Tuesday, May 13, 2014

တာဝန်သိမှ တရားရှင်သန် (ဇော်မင်း)

လွန်ခဲ့တဲ့ လေးငါးရက်လောက်က နိုင်ငံခြားတိုင်းပြည်တစ်ခုက သတင်းတပုဒ်ကို ဖတ်လိုက်ရပါတယ်။ အဲဒီသတင်းကို ဖတ်လိုက်ရတော့ ဒီမိုကရေစီနိုင်ငံတွေမှာ ဒီလိုမျိုးလုပ်ရင် ဒီလိုမျိုး အကျိုးဆက်ရှိပါလားလို့ မှတ်သားရပါတယ်။ သတင်းက ဘာကိစ္စလဲဆိုတော့ အစိုးရဝန်ကြီးတစ်ပါး ပုဂ္ဂိုလ်ရေး အသုံးစရိတ်များနေတဲ့အပေါ်မှာ ဝေဖန်ခံရတာ ဖြစ်ပါတယ်။ အဲသလို အဝေဖန်ခံရပြီး နောက်တော့ အဲဒီဝန်ကြီးဟာ တာဝန်သိသိနဲ့ သူ့ရာထူးကနေ နှုတ်ထွက်ပေးခဲ့ပါတယ်။ ဝန်ကြီးရာထူးမှာ ရသလောက်တော့ နေဦးမဟဲ့ဆိုပြီး ကုတ်ကပ်နေတာမျိုး မလုပ်ပါဘူး။ 

အဲဒီ ဝန်ကြီးကတော့ လက်ရှိအာဏာရ ဗြိတိသျှအစိုးရရဲ့ ဝန်ကြီးတစ်ပါး ဖြစ်ပါတယ်။ အမျိုးသမီးတစ်ဦးလည်း ဖြစ်ပါတယ်။ သူ့နာမည်ကတော့ မာရီယာ မီးလားလို့ ခေါ်ပါတယ်။ အဆိုပါ အမျိုးသမီးဝန်ကြီးရဲ့ တာဝန်ကတော့ ယဉ်ကျေးမှု၊ သတင်း မီဒီယာနဲ့ အားကစားရေးရာဝန်ကြီးဌာန ဖြစ်ပါတယ်။ အခုလက်ရှိ ဗြိတိန်နိုင်ငံမှာ အာဏာရယူထားတဲ့ နိုင်ငံရေး ပါတီက ဝန်ကြီးချုပ် ဒေးဗစ်ကင်မရွန်း ဦးဆောင်တဲ့ ကွန်ဆာဗေးတစ်ပါတီပါ။ 


ဝန်ကြီးဖြစ်သူ မစ္စမီးလားဟာ ဗြိတိန်နိုင်ငံရဲ့ အဓိက အတိုက်ခံပါတီဖြစ်တဲ့ လေဘာပါတီရဲ့ ဖိအားပေးမှုအောက်မှာ ရက်ပေါင်းများစွာ ဝေဖန်ခံခဲ့ရပါတယ်။ အတိုက်ခံပါတီရဲ့ ဝေဖန်မှုကိုခံနေရတဲ့တချိန်ထဲမှာလည်း မိခင်ကွန်ဆာဗေးတစ်ပါတီက ပါတီဝင်များရဲ့ ဝေဖန်မှုကိုလည်း အကြီးအကျယ် ခံရပါတယ်။ မစ္စမီးလားဟာ အိမ်တလုံးကို အရစ်ကျစနစ်နဲ့ ဝယ်ယူထား ပါတယ်။ အစိုးရဆီကိုတင်သွင်းတဲ့ ကုန်ကျစရိတ်ငွေတွေကို အစိုးရကိစ္စများအပေါ်မှာ သုံးစွဲတာထက် အဲဒီအိမ်အတွက် အရစ်ကျစနစ်နဲ့ ပေးရတဲ့အပေါ်မှာ သုံးနေတယ်လို့ စွပ်စွဲခံရတာလည်း ဖြစ်ပါတယ်။ 

ဝန်ကြီးချုပ် ဒေးဗစ်ကင်မရွန်းက ဒီကိစ္စနဲ့ပတ်သက်လို့ သူရဲ့အစိုးရဝန်ကြီးဖြစ်သူ မစ္စမီးလားကို အကာအကွယ် ပေးခဲ့ပါသေးတယ်။ ဒါပေမယ့် နောက်ဆုံးမှာတော့ ဝန်ကြီးဖြစ်သူဟာ ရာထူးကနေ နုတ်ထွက်စာတင်ခဲ့ပါတယ်။ နှုတ်ထွက်စာ တင်ရတာကလည်း အဖက်ဖက်က ဖိအားပေးမှုတွေ၊ ဝေဖန်မှုတွေကြောင့် စိတ်အနှောက်အယှက် ကြီးစွာဖြစ်ရပြီး နုတ်ထွက်တာလို့ ဆိုပါတယ်။ သူ့ပြဿနာကို အကြောင်းပြုပြီး လက်ရှိအစိုးရရဲ့ ဆောင်ရွက်မှုတွေကို မထိခိုက်စေလိုတာကြောင့် နှုတ်ထွက်ရခြင်းဖြစ်တယ်ဆိုတာကိုလည်း နုတ်ထွက်စာထဲမှာ ပြန်လည်ဖြေရှင်းထားပါတယ်။ တချိန်ထဲမှာလည်း မစ္စမီးလားက အစိုးရဆီက လိုအပ်တဲ့အသုံးစရိတ်တွေ တောင်းခံခဲ့ရာမှာ မရှင်းမလင်း ဖြစ်ခဲ့ရတဲ့ အချက်အလက်တွေနဲ့ပတ်သက်ပြီး သူ့ရဲ့အားနည်းချက်ရှိခဲ့တာကို ပါလီမန်မှာ တရားဝင် တောင်းပန်ခဲ့ပါတယ်။ 

ပြင်ပက လွတ်လပ်တဲ့ စုံစမ်းစစ်ဆေးရေးအဖွဲ့ကတခုက မစ္စမီးလားအနေနဲ့ အစိုးရဆီမှာ အစိုးရလုပ်ငန်းတွေနဲ့ပတ်သက်ပြီး ငွေကြေးတောင်းခံခဲ့တဲ့ကိစ္စတွေကို ပြန်သုံးသပ်ခဲ့ပါတယ်။ အဲသလို သုံးသပ်တဲ့အပေါ်ကနေ တွေ့ရှိရတာကတော့ မစ္စမီးလားဟာ အစိုးရကို စတာလင်ပေါင်ငွေ လေးသောင်းငါးထောင် ပြန်ဆပ်သင့်တယ်လို့ ထောက်ပြထားပါတယ်။ အမေရိကန်ဒေါ်လာနဲ့တွက်မယ်ဆိုရင် အကြမ်းဖျဉ်းအားဖြင့် ဒေါ်လာ ၇ သောင်းခန့် ရှိပါလိမ့်မယ်။ သို့သော်လည်း ပါလီမန်အတွင်းမှာရှိတဲ့ သက်ဆိုင်ရာ ကော်မတီတခုက မစ္စမီးလားအနေနဲ့ ပေါင်ငွေ ငါးထောင့်ရှစ်ရာသာ အစိုးရကို ပြန်လည် ပေးသွင်းဖို့ ဆုံးဖြတ်ခဲ့ပါတယ်။ တချိန်ထဲမှာလည်း ဒီကိစ္စနဲ့စပ်လျဉ်းပြီး ဗြိတိသျှနိုင်ငံသား တသိန်းလေးသောင်းက မစ္စမီးလားဟာ အစိုးရဝန်ကြီး ရာထူးကနေနုတ်ထွက်ဖို့ အဲသလိုမှမဟုတ်ရင်တော့ စတာလင်ပေါင် လေးသောင်း ငါးထောင်စလုံးကို ပြန်လည်ပေးဆပ်ဖို့ အွန်လိုင်းကနေ တောင်းဆိုထားပါတယ်။ 

မစ္စမီးလားရဲ့ မိခင်ပါတီဖြစ်တဲ့ ကွန်ဆာဗေးတစ်ပါတီက ပါတီဝင်ပေါင်း သုံးပုံနှစ်ပုံက မစ္စမီးလားအနေနဲ့ ဝန်ကြီးရာထူးကနေ နှုတ်ထွက်ဖို့ စစ်တန်းကောက်ယူရာမှာ သဘောထားပေးပါတယ်။ ကိုယ့်ပါတီက ဝန်ကြီးဖြစ်တာကြောင့် ပါတီဝင်တွေအနေနဲ့ ဝိုင်းကာတာမျိုး၊ ဝိုင်းဖာတာမျိုး မလုပ်တာကို တွေ့ရပါတယ်။ အင်မတန်ကောင်းမွန်တဲ့ အလေ့အထလို့ မြင်မိပါတယ်။ ကွန်ဆာဗေးတစ်ပါတီဝင်တွေက အဲသလိုမျိုး သဘောထားပေးတာက အကြောင်းရှိပါတယ်။ ဝန်ကြီးက မနှုတ်ထွက်ဘဲ ဝန်ကြီးချုပ်အားကိုးနဲ့ အစိုးရအဖွဲ့ထဲမှာ ကုတ်ကပ်နေဦးမယ်ဆိုရင် နောင်လာမယ့် ရွေးကောက်ပွဲတွေမှာ သူတို့ပါတီကို လူတွေက အကြည်အညိုပျက်မှာ စိုးရိမ်လို့ ဖြစ်ပါတယ်။ ပါတီဝင်တွေကိုယ်တိုင်က မဲဆန္ဒပိုင်ရှင် ပြည်သူတွေကို အလေးထားရတယ်၊ အလေးထားရမယ်ဆိုတာ ဒီနေရာမှာ မြင်နိုင်ပါတယ်။ နောက်တချက်ကတော့ ဗြိတိန်နိုင်ငံဟာ ဥရောပသမဂ္ဂအဖွဲ့ဝင် နိုင်ငံတစ်ခု ဖြစ်ပါတယ်။ အဲတာကြောင့် ဥရောပသမဂ္ဂအဖွဲ့ဝင် နိုင်ငံတွေအကြားမှာ မျက်နှာပျက်ရတာမျိုးကိုလည်း ရှောင်ရှားလိုတာကြောင့်လို့ ဆိုနိုင်ပါသေးတယ်။ 

မစ္စမီးလားရဲ့ ငွေရေးကြေးရေး အရှုပ်အထွေးကို စတင်ထောက်ပြ ဝေဖန်ခဲ့သူကတော့ အတိုက်ခံပါတီဖြစ်တဲ့ လေဘာပါတီက ပါလီမန်အမတ်တဦးဖြစ်ပါတယ်။ သူ့ရဲ့အမည် ဂျွန်မင်း လို့ခေါ်ပါတယ်။ သူက ဘယ်လိုပြောသလဲဆိုတော့ မစ္စမီးလားဟာ သူ့ရဲ့ ဝန်ကြီးရာထူးကနေ တာဝန်သိသိ နုတ်ထွက်ဖို့လိုကြောင်း ပြောခဲ့ပါတယ်။ အကယ်၍ မနှုတ်ထွက်ဘူးဆိုရင် ဝန်ကြီးချုပ်ဖြစ်သူ ဒေးဗစ်ကင်မရွန်းကိုယ်တိုင်က သူ့ရဲ့ခေါင်းဆောင်မှုကို မှန်မှန်ကန်ကန် ပြသတဲ့အနေနဲ့ မစ္စမီးလားကို တာဝန်ကနေ ရပ်ဆိုင်းရမယ်လို့ ဆိုပါတယ်။ 

မစ္စမီးလား အခုလို သူ့ဝန်ကြီးရာထူးကနေ ကိုယ်တိုင်နုတ်ထွက်သွားတာဟာ ပိုကောင်းတယ်လို့ တချို့က ထောက်ပြပါတယ်။ ဘာဖြစ်လို့တုန်းဆိုတော့ လူတွေအနေနဲ့ မဲဆန္ဒရှင်တွေအနေနဲ့ နိုင်ငံရေးသမားတွေဟာ ကိုယ်ပြုလုပ်ခဲ့တာနဲ့ပတ်သက်ပြီး တာဝန်သိတယ်၊ တာဝန်ခံမှုရှိတယ်ဆိုတာကို လိုက်နာရဲ့လားဆိုပြီး အမြဲတမ်းစောင့်ကြည့်နေတာကြောင့် ဖြစ်ပါတယ်။ ရာထူးလည်းရရော ဒီ ၅ နှစ်သက်တမ်းအတွင်း ကိုယ်လုပ်ချင်တာ လုပ်မယ်ဆိုတဲ့ အမတ်မျိုး၊ ဝန်ကြီးမျိုးကို လူတွေက မကြိုက်နှစ်သက်ပါဘူး။ တခါ ၅ နှစ်အတွင်း ငါ ဘာလုပ်လုပ် မပြုတ်နိုင်ဘူး၊ ငါ့ပါတီက ငါ့ကိုကာကွယ် ပေးလိမ့်မယ်ဆိုတာမျိုးရှိနေရင်တောင်မှ လူထုအသံ လူထုသဘောထားကို မျက်ကွယ်ပြုလို့ မရနိုင်တာလည်း မြင်ရပါတယ်။ 

မစ္စမီးလားရဲ့ကိစ္စကို ပြန်ကြည့်လိုက်တော့ စီးပွားရေးလုပ်ငန်းရှင်တဦးဦးဆီက အလုံးအရင်းနဲ့ လာဘ်ငွေယူတာမျိုး မဟုတ်တာကို တွေ့ရပါတယ်။ ဒါပေမယ့် သူရဲ့ဝန်ကြီးသက်တမ်းအတွင်း သူ့ရဲ့ဝန်ကြီးဌာနမှာသုံးစွဲရမယ့် အသုံးစရိတ်ကို အစိုးရဆီမှာ တင်ပြတောင်းခံတဲ့နေရာမှာ ရှင်းရှင်းလင်းလင်း မရှိလှတာကို တွေ့ရပါတယ်။ တစ်ချိန်ထဲမှာလည်း အိမ်တလုံးကို အရစ်ကျပေးသွင်းတဲ့စနစ်နဲ့ ဝယ်ယူထားတဲ့ကာလလည်းဖြစ်နေတော့ အလွဲသုံးစားလုပ်တယ်လို့ စွပ်စွဲခံရပါတယ်။ တကယ်တမ်းပြဿနာတက်ရတဲ့ ငွေကြေးပမာဏဟာ မများလှပါဘူး။ ဒေါ်လာနဲ့မှ ၇ သောင်းလောက်ပဲ ရှိပါတယ်။ သန်းနဲ့ချီပြီး အလွဲသုံးစားလုပ်တာမျိုး မဟုတ်ပါ။ ဒါပေမယ့် တစ်ပြားပဲဖြစ်ဖြစ် နှစ်ပြားပဲဖြစ်ဖြစ် နိုင်ငံတော်ပိုင်ငွေကို အလွဲသုံးစားလုပ်တာမျိုး သို့မဟုတ် အလွဲသုံးစားလုပ်တယ်လို့ ယုံကြည်ရတဲ့အခါမျိုးမှာ ဒီမိုကရေစီနိုင်ငံတွေမှာ ဝန်ကြီးလည်း ကိုယ့်တာဝန်ကို ကိုယ်ယူရပါတယ်။ ဝန်ကြီးချုပ်ကလိုက်ပြီး ကာပေးတာတောင် မရပါဘူး။ 

ကျနော်တို့ နိုင်ငံကလည်း အခု ဒီမိုကရေစီကို သွားနေတယ်လို့ လက်ရှိအုပ်စိုးသူ အစိုးရက ပြောပါတယ်။ ဒီမိုကရေစီသက်တမ်း မရင့်ကျက်သေးလို့ ဟိုဟာတွေ အခု မတောင်းပါနဲ့ဦး၊ ဒီဟာတွေလည်း အခုအချိန် မတောင်းဆိုပါနဲ့ဦး၊ စောလွန်းပါသေးတယ်ဆိုတာမျိုးကို အစိုးရထဲက လူတွေပြောနေတာ နေ့တိုင်းဆိုသလို ကြားရပါတယ်။ ဟုတ်ပါပြီ။ ဒီမိုကရေစီ မရင့်ကျက်သေးလို့ အနောက်နိုင်ငံများကလို နိုင်ငံရေးအခွင့်အလမ်းတွေ အခုချက်ခြင်း မရသေးဘူးဆိုတာ ထားလိုက်ပါ။ ဥပမာအနေနဲ့ နိုင်ငံရေး အခွင့်အရေးတွေကို မတောင်းသေးဘူးပဲ ဆိုပါစို့။ ပါလီမန်မှာ စစ်တပ်ကိုယ်စားလှယ် ၂၅% ရှိနေတာကိုလည်း မလျော့ခိုင်းသေးပါဘူး။ 

ဒါပေမယ့် တောင်းဆိုရမယ့်ကိစ္စတွေကတော့ ရှိပါသေးတယ်။ လာဘ်စားတဲ့ ဝန်ကြီး၊ နိုင်ငံတော်ပိုင် ပစ္စည်းတွေနဲ့ ငွေကြေးကို အလွဲသုံးစားလုပ်တဲ့ ဝန်ကြီး၊ လူတွေပြည်သူတွေကို ပြောင်ပြောင်တင်းတင်း စော်ကားမော်ကားပြောတဲ့ ဝန်ကြီး၊ စီးပွားရေး ကုမ္ပဏီမျိုးစုံနဲ့ လက်ဝါးရိုက်ပြီး ကိုယ့်အိတ်ထဲ ရသလောက်ထည့်နေတဲ့ ဝန်ကြီး၊ အဲတာမှ မဟုတ်လည်း တဖက်လှည့်နဲ့ ကိုယ့်သားသမီး အိတ်တွေထဲ ငွေတွေလှိမ့်ဝင်နေတာမျိုးတွေကိုကော အရေးမယူသင့်ဘူးလား။ မြေသိမ်းယာသိမ်းကိစ္စတွေနဲ့ ပတ်သက်နေတဲ့ ဝန်ကြီးမျိုးတွေ၊ အမတ်မျိုးတွေကိုကော အရေးမယူတော့ဘူးလား။ လူမျိုးရေး၊ ဘာသာရေးကို နိုင်ငံရေးမှာ ခုတုံးလုပ်နေတဲ့သူတွေကိုကော အရေးမယူတော့ဘူးလား။ 

အခု ကျနော်တို့တိုင်းပြည်မှာ ဖြစ်ပျက်နေတာက လွန်လွန်းအားကြီးပါတယ်။ နိုင်ငံရေးအရလည်း အပိုင်ချုပ်ထားတယ်၊ စီးပွားရေးအရလည်း မောင်ပိုင်စီးထားတယ်၊ လာဘ်စားတာ အပါအဝင် မဟုတ်တာ လုပ်နေတာတွေကိုလည်း အရေးမယူဘူးဆိုတော့ ဒီလိုနိုင်ငံမျိုးမှာ တည်ဆောက်နေတယ်ပြောတဲ့ ဒီမိုကရေစီဟာ ဘယ်တော့များမှ ရင့်ကျက်လာမှာလဲ။ ဒီမိုကရေစီခမျာ ရင့်ကျက်ခွင့်ကော ရှိဦးမှာလား။ အရပ်ဝတ်ဝတ်ထားတဲ့ စစ်ဗိုလ်ချုပ်များ အုပ်ချုပ်နေတဲ့တိုင်းပြည်လို့ပြောရင် လွန်မယ်မထင်ပါဘူး။ 

အခုလည်း ကြည့်ပါဦး။ ၂ဝ၁၅ ရွေးကောက်ပွဲဟာ တရားမျှတမှုရှိရပါစေ့မယ်လို့ ရွေးကောက်ပွဲကော်မရှင် ဥက္ကဋ္ဌ ပြောခဲ့တယ်။ ဘာမှ မကြာလိုက်ဘူး။ ပါလီမန် ကိုယ်စားလှယ်လောင်းသာလျှင် မိမိဝင်ပြိုင်မယ့် မဲဆန္ဒနယ်မှာ စည်းရုံး ဟောပြောခွင့်ရမယ်။ တခြားလူပုဂ္ဂိုလ်တဦးဦးကလာပြီး စည်းရုံးတာဟောပြောတာ မလုပ်ရဘူးဆိုတော့ ဒါဟာ ညစ်နည်းတထောင် ဖော်မြူလာထဲက တစ်နည်းကို သုံးတယ်လို့ စွပ်စွဲရပါလိမ့်မယ်။ ကိုယ့်ပါတီကို လူတွေကြိုက်လာအောင် ကြည်ညိုလာအောင် မဲပေးချင်လာအောင်လုပ်မယ်ဆိုရင် အခု အာဏာရ အစိုးရအဖို့ တရားနည်းလမ်းကျကျ လုပ်နိုင်တာတွေ လမ်းကြောင်းတွေ အများကြီးရှိပါတယ်။ အခုဟာက ထမင်းတော့စားခွင့်ရှိတယ် ဒါပေမယ့် လက်နဲ့မစားရ၊ ဇွန်းနဲ့မစားရ၊ အပ်ကလေးနဲ့ပေါက်ပြီး ထမင်းတစ်လုံးစီ ကောက်စားရမယ်ဆိုတဲ့ဟာမျိုးလို ဖြစ်နေတယ်။ 

ကျနော်တို့ တိုင်းပြည်မှာ အခုအစိုးရသက်တမ်း ၃ နှစ်အတွင်း မစ္စမီးလားလို ကိုယ်ပြုခဲ့တာအတွက် ကိုယ်တာဝန်ခံတဲ့ဝန်ကြီးမျိုး တယောက်မှ မတွေ့ဘူးသေးပါ။ လူသိရှင်ကြား အမှားတွေကျူးလွန်ခဲ့တဲ့ ပြည်ထောင်စုအဆင့် ဝန်ကြီးတွေကိုတောင် အာဏာရအစိုးရကော၊ အာဏာရအစိုးရရဲ့ ပါတီကကော အရေးယူတယ်၊ နှုတ်ထွက်ခိုင်းတယ် ဆိုတာများ ယောင်လို့တောင် မကြားမိသေးပါ။ ဒီမိုကရေစီရင့်ကျက်လာဖို့ဆိုတာ ဒီအတိုင်း ထိုင်စောင့်နေရုံ၊ ၅ နှစ်တခါ ရွေးကောက်ပွဲကျင်းပပေးရုံနဲ့ ဖြစ်လာမှာမဟုတ်ပါ။ ဒီမိုကရေစီ အလေ့အထကို လေ့ကျင့်ခန်းလုပ်သလို လုပ်နေပါမှ၊ အမှန်တကယ် ကျင့်သုံးနေပါမှ ဒီမိုကရေစီ ရင့်ကျက်လာမှာ ဖြစ်ပါတယ်။ ဒါ့ကြောင့်လည်း ရှေးလူကြီးများ ပြောလေ့ရှိတာတခုကို သွားပြီးသတိရမိပါတယ်။ အဲတာက ဘာတုန်းဆိုတော့ မင်းတို့ခေတ်ကတော့ကွာ ရှေ့လျောက်တော့ "အတု တစ်ထောင်၊ အယောင် တစ်သိန်း၊ အပလိန်း အန္တပါပဲ" ဆိုတဲ့ စကားကို အမှတ်ရမိပါကြောင်း။ ။ 

ဇော်မင်း 
၁၄ ရက်၊ ဧပြီလ၊ ၂ဝ၁၄ ခုနှစ် 

ရွက်မွန်ဘလော့ဂ်က ပြန်လည်ကူးယူ ဖော်ပြပါတယ်။

 

 

No comments: