“၈၈ မျိုးဆက် ကျောင်းသားတွေအနေနဲ့က အန်အယ်လ်ဒီနဲ့ ဒေါ်အောင်ဆန်းစုကြည်တို့သွားနေတဲ့ ရွေးကောက်ပွဲ လမ်းကြောင်းကို ကန့်ကွက်ရှုတ်ချနေတာမဟုတ်ဘဲ သူတို့ ကျောင်းသားခေါင်းဆောင်တွေ ပြန်လွတ်လာမှသာ ရွေးကောက်ပွဲမှာ ပါဝင်ရေး မပါဝင်ရေးနဲ့ ပါတီ တည်ထောင်ရေး စတာတွေကို ဆွေးနွေးဆုံးဖြတ်နိုင်ကြမှာဖြစ်တယ်လို့ …”
၈၈ မျိုးဆက်ကျောင်းသားတွေနဲ့ ဒေါ်အောင်ဆန်းစုကြည်တို့ ဗုဒ္ဓဟူးနေ့က တွေ့ဆုံ ဆွေးနွေးခဲ့ကြပါတယ်။
ဆွေးနွေးကြသူတွေကတော့ ၂၀၀၇ ခုနှစ် သံဃာ့လှုပ်ရှားမှုကာလအတွင်း ၈၈ မျိုးဆက်ကျောင်းသားများအဖွဲ့က ထိပ်တန်း ခေါင်းဆောင်တွေ ဖမ်းဆီးခံခဲ့ရပြီးတဲ့နောက် တိမ်းရှောင်နေခဲ့ကြသူတွေဖြစ်တဲ့ ကိုထွန်းမြင့်အောင်နဲ့ ကိုစိုးထွန်း အပါအဝင် ၈၈ မျိုးဆက်ကျောင်းသား၊ ကျောင်းသူ ၁၀ ယောက် ဖြစ်ပါတယ်။
ဒေါ်အောင်ဆန်းစုကြည်က ဒီမိုကရေစီရေးလမ်းကြောင်းကိုသွားမယ်ဆိုရင် ရွေးကောက်ပွဲဆိုတာကို ဖြတ်သန်းကြရမှာ ဖြစ်တယ်၊ ၈၈ မျိုးဆက်ကျောင်းသားတွေကိုလည်း ကျောင်းသားတွေအနေနဲ့မဟုတ်ဘဲ နိုင်ငံရေးသမားတွေအနေနဲ့ ဒီမိုကရေစီဖော်ဆောင်ရေးလုပ်ငန်းတွေမှာ အားလုံး ပူးပေါင်းလက်တွဲ ပါဝင်စေချင်တယ်လို့ ပြောတာကိုလည်း ကိုစိုးထွန်းက ပြန်ပြောပါတယ်။
၈၈ မျိုးဆက်ကျောင်းသားတွေအနေနဲ့က အန်အယ်လ်ဒီနဲ့ ဒေါ်အောင်ဆန်းစုကြည်တို့သွားနေတဲ့ ရွေးကောက်ပွဲ လမ်းကြောင်းကို ကန့်ကွက်ရှုတ်ချနေတာမဟုတ်ဘဲ သူတို့ ကျောင်းသားခေါင်းဆောင်တွေ ပြန်လွတ်လာမှသာ ရွေးကောက်ပွဲမှာ ပါဝင်ရေး မပါဝင်ရေးနဲ့ ပါတီ တည်ထောင်ရေး စတာတွေကို ဆွေးနွေးဆုံးဖြတ်နိုင်ကြမှာဖြစ်တယ်လို့ ကိုစိုးထွန်းက ပြောပါတယ်။
လောလောဆယ်မှာတော့ လာမယ့်ရွေးကောက်ပွဲမှာ ၈၈ မျိုးဆက်ကျောင်းသားတွေဘက်က ကိုယ်စားလှယ် ထည့်သွင်းပြီး ပါဝင်မှာမဟုတ်ဘူးလို့ ဆိုပါတယ်။
ဒေါ်အောင်ဆန်းစုကြည်ကို ဒီမိုကရေစီရေးနဲ့ အမျိုးသား ပြန်လည်သင့်မြတ်ရေး ကြိုးပမ်းနေသူ လူထုခေါင်းဆောင်တစ်ယောက်အဖြစ် ယုံကြည်ထားတာကြောင့် ဆက်လက် အကျဉ်းကျနေကြတဲ့ ကျောင်းသားတွေရော အခု ပြန်လွတ်လာတဲ့ ကျောင်းသားတွေအားလုံးကပါ ဝန်းရံထောက်ခံသွားမယ်လို့ ပြောပါတယ်။
ရွေးကောက်ပွဲနဲ့ပတ်သက်ပြီး ပါတီ စည်းရုံးရေး၊ မဲဆန္ဒရှင်တွေကို ပညာပေးရေးလုပ်ငန်းတွေ၊ ရွေးကောက်ပွဲ စောင့်ကြည့်ရေးလုပ်ငန်းတွေမှာ အန်အယ်လ်ဒီကို ပံ့ပိုးကူညီသွားမယ်လို့လည်း ၈၈ မျိုးဆက်ကျောင်းသား ကိုစိုးထွန်းက ပြောပါတယ်။
၈၈ မျိုးဆက်ကျောင်းသားတွေ အပါအဝင် နိုင်ငံရေးအကျဉ်းသားတွေအားလုံး ပြန်လွတ်လာရေး ဒေါ်အောင်ဆန်းစုကြည်က ကြိုးပမ်းဆောင်ရွက်လိမ့်မယ်လို့ ယုံကြည်ကြောင်းနဲ့ ပြန်လွတ်လာဖို့ မျှော်လင့်ကြောင်းလည်း ကိုစိုးထွန်းက ပြောပါတယ်။
သတင်း - ဘီဘီစီ
ဓာတ်ပုံ - ၈၈ မျိုးဆက် ကျောင်းသားများ
No comments:
Post a Comment