ကိုကိုးကျွန်းက ပြန်ရောက်စ လွန်ခဲ့တဲ့ အနှစ်သုံးဆယ်လောက်က ‘အလံမလှဲစတမ်း’ ဆိုတဲ့စာအုပ် ဒုတိယအကြိမ် ပြန်လည်ထုတ်ဝေခွင့်ရတော့ ‘ဝင်းဇော် ပြန်လာပြီ။ ချောအိမာန် ပြန်လာပြီ’ လို့ သတင်းစာမှာ ကြော်ငြာခဲ့တယ်။ နှစ်ပေါင်း နှစ်ဆယ်လုံးလုံး ထုတ်ဝေခွင့်မရခဲ့တဲ့ ‘အလံမလှဲစတမ်း’ တတိယအကြိမ် ပြန်လည် ထုတ်ဝေခွင့်ရတာနဲ့ မရှေးမနှောင်း လူထုစိန်ဝင်းလည်း နာလန်ထူစပြုလာပြီမို့ တိုက်ဆိုင်စွာ ‘ပြန်လာပြီဗျို့’ လို့ နှုတ်ဆက်လိုက်ရတာ ဖြစ်ပါတယ်။
စောင့်မျှော်အားပေး မေတ္တာထားကြတဲ့ စာဖတ်သူများအပေါ် တာဝန်မကျေဖြစ်ခဲ့ရတာ ဒီတစ်ခါ အကြာဆုံးပါပဲ။ မတ်လ နောက်ဆုံးပတ်ကစပြီး မိုးက မရွာ၊ အပူက လွန်ကဲ၊ မီးကဖြတ်ဆိုတော့ မရှူသာမကယ်သာ အလူးအလဲခံရပြီး အိပ်ရာထဲ လဲပါတော့တယ်။ အပတ်စဉ်လာကြည့်ပေးနေကျ ဆရာဝန်လေး ဒေါက်တာတင်စံဦးနဲ့ပဲ ခါတိုင်းလို ပြန်ကောင်းသွားမယ် ထင်တာ။ ကောင်းမလာဘူး။
ဧပြီ ၁ ရက် ရွေးကောက်ပွဲဝန်းကျင်မှာတော့ လူကတုံးပဲ။ ဘာမှမသိဘူး။ သင်္ကြန်ကျတော့ ဆရာလေးက နှစ်စဉ်သွားနေကျ ရှမ်းပြည်နယ်က ကျေးရွာတွေကို အခမဲ့ဆေးကု ထွက်သွားတယ်။ ဒီမှာ ကယ်တင်ရှင်အဖြစ် ရောက်လာတာက ‘အလဲဗင်း မီဒီယာဂရုပ်’ (EMG) ရဲ့ ဒေါက်တာသိန်းမြင့်ဖြစ်တယ်။ ဆရာက သင်္ကြန်တွင်းကြီးတောင် ရောက်အောင်လာပြီး စောင့်ရှောက်ကုသပေး ရှာတယ်။ ကျေးဇူးအင်မတန်တင်မိပါတယ်။
အဲဒီနောက် နိုင်ငံခြားရောက် သမီးသမားတော်လေးက ထုံးစံအတိုင်း ဖုန်းဆက်ပြီး ကျန်းမာရေးအကြောင်းမေးတော့ အိမ်ကသမီးကို ဖြစ်ကြောင်းကုန်စင် ပြောပြလိုက်တယ်။ အဝေးက လူက မမြင်ရတော့ ပိုစိတ်ပူပြီး ရန်ကုန်ကသူ့မိတ်ဆွေ သမားတော်တစ်ယောက်ကို လွှတ်ပေးပြီး ကြည့်စေတယ်။ ဓာတ်မှန်ရိုက်တာ၊ သွေးစစ်၊ သလိပ်စစ်တာ အားလုံးကို အီးမေးလ်နဲ့ သူ့ဆီ ပို့ခိုင်းတယ်။ စစ်ချက်တွေကိုကြည့်ပြီးတော့ ရန်ကုန်က သူ့မိတ်ဆွေဆရာဝန်နဲ့ ညှိနှိုင်းတိုင်ပင်ပြီး သောက်ဆေး၊ ထိုးဆေး၊ ရှူဆေးတွေပေးကြမယ်။
မနက်၊ ည ဆေး ထိုးဖို့လည်း ပူစရာမလိုဘူး။ ရန်ကုန်က သမားတော်ရဲ့အဆက်နဲ့ အိမ်တိုင်ရာရောက် ကျန်းမာရေးအဖွဲ့ HMS က ဆရာဝန်လေးတစ်ယောက် နဲ့ ဆရာမနှစ်ယောက်က နေ့စဉ် မပျက်မကွက် လာလုပ်ပေးကြတယ်။ ဒီကြားထဲ အဖျားတက်လို့ နှလုံးခုန်နှုန်း ၁၄၀ ရောက်နေလို့ ဖုန်းဆက်ခေါ် လိုက်ရင်လည်း ဖုန်းထဲက ဘာဆေး ဘာဆေးတိုက်ထားပါလို့ ညွှန်ကြားပြီး ခဏကြာတော့ လူကိုယ်တိုင်လာရောက် ကြည့်ရှုပေးကြတယ်။ သူတို့လေးတွေလည်း ကျေးဇူးတင်ရပါတယ်။
အရင်နွေတွေလို ခဏပဲထင်ခဲ့ပေမယ့် ဒီတစ်ခေါက် တော်တော်ကြာသွားတယ်။ သုံးလလုံးလုံး ဘုန်းဘုန်း လဲနေတော့တာပဲ။ ကိုယ့်အစာတောင် ကိုယ်မစားနိုင်လို့ ခွံကျွေးရတယ်။ အစာစားရတာကလည်း ဒုက္ခတော်တော်ကြီးတယ်။ အောက်ဆီဂျင်နဲ့ နှလုံးခုန်နှုန်းပြကိရိယာကို လက်မှာစွပ်ထားပြီး အရိပ်တကြည့်ကြည့် စားရတာ အစာတစ်လုတ်ဝါးလိုက်မြိုလိုက်တာနဲ့ နှလုံးက ဒိုင်းဒိုင်းနဲ့ ခုန်တက်သွားတယ်။ အစာတစ်လုတ်ကို နှလုံးက ခြောက်မှတ်၊ ခုနစ်မှတ်တက်သွားတာ။ နေက ပြင်းပြင်း၊ မီးကမလာတဲ့အချိန်မျိုးဆိုရင် စိုးရိမ်မှတ် ၁၄၀ လောက်အထိတောင် ရောက်သွားတတ်တယ်။ သိပ်သတိထားပြီး စားရသောက်ရလို့ ထမင်းဖြစ်စေ၊ ဆန်ပြုတ်ဖြစ်စေ ၁၅ ဇွန်းစားရင် အချိန် တစ်နာရီကြာတယ်။
လွန်ခဲ့တဲ့ သုံး၊ လေးနှစ်က အထူးကုဆေးရုံကြီးတစ်ခုမှာ ဆေးစစ်ဖို့လုပ်နေတုန်း ရုတ်တရက် အဆုတ်ထဲက လေအိတ်ပေါက်သွားလို့ အသက်ရှူမရတော့ဘဲ သေမလိုဖြစ်ခဲ့ဖူးတယ်။ ဆေးရုံမှာဖြစ်တာမို့ မသေတာ။ ဆရာဝန်တွေက ချက်ချင်းခွဲပြီး အဆုတ်ထဲက လေတွေကို ထုတ်ပစ်လိုက်တယ်။ နောက်တော့ အဆုတ်ထဲထိ ပိုက်ထိုးထည့်ပြီး အထဲက အရိအရွဲတွေကုန်အောင် ထုတ်ပစ်ဖို့ ပုလင်းတန်းလန်းနဲ့ နှစ်ပတ်လောက် ဆေးရုံမှာနေခဲ့ရတယ်။ ဒါတောင် စာရေးပျက်တာ တစ်လလောက်ပဲ။ ဒီတစ်ကြိမ်တော့ ရာသီပြောင်း ဖြစ်နေကျ အာဂန္တုဖျားပဲ၊ ခဏနေကောင်းသွားမှာပဲ ထင်ခဲ့ပေမယ့် သုံးလလောက်ကြာသွားတယ်။ တော်တော်လည်း ခံလိုက်ရတယ်။
ဒီကာလတစ်လျှောက်လုံး မေတ္တာ စေတနာထားကြတဲ့ စာဖတ်ပရိသတ်များက တစ်နေ့တစ်နေ့ ဆယ့်လေး၊ ငါးဦးထက်မနည်း ဖုန်းဆက်မေးကြ မေတ္တာပို့ကြတယ်။ နှစ်ရက်ခြားတစ်ခါ မှန်မှန်ဆက်ပြီး အကြိမ်ပေါင်း နှစ်ဆယ်၊ အစိတ် မေးသူလည်း ရှိတယ်။ ဒီလိုမေတ္တာတွေကြောင့် အားတင်းပြီး နာလန်မြန်မြန်ထအောင် ကြိုးစားရတယ်။ လုပ်စရာတွေက အများကြီးရှိသေးတယ်။ စာဖတ်ပရိသတ်အပေါ် တာဝန်မကျေသေးဘူး။ သူတို့ရင်ထဲက အသံတွေကို နားထောင်ပြီး သူတို့ ပြောချင်တာတွေကို တိုင်းသိပြည်သိ ပြောပေးရဦးမယ်။
အဲဒီလိုဆိုတော့ ‘ကမ္ဘာတုန်အောင် ကုန်းအော်ရလွန်းလို့ အမောဆို့ပြီးဖျားတာ’ လို့ ကရုဏာဒေါသောနဲ့ မှတ်ချက်ချခဲ့တဲ့ မန္တလေးကတူမ ချောက ဘာပြောဦးမလဲ မသိဘူး။
မှတ်ချက် - ဤဆောင်းပါးအား အဆုံးသတ်အထိ ရေးသွားနိုင်ခြင်း မရှိခဲ့ပါ။
ဆရာ လူထုစိန်ဝင်း နောက်ဆုံးရေးခဲ့သော ဆောင်းပါး (၆- ၆- ၂၀၁၂)
No comments:
Post a Comment