နံပါတ် ၁ က … ရဲနီတင်ငြိမ်းအလောင်း ပြည်မ ပြန်ပို့ပေးရေး။ နံပါတ် ၂ က … နာတာရှည်ရောဂါသည် ဒါမှမဟုတ်ရင် ကျွန်းမှာ ကုလို့မရတဲ့ ရောဂါသည်တွေကို ပြည်မ ပြန်ပို့ပေးရေး။ နံပါတ် ၃ က … ကျနော်တို့ကို စည်သွတ်ဗူးပေးမယ့်အစား အသားစိုပေးရေး။ နံပါတ် ၄ က … တရားဝင်ထုတ်ဝေတဲ့ စာနယ်ဇင်းတွေ ဖတ်ခွင့်ရရှိရေး။ နံပါတ် ၅ က … ကိုယ့်အိမ်နဲ့ စာရေး ဆက်သွယ်ခွင့်ရရေး။ဒီအချက် ၅ ချက်တင်ပြီးတော့ အစာငတ်ခံတိုက်ပွဲဝင်ကြဖို့ အားလုံး သဘောတူကြတယ်။ ဖိုတွေ အားလုံးလည်း သဘောတူတယ်။ အဲဒီတော့ ကျနော်တို့ အသုတ် ၃ သုတ်ခွဲဝင်တယ်။ ပထမအသုတ်ကဝင်ပြီး နောက်တပတ်အကြာမှာ ဒုတိယအသုတ်က ဝင်တယ်။ နောက်တတိယ အသုတ်က နောက်တပတ်ခြားပြီးတော့ ထပ်ဝင်တယ်။
ကျနော်တို့ အခုတိုက်ပွဲမှာတင်တဲ့ တောင်းဆိုချက်တွေက ဘာမှ မထူးဆန်းဘူး။ သာမန်လူ့အခွင့်အရေး၊ သာမန်ထောင်သား အခွင့်အရေးတွေ။ တချိန်ကဆိုရင်ဘာမှ တောင်းနေစရာမလိုတဲ့ ကိစ္စတွေ၊ ကျနော်တို့ကို ကျွန်းမပို့ခင် ပြည်မမှာတုန်းကတောင်မှ ထောင်ထဲမှာ သာမန်ခံစားခွင့်ရှိတဲ့ အခွင့်အရေးတွေဖြစ်တယ်။ ဒီ စစ်အစိုးရလက်ထက်မှာကို ခံစားခွင့်ရှိတဲ့ အခွင့်အရေးတွေဖြစ်တယ်။ အဲဒါတွေကို ကျနော်တို့ တောင်းတာ။
ဒါပေမယ့် အခုကျတော့ ဒီ သာမန်အခွင့်အရေးတွေဟာ အင်မတန်ကို အုံကြွတဲ့ပြဿနာကြီးတွေ ဖြစ်နေပြီ။ သူတို့ဘက်က မပေးနိုင်တဲ့ဟာကြီးတွေ ဖြစ်နေတာ။ အဲဒါကြောင့်မို့ ဒီတိုက်ပွဲဟာ ငါးပိတိုက်ပွဲလို လွယ်လွယ်လေးနဲ့ မဖြစ်နိုင်ဘူး။ ခက်ခဲမယ်လို့ ကျနော်တို့ဘက်က တွက်ထားတယ်။ ကျနော်တို့အနေနဲ့ ဒီတိုက်ပွဲမှာ တန်ဖိုးပေးရင် ပေးရလိမ့်မယ်လို့ တွက်ထားတယ်။ တန်ဖိုးဆိုတာက အသက်တင်မကဘူး။ ကျန်းမာရေး ထိခိုက်တာတွေရော အပါအဝင် ပေးရနိုင်စရာရှိတယ်လို့ တွက်ထားတယ်။ တွက်ထားပြီးတော့ ဒီတိုက်ပွဲကို ကျနော်တို့ လေးလေးနက်နက်နဲ့ ပြင်ပြင်ဆင်ဆင်နဲ့ တိုက်ပွဲဝင်တာ။
အဲဒီလို တိုက်ပွဲဝင်တယ်ဆိုတော့ ကျနော်တို့ဘက်က စောစောကပြောသလို ခေါင်းဆောင်တွေ ထိပ်က ဝင်တိုက်တာပဲ။ ဒီတိုက်ပွဲမှာ ဗန်းမော်ဦးတင်အောင်၊ ဦးလေး ဦးမြသန်းတင့် … စတဲ့သူတွေ ပထမအသုတ်က ထွက်တာပဲ။ ဒါကို ကြည့်လိုက်ရင် ကျနော်တို့ဘက်က ဝှက်ဖဲမထားဘူး။ အပြတ်တိုက်မယ်။ ရင်စီးပြီး တိုက်မယ်။ အသဲချင်းပေါက်တိုက်မယ်ဆိုတာ ဆုံးဖြတ်ပြီးသားဆိုတဲ့ အဓိပ္ပာယ်ပဲ။
ကျနော်ကိုယ်တိုင်က ဒုတိယအသုတ်မှာ ပါတယ်။ ဒီတိုက်ပွဲဟာ ‘ရက် ၄ဝ တိုက်ပွဲ’ လို့ ခေါ်တယ်၊ ရက် ၄ဝ ကြာလို့။ ကျနော်ကတော့ ၃၃ ရက် အစာငတ်ခံခဲ့ရတယ်။ ကျနော်တို့ ကိုကိုးကျွန်းမှာ အစာငတ်ခံပြီဆိုတာက တခြားနိုင်ငံတွေနဲ့ မတူဘူး။ ဘာဆို ဘာမှမစားတာ။ ရေသောက်တာကလွဲပြီး ဘာမှကို ပါးစပ်ထဲ မထည့်တာ။ ရေထဲမှာ ဆားမပါအောင်တော့ သတိထားတယ်။ အာဏာပိုင်ကနေပြီးတော့ ခိုးပြီးတော့ ညာပြီးတော့ ဂလူးကိုစ့် ကျွေးမှာ၊ ခုနက ဆားကျွေးမှာ တခုစီပေါ့။ အမြဲတမ်း သတိထားနေရတာ။ ဒါကြောင့်မို့ ကျနော်တို့ တိုက်ပွဲဝင်တယ်ဆိုလို့ရှိရင် ထောင်အာဏာပိုင်တွေကို အကြောင်းကြားတယ်။
တခုက ကျနော်တို့ မနက်အစောကြီးမှာ ထောင်ပေါက်ဝသွားပြီး အားလုံးစုပြီးတော့ ကြွေးကြော်သံတွေ တိုင်တယ်။ ပြီးရင် ထောင်အာဏာပိုင်တွေဆီက ဆရာဝန် လာစစ်ဆေးတယ်။ ဆရာဝန်က နေ့တိုင်းအလေးချိန် စစ်မယ်၊ သွေးပေါင်ချိန် စစ်တယ်။ ပြီးရင် သူ့အထက် သူ အစီရင်ခံတယ်။ ကျနော်တို့က သူတို့ကို စစ်စေတဲ့ အကြောင်းအရင်းက ကျနော်တို့လူတွေ မစားဘူး မလိမ်ဘူးဆိုတာပြတာ။
နောက်တခုကလည်း ကျနော်တို့က သူတို့ကို ဒီသေခြင်းတရားနဲ့ ခြိမ်းခြောက်တာဆိုတော့ ကျနော်တို့လူတွေရဲ့အခြေအနေက ဘယ်အခြေအနေက ရောက်နေပြီဆိုတာ သူတို့ အမြဲတမ်းသိအောင်လုပ်တာ။ နေ့တိုင်းပဲ သူတို့လာစစ်တယ်။ သူတို့ မနက်တိုင်း လာပြီးစစ်ရတယ်။
ဒီလိုနဲ့ တတိယသုတ် တိုက်ပွဲဝင်ပြီးတော့ ဘာမှမကြာတဲ့တနေ့မှာ (ကျနော်ထင်တယ် တတိယသုတ် တိုက်ပွဲဝင်ပြီး နောက်တနေ့ပဲ ထင်တယ်။) ထောင်အာဏာပိုင်တွေဟာ ခုနက ကိုတင်ငြိမ်းအလောင်းကို လာလုတယ်။ ကျနော် အထက်က ပြောခဲ့သလိုပဲ ဒီမှာ အကြမ်းဖက်တဲ့လက်နက် ဘယ်သူမှ မသုံးရဲဘူး။ သူတို့ မသုံးရဲဘူး။ သူတို့မှာ သေနတ်တွေ ရှိတယ်။ မသုံးရဲဘူး။ ကျနော်တို့ကို သတ်လို့မဖြစ်ဘူး။
နောက်ပြီး ကျနော်တို့နဲ့ ရိုက်လားပုတ်လား အဲဒီလောက်ထိကို သူတို့ မလုပ်နိုင်ဘူး။ ဘာပြုလို့ဆို ကျနော်တို့ဘက်ကသာ သူတို့ကို သတ်ချင်သတ်မယ်။ သူတို့က ကျနော်တို့ကို သတ်ခွင့်မရှိဘူး။ အဲလို ဖြစ်နေတယ်။ အဲလို အခြေအနေမှာ သူတို့ ဘယ်လိုလုလဲဆိုတော့ အလောင်းကို သံဆူးကြိုးအပြင်ကနေပြီးတော့ ကြိုးနဲ့ လှမ်းပတ်တယ်။ ကြိုးနဲ့ပတ်ပြီး ဆွဲထုတ်တာပဲ။ အဲဒီတော့ ကျနော်တို့က ပြန်ဆွဲ။ သူတို့က အပြင်ဆွဲ၊ ကျနော်တို့က အထဲ ဆွဲ။
အဲဒါ တနေကုန်ဆွဲကြတာ။ အဲဒါ ကျနော်တို့အထဲက အားကောင်းမောင်းသန်ဆိုတဲ့ ဟာတွေက ခုနက တိုက်ပွဲဝင်တဲ့ထဲ ရောက်နေတယ်။ တိုက်ပွဲဝင်တဲ့ ၃ သုတ်ဟာ လူ ၇ဝ ကျော်။ အဲဒီထဲမှာ အားကောင်းမောင်းသန်တွေ ပါသွားတယ်။ အပြင်မှာက ပြုစုဖို့ချန်ထားတဲ့လူ၊ နောက်ပြီးကျတော့ ကျန်းမာရေး မကောင်းတဲ့လူ၊ အသက်အရမ်းကြီးတဲ့လူ ဒါပဲ ကျန်တယ်။
အဲဒီတော့ သူတို့နဲ့ပြိုင်လုရတာ အတော့်ကို ခက်တယ်။ သူတို့ကို အာဏာပိုင်တွေက ပြောလိုက်တာ။ “လု”တဲ့ …။ “အောက်ခြေဝါဒါတွေ အဲဒီအလောင်းကို ရအောင်မလုနိုင်ရင် မင်းတို့ ပြည်မ ပြန်ခွင့်မပြုဘူး” အဲလိုကိုပြောတာ။ ပြီးတော့ အရက်တိုက်တယ်။ အရက်ကိုးမောင်းတိုက်ပြီး လုတာပဲ။ အဲဒါ တနေကုန်နီးပါးလုပြီး နောက်ဆုံးကျတော့ ကျနော်တို့ သူတို့ကို ပြိုင်မလုနိုင်တော့ဘူး။ ဘာလို့တုန်းဆိုတော့ အားလည်း မရှိတော့ဘူး။ အကုန်လုံး ပက်လက်တွေလန်၊ သဲပေါ်မှာ ပက်လက်တွေလန်ပြီး လဲနေကြတာ။ အလောင်းပါသွားတယ်။
သူတို့က အဲဒီအလောင်းကို ကျနော်တို့မြင်အောင်ပဲ (အလောင်းကြီးကိုတော့ မမြင်ရဘူး။) ဒါပေမယ့် ကျနော်တို့နဲ့ မလှမ်းမကမ်းမှာ မီးရှို့တာ။ မီးခိုးလုံးတွေ တက်လာတယ်။ ကျနော်တို့ စခန်းထဲက လှမ်းမြင်ရတာ။ တမင် ကျနော်တို့ မြင်အောင် လုပ်တယ်လို့ပဲ၊ စော်ကားတယ်လို့ပဲ ကျနော်တို့က အဲလိုပဲယူဆတယ်။ ဒီထက် ဝေးဝေးသွားပြီး ကျနော်တို့ မမြင်ရတဲ့နေရာမှာ မီးရှို့ရင် ရတဲ့ဟာပဲ။
အဲဒီတော့ တိုက်ပွဲထဲက ခုနက တောင်းဆိုတဲ့ ၅ ချက်ထဲမှာ ပထမတောင်းဆိုချက်ကတော့ အရာမမြောက်တော့ဘူး။ ကျန်တဲ့ တောင်းဆိုချက်တွေကို ကျနော်တို့ အလျော့မပေးဘဲ ဆက်ပြီး တောင်းတယ်။ ဒါကြောင့်မို့ ဆက်တိုက်တဲ့အခါကျတော့ နောက်ဆုံးကျတော့ အာဏာပိုင်တွေဟာ သဘောတူလိုက်ရတယ်။ အရက် ၄ဝ ပြည့်တဲ့နေ့မှာ ဒီတိုက်ပွဲ ပြီးဆုံးသွားခဲ့တယ်။
ဆက်လက်ဖော်ပြပါမယ်။
No comments:
Post a Comment