ဒီနေ့ဖတ်စရာ သတင်းများ (မေလ ၁၅ ရက်)

- ကတိကဝတ်ထက် လက်တွေ့လုပ်ဖို့ အဓိကကျကြောင်း ကုလ အထူးကိုယ်စားလှယ်ပြောကြား
- မုဒုံမြို့ ကြေးနန်းဆက်သွယ်ရေးရုံးကို လက်နက်ကိုင်တချို့ တိုက်ခိုက်မိုင်းခွဲ
- အစိုးရသစ် ကလေးအရွယ်များကိုပင် ပေါ်တာဆွဲ
- အမေရိကန် DV ကံစမ်းမဲ ရလဒ်မှားယွင်း
- မုန်တိုင်းသင့် ဖျာပုံ ရေလုပ်သားများ ရပ်တည်ရေးခက်ခဲ
- စီးပွားရေး နိုဘဲလ်ဆုရှင် မိုဟာမက် ယူနွတ်စ် ရာထူးမှထွက်
- ဘင်လာဒင်ကိုဖမ်းဖို့ အမေရိကန် စီးနင်းမှု ပါကစ္စတန်လွှတ်တော် ရှုတ်ချ
- မတရား အနိုင်ကျင့်မှု တိုင်တန်းသူကို ပြည်ခိုင်ဖြိုး စည်းရုံးရေးမှူးက ခြိမ်းခြောက်
- ပြည်ထဲရေး ဝန်ကြီးဟောင်း မောင်ဦး ကျေးရွာ အုပ်ချုပ်ရေးမှူးတဦးကို လက်တန်း အလုပ်မှဖြုတ်

ကတိကဝတ်ထက် လက်တွေ့လုပ်ဖို့ အဓိကကျကြောင်း ကုလ အထူးကိုယ်စားလှယ်ပြောကြား

2011-05-14 RFA

မြန်မာနိုင်ငံမှာ ဦးသိန်းစိန် သမ္မတဖြစ်လာချိန် ပြောကြားတဲ့ မိန့်ခွန်းမှာ အရေးကြီးတဲ့ ရည်ရွယ်ချက်တွေနဲ့ ပြုပြင်ပြောင်းလဲရေးတွေ ထည့်သွင်း ကတိပေးခဲ့တာကို ကုလသမဂ္ဂအနေနဲ့ ကြိုဆိုကြောင်း၊ ဒါပေမယ့် လက်တွေ့ အကောင်အထည်ဖော်ဖို့က အဓိက သော့ချက်ဖြစ်ကြောင်း ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးအကြံပေး အရာရှိ Vijay Nambir က မနေ့က ပြောကြားလိုက်ပါတယ်။

မစ္စတာ နမ်ဘီယားဟာ ၃ ရက်ကြာ မြန်မာခရီးစဉ်ကို မနေ့က အဆုံးသတ်လိုက်ပြီး ကြေညာချက်တရပ် ထုတ်ပြန်ရာမှာ မြန်မာနိုင်ငံ ခရီးစဉ်အတွင်း ရက်သတ္တပတ် ၆ ပတ်သာ သက်တမ်းရှိသေးတဲ့ မြန်မာအစိုးရ အကြီးတန်း အရာရှိတွေနဲ့ တွေ့ဆုံခဲ့သလို ဒေါ်အောင်ဆန်းစုကြည်နဲ့ NLD ဗဟိုအလုပ်အမှုဆောင်တွေ အပြင် နိုင်ငံရေးမှာ ပါထိုက်သူတွေနဲ့လည်း တွေ့ဆုံခဲ့ကြောင်း ဖော်ပြထားပါတယ်။

မြန်မာအစိုးရ အရာရှိတွေနဲ့ တွေ့ဆုံရာမှာ- နိုင်ငံရေးအကျဉ်းသားတွေ လွှတ်ပေးဖို့နဲ့ ကဏ္ဍအသီးသီးက ပါသင့်ပါထိုက်သူ အားလုံး ပါဝင်တဲ့ နိုင်ငံရေးဆွေးနွေးပွဲ ဖြစ်လာအောင် လုပ်ဆောင်ဖို့ လိုအပ်ကြောင်း၊ မြန်မာအစိုးရက လုပ်ဆောင်မယ့် ပြုပြင်ပြောင်းလဲရေးတွေ အကျိုးရှိ ကျယ်ပြန့်လာအောင် နိုင်ငံတကာနဲ့ ပိုပြီး ထိတွေ့ ဆက်ဆံလာဖို့ လုပ်အပ်ကြောင်း တိုက်တွန်း ပြောကြားခဲ့တယ်လို့လည်း ကြေညာချက်မှာ ဖော်ပြထားပါတယ်

မုဒုံမြို့ ကြေးနန်းဆက်သွယ်ရေးရုံးကို လက်နက်ကိုင်တချို့ တိုက်ခိုက်မိုင်းခွဲ

2011-05-14 RFA

မုဒုံမြို့ ဆက်သွယ်ရေးရုံးကို လက်နက်ကိုင်တချို့က ဒီကနေ့ မနက် ၆ နာရီကျော်လောက်က ဝင်ရောက်စီးနင်းပြီး မိုင်းခွဲ ဖျက်ဆီးလိုက်ကြတယ်လို့ သတင်း ရရှိပါတယ်။

အဲဒီ အမည်မသိ လက်နက်ကိုင်တွေနဲ့ နယ်မြေလုံခြုံရေး တပ်ဖွဲ့ဝင်တွေ အပြန်အလှန် ပစ်ခတ်ကြရာမှာ အစောင့် ရဲတပ်ဖွဲ့ဝင် တဦး သေဆုံးပြီး ၂ ဦး ဒဏ်ရာ ရရှိခဲ့တယ်လို့ ရန်ကုန်-မော်လမြိုင် မော်တော်ယာဉ်လိုင်း ပိုင်ရှင်တဦးက ပြောပါတယ်။

သေဆုံးတဲ့ အရေအတွက်နဲ့ ပတ်သက်ပြီး အတည်ပြုချက် ရဖို့ ဆက်လက် စုံစမ်းနေဆဲ ဖြစ်ပါတယ်။

အချိန်အတော်ကြာ တိုက်ပွဲဖြစ်ပွားပြီးနောက်မှာ ချိန်ကိုက်မိုင်း ဝင်ကပ်သွားတာ ဖြစ်ပြီး ပေါက်ကွဲမှုကြောင့် ဆက်သွယ်ရေး အဆောက်အအုံ အပေါ်ထပ် အနောက်ဘက်ခြမ်း ပွင့်ထွက်သွားတယ်လို့လည်း သိရှိရပါတယ်။

သေနတ်သမားတွေဟာ မုဒုံ-မော်လမြိုင် လိုင်းကားတစီးပေါ်က ခရီးသည်တွေကို ရပ်တန့် ဆင်းခိုင်းပြီး အခုလို ဝင်ရောက် တိုက်ခိုက်ခဲ့တာလို့ သိရပါတယ်။

ဒီတိုက်ခိုက်မှုကြောင့် မုဒုံမြို့နဲ့ အနီးတဝိုက်မှာ ကမ်းရိုးတန်း တယ်လီဖုန်းတွေ အဆက်အသွယ် ပြတ်တောက်သွားခဲ့တယ်လို့လည်း ဒေသခံတွေထံက သိရှိရပါတယ်။

အစိုးရသစ် ကလေးအရွယ်များကိုပင် ပေါ်တာဆွဲ

May 14, 2011 FNG

လက်ရှိဖြစ်ပွားနေသည့် ကရင်ပြည်နယ်တွင်းရှိ တိုက်ပွဲများအတွင်း စစ်အစိုးရတပ်ဖွဲ့ဝင်များက ကရင်ပြည်နယ် ဖာပွန် နှင့် ကော့ကရိတ်မြို့ နယ်များမှ ကျောင်းနေအရွယ် ကလေးငယ်များကို ရိက္ခာချက်ပြုတ်ခြင်း၊ လက်နက်ခဲယမ်းများ သယ် ဆောင်ခြင်း လုပ်ငန်းများအတွက် ပေါ်တာဆွဲနေကြောင်း FNG မှ သတင်းရရှိသည်။

ခလေးငယ်များကို ပေါ်တာဆွဲခြင်းမှာ ကော့ကရိတ်၊ ဖာပွန် နှင့် ရွှေဂွန်း မြို့နယ်များတွင်ဖြစ်ပြီး ယခု နယ်စပ်တစ်လျှောက် ဖြစ်ပွားနေသည့် စစ်ပွဲများအတွက် ဖြစ်သည်။

ကရင်ပြည်နယ်၊ မွန်ပြည်နယ် နှင့် ပဲခူး တိုင်း ဒေသများ တွင် ကျောင်း နေအရွယ် ကလေး ငယ် များ ကို ပေါ်တာ ဆွဲမှု များ မှာ အများ ဆုံး ဖြစ်သည်။

ဘားအံမြို့ နယ် တွင်း မှ ငါးတန်း ကျောင်းသား အရွယ် သားဖြစ်သူ ပေါ်တာ ဆွဲ ခံရသည့် မိဘ တစ်ဦးက ” သူတို့ သင်္ကြန် တွင်း တုန်း က လျှောက် လည် ကြတာ နောက် ဆုံး နေ့ (အတက်နေ့ )
မှာ ငါး နာရီ ကျော်ထိ ရေပက် တယ် ဆိုပြီး စစ်တပ် က ခေါ် သွားတာ ကျွန်မ တို့ က ဘယ်ကို လိုက်ရှာ ရမှန်း မသိဘူး ၊ ရဲက လည်း နောက် နေ့ ပြန်လာ မှာ ပါ ဆိုပြီး ပြောတယ် ။ အခု တစ်
လ ပြည့် မှ တစ်သိန်း နဲ့  မြိုင်ကြီး ငူ နား မှ လိုက်ရွေးရတယ် ဟု FNG သို့ ပြောသည်။

မြန်မာ စစ်အစိုးရသစ် လက်ထက် တွင် ဖိနှိပ် ညှင်းပန်း မှု များ ပပျောက် သွား မည် ဟု အာဆီယံ နိုင်ငံ အချို့ က ထင်မြင် ကြသော်လည်း ပို၍ ပင် တိုးလာသည် ဟု ၁၉၉၈ မျိုးဆက် ကျောင်းသား
တစ်ဦးက ပြောသည်။

အမေရိကန် DV ကံစမ်းမဲ ရလဒ်မှားယွင်း

By David Gollust's Report in Burmese သောကြာ, 13 မေ 2011

အမေရိကန်နိုင်ငံဆီကို အရောက်လာခွင့် ဗီဇာမဲဖောက်ရာမှာ ကွန်ပျူတာရဲ့ ချို့ယွင်းမှုကြောင့် လူထောင်ပေါင်းများစွာကို မဲပေါက်တယ်ဆိုပြီး မှားယွင်းစွာ အသိပေးခဲ့မိတဲ့အတွက် အမေရိကန် နိုင်ငံခြားရေး ၀န်ကြီးဌာနက အခု တောင်းပန်နေရပါတယ်။

ဒါကြောင့် လူပေါင်း ၁၅ သန်းနီးပါးရဲ့ လျှောက်လွှာတွေကို ပြန်ပြီး စိစစ် ရွေးချယ်ရလိမ့်မယ်လို့ ဆိုပါတယ်။ ဒီအကြောင်းနဲ့ ပတ်သက်လို့ ဗွီအိုအေ သတင်းထောက် ဒေးဗစ် ဂေါလပ်စ် (David Gollust) နိုင်ငံခြားရေးရုံးက သတင်း ပေးပို့ထားတာကို ဦးကျော်ဇံသာက တင်ပြပေးထားပါတယ်။

DV Lottery လို့ အများခေါ်နေကြတဲ့ အမေရိကန် ပြည်ထောင်စုမှာ လာရောက် အခြေချခွင့်ဗီဇာ မဲဖောက်တဲ့ ကိစ္စကို ၂၀၁၂ ခုနှစ်အတွက် ပြန်လုပ်ရတော့မယ်လို့ အမေရိကန် နိုင်ငံခြားရေး ၀န်ကြီးဌာနက လူသိရှင်ကြား မကြုံစဘူး တောင်းပန်နေရတာကတော့ ကွန်ပျူတာ ချို့ယွင်းမှုကြောင့် ဖြစ်ပါတယ်။ DV Lottery ကို ၁၉၉၄ ခုနှစ်မှာ အမေရိကန် ကွန်ဂရက်လွှတ်တော်က စတင် အကောင်အထည် ဖော်ခဲ့တာပါ။ ဖွံ့ဖြိုးဆဲနိုင်ငံတွေနဲ့ အမေရိကန်ကို လာရောက် အခြေချ နေထိုင်သူ သိပ်မရှိသေးတဲ့ နိုင်ငံတွေဆီက လူတွေ ပိုမိုလာရောက် အခြေချနိုင်ဖို့အတွက် ဖြစ်ပါတယ်။

အခု မိသားစုတွေ အပါအ၀င်ဆိုရင် သန်း ၂၀ နီးပါးရှိတဲ့ လူပေါင်း ၁၅ သန်းခန့်တို့ဆီက ၂၀၁၂ ခုနှစ်အတွက် မနှစ် နှောင်းပိုင်းက မှတ်ပုံတင် လျှောက်ထားခဲ့တာပါ။ ဒီအထဲက အပြီးသတ် ၅၀,၀၀၀ ကို ရွေးချယ်သွားဖို့ ဖြစ်ပါတယ်။ ပြီးခဲ့တဲ့ အောက်တိုဘာလမှာ စတင်ပြီး တလလုံး လက်ခံ ရရှိခဲ့တဲ့ လျှောက်လွှာတွေထဲက ရွေးချယ်ရမယ့်အစား ပထမ ၂ ရက်အတွင်း လက်ခံရရှိခဲ့တဲ့ လျှောက်လွှာတွေထဲကချည်းပဲ ကွန်ပျူတာက မှားမှားယွင်းယွင်း ရွေးချယ်လိုက်တာ ဖြစ်ပါတယ်။

ဒီလို မှားယွင်းချက်ကို ဒီရက်ပိုင်းအတွင်းမှာ သိလာရတော့ ဒီရွေးချယ်မှုဟာ ကံစမ်းမဲဖောက်ရာလည်း မကျဘူး၊ မျှမျှတတလည်း မဖြစ်ဘူးဆိုပြီး ပြန်ရွေးချယ်ဖို့ ဆုံးဖြတ်လိုက်ကြတာ ဖြစ်ပါတယ်။ ဒါပေမဲ့ ဒီအချိန်မှာ လျှောက်လွှာရှင် ၂၀,၀၀၀ ကျော်ဆီကို DV Lottery ကံစမ်းမဲ ပေါက်တယ်၊ လုပ်စရာရှိတာ ဆက်လုပ်ပါဆိုပြီး အကြောင်းကြားမိလျက်သား ဖြစ်နေပါပြီ။ ဒီအတွက် မနေ့ သောကြာနေ့က အမေရိကန် နိုင်ငံခြားရေးရုံး ပြည်ဝင်ခွင့်ဗီဇာ ၀က်ဘ်ဆိုက်ဒ်မှာ ဒု-လက်ထောက် နိုင်ငံခြားရေးဝန်ကြီး ဒေးဗစ် ဒိုနာဟူး (David Donahue) က အခုလို တောင်းပန်ထားပါတယ်။

“ဒီလို မျှတမှု မရှိသော၊ ကံကျရွေးချယ်ခြင်း မဟုတ်သော ရလဒ် ထွက်ပေါ်စေခဲ့တဲ့ ကွန်ပျူတာ ချို့ယွင်းချက်ကို သိရကတည်းက ပြန်ပြင်လိုက်ပါပြီ။ ဒီပြဿနာကြောင့် အဆင်မပြေမှုတွေ၊ စိတ်ပျက်စရာတွေ ကြုံခဲ့ရရင် ကျနော်တို့ အနေနဲ့ ရိုးသားစွာ တောင်းပန်ပါတယ်။ ၀မ်းနည်းပါတယ်။ ဒီအမှားအယွင်းကြောင့် လျှောက်လွှာရှင် အများအပြားကို မတရားသဖြင့် နစ်နာစေခဲ့တဲ့အတွက် ကံစမ်းရွေးချယ်မှုအသစ် ထပ်မံ ပြုလုပ်ဦးမှာ ဖြစ်ပါတယ်။”

အခု ထပ် မဲဖောက် ရွေးချယ်ရာမှာတော့ မူလလျှောက်လွှာတွေထဲက ရွေးချယ်မှာသာ ဖြစ်တဲ့အတွက် အသစ် ထပ်မံ လျှောက်ထားစရာ မလိုဘူးလို့လည်း ဒိုနာဟူးက ဆိုပါတယ်။ ကံစမ်းမဲ ရလဒ်သစ်တွေကိုတော့ အမေရိကန် နိုင်ငံခြားရေးဌာန ဗီဇာဝက်ဘ်ဆိုက်ဒ်မှာ လာမယ့် ဇူလိုင်လလယ်ကို နောက်ဆုံးထား ဖော်ပြသွားမယ်လို့ သိရပါတယ်။

အခု လျှောက်လွှာရှင် ၁၅ သန်းထဲက ၉၀,၀၀၀ ကို ပထမအဆင့် ကံထူးရှင်အဖြစ် ရွေးချယ်မှာ ဖြစ်ပါတယ်။ Finalists လို့ခေါ်တဲ့ ဒီလို ရွေးချယ်ခံရသူတွေ အနေနဲ့ သူတို့ရဲ့ အရည်အချင်းတွေနဲ့ ပတ်သက်ပြီး ပုံစံတွေကို ဖြည့်စွက် တင်သွင်းရဦးမှာ ဖြစ်ပါတယ်။ အဲဒီအထဲကမှ ၅၀,၀၀၀ ကို အမေရိကန်မှာ လာရောက် အခြေချခွင့် ဗီဇာကို အပြီးသတ် ထုတ်ပေးမှာ ဖြစ်ပါတယ်။ ကျန် ၄၀,၀၀၀ ကိုတော့ ပုံစံ ဆက်ဖြည့်စရာ မလိုတော့သူတွေ ဒါမှမဟုတ် ပညာအရည်အချင်း အသက်မွေးဝမ်းကြောင်း ပညာနဲ့ တခြား လိုအပ်ချက်တွေ မကိုက်ညီဘူး ဆိုပြီးတော့ ချန်လှပ်ခဲ့မှာ ဖြစ်ပါတယ်။

မုန်တိုင်းသင့် ဖျာပုံ ရေလုပ်သားများ ရပ်တည်ရေးခက်ခဲ

By မသင်းသီရိ စနေ, 14 မေ 2011

ဖျာပုံနယ်အတွင်းမှာ နေထိုင်ကြတဲ့ ရေလုပ်သားတွေဟာ အလုပ်လက်မဲ့ ဖြစ်နေတာမျိုးတွေ ကြုံနေရပြီး ၀မ်းစာနဲ့ ဘ၀ရပ်တည်ရေးအတွက် အခက်အခဲ ဖြစ်နေကြပါတယ်။

ဖျာပုံမြစ်ဝနဲ့ ကပ္ပလီပင်လယ်ပြင် မြောက်ပိုင်းမှာ ပြီးခဲ့တဲ့ မတ်လလယ်က တိုက်ခတ်ခဲ့တဲ့ လေပြင်းကြောင့် ရေလုပ်ငန်းတွေ အကြီးအကျယ် ထိခိုက်ပျက်စီးခဲ့ရသလို အခုချိန်ထိ နေရပ်တွေကို ပြန်မလာသေးတဲ့ ပျောက်ဆုံးနေဆဲ ရေလုပ်သားတွေလည်း ရှိနေဆဲ ဖြစ်ပါတယ်။ ရေလုပ်ငန်းတွေနဲ့အတူ ရေလုပ်သားတွေရဲ့ ခက်ခဲနေတဲ့ အခြေအနေ အပြည့်အစုံကို မသင်းသီရိက တင်ပြပေးထားပါတယ်။

ဖျာပုံမြစ်ဝနဲ့ ကပ္ပလီ ပင်လယ်ပြင်တွေမှာ ပြီးခဲ့တဲ့ မတ်လ ၁၅ ရက်နဲ့ ၁၆ ရက်တွေက တနာရီကို မိုင် ၇၀ နီးပါးနဲ့ တိုက်ခတ်ခဲ့တဲ့ လေမုန်တိုင်းကြောင့် ရေလုပ်သားတွေ ပင်လယ်ထဲ မျောပါသွားသလို ငါးဖမ်းလှေတွေ၊ ကျားဖောင်လို့ခေါ်တဲ့ ဖောင်နဲ့ ငါးဖမ်းလုပ်ငန်းတွေလည်း တော်တော်များများ ပျက်စီးခဲ့ရတာပါ။ အဲဒီထဲက ခုချိန်ထိ နေရပ်တွေကို ပြန်မရောက်သေးဘဲ ပျောက်ဆုံးနေဆဲ ရေလုပ်သား အရေအတွက် အတိအကျ မသိရသေးပေမဲ့ ရာဂဏန်းနဲ့ချီ ရှိနေသေးတယ်လို့ ဖျာပုံ ရေလုပ်ငန်းရှင်တွေက ပြောပါတယ်။

အဲဒီ မတ်လကတည်းက ရေလုပ်ငန်းတွေ ရပ်နားထားခဲ့ရတာ အခုဆို မိုးတွင်းကာလကလည်း ဖြစ်ပြန်တာမို့ ငါး ပုစွန်ဖမ်းတဲ့ ရေလုပ်ငန်းတွေ ရပ်ထားရတာပါ။ ဒါ့ကြောင့် အခုဆိုရင် အဲဒီ ဖျာပုံနယ်ထဲမှာရှိတဲ့ ရေလုပ်သားတွေ အလုပ်လက်မဲ့တွေလို ဖြစ်နေပြီး နိစ္စဓူဝ ၀မ်းစာအတွက်တောင် အခက်အခဲ ဖြစ်နေကြတယ်လို့ NLD ပါတီက သဘာဝဘေးဒဏ် ကူညီရေး အဖွဲ့က ဦးကြည်ဝင်းက ပြောပါတယ်။

ဦးကြည်ဝင်းတို့ အဖွဲ့ဟာ ဖျာပုံက ဒုက္ခရောက်နေတဲ့ ရေလုပ်သားတွေကို ကူညီဖို့အတွက် ဘယ်လိုအခက်အခဲ ဖြစ်နေကြသလဲ ဆိုတာကို လေ့လာဖို့ ဖျာပုံက ရွာ ၆ ရွာကို သွားရောက်ခဲ့ပါတယ်။ အဲဒီမှာ မိုးအကုန် ရေလုပ်ငန်းတွေ ပြန်စရင်တောင်မှ လုပ်ငန်းတွေ ပြန်လည်ထူထောင်ဖို့ အခက်အခဲ ရှိတယ်လို့ ဦးကြည်ဝင်းက ပြောပြပါတယ်။

“ဖျာပုံက ကျုံကဒွန်း၊ ကျုံကဒွန်းက ဟိုဘက်သွားရင် ရွှေလှေကြီးရယ်၊ ကုလားထိပ်ရယ်၊ ချောင်းဝရယ်၊ ဖိုးဝင်းတောင်ရယ် အဲဒီမှာ ရေလုပ်ငန်းသမားတွေက အများကြီးပဲ။ သူတို့မှာ အလုပ်လက်မဲ့ ဖြစ်ပြီးတော့ ပိုင်ရှင်ဆီမှာ တောင်းရင်လည်း ပိုင်ရှင်က မပေးနိုင်ဘူး။ အခု တပေါင်း၊ တန်ခူးက အလုပ်ရပ်သွားပြီ။ အလုပ်ရှင်တွေကလည်း အကုန်လုံးက မော်တော်တွေမြုပ်၊ ပိုက်တွေမြုပ်သွားတော့ သူတို့မှာလည်း ပြန်စဖို့က ခက်နေတယ်။ သူတို့မှာ အရင်းအနှီး မရှိတော့ လုပ်ငန်းက ပြန်မစနိုင်ဘူး။ အဲဒီမှာ အလုပ်ရှင်ရော၊ အလုပ်သမားတွေရော အကုန်လုံး ဒုက္ခတွေ ဖြစ်နေတယ်။”

NLD ပါတီ သဘာဝဘေးဒဏ် ကူညီရေးအဖွဲ့ရဲ့ ဒီခရီးစဉ်တွင်း ရွာ ၆ ရွာက ပျောက်ဆုံးနေဆဲ ရေလုပ်သားတွေထဲက ကျန်ရစ်တဲ့ မိသားစုဝင် ၄၈ ဦးကို ကျောင်းသားရှိရင် ကျပ်ငွေ ၁၅,၀၀၀၊ ကျောင်းသားမရှိတဲ့ မိသားစုဆိုရင် ကျပ်ငွေ ၁၀,၀၀၀ စီ ကူညီခဲ့ပါတယ်။ လတ်တလော ရွာ ၆ ရွာကို လေ့လာစဉ် အတွင်းမှာပဲ ဒီနေ့ထိ အိမ်ပြန်မရောက်သေးတဲ့ ရေလုပ်သား ၁၄၀ ကျော် ရှိနေတယ်လို့လည်း ပြောပါတယ်။

“ကျောင်းအပ်ဖို့တောင် ခက်နေတော့ အခု ကျနော်တို့က ပေးတော့ ကျောင်းအပ်ဖို့တော့ ရသွားပြီ။ ကလေးတွေက ပညာရေးက ကျောင်းဆက်သင်မယ်။ အခု တချို့က သွားပြီး အဲဒီမှာလုပ်တာ အသက် ၁၅ နှစ်၊ ၁၆ နှစ်၊ ၂၀ တွေတောင် ပါတယ်။ တချို့က အသက် ၂၀ အရွယ် ကလေးတွေ လုပ်နေတဲ့ အပေါ်မှာ မှီခိုပြီး စားနေတဲ့ လူတွေလည်း ရှိတယ်။ တချို့ကလည်း ကလေးတွေဆို စရိတ်တွေ ဘာတွေ ပေးခဲ့တယ်၊ ပိုက်ဆံပေးလိုက်တော့ ဘာပြောလဲဆိုတော့ ဟင်းနဲ့ မစားရတာ ကြာပြီတဲ့၊ အခုတော့ ဟင်းနဲ့ စားရမယ်လို့ ပြောတာ ၀မ်းနည်းစရာ ကောင်းလိုက်တာ။ သူတို့စားနေတာ ဟင်းမပါဘဲ စားနေတာတဲ့။”

NLD အမျိုးသား ဒီမိုကရေစီ အဖွဲ့ချုပ်ရဲ့ သဘာဝဘေးဒဏ် ကူညီရေးအဖွဲ့က ဦးဆောင်သူတဦးဖြစ်တဲ့ ဦးကြည်ဝင်း ရှင်းပြခဲ့တာ ဖြစ်ပါတယ်။

အဓိကအချက်အနေနဲ့ ရေလုပ်ငန်းရှင်တွေဟာ သူတို့လုပ်ငန်းတွေကို ပြန်လည် ထူထောင်နိုင်မယ်ဆိုရင် အားလုံး အလုပ်ပြန်ရကြမှာမို့ ဒီလုပ်ငန်းတွေ ပြန်လည်လုပ်လာနိုင်အောင် ၀ိုင်းကူညီပေးဖို့ လိုတယ်လို့လည်း ဦးကြည်ဝင်းက ပြောပါတယ်။ မြန်မာနိုင်ငံ ရေလုပ်ငန်းရှင်များအသင်း အပါအ၀င် တခြား လူမှုကူညီရေး အဖွဲ့တွေက ဒုက္ခရောက်နေကြတဲ့ ရေလုပ်သားတွေကို အကူအညီပေးတယ် ဆိုပေမဲ့ ထိရောက်တဲ့ လုပ်ငန်းတွေ ပြန်လည်မတည်နိုင်မယ့် ကူညီမှုမျိုးတွေ မတွေ့ရဘူးလို့လည်း ပြောပါတယ်။

အခုဆိုရင် ပင်လယ်ထဲ မျောသွားတဲ့ ရေလုပ်သားတွေဟာ ၂ လနီးပါး ရှိနေပြီမို့ ပြန်မလာသေးတဲ့ သူတွေအတွက် အသက်ရှင်လျက် ရှိပါ့မလားဆိုတဲ့ မျှော်လင့်ချက်တွေလည်း မိသားစုတွေကြား ပိုအားနည်းလာပါတယ်။ ဖျာပုံနယ်ဟာ ရေတံငါလုပ်ငန်း အားထားရပ်တည်တဲ့ ဒေသမို့ အခုဆို ဒီလုပ်ငန်းတွေ ပျက်စီးသွားတဲ့အတွက် တခြားစီးပွားရေးနဲ့ အရောင်းအ၀ယ်တွေပါ ထိခိုက်မှု ရှိနေတယ်လို့ ဖျာပုံနယ် ခါးပြတ်ရွာက ဒေသခံတဦးက ရှင်းပြပါတယ်။

“သူတို့တွေက အရင်တုန်းကလိုတော့ ၀ယ်ခြမ်းစားတာ မတွေ့ဘူး။ အလုပ်လက်မဲ့လေးတွေ ဖြစ်သွားတော့၊ အမတို့အပိုင်းက တံငါပိုင်းဆိုတော့ တံငါနဲ့ ဆက်သွယ်နေတဲ့ နေရာလေးတွေမှာတော့ သူတို့ ပြန်ထူထောင်ဖို့တောင် နည်းနည်း အခက်အခဲ ရှိကြတယ်။ သူတို့ရဲ့ စားဝတ်နေရေးကြောင့် လုပ်ငန်းရှင်ပိုင်းတောင် အခက်အခဲတွေ ဖြစ်သွားတယ်။”
ဖျာပုံဒေသခံတဦး ပြောပြခဲ့တာ ဖြစ်ပါတယ်။

တနာရီကို မိုင် ၃၀ ကျော်နှုန်းလောက်သာ ရှိနိုင်တယ်လို့ မိုးလေ၀သက ခန့်မှန်းချက် ထုတ်ခဲ့ပေမဲ့ တနာရီကို မိုင် ၇၀ ကျော်နှုန်းထိ လေပြင်းမုန်တိုင်းတွေ တိုက်ခတ်ခဲ့တာကြောင့် ဖျာပုံ အပါအ၀င် မြောင်းမြ၊ လပွတ္တာ၊ ဒေးဒရဲအပြင် ဧရာဝတီတိုင်းအတွင်းက ရေလုပ်ငန်းနဲ့ အသက်မွေးနေသူတွေ ပင်လယ်ထဲ မျောသွားကြသလို ငါးဖမ်းလှေတွေ၊ ငါးဖမ်းဖောင်တွေနဲ့အတူ ရေလုပ်ငန်းသုံး ပစ္စည်းတွေအားလုံး ပျက်စီးဆုံးရှုံးခဲ့ကြတာ ဖြစ်ပါတယ်။

စီးပွားရေး နိုဘဲလ်ဆုရှင် မိုဟာမက် ယူနွတ်စ် ရာထူးမှထွက်

By ဗွီအိုအေ (မြန်မာဌာန) သောကြာ, 13 မေ 2011

ဘင်္ဂလားဒေ့ရ်ှနိုင်ငံမှာ အသေးစား ငွေချေးဘဏ်ကို စတင် တည်ထောင်ခဲ့သူ နိုဘဲလ် ငြိမ်းချမ်းရေးဆုရင် မိုဟာမက် ယူနွတ်စ် (Mohammad Yunus) ဟာ ဘဏ်အကြီးအကဲ ရာထူးကနေ နှုတ်ထွက်သွားပါပြီ။ သူ့ကို လက်ရှိ ဘဏ်အကြီးအကဲ ရာထူးကနေ ထုတ်ပစ်ဖို့ ဘင်္ဂလားဒေ့ရှ် အစိုးရက ဆုံးဖြတ်ပြီး နောက်တနေ့မှာ အဲဒီ ဆုံးဖြတ်ချက်ကို တရားရုံးက အတည်ပြုပေးလိုက်တာကြောင့် အခုလို နှုတ်ထွက်သွားတာပါ။

သူတည်ထောင်ခဲ့တဲ့ ဂရာမီးန် (Grameen) ဘဏ်မှာ မလိုလားအပ်တဲ့ အနှောင့်အယှက်တွေ ဖြစ်ပေါ်လာမှာ စိုးတဲ့အတွက် သူ့အနေနဲ့ အခုလို ရာထူးက နှုတ်ထွက်ပေးလိုက်တာ ဖြစ်တဲ့အကြောင်း ကြာသပတေးနေ့က ထုတ်ပြန်တဲ့ ကြေညာချက်ထဲမှာ မစ္စတာ ယူနွတ်စ်က ဖော်ပြထားပါတယ်။

သူ့ရဲ့ လက်ထောက်အဖြစ် တာဝန်ထမ်းဆောင်ခဲ့တဲ့ နာဂျာဟန် ဘီဂမ် (Nurjahan Begum) က သူ့နေရာမှာ အစားထိုး တာဝန်ယူသွားမယ်လို့ မစ္စတာ ယူနွတ်စ်က ပြောပါတယ်။
မရှိဆင်းရဲသားတွေကို ငွေချေးနိုင်ဖို့ သူ စတင်တည်ထောင်ခဲ့တဲ့ ဘဏ်ရဲ့ အကြီးအကဲအဖြစ် ဆက်လက် တာဝန်ယူခွင့်ပြုဖို့ ပြီးခဲ့တဲ့ သီတင်းပတ်အတွင်း အယူခံတင်ခဲ့တာကို ဘင်္ဂလားဒေ့ရှ် တရားရုံးချုပ်က ပယ်ချလိုက်တာပါ။

အနားယူရမယ့် အသက် ၆၀ ထက်ကျော်ပြီး ဘဏ်အကြီးအကဲအဖြစ် ဆက်လက် တာဝန်ယူနေတဲ့အတွက် အစိုးရက သူ့ကို ရာထူးက ဖြုတ်ချဖို့ ဆုံးဖြတ်လိုက်တာပါ။ မစ္စတာ ယူနွတ်စ်ဟာ အခု အသက် ၇၀ ရှိပြီ ဖြစ်ပါတယ်။

၂၀၀၇ ခုနှစ်မှာ သူ့ကိုယ်ပိုင်ပါတီ ထောင်ဖို့ ကြိုးစားခဲ့တာကြောင့် အစိုးရက သူ့ကို နိုင်ငံရေးအရ အခုလို ဖြုတ်ချလိုက်တာ ဖြစ်မယ်လို့ သူ့ကို ထောက်ခံသူတွေကတော့ ယုံကြည်နေကြပါတယ်။

ဘင်လာဒင်ကိုဖမ်းဖို့ အမေရိကန် စီးနင်းမှု ပါကစ္စတန်လွှတ်တော် ရှုတ်ချ

By ဗွီအိုအေ (မြန်မာဌာန) စနေ, 14 မေ 2011

ပါကစ္စတန်နိုင်ငံထဲကို ၀င်ပြီး အယ်လ်ခိုင်းဒါး (Al Qaida) ခေါင်းဆောင် အိုစမာ ဘင်လာဒင် (Osama Bin Laden) ကို စီးနင်းသုတ်သင်တဲ့ ကိစ္စအတွက် အမေရိကန်နိုင်ငံကို ပါကစ္စတန် လွှတ်တော်က ရှုတ်ချလိုက်ပါတယ်။

တချိန်တည်းမှာပဲ အဲဒီ စစ်ဆင်ရေးနဲ့ ပတ်သက်တဲ့ ဓာတ်ပုံနဲ့ ဗွီဒီယိုတွေကို အမေရိကန်နိုင်ငံက အဖွဲ့အစည်း တချို့ကလည်း တောင်းဆိုနေကြပါတယ်။

သောကြာနေ့က လုပ်ခဲ့တဲ့ ပါကစ္စတန် လွှတ်တော်နဲ့ အမျိုးသား စုံညီအစည်းအဝေးမှာ အမျိုးသား ထောက်လှမ်းရေးအဖွဲ့ အကြီးအကဲနဲ့ ထိပ်တန်း စစ်ခေါင်းဆောင်တွေကို ဥပဒေပြု အဖွဲ့တွေက မေးခွန်းတွေ ထုတ်ခဲ့ကြပါတယ်။

တံခါးပိတ် အစည်းအဝေး အပြီးမှာ လွတ်လပ်တဲ့ ကော်မရှင်တခု ဖွဲ့စည်းပြီး ဒီဖြစ်ရပ်ကို စုံစမ်းစစ်ဆေးဖို့ တောင်းဆိုခဲ့ကြပါတယ်။

အမေရိကန်နိုင်ငံက ဥပဒေဆိုင်ရာ စောင့်ကြည့်လေ့လာရေး Judicial Watch အဖွဲ့က သတင်းလွတ်လပ်ခွင့်ဆိုင်ရာ ဥပဒေအရ ဘင်လာဒင် စစ်ဆင်ရေးနဲ့ဆိုင်တဲ့ ဓာတ်ပုံတွေကို ထုတ်ပေးဖို့ သောကြာနေ့က ဥပဒေကြောင်းအရ အမှုဖွင့် တောင်းဆိုခဲ့ပါတယ်။

ဒါပေမဲ့ ပန်တဂွန် စစ်ဌာနချုပ်က တောင်းဆိုတဲ့ ရက် ၂၀ အတွင်းမှာ ထုတ်ပေးနိုင်မှာ မဟုတ်ဘူးလို့ တုံ့ပြန် ပြောဆိုလိုက်ပါတယ်။

ဒီအတောအတွင်း စစ်ဆင်ရေးနဲ့ ပတ်သက်တဲ့ ဓာတ်ပုံတွေကို ထုတ်ပေးဖို့ မလိုအပ်ဘူး ဆိုပြီးတော့လည်း ကာကွယ်ရေး ၀န်ကြီးဌာနက AP သတင်းကို ပြောဆိုခဲ့ပါတယ်။

အမေရိကန် ဆန့်ကျင်မှုတွေ ထပ်ပြီး မဖြစ်လာအောင် ဘင်လာဒင်ကို သုတ်သင်တဲ့ စစ်ဆင်ရေးက ဓာတ်ပုံတွေကို ထုတ်ပြန်မှာ မဟုတ်ဘူးလို့ သမ္မတ အိုဘားမား (Barack Obama) က ပြီးခဲ့တဲ့ အပတ်က ပြောဆိုခဲ့ပါတယ်။

ဘင်လာဒင် ပုန်းအောင်းခဲ့တဲ့ နေရာက ပိုင်ရှင်မဲ့ ဓာတ်ပုံတွေကို တွေ့ခဲ့ကြောင်း အမေရိကန် တာဝန်ရှိသူတွေက သောကြာနေ့က ပြောဆိုလိုက်ပါတယ်။ အဲဒီဓာတ်ပုံတွေကို ဘင်လာဒင် ကြည့်ခဲ့ရသလား ဆိုတာကိုတော့ ဘယ်သူကမှ အတည်ပြု ပြောဆိုနိုင်တာမျိုး မရှိဘူးလို့ သိရပါတယ်။

မတရား အနိုင်ကျင့်မှု တိုင်တန်းသူကို ပြည်ခိုင်ဖြိုး စည်းရုံးရေးမှူးက ခြိမ်းခြောက်

2011-05-14 RFA

သာယာဝတီခရိုင် သုံးဆယ်မြို့မှာ ကိုင်းမြေတွေ စိုက်ပျိုးမရအောင် တမံ တုတ်လို့ အထက်ကို တိုင်ကြားသူတွေ ကို ကြံ့ခိုင်ဖွံ့ဖြိုးရေးပါတီ စည်းရုံးရေးမှူး က ခြိမ်းခြောက်ခဲ့တယ်လို့ သိရှိရပါတယ်။

သုံးဆယ်မြို့အပိုင် ဇီးပွဲကျေးရွာရှိ ဘိုးစဉ်ဘောင်ဆက်က တောင်သူ ၂ဝ လောက် စိုက်ပျိုးလုပ်ကိုင်လာတဲ့ ဦးပိုင်ပေါက် ကိုင်းမြေ ဧက သုံးရာခန့်အပေါ်မှာ၊ မိုးအကျ ပေါ်ပေါက်လာတဲ့ ယာယီ လယ်ကြားအင်းကို လုပ်ကိုင်ခွင့်ရသူ ကြံ့ခိုင်ဖွံ့ဖြိုးရေးပါတီ စည်းရုံးရေးမှူး ဦးရဲဒင်က တမံတုတ် ပိတ်ဆို့တာကို တိုင်ကြားခဲ့တဲ့အတွက့် အခုလို ခြိမ်းခြောက်ခံရတာဖြစ်ကြောင်း သာယာဝတီ ဒေသခံတဦးက ပြောပြပါတယ်။

“သုံးဆယ်မြို့က ပြည်ခိုင်ဖြိုးပါတီ စည်းရုံးရေးမှူး သီဟသုဓမ္မ ဦးရဲတင် ဆိုတာ အင်းလုပ်ငန်းတွေ လုပ်တယ်ပေါ့။ သူက ကိုင်းတွေကို စက်ယန္တယားကြီးတွေနဲ့ ကန်ဘောင်အမြင့်ကြီးတွေ လုပ်လိုက်တော့ လယ်သမားတွေ စိုက်ပျိုးရေး လုပ်လို့ မရတော့တာ ၂ နှစ်ရှိပြီ။ ဒီနေ့ လယ်သမားတွေက သက်ဆိုင်ရာကို တိုင်တယ်။ တိုင်တော့လည်း အာဏာပိုင် အဖွဲ့အစည်းတွေက အရေးမယူဘူး။ အဲဒီတော့ ဦးရဲဒင်က ဘာတဆင့် တိုးလုပ်လဲဆိုတော့ ရဲတပ်ဖွဲ့ဝင်တွေ ခေါ်သွားပြီး သေနတ်တွေဖောက်တယ်၊ ရိုင်းရိုင်းစိုင်းစိုင်း ခြိမ်းခြောက်တယ်”

ဧပြီလ ၁ဝ ရက်နေ့က တကြိမ်၊ မေလ ၉ ရက်နေ့က တကြိမ်၊ စုစုပေါင်း နှစ်ကြိမ် ခြိမ်းခြောက်ခဲ့ရာမှာ ဇီးပွဲ ရွာခံတဦးကလည်း သူ့အတွေ့အကြုံကို ခုလိုရှင်းပြပါတယ်။

“သူက ရဲတွေခေါ်ပြီး ရွာဘေးမှာ သေနတ်တွေဖောက်တယ်။ ရဲ လေးငါးယောက် ပါတယ်။ တိုင်တဲ့ကောင် ငါနဲ့ တွေ့မယ်- ငါ့ဘာကောင် ထင်လို့လဲ ပစ်သတ်ပစ်မယ် ဆိုပြီးတော့ သေနတ်ဖောက်တယ်။ ညနေ ၆ နာရီလောက်ကတည်းက ရွာပတ်လည်မှာ ကြိမ်းနေတာ။ ရွာအတွင်းထဲတော့ မဝင်ဘူး၊ ရွာဘေးနားက သူတို့ အလုပ်လုပ်တဲ့နေရာတွေ အနားမှာ”။

ပြည်ထဲရေး ဝန်ကြီးဟောင်း မောင်ဦး ကျေးရွာ အုပ်ချုပ်ရေးမှူးတဦးကို လက်တန်း အလုပ်မှဖြုတ်

ရခိုင်ပြည်နယ် အတွင်း ကြံ့ဖွံ့ စည်းရုံးရေး ခရီးစဉ်ကို ပြုလုပ်နေသော ယခင်ပြည်ထဲရေး ၀န်ကြီး မောင်ဦးသည် ကျေးရွာ အုပ်ချုပ်ရေးမှူး တစ်ဦးကို လက်တန်း အလုပ်မှ ဖြုတ်ပစ်ခဲ့သည်ဟု သတင်း ရရှိသည်။

လက်တန်း အလုပ်ဖြုတ်ခံရသော ကျေးရွာ အုပ်ချုပ်ရေးမှူးမှာ မောင်တောမြို့နယ်မှ အလယ်သံကျော် ကျေးရွာ အုပ်ချုပ်ရေးမှူး ရခိုင်အမျိုးသား ဦးအောင်သန်းဦး ဖြစ်ပြီး မေလ ၁၄ ရက်နေ့တွင် အလုပ်မှ ဖြုတ်ခံခဲ့ရခြင်း ဖြစ်ကြောင်း ကျေးရွာသားများက ပြောသည်။

" မနေ့က ပြည်ထဲရေး ၀န်ကြီးဟောင်း မောင်ဦး အလယ်သံကျော်လာတယ်။ သူ့ကို ဒီကနေ့ဘဲ အလုပ်က ဖြုတ်စာ ထွက်လာတယ်။ သူကို အလုပ်က ဖြုတ်ပစ်တာက ကြံ့ဖွံ့ ပြုလုပ်တဲ့ လူထု အစည်းအဝေးကို မတက်တဲ့ အတွက် ဖြစ်ပါတယ်" ဟု ကျေးရွာသား တစ်ဦးက ပြောသည်။

အလုပ်ဖြုတ်ခံရသူ အုပ်ချုပ်ရေးမှူး ဦးအောင်သန်းဦးနှင့် နီးစပ်သူများ အပြောအရ ၀န်ကြီးဟောင်း မောင်ဦး ပြုလုပ်သော ကြံ့ဖွံ့ လူထု စည်းဝေးပွဲသို့ ကျေးရွာ အုပ်ချုပ်ရေးမှူးကို ဖိတ်ကြားခြင်း မရှိသလို အစည်းအဝေး ပြုလုပ်မည့် အကြောင်းကို တစ်စုံတရာ အသိပေးခြင်းလည်း မရှိကြောင်း သိရသည်။

" အုပ်ချုပ်ရေးမှူးက ခုလို လူကြီး တစ်ဦးလာတဲ့ အခါ သူ့ကို မဖိတ်တော့ သူက ကြောက်ပြီး သူတို့ လုပ်တဲ့ အစည်းအဝေးကို မသွားရဲဘူး။ ဒါကို ၀န်ကြီးဟောင်း မောင်ဦးက သူတို့ အစည်းအဝေး လုပ်တာကို မလာတာဟာ သူ့တို့ကို ပမာမခန့် လုပ်တယ်ဆိုပြီး ခယကကို အကြောင်းကြားကာ အလုပ်မှ ချက်ချင်း ဖြုတ်ခိုင်းတယ်။ ဒီနေ့တော့ သူ အလုပ်ပြုတ်သွားခဲ့ပြီ ဖြစ်ပါတယ်" ဟု သူနှင့် နီးစပ်သူက ပြောသည်။

ပြည်ထဲရေး ၀န်ကြီးဟောင်း မောင်ဦးသည် ရခိုင်ပြည်နယ်တွင် ကြံ့ဖွံ့ စည်းရုံးရေးကို ပြုလုပ်နေရာ မေလ ၁၃ ရက်နေ့ နံနက် ၉ နာရီခွဲတွင် မောင်တောမြို့နယ် အလယ်သံကျော်သို့ ရောက်ရှိလာပြီး ကြံ့ဖွံ့ ပါတီကို ထောက်ခံ အားပေးကြရန် စည်းရုံး လုံဆော်ခဲ့သည်။

မောင်ဦးမှာ ရခိုင်ပြည်နယ်တွင် အနောက်ပိုင်း တိုင်းးမှူး ဘ၀ဖြင့် တာဝန် ထမ်းဆောင်စဉ်ကလည်း ယခုကဲ့သို့ အာဏာပြကာ ထင်ရာစိုင်း လုပ်ဆောင်ခဲ့မူများ ပြုလုပ်ခဲ့သည်။ ပြည်သူများနှင့် သူ့လက်အောက် ငယ်သားများကိုလည်း လူမြင်ကွင်းတွင် လက်သီးဖြင့် ပစ်ထိုးခဲ့သည့် အထိ ပြုလုပ်ခဲ့သဖြင့် မောင်ဦးမှာ နာမည်ဆိုးဖြင့် ကျော်ကြားခဲ့သည်။

အစိုးရသစ်တက်လာပြီး ဥပဒေနှင့် အညီ အုပ်ချုပ်နေပါသည်ဆိုသော ဦးသိန်းစိန် အစိုးရ လက်ထက်တွင် ကြံ့ဖွံ့ ခေါင်းဆောင်တစ်ဦးက အာဏာပါဝါပြပြီး သာမန် ကျေးရွာ အုပ်ချုပ်ရေးမှူး တစ်ဦးကို တစ်စုံတရာ ခေါ်ယူ စစ်ဆေး မေးမြန်းမူ မရှိဘဲ လက်တန်း ဖြုတ်ပစ်ခြင်း အပေါ် ဒေသခံ ပြည်သူများက နားမလည်အောင် ဖြစ်နေကြသည်ဟု သတင်း ရရှိသည်။