အိမ်ရှေ့က စားပွဲပေါ်မှာ
ပိတောက်တွေ မပွင့်တာကြာခဲ့ပြီ …။
ဘယ်လောက်ထိ ဇာတ်ကနာသလဲလို့ဆိုရင်
ဘုရားညောင်ရေအိုးကလည်း
ပိတောက်ပန်းကို လွမ်းလို့ …
ကလေးတယောက်နဲ့ မုဆိုးမဖြစ်နေရသူကလည်း
ပိတောက်ဆိုရင် စိတ်နာသတဲ့ …
ဘယ်တုန်းကမှ မျိုးရိုးမရှိခဲ့ဘူးတဲ့
ဟစ်ဟော့ပ် ဂီတနဲ့တောင်းစားနေရသူတွေကလည်း
ဒီနှစ် အတာသင်္ကြန်မှာ
ပိတောက်တွေပန်ပြီး တောင်းမတဲ့
သင်္ကြန်မိုးသီချင်းတွေ တိုက်လို့တဲ့ …။
ဘုရား … ဘုရား
ဘာတွေ ဘယ်လိုဖြစ်ကုန်သလဲဆိုတာ
ဘုရားရှင် ကိုယ်တော်လည်း နားမလည်နိုင်တော့ဘူးတဲ့ …
သူကိုယ်တိုင်က ဘုရား … ဘုရား တနေရသတဲ့ …။
လူတယောက် မိုးပေါ်က ဆင်းလာတယ်
လက်တဖက်မှာ ဗော့ဒ်ကာအရက်ပုလင်း
တဖက်မှာတော့ ဗိုလ်အောင်ဒင့် ခြောက်လုံးပြူးကို ကိုင်လို့
သူ့ခေါင်းထဲက ကျည်ဆံတတောင့်ကို ဆွဲထုတ်
ပြီးတော့
ကျည်အိမ်ထဲ ထည့်လိုက်တယ်
သူ့ပါးစပ်က ပြောလိုက်သေးတယ်
ငါဟာ … ကဗျာဆရာ မာယာကောဗ်စကီးကွတဲ့
ပြီးတော့မှ
သူပစ်ရမယ့် ပစ်မှတ်ကို ရှာတွေ့သွားတယ်
သွေးအေးအေးနဲ့ တည်တည်ငြိမ်ငြိမ် ပစ်ထဲ့လိုက်တယ်
လမ်းမပေါ်မှာတော့
သစ္စာဖောက်နေတဲ့ ပိတောက်တွေ …။ ။
တင်ကိုမင်းညို ဆိုတာ ကမာပုလဲရဲ့ ကလောင်ခွဲတခုပါ။
No comments:
Post a Comment