ဆိုတော့ကာ … ဇာတ်လမ်းကို မြေကြော လေကြောရှုံ့လိုက်ကြစို့ရဲ့ …။ ဒုတိယကမ္ဘာစစ် ဖြစ်ကရောဆိုပါတော့။ ကျုပ်တို့ကို ကျွန်ပြုထားတဲ့ အင်္ဂလိပ်ဘုရင်ခံအစိုးရက အနောက်ဘက် အိန္ဒိယဆုတ်ပြေးပြီလေ။ ‘အာရှ သာတူညီမျှရေး’ ‘နိပွန်-ဘိရုမာ ဘန်ဇိုင်း’ ဆိုတဲ့ ကြွေးကြော်သံလှလှလေးတွေနဲ့ ဂျပန်တွေတက်လာပြီလေ၊ ဘာပဲပြောပြော၊ ‘မင်းပြောင်းမင်းလွဲ’ ကာလ ‘စစ်ဦးဘီလူး’ နဲ့လဲ ရင်မဆိုင်ရဲတော့ ကျုပ်တို့လဲ မြို့လယ်ကောင်မှာ ဘယ်အတင့်ရဲနေလို့ ရတော့မလဲ။
ပြီး ‘မဟာမိတ်’ ဆိုတဲ့ လေယာဉ်ပျံကြီးတွေကလဲ ကျုပ်တို့ခေါင်းပေါ်မှာ နေ့စဉ်ရက်ခြားဆိုသလို ငရဲမီးဗုန်းတွေ လာကြဲချ စက်သေနတ်တွေနဲ့ပစ် လူတွေကို သတ်ဖြတ်နှိပ်စက်နေတာကို ...။ အရှေ့တော ပြောင်းပြေးကြရတာပေါ့။ သိတယ်နော် …။ စစ်ကာလက စစ်အုပ်ချုပ်ရေးလေ၊ အစိုးရအုပ်ချုပ်ရေးယန္တရားတွေ အကုန်ရပ်။ ရုံးတွေ ကျောင်းတွေ စက်ရုံ အလုပ်ရုံတွေ ငွေတိုက်ဘဏ်တွေ စီးပွားရေးလုပ်ငန်းကြီးတွေနဲ့ သယ်ယူပို့ဆောင်ရေးတွေလဲ အကုန်ပိတ်၊ သည်တော့ အစိုးရဝန်ထမ်းတွေ ကျောင်းဆရာ ဆရာမတွေလဲ အလုပ်လက်မဲ့ဖြစ်ပေါ့၊ လစာဝင်ငွေလဲ ခြူးတပြားမှ မရကြတော့ဘူးပေါ့။ ဩ … ပြောဖို့တခု ကျန်သွားတယ်။ ခုနက ဇာတ်လမ်းအကျဉ်းရုံးလိုက်တဲ့အထဲမှာ ပါသွားလို့၊ ဒုတိယကမ္ဘာစစ် မဖြစ်ခင်တနှစ်မှာ ကျုပ်တို့အဖိုး ဆုံးသွားတယ်။ ကုသိုလ်ကံကောင်းတယ်လို့ပဲ အောက်မေ့ရတော့မှာပေါ့။ စစ်ရဲ့ အနိဌာရုံတွေနဲ့ မကြုံရ မတွေ့ရတော့ဘူးပေါ့။ နော့မို့ဆို ဒုက္ခ။
ဒါပေမယ့် ဘောင်းဘီတိုက ထိုးကွင်းတွေကို လုံအောင်မဖုံးနိုင်ထားနိုင်တဲ့အပြင် ခေါင်းပေါ်မှာကလဲ ဦးထုပ်မဆောင်းထားဘူး။ ‘ရောင်’ နဲ့ဆိုတော့ ကိုယ်တိုင်ပေါင်းရတဲ့ ပန်းရောင် ပိုးပုဝါခေါင်းပေါင်းနဲ့။ ဒါပေမယ့် ကျုပ်တို့အဖိုးကို ပေါ့သေးသေးမထင်နဲ့။ အစိုးရကချီးမြှင့်ထားတဲ့ နာမည်ကောင်းလက်မှတ်နဲ့ လက်ကိုင်ဒင်မှာ နာမည်ရေးထိုးထားတဲ့ ၄၅ ဗို့ ခြောက်လုံးပြူး တလက်လဲရှိတယ်။ နောက်တော့ ဘယ်အလိုတော်ရိက လက်ထောက်ချလိုက်လို့လဲ မသိဘူး။ ဂျပန်ခေတ်ရောက်လာလို့ မကြာခင်မှာပဲ ဗမာလူမျိုးစကားပြန်နဲ့ပါလာတဲ့ ဂျပန် စစ်ဗိုလ်တကောင်က လက်နက်အပ်ပါဆိုလို့ … မြေကြီးထဲမြုပ်ဝှက်ထားတာကို ဖော်အပ်လိုက်ရတာပဲ။
အဖွားကတော့ ယောက်ျားနာမည်ပါတဲ့ တခုတည်းသော အမွေပစ္စည်းအနေနဲ့ တတ်နိုင်ရင် သေတပန် သက်တဆုံး သိမ်းထားချင်မှာပေါ့၊ မျက်ရည်ကျသေးတယ်။ အဲသည်တုန်းက အဖိုးလည်း မရှိတော့ပါဘူး။ အခုလည်း အဖိုးမရှိတော့၊ သေနတ်လည်း မရှိတော့ပေမယ့် အဖွားနဲ့ ကျုပ်တို့မိသားစုအားလုံး မျက်နှာမငယ်ရပါဘူး။ အရှေ့တောဆိုတာက အဖွားရဲ့ဇာတိ ချက်မြှုပ်လေ …။ ဆွေတွေမျိုးတွေဆိုတာက လက်ညှိုးထိုးမလွဲပဲ ဥစ္စာ။ အခုလို စစ်ဘေးဒုက္ခရောက်ရလို့ မင်းပြောင်းမင်းလွဲ ဖြစ်လို့သာ မြို့ပေါ်က အထည်ကြီးကိုဖျက်ပြီး ခေတ္တယာယီ ဇာတိရပ်ရွာမှာ ပြန်လာခိုလှုံတာကို … ဘယ်အဆွေအမျိုးက မသိုင်းဝိုင်း မပံ့ပိုး မကူညီ မဖြည့်စွမ်းပဲနေပါ့မလဲ။ ပြီးတော့လဲ ပြန်ပြောင်းအောက်မေ့ဘွယ် … အဲသည်ခေတ်တုန်းက လယ်ပိုင်ရှင်ဆိုတာသူ ရင်းငှားသားချင်း လယ်သမားတွေရဲ့အမြင်မှာက ကျေးဇူးရှင်ရယ်လို့ သတ်မှတ် ယူဆထားတတ်ကြတာ မဟုတ်လား။
ဆိုတော့ကာ အဖွားဇာတိ ပုသိမ်ကြီး အပါအဝင် ဇီးချိုကုန်း၊ သစ်ချိုကုန်း၊ ညောင်ပင်သာ၊ ချောင်းပန်း၊ နှမ်းကြဲ အစရှိတဲ့ ရွာအားလုံးက သူတို့ရွာမှာလာနေကြဖို့ အလုအယက် နေရာတွေပေး ဖိတ်ခေါ်ကြိုဆိုကြတာပေါ့၊ ရွာစုံက လှည်း ၁၆ စီးနဲ့ ညမှောင်ခိုက်မှာ မြို့ကအိမ်ရှိပစ္စည်းတွေ တိုက်လာကြတော့ တချို့က သူတို့ရွာမှာ လာနေစေချင်တဲ့ဆန္ဒနဲ့ မပြောမဆို ကိုယ့်ရွာကိုယ် မောင်းသွားလိုက်ကြတာ လူတွေလဲ ကွဲ၊ ပစ္စည်းတွေလဲ ပြန့်ကုန်။ နောက်တနေ့ မိုးလင်းမှ မနည်းလိုက်ပြန်စုယူရတယ်။
အဖွားကတော့ သူ့ဇာတိရွာ ပုသိမ်ကြီးက အိမ်ခြေလဲများ စစ်ပြေး သူစိမ်းတွေကလဲများလို့ ကြပ်နေပြီး၊ မြို့နဲ့လဲ မော်တော်ကားလမ်းပေါက်နေတဲ့အတွက် ကြောက်သတဲ့။ ဒါပေမယ့် ပုသိမ်ကြီးနဲ့လဲ တတိုင်လောက်ပဲဝေး၊ နည်းနည်း အတွင်းဘက်ကျပြီး ရွာနံဘေးမှာလဲ ဆယ့်နှစ်ရာသီ ရေမပြတ်တဲ့ ဆည်မြောင်းချောင်းကလေးရှိတဲ့ ဇီးချိုကုန်းရွာကို ရွေးလိုက်တယ်။ ဘာမှမဟုတ်ဘူး။ မသိရင် ခက်မယ်။ ဇီးချိုကုန်း ရွာသူကြီး ဦးမောင်ချိုဆိုတာက သူ့နိုင်ဖက်။ သူ့ကိုသာဆိုရင် ပြားပြားမှောက်ကြောက်ရတဲ့ ငယ်ကြောက်။ ပြီး ဇီးချိုကုန်းမှာ အချမ်းသာဆုံး လယ်ပိုင်ရှင်ကြီးတွေဖြစ်နေကြတဲ့ အဖွားဒေါ်မမတို့ ဘကြီးဦးစံပင်တို့ဆိုတာကလဲ အဖွားရဲ့ငယ်ပေါင်း၊ ကြာနီကန်ဆရာတော့်ကျောင်းမှာ စာအံဖက်တွေလို့ ပြောတယ်။
ပြီး ရေကန်အသင့် ကြာအသင့်ဖြစ်ချင်တော့၊ အဲသည်နှစ်ယောက်နေကြတာကလဲ ရွာ့တောင်ဖျားမှာ ခြံစည်းရိုးချင်းကပ်ရက် ဘာခဲယဉ်းတော့သလဲ။ နှစ်ခြံခွပြီး မြေလွတ် နှစ်ဧကလောက်ရအောင် စည်းရိုးဖျက် ခုတ်ထွင်ရှင်းလင်းလိုက်ကြတယ်။ ပြီး လောင်းရိပ်လွတ်တဲ့ ကွက်လပ်အလယ်မှာ ခြောက်ပင် သုံးခန်း သက်ငယ်မိုး ဝါးထရံကာ ဝါးပိုးကြမ်းခင်းတဲ့ တန်းလျားရှည်ကြီးထိုးတာပဲ။ ဗမာ့တောရွာဓလေ့ သတင်းမေးလာသမျှ လက်ပေါင်းစုံအင်အားနဲ့ ဝိုင်းဝန်းဆောက်လုပ်လိုက်ကြတာ နေ့ချင်းပြီး အိမ်ယာပေါ့။ ခိုင်မှခိုင် ခန့်မှခန့်။
အဲ … စစ်အတွင်းမှာ အလိုအပ်ဆုံးဖြစ်တဲ့ ဗုံးခိုကျင်းကိုတော့ မြို့နဲ့လဲဝေးပြီး လေယာဉ်ပျံမဲမဲကြီးတွေလဲ ခေါင်းပေါ် အဝဲကျဲလာပြီဆိုပြီး၊ နေ့ရွှေ့ ညရွှေ့နဲ့ တော်တော်နဲ့ မတူးခိုင်းဘူး။ တူးပြန်တော့လဲ တဲကြီးရဲ့မျက်နှာစာ ခပ်လှမ်းလှမ်းက နေ့ခင်းဘက် ချက်ပြုတ်စားသောက်ကြရာ ခန်းမဆောင်လို့ဆိုရမယ့် မန်ကျည်းပင်အုပ်အရိပ်အောက်မှာ တတောင်သာသာလောက်ပဲနက်တဲ့ ကျင်းတိမ်ကလေးပဲ ကရော်ကမယ် တူးတယ်။ ကျင်းက လူဆင်းထိုင်ရင် ခေါင်းမြေပြင်ပေါ်မှာလေ။ ခက်တာက သည့်ထက်နက်အောင် တထွာတမိုက် ထပ်တူးလိုက်မယ်ဆိုရင်ကိုပဲ ရေထွက်လာတော့တယ်တဲ့။ သည်တော့ အောက်မနှိုက်နဲ့။ ကျင်းပတ်ပတ်လည်မှာ တောင်ဆုပ်လောက် တိုင်တွေ အပြည့်စိုက်။ ပြီး အပြင်ဘက်ကနေ ထန်းလုံးတွေ ဆင့်ကာ။ အမိုးလဲ ထန်းလုံး ထက်ခြမ်းခွဲတွေနဲ့ အခြင်ပစ်။ ပြီး အပေါ်ကမှ လှည်းကြမ်းခင်းတွေနဲ့ တထပ်၊ ဝါးကြောဖျာကြမ်းတွေနဲ့ တထပ်၊ နှစ်ထပ် ထပ်ခင်းသည့်အပေါ်ကမှ မြေတွေဖို့။ ကျင်းပတ်ပတ်လည်လဲ မြေဆိုင်ခဲတွေနဲ့ ရံ၊ တနေ့တခါ မြေသိပ်အောင်ရေ ဖျန်းပေး။ အဲဒါပဲ။
ခုနေ ကျင်းထဲဝင်ထိုင်ရင် ခေါင်းတော့ ကောင်းကောင်း လွတ်ပါတယ်။ သာမန်ကြည့်လိုက်လို့ကတော့ ထန်းပင်မြစ် စိုက်ရောင်းဖို့ မြေဖို့ထားတာ အောက်မေ့ရမယ်။ သိတယ်နော်…။ ထန်းပင်မြစ်ဆိုတာ ကြွေကျတဲ့ ထန်းသီးမှည့်တွေထဲက ထန်းသီးစေ့တွေကို ဖို့မြေပွပေါ်မှာ မှောက်စိုက်တာပေါ့။ မြေထပ်ဖုံးစရာ မလိုဘူး။ ဒါပေမယ့် စိုက်ခါစမှာတော့ မိုးတပြိုက်နှစ်ပြိုက် ကြိုက်တတ်တယ်။ ပြီး တမိုးတွင်းလုံးပစ်ထားလိုက်ရုံပဲ။ အဲ…ဆောင်းတွင်းရောက်ပြီဆိုတော့မှ ဖို့မြေတောင်ပို့ကို ဘေးကနေ တဖြည်းဖြည်းချင်းဖဲ့ပြီး လိုသလောက်ဖြိုယူရုံပဲ။
မှတ်မိကြပါတယ်နော်။ ဆောင်းချမ်းခိုက်မှာ မီးဖိုဘေးက မီးလှုံကြရင်း ဖုတ်စားကြတာလေ။ ဆီကလေး ဆားကလေးနဲ့ တို့စားရင် အရသာရှိမှရှိ။ အဲ … ကြုံကြိုက်ချင်တော့ ကျုပ်တို့ ဖို့မြေတောင်ပို့ ဗုံးခိုကျင်းလဲတူးပြီးပါလေရော။ မိုးကလဲ အုံ့မှိုင်းထစ်ချုန်း ရွာချပါလေရော။ ရယ်ရတယ်။ ကျုပ်တို့ ဗုံးခိုကျင်းလဲ အသူရာသကြားမင်းရဲ့ စစ်တလင်းမှာ ချက်ချင်းလက်ငင်း ငါးမွေးကန် ဖြစ်သွားပါလေရော။ ကျင်းရဲ့အောက်ခြေမြေက သဲကျောက်စရစ်ဆိုတော့ အပေါ်ကဖုံးထားတဲ့ ထန်းလုံးတွေရဲ့ဖိအားကြောင့် ကျင်းနံရံတွေပါ အိကျပြီး ပြိုတော့တာပေါ့။ လုံးဝ သုံးမရတော့ဘူး။ ဒါပေမယ့် တော်သေးရဲ့။ သိတယ်နော် …။ မန္တလေးဆိုတာ မိုးခေါင်ရေရှားရပ်ကိုး။ ပူတယ်လေ၊ ဆယ်နေကဲ ကျဲကျဲတောက် ပူတော့တာပေါ့။ တပတ်ဆယ်ရက်နဲ့ ခြောက်သွားတော့ ပြန်ပြင်တူးပြီး ပိုခိုင်ခိုင်တောင့်တောင့် ဆောက်ကြတာပေါ့။ မြတ်စွာဘုရား တန်ခိုးတော်နဲ့ သမ္မာဒေဝ နတ်ကောင်းနတ်မြတ်တွေက သတိပေးတာလို့ပဲ အောက်မေ့ကြပါတယ်။ အဲသည်လို ပိုအခိုင်အခန့် လုပ်လိုက်လို့သာပေါ့။ မဟုတ်ရင် သေကုန်ပြီ။
ဘယ့်နှယ် မန္တလေးကို ပြန်သိမ်းတော့မြို့ကို မြောက်ဘက်ကနေ ဂဏန်းလက်မပုံစံနဲ့ ပတ်ညှပ်ပြီး ဝင်တာထင်ပါရဲ့။ အင်္ဂလိပ်တွေလား အမေရိကန်တွေလား မသိ။ ကျုပ်တို့ အရှေ့တောတလျှောက်လုံးကိုလဲ အမြောက်ကြီးတွေနဲ့ သခင်မတောင်ဘက်က လေးငါးနာရီလောက် လှမ်းထုလိုက်တာ ရစရာကိုမရှိဘူး။ ကျုပ်တို့ရွာတွေဝန်းကျင်မှာ ဂျပန်ဖြင့် တကောင်မှမရှိဘဲနဲ့၊ လက်နက်ကြီးအင်အား မတန်တဆသုံးပြီး ဖြိုခွင်း မောင်းထုတ်လိုက်တာ ပြောပါတယ်။ ရွာစဉ်တလျှောက်မှာ မြောက်ပိုင်းကျတဲ့ ဆင်ရွာကြီးတို့ ညောင်ပင်သာတို့ ကျုပ်တို့ ဇီးချိုကုန်းတို့ဆိုတာ စိစိညက်ညက်ကျေပေါ့။ ကျုပ်တို့တဲအိမ်ကြီးလဲ အမြောက်ကျည်ဆံဗုံးတွေ မှန်ထားလိုက်တာ ပွစိတက်။ အိမ်တိုင်တတိုင်မှာလဲ ထင်းခွဲဓားမလောက်ရှိတဲ့ ဗုံးဆံကြီးတဆံက စိုက်ရက်။ ဗုံးခိုကျင်းပေါ်မှာကလဲ ပြတ်သတ်ကျလာတဲ့ သစ်ကိုင်းတွေ သစ်ခက်တွေဆိုတာ ထင်းလှည်းတိုက်လာ ရပ်ထားသလိုပဲ။
အဲ … ကျုပ်တို့လူတွေအားလုံးလဲ တညနေနဲ့ တညဦးလုံး ဘယ်ခေါင်းဖော်ရဲကြပါ့မလဲ။ သမ္ဗုဒ္ဓေတွေ အမြီးအမောက်မတည့် တယောက်တပေါက်ရွတ်ကြပြီး တုတ်တုတ်မှ မလှုပ်ရဲကြဘူးပေါ့။ နားတွေလဲ အူ၊ ဇောချွေးတွေလဲ ပြန်၊ လက်ဖျားခြေဖျား အေးကြလို့ပေါ့။ ခေါင်းထဲ ကိုယ်ထဲမလဲ ဖုတ်သဲတွေ အလိမ်းလိမ်းနဲ့ပေါ့။ ရေငတ်ပေမယ့် ရေကို ဘယ်သူက ထွက်ယူရဲပါ့မလဲ။ အဲ ညမိုးချုပ်တော့မှ အမြောက်သံတွေစဲသွားပြီး စက်သေနတ်သံတွေ သေနတ်သံတွေ ကြားရတယ်။ ဘယ်သူတွေက ဘယ်သူတွေကို ပစ်နေမှန်းလဲ မသိ။ ဘယ်လှုပ်ရဲပါ့မလဲ။ ဒါပေမယ့် ကျင်းဝမှာ လူမဲမဲကြီးနှစ်ကောင် လာရပ်ပြီး သေနတ်နဲ့ချိန် အကုန် အပြင်ထွက်ခိုင်းတယ်။ ကျုပ်တို့တတွေဆိုတာ မေးခိုက်ခိုက်ရိုက်ရက်၊ လက်အုပ်ကလေးတွေချီ မျောက်တွေလို ထွက်ကြရတာပေါ့။ ကျုပ်တို့မိသားစုက အင်္ဂလိပ်လိုပြောနိုင်တော့ သူတို့ အတော်သဘောကျသွားတယ်။ ဘာမှမဟုတ်ဘူး။ ဂျပန်သတင်း မေးတာပေါ့။ သည်ရွာတဝိုက်မှာ ဂျပန်တယောက်မှ မရှိပါဘူးပြောတော့မှ ပြန်ထွက်သွားကြတယ်။
အဲသည်တော့မှပဲ ကျုပ်တို့အားလုံးလဲ သက်ပြင်းချနိုင်ကြတော့တယ်။ အဲသည်တော့မှ ရေငတ်မှန်း ဆာမှန်း သိကြတော့တယ်။ ဒါပေမယ့် ထမင်းမရှိ၊ ဟင်းလဲ မရှိတော့ဘူး။ ထမင်းအိုးကြီးကလည်း စလောင်းဖုံးလွင့်သွားပြီး ဖုံတွေ အမှိုက်တွေ နန်းချင်းဖုံးလို့။ မန်ကျည်းပင်မှာကပ် စင်ရိုက်ပြီး တင်ထားတဲ့ သောက်ရေအိုး နှစ်လုံးကလဲ ကျကွဲလို့။ သံပန်းကန်ပြားအဖုံးနဲ့ အုန်းသီးဆံ ရေမှုတ်တွေကိုတော့ လိုက်ရှာကောက်ယူရတယ်။ တော်သေးရဲ့။ သောက်ရေ ထည့်လှောင်ထားတဲ့စဥ့်အိုးက မြေကြီးထဲ အထိုင်မြုပ်ထားတဲ့အတွက် မကွဲလို့။ အင်ဒုံအဖုံးကိုလှပ်ပြီး၊ ရေမှုတ်နဲ့ ခပ်သောက်လို့ရကြတယ်၊ ထမင်းကတော့ မစားကြရပါဘူး။ ထပ်ချက်ရအောင် ညကြီးမင်းကြီး မီးလဲ မမွှေးရဲပါဘူး။ အမယ် … ကြက်တွေကတော့ မသေဘူးဟဲ့။ ဘယ်သွားပုန်းနေခဲ့ကြတယ် မသိဘူး။ လူသံတွေကြားတော့ သူတို့ အသံတွေလဲ ပြန်ကြားလာရတယ်။
လူတွေလဲ ခုမှ ဖုံတွေ သဲတွေ ချွေးစေးတွေနဲ့ ညစ်ပတ်ပေရေနေမှန်းသိပြီး၊ ရေချိုးချင်စိတ်တွေ ပေါ်လာကြတယ်။ ဒါပေမယ့် ချိုးစရာရေ ဘယ်မှာရှိမှာလဲ။ ထုံးစံအတိုင်း ခါတိုင်းလို ရွာ့ပြင်ထွက်ပြီး ချောင်းထဲ ခုန်ချ ရေချိုးရအောင်က ဘယ်ထွက်ရဲပါ့မလဲ၊ ကျုပ်တို့ကလေးတွေဆိုတာ နားအူလဲမပျောက်၊ အကြောက်လဲ တော်တော်နဲ့မပြေတော့၊ အမေတွေ အနားကပ်လို့။ အေးလေ … ဘာပဲပြောပြော စစ်ကြောင်းကျလို့ ရွာတွေ အိမ်တွေသာ ညက်ညက်ကြေပေမယ့် မီးလဲ မလောင်၊ လူလဲ အထိအခိုက် အသေအပျောက် လုံးဝ မရှိပါဘူး။ တခုတော့ရှိတယ်။ နွားတော့ လေးကောင်တောင် အမြောက်ဆံမှန်ပြီး သေတယ်။ နောက်တနေ့ တရွာလုံး အမဲသားပေါ်တော့တာပေါ့။ ဆိုတော့ကာ … အခုမှ ဆရာကြင့်တန်ဖိုးကို သိကြရတော့တယ်။
ဆရာကြင်ကတော့ မရှိတော့ပါဘူး။ သွားပြီပဲ။ ဒါပေမယ့် သည်အရှေ့တောဘက် ပြောင်းပြေးခိုလှုံကြမယ်ဆိုတုန်းက၊ မေမေကြီးကြီးကတဆင့် ဆရာကြင်က တွက်ချက်ပြီး သတိပေးတယ်။ မြို့ရဲ့အရှေ့မြောက်အရပ် တနင်္ဂနွေဒေါင့်က နဂါးလှည့်မသင့်ဘူး တဲ့။ မပြောင်းကောင်းဘူး တဲ့။ ဒုက္ခတွေ့နိုင်တယ် ပြောသားပဲ။ ဒါပေမယ့် ဆရာကြင့်စကားကို ဘယ်သူကမှ အယုံအကြည် မရှိကြဘူး။ တောကို သူ မလိုက်လာချင်လို့၊ မေမေကြီးကြီးတို့ သားအမိကို ပစ်သွားချင်လို့၊ သူ့ဇာတိ မြေလတ်မြို့ကလေးကို သူ ပြန်ပြေးချင်လို့ သက်သက်မဲ့ ရမယ်ရှာ ကပျက်ယပျက်လုပ်တာလို့ပဲ ထင်ခဲ့ကြတယ်၊ အဖွားကတော့ လူကြီးမိဘတယောက်နေနဲ့ နားလည်ခွင့်လွှတ်လိုက်တယ်။ စစ်အတွင်း ဘယ်သူမှအလုပ် မရှိကြ၊ ဝင်ငွေမရှိကြဘူး မဟုတ်လား။ အဲတော့ အားနာတာလဲပါ၊ ရှက်တာလဲ ပါကောင်းပါမယ်ပေါ့။
ပြီး ကြီးကောင့်ကြီးမားနဲ့ ယောက္ခမ ထမီနားလဲ ခိုမစားချင်ဘူး ထင်ပါရဲ့ပေါ့။ ဝင်မပါဘူး၊ လက်ပိုက်ကြည့်နေလိုက်တယ်။ နော့ … သားမက်နဲ့ ယောက္ခမရဲ့ အသက်ချင်းကလဲ ဆယ်နှစ်သာသာလောက်ပဲ ကွာတာကို။ ကျုပ်တို့ မေမေကြီးကြီးကလဲ တသက်လုံးမခွဲဖူးတဲ့ အမေကိုပစ်ပြီး၊ လင့်မယားကြီးရှိရာအရပ်ကို ဘယ်လိုက်ပါ့မလဲ။
ဆက်လက် ဖော်ပြပါမယ်။
No comments:
Post a Comment