ရာစုနှစ်က ချီးမြှင့်သွားတဲ့
နောက်ဆုံးလက်ဆောင်များပမာ
အံသြစရာ အဖြစ်အပျက်တွေ
ပဉ္စလက်ဆန်ဆန် ပြောင်းလဲခဲ့
အိပ်မက်ထဲ ထည့်မက်လို့
ဖြစ်နိုင်ဖို့ပင် မလွယ်တဲ့
ရက်စက်မှုနဲ့ ကြေကွဲမှုများဟာ
အမျိုးသားရေး
နယ်ခြားမျဉ်းကို ဖြတ်ကျော်ကာ
စိန်ခေါ်မှုသစ်တွေကို မွေးဖွားခဲ့ … ။
တခါတရံမှာတော့
ဝမ်းနည်းစရာပေပ
ပန်းများလွင့်ကြွေအနှံ
အခိုက်အတန့် နာကျင်ပေးဆပ်ရခဲ့
တိတ်ဆိတ်ခြင်းရဲ့ ချောက်လှန့်မှုတို့
နောက်ဆုံး ထွက်သက်တိုင် အန်တုနေဆဲ … ။
တချို့တလေဟာ
တနေကုန် အချည်းနှီး
ချိုးလည်း မရ၊ သိမ်းလည်း မရ
ငှက်ခတ်သမားဘဝကို စိတ်ပျက်
တက်ကြွမှု မီးတောင်များက
တဒင်္ဂ ငြိမ်းသေခဲ့ကြဖူးတယ် … ။
ပုံစံသစ်ထဲက
ပုံစံမကျတဲ့ သဏ္ဍာန်များကို
အသိဉာဏ်တရားနဲ့ ယှဉ်တဲ့
ဘယ်လိုနားလည်မှုမျိုးနဲ့မှ
ခွင့်လွတ်နိုင်ကြမှာ မဟုတ်ဘူး … ။
“ယထာဓမ္မာ
တထာ ဇယ
တရားတဲ့သူ အောင်နိုင်ရမှာ
အစဉ်အလာ ထုံးထမ်းဖြစ်တယ်” တဲ့
မဟာဘာရတရဲ့ စကားဟာ
ထာဝရလမ်းပြမယ့် အလင်းရောင်
မည်းမှောင်တဲ့ နယ်နိမိတ်ဟောင်းထဲက
ရုန်းကြွထွက်ပေါ်လာခဲ့ပြီ
အနာဂတ်ဆိုသည်ကား
အသနားခံလို့ မရနိုင်ပေ … ။
အချိန်ကာလရဲ့ စီရင်ချက်
“မျက်ရည်နဲ့ ပျိုးကြဲသူများဟာ
ပျော်ရွှင်စွာ ရိတ်သိမ်းကြလိမ့်မယ်” တဲ့
ဆာလမ်ကျမ်းရဲ့ဗျာဒိတ်ပမာ
လူ့ဂုဏ်သိက္ခာနဲ့ ဖြစ်တည်မှု
မြင့်မြတ်မှုနဲ့ သစ္စာတရားမွန်
ရှင်သန်ထမြောက်လာတော့မှာ
တို့ … အသေအချာသိတယ် … ။ ။
မုံရွာ အောင်ရှင်
No comments:
Post a Comment