တပ်တွေနှင့် ကျနော်တို့ပါတီနှင့်ဆို ဘယ်လိုလို့ ပေါင်းလို့ရမလဲ။
ဦးကျော်ဇံသာ ။ ။ အဲဒီတော့ တရားဝင်ပါတီတွေပေါင်းတာကိုမပြောခင် အဲဒီ SSA နှစ်ပိုင်းရှိတာပေါ့ တောင်ပိုင်း မြောက်ပိုင်း။ နှစ်ပိုင်းလုံးဟာ လက်နက်မစွန့်သေးတဲ့အဖွဲ့လို့ ထင်ပါတယ်။
စိုင်းညွန့်လွင် ။ ။ ဟုတ်ပါတယ်။
ဦးကျော်ဇံသာ ။ ။ ဆိုတော့ ဒီအဖွဲ့တွေနှင့် ပေါင်းစည်းရေးအလားအလာ ဘယ်လိုနေပါသလဲ။ ဘာကို သဘောတူပြီး ညီညွတ်ထားကြပါသလဲ။
စိုင်းညွန့်လွင် ။ ။ အခုလက်ရှိအခြေအနေမှာ ဒီနိုင်ငံလုံးဆိုင်ရာ အပစ်ရပ်စဲရေးအခြေအနေ ဆွေးနွေးဖို့ အခြေအနေဆိုက်ရောက်နေပြီ။ ဆိုတော့ လိုင်ဇာမှာ မကြာခင် သူတို့ လက်နက်ကိုင်အဖွဲ့တွေ သွားပြီး ဆွေးနွေးကြမှာပါ။ ညီညွတ်ရေးဆိုတာတော့ မဖြစ်မနေ လုပ်ရမှာပါပဲ။ ပထမဦးဆုံး ကိုယ်နှင့်အနီးစပ်ဆုံး အဖွဲ့အစည်းတွေနဲ့ လုပ်ရမယ်။ ပြီးတော့ ကိုယ်နဲ့ တဖြည်းဖြည်း လက်လှမ်းမီသလောက် ရနိုင်သလောက်တော့ ညီညွတ်ရေးက လုပ်ရမှာပါပဲ။ နောက်ဆုံးကျရင်တော့ အစိုးရနဲ့အထိ လုပ်ရမှာပါ။
ဦးကျော်ဇံသာ ။ ။ အခု အဲဒီအဆင့်ကိုမတက်ခင်မှာ အဲဒီ SSA တောင်မြောက်တို့နဲ့ ကျန်တဲ့ တရားဝင် မြေပေါ် နိုင်ငံရေးပါတီတို့နဲ့ရရှိထားတဲ့ ညီညွတ်ရေးက ဘာကို ညီညွတ် ဘာကို သဘောတူပြီး ရရှိထားလဲ ခင်ဗျာ။ ဘာမျှော်မှန်းချက်နှင့် ညီညွတ်မှု ရရှိကြတာလဲ။
စိုင်းညွန့်လွင် ။ ။ လောလောဆယ်တော့ သဘောတူထားတဲ့ အချက်မရှိပါဘူး။ လောလောဆယ်တော့။ ဒါ ကျနော်တို့က အခု နိုင်ငံရေးဆွေးနွေးပွဲစမယ်ဆိုရင် ကျနော်တို့ ညှိနှိုင်းမှာပါ။ အပစ်အခတ်ရပ်စဲရေးကိစ္စတွေ စမယ်ဆိုရင် ကျနော်တို့ ညှိနှိုင်းမှာပါ။ ညှိနှိုင်းဖို့အတွက်ကို ဒါ နေရာတခု တည်ဆောက်ထားတာပါ။
ဦးကျော်ဇံသာ ။ ။ ဆိုတော့ အခု စိုင်းညွန့်လွင်တို့နဲ့ SNLD အခု ကျားဖြူပါတီနဲ့ ပေါင်းစည်းရေးကျတော့ကော။ ပိုပြီးတော့ ခရီးရောက်နေပြီလား။
စိုင်းညွန့်လွင် ။ ။ ဟုတ်ပါတယ် ခင်ဗျာ။ ရခိုင်အမျိုးသားတွေကျတော့ ပါတီတခုကိုဖျက်ပြီးတော့ ပါတီတခုနဲ့ ပေါင်းတယ်။ အဲဒီလိုမျိုး အခြေအနေတွေက ကျနော်တို့ဆီမှာ အခြေအနေ မပေးသေးပါဘူး။ မပေးသေးပါဘူးဆို လောလောဆယ် အချိန်ကလည်း သိပ်စောင့်နေလို့ မရတော့ဘူး။ ဆိုတော့ အဲဒီနယ်ကပဲ ရှမ်းပြည်ငြိမ်းချမ်းရေး ကော်မတီကနေပြီးတော့မှ ကျနော်တို့ ကျားဖြူနဲ့ နိုင်ငံရေးကိစ္စတွေ ညှိနှိုင်းလို့ရမှာပါ။
ဦးကျော်ဇံသာ ။ ။ ဆိုတော့ ကျားဖြူကော SNLD ကော အဲဒီလက်နက်ကိုင် အဖွဲ့အစည်းတွေကော အခြေခံတူညီချက်က ဘာလဲခင်ဗျ။ သူတို့ ဘာလိုချင်ကြတာလဲ အဓိကက။
စိုင်းညွန့်လွင် ။ ။ ကျနော် နားလည်သလောက်ပေါ့။ နည်းနည်းပါးပါး လွဲချင်လည်း လွဲမယ်။ ကျနော်တို့ကတော့ ဒီ ဖယ်ဒရယ် စစ်မှန်တဲ့ ပြည်ထောင်စုတခု တည်ဆောက်ချင်တယ်။ ကိုယ်ပိုင်ပြဌာန်းခွင့်တွေ၊ တန်းတူညီရေးပေါ့ အဲဒါတွေ လိုချင်တယ်။ အဲဒီ ရည်မှန်းချက်နဲ့ သွားနေတာပါ။ ဒီတပ်ပိုင်းမှာတော့ တချို့ကတော့ ဒီလွတ်လပ်ရေးအထိ သူတို့ မျှော်မှန်းတဲ့သူတွေ ရှိကောင်းရှိမယ်။ သို့သော်လည်း ဒါတွေကိုတော့ တနေရာမှာပြန်ပြီးတော့ ညှိနှိုင်းရမှာပါ။
ဦးကျော်ဇံသာ ။ ။ တပ်ထဲက တချို့ကတော့ လွတ်လပ်ရေးလိုချင်တဲ့ဆန္ဒ ဆုပ်ကိုင်ထားသေးတယ်ဆိုတဲ့ကိစ္စနဲ့ပတ်သက်ပြီးတော့ ဗိုလ်မှူးကြီးစိုင်းလတ် ဘာပြောချင်ပါလဲ ခင်ဗျာ။
ဗိုလ်မှူးကြီးစိုင်းလတ် ။ ။ ကျနော်တို့ အရင်တုန်းကတော့ ကျနော်တို့ လွတ်လပ်ရေးကို တောင်းဆိုခဲ့ဖူးပါတယ်။ ဒါပေမယ့် အဲဒီကိစ္စကတော့ ကျနော်တို့ ပြည်သူလူထုတွေအားလုံး ဆန္ဒပေါ်မှာ မူတည်ပါတယ်။ ဆိုတော့ အခု ကျနော်တို့ ပြည်သူလူထုတွေအားလုံး လိုနေတဲ့ရည်မှန်းချက်ကတော့ ဒီစစ်မှန်တဲ့ ဖယ်ဒရယ်ပြည်ထောင်စုတရပ်ကို ကျနော်တို့ ပူးပေါင်းပြီးတော့ တည်ဆောက်ဖို့ကိစ္စကိုပဲ အများရဲ့ဆန္ဒနှင့်အညီ ကျနော်တို့ ပူးပေါင်းဆောင်ရွက်သွားဖို့ ကျနော်တို့ ဆုံးဖြတ်ချက်ချခဲ့ပြီးပါပြီ။ နိုင်ငံရဲ့ ပြုပြင်ပြောင်းလဲမှုကို အတူတကွဖော်ဆောင်သွားကြဖို့ ကျနော်တို့ အဲဒီအခြေခံပေါ်မှာ မူတည်ပြီးတော့ ကျနော်တို့ ဖွဲ့စည်းရခြင်းပဲ ဖြစ်ပါတယ်။
ဦးကျော်ဇံသာ ။ ။ ဗိုလ်မှူးတို့က ငြိမ်းချမ်းရေးကောင်စီနဲ့တော့ မကြာခဏ ဆွေးနွေးတွေ့ဆုံတာတွေရှိတယ်လို့တော့ ကြားရပါတယ်။ တိုင်းရင်းသားအင်အားစုတွေနဲ့၊ ငြိမ်းချမ်းရေးကောင်စီကပုဂ္ဂိုလ်တွေရဲ့ သဘောထားကတော့ တိုင်းရင်းသားတွေရဲ့လိုအပ်ချက်ကို သူတို့ ကောင်းကောင်းမွန်မွန် သဘောတူညီမယ်။ ညှိနှိုင်းဆွေးနွေးဖို့ ဆန္ဒရှိတယ်လို့ ကျနော်တို့ ကြားရပါတယ်။ သို့သော်လည်းပဲ နောက်ကွယ်မှာ တကယ်အဆုံးအဖြတ်ပေးရမယ့် တပ်မတော်လိုဟာမျိုး တခါ ကြံ့ခိုင်ဖွံ့ဖြိုးရေးပါတီလို အဖွဲ့အစည်းမျိုးကတော့ တိုင်းရင်းသားတွေ တောင်းခံနေတဲ့ ကိုယ်ပိုင်ပြဌာန်းခွင့် ပြည့်ဝတဲ့ စစ်မှန်သော ဖယ်ဒရယ် ပြည်ထောင်စုဆိုတာကိုတောင် များလွန်းတယ်။ ဒီအတွက် သံသယမကင်း ဖြစ်နေရပါတယ်။ အဲဒါကိုကော ညှိနှိုင်းလို့ရမယ်လို့ ထင်ပါသလား။
ဗိုလ်မှူးကြီးစိုင်းလတ် ။ ။ အဲဒါကတော့ ညှိနှိုင်းဆွေးနွေးတဲ့အရေးပဲ ဖြစ်ပါတယ်။ ကျနော်တို့ ထပ်မံပြီးတော့ ညှိနှိုင်းဆွေးနွေးရပါမယ်။ အဲဒီ ကျနော်တို့ တိုင်းရင်းသားတွေတောင်းဆိုနေတဲ့ အဲဒီအရေးကို ကျနော်တို့ အပြည့်အဝ တခါချက်ချင်းကြီးနဲ့ ရယူနိုင်မှာမဟုတ်သလို ဒီညှိနှိုင်းဆွေးနွေးတယ်ဆိုတာ အပြန်အလှန်ညှိနှိုင်းဆွေးနွေးပြီးတော့ တိုင်းပြည်ရဲ့လိုအပ်ချက်တွေကို ကျနော်တို့ တဖြည်းဖြည်းနှင့် ပြုပြင်ပြောင်းလဲလို့ ရသွားပါလိမ့်မယ်ဆိုတဲ့ ယုံကြည်ချက်နှင့် ကျနော်တို့ အစိုးရက ဖော်ဆောင်နေတဲ့ ငြိမ်းချမ်းရေးလမ်းစဉ်ထဲမှာ ပါဝင်ခဲ့ရခြင်းပဲ ဖြစ်ပါတယ်။
ဦးကျော်ဇံသာ ။ ။ ဟုတ်ကဲ့။ ဗိုလ်မှူးပြောသလိုပဲ ငြိမ်းချမ်းရေးဆွေးနွေးတယ်ဆိုတာ အပြန်အလှန် ညှိနှိုင်း ဆွေးနွေးရတာဖြစ်တယ်ဆိုတာ မှန်ပါတယ်။ အဲဒီတော့ အဲဒီလိုပဲ အပြန်အလှန် ညှိနှိုင်းဆွေးနွေးရင်းနှင့် နှစ်ဖက် ဟိုဘက် ဒီဘက် နည်းနည်းစီ ဈေးစစ်ကြရတာ။ အပေးအယူ လုပ်ကြရတာလည်း ရှိပါတယ်။ အဲဒီတော့ ဗိုလ်မှူးတို့ဘက်က ဘယ်လောက်ထိ အပေးအယူလုပ်နိုင်မယ်လို့ ထင်ပါသလဲ။ အပေးအယူလုပ်လို့ကော သဘောတူညီမှုရနိုင်မယ်လို့ ထင်ပါသလား သူတို့နဲ့။
ဗိုလ်မှူးကြီးစိုင်းလတ် ။ ။ အမှန်တော့ တိုင်းပြည်ပြုပြင်ပြောင်းလဲရေးကိစ္စမှာ ပြည်သူလူထုရဲ့ဆန္ဒက အဓိကကျပါတယ်။ ဆိုတော့ အခု ပြည်သူလူထုရဲ့အသံ ပြည်သူလူထုရဲ့ဆန္ဒကိုလည်း အားလုံးကလည်း အရေးထားပြီးတော့ ဖြည့်ဆည်းပေးဖို့ လိုအပ်ပါလိမ့်မယ်လို့ ဒီလိုမျိုးစိတ်ဓာတ်တွေ ရှိကြတယ်ဆိုရင်တော့ ဒီတိုင်းပြည် ပြုပြင်ပြောင်းလဲတဲ့နေရာမှာ မခက်ပါဘူးလို့ ကျနော်တော့ ထင်ပါတယ်။
ဦးကျော်ဇံသာ ။ ။ ဦးစိုင်းညွန့်လွင်တို့အနေနဲ့ ဒီကိစ္စကို ဘယ်လိုသဘောရပါသလဲ။ အဲဒီတော့။
စိုင်းညွန့်လွင် ။ ။ အခုကတော့ အဖွဲ့စည်းအသီးသီးက သူ့ offer လေးတွေ ပြောနေကြတာပဲ။ သူ့သဘောထားကို သူပြောနေတာတွေ ရှိသေးတယ်။ ဒီနေ့ ဒီအချိန်ထိ ကြံ့ခိုင်ရေးနဲ့လည်း ကျနော်တို့ တွေ့ဆုံဆွေးနွေးခွင့် မရသေးပါဘူး။ တပ်မတော်နဲ့လည်းပဲ တွေ့ဆုံဆွေးနွေးခွင့် မရသေးပါဘူး။ တပ်မတော်ရော ကြံ့ခိုင်ရေးကော သူ့သဘောထား သူ့ဟာသူ သီးခြားရှိနေသေးတယ်။ ကျနော်တို့အနေနဲ့လည်း ကျနော်တို့သဘောထား သီးသန့်ရှိနေပါသေးတယ်။ ကျနော် မျှော်လင့်တာကတော့ တွေ့ဆုံဆွေးနွေးခွင့် ရမယ်ဆိုရင်တော့ အတိုင်းအတာတခုထိတော့ ပြေလည်အောင်တော့ ကျနော်တို့ ဆွေးနွေးနိုင်မယ်လို့ မျှော်လင့်ထားပါတယ်။
ဦးကျော်ဇံသာ ။ ။ အဲဒီ တပ်မတော်၊ ကြံ့ခိုင်ဖွံ့ဖြိုးပါတီတို့နှင့် ဆွေးနွေးပွဲ ဖြစ်နိုင်မယ်လို့ မျှော်လင့်တာလား။
စိုင်းညွန့်လွင် ။ ။ ဖြစ်အောင်လို့တော့ ကျနော်တို့ ကြိုးစားရမှာပါ။
ဦးကျော်ဇံသာ ။ ။ အခု အာဏာပိုင်တွေက ပြောတယ်။ သူတို့က အပစ်အခတ်ရပ်စဲရေးလုပ်ပြီးရင် နိုင်ငံရေးဆွေးနွေးပွဲကို တက်လှမ်းမယ်လို့ ပြောတယ်။ ဆိုတော့ အဲဒီဆွေးနွေးပွဲတွေမှာ အစိုးရ ငြိမ်းချမ်းရေးဆွေးနွေးပွဲကောင်စီအပြင် စောစောကပြောတဲ့ ကြံ့ခိုင်ဖွံ့ရေးပါတီတို့ တပ်မတော်က ကိုယ်စားလှယ်တွေ ပါလာလိမ့်မယ်။ သူတို့နှင့်လည်း ဆွေးနွေးခွင့်ရမယ် ထင်ပါသလား။
စိုင်းညွန့်လွင် ။ ။ မပါလို့မရဘူး ခင်ဗျာ။ မပါဘဲနဲ့ ကျနော်တို့ နိုင်ငံရေးပြဿနာက မပြီးနိုင်ဘူး။ ဒီအတိုင်းပဲ မဆွေးနွေးဘဲနေခဲ့လို့ပဲ နှစ်ပေါင်းများစွာကြာခဲ့ပြီ။ အခုဆိုရင် ဒီဟာကို စွန့်လွှတ်ရမှာပဲ။ ကျနော်တို့ ပြည်တွင်းထဲက အဖွဲ့အစည်းတွေပဲ ဆွေးနွေးရမှာပဲ။ သဘောတူညီချက်တခု ရအောင်တော့ ကျနော်တို့ ညှိနှိုင်းရမှာ ဖြစ်ပါတယ်။
ဦးကျော်ဇံသာ ။ ။ အဲဒီတော့ သဘောတူညီမှုရအောင် ညှိနှိုင်းမယ်ဆိုလို့ရှိရင် ဟိုဘက်ကလည်း တင်းမယ်။ ဒီဘက်ကလည်း တင်းမယ်ဆိုရင်တော့ မဖြစ်ဘူးပေါ့ခင်ဗျာ။ အဲဒီတော့ နှစ်ဖက်လုံး ဟိုဘက်နည်းနည်း ဒီဘက်နည်းနည်း လျော့ကျပါ ညှိကြပါ Compromise လုပ်ကြပါဆိုရင် ရှမ်းတိုင်းရင်းသားတွေဘက်က လုပ်ဖို့ အဆင်သင့်ရှိပါရဲ့လား ။
စိုင်းညွန့်လွင် ။ ။ မှန်ပါတယ်။ အဲဒါ ကျနော်တို့ဘက်ကတော့ ကျနော် တက်နိုင်သလောက်ကတော့ ပြောထားတာတော့ ဒီဆွေးနွေးပွဲ သွားမယ်ဆိုရင် စိတ်ကောင်း စေတနာကောင်းထားမယ်။ ထားရမယ်။ ပြီးရင် တိုင်းပြည်အတွက် ပထမ ဦးစားပေးထားရမယ်။ ဒီအချက်တွေနဲ့တော့ ကျနော်တို့ ဒီလိုအခြေခံတွေနဲ့ သွားလို့ရှိရင်တော့ အောင်မြင်မှာပါ။ ဒါပေမယ့်လည်း နှစ်ဖက်စလုံးက အဲဒီလို အခြေခံတွေ ရှိဖို့လိုပါတယ်။ နှစ်ဖက်စလုံးက အဲဒီလို အခြေခံတွေရှိမှပဲ အလုပ်ဖြစ်မှာပါ။
ဦးကျော်ဇံသာ ။ ။ ကျနော် ဘာကြားရသလဲဆိုတော့ ဒါဟာ စစ်တပ်ပိုင်းက ကြားရတဲ့သတင်းတခုပါ။ ရှမ်းတိုင်းရင်းသားတွေကိုကြည့်လိုက်ရင် တိုင်းရင်းသားတွေကို ကြည့်လိုက်မယ်ဆိုရင် သူတို့ဟာ ဒီမိုကရေစီအရေးထက် ဖယ်ဒရယ်အရေးကိုပဲ ပြောနေကြတယ်ဆိုတဲ့ စကားတခွန်း ကျနော် ကြားရပါတယ်။ တဆင့်စကားပေါ့လေ။ ကျနော် တိုက်ရိုက်အင်တာဗျူးမှာ ထွက်လာတဲ့စကားတော့ မဟုတ်ဘူး။ အဲဒီကိစ္စကိုကော ဘယ်လို ပြန်ပြောချင်ပါလဲခင်ဗျာ။
စိုင်းညွန့်လွင် ။ ။ ကျနော်တို့ကတော့ ကျနော်တို့ လူကြီးတွေပြောခဲ့တာပေါ့။ ဒီမိုကရေစီအရေးနဲ့ တိုင်းရင်းသားအရေးဟာ ဒင်္ဂါးတခုထဲက ခေါင်းနှင့်ပန်းလိုပဲ တဖက် တဖက်တည်း ဖြစ်ပါတယ်။ အဲဒီလိုမျိုးပါပဲ။ ဒီမိုကရေစီမရှိဘဲနဲ့လည်း ကျနော်တို့လိုချင်တဲ့ ဖယ်ဒရယ်ပြည်ထောင်စု မဖြစ်နိုင်ပါဘူး။ ဖယ်ဒရယ်ပြည်ထောင်စု တည်ဆောက်မယ်ဆိုရင် ဒီမိုကရေစီက မလွဲမသွေ ရရမှာပါ။ ဒါကြောင့် ကျနော်တို့က ဖယ်ဒရယ်ပြည်ထောင်စုဖြစ်ဖို့အရေးရယ် ဒီမိုကရေစီအရေးရယ်ကို တပြိုင်နက် ဆောင်ရွက်နေခြင်း ဖြစ်ပါတယ်။
ဦးကျော်ဇံသာ ။ ။ ဗိုလ်မှူး ကျနော် နောက်ဆုံးတခု မေးချင်တာကတော့ KIA က အပစ်အခတ်ရပ်စဲရေး ပြည်လုံးကျွတ်လုပ်မယ်ဆိုတာကို သူတို့က လက်မှတ်မထိုးဘဲ အပစ်အခတ်ရပ်စဲရေးဆိုတာ နိုင်ငံရေး သဘောတူညီမှုရရင် နိုင်ငံရေးအရ ပြေလည်ရင် အလိုလို ဖြစ်လာမှာပဲ။ အဲဒါကြောင့် နိုင်ငံရေးသဘောတူညီမှုက ပိုအရေးကြီးတယ်။ အပစ်အခတ်ရပ်စဲရေးက သိပ်အရေးမကြီးဘူး။ တနည်းအားဖြင့် နိုင်ငံရေးသဘောတူညီမှုရဖို့က ပထမလို့ သူတို့က ပြောပါတယ်။ ဗိုလ်မှူးတို့ ဘယ်လိုသဘောရပါသလဲ ဒီကိစ္စကို။
ဗိုလ်မှူးကြီးစိုင်းလတ် ။ ။ ဟုတ်ပါတယ်။ ကျနော်တို့ ဒီ လက်နက်ကိုင် ပဋိပက္ခတွေဖြစ်ရတာ အဓိက အကြောင်ရင်းကတော့ နိုင်ငံရေးပြဿနာ ဖြစ်နေပါတယ်ဆိုတာ အားလုံးကလည်း လက်ခံကြပါတယ်။ ဒီနိုင်ငံရေး ပဋိပက္ခတွေကို ကျနော်တို့ ဖြေရှင်းနိုင်မှသာလျှင် ဒီလက်နက်ကိုင် ပြဿနာတွေကို ကျနော်တို့ ဖြေရှင်းနိုင်မှာ ဖြစ်ပါတယ်။ ဒါပေမယ့် ဒီနိုင်ငံရေးကိစ္စ ဖြေရှင်းဖို့အတွက် အပစ်အခက်ရပ်စဲရေးတွေ အပြန်အလှန်ယုံကြည်မှုတွေ တည်ဆောက်နိုင်ဖို့ဆိုလည်း နိုင်ငံရေးဆွေးနွေးပွဲမှာ ကျနော်တို့ ဘယ်လိုပုံ ဘယ်လိုနည်းနှင့် ပါဝင်နိုင်ကြမလဲဆိုတာလည်း ကျနော်တို့ ပြန်လည်စဉ်စားသုံးသပ်ဖို့လည်း လိုအပ်ပါလိမ့်မယ်လို့ ကျနော်တို့ အဲဒီလိုပဲ ထင်ပါတယ်။ ။
ဗွီအိုအေ (မြန်မာပိုင်း) အစီအစဉ်မှ ပြန်လည်ကူးယူ ဖော်ပြပါတယ်။
No comments:
Post a Comment