ကလေး၊ လူကြီးများ ဝိုင်းအုံနေသော လူစုလူဝေး၏ အလယ်တွင် လူတစ်ယောက်နှင့် မျောက်တစ်ကောင် ရှိနေသည်။ ပုသိမ်ထီးလေး ဆောင်းလိုက်၊ ရှေ့ကျွမ်းနောက် ကျွမ်းထိုးပြလိုက်၊ ဇော်ဂျီတောင်ဝှေး ထမ်းလိုက်၊ အဖိုးအို တုတ်ထောက်လိုက်၊ အကြော်သည် လုပ်လိုက်၊ ရေသည်လုပ်လိုက်၊ ဘောလုံးကန်လိုက် စသဖြင့် တုတ်တစ်ဖက်၊ သံကြိုးတစ်ဖက် ကိုင်ထားသည့် မျောက်ဆရာက ညွှန်ကြားသမျှကို တစ်သဝေမတိမ်း လုပ်ဆောင်ပြနေသော မျောက်ကလေး၏ လိမ္မာသိတတ်ပုံကို တအံ့တသြ ဝိုင်းဝန်း၍ကြည့်နေကြသည်။
မျောက်ပွဲပြရာတွင် အသုံးပြုသည့် ပစ္စည်းပစ္စယများထည့်ထားသည့် ကျောပိုးအိတ်တစ်လုံးနှင့် မျောက်ဆရာ ကိုညီညီလွင်ဟူသည့် လူတစ်ယောက် ကျွေးမွေးပြုစု သွန်သင်ခိုင်းစေသည့် သခင်အလိုကျ ပွဲဝင်အသုံးတော်ခံနေသည့် ရာဇာနေဝင်းဟု အမည်ပေးထားသော မျောက်လိမ္မာလေးတစ်ကောင်၊ အမှတ်တမဲ့ကြည့်လိုက်လျှင် သူတို့နှစ်ဦးကြားဆက်သွယ်မှုက သံကြိုးတစ်ချောင်းသာ ဖြစ်သော်လည်း စေ့စေ့ငင မေးမြန်းကြည့်လိုက်တော့ နှစ်ဦးသား ဆက်နွှယ်မှုက သံကြိုးမဟုတ် သံယောဇဉ်ကြိုးသာ ဖြစ်နေသည်ကို တွေ့ရှိလိုက်ရသည်တွင် သူတို့နှစ်ဦးဘဝ၏ အခြားစာမျက်နှာများက ...
“ကျွန်တော့် ဝါသနာကိုက တိရစ္ဆာန်တွေကို ချစ်တတ်တယ်။ အထူးသဖြင့် မျောက်ကလေးတွေပေါ့။ ဘယ်နေရာမှာ မျောက်ရှိတယ်လို့ ကြားရင်ပဲ မနေနိုင်ဘူး။ သွားရှာတယ်။ ကြည့်တယ်။ သုံးလေး၊ ငါးသောင်းပေးပြီး ဝယ်တယ်။ ကိုယ့်မှာရှိတဲ့ မျောက်တွေကိုလည်း ချစ်လို့ ခင်လို့ ကောင်းကောင်းမွန်မွန် မွေးမြူမယ်ဆိုလည်း ဘယ်လောက်ပေးပေး ရောင်းပစ်လိုက်တယ်။ အသက်အရွယ်ကြီးလို့ ပွဲမထွက်သင့်တော့တဲ့ မျောက်တွေဆိုလည်း ဘေးမဲ့ပေးတာ၊ ဘုန်းကြီးကျောင်း လှူလိုက်တာမျိုး လုပ်တယ်။ သတ်စားမယ့်သူဆို ဘယ်လောက်ပေးပေး လုံးဝမရောင်းဘူး” ဟု မျောက်ဆရာ ကိုညီညီလွင်က ဆိုသည်။ ဤကဲ့သို့ဖြင့် မျောက်လောကကို ပွဲထွက်မျောက်ရှစ်ကောင်ဖြင့် ဖြတ်သန်း ကျင်လည်ခဲ့သည်က ဆယ်နှစ် ဆယ်မိုး ကြာမြင့်ခဲ့ပြီဖြစ်သည်။
သူ၏နေအိမ်တွင်လည်း ရာဇာနေဝင်း၊ Rဇာနည်၊ နေတိုး၊ မိညို၊ မိစံ၊ မိငယ်ဟု အမည်ပေးထားသည့် မျောက် ၆ ကောင် မွေးမြူထားရာ မိဘများ သားဆိုးသမီးဆိုး၊ သားကောင်း သမီးကောင်း မွေးမိသလိုပင် သူ၏ဘဝတွင်လည်း မျောက်ဆိုး မျောက်ကောင်းများကို စွန့်ပစ်ရိုးထုံးစံမရှိသော မိဘနှလုံးသားဖြင့် မျောက်များကို ကျွေးမွေးပြုစုရင်း ဖြတ်သန်းနေရသည်။
ထိုအထဲတွင်တော့ မျောက်ကလေး ရာဇာနေဝင်းက အလိမ္မာဆုံးနှင့် လုပ်ငန်းအကျွမ်းဝင်ဆုံး၊ မိသားစုနှင့် တစ်သွေးတစ်သားတည်းလို ဖြစ်နေသည်မို့ အချစ်ပိုကြသည်။ မျောက်ဆရာ ကိုညီညီလွင်၏ မိသားစုနှင့် မျောက်ကလေး ရာဇာနေဝင်းတို့ကြား ဆက်နွှယ်မှုသံယောဇဉ်ကို မေးမြန်းကြည့်ရာ ကိုညီညီလွင်က “အရင်က လီဆောင်းဦး ဆိုတဲ့ မျောက်မကြီးက မွေးပေးခဲ့တာဆိုတော့ ရာဇာ က ငယ်မွေးခြံပေါက်ပေါ့။ လူနဲ့အနေနီးပြီး ဉာဏ်ကောင်းတယ်။ ယဉ်ပါးတယ်။ လူချစ်လူခင်ပေါတယ်။ သူကလည်း ကျွန်တော့်မိသားစု အပါအဝင် ရပ်ကွက်ထဲက လူတွေနဲ့ခင်တယ်။ သူ့အမေမရှိတော့လို့ နှစ်လသားကတည်းက နို့တိုက်မွေးခဲ့ရတာမို့ ကိုယ့်သားသမီးလိုပဲ သံယောဇဉ်ဖြစ်ရတယ်။ ရာဇာနဲ့ ပတ်သက်ပြီး မှတ်မှတ်ရရပြောရရင် သူလသားအရွယ်က ဝယ်သူလည်းရှိ မိသားစုအရေးကလည်း အဆင်မပြေတာမို့ သုံးသောင်းနဲ့ ရောင်းလိုက်ဖူးတယ်။ နောက်ပိုင်း သူ့စိတ်နဲ့ပဲ မနေနိုင်လို့မရမက ရှာကြံပြီး တစ်သိန်းနဲ့ ပြန်ဝယ်မွေးထားရတယ်။ တကယ့် ကိုယ့်ကလေးလိုပါ ပဲ” ဟုဆိုရာ မျောက်နှင့်လူအကြား သံယောဇဉ်ကြိုးက တင်းလွန်းလှပါတကား ....။
နို့စို့ကလေး အပါအဝင် အရွယ်ငယ်၊ အရွယ်ရောက်ကလေး ခြောက်ယောက်နှင့် မိဘနှစ်ပါး အပါအဝင် မိသားစုဝင်ရှစ်ယောက်၏ ထမင်းအိုးကို မျောက်ကလေး ရာဇာနေဝင်းက ဖြည့်ဆည်းပေးနေရရာ “ကျွန်တော် အမှန်တိုင်းပြောရရင် မျောက်ပွဲလည် ကတာ၊ ရာဇာရှာပေးတာ တစ်နေ့ကို တစ်သောင်းခွဲနဲ့ သုံးသောင်းကြားရတယ်။ ဒီမိသားစု စားအိုးကြီးကို သူက ဖြည့်ပေးနေတာ။ ဒါ့အပြင် တခြားမျောက်တွေစားဖို့လည်း သူက ရှာကျွေးနေတာ။ တခြားမျောက်တွေက အစုံစားပေမယ့် ရာဇာကတော့ ထမင်းဖြူပဲ အဓိကစားတယ်။ ရာသီဥတု မကောင်းလို့၊ မျောက် နေမကောင်းလို့ ပွဲမထွက်နိုင်ရင် တစ်အိမ်လုံးစားဝတ်နေရေး အခက်ကြုံတာ ပဲ” ဟု သိရရာ မျောက်ကလေး ရာဇာနေဝင်း၏ အိမ်စားဝတ်နေရေး ဖြည့်စွမ်းပေးပုံကို သိရသည်။
ရင်ခွင်ထဲမှကလေးကို နို့တိုက်ရင်း ကွပ်ပျစ်ခြေရင်းမြေပြင်တွင် ကျွမ်းပစ်နေသော ရာဇာကိုကြည့်ရင်း နို့စို့ကလေးကို ထိုးပြကာ “နောက် ဆုံးမွေးတဲ့ အမွှာနှစ်ယောက်နဲ့ ရာဇာ က အတူမွေးကြတာ။ အခုဆိုအားလုံး ၁ နှစ်နဲ့ ၄ လရှိပြီ။ ကလေး အမွှာပူးမွေးတယ်ဆိုပေမယ့် သူ့လည်း အတူတူစောင့်ရှောက်ရတာဆိုတော့ သုံးမွှာပူးမွှေးရတဲ့အတိုင်း ပြုစုခဲ့ရတာ။ အိမ်က ကလေးငယ်တွေနဲ့ အတူဆော့၊ အတူစား၊ အတူတူသွား လာနေတာကြောင့် ကိုယ့်သားသမီး အရင်းလိုပါပဲ” ဟု ကိုညီညီလွင်၏ ဇနီးမဥမ္မာလွင်ကဆိုရာ ဖြစ်နိုင်လျှင် မျောက်ကို အိမ်ထောင်စုဇယားမှာ စာရင်းတို့ထားတော့ မယောင်ပင်။
ဆက်လက်၍ မဥမ္မာလွင်ကပင် “အခုလောလောဆယ်မှာ ရာဇာကအိမ်ရဲ့ထမင်းအိုးပဲ။ သူ ပွဲမထွက်ရင် ရှာရဖွေရတော့တာပဲ။ လူချစ်လူခင်များပြီး လိမ္မာသလို ငွေရှာလည်းကောင်းတယ်လို့ ပြောရမယ်။ လွန်ခဲ့တဲ့ ၁၅ ရက်ကပဲ နွားမကြီးနဲ့ နွားကလေးတစ်ကောင်ကို သုံးသိန်းခွဲနဲ့ ဝယ်နိုင်ခဲ့တယ်။ သူရှာပေးတဲ့ပိုက်ဆံပဲ။ ကလေးတွေ ကျောင်းစရိတ်လည်း သူပဲ။ ကျေးဇူးရှင်ပါပဲ” ဟု ပြောရာ အာဂမျောက်ပါလားဟု တွေးမိသည်။
မိသားစုအရေးအတွက် ဘဝကို မျောက်ကလေးများနှင့် ရင်ဆိုင်ဖြတ်သန်းနေရသော မျောက်ဆရာမိသားစုမှာ မျောက်ပြဆန်တောင်းသူ၊ တိရစ္ဆာန် ညှင်းဆဲသူဟူသော ဝေဖန်ကဲ့ရဲ့သံများကို သည်းခံရင်းမိမိတို့၏ ထမင်းအိုးနှင့် စားဝတ်နေရေးကို ကြံဖန်ဖြည့်တင်း၍ နေကြရသည်။
နှစ်ပေါင်းများစွာ၊ မျောက်ပေါင်းများစွာကို ကျွေးမွေးပြုစုသွန်သင်ရင်း တစ်ချိန်တွင် မျောက်ကောင်ရေများစွာဖြင့် ရုံပွဲပြရန် ကြံစည်ကြိုးစားနေသော မျောက်ဆရာ၏ အိမ်မက်ထဲက မျောက်သဘင်ဆင်ယင် ကျင်းပချိန်ကိုကား ဘယ်အခါတွင် ကြည့်ရလိမ့်မည် မသိ။
Eleven Media Group မှ ပြန်လည်ကူးယူ ဖော်ပြပါတယ်။
No comments:
Post a Comment