မေမေကြီးကြီး (မောင်သာရ) - ၂

ဆိုတော့ကာ … ကွဲကြလေသတည်းပေါ့။ အိမ်မကြီးရဲ့ဘယ်တောင်ပံက အိမ်ထောင်ရေး ကံဇာတာညံ့တယ်လို့ပဲ ပြောရတော့မှာပေါ့။ ညာတောင်ပံ တောင်ညာစံဒေဝီတွေရဲ့ သားမက်တွေကတော့ မဆိုးပါဘူး။ အနည်းဆုံး ထင်းခွဲ ရေခတ် ဟင်းရှာ သီးနှံစိုက်ပေါ့။ ရွာဦးကျောင်း အဝီစိတွင်းက သောက်ရေ သုံးရေကို နေ့စဉ် ဆယ်ထမ်း ဆယ်ခေါက်လောက် ခပ်ရတယ်ဆိုတာကလဲ လွယ်တာမှတ်လို့။ အိမ်နဲ့ကျောင်းနဲ့က တပြခွဲလောက်ဝေးတာ တယောက်တခေါက် အလှည့်နဲ့ ထမ်းကြရတာ။ တွင်းကလဲ ဘယ်လောက်နက်သလဲဆိုရင် ရေကိုငုံ့ကြည့်လို့ မမြင်ရဘူး။ 

ပြီးတော့ အမျိုးသမီးတွေလဲ ခပ်ခွင့် ငင်ခွင့် တွင်းဘောင်ရပ်ခွင့် မရှိဘူး။ ကျုပ်တို့ အမေတွေအုပ်စုကတော့၊ ချက်ပြုတ် လျှော်ဖွပ်တာဝန်တွေအပြင် တတ်တဲ့ပညာ မနေသာဆိုသလို ပါလာသမျှ သိုးမွှေးထည်တွေကို ပြန်ဖြေ ပြန်လုံးပြီး ဝါးသီတံဇာထိုး အပ်တွေနဲ့ အင်္ကျီတွေ ခြုံစောင်တွေ ဦးထုပ်တွေ ပြန်ထိုးရောင်းကြပေါ့။ 

ဒါပေမယ့် စစ်အတွင်းမှာ ဘယ်က သိုးမွှေးချည်ခင်အသစ် ဝယ်လို့ရမှာလဲ။ ကုန်တော့ အလုပ်ပြုတ်ပေါ့။ ပြဿနာက ဆန် ဆီ ဆား စသည့် အခြေခံစားကုန်က မပူရပါဘူး၊ ဦးလေး ကျောက်(ပွဲစား)က ကြက်တွေ မွေးထားလို့ ကြက်ဥလဲ အလျှံပယ် စားရပါတယ်။ ဒါပေမယ့် စစ်ဒဏ် အမြောက်ကျည်ဒဏ်က တချီတည်းနဲ့ သေလုမျောပါးခံလိုက်ကြရတော့ နောက်တကြိမ် ကြော့လာရင် ဘယ်နှယ်လုပ်ကြပါ့မလဲပေါ့။ လူကြီးတွေ ခေါင်းချင်းဆိုင် တိုင်ပင်ကြတယ်။ ခုနေရတာက မနက်မိုးလင်းလို့ အိပ်ရာကနိုးတာနဲ့တပြိုင်နက် ကိုယ့် ခေါင်းကိုယ် ဘီးစမ်းသလို ပြန်စမ်းကြည့်နေရတဲ့ဘဝ တဲ့။ ခေါင်းနဲ့ကိုယ် တဆက်တည်း အိုးစားမကွဲသေးပါလားဆိုတာသေချာမှ အသက်တရက်တော့ ရှည်ပြန်ပဟဆိုပြီး သက်ပြင်းချလို့ရသတဲ့။

ပြီးတော့လဲ ဦးလေးကျောက်က အကြံပြုတယ်။ မန္တလေးတမြို့လုံးကလူတွေ အနောက်ဘက်ကမ်း စစ်ကိုင်းတောင်ရိုး ပြေး၊ ဘုရားရိပ် ကျောင်းရိပ် ခိုလှုံကြတာများတယ်၊ ခုဆိုရင် စစ်ကိုင်းတောင်ရိုးက ချောင်တွေမှာ မြို့လိုစည်ကားနေပြီဆိုပဲ။ ဘုန်းကြီးတပါးဆီက သူ သတင်းကြားလာသတဲ့။ စစ်ကိုင်းတောင်ရိုး အောက်ဘက်က ‘သရက်ပင်ဆိပ်’ တို့ အထက်ဘက်က ‘ဝါးချက်’ တို့ဆိုရင် ဈေးဆိုင်တန်းတွေနဲ့ ဖြစ်နေပြီတဲ့။ ပြီး အောက်ပြေအောက်ရွာက ရွက်လွှင့်ဆန်တက်လာကြတဲ့ ပိန်းကောမကြီးတွေနဲ့ အောက်ကုန် ငခြောက် ငခြမ်းတွေလဲ ရောက်လာ၊ အကြီးအကျယ် ဈေးကွက်ကြီးဖြစ်နေတယ်ဆိုပဲ။ သူ့အနေနဲ့ အများကြီး အလုပ်လုပ်လို့ရနိုင်တယ် ပြောတယ်။ 

ဆိုတော့ကာ … သူက စစ်ကိုင်းတောင်ရိုး ပြောင်းကြဖို့ စည်းရုံးမဲဆွယ်တယ်။ ရာနဲ့ချီရှိတဲ့ ချောင်တွေမှာ ထောင်နဲ့ချီရှိတဲ့ ကျောင်းကန်ဇရပ်တွေ ဓမ္မာရုံတွေလည်း ပေါပါတယ်ပေါ့။ ပထမဆုံး သူကိုယ်တိုင် ကူးစုံစမ်း လေ့လာစုံစမ်းလိုက်မယ်ပေါ့။ အဆင်ပြေရင် ပြောင်းနေကြဖို့ တခါတည်း စီစဉ်ဆောင်ရွက်ခဲ့မယ်ပေါ့။ သည်အချိန်မှာ ဘိုမေမေ့ယောက်ျား လေးလေးဘိုကလဲ အညံ့မခံဘဲ အကြံတခု ထပ်တင်တယ်။ အခု အင်္ဂလိပ်လဲ ပြန်ဝင်လာပြီ၊ မကြာခင် တပြည်လုံး ပြန်သိမ်းပြီး အုပ်ချုပ်ရေးယန္တရားက ပြန်စရင် ကျောင်းတွေလဲ မလွဲမသွေပြန်ဖွင့်မှာပဲပေါ့။ သည်တော့ ချောင်တချောင်က ဓမ္မာရုံကြီးတခုခုမှာ ဆရာတော်တွေရဲ့အကူအညီနဲ့ ကျုပ်တို့မိသားစု အပါအဝင် ကျောင်းတကျောင်း ကြိုတင်ဖွင့်နှင့် သင်ပြနေရင် မကောင်းဘူးလားပေါ့။ တောင်ရိုးက ဘုန်းတော်ကြီးတွေ သီလရှင်ဆရာလေးတွေကို ကျောင်းသုံး ပရိဘောဂတွေ အလှူခံမယ်ပေါ့။ နောင်အခါ အစိုးရ အသိအမှတ်ပြုကျောင်းလဲ ဖြစ်သွားနိုင်တယ်ပေါ့။

လေးလေးဘို ပြောသလို ကျုပ်တို့ကလေးတွေ စာနဲ့ဝေး ပညာရေးနောက်ကျခဲ့ရတာ လေးနှစ်ရှိပြီလေ။ လူကောင်တွေသာ ကြီးလာ၊ အတန်းတွေက ငယ်၊ အတတ်တွေက နောက်ကျနဲ့ အတော်ကြိုးစားလုပ်ယူကြရမှာဆိုတာ မှန်တယ်။ တယောက်က လက်ငင်းစားဝတ်နေရေး ပြေလည်ဖို့ ရည်ရွယ်တယ်။ တယောက်က အနာဂတ်အတွက်ပါ ရည်ရွယ်တယ်။ အမှန်ကတော့ အဖွားရဲ့ဆုံးဖြတ်ချက်တခုပါပဲ။ အဖွားက အားလုံးရဲ့အမေ၊ အိမ်ထောင်ဦးစီး ခေါင်းဆောင်ပဲ။ ပြဿနာက သည်အရှေ့တောမှာ ဆက်ပုန်းရှောင်နေလို့က ဘာအာမခံချက်မှ မရှိဘူး။ 

ဆိုတော့ကာ … သားမက်နှစ်ယောက်ရဲ့အဆိုကို အဖွားက ခေါင်းညိတ်လိုက်ပါတယ်။ သွားကြ … မြန်မြန်လဲ ပြန်လာကြ … မှာပြီး လမ်းစရိတ်တွေပါ ထုတ်ပေးလိုက်တယ်။ ဂျပန်ငွေစက္ကူ အစိမ်းရောင်တရောင်တည်း ‘ထောင်မလဲ သဲကော်ရ’ တွေပေါ့။ ပြီး သူ ပဉ္ဇင်းခံပေးခဲ့တဲ့ ဘုန်းကြီး ဦးကောသလ္လရဲ့ ဗောဓိချောင်မှာ အကျိုးအကြောင်း ပြောပြလျှောက်ထားပြီး တည်းခို အကူအညီတောင်းဖို့ပါ စာရေးပေးလိုက်တယ်။ ဘာအခက်အခဲ တွေ့စရာရှိသလဲ။ တပတ်မကြာခင် ချောချောမောမော ပြန်ရောက်လာကြတယ်။ မမြင်ရတာကြာလို့ မမှတ်မိချင်ချင်ဖြစ်နေတဲ့ အဖွားရဲ့အနှစ်သက်ဆုံး ငသိုင်းခြမ်းခြောက်ကြီးတွေလဲ ဂျုံထည့်တဲ့ ပိတ်ဖြူအိတ်နဲ့ တအိတ်ပါလာတယ်။ ပြီး သရက်ပင်ဆိပ်နဲ့ သိပ်မဝေးတဲ့ ချောင်အတွင်းလမ်း မြင်းလှည်းဂိတ် အထက်နားက မောက္ခသီဝံချောင်ရွာနေမယ်ဆိုရင်နေဖို့ သီလရှင် ဇရပ်အောက်ထပ်ကြီး တထပ်လုံးလဲ ပါးစပ်စရံသပ်ခဲ့တယ်လို့ ဆိုတယ်။ 

ဆိုတော့ကာ … ဇာတ်လမ်းကို တကြိမ် မြေကြောရှုံ့လိုက်ကြအုံးစို့ရဲ့။ ဆိုင်းမဆင့် ဗုံမဆင့်ဆိုသလို ဆွေကုန်မျိုးကုန် နှုတ်ဆက်မနေကြတော့ဘဲ အစုတ်ပလုပ် စုပေါင်းထုတ် ခပ်ကုပ်ကုပ် ပြောင်းလာခဲ့ကြတယ်။ သိတယ်နော်။ လှည်း ၁၆ စီးတိုက်ပစ္စည်းနဲ့ လူတကျိပ်တယောက်ဆိုတဲ့ ဝန် နည်းနည်းမှမဟုတ်ဘဲ။ ပြီးတော့ ဧရာဝတီမြစ်ကို ဖြတ်ကူးရတာက ‘ငှက်’ ကလေးတွေနဲ့ပဲ ကူးရတာလေ။ သည်အထဲ သံယောဇဉ်က မဖြတ်နိုင်တော့၊ လူတွေနဲ့ယဉ်ပါးနေတဲ့ လူတွေရဲ့ထမင်းဝိုင်းမှာ အတင်းဝင်နှိုက်စားတတ်တဲ့ ဦးလေးကျောက်ရဲ့ ရွှေဒင်္ဂါးဘိလပ်ကြက်ကြီး ဆယ်ကောင်ကလဲ ပါသေးတယ်။ ငှားလို့ရသမျှ ငှက်တွေနဲ့ ပိုက်ကျုံးဆိပ်မြစ်ညာကကူးတာ တနေကုန်နဲ့ မပြီးဘူး။ တော်သလင်း ဧရာဝတီကလဲ ကျယ်မှကျယ်ကို။ ဦးပဉ္ဇင်းတွေလဲ မနေရ၊ ဆရာလေးတွေလဲ တယောက်တလက်ပေါ့။ အေး … နောက်ဆုံးတော့ မေက္ခသီဝံမှာ ဆရာလေး ဒေါ်ဓမ္မေသီရဲ့ ကျေးဇူးနဲ့ အခြေကျကြရောဆိုပါတော့။ 

အဲ အဆင်ပြေချင်တော့ သရက်ပင်ဆိပ်က အတက်မှာပါပဲ။ ကျုပ်တို့ မောက္ခသီဝံချောင်ရဲ့တောင်ဘက်မှာ သံဃာတော်တွေသာ သီတင်းသုံးတဲ့ ခေမာသကချောင်ဆိုတဲ့ ဧရာမ နှစ်ထပ်ချောင်ကြီး တချောင်ရှိတယ်။ တောင်ကမ်းပါးယံစောင်းမှာ ဆောက်ထားတာဆိုတော့ မြေပြင်နဲ့အညီထပ်မှာ သံဃာဆောင်တွေနဲ့ ဆွမ်းစားဆောင် စသည်ပေါ့။ တောင်ပေါ်ထပ်မှာကတော့ သိမ်တို့ ပိဋကတ်တိုက်တို့ ကမ္မဌာန်းဆောင်တို့ပေါ့။ အဲ တရားနာပရိသတ် နှစ်ထောင်ကျော်ဆံ့တဲ့ သို့မဟုတ် သံဃာအပါး ငါးရာလောက် စာဖြေနိုင်တဲ့ မှန်စီရွှေချ ဓမ္မာရုံကြီးလဲ ရှိတယ်။ မလျှောက်ရပါဘူး။ ကလေးသူငယ်တွေရဲ့ ပညာသင်ကြားရေးအတွက် နေရာအခက်အခဲ တွေ့နေကြတယ်သတင်းကြားတော့ ဆရာတော်ဘုရားကြီး ဦးဉာဏောဘာသာဘိဝံသက ကျုပ်တို့ လေးလေးဘိုနဲ့ ကျောင်းအုပ်ဆရာကြီးဟောင်း ဦးမင်းဟန်ကို တနေ့ခေါ်တွေ့ပြီး ဓမ္မာရုံကြီးမှာ ယာယီကျောင်းဖွင့်ခွင့်ပြုလိုက်ပါတယ်။ ဆိုတော့ကာ … သီတင်းကျွတ်လ ထုံးစံ ကျောင်းပိတ်ရက်တွေလွန်တော့ ကျုပ်တို့တတွေ ကျောင်းသားဖြစ်ကြပေါ့။ ကျောင်းကြီးက ခန့်မှန်းပြောရရင် ကြက်တောင်ရိုက်ကွင်း ခြောက်ကွင်းစာလောက်ကို ကျယ်ပါတယ်။

ဒါပေမယ့် အခန်းဖွဲ့ကာထားတာ မရှိ၊ ခန်းမကျယ်ကြီးပေါ့။ ပရိဘောဂလဲ မရှိသေးတော့ မှန်ကြည့်လို့ရနိုင်လောက်အောင် ပြောင်လက်နေတဲ့ ကျွန်းလျှာထိုးကြမ်းပြင်ကြီးပေါ်မှာပဲ ထိုင်ကြရတာပေါ့။ နောက် တဖြည်းဖြည်းနဲ့တော့ အတန်းတိုင်းအတွက် သစ်သားကျောက်သင်ပုန်းကြီးတွေ ရလာပါတယ်။ စစ်ကြည့်တော့ အရည်အချင်းအလိုက်လဲ အတန်း ငါးတန်း ခွဲသင်ပြပါတယ်။ လုံးဝ ကျောင်းမနေဖူးသေးတဲ့ကလေးတွေက တတန်းသပ်သပ်ပေါ့။ ကျုပ် မှတ်မိသလောက်တော့ ၁+၂+၃ က တတန်း၊ ၄+၅+၆ က တတန်း၊ ၇ နဲ့ ၈ က တတန်းနဲ့ ၉+၁၀ က တတန်းအောက်မေ့တာပဲ။ အဲ နောက် နှစ်လ သုံးလကြာလာတော့ ထင်ပါရဲ့။ အစတုန်းကလို ကြမ်းပေါ်မှာ စာအုပ်ချပြီး ကုန်းရေးစရာ မလိုတော့ပါဘူး၊ တင်ရေးစရာ ခုံတန်းရှည်ကလေးတွေ လုပ်လှူကြတဲ့ အလှူရှင်တွေ ပေါ်လာပါတယ်။ 

ကျုပ်ကတော့ စစ်မဖြစ်ခင်ကလည်း ငါးတန်း၊ ခုပြန်တတ်တော့လဲ ငါးတန်းမှာပဲ နေရပါတယ်။ ကျုပ်အမေက ‘ကျောင်းဆရာမရဲ့သား စာမလိုက်နိုင်ရင် သိက္ခာကျမယ်’ ဆိုပြီး အတန်းတက်မထားပါဘူး။ ကျုပ် မှတ်မိသေးတယ်။ ကျုပ်နဲ့အတန်းဖော် သိန်းအောင်ဆိုတဲ့ကောင်က တနေ့ အင်္ဂလိပ်စာ ဆရာမကို ထမေးတယ်။ M.O.T.H.E.R မိုးသား ဆိုတာ ဘာလဲဆရာမ တဲ့။ တတန်းလုံးရော တကျောင်းလုံးရော ပွဲကျသွားပါတယ်။ အဲသည်ကောင် နောင်အခါကြီးလာတော့ ဟံသာဝတီခရိုင် စက်ရှင်တရားသူကြီး A.S.L.S.S ဖြစ်တယ်။ အဲသည်တုန်းက အတန်းဖော်ပဲ။ ကြည်ညွန့်ဆိုတဲ့ကောင် နောင်အခါ စစ်ဗိုလ်ကြီးဖြစ်ပြီး သာသနာရေးဝန်ကြီးဌာန ဝန်ကြီး ဖြစ်တယ်။ အဲသည်တုန်းက အတန်းဖော်ပဲ အမြဲတမ်း ပြုံးချိုနေတတ်တဲ့ မောင်စိုးဆိုတဲ့ကောင် နောင်အခါ ကွန်မြူနစ်ဖြစ်၊ တောခိုပြီး တောထဲမှာပဲ တိုက်ပွဲကျသလား၊ ငှက်ဖျားမိ သေသလား မသိ၊ သတင်းအစအန ပျောက်သွားတယ်။ ကျုပ်မှတ်မိသမျှ ကျောင်းနေဘက်တွေကို ပြောပြတာပါ။ ကျန်တာတွေတော့ နောင်တနှစ်မှာ စစ်ကိုင်းမြို့ထဲကို ကျောင်းပြောင်း၊ ကျုပ်တို့လဲ မန္တလေးပြန်ပြောင်းနဲ့ လူချင်းလဲကွဲကုန်ကြရလို့ မေ့ကုန်ပါပြီ။

ဆိုတော့ကာ ပြောစရာက ကျုပ်တို့မေမေကြီးကြီးအကြောင်းပဲ ကျန်ပါတော့တယ်။ နော့…ကျုပ်တို့မိသားစုကြီးထဲမှာ ထူးခြား ပြောင်းလဲနေတာက သူတယောက်ပဲရှိတာကို။ စစ်မဖြစ်ခင်တုန်းက လင်နဲ့သားနဲ့ အိမ်ထောင်ပြည့်။ လူလဲ အကောင်းပြကတေ့။ ဟော စစ်မီးလဲ ငြိမ်းရော။ နေရပ်ဟောင်းကို ပြန်ပြောင်းကြမယ်ဆိုတော့ အနားမှာ ယောက်ျားလဲ မရှိတော့ဘူး။ သူ့ဆရာကြင်လဲ စူဠလိပ်၊ တခါတည်း ပြန်ပေါ်မလာတော့ဘူး။ မေမေကြီးကြီးလဲ မျက်စိ လုံးဝ မမြင်တော့ဘူး။ ဘယ်လိုဖြစ်သွားရတာလဲဆိုတော့ စစ်ကိုင်းတောင်ရိုးက ငလျင်ကြော ကျောက်တောင် မဟုတ်လား။ အောက်က ပူတာပေါ့။ သည်အထဲ များသောအားဖြင့် ဖိနပ်ကလဲ မစီးဖြစ်တော့ ကျောက်ပူမိ ကျောက်ခိုးရိုက်တာနေမှာပေါ့။ လူတိုင်းလဲ သူ့လို စီးလိုက် ချွတ်လိုက် နေကြရတာပါပဲ။ ဘာကြောင့် သူ့ကျမှ ရွေးဖြစ်ရသလဲဆိုတော့ ဝဋ်နာကံနာလို့ပဲ လူမတန်ပြောရမလား မသိပါဘူး။ သူ့ကျမှ ခြေဖဝါးတွေ ခြေဖနောင့်တွေက ပပ်ကြားတွေအက်ပြီး ကွဲကုန်သတဲ့လေ။ အဲဒါကို အရှေ့တောက လယ်သူမ ကောက်စိုက်သမတွေ ခြေထောက်ဝဲစားတော့ ကုလေ့ရှိကြတဲ့ ဇာတ်ကြမ်းတိုက် ဆေးမြီးတိုနဲ့ကုသတဲ့။

ကျောက်ပြင်ဖင်မှာ ရေနံချေးနဲ့ဆားကို ကျိတ်သွေးပြီး ခြေဖဝါးပပ်ကြားအက်တွေ ထဲထည့်သတဲ့။ ထွန့်ထွန့်လူးပေါ့။ ခံရတဲ့ ဝေဒနာက မျက်ရည်ပေါက်ကြီးငယ်တွေ ကျ၊ မသက်သာလှဘူး။ ဒါပေမယ့် ပျောက်သလားဆိုတော့ ဟုတ်နိုးနိုး ငုပ်လျှိုးသွားတာနေမှာပေါ့။ လမ်းတော့ ပြန်လျှောက်လာနိုင်ပါရဲ့။ ဒါပေမယ့် အထက်တက် မျက်စိလာခိုက်ပြီး၊ မှုန်ရာက ဝါး … ဝါးရာကနေ တဖြည်းဖြည်းနဲ့ လုံးဝကွယ်သွားရတော့တာပါပဲ။ အင်း … ကံကွက်ကျားပြီး သူ့မှရွေးဖြစ်ရလေတော့၊ ဒွေးရော ဥပါဒ်ရောဆိုသလို ကျုပ်တို့မေမေကြီးကြီးလဲ စိတ်ပါ ခပ်နောက်နောက် ဖြစ်သွားတော့တာပါပဲ။ အရင်က ဓမ္မစကြာတွေ ပဌာန်းတွေသာ အစဉ်ရွတ်ဆိုလေ့ရှိတဲ့ ကလျာဏယုဝ ပါးစပ် … ခုတော့ ငယ်တုန်းက ကြည့်ဖူးထားတဲ့ ဇာတ်ပွဲတွေထဲက သီချင်းတွေချည့် သံနေသံထားနဲ့ ပြန်ဆိုနေတော့တာပါပဲ။ ကျုပ်အဖို့ကတော့ … ဒုတ်ဆွဲ တွဲပို့ တွဲခေါ်နဲ့ ဆေးပြင်းလိပ် မီးခဏခဏ ညှိပေးရကျိုးနပ်ပါတယ်။ ရှေးဇာတ် သီချင်းပေါင်းချုပ်စာအုပ်ကြီး အပိုင်ရထားလိုက်သလိုပါပဲ၊ အရှုံးထဲက အမြတ်ပြောပါတော့။ 

ဆိုတော့ကာ … ဇာတ်လမ်းကိုချုပ်ရရင် မေမေကြီးကြီးလဲ ခုတော့ ဘယ်ရှိပါတော့မလဲ။ မေမေကြီးကြီး မပြောပါနဲ့၊ ကျုပ်အမေ့မျိုးဆက်လဲ တမျိုးဆက်လုံး ဆုံးကုန်ကြပါပြီ။ ကျုပ်တို့ နို့စို့ဖက် မောင်နှမ ၃ ယောက်ထဲကတောင် စိန်မေ တယောက် ပြုတ်နှင့်ပြီ။ ‘စန်းငွေ’ နဲ့ ကျုပ်ပဲ ကျန်တော့တယ်။ အမယ် ကျုပ်တောင် မြစ် ၁ ယောက် ရနေပြီ။ မြစ်မကလေးကို သူ့အဖွား ကျုပ်သမီး ‘အိမ့်’ က ကျုပ် နာမည်ပေးနည်းအတိုင်းလိုက်ပြီး တလုံးတည်းပေးထားတယ်၊ တနင်္လာသမီးမို့ … ‘ခ’ တဲ့။ သူ မသိဘူးရယ်။ ‘ခ’ ဆိုတာ သူ မမီလိုက် မတွေ့ဖူးလိုက်ရတဲ့ ကျုပ်တို့ မေမေကြီးကြီးရဲ့ နာမည်။ မေမေကြီးကြီးရဲ့ ငယ်နာမည်က ‘မခ’ …။ ကြီးလာတော့ ‘ဒေါ်ခ’ … ပေါ့။

မောင်သာရ

မှတ်ချက်။ ။ မန္တလေးဂေဇက် ဒီဇင်ဘာလထုတ်၂၀၀၉ တွင် ပုံနှိပ်ဖော်ပြပြီး ဖြစ်သည်။ သရုပ်ဖော်ပုံကို ပန်းချီသန်းဌေးမောင် မှ ရေးဆွဲပါသည်။

ကူးယူအသုံးပြုလိုသူများ မန္တလေးဂေဇက်သို့ ရည်ညွှန်းပေးကြစေလိုသည်။ ကောမန့် (မှတ်ချက်)များလည်း ရေးပေးကြစေလိုပါသည်။ ဆရာကြီးအား အကြောင်းကြားပေးပါမည်။