လေညင်းကလေး လာနေပြီ
(နိုင်ဝင်းဆွေ)
(၁)
တောင်ကြားထဲ
မှောင်မည်းစွတ်စို
အကျဉ်းခန်းလို လျှိုထဲမှာ
အိပ်ပျော်ရာက
လန့်နိုးလာတဲ့ကျနော် … ။
ဖြူစင်ချစ်ခင်စရာ့အရွယ်
လူ သူငယ်ကလေးများ
ပွေ့နမ်းကစားဖို့၊
ပန်းအလှလေးများ
မွှေ့ယမ်းမလားလို့၊
လမ်းမ ခြံဝ မြောင်းစပ်နဲ့
မြက်ခင်းတွေပေါ်
ကျနော်နဲ့ခွေးသူငယ်လေးများ
ပျော်မြူးပြေးလွှား ဆော့ကစားဖို့။
ရုိုးပြတ်လယ်ကွင်း ကန်သင်းတွေပေါ်
ကျော်နင်းတိုးဝှေ့၊
ကျနော့်ကိုမျှော်ရှာသူ
စမ်းချောင်းကလေး တေးသီနေတဲ့
ရွာကလေးဆီ … ။
(၂)
ကျနော်လာပြီ
‘ရွာရဲ့မိတ်ဆွေ လေညင်းကလေး’ ပါ
သတိရလျက်
တမ်းတလျက်။
ခါတိုင်းကဆို
ရွာကိုအဝင် ကျောင်းရင်ပြင်မှာ
ခွန်းဆက်ခင်မင်
ကိုရင်ကလေးတွေ
ပန်းအလှကလေးတွေ။
အခုတော့
ပန်းယမင်းတို့ရဲ့
သင်းရနံ့ကလေးရယ်
ဘယ်မှာလဲကွယ်။
(၃)
အို …
ဒီမှာသွေး
မနုဿသွေးနံ့
ညှီစို့ပြန့်လျက်
ဇရပ်ပေါ်က သွေးကွက်တွေ။
ဟိုမှာ …
ကျောင်းကြီးအို
ပြိုမလိုယိုင်လဲလု
စေတီအိုဟာ ဗုံးဒဏ်ရာထန်သည်း
ထီးမြတ်ငိုက်ကျ
အက်ကြောင်းဟလို့
ပြိုကျလု တဲတဲ
ကြေကွဲစရာ့ စိတ္တဇပန်းချီ။
ဟော … သေနတ်သံတွေ
ကျည်ဆံတွေက
ငါ့ ကိုယ်ထဲများ ဖောက်သွားလေမလား
ကျနော် ကြောက်သွားမိတယ်လေ။
စစ်ကိုမွေးဖွား
စစ်ကြေးစားများရဲ့
စစ်ဖိနပ်သံ ကန်ကြောက်သံ ဆဲသံ ဆိုသံ
အော်သံ ငေါက်သံ ညည်းသံ ညူသံ
ညှဉ်းပန်းသံ
‘လူ တစ္ဆေသူရဲ၊ ငရဲသားတွေ
သေနတ်တကားကား ကိုင်ထားပေမယ့်
ကြောက်စိတ်တဖွားဖွားနဲ့
စစ်ကြေးစားတွေ’။
ငါ … သင်တို့အနားကပ် ခဏရပ်ခိုက်
စကားတပုဒ် အော်ပြောလိုက်မိတယ် ။
“ ခင်ဗျားတို့ဟာ
ဟို အဝေးကြီးရွာတွေက
လယ်သမားတွေ၊
ဒီရွာသားတွေဟာလည်း
လယ်သမားတွေပဲ မဟုတ်လား
စဉ်းစားစမ်းဟေ့ …”။
ကျောင်းလှေကား အုတ်တိုင်နံဘေး
ထိုင်ငေးလေသူ
ကြေးစားကလေးတဦးရဲ့အတွေးတွေ …
‘‘အို ယေရှုသခင်မြတ်
လူကိုသတ်နေရတဲ့
ဒီစစ်ဇာတ်ပွဲ
ရပ်စဲပါတော့
ကောင်းကင်ဘုံအောက် ဒီမြေပြင်မှာ
ကြည်လင်အေးမြ
နေ့သမယများ
တွေ့ပါရစေ ဘုရားသခင်”
ကြေးစားကလေးရဲ့
တောင်းဆုရေအလျဉ်တွေလည်း
ကျောင်းပရဝဏ်ထဲ
ဝဲကတော့ လည်ဆဲပါ။
(၄)
ရွာထဲအဝင်
ကျနော့်ရင်တွေ ဆတ်ဆတ်ခါလျက်
မီးပြာကျ အိုးအိမ်တွေ
မီးကျည်ခဲတို့၊ ရွာလုံးဖုံးပေါ့။
စကားတသံ
ကြားဖူးနေကြ၊ ရင်းနှီးလှတဲ့အသံ
“ မိတ်ဆွေလေးရေ
ငါတော့ အိမ်ကြီးရခိုင်၊ ခေါင်တိုင်ကနေ
မီးသွေးတုံးဘဝ၊ ကူးခဲ့ရပြီ
ငါ့ရင်ထဲဆူ၊ ပူလောင်ရပြီ။”
ကျနော့်ရင်ထဲလည်း
အပူမီးငရဲ၊ စွဲရပေါ့။
“ကျနော်ချစ်တဲ့
လူသူငယ်လေးတွေ
ခွေးသူငယ်လေးတွေကော
မိတ်ဆွေ … ”
“ ရှာသာကြည့်တော့ကွာ
သူတို့ဘယ်မှာ
ငါမသိတော့ဘူး
အို ခုဆိုရင်
သင့်ရဲ့ကလေးတွေလည်း
မီးကျည်ခဲ တဖြစ်လဲရှာတော့မယ်”။
(၅)
ကွေ့ကောက်ကောက်
လမ်းတလျှောက်
ကဆုန်ပေါက်ကျနော်၊ စိုင်းလာတယ်။
ပြာပုံ …
ကျည်ဆံခွံ …
ဒုက္ခ၊ သောက
ချောင်းချောင်းပွက်ထ သောက … ။
(ဟေ့ စစ်တရားခံတွေ
ငါ မုန်တိုင်းဖြစ်လို့ ခြိမ်ခြိမ့်အသဲမှာ
မင်းတို့ရှိရာ လာခဲ့မယ်ဟေ့။)
လမ်းတကွေ့ ချိုးအချ
ခြံတဝ တံခါးပေါက်မှာ
ဆင်းရဲသား လယ်သမားနှစ်ယောက်အလောင်း၊
ရွံမုန်းစရာ့
ယင်ကောင်တွေ၊
မီးလောင်နံ့ ညှီနံ့ သွေးနံ့ ယမ်းနံ့ မီးခိုးနံ့
အသားစညှောာ်နံ့ ပြာမှုန့်နံ့ ။
ဒီနေရာလေ
လွန်ခဲ့တဲ့ နေ့တဝက်က
ပွက်လောရုိုက် ငိုသံ ညည်းသံ ပေါက်ကွဲသံ
အော်သံ ဆူသံ သံရှည်ဆွဲသံ အသံနက်ကြီးတသံ
စက်သေနတ်သံ၊ ထိမှန်တဲ့အသံ အမြောက်သံ
လဲကျသံ ငရဲဟက်တက် ကွဲအက်သလို …
ဆူသံ အူညံခဲ့ပါပကော။
ဘယ်ဆိုးကြမ္မာတို့
ညှိုးလျာရက်တယ်။
(၆)
ဟိုတုန်းခါက
စိမ်းပြာ ရေကြော
ဝါးတောရိပ်အောက်
ကျနော် လျှောက်ပြေးရတာ
သိပ်ပျော်တာပဲ။
စမ်းချောင်းလေး၊ တေးဆိုပြတော့
ကျနော် ကလိုက်တာပေါ့ ။
စမ်းရေစီးပေါ်မှာ
ကျနော်အိပ်မှေးတဲ့အခါ
စမ်းပုခက်ကလည်း
ဒန်းလွှဲလျက်ပါ။
အခုတော့
စမ်းချောင်းလေးက
“ချစ်လှတဲ့မိတ်တွေရေ
ကျွန်ုပ်လည်း
လူသွေးညှီနှောက်လို့ 
အရူးတယောက်လို
နောက်ကျိနေရပါပကောလားဗျာ” … တဲ့ 
(၇)
ဆည်းဆာနေညို
နွေပန်းချီလည်း၊ မပီမှုန်ရီဝါး
ဆေးသားပြယ်လွင့်စ
အမှောင်စများ
မညီမမျှ
ဒီတစ ဟိုတစနဲ့
စမ်းချောင်းဝမှာ
ပျပျညို့ပြီ။
ဟို အရင်ကဆို
ဒီတဲအိုကလေးမှာ
သူတို့လင်မယား
အကြည်စားသန်တုန်း
နှစ်ယောက်ကြား ကျနော်ဝင်ထိုင်လို့
သူတို့စကား
နားထောင်ရတာ
ကြည်နူးစရာ့
ရွှင်စရာ့
ပျော်စရာ့ ညနေ ၊ ညနေများစွာ … ။
(၈)
အခုတော့
ထရံနဲ့ တဲတိုင်တွေဟာ
ကျည်ဆံရာ အထပ်ထပ်
စစ်တံဆိပ် အမှတ်အသားတွေ ။
တဲပေါ်က မိခင်အလောင်း
သွေးစီးကြောင်းပွက်
ချောင်းကလေးနဲ့ ဆက်လို့ ။
လူ့သားကလေးလေ
လေးဘက်တွားတက်
အမေ့အလောင်း ရင်ခွင်ထက်မှာ
နို့ချိုရှာလျှက် … ၊
“ပေးလိုက်စမ်းပါ
သားကလေးအတွက်
နို့တစက်”
“အို … လောကသခင်
သင်ဘယ်မှာလဲ
မတရားတာတွေ
မတားဘူးလား။”
ငါက
လူ့သူငယ်လေးကို ပွေ့လျက်။
“ကလေးရာ
မင်းအနားမှာ ငါ
ငါ့ ရင်ခွင်ထဲမှာ မင်း
မင်းကိုယ်စား - ဟောဒီ ငါ”
(၉)
နေဟာလေ
အိပ်ရာပေါ်မှာ လဲလျောင်းဖုို့ 
လူသူငယ်လေးကို ပစ်ထား
ထွက်ခွာသွားပြီကို။
လူကလေးက ငိုတော့တယ် ။
“မေမေ့ နို့ချိုချို
ဘယ်လိုအညှိုးနဲ့
ခိုးယူကြသလဲ ။
လူကလေးက ဘာပြစ်မှု
ပြုဖူးလို့လဲ”
လူကလေး ငိုတော့တယ်။
ငှက်ကလေးတွေလည်း
စမ်းချောင်းဘေး ဝါးရုံဖျားမှာ
ချစ်စကား ခွန်းမဟ
တေးအလှ မသီဆို
ငိုကြ ပြီ ကော ကွယ်။
(၁ဝ)
ငါလေ
လူ့သူငယ်လေးကိုနှုတ်ဆက်
တဲတံခါးဝက ထွက်ခဲ့တယ် ။
ဟို ဒီ ပြေးကာ
ကမ္ဘာကုန် ခြေဆန့်၊ မတန့်မနား
လောကကို တိုင်တန်းသွားဖို့လေ
ခရီးစတင် နှင်လေပြီ။
လူကလေးရဲ့ဖေဖေ့ဆီ …
လူကလေးအတွက်၊ နာကျင်တတ်သူတွေဆီ …
လူကလေးကို စာနာတတ်သူတွေဆီ …
တရားမှု မြတ်နိုးသူတွေဆီ …
မတရားမှု ခါးသီးသူတွေဆီ …
မတရားမှုမှန်သမျှ ၊ မသာချ မြှုပ်နှံရန်
သုဿန်ပြင်နေသူတွေဆီ … ။ ။
နိုင်ဝင်းဆွေ
No comments:
Post a Comment