ဒီနေ့ဖတ်စရာ သတင်းများ (မေလ ၃၀ ရက်)

- နယ်ခြားစောင့် လက်ခံတဲ့ DKBA ဌာနချုပ် သိမ်းပိုက်ခံရ
- အစာငတ်ခံ ဆန္ဒပြခဲ့သူတွေကို ပြစ်ဒဏ်တိုက် ပြန်ပို့
- နေတိုးတပ်ဖွဲ့ လေကြောင်းတိုက်ခိုက်မှု အာဖဂန် အရပ်သား ၁၄ ဦးသေဆုံး
- ဒုတိယအကြိမ် ပင်လုံညီလာခံအတွက် ပြင်ဆင်မှုတွေ စတင်
- ဝန်ကြီးတွေ လုံခြုံရေးကြောင့် ရပ်ရွာလုံခြုံရေး လျော့ကျ
- ကလေးထောင်တွင် သံဃာ့ခေါင်းဆောင် အရှင်ဂမ္ဘီရအပါအဝင် နိုင်ငံရေးအကျဉ်းသားများ ဆန္ဒပြ
- ဖွံ့ဖြိုးရေးစီမံကိန်းနှင့် ရင်းနှီးမြှုပ်နှံမှုများကို ဆန့်ကျင်ကြောင်း ကရင်နှီးနှောဖလှယ်ပွဲမှ ဆွေးနွေးဆုံးဖြတ်ခဲ့
- ကာတာနိုင်ငံသား ဘင်ဟာမန် FIFA ဥက္ကဋ္ဌလောင်း အဆိုပြုချက် ရုပ်သိမ်း

နယ်ခြားစောင့် လက်ခံတဲ့ DKBA ဌာနချုပ် သိမ်းပိုက်ခံရ

By မအေးအေးမာ တနင်္ဂနွေ, 29 မေ 2011 - VOA

နယ်ခြားစောင့်တပ် ဖွဲ့စည်းရေးကို လက်မခံတဲ့ ဗိုလ်ချုပ် နှုတ်ခမ်းမွေး ဦးဆောင်တဲ့ DKBA တပ်ဖွဲ့တွေ၊ ကရင်အမျိုးသား လွတ်မြောက်ရေး ပူးပေါင်းတပ်တွေ အင်အား ၆၀၀ ကျော်လောက်ဟာ ကရင်ပြည်နယ် လှိုင်းဘွဲ့မြို့နယ်ထဲက မြိုင်ကြီးငူမှာရှိတဲ့ DKBA ဌာနချုပ်ဟောင်း နေရာတခုလုံးကို ပြီးခဲ့တဲ့ရက်ပိုင်းမှာ ထိန်းချုပ်ထားလိုက်ပြီးနောက် ကရင်ပြည်နယ်အတွင်းမှာ မြန်မာအစိုးရ တပ်တွေနဲ့ တိုက်ပွဲတွေ ဆက်ဖြစ်နေပါတယ်။ အပြည့်အစုံကို ဗွီအိုအေ ထိုင်းအခြေစိုက် သတင်းထောက် မအေးအေးမာက တင်ပြပေးထားပါတယ်။

မြန်မာအစိုးရရဲ့ နယ်ခြားစောင့်တပ် လုပ်ခိုင်းတာကို မကျေနပ်တာကစပြီး ကရင်ပြည်နယ် တခုလုံးမှာ တိုက်ပွဲသံတွေ ကြားနေရတာ ၇ လခန့်ရှိပြီလို့ ဆိုရမှာပါ။ အခုအခါမှာတော့ အရင်တုန်းက ကရင်အမျိုးသား အချင်းချင်း တိုက်ခိုက်နေတဲ့ အဖွဲ့တွေဖြစ်တဲ့ DKBA၊ KNU နယ်ခြားစောင့်တပ်တွဟာ အတူတကွ မြိုင်ကြီးငူဒေသမှာ ပူးပေါင်း တပ်စွဲလိုက်ပြီလို့ ဆိုပါတယ်။ DKBA ၉၀၂ တပ်မှူး ဗိုလ်မှူး စောဆန်းအောင် ပြောပြတာကတော့…

“ကျနော်တို့ ဗိုလ်ချုပ် နှုတ်ခမ်းမွေးက တပ်ရင်းတရင်း၊ လက်ရှိ တပ်မဟာ ၇ ဗိုလ်ချုပ် ဂျော်နီက တပ်ရင်းတရင်း၊ နောက် ဗိုလ်ဘိရဲ့ အင်အား ၄၀၀ ကျော်ရှိတယ်၊ စုစုပေါင်းဆိုရင် ၆၀၀ ကျော်မှာရှိတယ်။ မြိုင်ကြီးငူမှာ လက်ရှိ ကျနော်တို့ ဗိုလ်ဘိနဲ့ ဗိုလ်ချုပ် နှုတ်ခမ်းမွေးတပ်နဲ့ ဗိုလ်ချုပ် ဂျော်နီရဲ့ ရဲဘော်ရဲတွေ ပူးပေါင်းပြီးတော့ မြိုင်ကြီးငူဒေသကို ခြေကုတ်ထိုင်ထားတယ်။ မြိုင်ကြီးငူရဲ့ အရှေ့ဘက်ခြမ်း ဘားအံနားမှာ တပ်တွေ အမြောက်အမြား ဖြန့်ထားတယ်။”

ကရင်အမျိုးသား လွတ်မြောက်ရေးတပ် အောက်ခြေတပ်တွေဘက်ကတော့ DKBA နဲ့ စစ်ရေးအရ ပူးပေါင်း တိုက်ခိုက်မှုတွေ ရှိတယ်ဆိုတာ အတည်ပြု ပြောကြားပါတယ်။

ပြီးခဲ့တဲ့ ရက်တွေကပဲ DKBA စစ်ဦးစီးချုပ် ဗိုလ်ချုပ် ကျော်သန်းကို နယ်ခြားစောင့်တပ်တွေကပဲ ဖမ်းဆီးခဲ့တယ်လို့ ဗွီအိုအေက ထုတ်လွှင့်ခဲ့ပြီး ဖြစ်ပါတယ်။ အခုအခါမှာ ဗိုလ်ချုပ် ကျော်သန်း ထွက်ပြေး လွတ်မြောက်သွားခဲ့ကြောင်း၊ ဘားအံမှာရှိတဲ့ မြန်မာစစ်တပ်ကို အကူအညီ သွားတောင်းတာတွေ လုပ်နေကြောင်း DKBA ဘက်က ပြောပါတယ်။

“ဗိုလ်ချုပ် ကျော်သန်း ထွက်ပြေး လွတ်မြောက်သွားပြီး ဘားအံမှာ စစ်ကူသွားတောင်းတယ်။ အဲဒီ မြိုင်ကြီးငူ ဒေသကို ၀င်ရောက် ထိုးဖောက် တိုက်ခိုက်ဖို့အတွက် နအဖ တပ်မတော်ကို စစ်ကူသွားတောင်းတယ်။ ဗိုလ်ချုပ် ထွန်းနိုင်ကို ပြန်ဖမ်းမိတယ်၊ နယ်စပ်တနေရာမှာ ထိန်းသိမ်းထားတယ်။”

မြန်မာအစိုးရနဲ့ အပစ်အခတ် ရပ်စဲရေး ရယူပြီး ၁၅ နှစ်အကြာ ပြီးခဲ့တဲ့နှစ်ကုန်မှာ နယ်ခြားစောင့်တပ် လုပ်ခိုင်းရာကစလို့ တိုးတက်သော ကရင်ဗုဒ္ဓဘာသာ တပ်တွေနဲ့ မြန်မာအစိုးရကြား တင်းမာမှုတွေ ဖြစ်ခဲ့တာပါ။ ၇ လကြာတဲ့အထိ တိုက်ပွဲတွေ ဆက်တိုက်ဖြစ်ခဲ့တာကြောင့် ဒုက္ခသည် သောင်းနဲ့ချီပြီး ထိုင်းနိုင်ငံထဲကို ခိုလှုံလာရတာတွေလည်း ဖြစ်ခဲ့ရပါတယ်။

အခုအခါမှာတော့ ထိုင်း၊ မြန်မာနယ်စပ် ကရင်ပြည်နယ် ကော့ကရိတ်၊ ကနဲလေး၊ ၀ါလေ၊ သေဘောဘိုး၊ ခီးသဲလယ် စတဲ့နေရာတွေမှာ တိုက်ပွဲတွေ ၄ ပွဲထက်မနည်း မနေ့ညနေနဲ့ ဒီနေ့မနက်မှာ ဖြစ်ခဲ့ပါတယ်။ ကော့ကရိတ်က အစိုးရစစ်တပ် တပ်စွဲရာ ကော့ကရိတ် ချက်ပွိုင့်ကို ၀င်ရောက် ပစ်ခတ်မှုတွေ လုပ်ခဲ့တယ်ဆိုပြီး DKBA က ပြောပါတယ်။

“ဒီနေ့ညနေ ၄ နာရီ ၃၅ မိနစ်မှာ ကော့ကရိတ်ချက်ပွိုင့်၊ ကော့ကရိတ်နဲ့ အောက်ဘိုတဲအကြား စခန်းကို ကျနော်တို့ ၀င်ရောက်တိုက်ခိုက်တယ်။ သူ့တပ်ရင်းကတော့ ခလရ ၅၄၈ တပ်ရင်း။”

ဝါလေနဲ့ သေဘောဘိုး စတဲ့နေရာတွေမှာ ဖြစ်ပွားခဲ့တဲ့ တိုက်ပွဲတွေနဲ့ ပတ်သက်ပြီး ဒေသခံတဦး ပြောပြတာကတော့…

“မနေ့ညနေက ၅ နာရီခွဲလောက်ပေါ့၊ သူတို့ ရင်ဆိုင်တိုက်ပွဲ ဖြစ်ပွားတယ်။ DKBA နဲ့ ခလရ ၃၂၁ ပေါ့၊ နအဖဘက်က အရာခံဗိုလ်တယောက် ဆုံးသွားတယ်၊ ၄ ယောက်တော့ ဒဏ်ရာရတယ်။”

အခုအခါမှာတော့ နယ်ခြားစောင့်တပ်အဖြစ် လက်ခံခဲ့တဲ့ တပ်တွေက သူတို့တပ်မှူးတွေကို ပြန်လည်ပုန်ကန်တဲ့ အနေနဲ့ ဖမ်းဆီးမှုတွေ လုပ်လာခဲ့ပါတယ်။ ဒီလို ဘာကြောင့် လုပ်လာရသလဲ ဆိုတာကတော့ နယ်ခြားစောင့်တပ် ဖွဲ့စည်းရေးကို အောက်ခြေဆန္ဒ မပါဘဲ ခေါင်းဆောင်ပိုင်းက သဘောတူ လက်ခံလာကြတာတွေကနေ တင်းမာမှုတွေ စခဲ့ကြတာပါ။

အရင်က ကရင်တော်လှန်ရေးမှာ ပါခဲ့ကြတဲ့ DKBA ခေါင်းဆောင်တချို့ကို အသက် ၅၀ ကျော်တယ်ဆိုပြီး အနားယူခိုင်းလိုက်တာတွေ၊ အာဏာရ နယ်ခြားစောင့် အဖွဲ့တွေက အနားယူခိုင်းလိုက်တဲ့ ကရင်ခေါင်းဆောင်တွေ ပိုင်ဆိုင်တဲ့ အိမ်တွေ ပစ္စည်းတွေကို သွားရောက် သိမ်းယူတဲ့ အဖြစ်တွေ၊ နယ်ခြားစောင့်တပ်ကို လက်ခံတဲ့ ခေါင်းဆောင်ပိုင်းတွေ အနေနဲ့ စီးပွားရေး အခွင့်အလမ်းတွေ ရရှိပြီး အထက်နဲ့ အောက်ခြေ ကွာဟမှုတွေလည်း ဖြစ်ခဲ့ရပါတယ်။ အောက်ခြေတပ်တွေကတော့ နယ်ခြားစောင့် တပ်စခန်းတွေကို ဆောက်လုပ်ပြီး မြန်မာစစ်တပ်နဲ့ တွဲပြီးထားမယ့် အခြေအနေတွေကို လက်မခံလိုသူတွေလည်း တဖြည်းဖြည်း များလာနေပါတယ်။

DKBA တပ်သားတွေကြား သဘောထား ကွဲလွဲမှုတွေ ရှိလာခဲ့ပြီး အခုအခါမှာတော့ နယ်ခြားစောင့်တပ်ကို လက်မခံတဲ့ ကရင်လက်နက်ကိုင် အင်အားစုတွေဖြစ်တဲ့ KNU နဲ့ ဗိုလ်ချုပ် နှုတ်ခမ်းမွေး ဦးဆောင်တဲ့ DKBA အပြင် နယ်ခြားစောင့်တပ်အဖြစ် လက်ခံခဲ့တဲ့ ဗိုလ်ဘိ ဦးဆောင်တဲ့ DKBA တွေဟာ အချင်းချင်း ပူပေါင်းသွားကြပြီး စစ်ရေးအရ ပူးပေါင်းဆောင်ရွက်ဖို့အတွက် သဘောတူလာခဲ့ကြတာလည်း ဖြစ်ပါတယ်။

အစာငတ်ခံ ဆန္ဒပြခဲ့သူတွေကို ပြစ်ဒဏ်တိုက် ပြန်ပို့

By မအေးအေးမာ စနေ, 28 မေ 2011 - VOA

အင်းစိန်ထောင်ထဲမှာ နိုင်ငံရေး အကျဉ်းသားတွေ အစာငတ်ခံ ဆန္ဒပြနေကြတဲ့ဆီကို နေပြည်တော်က စုံစမ်း စစ်ဆေးရေးအဖွဲ့ ရောက်လာခဲ့ပါတယ်။ အဲဒီနောက်မှာတော့ မေလ ၂၈ ရက်ကစပြီး ဆန္ဒပြ နိုင်ငံရေး အကျဉ်းသားတွေရဲ့ ထောင်ဝင်စာ တွေ့ခွင့်နဲ့ ပါဆယ်ပေးခွင့်ကို အကန့်အသတ်မရှိ ပိတ်ပင်လိုက်ရုံမက ဆန္ဒပြသူတွေကိုလည်း တိုက်ပိတ်ထားလိုက်တယ်လို့ ဆိုပါတယ်။

အင်းစိန်နဲ့ တပြိုင်တည်း ကလေးမြို့က အကျဉ်းထောင်မှာလည်း အကျဉ်းသား အခွင့်အရေး တောင်းဆိုနေတဲ့ အရှင် ဂမ္ဘီရကို ထောင်ဝင်စာတွေ့ခွင့် ပိတ်ထားကြောင်း မိသားစုက ပြောပါတယ်။ အပြည့်အစုံကို ဗွီအိုအေ ထိုင်းအခြေစိုက် သတင်းထောက် မအေးအေးမာက တင်ပြပေးထားပါတယ်။

အကျဉ်းသားတွေရဲ့ ရပိုင်ခွင့် အခွင့်အရေး ၆ ချက်ကို တောင်းဆိုပြီး အစာငတ်ခံ ဆန္ဒပြခဲ့တဲ့ အင်းစိန် အကျဉ်းထောင်က နိုင်ငံရေး အကျဉ်းသားတွေကို ထောင်ဝင်စာ တွေ့ခွင့်နဲ့ ပါဆယ်ပေးခွင့်တွေကို အကန့်အသတ်မရှိ ပိတ်ပင်လိုက်ကြောင်း နိုင်ငံရေး အကျဉ်းသား အကျိုးဆောင်ကွန်ရက်က ကိုအောင်ထွန်းဇော်က အခုလို ပြောပြပါတယ်။

“အစာငတ်ခံ တိုက်ပွဲဝင်နေတဲ့ အထဲမှာ ပါဝင်တဲ့ နိုင်ငံရေးအကျဉ်းသား မိသားစု ၂ စုက ဒီနေ့ နေ့ခင်း ၁ နာရီလောက်မှာ သွားတွေ့တယ်။ သွားတွေ့တော့ အရှေ့မှာရှိတဲ့ ထောင်ဝင်စာ တာဝန်ခံ ဒု-ထောင်မှူး အဆင့်ကနေပြီးတော့ ထောင်ဝင်စာ လာတွေ့တာနဲ့ တပြိုင်တည်း ဘယ်သူ့ကို လာတွေ့တာလဲဆိုတဲ့ နာမည်မေးပြီးတာနဲ့ သူတို့လက်ထဲမှာ အသင့်ကိုင်ထားတဲ့ နာမည်ရေးထားတဲ့ စာရွက်လေးနဲ့ တိုက်ကြည့်ပြီးတော့ ဒီလူ ဒီလူဆိုရင်တော့ တွေ့ခွင့်မရနိုင်ဘူး ဆိုပြီးတော့ သူက ပြောတယ်။ ပါဆယ်လည်း မပေးရဘူး၊ ထောင်ဝင်စာလည်း တွေ့ခွင့်ပိတ်ထားတယ်လို့ အကြောင်းပြန်လိုက်တယ်။

“အဲဒီအခါကျတော့ ထောင်ဝင်စာ သွားတွေ့တဲ့ အစာငတ်ခံ ဆန္ဒပြတဲ့ အထဲမှာ ပါနေတဲ့ နိုင်ငံရေး အကျဉ်းသားရဲ့ မိသားစုက အိမ်က လူတွေကို ဘာလို့ တွေ့ခွင့်မပေးတာလဲ၊ ဘယ်လို အကြောင်းပြချက်များ ရှိသလဲလို့ မေးတဲ့အခါ ဒု-ထောင်မှူးက လုံခြုံရေး အခြေအနေအရ ပြောပြလို့ မဖြစ်နိုင်ပါဘူးလို့ အကြောင်းပြန်တယ်။ အဲဒီတော့ မိသားစုက ထပ်မေးတယ်၊ အချိန်ကာလ ဘယ်လောက်အထိ ထောင်ဝင်စာ ပိတ်ထားသလဲ၊ ပါဆယ်ပိတ်ထားသလဲလို့ မေးတော့ သူတို့က အဲဒါကိုလည်း အတိအကျ မပြောနိုင်ဘူး၊ နောက်တပတ်မှာ ပြန်ပြီး လာစုံစမ်းပါဆိုပြီး ပြောလိုက်တယ်။

“အစာငတ်ခံ ဆန္ဒပြမှုမှာ ပါတဲ့ နိုင်ငံရေး အကျဉ်းသား အားလုံးကို ၅ ဆောင် တိုက် ၁၊ ၂ ထဲမှာ ထည့်ပြီးတော့ တိုက်ပိတ်ထားတယ်လို့ ကြားသိရတယ်။”

မေလ ၂၈ ရက်ကစပြီး ထောင်ဝင်စာတွေ့ခွင့် ပိတ်ခံထားရသူတွေထဲမှာ နိုင်ငံရေး အကျဉ်းသား ၃၀ ခန့် ပါဝင်တယ်လို့လည်း မိသားစုတွေထံက သိရပါတယ်။ ဒီလိုပိတ်ပင်လိုက်တာကတော့ မေလ ၂၇ ရက်နေ့ မနက်ပိုင်းမှာ နေပြည်တော်က ဆင်းလာတဲ့ စုံစမ်း စစ်ဆေးရေး အဖွဲ့ကို နိုင်ငံရေး အကျဉ်းသားတွေက ဆန္ဒပြ ကြွေးကြော်မှုတွေ လုပ်ရာကနေ တင်းမာမှုတွေ ဖြစ်ခဲ့ရတာလို့ ဆိုရမှာပါ။

နိုင်ငံရေး အကျဉ်းသားတွေဟာ စာဖတ်ခွင့်၊ မိသားစုနဲ့ လွတ်လပ်စွာ တွေ့ဆုံခွင့်၊ ဆက်သွယ်ခွင့် အပါအ၀င် အကျဉ်းသားတွေရဲ့ အခြေခံ ရပိုင်ခွင့်တွေကိုပဲ တောင်းဆိုခဲ့တာပါ။

ကလေး အကျဉ်းထောင်ထဲမှာ ထောင်ဒဏ် ၆၃ နှစ် ကျခံနေရတဲ့ စက်တင်ဘာ သံဃာ့လှုပ်ရှားမှုက ဦးဆောင်သံဃာတပါး ဖြစ်တဲ့ ဦးဂမ္ဘီရကလည်း အကျဉ်းသား အခွင့်အရေးတွေကို ပေးဖို့ အစိုးရကို တောင်းဆိုထားတဲ့စာ ထုတ်ခဲ့တဲ့အတွက် မေလ ၂၇ ရက်နေ့က မိသားစု တွေ့ချိန်မှာ ထောင်ဝင်စာတွေ့ခွင့် ပိတ်ထားလိုက်ပါတယ်။ အမတော်စပ်သူ မခင်သူဌေး ပြောပြခဲ့တာကတော့…

“ဂိတ်စောင့်တဲ့ကောင်လေးက သိနေတာပေါ့၊ အမ တွေ့လို့ရမယ် မထင်ဘူးတဲ့၊ အဲဒီလို ပြောတာ။ အရင်တပတ်က ဦးဇင်း တောင်းဆိုတဲ့စာ ထုတ်တဲ့ကိစ္စနဲ့ ပတ်သက်ပြီး တွေ့လို့ရမယ် မထင်ဘူးတဲ့။ အဲဒီလိုကျတော့ ငါ မပြန်နိုင်ဘူးလို့၊ သွားပြီးတော့ တွေ့ခွင့်တင်ပေးဆိုတော့ အမဆန္ဒအရ သွားပါမယ်ဆိုပြီး သူက အထဲကို ပြန်ဝင်သွားတယ်။ သွားပြီး ထောင်မှူးတွေဆီမှာ ကျမပေးတဲ့အကြောင်းကို တင်ပြပြီး ၁၅ မိနစ်လောက်ကြတော့ ပြန်ထွက်လာတယ်၊ မရဘူး အမတဲ့၊ နောက် နယ်မြေခံရဲနဲ့ SB တယောက် ၀င်လာပြီးတော့ ဒီနေ့ ဦးဇင်းတို့ ဆန္ဒပြမယ်ကြားလို့ သတင်းလာယူတာပေါ့၊ အဲဒီလို ပြောတယ်။ ပြီးရင် SB တွေလည်း ရောက်လာမယ်လို့ ပြောတယ်။”

ထောင်ဝင်စာတွေ့ခွင့် မရတာကြောင့် ပါဆယ်ပေးဖို့အတွက် ကြိုးစားခဲ့ရာမှာ အစားအသောက်တွေကို လက်ခံခြင်း မရှိတာ တွေ့ရတယ်လို့လည်း မခင်သူဌေးက ပြောပြပါတယ်။

“စာအုပ်စာရင်းတွေတော့ လက်ခံထားတယ်။ အစားအသောက်တွေတော့ လက်ခံထားတာ မတွေ့ရဘူး။ လက်မှတ်လည်း ထိုးထားတယ်။ လက်မှတ်က ဦးဇင်း ထိုးနေကျ လက်မှတ်မဟုတ်ဘဲ အမည်ပဲ ရေးထားတာပေါ့။ အစားအသောက်ကတော့ လက်ခံထားတာ မတွေ့ရဘူး။”

ပြီးခဲ့တဲ့ မေလ ၁၄ ရက်နေ့က ထောင်ဝင်စာ တွေ့ချိန်မှာ အကျဉ်းသား အခွင့်အရေးအတွက် တောင်းဆိုထားတဲ့စာကို အရှင် ဂမ္ဘီရက ထောင်ဝန်ထမ်းရဲ့ လက်ထဲကနေ တရားဝင် ပေးလိုက်တာဖြစ်ပြီး လိပ်မူထားတာကတော့ နိုင်ငံတော် သမ္မတအပြင် အကျဉ်းဦးစီးဌာန၊ ကမ္ဘာ့ကုလသမဂ္ဂ လူ့အခွင့်အရေး ကော်မရှင်၊ အာဆီယံ လူ့အခွင့်အရေး ကော်မတီ၊ အာရှ လူ့အခွင့်အရေး ကော်မရှင်တို့ကိုလည်း မိတ္တူပို့ထားတာ ဖြစ်ပါတယ်။

ဒီစာကို ထုတ်ပေးခဲ့တဲ့ ထောင်ဝန်ထမ်းတွေဟာ မသိနားမလည်လို့ ထုတ်ပေးလိုက်တာ ဖြစ်တဲ့အတွက် သူတို့ကိုလည်း အရေးယူတဲ့ အနေနဲ့ နယ်ပြောင်းရွှေ့ဖို့ စီစဉ်နေတယ်လို့လည်း ကလေး အကျဉ်းထောင်က ၀န်ထမ်းတွေက ဆိုပါတယ်။

ဦးဂမ္ဘီရဟာ ၂၀၀၇ ခုနှစ် နိုဝင်ဘာလ ၄ ရက်နေ့မှာ ဖမ်းဆီးခံခဲ့ရပြီး နိုဝင်ဘာလ ၁၁ ရက်နေ့မှာ အင်းစိန်ထောင်ကို ရောက်ရှိပြီးတဲ့နောက် နယ်စပ်ဖြတ်ကျော်မှု လူဝင်မှု အက်ဥပဒေ ၁၃(၁)၊ တရားမ၀င်အသင်းနဲ့ ဆက်သွယ်မှု ၁၇(၁)၊ ၁၇(၂၀) စတဲ့ ပုဒ်မ ၁၆ ခုနဲ့ ၂၀၀၈ ခုနှစ် နိုဝင်ဘာလ ၂၂ ရက်နေ့မှာ အမိန့်ချမှတ်ခံခဲ့ရပြီး ထောင်ဒဏ် ၆၃ နှစ် ကျခံနေရတဲ့ သံဃာတပါးလည်း ဖြစ်ပါတယ်။

နေတိုးတပ်ဖွဲ့ လေကြောင်းတိုက်ခိုက်မှု အာဖဂန် အရပ်သား ၁၄ ဦးသေဆုံး

By ဗွီအိုအေ (မြန်မာဌာန) တနင်္ဂနွေ, 29 မေ 2011

နေတိုးတပ်ဖွဲ့တွေရဲ့ လေကြောင်းတိုက်ခိုက်မှု တခုကြောင့် အာဖဂန်နစ္စတန်နိုင်ငံမှာ အရပ်သူ အရပ်သား ၁၄ ဦး သေဆုံးခဲ့ရတယ်လို့ အာဖဂန်တောင်ပိုင်း အရာရှိတွေက ပြောပါတယ်။ သေဆုံးခဲ့ရသူ အားလုံးဟာ အမျိုးသမီးနဲ့ ကလေးငယ်တွေချည်းပဲလို့ ဆိုပါတယ်။

အဲဒီတိုက်ခိုက်မှုဟာ ဟယ်လ်မန် (Helmand) ခရိုင်မှာ ဒီနေ့ ဖြစ်ပွားခဲ့တာပါ။ လူ ၆ ဦးလည်း ဒဏ်ရာတွေ ရခဲ့တယ်လို့ အာဏာပိုင်တွေက ဆိုပါတယ်။

နေတိုးတပ်ဖွဲ့ လေကြောင်း တိုက်ခိုက်မှုကြောင့် လူနေအိမ် ၂ လုံး ထိမှန် ပျက်စီးခဲ့ရပြီး အဲဒီမှာ အမျိုးသမီး ၂ ဦးနဲ့ မိန်းကလေး ၅ ဦး၊ ယောက်ျားလေး ၇ ဦး သေဆုံးခဲ့ရတယ်လို့ ပြည်နယ် အုပ်ချုပ်ရေးမှူးရုံးက အရာရှိက ဆိုပါတယ်။

နေတိုးတပ်ဖွဲ့တွေရဲ့ ပြောခွင့်ရ ပုဂ္ဂိုလ်ကတော့ အရပ်သူ အရပ်သားတွေ သေဆုံးမှုနဲ့ သက်ဆိုင်တဲ့ သတင်းတွေကို သူတို့သိနေတယ်၊ တိုက်ခိုက်ခံခဲ့ရတဲ့ နေရာကို ပူးတွဲကူညီရေး အဖွဲ့တခု စေလွှတ်ထားပြီး ထပ်ပြီး သိရှိရတဲ့ သတင်း အချက်အလက်တွေကို မကြာခင်မှာ အသိပေး ထုတ်ပြန်မယ်လို့ ဆိုပါတယ်။

အာဖဂန်နစ္စတန်နိုင်ငံမှာ ရောက်နေတဲ့ နိုင်ငံခြား တပ်ဖွဲ့တွေရဲ့ တိုက်ခိုက်မှုတွေကြောင့် အရပ်သူ၊ အရပ်သားတွေ သေဆုံးခဲ့ရတဲ့ ကိစ္စတွေဟာ အာဖဂန်သမ္မတ ဟာမစ် ကာဇိုင်း (Hamid Karzai) နဲ့ အနောက်နိုင်ငံ အရာရှိတွေကြားမှာ အဓိက ပြဿနာတရပ်အဖြစ် ရှိနေတာပါ။

အာဖဂန်နစ္စတန်နိုင်ငံမှာ ညဘက် ၀င်ရောက် စီးနင်းမှုတွေကို လုပ်တဲ့အခါ နေတိုးတပ်ဖွဲ့တွေက မလုပ်တော့ဘဲ အာဖဂန်အစိုးရ တပ်ဖွဲ့တွေပဲ သီးသန့် လုပ်ဆောင်ဖို့ မနေ့တုန်းကပဲ အာဖဂန်သမ္မတ ဟာမစ် ကာဇိုင်းက အမိန့်ထုတ်ပြန် ထားတာပါ။

နေတိုးတပ်ဖွဲ့တွေရဲ့ စစ်ဆင်ရေးတွေနဲ့ ညပိုင်း စီးနင်း ၀င်ရောက်မှုတွေကြောင့် အရပ်သူ အရပ်သားတွေ သေဆုံးရတယ်ဆိုပြီး အာဖဂန် ပြည်သူတွေက အပြစ်တင် ပြောဆိုနေကြတာ ဖြစ်ပါတယ်။

ဒုတိယအကြိမ် ပင်လုံညီလာခံအတွက် ပြင်ဆင်မှုတွေ စတင်

2011-05-29 RFA

‘ပင်လုံစာချုပ်နဲ့ ပြည်ထောင်စုစိတ်ဓာတ်’ ဆိုတဲ့ ခေါင်းစဉ်နဲ့ စာတမ်းတွေ ပြုစုရေးသားဖို့ ပြည်သူ့လွှတ်တော် ကိုယ်စားပြုကော်မတီ CRPP က ပြည်တွင်းပြည်ပ လူငယ်တွေနဲ့ ပညာရှင်တွေကို တိုက်တွန်းထားပါတယ်။

၂၁ ရာစု ပင်လုံညီလာခံကို ရည်ရွယ်ပြီး စာတမ်းဖတ်ပွဲ ကျင်းပဖို့ အခုလို စုဆောင်းနေတာလို့ CRPP အတွင်းရေးမှူး ဦးအေးသာအောင်က RFA ကို ပြောပါတယ်။

“ဒုတိယပင်လုံအတွက် ‘ပင်လုံစာချုပ်နဲ့ ပြည်ထောင်စုစိတ်ဓာတ်’ ဆိုတဲ့ ခေါင်းစဉ်ပေးပြီးတော့ စာတမ်းတွေ ရေးခိုင်းထားတယ်၊ လူငယ်တွေ ပညာရှင်တွေနဲ့ ပြည်ပကိုပါပေ့ါ။ အဲဒါတွေ ရရင်တော့ စာတမ်းဖတ်ပွဲတခု လုပ်မယ်။ နိုင်ငံခြားသား ပညာရှင်တွေကိုတော့ ဒေါ်အောင်ဆန်းစုကြည်က သူကိုယ်တိုင် တောင်းမယ်လို့ ပြောတယ်။ ပြည်တွင်းမှာတော့ သက်ဆိုင်ရာ နီးစပ်ရာ နီးစပ်ရာ ကမ်းလှမ်းတယ်။ တိုင်းရင်းသားတွေ ကိစ္စကတော့ ရခိုင်ဆိုရင်တော့ ကျနော်က တာဝန်ယူတာပေါ့။ ချင်း ဆိုရင်တော့ ပူကျင်ရှင်းထန် ကပေါ့။ ရှမ်း ဆိုရင်တော့ စိုင်းထွန်းအောင်တို့ ဘာတို့ ဒီလိုပေါ့ဗျာ”

စာတမ်း ပေးပို့ရမယ့် နောက်ဆုံးရက်ကိုတော့ မသတ်မှတ်ထားသေးဘူးလို့ သိရပါတယ်။ ဒါပေမယ့် လာမယ့် CRPP အစည်းအဝေးမှာ ဒီကိစ္စကို ဆွေးနွေးဆုံးဖြတ်မယ်လို့ ဦးအေးသာအောင်က ပြောပါတယ်။

နိုင်ငံခြားသား ပညာရှင်တွေဆီက စာတမ်းကို မျှမျှတတရေးမယ့် ပုဂ္ဂိုလ်မျိုးတွေကို ကမ်းလှမ်းမှာ ဖြစ်တယ်လို့ ဆိုပါတယ်။

လူမျိုးမတူ၊ ဘာသာစကား မတူ၊ ယဉ်ကျေးမှု မတူတဲ့ တိုင်းရင်းသားတွေ စုပေါင်းနေထိုင်တဲ့ မြန်မာနိုင်ငံမှာ ငြိမ်းချမ်းရေးနဲ့ ဖွံ့ဖြိုးတိုးတက်ရေး၊ တန်းတူညီမျှရေး တွေအတွက် ခေတ်နဲ့ ပိုပြီးလျှော်ညီမယ့် ပြည်ထောင်စုတခု တည်ဆောက်ဖို့ ဒုတိယ ပင်လုံညီလာခံတခု ကျင်းပနိုင်အောင် ပြင်ဆင်နေတာလို့လည်း သိရပါတယ်။

ဝန်ကြီးတွေ လုံခြုံရေးကြောင့် ရပ်ရွာလုံခြုံရေး လျော့ကျ

2011-05-29 RFA

ကချင်ပြည်နယ် ဝန်ကြီးတွေရဲ့ လုံခြုံရေးအတွက် ရဲတပ်ဖွဲ့ဝင်တွေကို တာဝန်ချထားတာမို့ မြစ်ကြီးနားမြို့နဲ့ ပတ်ဝန်းကျင်မှာ ရဲအစောင့် တာဝန်ယူသူ နည်းသွားပြီး ရာဇဝတ် မှုခင်းတွေ တိုးများလာနေတယ်လို့ ဒေသခံတွေက ပြောပါတယ်။

မြစ်ကြီးနားမြို့နဲ့ ပတ်ဝန်းကျင်မှာ ရပ်ရွာလုံခြုံရေး တာဝန်ယူတဲ့ ရဲတပ်ဖွဲ့အင်အားဟာ နဂိုကထဲက သတ်မှတ်ချက် အရေအတွက် မပြည့်မီဘူးလို့ သိရပါတယ်။ ဒါ့အပြင် မေလ ၁၇ ရက်နေ့က ဦးသိန်းစိန် အစိုးရ ထုတ်ပြန်ခဲ့တဲ့ လွတ်ငြိမ်းချမ်းသာခွင့် အမိန့်နဲ့ ရာဇဝတ်အကျဉ်းသားတွေ လွတ်လာပြီးနောက်ပိုင်းမှာ ရာဇဝတ်မှုတွေ ပိုများလာတယ်လို့လည်း ဒေသခံတွေက ပြောပါတယ်။

ည ၇ နာရီ ၈ နာရီ၊ မှောင်ရိပ် သမ်းလာတာနဲ့ လုယက်မှုတွေ ဖြစ်ပွားနေတယ်လို့ ဒေသခံတယောက်က ပြောပါတယ်။

မြစ်ကြီးနားမြို့ဟာ နဂိုကတည်းက လူဝင်လူထွက်များတဲ့ မြို့ဖြစ်ပြီး အလုပ်အကိုင် အခွင့်အလမ်းရှာဖို့ မြန်မာနိုင်ငံ အနှံ့က လူတွေ လာရောက်နေထိုင်တဲ့ မြို့ဖြစ်ပါတယ်။ ဒါကြောင့် လုယက်ပြီး မော်တော်ဆိုင်ကယ်နဲ့ ထွက်ပြေးသူတွေ ဘယ်သူဘယ်ဝါ ဖြစ်တယ်ဆိုတာကို ရဲက ခြေရာခံလို့ မလွယ်ကူဘဲ အရေးလည်း မယူနိုင်ဘူးလို့ သိရပါတယ်။ ဒါ့အပြင် ပြည်နယ်ဝန်ကြီးတွေရဲ့ လုံခြုံရေးတာဝန် ယူထားရတဲ့အတွက် ပတ္တရောင် သိပ်မလှည့်နိုင်ဘူးလို့လည်း ဆိုပါတယ်။

အစိုးရ ထုတ်ပြန်ခဲ့တဲ့ လွတ်ငြိမ်းချမ်းသာခွင့် အမိန့်ကြောင့် မြန်မာတနိုင်ငံလုံးက အကျဉ်းသား တသောင်း လေးထောင်ကျော် လွတ်မြောက်လာပေမယ့် အများစုက ရာဇဝတ်သားတွေပဲ ဖြစ်ပြီး လွတ်လာတဲ့ နိုင်ငံရေး အကျဉ်းသားဦးရေ ၅ဝ ဝန်းကျင်သာ ရှိတယ်လို့ သိရပါတယ်။

ကလေးထောင်တွင် သံဃာ့ခေါင်းဆောင် အရှင်ဂမ္ဘီရအပါအဝင် နိုင်ငံရေးအကျဉ်းသားများ ဆန္ဒပြ

May 29th, 2011 - ရိုးမ ၃

စစ်ကိုင်းတိုင်းဒေသကြီး၊ ကလေးထောင်တွင် အကျဉ်းကျခံနေရသည့် ရွှေဝါရောင်သံဃာ့လှုပ်ရှားမှု ခေါင်းဆောင် အရှင်ဂမ္ဘီရနှင့် နိုင်ငံရေးအကျဉ်းသားများ ထောင်တွင်းဆန္ဒပြမည့် သတင်းများထွက်ပေါ်နေခြင်းကြောင်း မိသားစုဝင်များကို ထောင်ဝင်စာ တွေ့ခွင့်ပိတ်လိုက်သည်။

အရှင်ဂမ္ဘီရက အစာငတ်ခံဆန္ဒပြမည့် အခြေအနေရှိနေသည့်အတွက် အာဏာပိုင်တွေဘက်က ထောင်ဝင်စာ တွေ့ခွင့်ပိတ်လိုက်တာခြင်းနှင့် ပတ်သက်ပြီး မေလ (၂၇) ရက်နေ့က ထောင်ဝင်စာသွားတွေ့ခဲ့သည့် အစ်မဖြစ်သူ မခင်သူဌေးက ပြောသည်။

“သူတို့ကပိတ်တာပေါ့ အရင်ဆိုလို့ရှိရင် တလကို ဒါ နှစ်ကြိမ်တွေ့ခွင့်ရတယ်လေ၊ ဦးဇင်းကိုတွေ့ချင်လို့မို့သာ သက်သပ်မဲ့ (၁၅)ရက် ပြည့်အောင် ထိုင်စောင့်နေရတာလေ အဲဒါ မတွေ့ခဲ့ရဘူး။ မတွေ့ခဲ့ရတာ အဲဒီထောင်ထဲကို နယ်မြေခံရဲနဲ့ အက်စ်ဘီလာမယ်တဲ့ အဲဒီ့ဝင်လာ ပြီးတော့ ဒီမှာတဲ့ ဒီနေ့ ဦးဇင်းတို့ ဆန္ဒပြမယ်ကြားလို့ လာကြတာ၊ သတင်းလာယူတာလို့ ပြောတယ် ပြီးရင်အက်စ်ဘီတွေလည်း ထပ်ပြီးရောက်လာကြအုံးမှာလို့ ပြောတယ်” ဟု မခင်သူဌေးက ပြောသည်။

မေလ (၁၁)ရက်နေ့က အရှင်ဂမ္ဘီရအပါအ၀င် နိုင်ငံရေးအကျဉ်းသား (၄)ဦးက အကျဉ်းထောင်အတွင်း ကျန်းမာရေး ပြုစုစောင့်ရှောက်မှုနှင့် အစားအသောက် အပြည့်အဝရရှိရေး၊ မိသားစုနဲ့ လွတ်လပ်စွာ စကားပြောဆိုခွင့် တယ်လီဖုန်းဆက်သွယ် စကားပြောခွင့်နှင့် အကျဉ်းထောင်လက်စွဲ စာအုပ်ပါ ပြဋ္ဌာန်းချက်များနှင့်အညီ နိုင်ငံရေးအကျဉ်းသား အခွင့်အရေးများ ရရှိရန် စသည့်အချက် (၆) ချက်ကို မြန်မာအစိုးရသစ်နှင့် နိုင်ငံတကာအဖွဲ့အစည်းများထံ တင်ပြတောင်းဆိုခဲ့သည်။

အဆိုပါတောင်းဆိုချက်များကို သက်ဆိုင်ရာက မလိုက်လျောပါက အစာငတ်ခံဆန္ဒပြမယ်ဟု အရှင်ဂမ္ဘီရကပြောကြားကြောင်း ပြီးခဲ့သည့်အပတ် ထောင်ဝင်စာ တွေ့ပြီးနောက် အစ်မဖြစ်သူ မခင်သူဌေးက သတင်းဌာနများကို ပြောကြားခဲ့သည်။

ယခုအပတ် သောကြာနေ့တွင် ထောင်ဝင်စာတွေ့ခွင့်မရသည့် အခြေအနေနှင့် အစားအသောက်၊ စာအုပ်၊ ပါဆယ်ပေးပို့ခဲ့သော်လည်း စားစရာများကို လက်ခံထားတာမရှိဘဲ ဖတ်စရာ စာအုပ်တွေကိုသာ အရှင်ဂမ္ဘီရကိုယ်စား အခြားတဦးက လက်မှတ်ထိုးလက်ခံခဲ့ခြင်းကြောင့် အစာငတ်ခံ ဆန္ဒပြနေ ခြင်းဖြစ်နိုင်သည်ဟု မဖြစ်သူ မခင်သူဌေးက ဆက်ပြောသည်။

“အစားအသောက်က အဲဒါ လက်ခံထားတာတော့ မတွေ့ရဘူး။ စာအုပ်စာတမ်းတွေကိုတော့ ဂေါက်ချစ်ပြီးတော့ လက်မှတ်ထိုးပြီး ယူထားတယ်ရှင့်၊ နယ်မြေခံရဲတွေ အက်စ်ဘီတွေ လာပုံ ထောက်ရင်တော့ အဲဒါ သေချာသလောက်ပဲလို့ ကျမတော့ထင်တယ်။ အစာငတ်ခံဆန္ဒပြကြမှာပေါ့”ဟု ပြောသည်။

အရှင်ဂမ္ဘီရအပါအ၀င် ဦးညီပု၊ ကိုဌေးအောင် (ခေါ်)ကိုအောင်မြတ်နှင့် ကိုမင်းမင်းထွန်းတို့ (၄)ဦး ရေးသားတောင်းဆိုခဲ့သည့်အချက် (၆)ချက်ပါ စာရွက်သည် ကလေးအကျဉ်းဦးစီးဌာနတံဆိပ်ဖြင့် ပြင်ပကို ရောက်ရှိခဲ့သည့်အတွက် ထောင်ဝန်ထမ်းအချို့ စစ်အဆေးခံရပြီး နယ်ပြောင်းခံရနိုင်ပြီး အရှင်ဂမ္ဘီရတို့အတွက်လည်း စိတ်ပူနေရကြောင်း မခင်သူဌေးက ဆက်ပြောသည်။

“၁၄ ရက်နေ့ တွေ့တဲ့နေ့က အက်စ်ဘီတွေလည်းမရှိဘူး ထောင်မှူး ထောင်ပိုင်တွေလည်းမရှိဘူး အဲဒီနေ့က ဗိုလ်ချုပ်သာအေးရောက်တဲ့နေ့ ဆိုတော့ အဲဒီကို သွားရတယ်ထင်ပါတယ်။ ၀န်ထမ်းအသစ် ကလေးတွေ (၄)ယောက်ပဲရှိတယ်။ ဟိုတယောက်ပြောတာတော့ နားမလည်လို့ ထုတ်ပေးလိုက်တယ် ထုတ်ခွင့်မရှိဘူး လို့ပြောတာပဲ။ အဲဒီကလေးတွေတော့ အတော်အကြပ်ခံနေရ တယ်ပေါ့နော်၊ အစစ်ဆေးခံနေရတယ်တဲ့ နယ်ပြောင်း ခံရမယ်လို့တော့ပြောတယ်။ ဒါဆိုလို့ ရှိရင် ဦးဇင်းတို့ကော ဖိအားပေးလားဆိုတော့ ဦးဇင်းတို့တော့ မပေးဘူးလို့တော့ပြောတာပဲ ဒါပေမယ့် စိတ်တော့ ပူတာပေါ့။ တွေ့ရမယ့်အချိန်မှာ မတွေ့ရတော့”ဟု ပြောသည်။

ဖွံ့ဖြိုးရေးစီမံကိန်းနှင့် ရင်းနှီးမြှုပ်နှံမှုများကို ဆန့်ကျင်ကြောင်း ကရင်နှီးနှောဖလှယ်ပွဲမှ ဆွေးနွေးဆုံးဖြတ်ခဲ့

29 May 2011 - KIC

၈ကြိမ်မြောက် ကရင်အမျိုးသား စည်းလုံးညီညွှတ်ရေး နှီးနှောဖလှယ်ပွဲမှ ကရင်ဒုက္ခသည်များကို နေရပ်ပြန်လည် မပို့ဆောင် ရေးနှင့် ကရင်ဒေသများတွင် ပြုလုပ်နေသည့် ဖွံ့ဖြိုးရေးစီမံကိန်းများနှင့် ပြည်တွင်းပြည်ပ ရင်းနှီးမြှုပ်နှံမှုများကို ဆန့်ကျင် ရှုတ်ချကြောင်း ယမန်နေ့က ကြေညာချက် ထုတ်ပြန်လိုက်သည်။

ထိုကြေညာချက်တွင် နှီးနှောဖလှယ်ပွဲမှ ကရင်လူမျိုးများအကြား စည်းလုံးညီညွှတ်မှု ပိုမို အားကောင်းလာစေရေး၊ မြန်မာ ပြည်၏ လက်ရှိ နိုင်ငံရေးအခြေအနေများနှင့် ကရင်လူထုတစ်ရပ်လုံး၏ ခံစားနေရမှုများကို ဆွေးနွေးခဲ့ကြပြီး ထိုင်းနိုင်ငံအ တွင်း ရောက်ရှိနေသည့် သိန်းနှင့်ချီသော စစ်ပြေးဒုက္ခသည်များအား ယာယီ လက်ခံထားပေးရန်နှင့် ပြန်လည်ပို့ဆောင်ခြင်း မပြုလုပ်သေးရန် ထိုင်းအစိုးရနှင့် UNHCR တို့အား တောင်းဆိုထားသည်။

နှီးနှောဖလှယ်ပွဲ၏ ပြောရေးဆိုခွင့်ရှိသူ စောကနဲမီက “သူတို့(မြန်မာအစိုးရ)ကိုယ်သူတို့ အစိုးရလို့ ခံယူပြီး ကရင်တွေနယ် မြေမှာ ဖွံ့ဖြိုးရေးကို ဘမ်းပြပြီး Dam(ရေကာတာ)နေရာအဆင့်ဆင့် လာလုပ်တာဟာ နယ်မြေတွေ ဆုံးရှုံးပျက်စီးကုန်တယ်။ ဒီလို နားလှည့်ပါးရိုက်လာလုပ်တာ ဘယ်သူမှ လက်ခံနိုင်စရာ အကြောင်းမရှိဘူး။ ကျနော်တို့တွေ ဖွံ့ဖြိုးမှုကို မလိုလားတာ မဟုတ်ဘူး။ နိုင်ငံတကာကို လိမ်လည်ပြီး တိုင်းပြည်ကို အုပ်ချုပ်နေတဲ့ သူတွေကို လုံးဝ လက်မခံနိုင်ဘူး။ ဒါကြောင့် ကျနော် တို့ Karen Unity Seminar အနေနဲ့ မတ်မတ်ရပ်ပြီး ဒါကို လုံးဝ ဆန့်ကျင်တာ၊ ရှုတ်ချတာ ဖြစ်တယ်။”ဟု ကေအိုင်စီကို ပြောသည်။

ဆက်လက်၍ သူက “ဒုက္ခသည်နဲ့ ပတ်သက်လို့ အတင်းအဓမ္မ ရွှေ့ခိုင်းပြောင်းခိုင်းတာတွေ မလုပ်ရဘူးဆိုတာ ဥပဒေရှိ တယ်။ ကျနော်တို့က တကမ္ဘာလုံးက ပြဌာန်းထားတဲ့ လူ့အခွင့်အရေး ဥပဒေအရဆိုပြီး ကိုယ့်ကိုယ်ကို သတ္တိပြတာတော့ မဟုတ်ဘူး။ ကျနော်တို့ အမှန်တရားဘက်မှာ ရှိတယ်ဆိုတာရယ်၊ ခိုင်မာတဲ့ အခြေခံ အကြောင်းရင်းတွေ ရှိတယ်ဆိုတာရယ် ပါ။”ဟု ရှင်းပြသည်။

၎င်းအပြင် အခုတက်လာသည့် ကြံ့ဖွံ့အစိုးရအနေဖြင့် အင်အားတောင့်တင်းပြီး အဆင့်မြင့်သည့် စစ်တပ်ကို ထူထောင်ပါက ကရင်ဒေသများအတွင်း ဆိုးဝါးသော လူ့အခွင့်အရေး ချိုးဖောက်မှုများ ဆက်လက် ဖြစ်ပွားလာနိုင်ခြင်း၊ လူထု၏ အိုးအိမ် မြေယာများ ပိုမို ပျက်စီးဆုံးရှုံးလာနိုင်ခြင်းနှင့် လူသားများအပေါ် စစ်ရာဇ၀တ်မှုများ ကျူးလွန်နေသည့်အတွက် ကုလသမဂ္ဂ မှ စုံစမ်းစစ်ဆေးရေး ကော်မရှင် စေလွှတ်၍ ကြံ့ဖွံ့အစိုးရအား အရေးယူမှုများ ချက်ချင်း ဆောင်ရွက်သွားရန်လည်း နှီးနှော ဖလှယ်ပွဲက တောင်းဆိုလိုက်သည်။

ထိုနှီးနှောဖလှယ်ပွဲသို့ ပြည်တွင်းနှင့် ယူကေ၊ အမေရိကန်၊ ကနေဒါ၊ စင်္ကာပူ၊ သြစတြေးလျားနိုင်ငံများမှ ကရင်တိုင်းရင်းသား ကိုယ်စားလှယ်များလည်း တက်ရောက်ခဲ့ကြသည်။

UK မှ စောဝင်းစတန်တောက “ကျနော် ဒီစီမီနာကို ပထမဆုံးရောက်လာတာပဲ။ ဆွေးနွေးမှုတွေအတွင်းမှာ အချေအတင် ငြင်းခုန်ဆွေးနွေးအဖြေရှာကြတာဟာ ဆုံမှတ်ကိုတွေ့ရှိသွားသလို စိတ်ဝင်စားမှုကောင်းတဲ့ တော်လှန်ရေးအတွေ့အကြုံ သဘောတရားတွေကိုလည်း ရရှိခဲ့ပါတယ်။”ဟု ကေအိုင်စီသို့ ပြောသည်။

ပြည်တွင်းကိုယ်စားလှယ်တဦးကလည်း “အခုလို ကရင်ကိုယ်စားလှယ်ကြီးတွေ ဒုက္ခအခက်အခဲကြားက မတူကွဲပြားတဲ့ အတွေးအခေါ် အယူအဆတွေကို ပြန်လည်ပေါင်းစည်းပေးဖို့ လာရောက်ဆွေးနွေးကြတာ အားရကျေနပ်မှု အတော်ရပါ တယ်။ နိုင်ငံရေး၊ အမျိုးသားရေးပန်းတိုင်ကို ဒီစီမီနာမှာ ရှင်းရှင်းလင်းလင်းကြီး တွေ့ခွင့်ရခဲ့တယ်။ ပြည်တွင်းမှာဆို ဘာဆို ဘာမှ သိခွင့်၊ လုပ်ခွင့်မရှိဘူး။”ဟု ဆိုသည်။

နှီးနှောဖလှယ်ပွဲ ကျင်းပရေးကော်မတီ ဥက္ကဌ စောလှထွန်းက “နိုင်ငံတကာက ကိုယ်စားလှယ်တွေ၊ ခရိုင်ကိုယ်စားလှယ်တွေ နဲ့ ပြည်တွင်းကိုယ်စားလှယ်တွေ အခုလို လာရောက်တွေ့ဆုံပြီး ကရင်အမျိုးသားတွေရဲ့ စည်းလုံးမှုပြိုကွဲစေမယ့် အကြောင်း အရာတွေကို ဝိုင်းဝန်းပူးပေါင်းဆောင်ရွက်ပြီး ကာကွယ်ပေးကြ၊ နည်းလမ်းအဖြေရှာကြတာဟာ အင်မတန်မှ အားရကျေနပ် မှု ရှိပါတယ်။”ဟု ပြောဆိုသည်။

မေလ ၂၄ရက်မှ ၂၇ရက်နေ့အထိ ထိုင်း-မြန်မာနယ်စပ်တနေရာတွင် ပြုလုပ်ကျင်းပခဲ့သည့် ထိုနှီးနှောဖလှယ်ပွဲသို့ ပြည်တွင်း ပြည်ပရှိ ကရင်အဖွဲ့အစည်း(၄၂)ဖွဲ့မှ ကိုယ်စားလှယ်များ၊ မျိုးဆက်သစ် နိုင်ငံရေးကျောင်းသားကျောင်းသူများနှင့် လေ့လာ သူများ စုစုပေါင်း ၁၁၇ဦး တက်ရောက်ခဲ့ကြသည်။

ကာတာနိုင်ငံသား ဘင်ဟာမန် FIFA ဥက္ကဋ္ဌလောင်း အဆိုပြုချက် ရုပ်သိမ်း

By ဗွီအိုအေ (မြန်မာဌာန) တနင်္ဂနွေ, 29 မေ 2011

ကမ္ဘာ့ဘောလုံးအဖွဲ့ချုပ် (FIFA) ဥက္ကဋ္ဌ နေရာအတွက် ဝင်ရောက် အရွေးခံမယ့် ကာတာနိုင်ငံက မိုဟာမက် ဘင်ဟာမန် (Mohamed Bin Hammam) ဟာ လာဘ်ပေးလာဘ်ယူမှု စွပ်စွဲချက်တွေနဲ့ စည်းကမ်းထိမ်းသိမ်းရေး ကော်မတီ ရှေ့မှောက်မှာ စစ်ဆေးခံဖို့ နာရီပိုင်း အလိုမှာပဲ FIFA ရဲ့ ဥက္ကဋ္ဌ နေရာအတွက် ဝင်မပြိုင်တော့ဘူးလို့ ပြောသွားပါတယ်။

ဒီလို မစ္စတာ ဘင်ဟာမန် ယှဉ်ပြိုင်မှုကနေ နှုတ်ထွက်သွားတာကြောင့် FIFA မှာ သက်တမ်းရှည်လှပြီဖြစ်တဲ့ လက်ရှိဥက္ကဋ္ဌ ဆွစ်ဇာလန်နိုင်ငံက ဆက်ပ် ဘလတ္တာ (Sepp Blatter) အတွက် လမ်းရှင်းသွားသလို ဖြစ်သွားရပါတယ်။

မစ္စတာ ဘင်ဟာမန်ကတော့ သူ့ရဲ့ ပုဂ္ဂိုလ်ရေး ဖြစ်ချင်ဇောတွေကို FIFA ရဲ့ ဂုဏ်သိက္ခာနဲ့ မှန်မှန်ကန်ကန် ရပ်တည်မှုတွေထက် ဦးစားမပေးနိုင်ဘူးလို့ စနေနေ့ ညပိုင်းက ပြောသွားပါတယ်။ သူရယ် မစ္စတာ ဘလတ္တာရယ်နဲ့ FIFA ဒု-ဥက္ကဋ္ဌ ဂျက် ၀ါနာ (Jack Warner) တို့ဟာ ရွေးကောက်ပွဲအတွက် မဲဆွယ်မှုတွေမှာ အဂတိ လိုက်စားမှုတွေ ရှိခဲ့တယ်ဆိုပြီး စွပ်စွဲခံထားရတာ ဖြစ်ပါတယ်။ သူတို့ ၃ ဦးလုံးကို FIFA စည်းကမ်းထိန်းသိမ်းရေး ကော်မတီက တနင်္ဂနွေနေ့မှာ မေးမြန်းမှာပါ။

မစ္စတာ ဘင်ဟာမန်နဲ့ ဒု-ဥက္ကဋ္ဌ ၀ါနာတို့က သူတို့ ဘာအမှားအယွင်းမှ မလုပ်ထားဘူးလို့ ပြောနေပြီး မစ္စတာ ဘလတ္တာကတော့ အချက်အလက်တွေက သက်သေပြပါလိမ့်မယ်လို့ ပြောသွားပါတယ်။