ဦးနေမျိုးဝေ ။ ။ အဲဒါကတော့ နေရာအနှံ့ပဲ တရားစွဲဆိုခံထားရတာတွေ ရှိတယ်။ ဘယ်မှာရှိသလဲဆိုရင် မော်ကျွန်းမှာ ရှိတယ်။ ဧရာဝတီတိုင်း။ ထားဝယ်မှာ ရှိတယ်၊ တနင်္လာရီတိုင်း။ နောက်တခါ ရှမ်းပြည်နယ်မှာ ရှိတယ်။ နောင်ချိုမှာ ရှိတယ်။ ရန်ကုန်တိုင်းမှာ ရှိမယ်။ မင်္ဂလာဒုံမှာ ရှိမယ်။ နောက် ဘယ်မှာရှိမလဲဆိုရင် ပဲခူးတိုင်း ဒိုက်ဦးမြို့နယ်မှာရှိမယ်။ နောက် တခြား ဒလတို့ အဲဒီဘက်တွေမှာလည်း ရှိတယ်။ အဲဒီဟာတွေက ဆွဲတဲ့ပုဒ်မတွေက လယ်ယာမြေပြဿနာပေါ် မူတည်ပြီးဖြစ်တဲ့ ပုဒ်မတွေက ၅၁ (စ၊ ဆ) ဟာမျိုးတွေ ရှိမယ်။ ပုဒ်မ (၁၈) လိုမျိုးတွေ ရှိမယ်။ နောက်တခါ ကုမ္ပဏီတွေဘက်က အခုန အုပ်ချုပ်ရေးပိုင်းတွေက ဆွဲတာ။ ကုမ္ပဏီဘက်ကဆွဲတာတွေဆိုရင် (၄၄၇) (၄၂၇) တွေ ရှိမယ်။ နောက်တခါ ရေးသားပြောဆိုမှုတွေနဲ့ပတ်သက်လို့ ဆွဲတာဆိုရင် ပုဒ်မ (၅၀၀) တွေရှိမယ်။ အဲဒါတွေ ရှိတယ်ဗျ။
ဦးသန်းလွင်ထွန်း ။ ။ အဲဒီနေရာမှာ သာမန်လူ နားလည်အောင်ဆိုလို့ရှိရင် ကုမ္ပဏီဘက်ကဆွဲတဲ့ကိစ္စကို အရင်ရှင်းပြပါလား။ ကုမ္ပဏီဘက်ကဆွဲတဲ့ ပုဒ်မ (၄၄၇) (၄၂၇) ဘာညာဆိုတာ ဘယ်လိုအခြေခံကို ပြောချင်တာလဲ။ ဘယ်လိုအခြေခံနဲ့ လယ်ယာမြေမှာ ဝင်ပြီးထွန်းယက်တဲ့ လယ်သမားတွေကို တရားစွဲရတာလဲ။
ဦးနေမျိုးဝေ ။ ။ သူက ပိုင်နက်ကျူးလွန်မှု၊ ပိုက်နက်ကျူးကျော်မှုဆိုတဲ့ပုံစံမျိုးတွေ ဆွဲကြတာ များတယ်။ ဒါကတော့ လုပ်ငန်းရှင်တွေ၊ ကုမ္ပဏီတွေဘက်က ဆွဲတာ။ အဲဒါကလည်း မူလမှုခင်းက လယ်ယာမြေမှုခင်း။ ဘယ်သူပိုင်တယ်ဆိုတာကို ပြောဖို့ခက်တယ်။ နောက် အမှန်တကယ် လုပ်ကိုင်နေထိုင်နေတဲ့လူတွေက လယ်သမားတွေ ဖြစ်တယ်။ ဒါပေမဲ့ အဲဒီဟာကို မျက်ကွယ်ပြုပြီးတော့ သူတို့ကို လုပ်ပိုင်ခွင့်ပေးထားပါတယ် ဆိုတဲ့ဟာမျိုးတွေနဲ့ ဆွဲတာဗျ။ ဒါပေမဲ့ လုပ်ပိုင်ခွင့်ပေးထားတယ်ဆိုတာ လုပ်ပိုင်ခွင့်က ဘယ်သူကပေးသလဲဆိုရင် ရပ်ကျေး မြေယာကော်မတီတွေက ပေးတာ။
ကျနော် မနေ့ကဆို ဒိုက်ဦးမြို့ နယ် တရားရုံးကိုရောက်တော့ ဒိုက်ဦးမြို့နယ်မှာ ဦးခင်မောင်,ပါ တောင်သူ (၁၂) ဦးကို ဆွဲထားတယ်။ ဆွဲထားတာက ရွှေဟင်္သာအရက်ချက်စက်ရုံက ဆွဲထားတယ်။ မနေ့က တရားရုံးမှာမေးတော့ ရပ်ကျေးမြေယာကော်မတီ ဥက္ကဋ္ဌလုပ်ရမယ့်လူက ဘယ်သူလဲဆိုတော့ ရပ်ကျေးအုပ်ချုပ်ရေးမှူး၊ အုပ်ချုပ်ရေးမှူး သူက မြေယာကော်မတီ ဥက္ကဋ္ဌ။ သူကိုယ်တိုင် တရားရုံးမှာမေးလို့ ပေါ်ပေါက်လာတာက မြေယာဥပဒေဟောင်းကိုလည်း သူ နားမလည်ဘူး၊ အသစ်ကိုလည်း နားမလည်ဘူး။ အဲဒီလိုဖြစ်တယ်။ သူက သက်သေထွက်တယ်။ တရားရုံးမှာ အဲဒီအတိုင်း ပေါ်ပေါက်တယ်။ သူပိုင်တယ်ဆိုတာကို မသိဘဲနဲ့ တရားစွဲမှုတွေကို လယ်သမားတွေက အချိန်ကုန်ခံ၊ ငွေကုန်ခံ၊ စရိတ်အကုန်ခံပြီးတော့ ရင်ဆိုင်ဖြေရှင်းနေရတယ်။
ဦးသန်းလွင်ထွန်း ။ ။ အခြေခံက ပိုင်နက်ကျူးလွန်မှုနဲ့ ဆွဲတာ။ ပိုင်နက်ကျူးလွန်မှုနဲ့ဆွဲရတယ်ဆိုတဲ့ အခြေခံက ဥပမာအားဖြင့် ကုမ္ပဏီတခုခုက လွန်ခဲ့တဲ့နှစ်ပေါင်း နှစ်အနည်းငယ်က သူတို့ဝယ်ယူထားတာပဲဖြစ်စေ၊ ဒါမှမဟုတ် အစိုးရဆီက လျှောက်ထားတာပဲဖြစ်စေ သူတို့ပိုင်ဆိုင်တဲ့ဆိုတဲ့ သတ်မှတ်ထားတဲ့မြေထဲမှာ လယ်သမားတွေက မူလ သူတို့ကိုယ်သူတို့ မူလပိုင်ရှင်ပါပြောတဲ့ လယ်သမားတွေကဝင်ပြီး ထွန်းယက်ကြတဲ့အပေါ်မှာ နှစ်ဖက်အငြင်းပွားနေတဲ့ ကိစ္စတွေပေါ့။ အဲဒါကို ဆိုလိုတာလား။
ဦးနေမျိုးဝေ ။ ။ အဲဒီမှာ နှစ်ပိုင်းရှိတယ်။ တစ်ပိုင်းက မင်္ဂလာဒုံမှာဖြစ်တာဆိုရင် ဇေကမ္ဘာကုမ္ပဏီကို သီးစားချထားပေးတယ်။ ဇေကမ္ဘာကုမ္ပဏီကို သီးစားချထားပေးတယ်ဆိုတာ စပါးစိုက်ခွင့်ပေးထားတာ။ နိုင်ငံတော်ပိုင်မြေကို စပါးစိုက်ခွင့် ပေးထားတယ်။ အဲဒီသီးစားစိုက်ခွင့်ဆိုတာ ဇေကမ္ဘာကုမ္ပဏီက developer အနေနဲ့ပဲ လုပ်တာ။ စပါးစိုက်တဲ့ကုမ္ပဏီ မဟုတ်ဘူး။ စက်မှုဇုံတည်ဆောက်ရေးအတွက်။ အဲဒါကို ရန်ကုန်တိုင်းဒေသကြီး အစိုးရအဖွဲ့လမ်းညွှန့်မှုနဲ့ပေးတယ် ဆိုတဲ့ပုံစံမျိုး မြို့နယ်ကနေ စာထုတ်တယ်။ အဲဒီစာကိုအကြောင်းပြုပြီးတော့ လယ်သမားတွေကို တရားစွဲတယ်။ တကယ်က လယ်သမားတွေက တောက်လျှောက်တဆက်တည်း တနှစ်မှ မပျက်ဘူး။ သူတို့ ၁၉၉၀ လောက်ကတည်းကနေ ၂၀၁၀ မှာ အငြင်းပွားမှုဖြစ်တယ်။ အဲဒီအချိန်အထိ စိုက်တယ်။ ၁၀ မှာလည်း စိုက်တယ်။ ၁၁ မှာလည်း စိုက်တယ်။ ၁၂ မှာလည်း စိုက်တယ်။ ဒီနှစ် ၂၀၁၃ မိုးရာသီမှာလည်း စိုက်တယ်။ အဲဒါကို ဆွဲတာ။
နောက်တခါ ဒါကတော့ သီစားစိုက်ပြီးတော့ ပေးပြီးတော့ ဆွဲတဲ့ပုံစံတမျိုး။ နောက် ရွှေဟင်္သာမှာဆိုရင် သီးစားစိုက်ပျိုးခွင့်လည်း မရှိဘူး။ ရပ်ကျေးမြေယာကော်မတီ ဥက္ကဋ္ဌဖြစ်တဲ့လူကိုမေးတဲ့အခါမှာ အဲဒီရွှေဟင်္သာမှာ ဘာလုပ်ပိုင်ခွင့်ရှိသလဲဆိုရင် မရှိဘူး၊ မသိဘူး ဖြေတယ်။ အဲဒီအပေါ်မှာလည်း ဆွဲတာပဲ။ ရွှေဟင်္သာ ယခင်နှစ်တွေက အဲဒီနေရာမှာ ကြံစိုက်ပျိုးခဲ့တယ်။ နောက် ပလပ်ထားတယ်။ နောက် ၂၀၁၂ ခုနှစ် လယ်ယာမြေဥပဒေပုဒ်မ ၁၂ (ဈ) မှာပါတာ တခုရှိတယ်။ အဲဒါ ဘယ်လိုပါသလဲဆိုတော့ မည်သည်အကြောင်းကြောင့် ပလပ်မထားရဆိုတော့ တောင်သူလယ်သမားတွေက ပလပ်မထားရဲဘူး။ ပလပ်ထားလိုက်ပြန်ရင်လည်း ပလပ်ထားတဲ့မြေယာကို သိမ်းလို့ရတယ်။ ပလပ်မထားဘဲနဲ့ ထွန်းယက်စိုက်ပျိုးပြန်တဲ့အခါကျတော့လည်း ပိုက်နက်ကျူးလွန်မှုတွေနဲ့ တရားစွဲဆိုခံရတယ်။
ဦးသန်းလွင်ထွန်း ။ ။ ဒါပေမဲ့ အခုစောစောက ဦးနေမျိုးဝေပြောတဲ့ မင်္ဂလာဒုံကကိစ္စ၊ ရွှေဟင်္သာကိစ္စဆိုလို့ရှိရင် ကုမ္ပဏီတွေအနေနဲ့ သက်ဆိုင်ရာလယ်သမားတွေကို အခကြေးငွေပေးပြီးတော့ ဝယ်ယူထားပြီးသာကိစ္စတွေ မဟုတ်ဘူးလား။
ဦးနေမျိုးဝေ ။ ။ မဟုတ်ဘူးခင်ဗျာ။ ရွှေဟင်္သာမှာဆိုရင် ပဲခူးတိုင်း ဒိုက်ဦးမှာဖြစ်တာဆိုရင် တပြားတချပ်မှ မပေးဘဲနဲ့ ... အေးသုခ ကျေးရွှာဖွံ့ဖြိုးရေးအဖွဲ့ကနေ သိမ်းတယ်လို့ ပြောတယ်။ ဒါပေမဲ့ မနေ့က မြို့နယ်အုပ်ချုပ်ရေးမှူး၊ ဒိုက်ဦးမြို့နယ် အုပ်ချုပ်ရေးမှူးကိုမေးတဲ့အခါမှာ မြေသိမ်းမှုဆိုတာမရှိပါဘူးတဲ့ သူတို့မြို့နယ်ထဲမှာ။ ဒါက အောက်ခြေမှာ ဖြစ်တာပါ။ တပြားတချပ်မှ လျော်ကြေးမရဘူး။ အဲဒီလိုပဲ ရွှေနံ့သာ မင်္ဂလာဒုံမှာဖြစ်တဲ့ဟာတွေကလည်း စက်မှုဇုံ အကောင်အထည်ဖော်ရမယ်လို့ပြောပြီးတော့ သိမ်းထားတယ်။ ဒါပေမဲ့ နိုင်ငံတော်အစိုးရ ခွင့်ပြုထားတာ ၁၄၈၀။ အဲဒီမှာဖြစ်နေတာက ဧက ၄၀၀၀ လောက်ဖြစ်နေတယ်။ ပိုလျှံပြီးတော့ သွားပြီးတော့ ယူထားတာဖြစ်တယ်။ တောင်သူလယ်သမားတွေကို မင်္ဂလာဒုံမှာပေးတာက ဇုံတစ်နှစ်သုံးထဲမှာ တပြားတချပ်မှ မပေးတာရှိတယ်။ ၁၄ ဧကလောက်ကိုမှ ငွေ ၄၀၀၀၀ လောက် ပေးလိုက်တာရှိတယ်။ အိမ်ယာကွက်တွေ ကျန် ၄၀-၆၀ တွေ ခေါ်ပေးမယ်ဆိုပြီး မရသေးတာရှိတယ်။ သုံးသိန်းပေးပြီးတော့ ပယ်ထုတ်လိုက်တာရှိတယ်။ သုံးသိန်းပေးတဲ့အချိန်မှာ ကာလပေါက်ဈေးက ၁၄ သိန်း-၁၅ သိန်း ပေါက်နေတယ်။ အဲဒါမျိုးတွေ ရှိတယ်ဗျ။
ဦးသန်းလွင်ထွန်း ။ ။ အဲဒီတော့ အစောပိုင်းက ဦးနေမျိုးပြောတဲ့အထဲမှာ နေရာတခုကို လယ်သမားတွေက ထွန်းယက်မစိုက်ပျိုးဘဲနဲ့ ပလပ်ထားရင် သိမ်းပိုင်ခွင့်ရှိတယ်ဆိုပြီးတော့ ပါတယ်။ ဒါ့အပြင် နောက်တမျိုး ကျနော်တို့ကြားရတာက သတ်မှတ်ထားတဲ့ တာဝန်ကျေ စပါးမပေးနိုင်လို့ တချိန်တုန်းကသိမ်းခဲ့တဲ့ ဖြစ်ရပ်တွေလည်းရှိခဲ့ဖူးတယ်လို့ ဆိုတယ်။ အဲဒါလေးကိုလည်း နည်းနည်းလေး ရှင်းပြပေးပါ။
ဦးနေမျိုးဝေ ။ ။ အဲဒါတွေနဲ့ပတ်သက်ရင် တာဝန်ကျေစပါးဆိုတာ ရှိတယ်။ အဲဒါက မြန်မာ့ဆိုရှယ်လစ်လမ်းစဉ်ပါတီခေတ်က ရှိတာ။ ဒါပေမဲ့ ဒီ စစ်အုပ်ချုပ်ရေးတက်လာပြီးတော့ ၁၉၈၉ မှာ ပျောက်ကွယ်သွားတယ်။ အဲဒီတုန်းက တာဝန်ကျေစပါး မသွင်းနိုင်တဲ့ပုဂ္ဂိုလ်တွေကို မြေသိမ်းတယ်ဆိုတာရှိတယ်။ အဲဒီအမှုမျိုးတွေလည်း ကျနော်တို့ လိုက်ပါဆောင်ရွက်တဲ့အထဲမှာ မရှိဘူး။ အဲဒါက တည်ဆဲကာလဥပဒေတွေနဲ့ အကျုံးဝင်နေတယ်။ ဘောင်ဝင်နေတယ်လို့ သုံးသပ်တဲ့အတွက် လိုက်ပါဆောင်ရွက်တာ မရှိဘူး။ ကျနော်တို့ လိုက်ပါဆောင်ရွက်တာတွေက တာဝန်ကျေစပါး မရောင်းလို့ သိမ်းတဲ့ဟာမျိုးတွေ မပါဘူး။ အဲဒါမျိုးကို ကျနော်တို့ ရှောင်တယ်။
နောက် ဒီဘက်မှာ ကျနော်တို့ လိုက်လုပ်တဲ့ဟာတွေမှာ ... ၃၉ ကျပြီးတော့ နိုင်ငံတော်ကနေ သိမ်းတယ်။ ... ၃၉ မှာလည်း မြေသိမ်းဥပဒေတွေ၊ လယ်ယာမြေဥပဒေတွေနဲ့ မကိုက်ညီဘူး။ လယ်ယာမြေ ဥပဒေပုဒ်မ (၅) မှာ ပြဆိုထားတာရှိတယ်။ အဲဒါတွေက စီမံကိန်းမအောင်မြင်လို့ရှိရင် သို့မဟုတ် မသုံးတော့ရင် မူလလက်ငုတ်တောင်သူကို ပြန်ပေးရမယ်ဆိုတာ ပါတယ်။ နောက် စက်မှုဇုန်လို လုပ်မယ်ဆိုရင်လည်း စီမံကိန်းကာလ (၆) နှစ်အတွင်းမှာ စတင်ပြီး အကောင်အထည်ဖော်ရမယ်။ (၅) နှစ် စီမံကိန်းဆိုရင် (၅) နှစ်အတွင်းမှာ ပြီးပြတ်ရမယ်။ မပြီးပြတ်ရင် လယ်ယာမြေအတိုင်းရှိနေရင် မူလလက်ငုတ်လယ်သမားကို ပြန်ပေးရမယ်။ ပြင်ပ ပုဂ္ဂလိကတွေကို ပြန်လည်ရောင်းဝယ်၊ ပေါင်ရန် ငှားရမ်းခွင့်၊ ပေးကမ်းခွင့် မရှိဘူး။ ပုဒ်မ(၁၀) မှာ ခြွင်းချက် ဘယ်လိုပါသလဲဆိုတော့ တောင်သူလယ်သမား၊ မိသားစုတွေက နှစ်ကြာသွားလို့ အဖေ အမေတွေ သေသွားရင် သားသမီးတွေ ပြန်ပြီးလုပ်ပိုင်ခွင့် ပေးရမယ်၊ ငှားရမယ်၊ ရောင်းရမယ်။ အဲဒီလို အတိအကျတွေပါတယ်။
ဦးသန်းလွင်ထွန်း ။ ။ အခုပြောတဲ့ ဥပဒေဆိုတာက ပြီးခဲ့တဲ့နှစ် ၂၀၁၂ မတ်လတုန်းက အတည်ပြုခဲ့တဲ့ မြေယာဥပဒေသစ်ကို ပြောနေတာလား။ ဒီ မြေယာဥပဒေသစ်က။
ဦးနေမျိုးဝေ ။ ။ မဟုတ်ဘူးဗျ။ အခင်းဖြစ်ကာလ ဥပဒေ။ စတင်ပြီးတော့ သိမ်းဆည်းတာ။ နောက်ပြီးတော့ အဲဒီ ဥပဒေတွေနဲ့အညီ ပြန်လည်ပေးကမ်းရမယ့်အချိန်ကာလ။ အဲဒါက အခင်းဖြစ်ကာလဥပဒေ ၁၉၅၃ ခုနှစ် လယ်ယာမြေ နိုင်ငံတော်ပိုင်ပြုတဲ့ ဥပဒေ။ ၆၃ သီးစားချထားတဲ့ ဥပဒေ။ အဲဒါတွေကိုပြောတာ။ ဒီဘက်ခေတ်မှာ အသစ်ဖြစ်တာက ၂၀၁၂ ခုနှစ် သြဂုတ်လ ၃၀ ရက်နေ့မှာ သုံးနိုင်ပြီလို့ပြောတဲ့ သမ္မတအမိန့် ညွှန်းကြားချက်ထုတ်လိုက်တဲ့ဟာက လယ်ယာမြေဥပဒေမှာလည်း ပုဒ်မ ၃၂ ဆိုတာပါတယ်။ စီမံကိန်းနယ်မြေတွေအတွက် သုံးရမယ်ဆိုရင် သုံးဖို့လိုအပ်လို့ သိမ်းပေးရမယ်ဆိုရင် အနည်းဆုံးပမာဏကို သိမ်းပြီးပြီတော့။ မသုံးနိုင်တဲ့ ပမာဏတွေကို တောင်သူလယ်သမား လက်ငုတ်တွေကို ပြန်ပေးရမယ်လို့ ပါပြန်ရော။
ဦးသန်းလွင်ထွန်း ။ ။ အဲဒါက တောင်သူလယ်သမားတွေရဲ့ အခွင့်အရေးတွေအတွက် ကောင်းတဲ့အချက်လို့ ပြောရမှာပေါ့။ အဲဒီတော့ ဒီ ဥပဒေက အကောင်အထည် မပေါ်ဘူးလား။
ဦးနေမျိုးဝေ ။ ။ ဒီမှာ အခုဖြစ်နေတာတွေက ဥပဒေတွေ အကောင်အထည်မပေါ်တဲ့ သဘောတွေ။ ကျနော်တို့က လွှတ်တော်က ဆုံးဖြတ်ချက်တွေ ချပြီးသွားပြီ။ တကယ် ဆက်လျက်ပြီးလုပ်ရမယ့်ဟာ ဘာကျန်သေးလဲဆိုတော့ တရားဥပဒေ စိုးမိုးရေး ကျန်နေတယ်။ ဥပဒေအတိုင်း ဥပဒေနဲ့အညီ ဖြေရှင်းဆောင်ရွက်နိုင်ဖို့တွေ ကျန်နေတယ်။ အဲဒီအပိုင်းက အခုထက်ထိ အကောင်အထည် ပေါ်မလာသေးဘူးလို့ ပြောလို့ရပါတယ်။
ဦးသန်းလွင်ထွန်း ။ ။ အဲဒီတော့ ပြီးခဲ့တဲ့နှစ် သြဂုတ်လမှာ စပြီးတော့ ထွက်လာတဲ့၊ အတည်ဖြစ်လာတဲ့ ဥပဒေအရဆိုရင် လယ်သမားတွေအနေနဲ့ သူတို့ရဲ့လယ်ယာမြေတွေကို မှတ်ပုံတင်နိုင်ဖို့ ဆောင်ရွက်ရတော့မယ်။ ဒီကိစ္စက အခုထက်ထိ တချို့နေရာတွေမှာ အကောင်အထည် မပေါ်သေးဘူး။ နှောင့်နှေးနေတယ်ဆိုတာတွေလည်း ကြားရတယ်။ လယ်သမားတွေအနေနဲ့ သူတို့ပိုင်ဆိုင်တဲ့၊ သူတို့ ထွန်းယက်စိုက်ပျိုးနေတဲ့ မြေတွေကို မှတ်ပုံတင်ပြီးပြီဆိုလို့ရှိရင် ဘယ်လိုအခွင့်အရေးတွေ ရနိုင်ပါသလဲ။
ဦးနေမျိုးဝေ ။ ။ မြေယာတွေကို မှတ်ပုံတင်ပြီးသွားပြီဆိုရင်တော့ တောင်သူလယ်သမားတွေက မိမိတို့ မြေယာမှာ ကျနော်တို့ အိမ်ဂရမ်များလို့ပေါ့ နိုင်ငံတော်က မြေယာတွေရဲ့ မူရင်းပိုင်ရှင်ဖြစ်တာတော့ မှန်တယ်။ တောင်သူလယ်သမား ဦးနေမျိုးဝေ၊ ဦးဖြူ စသဖြင့် နာမည်ပေါက်နဲ့ မှတ်ပုံတင်ထားမယ်ဆိုရင် အဲဒီမှတ်ပုံတင်ထားတဲ့ မြေက ခြောက်လ ပြည့်သွားပြီ၊ ကျော်လွန်တဲ့ကာလမှာ ပေါင်းနှံ၊ ငှားရမ်း၊ ရောင်းချခွင့်တွေ ရမယ်။ Property rights လို့ ပြောလို့ရတယ်။ ပုဂ္ဂလိက အခွင့်အရေးပိုင်ခွင့်တွေ သူ ရလာလိမ့်မယ်။ အိမ်ဂရမ်ရှိတဲ့အိမ်တွေကို ရောင်းဝယ်၊ ငှားရမ်းခွင့်ပုံစံမျိုး သူ ရသွားမယ်။ သူ့မှာ စာရွက်စာတမ်းရှိမယ်ဆိုရင် သူ့ကို မနှောက်ယှက်နိုင်တော့ဘူး။ ကျန်တယ်လူတွေ သိမ်းတာပြုတာတွေ မလုပ်နိုင်တော့ဘူး။ သိမ်းမယ်ဆိုရင်လည်း အခု မြေသိမ်းကိစ္စက လိုအပ်လို့ နိုင်ငံတော်က သုံးဖို့လိုအပ်မယ်ဆိုရင်လည်း အဲဒီမှာရှိတဲ့ ကာလပေါက်ဈေးတွေနဲ့ ပေးလျော်တာတို့၊ လျော်ကြေးရယူပိုင်ခွင့် ပုဒ်ထီး ပုဒ်မတွေ ဆက်ပါသေးတယ်ဗျ။
ဦးသန်းလွင်ထွန်း ။ ။ အခုလက်ရှိ မြန်မာနိုင်ငံမှာရှိတဲ့ အများစုဖြစ်တဲ့ လယ်သမားတွေဟာ သူတို့ရဲ့ လယ်ယာမြေတွေကို ထွန်းယက်နေပေမယ့် တကယ်တမ်း သူတို့ပိုင်ဆိုင်တဲ့မှတ်ပုံတင် မရှိဘူးဆိုတဲ့သဘောလို့ ပြောချင်တာလား။
ဦးနေမျိုးဝေ ။ ။ အဲဒါက တော်တော်များများ။ လယ်သမားမှ မဟုတ်ဘူး။ ကုမ္ပဏီတွေမှာလည်း အဲဒီ ပိုင်ရေးဆိုင်ခွင့်မှတ်ပုံတင် မရှိပါဘူး။
ဦးသန်းလွင်ထွန်း ။ ။ အဲဒီတော့ အခုလောလောဆယ် မှတ်ပုံတင်မယ်ဆိုတဲ့ကိစ္စက ဖြစ်လာတော့မလား။ ဘယ်လောက်တော့ အကောင်အထည်ဖော်မလဲ။ ဒီကိစ္စက လွှတ်တော်ကလည်း အတည်ပြုပြီးပြီ။ ဥပဒေအဖြစ်လည်း လွှတ်တော်ကလည်း အတည်ပြုပြီးပြီ။ ဥပဒေလည်း ဖြစ်လာပြီဆိုတော့ အကောင်အထည်ဖော်ဖို့ နှောင့်နှေးနေတယ်ဆိုရင် တာဝန်ရှိတဲ့ အစိုးရအပေါ်ကို အရေးယူ မဆောင်ရွက်တဲ့အတွက် ဘယ်လိုများ တုံ့ပြန်လုပ်ဆောင်တာတွေ လုပ်နိုင်မလဲ။
ဦးနေမျိုးဝေ ။ ။ အဲဒါက ဒီနိုင်ငံမှာရှိတဲ့ အစိုးရရဲ့ဝန်ထမ်း၊ အုပ်ချုပ်ရေး အဖွဲ့အစည်းတွေအကုန်လုံးရဲ့ ညံ့ဖျင်းမှုပါ။ အဲဒါတွေကတော့ တော်တော်များများ မြို့ ရွာတွေ တော်တော်များများမှာ။ ပုသိမ်မှာတော့ တလောက သတင်းတခု ကြားလိုက်ပါတယ်။ တောင်သူလယ်သမားဥပဒေ ဘယ်လောက်ကို မှတ်ပုံတင် တင်ပြီးပြီ။ ဧက ဘယ်လောက် မှတ်ပုံတင်ပြီးပြီ။ ဒါပေမဲ့ အလွန်နည်းတဲ့ ပမာဏပါ။ ဧရာဝတီတိုင်းထဲမှာ မြို့နယ်လေး တနယ်ဖြစ်တဲ့ ဘိုကလေးမြို့နယ်မှာဆိုရင်တော့ ဧကပေါင်း ၃၀၇၈၂၉ သိန်းကျော် ရှိပါတယ်။ အဲဒါတွေကို မှတ်ပုံတင်တဲ့လုပ်ငန်းတွေကို လျင်မြန်စွာ လုပ်ပေးရမှာပါ။ အခုဆိုရင် သြဂုတ်လရောက်ရင် တနှစ်တောင်ကျော်သွားပါပြီ၊ မှတ်ပုံတင် ပမာဏက အလွန်တော်သေးတယ်။ စွမ်းဆောင်ရည် ညံ့ဖျင်းတဲ့ အုပ်ချုပ်ရေး ယန္တရားကြီးလို့ ပြောလို့ရပါတယ်။
ဦးသန်းလွင်ထွန်း ။ ။ အခုလောလောဆယ်က မြန်မာနိုင်ငံမှာဆိုရင် ၂၀၁၅ ခုနှစ် ရွေးကောက်ပွဲ အစီအစဉ်လည်း တဖြည်းဖြည်းနဲ့ နီးကပ်လာပြီပေါ့။ မြန်မာနိုင်ငံရဲ့ အဓိက ဦးရေက တောင်သူလယ်သမားတွေ မြေယာနဲ့ပတ်သက်ပြီး အသက်မွေးကြောင်းလုပ်နေတဲ့လူတွေဆိုတော့ ဒီ ရွေးကောက်ပွဲ အထူးအစီအစဉ် ပါတီစုံ ရွေးကောက်ပွဲတွေမှာဆိုရင် အများစုဖြစ်တဲ့ လူဦးရေကို မဲဆွယ်နိုင်ဖို့ဆိုတာ အတော်အရေးကြီးတော့ ဒီကိစ္စက အခု လယ်ယာမြေသိမ်းတဲ့ကိစ္စ၊ မှတ်ပုံတင်တဲ့ကိစ္စတွေက အခုလာမယ့် နိုင်ငံရေးအခင်းအကျဉ်းမှာ ဘယ်လောက်အထိ အရေးပါလာမယ်လို့ ထင်ပါသလဲ။
ဦးနေမျိုးဝေ ။ ။ အဲဒါကလည်း ပြောရခက်တယ်ဗျ။ ပြည်သူကလည်း ခပ်တုံးတုံး။ အစိုးရကလည်း ခပ်တုံးတုံးပဲ။ မဲဆွယ်ရင်လဲ ဆွယ်လို့ဆွယ်မှန်း သိချင်မှသိတာ။ အဲဒီ အနေအထားကတော့ ရှိတယ်ဗျာ။ တောင်သူလယ်သမားတွေရဲ့ မဲက အရေးပါတာတော့ မှန်တယ်။ အရေးပါတဲ့ တောင်သူလယ်သမားတွေက ဘယ်သူကို ဘာကြောင့် မဲပေးရမလဲ။ သူတို့ရဲ့အရေးကို ဘယ်သူတွေက ဆောင်ရွက်ပေးနေတယ်။ ဘယ်သူတွေက ဘယ်လိုနှောက်ယှက်နေတယ်။ ဘယ်သူတွေက ဘယ်လိုညံ့ဖျင်းနေတယ်ဆိုတာကို ကျကျနန မသိနိုင်ဘူး ဖြစ်နေတယ်။ သိရင်တော့ အဲဒီ မဲက အရေးပါမှာပေါ့။ အဲဒီလိုသိနိုင်တဲ့ ပမာဏ ၂၀% လောက်ပဲရှိတယ်။ တောင်သူလယ်သမား တစ်ရာရှိမယ်ဆိုရင်တောင်။ အဲဒီအထဲမှာ အဲဒီလောက်ပဲ သိနိုင်တာဖြစ်တဲ့အတွက် အဲဒီလူတွေရဲ့မဲကတော့ အခရာကျပြီးတော့ ကျန်တဲ့လူတွေရဲ့  ၈၀% မဲကတော့ ရွေးကောက်ပွဲကာလမှာပေါ်လာတဲ့ အခင်းအကျင်းတွေနဲ့ပဲ သက်ဆိုင်သွားပါလိမ့်မယ်။
ဦးသန်းလွင်ထွန်း ။ ။ မြန်မာနိုင်ငံအတွင်း လယ်ယာမြေကိစ္စတွေကို ဆောင်ရွက်ပေးနေတဲ့ မတူကွဲပြားခြင်းနဲ့ ငြိမ်းချမ်းရေးပါတီ ဥက္ကဋ္ဌ ဦးနေမျိုးဝေ ကို ဆက်သွယ်မေးမြန်းခဲ့တာပါ။
ဗွီအိုအေ (မြန်မာပိုင်း) အစီအစဉ်မှ ပြန်လည်ကူးယူ ဖော်ပြပါတယ်။
No comments:
Post a Comment