ပြန်လည် ဆုံဆည်းကြရာဝယ် (ခင်မမမျိုး)

(၁) 

အချိန်က ၁၉၉၇ ခုနှစ်၊ နေရာက ဆူးလေဘုရားအနီးမှာပါ။ 

ဒီတုန်းက ရန်ကုန်မှာ ကွန်ပျူတာသင်တန်းတက်ရင်း စာတိုပေစလေးတွေ ရေးဖြစ်ခဲ့ပါတယ်။ စာစောင်တခုမှာ လစဉ်ရေးခွင့်ရတာကြောင့် ရေးထားတဲ့စာမူလေးတွေကို ဆူးလေဘုရားအနီးက လမ်းဘေးလက်နှိပ်စက်ရိုက်တဲ့ အစ်မကြီးတွေဆီမှာ လက်နှိပ်စက်ရိုက်ခိုင်းပြီး စာပေတိုက်ကို သွားပို့နေကျပါ။ ပြီးတဲ့အခါ စာပေတိုက်က မိတ်ဆွေများနဲ့ လက်ဖက်ရည်သောက်ရင်းစကားပြောပြီး ဆူးလေ-ပန်းဆိုးတန်းတဝိုက်က စာအုပ်အဟောင်းဆိုင်တွေမှာ စာအုပ်မွှေ၊ အဟောင်းဆိုင်က ဦးလေးကြီးများနဲ့ စကားပြောနှုတ်ဆက်ပြီးမှ အိမ်ကို ပြန်လေ့ရှိပါတယ်။ 

ဒီလိုနဲ့ တနေ့တော့ ဆူးလေဘုရားအနီးမှာ သီလရှင်အိုကြီးတပါးနဲ့ သက်တော်ဆယ်နှစ်ကျော်လောက်ပဲရှိမယ့် သီလရှင်ဆရာလေးတပါးတို့ လမ်းကူးဖို့ ခဲယဉ်းနေတာ တွေ့ရပါတယ်။ လူကူးမျဉ်းကြားနေရာလည်းမဟုတ်လေတော့ လမ်းပေါ်ခြေလှမ်းတိုးလိုက်၊ ကားတွေကလည်းလာလိုက် (ရန်ကုန်မှာက လူကူးမျဉ်းကြားမှာတောင် ကားနဲ့ လူ အပြိုင်လုကြရတာပါ)၊ ခြေလှမ်းနောက်ဆုတ်လိုက်ဖြစ်နေကြတာ တွေ့ရပါတယ်။ ဒါကြောင့် ဆရာလေးတို့ကို မျဉ်းကြားရှိရာခေါ်သွားပြီး လမ်းကူးပေးရင်း အကျိုးအကြောင်းလျှောက်ထားတော့ နယ်ကနေ ရန်ကုန်တက်လာကြတာမှန်း သိရပါတယ်။ မသွားတတ်၊ မလာတတ်နဲ့ ဘုန်းကြီးကျောင်းတကျောင်းကိုသွားဖို့ ဘတ်စ်ကားတွေကို လိုက်မေးနေကြတာပါ။ ဒါနဲ့ပဲ အဲဒီနေ့က ထုတ်လာတဲ့ စာမူခလေးနဲ့ တည်းခိုရာကို တက္ကစီလေးငှားပေးလိုက်ပါတယ်။သွားရင်းလာရင်း ဒီလိုအဖြစ်လေးတွေက ကြုံတတ်တာကြောင့် နောက်ပိုင်းကျတော့လည်း မေ့မေ့ပျောက်ပျောက်ပါပဲ။ 


ဒါပေမယ့် ဒီသီလရှင်နှစ်ပါးကို မထင်မှတ်ပဲ ပြန်လည်ဆုံဆည်းခဲ့ရပါတယ်။ ဒီတခါ ဆုံဆည်းရတဲ့ နေရာကတော့ ဒေးစွန်ပါ မှာပါ။ တခါတရံ ကျွန်မရဲ့ စိတ်ထဲမှာ ပုတီးစိပ်အဓိဌာန်ဝင်လိုစိတ်ဖြစ်လာတဲ့အခါ မြန်မာပြည်က ဘုရားတွေကို လိုက်ဖူးပြီး ပုတီးစိပ်လေ့ရှိပါတယ်။ အလွန်ဆုံး ကိုးရက်ကနေ ၂၇ ရက်အထိပါ။ တခါတုန်းကတော့ ဗိုလ်တထောင်ဘုရားမှာ ၄၅ ရက်တိတိ ရက်ရှည် အဓိဌာန်ဝင်ခဲ့ဖူးပါတယ်။ ဒီလိုနဲ့ ၂၀၀၁ ခုနှစ်ထဲကကာလတခုမှာတော့ ဒေးစွန်ပါမှာ ပုတီးသွားစိပ်လိုစိတ်ဖြစ်လာတာကြောင့် ရန်ကုန်ကနေ ထွက်သွားလိုက်ပါတယ်။ အရင်တုန်းက ရောက်ဖူးပေမယ့် ပုတီးစိပ်အဓိဌာန်တော့ မဝင်ဖူးခဲ့ပါဘူး။ ဒီလိုနဲ့ ရောက်သွားတော့ ခရီးကပဲပန်းလို့လား မသိ၊ ဘုရားပေါ်ကိုမရောက်ခင်မှာပဲ ခေါင်းမူးလာပါတယ်။ 

ဘုရား တည်ထားတဲ့တောင်ပေါ်ကို တက်ရာလမ်းတလျှောက်မှာ သီလရှင်မြေစိုက်တဲလေးတွေ ရှိပါတယ်။ ဒါကြောင့် သီလရှင်တဲကတိုင်လေးကို အားပြုပြီး မှီထားလိုက်ချိန်မှာ သီလရှင်လေးတပါးက တဲလေးပေါ်ကိုတက်ပြီးနားဖို့ လာခေါ်ပါတယ်။ ဒီသီလရှင်လေးဟာ ရန်ကုန် ဆူးလေဘုရားအနီးမှာတွေ့ခဲ့ဖူးတဲ့ သီလရှင်လေးမှန်းအစပိုင်းမှာ မမှတ်မိခဲ့ပါဘူး။ သီလရှင်အိုကြီးကို တွေ့ရတော့မှ မှတ်မိသွားပါတယ်။ သီလရှင်လေးကတော့ ကလေးမှတ်ဉာဏ်ကြောင့်လား မသိ။ ကျွန်မကို မှတ်မိနေပါတယ်။ တိုက်တိုက်ဆိုင်ဆိုင် ပြန်လည်ဆုံစည်းကြရတာကြောင့် အားလုံးပဲ ဝမ်းသာခဲ့ရပါတယ်။ တဦးမေတ္တာ၊ တဦးမှာ .... ..... .... .... .... .... ...။ 

(၂) 

အချိန်က ၁၉၉၉ ခုနှစ်၊ နေရာက မန္တလေး ရွှေမြို့တော်ကြီးမှာပါ။ 

ဒီတုန်းက မန္တလေးမှာ ကျောင်းသွားတက်ဖြစ်ခဲ့ပါတယ်။ မန္တလေးသားတွေအတွက်တော့ မသိဘူး။ ကျွန်မလို တောင်ပေါ်သူတယောက်အတွက်တော့ မန္တလေးရဲ့နေက အတော်ကိုပူပါတယ်။ ကျွန်မတို့ခေတ်တုန်းက တက္ကစီတွေကလည်း တော်တော်နည်းပါတယ်။ စက်ဘီးတွေကလည်း များ၊ ဆိုင်ကယ်တွေကလည်းများတော့ အိမ်ကကားကိုလည်း တာရှည်မယူထားရဲပါဘူး။ တခါတရံ လိုရင်ပဲ ကားမောင်းသမားနဲ့ကားကို တောင်ကြီးကို လှမ်းမှာဖြစ်ပါတယ်။ စက်ဘီးကျတော့လည်း မစီးတတ်ပြန်ဘူး။ ဆိုင်ကယ်ကျတော့လည်း မေမေက စိတ်မချ။ ဒါကြောင့် မြို့ထဲမှာ ဟိုနားဒီနားသွားရင် ဆိုက်ကားကို အားပြုရပါတယ်။ ကိုယ့်ဝန်တာကို သူများကိုသယ်ဆောင်ခိုင်းရတာကြောင့် ဆိုက်ကားဆရာတွေကိုတော့ အားနာမိသလို ရှိသား။ ဒါပေမယ့်လည်း အထက်ပူ၊ အောက်ပူနဲ့မို့ အားနာနာနဲ့ပဲ စီးရပါတော့တယ်။ 

ဒီလိုနဲ့ တနေ့မှာ ကိစ္စတခုရှိတာနဲ့ ဆိုက်ကားစီးပြီး အပြင်ထွက်ပါတယ်။ မန္တလေးမှာက တချို့နေရာတွေမှာ လူအရမ်းများပေမယ့် လူပြတ်တဲ့လမ်းတွေလည်း ရှိပါတယ်။ ဒီလို လူပြတ်တဲ့ လမ်းတနေရာမှာ အဒေါ်ကြီးတယောက် အထုပ်အပိုးတွေနဲ့ လမ်းပေါ်မှာ ဆောင့်ကြောင့်ထိုင်နေတာ တွေ့ရပါတယ်။ ဒီလောက် နေပူကြီးထဲမှာ ဒုက္ခပါပဲဆိုပြီး ဆိုက်ကားဆရာကို ရပ်ခိုင်း၊ အကျိုးအကြောင်းမေးတော့ ဘူတာကြီးသွားမလို့တဲ့။ ဆိုက်ကားစီးဖို့လည်း ပိုက်ဆံမရှိလို့ တပြစီ နားနားပြီး လမ်းလျှောက်နေတာပါတဲ့။ ဒါနဲ့ပဲ စီးလာတဲ့ ဆိုက်ကားဆရာကို လမ်းကြောင်းပြောင်းပြီး ဘူတာကြီးဘက်ကိုပဲ ပို့ခိုင်းလိုက်ရပါတယ်။ ပြီးတော့မှ ကိုယ်လိုရာခရီးဆက်သွားဖြစ်ခဲ့ပါတယ်။ ဒီလိုတွေ ကြုံရဆုံရ ဆိုတော့လည်း မေ့မေ့ပျောက်ပျောက်ပါပဲ။ 

ဒါပေမယ့် တိုက်တိုက်ဆိုင်ဆိုင် ဒီအဒေါ်ကြီးနဲ့ တခါပြန်ဆုံခဲ့ရပါတယ်။ ဒီတခါဆုံတာကတော့ အုန်းချောဘက်မှာပါ။ အုန်းချောရွာကြီးကို သဘောကျတာကြောင့် နေ့ချင်းပြန်ခရီးသွားလည်ဖြစ်ခဲ့တာ အကြိမ်ကြိမ်ပါပဲ။ အုန်းချောကိုသွားလေ့ရှိတာက ဈေးသည်တွေနဲ့ ကုန်သည်တွေ များပါတယ်။ ကျွန်မကတော့ အလည်သွားတာဆိုတော့ ရှေ့ခန်းရတဲ့ဒိုင်နာကားကို စောင့်စီးပြီး ခရီးသွားဖြစ်ခဲ့ပါတယ်။ တခါတလေတော့လည်း သူငယ်ချင်းတချို့ အဖော်လိုက်ပါတယ်။ 

နောက်ပိုင်းမှာ ဒိုင်နာကား ဆရာတယောက်နဲ့ ရင်းနှီးသွားတာကြောင့် ကျွန်မတို့သူငယ်ချင်းတွေအတွက် ကားဦးစရာ၊ စောင့်စီးစရာ သိပ်မလိုတော့ပါဘူး။ မန္တလေးတက္ကသိုလ်ထဲမှာ သူ့အမျိုးသမီးက အစားဆိုင်ဖွင့်ထားပြီး၊ ကားစပယ်ယာကလည်း သူ့ယောက်ဖဖြစ်တာကြောင့် အုန်းချောဘက် ကားမထွက်ခင် တကူးတကကို အဆောင်မှာလာကြိုပေးပါတယ်။ ညနေပိုင်း သူ့ကားပြန်ထွက်ချိန်နဲ့ညှိပြီး၊ ရွာထဲသွားလည်လို့ရတာကြောင့် ကျွန်မအတွက်ကတော့ အတော်အဆင်ပြေသွားပါတယ်။ 

ဒီလိုနဲ့ ရွာထဲသွားလည်ဖြစ်ချိန် တရက်မှာ နို့ထမင်းရောင်းတဲ့ အဒေါ်ကြီးတယောက်တွေ့တာနဲ့ နို့ထမင်းဝယ်စားဖြစ်ပါတယ်။ မန္တလေးဘက်၊ ကျွဲဆည်ကန်ဘက်၊ အမရပူရဘက်၊ စစ်ကိုင်းဘက်တွေမှာ ဒီလိုပဲ မုန့်ပဲသရေစာလေးတွေကို အိုးထဲမှာထည့်ပြီး ဈေးလှည့်ရောင်းသူတွေ ရှိပါတယ်။ အိုးထဲမှာပါလာတဲ့ အစားအစာတွေက အမျိုးအစားလည်း စုံပါတယ်။ ကျွန်မကတော့ အစားကြိုက်သူဆိုတော့ တွေ့ရင်တွေ့တဲ့နေရာမှာ လှမ်းခေါ်ပြီး ဝယ်စားတော့တာပဲ။ 

ဒါနဲ့ စားပြီး ပိုက်ဆံပေးတော့ မယူပါရစေနဲ့ ကျေးဇူးပြန်ပြုတာလို့ ဆိုပါတယ်။ အစက မမှတ်မိပါဘူး။ သူပြန်ပြောပြတော့မှ ဘူတာကိုလိုက်ပို့ပေးခဲ့ဖူးတဲ့ အဒေါ်ကြီးမှန်း မှတ်မိသွားရပါတော့တယ်။ ပိုက်ဆံကိုလည်း တောင်းတောင်းပန်ပန်နဲ့ ပေးလိုက်ရပါတယ်။ တနေ့လုပ်၊ တနေ့စားတွေရဲ့ဘဝမှာ ဒီနေ့ရောင်းရငွေဟာ နောက်တနေ့ရဲ့ အရင်းအနှီး ဖြစ်နေတတ်တာ မဟုတ်ပါလား။ ဒါပေမယ့် ကျေနပ်အောင် နို့ထမင်းတပွဲတော့ ကျသင့်ငွေထဲ ထည့်မတွက်ပဲ စားပေးလိုက်ရပါတယ်။ မေတ္တာတရားတို့ ရောယှက်နေခဲ့သော နို့ထမင်းတပွဲ ... .... .... ... ...။ 

(၃) 

အချိန်က ၂၀၀၁ ခုနှစ်။ နေရာက တောင်ကြီး-ရန်ကုန် အဝေးပြေးကားလမ်းမ။ 

ရန်ကုန်မှာ စာမေးပွဲတခု ဖြေစရာရှိတာကြောင့် တောင်ကြီးကနေ ရန်ကုန်ကို ကားစီးသွားဖြစ်ခဲ့ပါတယ်။ ကျွန်မရဲ့ဘေးမှာတော့ အသက်သုံးဆယ်အရွယ် အမျိုးသမီးတယောက် စီးလာပါတယ်။ တောင်ကြီး-ရန်ကုန် ကားတွေက နေ့လည်ဆယ့်နှစ်နာရီ ဝန်းကျင်မှာ ထွက်လေ့ရှိပါတယ်။ ညနေပိုင်းမှာ လက်ဖက်ရည်သောက် ခဏနားပြီး ညရှစ်နာရီလောက်မှာတခါ ညစာစားဖို့ ထပ်နားလေ့ရှိပါတယ်။ အဲဒီကနေ ဆက်ထွက်လာလိုက်တာ သန်းခေါင်ကျော်မှတခါ ထပ်နားလေ့ရှိပါတယ်။ ကားစထွက်စကတည်းက အဲဒီအစ်မရဲ့မျက်နှာက သိပ်မကောင်းလှဘူး။ ပင်ပန်းပြီး နွမ်းနေသလိုပဲ။ လက်ဖက်ရည်သောက် နားတုန်းကလည်း ဆင်းတာမတွေ့ရဘူး။ ညစာစားချိန်တုန်းကလည်း အအေးပုလင်း တပုလင်းပဲ မှာသောက်တာတွေ့ရတယ်။ 

ဒီလိုနဲ့ ကားပြန်ထွက်ပြီး နောက်ပိုင်းကျတော့ နေမကောင်းဖြစ်နေတာမှန်း အတော်ကိုသိသာနေပြီ။ အဖျားတက်နေတာပဲ။ ဆရာဝန်သမီးဆိုတော့ ခရီးသွားရင် ဆေးတွေဆောင်သွားတတ်တာ အကျင့်ပါနေပြီမို့ ကျွန်မရဲ့လက်ထဲမှာ ဆေးတချို့ပါပါတယ်။ ဒါပေမယ့်လည်း ကော်ဖီနဲ့ဖြစ်ဖြစ်ဆေးတိုက်မှ ဖြစ်မယ်ထင်တာကြောင့် ညသန်းခေါင်ကျော်နောက်ပိုင်း ကားရပ်ချိန်ကျတော့ အဖျားတက်နေတဲ့အစ်မကို တွဲဆင်းပြီး ဆိုင်ထဲမှာကော်ဖီမှာ ဆေးတိုက်ရပါတယ်။ နေမကောင်းချိန်ဆိုတော့ စကားတော့ အများကြီး မပြောဖြစ်ကြပါဘူး။ ဝန်ထမ်းဆိုတာရယ်၊ ရန်ကုန်ကို အလုပ်တာဝန်တခုနဲ့ သွားတယ်ဆိုတာလောက်ပဲ ပြောဖြစ်ခဲ့ကြပါတယ်။ 

ဒီလိုနဲ့ ၂၀၀၂ ခုနှစ်ရောက်တော့ နိုင်ငံခြားကို မဖြစ်မနေထွက်ဖို့ အခြေအနေတခုက လှုံ့ဆော်ထားလိုက်ပါပြီ။ ဒါကြောင့် D-form အတွက် အခွန်ကင်းရှင်းကြောင်း စာကို တောင်ကြီးက အခွန်ရုံးမှာ သွားယူရပါတယ်။ အချိန်က သိပ်မရတာကြောင့် ကားလမ်းခရီးကိုကြိုက်ပေမယ့် မသုံးဖြစ်တော့ပါဘူး။ လေယာဉ်နဲ့ပဲ ခရီးသွားရပါတယ်။ ဒါပေမယ့် ဟဲဟိုးလေဆိပ်ရောက်တော့ ကျွန်မမှာ မျက်လုံးပြူးစရာကိစ္စတခု ကြုံရပါတယ်။ ပုံမှန်ပဲလား၊ သတင်းအရလားတော့ မသိ။ အဲဒီမှာ ရှာဖွေရေးတွေ လုပ်နေပါတယ်။ ကျွန်မရဲ့ လက်ဆွဲအိတ်ထဲမှာက မိတ်ဆွေတယောက်ပေးလိုက်တဲ့ စာစောင်တခု။ ဒီတုန်းက နိုင်ငံရေးအခြေအနေအရ ဒီစာစောင်လက်ဝယ်ရှိမှုဟာ ကျွန်မရဲ့ဘဝကို တစုံတရာပြောင်းလဲမှု ဖြစ်သွားစေနိုင်ပါတယ်။ 

အဲဒီမှာပဲ ယူနီဖောင်းဝတ် အမျိုးသမီးတယောက်က ကျွန်မကို လာခေါ်ထုတ်သွားပါတယ်။ အစပိုင်းမှာ ဒီအမျိုးသမီးကို ကျွန်မ မမှတ်မိပါဘူး။ အခန်းတခုထဲကို ခေါ်သွားချိန်မှာ ကျွန်မ စိတ်လျှော့ထားလိုက်ပါပြီ။ ကြုံသမျှ ရင်ဆိုင်ရုံပဲရှိတော့တာပေါ့လေ။ ဒါပေမယ့် အခန်းထဲကိုရောက်တော့ သူက မေးပါတယ်။ သူ့ကို မှတ်မိလားတဲ့။ တခါတုန်းက ရန်ကုန်ခရီးမှာ ညီမလေးကိုယ်တိုင် ကော်ဖီပူကိုမှုတ်ပေးပြီး ဆေးတိုက်ပေးခဲ့တာလေတဲ့။ ဘာပဲပြောပြော ဒီအချိန်အထိ ကျွန်မရဲ့ရင်ထဲမှာ တဒိတ်ဒိတ်ရှိနေဆဲပဲ။ သူက ဆက်ပြောပါတယ်။ ဘာမှစိတ်မပူနဲ့။ ညီမလေး မူပျက်နေတာကို အတွေ့အကြုံအရ အစ်မ ရိပ်မိပါတယ်တဲ့။ ဒီမှာက မူးယစ်ဆေးဝါး ရှာဖွေနေကြတာ။ ညီမလေးက ရာဇဝတ်မှုကျူးလွန်မယ့်လူ မဟုတ်ဘူးဆိုတာ အစ်မ ယုံပါတယ်တဲ့။ နောက်ဆိုရင် အသွားအလာ သတိထားပါတဲ့။ ကျွန်မရဲ့အိတ်ကို သူခဏ ယူထားလိုက်ပြီး လေယာဉ်ပေါ်တက်ခါနီးမှာ ပြန်လာပေးသွားတယ်။ စာစောင်တော့ မပါလာတော့ဘူး။ ရန်ကုန်လေဆိပ်ရောက်ချိန်အထိ ကျွန်မရဲ့ စိတ်ထဲမှာ အိပ်မက်မက်နေသလိုခံစားနေရဆဲ ... ... ... ...။ 

(၄) 

အချိန်က ၂၀၀၄ ခုနှစ်၊ နေရာက အင်္ဂလန်နိုင်ငံ၊ လန်ဒန်မြို့မှာပါ။ 

ဒီနိုင်ငံမှာ ထူးခြားတာတခုက သက်ကြီးရွယ်အိုအများစုက ကျန်းမာတယ်ဆိုရင် သူတို့အိမ်မှာပဲ ကိုယ့်ဘာသာကိုယ်နေကြတာပါ။ သားသမီးတွေက အသက်ဆယ့်ရှစ်နှစ်ကျော်အရွယ်ရောက်ရင် အိမ်က ထွက်ပြီး ကိုယ့်ဘာသာကိုယ် အိုးအိမ်ထူထောင်ကြပါတယ်။ မိသားစုဘဝ တည်ဆောက်ကြပါတယ်။ နီးရင်တော့ တလ တခါ၊ ဝေးရင်တော့ တနှစ် တခါ ခရစ်မတ်ကာလမှာ မိဘတွေကို ပြန်လာတွေ့ကြပါတယ်။ မိဘများကို သားသမီးတွေက လုပ်ကျွေးတယ်ဆိုတာ မရှိပါဘူး။ လက်ဆောင်တွေ ဝယ်ပေးတာ၊ အပန်းဖြေခရီးခေါ်သွားတာလောက်ပဲ ရှိပါတယ်။ သက်ကြီးရွယ်အိုများကို အဓိက စောင့်ရှောက်တာကတော့ နိုင်ငံတော်ပါပဲ။ 

ပင်စင်စားဖြစ်သွားချိန်မှာ အလုပ်လုပ်ချိန်တုန်းက အလုပ်ရဲ့ပင်စင် အစီအစဉ်တွေရှိထားရင် အလုပ်ပင်စင်ခံစားခွင့်၊ မဟုတ်ရင်လည်း နိုင်ငံတော်ပင်စင်ခံစားခွင့် ရှိပါတယ်။ ဒီတော့ သက်ကြီးရွယ်အိုများကလည်း သူတို့ဘာသာနေပြီး ကျန်းမာရေးမကောင်းရင်တော့ သူနာပြုများနဲ့ စောင့်ရှောက်သူများရှိတဲ့ care homes များမှာ သွားနေကြပါတယ်။ ဒီလိုနေချိန်တွေမှာ သူတို့ရဲ့ အိမ်ကို ရောင်းပြီး စောင့်ရှောက်ခပေးကြပါတယ်။ သားသမီးတွေက စောင့်ရှောက်ခပေးတယ်ဆိုတာကတော့ ခပ်ရှားရှားပါပဲ။ ဘယ်လိုပဲဖြစ်ဖြစ် ပန်းစည်းလေးတွေ၊ ကတ်လေးတွေ အချိန်မှီပို့ပေးတာ၊ မြေးမြစ်တွေခေါ်ပြီး အလည်လာတာ၊ ဓာတ်ပုံလေးတွေ ပို့ပေးတာ၊ ခရစ်မတ်နေ့လည်စာ လာစားတာလေးတွေနဲ့ မိဘ-သားသမီးကြားက တွယ်နှောင်မှုလေးတွေတော့ ရှိနေတတ်ပါတယ်။ 

ဒီလိုနဲ့ တနေ့မှာ ကျွန်မသူငယ်ချင်းရှိတဲ့ လန်ဒန်မြောက်ပိုင်းကို အလည်သွားရင်း လမ်းမှာ အသက်ရှစ်ဆယ်အရွယ် အဖွားတယောက် ဈေးဝယ်တွန်းလှည်းလေးကို ဖြည်းဖြည်းချင်းတွန်းပြီး တရွေ့ရွေ့သွားနေတာ တွေ့ရပါတယ်။ အတော်လဲ မောနေပုံပေါက်ပါတယ်။ ဆောင်းတွင်းရဲ့ အေးစက်စက်လမ်းတလမ်းပေါ်မှာ အဖွားအိုတယောက်နဲ့ လူငယ်တယောက် နှစ်ယောက်ထဲ လမ်းလျှောက်နေချိန်မှာ ဒီလိုအခြေအနေမျိုးကို မြန်မာစိတ်ရှိတဲ့ လူငယ်တယောက်က ဘယ်လို ဥပေက္ခာ ပြုနိုင်မှာတဲ့လဲ ။ဒါနဲ့ပဲ အဖွားကို ကူညီဖေးဖရင်း သူ့အိမ်လေးဆီကို အရောက်ပို့ပေးခဲ့ပါတယ်။ 

အိမ်ရှေ့ရောက်တော့ အဖွားက အိမ်ထဲမဝင်သေးဘဲ ကျွန်မကို လက်ကလေးကိုင်ထားပြီး အကြိမ်ကြိမ် ကျေးဇူးတင်စကားပြောပါတယ်။ အဖွားက အိမ်ထဲကိုလည်း အလည်ခေါ်ပါတယ်။ လက်ဖက်ရည်သောက်ဖို့ပါ။ အဖွားနှစ်ယောက်နဲ့ ကြီးပြင်းလာတဲ့ ကျွန်မအတွက်တော့ ရေခြားမြေခြားမှာ အဖွားတယောက်ရဲ့ ဒီလိုကြင်နာယုယမှုခံရတာ တကယ့်ထီပေါက်တာပါပဲ။ ဒါနဲ့ပဲ အိမ်ထဲ အတူဝင်ဖြစ်ခဲ့ပါတယ်။ သူ့ရဲ့ ဈေးဝယ်လာတဲ့ ပစ္စည်းတွေကိုကူသိမ်းပေးပြီး၊ လက်ဖက်ရည်သောက် စကားပြောဖြစ်ကြပါတယ်။ 

ဆယ့်ငါးမိနစ်လောက်ကြာတော့ အဖွားရဲ့ သားဖြစ်သူ ရောက်လာပါတယ်။ တခါတလေ အလုပ်ဆင်းချိန်မှာ အမေကို လာဝင်ကြည့်တတ်တယ်တဲ့။ အသက် လေးဆယ်ကျော်၊ ငါးဆယ်ဝန်းကျင် လူတယောက်ပါပဲ။ အင်္ဂလိပ်လူမျိုးတွေက သီးခြားနေတတ်သူတွေပါ။ လူတွေကိုလဲ သိပ်ယုံတတ်ကြတာ မဟုတ်ပါဘူး။ ဒါပေမယ့်လည်း အဖွားက အကျိုးအကြောင်းတွေပြောပြတော့ ကျေးဇူးတင်စကား ဆိုပါတယ်။ မြန်မာပြည်ကဆိုတော့ မြန်မာပြည်အကြောင်းလေးတွေတောင် ပြောဖြစ်လိုက်ကြပါသေးတယ်။ နောက်ပိုင်းကျတော့လည်း အလုပ်တွေက တဖက်၊ ကျောင်းက တဖက်နဲ့မေ့မေ့ပျောက်ပျောက်ပါပဲ။ 

ဒါပေမယ့် တိုက်ဆိုင်ချင်တော့ ဘဏ်အလုပ်တခုရဲ့အင်တာဗျူးမှာ အဲဒီလူကို ပြန်တွေ့ရပါတော့တယ်။ ဘဏ်အလုပ်အတွက် စာမေးပွဲတွေ၊ အင်တာဗျူးတွေ အဆင့်ဆင့်ဖြေရပါတယ်။ ပထမဆုံး လျှောက်လွှာတင်၊ ပြီးရင် သင်္ချာနဲ့ analyticalskills စာမေးပွဲတွေကို အွန်လိုင်းကနေ ဖြေရပါတယ်။ အဲဒါအောင်ရင် တယ်လီဖုန်းနဲ့ အင်တာဗျူး၊ ပြီးရင် တခါ လူတွေ့အင်တာဗျူး၊ နောက်တော့ တခါ မြို့တမြို့ (ဘဏ်အလိုက် မြို့က ကွဲပြားပါတယ်) ကို သွားပြီး လူအများနဲ့ စုပေါင်းလုပ်ဆောင်တတ်တဲ့ အရည်အချင်းတွေ၊ ဆုံးဖြတ်ချက်ချတဲ့ အရည်အချင်းတွေအတွက် စစ်ဆေးခံရပါတယ်။ 

သူတို့ စစ်ဆေးအကဲဖြတ်တာတွေထဲမှာ လူတွေကို အုပ်စုခွဲပြီး အကြောင်းအရာတခုကို ဆွေးနွေးခိုင်းတာတွေ၊ အလုပ်တခုတွဲလုပ်ခိုင်းတာတွေလည်း ပါဝင်ပါတယ်။ ပြီးရင်တော့ အင်တာဗျူးဘုတ် အဖွဲ့နဲ့နောက်ဆုံး တွေ့ဆုံရပါတယ်။ တပတ်လောက်အခါကျရင်တော့ အရွေးခံ ရမရကို အကြောင်းကြားလေ့ရှိပါတယ်။ ရှေ့ပိုင်းအဆင့်ဆင့်ကလည်း အရေးကြီးတယ်ဆိုပေမယ့် နောက်ဆုံး အဆင့်ဖြစ်တဲ့ အင်တာဗျူးဘုတ်အဖွဲ့ကတော့ အရေးကြီးဆုံးလို့ ဆိုရပါလိမ့်မယ်။ အဲဒီဘုတ်အဖွဲ့ထဲမှာ တခါကဆုံဖူးခဲ့တဲ့ အဖွားရဲ့သားဖြစ်သူ ပါလာတာကတော့ ကျွန်မရဲ့ ကံကြမ္မာပဲ ထင်ပါရဲ့။ အင်တာဗျူးခန်းထဲကနေ အားလုံးကိုနှုတ်ဆက်ထွက်ခွာချိန်မှာ သူလှမ်းကြည့်လိုက်တဲ့ အကြည့်တချက်နဲ့တင် အလုပ်ခန့်စာကို စောင့်စရာ မလိုတော့ဘူးဆိုတာ ကျွန်မ ကြိုသိသွားခဲ့ပါပြီ။ 

နိဂုံး 

မွေးဖွားချိန်ကနေ သေဆုံးချိန်အထိ ဖြတ်သန်းရတဲ့လူ့ဘဝဟာ ခရီးတခုကို သွားနေရတာနဲ့အတူတူပဲလို့ ကျွန်မ ယူဆမိပါတယ်။ ဒီခရီးလမ်းပေါ်မှာ လူအများနဲ့ ကြုံတွေ့ရလေ့ရှိပါတယ်။ တချို့လူတွေကို ခေတ္တခဏသာ ဆုံဆည်းရတတ်ပါတယ်။ တချို့လူတွေကိုတော့ ဘဝတလျှောက်လုံးမှာ ကြုံတွေ့ရတတ်ပါတယ်။ ခေတ္တဆုံတွေ့ပြီး နောက်ပိုင်းအတန်ကြာမှ မမျှော်လင့်ဘဲ ပြန်ဆုံရတတ်တာတွေလည်း ရှိပါတယ်။ ဘဝခရီးလမ်းကိုဖြတ်သန်းခဲ့စဉ်မှာ မေတ္တာ၊ ကရုဏာ၊ မုဒိတာ၊ ဥပက္ခာတရားတွေကိုင်စွဲမိတဲ့ အခြေအနေတွေလည်းရှိခဲ့သလို၊ သူတော်စင်တယောက်မဟုတ်တဲ့အတွက် လောဘ၊ ဒေါသ၊ မောဟ၊ မာန်မာနတွေကိုင်စွဲသွားမိတဲ့ အခြေအနေတွေလည်း ရှိကောင်းရှိခဲ့ပါလိမ့်မယ်။ ဘယ်လိုပဲဖြစ်ဖြစ် ရှေ့ဆက်ရမယ့်ဘဝခရီးမှာတော့ မေတ္တာတရားကိုအခြေခံ ဆုံတွေ့ကြရပြီး တိုက်တိုက်ဆိုင်ဆိုင် ပြန်လည်ဆုံဆည်းရချိန်တွေမှာလည်း မေတ္တာတရားကို အခြေခံသော ဆုံဆည်းမှုများရှိတဲ့ခရီးတခုကိုပဲ ဆက်လက်ဖြတ်သန်းခွင့်ရပါစေလို့ ဆုတောင်းမိပါရဲ့။    ။

ခင်မမမျိုး
(၆၊ ၅၊ ၂၀၁၃)