Thursday, February 5, 2015

ပညာရေးဥပဒေ ပြင်ရေး အစိုးရ မေတ္တာရပ်ခံ

အမျိုးသားပညာရေးဥပဒေ ပြင်ဆင်ရေးနဲ့စပ်လျဉ်းပြီး မိဘပြည်သူတွေကို မေတ္တာရပ်ခံချက်ဆိုပြီး အစိုးရက ထုတ်ပြန် ကြေညာချက် ထုတ်လိုက်ပါတယ်။ 

ဒီကြေညာချက်မှာ ဥပဒေနဲ့မညီတဲ့ ဆန္ဒပြမှုတွေ အပါအဝင် ဆူပူမှုတွေဖြစ်အောင် ကျောင်းသားလူငယ်တွေကို အသုံးချနေသူတွေရှိတယ်ဆိုပြီး စွပ်စွဲထားပါတယ်။ 

ဒီကြေညာချက်ဟာ လက်ရှိ သပိတ်မှောက် ကျောင်းသားတွေရဲ့ လှုပ်ရှားမှုတွေအပေါ် အထင်အမြင်လွဲမှားအောင် ပုံဖျက်နေတာလို့ သပိတ် ဦးဆောင်ကော်မတီဝင် ကိုမင်းသွေးသစ်က ပြောပါတယ် ။ 


၂ဝဝ၇ သံဃာ့အရေးအခင်းမှာပါတဲ့ ရဟန်းတော်တွေကို သံဃာတုတွေဆိုပြီး မဟုတ်မမှန် သတင်းလွှင့်ပြီးမှ အကြမ်းဖက်ဖြိုခွဲခဲ့သလိုမျိုး ကျောင်းသားတွေကို ချေမှုန်းနိုင်တယ်လို့ သူက ယူဆပါတယ်။ 

လူမှုရေးအသင်းအဖွဲ့တွေနဲ့ ကျောင်းသားတွေနဲ့ ဆက်စပ်လှုပ်ရှားမှုသာရှိပြီး ကျောင်းသားတွေကလည်း တက္ကသိုလ်ကျောင်းတွေကိုဝင်ရာမှာ ဆိုင်ရာ ဆရာ ဆရာမတွေကို ခွင့်တောင်းပြီးမှ စည်းကမ်းတကျဝင်တယ်လို့ မင်းသွေးသစ်က ပြောပါတယ်။ 

မြင်းခြံမှာ အလံဖြုတ်ခဲ့တဲ့ကိစ္စဟာလည်း ဆိုင်ရာ ကျောင်းအာဏာပိုင်တွေက မချေမငံပြောပြီး ကျောင်းထဲ အဝင်မခံလို့ တင်းမာမှုတွေ ဖြစ်ခဲ့ရာက မထိန်းနိုင်တဲ့ထိဖြစ်သွားတယ်လို့ ရှင်းပြပါတယ်။ 

ကျောင်းသား သပိတ်စစ်ကြောင်းဟာ တောင်တွင်းကြီးမှာ ညအိပ် ရပ်နားနေပါတယ်။ 

သောကြာနေ့ ညအိပ်မယ့်မြို့ရောက်မှ သပိတ် ဘယ်လိုဆက်သွားမလဲ တိုင်ပင်ဆွေးနွေးကြမယ်လို့ သိရပါတယ်။ 

သတင်း - ဘီဘီစီ 

 

No comments: