“ကျနော်တို့အနေနဲ့ကတော့ နိုင်ငံရေးမှာ အလွန်ကို ကျဉ်းမြောင်းကြပ်တည်းပြီးတော့ ဘယ်လိုမှ လှုပ်လို့မရ ရှားလို့မရအောင်ဖြစ်နေတဲ့ အနေအထားမှာ ဆိုက်ရောက်နေပါတယ်။ ဒါကြောင့်လည်း အမှန်အတိုင်းပြောရရင် ကျနော်တို့ လူထုဆီကို တနည်းတဖုံ ပြန်ပြီးတော့ ချည်းကပ်ရခြင်းဖြစ်ပါတယ်”
ဦးဝင်းတင်
အန်အယ်လ်ဒီ အမျိုးသားဒီမိုကရေစီအဖွဲ့ချုပ်က ဒေါ်အောင်ဆန်းစုကြည်နဲ့တကွ နိုင်ငံရေးအကျဉ်းသားတွေအားလုံး လွှတ်ပေးရေးကို တိုင်းသူပြည်သားတွေအားလုံးက ဝိုင်းဝန်းထောက်ခံကြဖို့ နိုးဆော်တိုက်တွန်းလိုက်ပါတယ်။
အန်အယ်လ်ဒီခေါင်းဆောင် ဒေါ်အောင်ဆန်းစုကြည်၊ ဦးခွန်ထွန်းဦး အပါအဝင် ရှမ်းခေါင်းဆောင်တွေအပြင် နိုင်ငံရေးအကျဉ်းသားတွေ အားလုံးကို လွှတ်ပေးဖို့ မြန်မာစစ်အစိုးရကို အန်အယ်လ်ဒီဘက်က တစိုက်မတ်မတ် တောင်းဆိုလာခဲ့တာဖြစ်ပေမယ့် လူထုပါ ပါဝင်တောင်းဆိုကြဖို့ တိုက်တွန်းတာကတော့ အခုတကြိမ်ဟာ ပထမဦးဆုံးပါ။
ဒီတော့ဘာကြောင့် အခုအချိန်မှာ လူထုပါဝင်လာသင့်ပြီလို့ အန်အယ်လ်ဒီဘက်က ယူဆတာပါလဲ။ အန်အယ်လ်ဒီ ဗဟိုအလုပ်အမှုဆောင် အဖွဲ့ဝင် ဦးဝင်းတင်က အခုလိုပြောပါတယ်။
“လူထုပါဝင်ဖို့ လိုပြီထင်တဲ့အကြောင်းက အရင်တုန်းက ကမ္ဘာကိုလည်း ကျနော်တို့လှမ်းပြီးတော့ တိုက်တွန်းနေတယ်။ စစ်အစိုးကို လွှတ်ပေးဖို့ တောင်းဆိုပေးပါလို့ ကျနော်တို့ ပြောခဲ့တယ်ပေါ့ဗျာ။ ကမ္ဘာမှာလည်း ဗမာပါနေတာပဲဆိုပြီးတော့။ သို့သော် အခုထက်ထိလည်း ကမ္ဘာက ဘယ်လောက်ပြောပြောလည်း ဘာမှမပြောဘူးဆိုတဲ့အခါကျတော့ မြန်မာလူထုကလည်း အရင်တုန်းကထက်စာလို့ရှိရင် အကျဉ်းသားတွေလွတ်မြောက်ရေးကို တောင်းဆိုဖို့ အနေအထားတွေ ပိုပြီးတော့ရှိလာတယ်လို့ ကျနော်တို့က ထင်တယ်။ ဘာဖြစ်လို့လည်းဆိုတော့ အခုဟာက ဖမ်းတာဆီးတာ ချုပ်တာနှောင်တာကဗျာ၊ အန်အယ်လ်ဒီ ခေါင်းဆောင်လို ဘာလို ဆိုတဲ့ ပုဂ္ဂိုလ်မျိုးတွေတင်မကတော့ဘဲနဲ့ တိုင်းရင်းသားခေါင်းဆောင်တွေလည်း ဖမ်းဆီး ချုပ်နှောင်လာ၊ ကျောင်းသား လူငယ်ခေါင်းဆောင်တွေ ရော သံဃာတော်တွေလည်း ဖမ်းဆီးချုပ်နှောင်လာ၊ ၈၈ မျိုးဆက် လူငယ်ကျောင်းသား ခေါင်းဆောင်တွေရော စသည့် လူပေါင်းများစွာ ကို ဖမ်းဆီးလာတဲ့အခါကျတော့ တိုင်းပြည်က ဒီအဖမ်းအဆီးတွေကို သိပ်ပြီးတော့ မလိုလားတဲ့သဘေားထားတွေ ပိုပြီးတော့ ဖြစ်ထွန်းလာတယ်လို့ ကျနော်တို့က ထင်တယ်။”
- အဲတော့ လူထုက ဘယ်လိုပုံစံနဲ့များ ပါဝင်လာကြရမှာပါလဲ။
“ပါတီတရပ်ကနေပြီးတော့ တိုက်တွန်းရုံပဲရှိတယ်၊ ဘယ်ပုံစံလုပ်ပါ။ ဘယ်နည်းလုပ်ပါဆိုတာတွေကတော့ လူထုက ကျနော်တို့က ဒါ သွားပြီးတော့ ညွှန်ကြားနေစရာ မလိုအပ်ဘူးလို့ ယူဆပါတယ်။ အဲတော့ လူထုအနေနဲ့ကတော့ လက်ဖက်ရည်ဆိုင်မှာထိုင်ရင်း ဒီအကျဉ်းသားတွေ လွှတ်ပေးဖို့တော့ သင့်တော်ပြီ၊ ဒီလိုအချိန်အခါမျိုးတော့ ရောက်နေပြီဆိုပြီးတော့ တိုက်တွန်းပြောဆိုဆွေးနွေးတဲ့ အနေအထားမျိုးကနေပြီးတော့ ဟိုး အမြင့်ဆုံးပေါ့ဗျာ အစိုးရကို တိုက်တွန်းတဲ့ပုံစံမျိုး သဘောထားဆန္ဒများကို ဖော်ထုတ်တဲ့ပုံစံမျိုး အထိပေါ့၊ လူထုအနေနဲ့ ဒီကိစ္စကို ပါဝင်ထောက်ခံလာရင် ကျနော်တို့ အကောင်းဆုံးဖြစ်မယ်လို့ထင်တဲ့အတွက် ဒီဟာကိုလုပ်ခြင်း ဖြစ်ပါတယ်။”
- လူထုဘက်က အကျဉ်းသားတွေလွှတ်ပေးရေးနဲ့ပတ်သက်ပြီးတော့ ထိထိရောက်ရောက် တောင်းဆိုတိုက်တွန်းလာနိုင်အောင်လို့ အန်အယ်လ်ဒီပါတီဘက်ကရော ဘယ်လိုများလုပ်ဆောင်မှာပါလဲ။
“ယခုအချိန်ထိကတော့ ကျနော်တို့က ပန်ကြားရုံပဲခင်ဗျ၊ ကျနော်တို့အနေနဲ့ကတော့ နိုင်ငံရေးမှာ အလွန်ကို ကျဉ်းမြောင်း ကြပ်တည်းပြီးတော့ ဘယ်လိုမှ လှုပ်လို့မရ ရှားလို့မရအောင်ဖြစ်နေတဲ့ အနေအထားမှာ ဆိုက်ရောက်နေပါတယ်။ ဒါကြောင့်လည်း အမှန်အတိုင်းပြောရရင် ကျနော်တို့ လူထုဆီကို တနည်းတဖုံ ပြန်ပြီးတော့ ချည်းကပ်ရခြင်းဖြစ်ပါတယ်”
- အန်အယ်လ်ဒီလို နိုင်ငံရေးပါတီအတွက်တောင်မှ လှုပ်လို့မရ ရှားလို့မရ ဖြစ်နေတယ်ဆိုရင် သာမန်ပြည်သူတွေအနေနဲ့ အန်အယ်လ်ဒီတိုက်တွန်းသလို ထုတ်ဖော်တောင်းဆိုဖို့ကရော လွယ်ကူပါ့မလား။ ဦးဝင်းတင်ကပဲ အခုလို ဆက်ပြောပါတယ်။
“ကျနော်တို့ပြောနေကြစကား ရှိပါတယ်။ ဗမာပြည်ကြီးက ဒီနေ့ ထောင်ကျနေတာ ခင်ဗျ၊ ထောင်ကျနေတဲ့အခါ ထောင်ထဲမှာနေနေရတဲ့ ထောင်သားတွေလိုပဲ သူတို့လည်း အကျပ်အတည်းတွေ အများကြီးရှိမှာပဲ၊ သို့သော် ဘာပဲပြောပြော ကျနော်တို့နဲ့ ပြည်သူနဲ့ဟာ နည်းနည်းတော့ ကွာတယ်ခင်ဗျာ၊ ဒေါ်အောင်ဆန်းစုကြည်နဲ့ ကျနော်တို့ဟာ၊ ကျနော်တို့ခေါင်းဆောင်နဲ့ ကျနော်တို့အဖွဲ့အစည်းတွေဟာ တသားတည်း တထပ်တည်း တသဘောတည်း ဖြစ်နေတယ်ခင်ဗျ၊ ကျနော်တို့လည်း အကျယ်ချုပ်ကျနေတယ် ခင်ဗျာ။ ပြည်သူကတော့ ထောင်ကျနေတာ မှန်သော်ငြားလည်း ရိုးရိုးအကျဉ်းသားလို လှုပ်ရှားသွားလာ ပြောဆိုဆက်ဆံ ဆွေးနွေးနိုင်တဲ့အခါကျတော့ ကျနော်တို့ထက်တော့ ခြေနည်းနည်း ပိုကျယ်လာတယ်၊ ကျနော်တို့ထက် နည်းနည်းလေးပိုပြီးတော့ လွတ်လပ်ပါတယ်၊ အသံထွက် လွယ်ပါတယ်၊ ထောင်ပုံစံနဲ့ပဲ ကျနော်ပြောရရင်တော့ အန်အယ်လ်ဒီတင် မဟုတ်ပါဘူး၊ အခြားနိုင်ငံရေးအဖွဲ့အစည်းများလည်း ဘာပြောလို့ရလည်းခင်ဗျ ဘာမှပြောလို့မရဘူး။ ဘာမှ လှုပ်ရှားလို့မရဘူး။ အခြားခြားသော နိုင်ငံရေးပါတီအဖွဲ့အစည်းများဟာ တိုက်ထဲမှာနေရသလို အကျဉ်းကျနေပါတယ်။ ဒါထက်ပိုဆိုးတဲ့ တချို့သောအဖွဲ့အစည်းများဆိုလို့ရှိရင် အလုံတိုက်လို နေရာမျိုး ရောက်ပါတယ်။ ကျနော်တို့ အန်အယ်လ်ဒီလို အဖွဲ့အစည်းမျိုးကတော့ ဘယ်လောက်တောင်ဖြစ်နေလဲဆိုတော့ ထောင်ထဲက စစ်ခွေးတိုက်လိုနေရာမျိုးမှာ ရောက်နေတဲ့အဖွဲ့အစည်းလိုမျိုး ဖြစ်နေပါတယ်။ သူတို့ပြောနိုင်တဲ့အနေအထားကတော့ ကျနော်တို့ထက် နည်းနည်းလေးတောင်မှ ပိုမယ်လို့ထင်တယ်ပေါ့ဗျာ၊ အဲလိုနဲ့ အားကိုးတကြီး ပြည်သူကိုပန်ကြားခြင်းဖြစ်ပါတယ်။”
အန်အယ်လ်ဒီ ဗဟိုအလုပ်အမှုဆောင်အဖွဲ့ဝင် ဦးဝင်းတင်ပါ။ ။
ဘီဘီစီ တပတ်အတွင်း မြန်မာ့သတင်း မှ ကောက်နုတ် ကူးယူဖော်ပြပါတယ်။ (ဓာတ်ပုံ - ရိုက်တာ)
No comments:
Post a Comment