မိဘအိမ်တွင်လည်း ငကြောင် ကြောင်ခဲ့၏ ...။ လူလတ်တန်းစား မိသားစုဘဝတွင် ထမင်းထဲရှိသည့် ဆန်ပုိုးတုို့အား ရွံရှာသည်ဟု အကြောင်းပြကာ မစားဘဲနေအောင် ကြောင်ခဲ့၏ ...။ ထမင်းစားသည့်အခါတွင်လည်း ခဲတလုံးကုိုက်မိသည်နှင့် ငကြောင်ဆက်မစားလုိုတော့ ...။ ထမင်းဝိုင်းမှ ချက်ခြင်းလက်ငင်းပင် ထထွက်သွားလုိုက်သည်ချည်း ...။ မိဘတုို့မျက်မှာကား ငကြောင် လှည့်တောင်မကြည့်ခဲ့ ...။ ဗမာလူမျိုးတုို့ ထုံးဓလေ့ ... မိသားစုထမင်းဝိုင်းတွေ မပါမဖြစ် ပါရသည့် ငါးပိရည်ကျိုအား ... လောက်တွေနှင့်ဟုဆုိုကာ ရွံ့ရွံ့ရှာရှာ ကြောင်ခဲ့၏ ...။ ငါးပိနှင့်လောက် ... ရွှေနှင့်ကျောက်ဟူသည့် ဗမာစကားပုံကုိုလည်း ငကြောင် ရွံ့မုန်း၏ ...။
ငကြောင်၏ ကြောင်ချက်သည်ကား လက်လန်လှ၏ ...။ ရေစုိုစုို မြေစုိုစုိုတုို့တွင် ပေါက်လေ့ရှိသည့် အဖုိုးထုိုက်တန်လှသည့် ကန်စွန်းရွက်တုို့အား ... ဝက်တုို့စားသည်ဟုဆုိုကာ ငကြောင် မစား ...။ ရန်ကုန်ရွှေမြို့တော်ကြီးတွင် မြောင်းကျို မြောင်းကျား ... အိမ်သာကြို အိမ်သာကြားတွင်ပေါက်သည့် ကန်းစွန်းထွားထွားတုို့အား ... ဆုိုင်ကြီး ကနားကြီးတွင် ကန်စွန်းပလိမ်းဟု နာမည်လှလှတပ် ဈေးကြီးပေးကာ ဘီယာတကျိုက်နှင့်မြည်းရသည်ကုိုမှ ငကြောင်က ကန်စွန်း ဟု ထင်သည်။ နောင် မိန်းမရသည့်အခါတွင်ကား သောက်လုပ်သောက်ကုိုင်မရှိသည့် ငကြောင်သည် လယ်ထဲ ယာထဲမှ ကန်းစွန်းတုို့ကုိုခူးကာ မိန်းမအား ဖားရသည်မှာအမော ...။ ဤသည်မှာလည်း လည်လည်ဝယ်ဝယ်ရှိသည့် တုိုင်းရင်းသူ တောသူမိန်းမညွှန်ပြသည့်အတွက်သာ အလုပ်မရှိသည့်ငကြောင် စားသာနေခြင်းဖြစ်သည်။
ငကြောင်သည် ငါးမစား ... ငါးမကြိုက် ...။ ငါးတုို့သည် လူသတ္တဝါတွေပင်မစားသည့် ချီးနှင့် တီကောင်တုို့ကုိုစားသည့်အတွက် ငကြောင် မသတီ ...။ အရုိုးများသည် ... ညှီလှသည်ဟုပင် ထပ်မံ အကြောင်းပြလုိုက်သေးသည် ...။ ထပ်ကွန့်လာပါက ... ခြေထောက်မပါ၍ မစားခြင်းဖြစ်သည်ဟု ဆင်ခြေတက်မည်ဟု ငကြောင် တွေးထားမိ၏ ...။
ငကြောင်သည်ကား ... ငယ်ငယ်ဘဝထဲတွင်ကပင် ကြောင်လှ၏ ...။
အလှပအပ ကြိုက်တတ်၏ ...။ အနုအရွ ကြိုက်တတ်၏ ...။ ရွံတတ် ရွဲ့တတ်၏ ...။
အနှီတုို့သည်ကား ငကြောင်၏ ငယ်ဘဝ တစိတ်တဒေသ ကြောင်ချက်များသာ ...။ ထုို့ထက်များပြားလှသည့် ငကြောင်၏ ကြောင်ချက်တုို့ကုိုသိပါက ငကြောင်အား သောက်ရူးစာရင်းတွင် သွင်းနုိုင်ကြကုန်၏ ...။
ခုတလော ငကြောင် နည်းနည်းထပ်ကြောင်လာသည် ...။ ကန်ဇွန်းရွက်နှင့် ကြက်ဥသာစားရသည့် တောဇနပုဒ်မှ နေ့ချင်း ညချင်း ရွှေမြို့တော်ကြီးဆီသုို့ရောက်လာသည့်အခါတွင် ... ငကြောင်၏ စိတ်တုို့သည် ပုံမှန်မဟုတ် ...။
လူပျိုယောင်ယောင် ဘာယောင်ယောင်နှင့် နုိုက်ကလပ်လေး တက်ချင်လာသည်။ အညောင်းပြေ အညာပြေ မျက်လုံးလေး ကစားချင်လာ၏ ...။ အိမ်က မဟေသီမသိအောင် ဇယားလေးတွေ ငြိချင်လာသည်။ ငကြောင်၏ ဖွန်ချဉ်ခြင်းတုို့သည် ပြင်းလှ၏ ...။ မလွယ် ...။
ထုို့အတူ ... အားအားရှိ ... လတ်ယားလတ်ယားနှင့် ဖေ့ဘုတ်တွင်တက်ကာ ... နကန်းတလုံးမှမသိသည့် နုိုင်ငံရေးအား ဟုို ဒီ ... စာအုပ်များ ဖတ်၊ အတိတ်နှင့် ပစ္စုပ္ပန်တောင် ကွဲအောင်မသိတဲ့ အေဘီစီ ဘလွတ်တဲ့ ရွတ်ရှဲ့တွေနှင့် ... တွေ့သမျှ ... မြင်သမျှ ... မှတ်ကာ ... သားကား ... ဝင်ကွန့်လုိုက် ... ဝင်မန့်လုိုက် ... အဆင်ပြေရင် လုိုက်ခ်လုပ်လုိုက်နှင့် ... ငကြောင်သည်ကား ပျော်လျှက်ရှိ၏ ...။
ငကြောင်သိ၏ ... ဤရက်များတွင် ... ထူးထူးခြားခြား ... ငကြောင် ချဉ်ခြင်းတပ်နေသည်ကား ... ဖားခြင်းတည်း ...။ ငကြောင် ဖားချင်နေ၏ ...။ ငကြောင် ယားချင်နေ၏ ...။
ဖားယားခြင်းဟူသည် တဖက်လူအတွက် ကောင်းခြင်းဖြစ်သလုို ... ငကြောင်အတွက်သည်လည်း အကျိုးအမြတ်ရှိခြင်းပင် မဟုတ်ပါလော ...။
ကျနော် ငကြောင်သည်ကား ... ဖားယားပြီး ... နောက်တဆင့်ဖြစ်သည့် ... ကြောင်ဖားအဆင့်ဆီသုို့ ...။
အေ ဘီ စီ ဒီ မတတ်သည့် ငကြောင်သည်ကား ... ကြောင်ဖားဖြစ်ရန်အသင့် ...။ ။
ဆောင်းလူ
သြဂတ်စ် ၂၆၊ ၂၀၁၃
No comments:
Post a Comment