ကရင်နီတပ်မတော် အင်အားစုတချို့မှာ ငြိမ်းချမ်းရေးကိုယုံစားမိကာ အမိအိမ်များသို့ အပြုံးကိုယ်စီဖြင့် ခွင့်ပြန်သွားသောကြောင့် အင်အားပြန်လည်စုစည်းရန် လက်လှမ်းမမီ ဖြစ်နေရသည်။ ထိုအချက်ကို အစိုးရတပ်မှ ကောင်းစွာအသုံးချခဲ့သည်။ ဖြတ်လေးဖြတ် စီမံချက်ကိုလည်း ချမှတ်ဆောင်ရွက်ခဲ့သည်။ ထိုတိုက်ပွဲများတွင် ကျောင်းသားတပ်မတော် တပ်ရင်း (၃၀၃)၊ တပ်ရင်း (၆၀၁) တို့ကလည်း အစိုးရတပ်များကို ရွပ်ရွပ်ချွံချွံ တိုက်ပွဲဝင်ခဲ့ကြသည်။ နောက်ဆုံးခံစစ်ဖြစ်သော နောင်လုံ စခန်းကြီးကို အပြင်းအထန် ချေမှုန်းကြသည်။ (၁၂၀) မမ လက်နက်ကြီးများဖြင့် အဆက်မပြတ် ပစ်ခတ်သည်။ နဝတ အစိုးရ တပ်မတော် (လေ) မှလည်း လေယာဉ်များဖြင့် ဗုံးကြဲချသည်။ အလေးချိန်ပေါင် ၆၀ ရှိသော ဗုံးဒဏ်များကို မည်သူမျှ ကြာရှည်မခံစားနိုင်ကြ။ ထို့ကြောင့် မဖြစ်သာသည့်အဆုံး အားမတန် မာန်လျှော့လိုက်ကြရသည်။ ရဲဘော်များမှာ မိုးရေများနှင့်အတူ မျက်ရည်ဖြိုင်ဖြိုင်ကြရသည့်မြင်ကွင်းက ယနေ့တိုင် ထင်ဟပ်နေဆဲ။
နယ်စပ်တောင်ကုန်းများကြား လက်နက်သံတို့က အဆက်မပြတ်။ ခုခံစစ်ဝင်နေသော ရဲဘော်များကို ကျနော်တို့ ကျောင်းဆရာ/မ များက ထမင်းထုပ်နှင့် အားပေးစာများ ပို့ပေးရသည်။ တိုက်ပွဲများကြား ဆရာ/မ တို့မှာလည်း အားချိန်မရှိ စာသင်တဖက် တိုက်ပွဲဝင်တဖက် ကျရာတာဝန်ကို ထမ်းဆောင်ကြရသည်။
မိုးကား အဆက်မပြတ်၊ သွားရေးလာရေး ခက်ခဲသောကာလ။ လက်နက်ကြီး လက်နက်ငယ်အသံတို့က တဖြည်းဖြည်း စာသင်ကျောင်းအပေါ်သို့ လွှမ်းခြုံကျရောက်လာသည်။ ရွာအတွင်းရှိ သက်ကြီးရွယ်အို မသန်မစွမ်းနှင့် ကလေးများ ဝရုန်းသုန်းကား ပြေးလွှားနေကြသည်။ ယူနိုင်သမျှ ပစ္စည်းတချို့ကိုလည်း ယူကြရသည်။ တချို့က အော်ဟစ်ငိုကြွေးနေကြသည်။ ထိုမြင်ကွင်းများမှာ အရူးမီးဝိုင်းသကဲ့သို့ ဖြစ်မည်ထင်သည်။ တဖြည်းဖြည်းချဉ်းကပ်လာသော နဝတ တပ်များနှင့် လွတ်မြောက်ရန် အသက်လု ပြေးလွှားနေသည်ကြား တချို့က ဥစ္စာပစ္စည်းများကြောင့် မပြေးနိုင်သူတွေလည်းရှိသည်။ စစ်ဦး ဘီလူးများ လက်ချက်များကြောင့် ရွာသားတချို့ သေဆုံးကြရသည်။ ထိုင်းနိုင်ငံအတွင်းပိုင်းသို့ သုတ်ခြေတင်ကာ ပြေးကြရသည်။
အစိုးရတပ်များမရောက်မီ ရက်ပိုင်းအလို ထိုင်းသစ်တင်ကားများက နေ့မအား ညမအား အပြေးအလွှား ရသမျှသစ်တွေ ကြုံးယူနေသေးသည်။ ဒုက္ခရောက်နေသူတွေက သူတို့နှင့်မဆိုင်သလို အကျိုးအမြတ်တခုတည်းကိုသာ ဦးစားပေးကြသည်။ အတိဒုက္ခ များလွန်းသောကြောင့် ကျနော်ပင် စိတ်ဒဏ်ရာရလျှင် နှစ်ရှည်လများခံစားနေရသော တိုင်းရင်းသားတို့ ဝေဒနာကား ဆိုဖွယ်ရာပင်မရှိ။ ထိုဝေဒနာများကိုကုစားရန် နှစ်ရှည်ကာလ အတော်ကြာ အချိန်ယူရပေဦးမည်။ တိုင်းရင်းသားတို့ နှလုံးအိမ်တွင် ဗမာစစ်တပ်၊ ဗမာလူမျိုးကို နာကျည်းမုန်းတီးစိတ်က အမြစ်တွယ်သထက် တွယ်နေသည်။ မြန်မာ့တပ်မတော်သည်လည်း တိုင်းရင်းသားပေါင်းစုံဖြင့် ဖွဲ့စည်းတည်တောင်ထားသော တပ်မတော်ဖြစ်သည်ကို တွေးမိပုံမရ။
မိုးတို့က အဆက်မပြတ် ရွာသွန်းနေသည်မှာ နေ့စဉ်ရက်ဆက်။ နေရေးထိုင်ရေးအတွက် ပြင်ဆင်ကြရပြန်သည်။ ကျနော်တို့ ရောက်ရှိအခြေချမည့်နေရာမှာ ထိုင်းနိုင်ငံ၊ မဲ့ဟောင်ဆောင်မြို့အနီးရှိ နန်းဆွယ် ရွာနံဘေးတွင် ဖြစ်သည်။ ချုံနွယ်တွေကို ရှင်းကြရသည်။ စာနာထောက်ထားမှုကြောင့်ရသော မိုးကာရွက်ဖျင်မှာ ခြောက်တောင်ပတ်လည် မိသားစုတခုဖို့ လုံခြုံမှု အပြည့်အဝ မပေးနိုင်။ လုံလောက်သော ဆေးဝါးမရှိ။ မိုးဒဏ်လေဒဏ်ကြောင့် လူတော်တော်များများ ဖျားနာလာကြသည်။ ဆန်များကလည်း မိုးရေထိသောကြောင့် မှိုများတတ်ကာ ချပ်ခဲများဖြစ်နေသည်။ ထိုဆန်များကိုပင် ထုထောင်း ချက်ပြုတ်စားသောက်ကြရသည်။ ဝမ်းရောဂါတွေကလည်း နှိပ်စက်သောကြောင့် တချို့တချို့ ဘဝတစ်ပါးသို့ ထပ်မံပြောင်းသွားကြရပြန်သည်။ ဝဲ၊ ယားနာတို့ကလည်း လူတော်တော်များများနှင့် မလွတ်ကင်း။
တဦးကိုတဦး ကူညီနိုင်ခြင်းမရှိ။ အားလုံးက ကိုယ့်အပူနှင့်ကိုယ် အဟပ်ခံနေရသည်။ အဓိပ္ပာယ်မည်သို့ ဖွင့်ဆိုရမည် မသိ။ ဒုက္ခအပူကို ချိုမြိန်စွာသောက်သုံးရင်း ဖြတ်သန်းကြရသည်။ တိုက်ပွဲအရှိန်က တဖြည်းဖြည်း လျော့နည်းလာသည်။ မြားဦးက KNU ဘက်သို့ ဦးတည်သွားသောကြောင့်ဖြစ်သည်။ ကရင်နီနယ်မြေတွင်လည်း ခုခံစစ်အနည်းငယ်သာ ကျန်ရှိနေတော့သည်။ ကျနော်တို့နေသော နန်းဆွယ် စခန်းလေးမှာလည်း ထိုးထိုးထောင်ထောင်နဲ့ ရုပ်လုံးပေါ်လာခဲ့သည်။ ဆေးခန်း၊ စာသင်ကျောင်း၊ ဘုရားကျောင်း လိုအပ်သော အဆောက်အဦများ တလုံးပြီးတလုံးမြင်ရတော့ ကြည်နူးရပြန်သည်။ ရွာလေး သက်ဝင်လှုပ်ရှား၍မကြာ၊ မာနယ်ပလော ဌာနချုပ်ကျသွားသောကြောင့် မိတ်ဆွေတချို့နှင့် နန်းဆွယ်တွင် ပြန်လည်ဆုံတွေ့ရပြန်သည်။ အမှတ်တရ ဓာတ်ပုံတွေလည်း တွဲရိုက်ဖြစ်ကြသည်။ ထိုတွဲရိုက်ထားသောဓာတ်ပုံကို ယခု ကျနော် ပြန်ကြည့်လိုက်မိသောအခါ ထိုဓာတ်ပုံမှာ ၁၇ နှစ်ပင်ရှိပြီ။ ထိုဓာတ်ပုံထဲတွင် ကဗျာဆရာ စာရေးဆရာ ငြိမ်းဝေ၊ ဝင်းနိုင်ဦး၊ ဆရာဘယ်ရီထွန်း (ကျောင်းအုပ်ကြီး)၊ ဆရာဟဲရယ်(ကရင်နီစာပေ ဆရာ)၊ ဆရာစောကုကူး ပြီးတော့ ကျနော်။
(ဆက်ပါဦးမည်)
အုပ်ကြီးဖေ
၂- ၈- ၂၀၁၃
No comments:
Post a Comment