၂၀၁၄ ခုနှစ် ကမ္ဘာ့ဖလား၊ အာရှဇုန် ဒုတိယ အဆင့် ခြေစစ်ပွဲ ဒုတိယ အကျော့အဖြစ် မြန်မာအသင်းနဲ့ အိုမန်နိုင်ငံအသင်းတို့ ရန်ကုန် သုဝဏ္ဏ အားကစားကွင်းမှာ ဒီကနေ့ ယှဉ်ပြိုင်ကစားကြရာ ပထမပိုင်း ပွဲစလို့ နာရီဝက်မှာပဲ ပရိတ်သတ်ကို ထိန်းမရလို့ ပွဲရပ်လိုက်ရပါတယ်။
ညနေ ၃နာရီခွဲမှာ အိုမန်နဲ့ မြန်မာကန်တဲ့ ဘောလုံးပွဲစလို့ ပထမပိုင်း ၁၅ မိနစ်လောက်မှာ အိုမန်က ဗွေဆော်ဦးဂိုးသွင်းပြီး၊ နောက် ၁၅ မိနစ်အကြာမှာ ပယ်နယ်တီရလို့ ဒုတိယဂိုး ထပ်သွင်းပြီးတဲ့နောက်မှာ မြန်မာပရိသတ်က ရေသန့်ဗူးတွေ၊ ဖိနပ်တွေ၊ ခဲတွေနဲ့ပေါက်လို့ လုံခြုံရေး အဖွဲ့တွေ ထိန်းမနိုင်တော့တာကြောင့် ပွဲစဉ်ကို ရပ်နားလိုက်ရတာ ဖြစ်ပါတယ်။
ဆူပူနေတဲ့အချိန်မှာပဲ ဘောလုံးပွဲကြည့်နေတဲ့ ပရိတ်သတ်တဦးကို ဘီဘီစီက ဆက်သွယ်မေးကြည့်တော့ သူက အခုလို ရှင်းပြပါတယ်။
“နောက်ပိုင်းမှာ ပွဲက ကြမ်းလာပြီးတော့ ပရိတ်သတ်က ရေသန့်ဗူးတွေ ဘာညာ စပေါက်တာ လုပ်တယ်ဗျာ။ နည်းပြတွေ ဘာတွေက ကွင်းလယ်ကို ဝင်ပြေးတယ်။ ဝင်ပြေးတော့ ပရိတ်သတ်က ပိုပြီးတော့ ဆူလာပြီးတော့ ရဲလုံခြုံရေး တိုးချတယ်။ ၁၅၀ နောက်ပြီးတော့ ၃၀ဝ နောက်ဆုံးတော့ ၅၀ဝ အထိ တိုးချတယ်ဗျာ။ ပိုဆိုးသွားတယ်ဗျာ။ ဖြစ်တာက ပရိသတ်က ရဲတွေကိုပါ ပစ်တာ။ ဖိနပ်တွေနဲ့ ပစ်တယ်။
အဲ့ဒါမျိုးတွေလုပ်လာတော့ ဒီမြန်မာနိုင်ငံ ဘောလုံးအဖွဲ့ချုပ်က ဦးဇော်ဇော်နဲ့ တိုင်းရဲမှူးကြီး အောင်သန်းတို့ကနေ ပရိသတ်ကို ကားနဲ့လိုက်ပြီးတော့ဗျာ ဒီလိုမျိုး မလုပ်ပါနဲ့ဆိုပြီး လိုက်တောင်းပန်တယ်။ အဲ့လိုတောင်းပန်လေ ပိုဆိုးလေဖြစ်သွားတယ်။ ပရိတ်သတ်က အခုဖြစ်တာကတော့ဗျာ တဖက် ဘောလုံးအသင်းကို တိုက်ခိုက်တာမျိုး မဟုတ်ဘူးဗျ။ လုံခြုံရေးတွေတိုးချတော့ လုံခြုံရေးတွေကို ပြဿနာရှာတာပေါ့ဗျာ။ မကျေမနပ် ပုံစံမျိုးတွေဖြစ်တယ်”
နောက်ဆုံး ရဲကားအစီး ၂၀ ကျော်နဲ့ လူနာတင်ကားတွေ ရောက်လာတာတောင် ပရိသတ်က အော်ဟစ်ပြီး တွေ့ရာတွေနဲ့ ပစ်ပေါက်ကြတယ်လို့ ပြောပါတယ်။
ဒီကနေ့ ပွဲကိုလာကြည့်တဲ့ ပရိတ်သတ်ဟာ ကွင်း လေးဖက်လေးတန်မှာ ပြည့်ကျပ်နေတဲ့အတွက် တသိန်းဝန်းကျင်လောက် ရှိမယ်လို့ သိရပါတယ်။
မြန်မာဘောလုံးအသင်းရဲ့ တာဝန်ရှိသူတွေကို ဘီဘီစီက ဆက်သွယ်ကြည့်တော့ ပရိသတ်ကို ထိန်းမနိုင်လို့ ရပ်နားထားလိုက်ကြောင်းလောက်ပဲ ဖြေကြားပေးခဲ့ပါတယ်။
ခုလိုဖြစ်ရတာ ဘယ်လိုအကြောင်းတွေကြောင့်လဲ၊ မြန်မာဘောလုံးအသင်းအနေနဲ့ ဒေသတွင်း နိုင်ငံတွေမှာတောင် အောင်မြင်မှုမရဘဲ ဘာ့ကြောင့် ဒီလို ကမ္ဘာ့ဖလား ခြေစစ်ပွဲကို ဝင်ပြိုင်ရလဲလို့ စည်းကမ်းထိန်းသိမ်းရေး အဖွဲ့ဝင်လည်းဖြစ် အားကစား ကလောင်ရှင်လည်းဖြစ်တဲ့ ဆရာ ခင်မောင်ထွေးက အခုလို ရှင်းပြပါတယ်။
“အခုဟာက ဒီနေ့ဖြစ်တာက ကျနော်တို့အသင်းနဲ့လည်း လုံးဝ မဆိုင်ဘူးလေနော်။ ဘောလုံးသမားတွေ ကြမ်းတာ ရမ်းတာကြောင့် မဟုတ်ဘူးဗျ။ ဒါက ဖီဖာပွဲတွေဗျာ။ ဖီဖာက ဘယ်လို အရေးယူမလဲဆိုတာ ကျနော်တို့ စောင့်ကြည့်ရလိမ့်မယ်။ ကျနော်တို့ ဖီဖာမန်ဘာရှစ် ကန်တဲ့ဟာက ဖီဖာက လုပ်တဲ့ အဲ့ဒီ ဝေါလ်ကပ် ကွာလီဖိုင်းရားတို့ ဖီဖာက လုပ်တဲ့ပွဲတွေ အိုလံပစ်ပေါ့ဗျာနော့် နိုင်ငံတကာပွဲတွေမှာ သူ့သက်ဆိုင်ရာ နိုင်ငံတွေက ဝင်ပြိုင်ပေးရတယ်။ အဲ့ဒါကြောင့် ပြိုင်တာပါ။ ရှုံးမယ်မှန်းတော့ သိတာပေါ့ဗျာ၊ ဘယ်နိုင်မလဲ။ အများကြီးလုပ်ရမှာ။ လုပ်ရမှာတော့ မပြောနဲ့။ ဒီအမည်းကွက်ကြီးက ဘယ်လို ဖျောက်ကြမလဲဆိုတာက စောင့်ကြည့်ရမှာပေါ့နော်။ အားလုံးပြုပြင်ရမှာပါ”
မြန်မာအသင်းဟာ အိုမန်အသင်းကို ပထမ အကျော့အဖြစ် အိုမန်ကွင်းမှာ ဇူလိုင် ၂၃ ရက်က ကစားစဉ်တုန်းကလည်း ၂ ဂိုး၊ ဂိုးမရှိနဲ့ ရှုံးခဲ့ပါတယ်။
ဒီပွဲမှာတော့ အရင် မြန်မာအသင်းရဲ့ နည်းပြချုပ်အသစ် ဆားဘီးယားလူမျိုး မီလန်ဇီဗာဒီနိုဗစ်က နုတ်ထွက်ပြီး မြန်မာနည်းပြ ဦးဆန်းဝင်း က ကိုင်တွယ်ခဲ့တယ်လို့ သိရပါတယ်။
အခုပွဲစဉ်မှာ အနိုင်ရမယ့်အသင်းကတော့ အာရှ ထိပ်သီးအသင်းတွေဖြစ်တဲ့ ဂျပန်၊ သြစတြေးလျ၊ တောင်ကိုရီးယား၊ ဘာရိန်း၊ မြောက်ကိုရီးယား အသင်းတွေပါဝင်မယ့် အုပ်စုအဆင့် ခြေစစ်ပွဲသို့ တက်လှမ်းနိုင်မှာဖြစ်တယ်လို့ သိရပါတယ်။
သတင်း - ဘီဘီစီ
Photos: AP, Reuters
No comments:
Post a Comment