ဒီနေ့ဖတ်စရာ သတင်းများ (ဧပြီလ ၂၄ ရက်)

- နာရေးကူညီမှုအသင်း ၁ဝ နှစ်ပြည့် အခမ်းအနား ကျင်းပ
- ပ်ံက်ေစ်းသည္မ်ား NLD အတုိးမဲ့ ေငြေခ်း
- ငွေကြေးအစားထိုး ပစ္စည်းသုံးလျှင် အရေးယူခံရမည်
- ယီမင် သမ္မတ ရာထူးက ဆင်းဖို့ သဘောတူ
- အမေရိကန် အဝေးထိန်း ဒုံးလေယာဉ်နဲ့ လစ်ဗျားကိုတိုက်ပြီ
- ဆီးရီးယားရဲတွေ ပစ်ခတ်လို့ ဆန္ဒပြသူ ၇၀ ကျော်သေဆုံး
- မကွေးတိုင်းမှ ရထားလမ်းဖောက်လုပ်မှု လယ်ယာမြေတွေ ထိခိုက်ဆုံးရှုံး
- မြိုင်ကြီးငူစခန်း တိုက်ခိုက်ခံရ
- မလေးရှားမှာ မြန်မာအလုပ်သမားတွေ ဆန္ဒပြ
- ငါးနှစ်အတွင်း မိုဘိုင်းဖုန်း အဆ ၃၀ နီးပါး တိုးပွားအောင်လုပ်မည်ဟုဆို

နာရေးကူညီမှုအသင်း ၁ဝ နှစ်ပြည့် အခမ်းအနား ကျင်းပ

2011-04-23

ရုပ်ရှင်သရုပ်ဆောင် ကိုကျော်သူ ဦးဆောင်တဲ့ နာရေးကူညီမှုအသင်း ဆယ်နှစ်ပြည့် အခမ်းအနားကို ဒီကနေ့ မနက်ပိုင်းက ရန်ကုန်မြို့မှာ ကျင်းပ ပြုလုပ်ခဲ့ပါတယ်။

အခမ်းအနားကို မနက် ၉ နာရီမှာ စတင်ခဲ့ပြီး လူမှုရေးအသင်း ဖြစ်ပေါ်လာအောင် တိုက်တွန်းခဲ့တဲ့ ရုပ်ရှင်အနုပညာရှင်၊ ကွယ်လွန်သူ ဦးသုခ ရဲ့ ရုပ်တုဖွင့်ပွဲကိုလည်း တပါတည်း ကျင်းပခဲ့ပါတယ်။

ဒီကနေ့ အခမ်းအနားကို မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ကိုယ်တိုင် တက်ရောက် ဖွင့်လှစ်ပေးခဲ့ပြီး၊ ကိုကျော်သူတို့ရဲ့ လူမှု ကူညီထောက်ပံ့ရေး လုပ်ငန်းတွေအတွက် အလှူငွေ အမေရိကန် ဒေါ်လာ တသောင်း ငါးထောင်ကိုလည်း ဒေါ်အောင်ဆန်းစုကြည်က လှူဒါန်းသွားခဲ့တယ်လို့ သိရပါတယ်။

ဒီကိစ္စနဲ့ ပတ်သက်ပြီး ကိုကျော်သူက အခုလို ပြောပါတယ်။

“အမှန်တော့ ၁ဝ နှစ်ပြည့်က ဇန်နဝါရီလ ၁ ရက်နေ့က ပြည့်တာပါ။ နာရေးကူညီမှုအသင်း ရုံး အဆောက်အဦး ပြီးတာကို စောင့်နေတာနဲ့ ဒီနေ့မှ လုပ်ဖြစ်သွားတာပါ။ ဒီနေ့ ဒေါ်အောင်ဆန်းစုကြည်ကလည်း မျက်စိခွဲခန်းအတွက် ဒေါ်လာ ၁ သောင်းခွဲ လာရောက် လှူဒါန်းပါတယ်။ လာလှူဒါန်းတဲ့အတွက်လည်း ကျေးဇူး အများကြီး တင်တယ်။ ပြီးတော့ ဖွင့်ပွဲ အခမ်းအနားကို ဖဲကြိုးဖြတ် ဖွင့်ပေးလိုက်တဲ့ အတွက် ကျနော် အများကြီး ကျေးဇူးလည်းတင်တယ်၊ ဝမ်းလည်းသာတယ်၊ ဂုဏ်လည်း ယူပါတယ်”

လွန်ခဲ့တဲ့ ၁ဝ နှစ်က နာရေးကူညီမှုအသင်းနဲ့ စတင်ခဲ့ပြီး အခုအခါ လူမှု ကူညီစောင့်ရှောက်ရေး လုပ်ငန်းမျိုးစုံကို လုပ်ဆောင်နေတဲ့ အသင်းတခု ဖြစ်လာခဲ့ကြောင်း၊ အခုအခါ အခမဲ့ သုခ ဆေးခန်း၊ ကလေးများအတွက် ဖြည့်စွက် ပညာသင်ကြားရေး၊ အက သင်တန်း၊ ဂီတ နဲ့ ပန်းချီသင်တန်း အပါအဝင်၊ လူကြီးများအတွက် လုပ်ငန်း အထောက်အကူပြု အင်္ဂလိပ်စာသင်တန်း စတဲ့ လူမှုကူညီရေး လုပ်ငန်းတွေကို လုပ်ကိုင်နေပြီး စေတနာ့ဝန်ထမ်း လုပ်သား ၅ ရာကျော် ပါဝင်လုပ်ဆောင်နေကြောင်း ကိုကျော်သူက ရှင်းပြခဲ့ပါတယ်။

အဲဒီ စေတနာ့ဝန်ထမ်း လုပ်ဆောင်သူတွေထဲမှာ လူငယ်အများစု ပါဝင်ပြီး အသက် ၁၅ နှစ် ၁၆ နှစ်အရွယ် အထက်တန်း ကျောင်းသူကျောင်းသားတွေ ပါဝင်ကြောင်း ပြောပြပါတယ်။

ဒီကနေ့ အခမ်းအနားကို ဂီတပညာရှင် ကိုရဲလွင်၊ ကိုနေဝင်း တို့နဲ့အတူ သားထွေး၊ မေခလာ၊ ဥတ္တရအလင်း ကိုတိုးလွင်၊ ညီညီလွင် စတဲ့ တေးရေးတေးဆို ဂီတ အနုပညာရှင်တွေ သွားရောက် ဖျော်ဖြေခဲ့ကြတယ်လို့ သိရပါတယ်။

ဒီ နှစ်ပတ်လည် အခမ်းအနားကို အမျိုးသား ဒီမိုကရေစီအဖွဲ့ချုပ် ခေါင်းဆောင်တွေ တက်ရောက်ခဲ့သလို တခြား လူမှု ကယ်ဆယ်စောင့်ရှောက်ရေး အဖွဲ့ အစည်းတွေ၊ စာနယ်ဇင်းသမားတွေ၊ အနုပညာရှင်တွေ၊ အလှူရှင်တွေ အပါအဝင် စုစုပေါင်း လူ တသောင်းလောက် တက်ရောက်ခဲ့ပါတယ်။

ပ်ံက်ေစ်းသည္မ်ား NLD အတုိးမဲ့ ေငြေခ်း

By ကိုဇော်ဝင်းလှိုင် စနေ, 23 ဧပြီ 2011

အရင်းအနှီးမတတ်နိုင်တဲ့ ပျံကျ အသေးစား ဈေးသည်တွေကို အထောက်အပံ့ဖြစ်စေမယ့် အတိုးမဲ့ ငွေချေးစနစ်ကို NLD က စမ်းသပ် အကောင်အထည် ဖော်နေပါတယ်။ ဒီစနစ်သာ အောင်မြင်မှုရရှိခဲ့ရင် တခြား မြို့နယ်တွေကိုပါ တိုးချဲ့ လုပ်ဆောင်သွားမယ့်အကြောင်း လုပ်ငန်းတွေကို ကြီးကြပ် ဆောင်ရွက်ပေးနေတဲ့ NLD ဗဟိုအမျိုးသမီးအဖွဲ့ တာဝန်ခံ ဒေါက်တာ မေ၀င်းမြင့်က ပြောပါတယ်။ အပြည့်အစုံကိုတော့ ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြထားပါတယ်။

ဒီငွေချေးတဲ့စနစ်ကို ရန်ကုန်မြို့၊ ဗဟန်းမြို့နဲ့ တာမွေမြို့ကြားမှာရှိတဲ့ ရာပြည့်ဈေးမှာ စတင် အကောင်အထည် ဖော်နေတာပါ။ အခုလို ဈေးသည်တွေကို ငွေချေးနိုင်ဖို့အတွက် NLD ဗဟိုအမျိုးသမီးအဖွဲ့က သူတို့ကိုယ်ပိုင် ရန်ပုံငွေ ၁၀ သိန်းနဲ့ စတင်မတည်ပြီး လုပ်ဆောင်နေတာဖြစ်ပါတယ်။
NLD က လက်ရှိအကောင်အထည်ဖော်နေတဲ့ အတိုးမဲ့ငွေချေးစနစ်အကြောင်း ဗဟိုအမျိုးသမီးအဖွဲ့တာဝန်ခံ ဒေါက်တာ မေ၀င်းမြင့်က ပြောပြပါတယ်။

“ဖေဖော်ဝါရီလ ၁ ရက်နေ့ကစပြီးတော့ တယောက် ၂ သောင်းနှုန်းနဲ့ စလုပ်ပေးတာပေါ့။ လူ ၅၀ ကို။ အခုဆိုရင် ဒါ ၃ လမြောက် ဖြစ်လာပြီပေါ့နော်။ ဒါကို သူတို့က စမ်းသပ်ကာလ ၆ လအထိကို လုံးဝ အတိုးမယူဘဲနဲ့ ပေးပါတယ်။ ၆ လပြည့်သွားရင်တော့ စာရွက်စာတမ်းဖိုး ဆိုပြီးတော့ သူတို့ စေတနာရှိသလောက် နည်းနည်း အလှူငွေ ထည့်ခိုင်းမှာပေါ့။ အတိုးမဟုတ်ပါဘူး။ အသုံးပြုတဲ့ စာရွက်စာတမ်းဖိုးပဲ ယူပါမယ်။ တကယ်လို့ ဒီ ရာပြည့်ဈေးမှာ စမ်းသပ်လို့ အောင်မြင်ရင် တခြား မြို့နယ်တွေမှာရှိတဲ့ ဈေးတွေမှာလည်း ဆက်ပြီးတော့လုပ်သွားဖို့ ရှိပါတယ်။”

ဗဟန်းမြို့နယ်အတွင်းမှာရှိတဲ့ အမျိုးသမီးအဖွဲ့ဝင်တွေနဲ့ တွေ့ဆုံတဲ့အချိန် NLD အတွင်းရေးမှူးချုပ် ဒေါ်အောင်ဆန်းစုကြည်ကို သူတို့အခက်အခဲတွေ တင်ပြရာက အခုလို အတိုးမဲ့ ငွေချေးဖို့ စတင် အကောင်အထည် ပေါ်လာတာဖြစ်ပါတယ်။

“ဇန်န၀ါရီလက ခရမ်းကိုယ်စားလှယ် ထောင်ထဲမှာဆုံးသွားတဲ့ ဦးတင်မောင်ဝင်းရဲ့ နှစ်ပတ်လည်မှာ ဒေါ်စုကနေ သူတို့အိမ်သွားရင်းနဲ့မှ အဲဒီမှာရှိတဲ့ ဗဟန်းမြို့နယ် အမျိုးသမီးတွေကို တွေ့တော့ စီးပွားရေး အခက်အခဲတွေကို မေးတော့ ဈေးရောင်းတဲ့အခါမှာ အခက်အခဲတွေ့တယ်ဆိုလို့ ဒေါ်စုကနေပြီးတော့ အတိုးမဲ့ ငွေချေးစနစ်နဲ့ အသေးစား ငွေချေးတာကို ရာပြည့်ဈေးမှာရှိတဲ့ ဈေးသည်တွေကို စပြီးတော့ ပေးတာဖြစ်ပါတယ်။ ဒါကို သူက အမျိုးသမီးအဖွဲ့ကို ဦးဆောင်ခိုင်းတာ ဖြစ်တဲ့အတွက် သူတို့အဖွဲ့က ဦးဆောင်တာပေါ့နော်။ ပထမဆုံးကတော့ လူ ၁၀၀ လို့ မှန်းထားပေမဲ့ တကယ်ဖိတ်တဲ့အခါကျတော့ လူ ၅၀ ပဲလာပါတယ်။ တချို့ကလည်း မလာရဲတာပေါ့နော်။”

ဒေါ်အောင်ဆန်းစုကြည်နဲ့ တခြား NLD ခေါင်းဆောင်တချို့ရဲ့ ဓါတ်ပုံတွေပါတဲ့ လက်ဆောင်ပစ္စည်းတွေ ရောင်းချလို့ရတဲ့ ရန်ပုံငွေထဲက ၁၀ သိန်းကို အမျိုးသမီးအဖွဲ့က မတည်ငွေအဖြစ်နဲ့ စတင် အကောင်အထည် ဖော်ခဲ့တာလို့ ဆိုပါတယ်။

တကယ်တော့ အရင်းအနှီး မတည်ငွေ မတတ်နိုင်ကြတဲ့ အသေးစား အမျိုးသမီး လုပ်ငန်းရှင်တွေကို ငွေချေးပေးတာ အခုမှ စတင်တာတော့ မဟုတ်ပါဘူး။ ဘင်္ဂလားဒေ့ရ်ှနိုင်ငံက စီးပွားရေးပညာရှင် မိုဟာမတ်ယူးနက်စ် (Mohammad Yunus) ရဲ့ ဂရာမင်းန် (Grameen) ဘဏ်ဟာ အဲဒီလို အသေးစား ငွေချေးတဲ့နေရာမှာ အောင်မြင်မှုတွေ ရရှိနေတဲ့ စီမံကိန်းဖြစ်ပါတယ်။ Grameen ဘဏ်ဟာ သမာရိုးကျ အတိုးနှုန်းများများယူပြီး ငွေချေးငှားတဲ့ စီးပွားရေးဘဏ်တွေနဲ့ မတူဘဲ အသေးစား စီးပွားရေး လုပ်ငန်းရှင်တွေကို အတိုးနှုန်းသက်သက်သာသာနဲ့ ငွေချေးပေးခဲ့ရာက ဘင်္ဂလားဒေ့ရ်ှနိုင်ငံ တင်သာမက ကမ္ဘာအနှံ့ လူသိများလာပြီး ၂၀၀၆ ခုနှစ်မှာ နိုဘဲလ်ငြိမ်းချမ်းရေးဆုပါ ချီးမြင့်ခံခဲ့ရတာဖြစ်ပါတယ်။ Grameen ဘဏ်က ငွေချေးကြသူ ၉၇ ရာခိုင်နှုန်းဟာ အမျိုးသမီးလုပ်ငန်းရှင်တွေ ဖြစ်တယ်လို့ ဆိုပါတယ်။

NLD က အခု စတင်အကောင်အထည်ဖော်နေတဲ့ အတိုးမဲ့ ငွေချေးစနစ်ဟာလည်း Grameen ဘဏ်ရဲ့ စနစ်နဲ့ အရင် ရှိခဲ့ဖူးတဲ့ မြန်မာနိုင်ငံအတွင်းက အတွေ့အကြုံတွေ ပေါင်းစပ် လုပ်ဆောင်နေတာဖြစ်တယ်လို့ ဒေါက်တာ မေ၀င်းမြင့်က ဆက်ပြောပါတယ်။

“အဲဒါ (ဂရာမင်းန် ဘဏ်စနစ်) ကိုလည်း ယူပါတယ်။ အန်ကယ် ဦးဝင်းတင် ပြောပြတာကတော့ ဟိုးကတည်းကိုက စာရေးဆရာ ဆရာဦးသော်တာဆွေ ကနေပြီးတော့ အဲဒီလိုပဲပေါ့နော်၊ ခေါင်းရွက်ဗျက်ထိုး ဈေးသည်လေးတွေကို မနက်ငွေပေး၊ ညနေငွေပြန်ယူတဲ့ဟာမျိုး ငွေချေးပေးတာ အောင်မြင်တယ် ဆိုတဲ့အကြောင်း သူက ဒေါ်စုကို ပြောပြတာရှိပါတယ်။ အဲဒီတုန်းက အတွေ့အကြုံကလည်း အောင်မြင်တယ် ဆိုတာကို ဦးဝင်းတင်က ပြောပြတဲ့အတွက် ဒေါ်စုကနေပဲ အဲဒီမှာ ဆုံးဖြတ်ပြီးတော့ ကျမတို့ စခဲ့တာဖြစ်ပါတယ်။”

NLD က လက်ရှိ အတိုးမဲ့ငွေချေးငှားနေတဲ့ လုပ်ငန်းတွေကို ဦးစီးလုပ်ဆောင်ပေးနေတဲ့ ဗဟိုအမျိုးသမီးအဖွဲ့ တာဝန်ခံ ဒေါက်တာမေ၀င်းမြင့် ပြောပြခဲ့တာပါ။

အခု ရာပြည့်ဈေးမှာချေးပေးနေတဲ့ အတိုးမဲ့ ငွေကြေးစနစ် အောင်မြင်မှုရှိခဲ့ရင်တော့ ဒီအစီအစဉ်တွေကို တခြားမြို့နယ်တွေကိုပါ ဆက်ပြီး တိုးချဲ့လုပ်ဆောင်သွားဖို့ စီစဉ်ထားတယ်လို့ ဆိုပါတယ်။

ငွေချေးဖို့အတွက် ဈေးသည်တွေအနေနဲ့ သူတို့အမှန်တကယ် ဈေးရောင်းနေတဲ့အကြောင်း သန်းခေါင်စာရင်းနဲ့ မှတ်ပုံတင် မိတ္တူတွေနဲ့ ရုံးချုပ်မှာ လာလျှောက်ကြရတာပါ။ ဒါပေမဲ့ တချို့ဈေးသည်တွေက တခြား မြို့နယ်တွေကနေ ရာပြည့်ဈေးထဲမှာ လာရောင်းချကြတာဖြစ်တဲ့အတွက် လစဉ်ကြေး ၇ ရာ ပြန်ကောက်တဲ့နေရာမှာ အခက်အခဲတချို့ ကြုံတွေ့ရတာတွေ ရှိတယ်လို့ ဒေါက်တာ မေ၀င်းမြင့်က ပြောပါတယ်။

လောလောဆယ် ဈေးသည်တွေကို အခုလို ငွေချေးပေးနေတဲ့အပြင် ဈေးသည်တွေအနေနဲ့ ၂ လုံးထီ၊ ၃ လုံးထီ၊ ချဲ စတာတွေ ထိုးပြီး ပင်ပင်ပမ်းပမ်း ရှာထားတဲ့ငွေတွေ လွယ်လွယ်ကူကူနဲ့ မဖြုန်းကြဖို့၊ ရိုးရိုးသားသား ကြိုးစားလုပ်ကိုင်ကြဖို့ရည်ရွယ်ပြီး ၃ ပတ်ကြာ စိတ်ဖွံ့ဖြိုးရေးသင်တန်း ပို့ချပေးခဲ့တယ်လို့ ဆိုပါတယ်။ ဒီလိုမျိုးသင်တန်းတွေ နှောင်မှာလည်း အလျဉ်းသင့်သလို ဆက်လက် ပို့ချသွားမယ်လို့ သိရပါတယ်။

ငွေကြေးအစားထိုး ပစ္စည်းသုံးလျှင် အရေးယူခံရမည်

ဧရာဝတီ Saturday, 23 April 2011 15:52

ကျပ် ၁၀၀ တန်၊ ကျပ် ၂၀၀ တန် ငွေစက္ကူများ ရှားပါးနေသောကြောင့် ဈေးဝယ်စင်တာများ၊ မြို့တွင်း ပြေးဆွဲနေသော ယာဉ်လိုင်းများက ကူပွန်များ၊ ဆေးလိပ်၊ ကော်ဖီမစ်၊ သကြားလုံး စသည်တို့ကို ငွေအကြွေ အစားထိုးပြန်အမ်းငွေအဖြစ် သုံးပြုနေခြင်းကို ငွေကြေးဥပဒေအရ တရားစွဲဆို အရေးယူသွားမည်ဟု ထုတ်ပြန်ကြေညာလိုက်ကြောင်း သိရသည်။

ငွေအကြွေ အစားထိုး တန်ဖိုးတူ ကူပွန်များ အသုံးပြုနေခြင်းသည် ငွေကြေးဥပဒေအရ တရားစွဲဆို အရေးယူနိုင်သည်အထိ အပြစ်မှုကြီးသောကြောင့် ဆက်လက် မပြုလုပ်ကြရန် ရန်ကုန်ရှိ ဈေးဝယ်စင်တာများနှင့် ယာဉ်လိုင်းများအား သတိပေးထားသည်။

ဈေးဝယ်စင်တာများ၊ ကုန်ခြောက်ဆိုင်များနှင့် မော်တော်ယာဉ်လိုင်းများတွင် ငွေအကြွေအစားထိုး ကူပွန်သုံးစွဲမှုများ စစ်ဆေးတွေ့ရှိသဖြင့် ရန်ကုန်တိုင်းဒေသကြီး အစိုးရအဖွဲ့က အသုံးမပြုရန် သတိပေး တားမြစ်ခဲ့ပြီး အသုံးပြုသည်ကို ထပ်မံတွေ့ရှိပါက ဥပဒေအကြောင်းအရ အရေးယူဆောင်ရွက်သွားမည် ဖြစ်ကြောင်း အဆိုပါ အစိုးရအဖွဲ့မှ တာဝန်ရှိသူတဦးက ပြောသည်။

၎င်းက “ငွေကျပ် ၂၀၀ နဲ့ညီတဲ့ ကူပွန်မှာ ဆိုင်တံဆိပ်ပါတယ်။ အဲဒီတော့ ဒီ ၂၀၀ ကို သူ့ဆိုင်မှာပဲ ထပ်သုံးရမယ် ဆိုတဲ့သဘောပဲ။ ဒီတော့ ၀ယ်သူအနေနဲ့ ထိခိုက်နစ်နာစေပါတယ်။ ဒါ့အပြင် ငွေအကြွေ အစားထိုးသုံးစွဲနေတာ တရားမ၀င်တဲ့ အတွက် သတိပေး တားမြစ်ခဲ့ပြီးပြီ။ နောက်တကြိမ် ထပ်အသုံးပြုနေတာ စစ်ဆေးတွေ့ရှိရင်တော့ ဘယ်သူ့ကို မဆို အရေးယူသွားမှာပါ” ဟု ဆိုသည်။

ထိုသို့ ငွေအကြွေအစားထိုး ကူပွန်များ အသုံးပြုလျှင် အရေးယူမည် ဆိုသောကြောင့် အကြွေရှားပါးမှု ပြဿနာ ကြုံတွေ့နေရသည့် ဈေးဆိုင်များ၊ ယာဉ်လိုင်းများ အခက်တွေ့နေကြသည်။

“ကူပွန်တွေကို ပြန်အမ်းတာက တကယ့်ကို ငွေ ၂၀၀ ကျပ်တန်၊ ၁၀၀ ကျပ်တန်တွေ အခက်အခဲဖြစ်လို့ပါ။ ကော်ဖီမစ်တို့ ခေါင်းလျှော်ရည်ထုတ်တို့ကို လူတိုင်းက လိုချင်တာ မဟုတ်ဘူးလေ။ ကူပွန်ကျတော့ ဒီမှာ သူတို့လိုချင်တာကို ပြန်ဝယ်သုံးလို့ ရတော့ ကျေကျေနပ်နပ်ပဲ ယူကြပါတယ်။ အခုတော့ ငွေအကြွေအတွက် ဘယ်လို ဖြေရှင်းရမလဲ ဆိုတာတောင် မသိတော့ဘူး” ဟု ဈေဝယ်းစင်တာတခုမှ မန်နေဂျာ အမျိုးသမီးတဦးက ပြောသည်။

ဈေးဝယ်စင်တာများတွင် တဦးချင်းအလိုက် ပြန်အမ်းငွေအဖြစ် လိုအပ်လျက်ရှိသော ကျပ် ၁၀၀ တန်၊ ၂၀၀ တန်များအား အစိုးရဘဏ်မှ ထုတ်ပေးနေသော်လည်း အမှန်တကယ် လိုအပ်ငွေ၏ ၅ ပုံတပုံခန့်မျှသာ ရှိသောကြောင့် အဆင်ပြေစေရန် ဆောင်ရွက်နေရခြင်းဖြစ်ကြောင်း အဆိုပါ မန်နေဂျာက ဆက်ပြောသည်။

မရမ်းကုန်းမြို့နယ်မှ အိမ်ရှင်မ တဦးက “ပိုက်ဆံအကြွေ ပြန်မအမ်းနိုင်လို့ ကူပွန်ပြန်အမ်းတာက တော်သေးတယ်လို့ ထင်တယ်၊ အဆင်ပြေတယ်။ အကောင်းဆုံးကတော့ ပိုက်ဆံပဲပေါ့။ အခု ဒီမှာက ၂၀၀ တန် နဲ့ ၁၀၀ တန်က သိပ်ရှားတယ်။ တခါတလေလည်း ပိုက်ဆံတွေက စုတ်ပြတ်နေတော့ ကိုင်ရမှာတောင် ရွံစရာဖြစ်နေတယ်” ဟု ဆိုသည်။

ယခုကဲ့သို့ ငွေကျပ် ၁၀၀ တန်၊ ၂၀၀ တန်ရှားပါးမှုကြောင့် ငွေအကြွေ အရောင်းအ၀ယ် မှောင်ခို ဈေးကွက်လည်း ပေါ်ထွက်လာကြောင်း သိရှိရသည်။

“ကျနော်တို့က အကြွေ ကျပ် ၁ ထောင်ဖိုး ၀ယ်ရင် ၉၀၀ ရတယ်။ ၁ သောင်းဖိုးဆိုရင် ၁ ထောင်ပေးဝယ်ရတဲ့ အခြေအနေ ဖြစ်နေတယ်။ ရှားလွန်းရင်တော့ ၁ ထောင်ပေးရင် ၈၀၀ ပဲရတယ်၊ ငွေအကြွေရှားတဲ့အပေါ်မှာ မူတည်တယ်။ အဲဒီလို အကြွေဝယ်တာတောင် လိုသလောက်ရတာ မဟုတ်ဘူး” ဟု ဘုရင့်နောင်ဈေးမှ ကုန်ခြောက်သည် တဦးက ပြောသည်။

ရန်ကုန်မြို့တွင်းရှိ စတိုးဆိုင်များ၊ ဈေးဝယ်စင်တာများနှင့် တချို့သော အထူးယာဉ်းလိုင်းများပေါ်တွင် ငွေအကြွေအမ်းရန် အဆင်မပြေပါက ကော်ဖီမစ်၊ သကြားလုံး၊ ပီကေ၊ ဆေးလိပ်၊ ခေါင်းလျှော်ရည် စသည်ဖြင့် ပြန်အမ်းမှုများ ရှိနေသည့်အပြင် တချို့ ဘတ်စ်ကားလိုင်းများတွင် အကြွေ ပြန်မအမ်းနိုင်သည့်အခါ လောင်းကစားနည်းများ ပြုလုပ်လာကြကြောင်းလည်း သိရှိရသည်။

“ကျနော်စီးတဲ့ ၂၀၄ ဘတ်စ်ကားမှာ အကြွေ ၁၀၀ ပြန်မအမ်းနိုင်တဲ့အတွက် ယာဉ်နောက်လိုက်က ပိုက်ဆံ ပွတ်မယ်လို့ ပြောတယ်။ သူနိုင်ရင် ပြန်အမ်းငွေ ၁၀၀ မပေးတော့ဘူးပေါ့၊ ကျနော်နိုင်သွားရင်တော့ သူက ၂၀၀ တန် ပြန်ပေးမယ်လို့ ပြောတယ်” ဟု ကမာရွတ်မြို့နယ်တွင် နေထိုင်သူတဦးက ပြောသည်။

ထိုကဲ့သို့ ငွေအကြွေ ပြဿနာ အခက်အခဲအား ဖြေရှင်းရာတွင် ၀ယ်သူဘက်မှ အစဉ် နစ်နာမှုများ ရှိနေကြောင်း၊ အစားထိုး ကူပွန်ငွေများ လက်ခံမိ၍ သတ်မှတ်ဆိုင်များတွင် ပြန်လည် အသုံးပြုနိုင်ခြင်း မရှိပါက ဆုံးရှုံးမှုများ ရှိကြကြောင်း၊ ငွေအကြွေပြဿနာ ဖြေရှင်းရန်အတွက် အစိုးရမှ ဟောင်းနွမ်း ငွေစက္ကူများနှင့် အကြွေများ လဲလှယ် ထုတ်ပေးရန် လိုအပ်လျှက် ရှိကြောင်း ရန်ကုန်မြို့မှ စီးပွားရေးပညာရှင် တဦးက ပြောသည်။

“ဒီကိစ္စဖြစ်ရတာ အစိုးရအနေနဲ့ လိုအပ်နေတဲ့ ၁၀၀ ကျပ်တန်နဲ့ ၂၀၀ တန် ငွေစက္ကူတွေကို လုံလုံလောက်လောက် ထုတ်မပေးနိုင်လို့ပါ။ ဒါကို အခွင့်ကောင်းယူတဲ့ စီးပွားရေး သမားတွေရှိလာတော့ ပြည်သူတွေ နစ်နာကြတယ်။ ပြည်သူ့ အကျိုးစီးပွားကို ကာကွယ်ဖို့အတွက် လိုအပ်တဲ့ ငွေစက္ကူတွေကို ပြန်လဲလှယ် ပေးတာတွေ၊ ထုတ်ပေးတာတွေ များများ လုပ်ရလိမ့်မယ်” ဟု ၎င်းက ဆိုသည်။

ယမန်နှစ် ဇန်နဝါရီလက ရခိုင်ပြည်နယ် မောင်တောတွင် ငွေကျပ်အစားထိုး သုံးစွဲသော ကူပွန်လက်မှတ် ကျပ် ၉ သိန်းကျော်ဖိုးကို နယ်စပ်ဒေသ စစ်ဆေးရေးနှင့် ကွပ်ကဲရေး (နစက) က ဖမ်းဆီခဲ့သေးသည်။ ဖမ်းဆီးခဲ့သော ကူပွန်လက်မှတ်များတွင် ၅၀ တန်၊ ၁၀၀ တန်၊ ၂၀၀ တန်တို့နှင့် တန်ဖိုးညီမျှသော အစားထိုးလက်မှတ်များ ပါဝင်သည်။

ယီမင် သမ္မတ ရာထူးက ဆင်းဖို့ သဘောတူ

23-4-2011 BBC New

၃၂ နှစ်ကြာ အုပ်ချုပ်ခဲ့တဲ့ သမ္မတ ဆာလေး ဆင်းပေးဖို့ အချိန်စေ့ပြီ။
လူတရာကျော် သေဆုံးခဲ့တဲ့ နှစ်လကြာ ဆန္ဒပြပွဲတွေ အပြီးမှာ ယီမင်ကို နှစ်သုံးဆယ် ကျော်ကြာ အုပ်ချုပ်ခဲ့တဲ့ သမ္မတ ဆာလေး ရာထူးက ဆင်းပေးဖို့ သဘောတူ လိုက်ပါပြီ။

ရက်သုံးဆယ် အတွင်း အစိုးရသစ်ကို အာဏာ လွှဲပေးဖို့ ပင်လယ်ကွေ့ နိုင်ငံတွေက တင်ပြ လာတဲ့ အစီအစဉ်ကို ယီမင် သမ္မတ အဘဒူလာ ဆာလေးက သဘောတူ လိုက်ပါတယ်။

ဒီအစီအစဉ်အရ အတိုက်အခံတွေနဲ့ သဘော တူညီချက် တခု လက်မှတ် ထိုးပြီး ရက်သုံးဆယ် အကြာမှာ သူ့ရဲ့ လက်ရှိ အာဏာကို ဒုတိယ သမ္မတကို လွှဲပေးမှာ ဖြစ်ပြီး အပြန်အလှန် အားဖြင့် သူ့ကို တရား စွဲဆိုမှုတွေကနေ ကင်းလွတ်ခွင့် ပေးမှာ ဖြစ်ပါတယ်။

ခုသဘောတူညီချက် ထွက်မလာခင်ထိ အတိုက်အခံတွေက သမ္မတ ဆာလေးကို တရားမစွဲ ရဘူးဆိုတဲ့ အချက်ကို လက်မခံနိုင် ဖြစ်နေပေမယ့် ခုနောက်ဆုံးမှာ အတိုက်အခံ ခေါင်းဆောင် ယက်ဆင် နိုမင် ကိုယ်တိုင်က အာဏာ လွှဲပြောင်းပေးဖို့ သဘော တူညီချက်ကို ကြိုဆိုလိုက်တယ်လို့ ရိုက်တာ သတင်းဌာနက ဖော်ပြပါတယ်။

အမေရိကန် အစိုးရက ဒီသဘောတူညီချက်ကို ကြိုဆိုလိုက်ပြီး သက်ဆိုင်ရာ ပါတီ အဖွဲ့ အစည်း အားလုံးက အာဏာ လွှဲပြောင်းရေး လုပ်ငန်းစဉ်ကို အမြန် ဖော်ဆောင်ဖို့ တိုက်တွန်း လိုက်ပါတယ်။
ဒါပေမယ့် အစိုးရ သစ်ထဲမှာ သူကိုယ်တိုင်တော့ ပါမှာ မဟုတ်ဖူးလို့ ဆိုပါတယ်။

ယီမင်ဟာ အာရပ် နိုင်ငံတွေထဲမှာ အဆင်းရဲဆုံး နိုင်ငံ ဖြစ်ပြီး ခုလက်ရှိ ဆန္ဒပြပွဲတွေ မတိုင်ခင်မှာကို အယ်ကိုင်ဒါနဲ့ ခွဲထွက်ရေး လှုပ်ရှားမှုတွေက အစိုးရကို တလျှောက်လုံး စိန်ခေါ်လာခဲ့တာ ဖြစ်ပါတယ်။
ယီမင်က ဆန္ဒပြပွဲတွေ နှစ်လ အကြာမှာ ခုလို ရာထူးက ဆင်းပေးဖို့ သဘောတူခဲ့ရတာ ဖြစ်ပါတယ်။

အထူးသဖြင့် ပြီးခဲ့တဲ့လက ဆာနား မြို့တော်က ဆန္ဒပြပွဲတွေကို အကြမ်းဖက် နှိမ်နင်းရာမှာ လူ လေးဆယ်ငါးယောက် သေဆုံး ခဲ့ပြီးနောက် သူ့အစိုးရ အဖွဲ့ထဲက ဝန်ကြီးတွေနဲ့ သံအမတ်ကြီးတွေ ကိုယ်တိုင် ရာထူးက နှုတ်ထွက်တဲ့ထိ ဖြစ်လာခဲ့ပါတယ်။

အမေရိကန် အဝေးထိန်း ဒုံးလေယာဉ်နဲ့ လစ်ဗျားကိုတိုက်ပြီ

စနေ, 23 ဧပြီ 2011

လစ်ဗျားအစိုးရရဲ့ အမာခံနယ်မြေတွေမှာ အစိုးရတပ်တွေဟာ ရှုံးနိမ့်တော့မယ့်အနေအထား ရှိနေတယ်လို့ လစ်ဗျားသူပုန်တွေက ပြောလိုက်တဲ့တချိန်တည်းမှာပဲ အမေရိကန်ပြည်ထောင်စုက လစ်ဗျားနိုင်ငံမှာ မောင်းသူမပါတဲ့ အဝေးထိန်းဒုံးလေယာဉ်တွေနဲ့ တိုက်ခိုက်မှုကို ပထမဆုံးအကြိမ် စတင်လိုက်ပါတယ်။

လေကြောင်းကနေ ပြုလုပ်တဲ့ အဲဒီ အဝေးထိန်းဒုံးတိုက်ခိုက်မှုကို စနေနေ့က လုပ်ဆောင်လိုက်တာဖြစ်တယ်လို့ အမေရိကန် ကာကွယ်ရေးဝန်ကြီးဌာန ကြေညာချက်ထဲမှာ ဖော်ပြထားပါတယ်။ ဒါပေမဲ့ ဘယ်နေရာကို တိုက်ခိုက်ခဲ့တယ် ဆိုတာကိုတော့ မဖော်ပြထားပါဘူး။

ဒီတိုက်ခိုက်မှုဟာ လစ်ဗျားနိုင်ငံမှာ လေယာဉ်မပျံသန်းရဇုံ အဖြစ် သတ်မှတ်ထားတဲ့ နေတိုး မဟာမိတ်တပ်ဖွဲ့တွေရဲ့ ဦးဆောင်မှု တစိတ်တပိုင်းအဖြစ်နဲ့ တိုက်ခိုက်ခဲ့တာ ဖြစ်ပါတယ်။
တိုက်ပွဲတွေ အပြင်းအထန်ဖြစ်နေတဲ့ မစ်ရာတာမြို့မှာတော့ လစ်ဗျားခေါင်းဆောင် မိုမာကဒါဖီရဲ့ တပ်တွေ ဆုတ်ခွာသွားတဲ့အတွက် လစ်ဗျားသူပုန်တွေဟာ စနေနေ့က အောင်ပွဲခံနေကြပါတယ်။

ဆီးရီးယားရဲတွေ ပစ်ခတ်လို့ ဆန္ဒပြသူ ၇၀ ကျော်သေဆုံး

သောကြာ, 22 ဧပြီ 2011

ဆီးရီးယားနိုင်ငံတ၀ှမ်းမှာ အစိုးရဆန့်ကျင်ရေး ဆန္ဒပြမှုတွေ အဆက်မပြတ် ဖြစ်ပေါ်နေပြီး မနေ့က သောကြာနေ့မှာ လုံခြုံရေးရဲတွေက ဆန္ဒပြသူတွေကို သေနတ်တွေနဲ့ ပစ်ခတ်ခဲ့လို့ လူ ၇၅ ဦးထက်မနည်း သေဆုံးခဲ့တယ်လို့ လူ့အခွင့်အရေး အုပ်စုတွေနဲ့ လှုပ်ရှားသူတွေက ပြောကြပါတယ်။

ပြီးခဲ့တဲ့မတ်လကတည်းက စတင်လာခဲ့တဲ့ အစိုးရဆန့်ကျင်ရေး ဆန္ဒပြပွဲတွေအတွင်း သေဆုံးမှုတွေလည်း ရှိခဲ့ပါတယ်။ ဒါပေမဲ့ မနေ့ကသေဆုံးမှုကတော့ တရက်ထဲမှာတင် လူအများဆုံး သေဆုံးမှုပါပဲ။ မျက်မြင် သက်သေတွေပြောကြတာက လုံခြုံရေးတပ်ဖွဲ့တွေက တကယ့် ကျည်ဆံအစစ်တွေနဲ့ မျက်ရည်ယိုဗုံးတွေသုံးပြီး ဆန္ဒပြသူတွေကို ဖြိုခွဲတယ်လို့ဆိုပါတယ်။

မနေ့က သောကြာနေ့ ဘုရားဝတ်ပြုအပြီး ပြန်လာကြသူတွေနဲ့ ဆန္ဒပြသူတွေ လမ်းမတွေမှာ ရောပြီးရှိနေချိန် သမ္မတ ဘက်ရှာအယ်လ် အာဆာဒ် ကို ချက်ချင်း အာဏာကဆင်းပေးဖို့ တောင်းဆိုနေကြတုန်း လုံခြုံရေး တပ်ဖွဲ့တွေက ပစ်ခတ်ခဲ့ကြတာလို့ ဆိုပါတယ်။

အမေရိကန်သမ္မတ ဘရက်အိုဘားမားက အခုလို အကြမ်းဖက်မှုတွေကို ပြစ်တင်ရှုတ်ချလိုက်ပါတယ်။ ဒါဟာ ဆီးရီးယားအစိုးရရဲ့ တရားလွန်တဲ့လုပ်ရပ်ပဲလို့ ပြောလိုက်ပြီး ဆန္ဒပြသူတွေကို အကြမ်းဖက်နေတာတွေ ချက်ချင်း ရပ်တန့်ဖို့လည်း သမ္မတ အိုဘားမားက တောင်းဆိုလိုက်ပါတယ်။

မကွေးတိုင်းမှ ရထားလမ်းဖောက်လုပ်မှု လယ်ယာမြေတွေ ထိခိုက်ဆုံးရှုံး

2011-04-23 RFA

မြန်မာနိုင်ငံ မီးရထားဝန်ကြီးဌာန က မကွေးတိုင်း ဒေသကြီးအတွင်း၊ မကွေး- နတ်မောက်- ပျော်ဘွယ် ရထားလမ်းသစ် ဖောက်လုပ်ရာမှာ ရထားလမ်း မြေသားတာဘောင်ရဲ့ ပိတ်ဆို့မှုကြောင့် နတ်မောက် မြို့နယ်အတွင်း လယ်ယာမြေတချို့ ရေဘေးအန္တရာယ် ကြုံတွေ့နေရတယ်လို့ သိရပါတယ်။

နတ်မောက်မြို့နယ်၊ နလခုတ်ပင် ကျေးရွာအုပ်စု၊ ကြူအိုင်ကျေးရွာအနီးမှာ ဖြတ်သန်းဖောက်လုပ်တဲ့ မီးရထားလမ်း တာဘောင်ကြီးကြောင့် ပြီးခဲ့တဲ့နှစ်က လယ်ယာမြေတွေ ရေနစ်မြုပ်ခဲ့ပြီး အခုနှစ်မှာလည်း နွေစပါး စိုက်ထားတဲ့ လယ်ယာမြေတွေ အလားတူ အန္တရာယ်နဲ့ ကြုံတွေ့နေရတဲ့အကြောင်း ကြူအိုင်ကျေးရွာနေ လယ်သမားကြီးတဦးက ပြောပြပါတယ်။

မနှစ်က လယ်ယာမြေတွေ ရေနစ်လို့ ချိုးဖောက်ထားတဲ့ မီးရထားလမ်း တာဘောင်ကို နန်းပြည်တံခွန် ကုမ္ပဏီ က သင်္ကြန်ကာလ မတိုင်မီက ပြန်လည်ပြီး ပိတ်ဆို့ တည်ဆောက်နေတာလို့ ဆိုပါတယ်။ တည်ဆောက်မှု ပြီးစီးသွားခဲ့ရင် ကြူအိုင်ကျေးရွာဟာ မိုးရာသီမှာ ရေဘေး အန္တရာယ် ကြုံတွေ့ရမှာ ဖြစ်တယ်လို့လည်း သိရပါတယ်။

မြိုင်ကြီးငူစခန်း တိုက်ခိုက်ခံရ

Posted by admin on April 23, 2011 နေ့သစ်

ကရင်ပြည်နယ် ကမမောင်းမြို့နယ် အနီးက ဒီကေဘီအေ ဌာနချုပ်ဖြစ်ခဲ့တဲ့ မြိုင်ကြီးငူစခန်းကို အခု နယ်ခြားစောင့်တပ် (ယခင် ဒီကေဘီအေ ၃၃၃) တပ်ဖွဲ့မှ ဗိုလ်ဖားဘိ ဦးဆောင်ကာ ဧပြီလ ၂၂ ရက်နေ့ ညနေ ၃ နာရီလောက်မှာ ဝင်ရောက်တိုက်ခိုက် ရှင်းလင်းခဲ့ပါတယ်။

နယ်ခြားစောင့်တပ် (ယခင် ဒီကေဘီအေ ၃၃၃) ဟာ ဗိုလ်ချုပ်မောင်ကြည် ဦးဆောင်နေတဲ့ တပ်ဖွဲ့ဖြစ်ပြီး မြိုင်ကြီးငူစခန်း မှာရှိတဲ့ လက်နက်တိုက် ရယ် ပစ္စည်းဂိုဒေါင်တွေရယ်ကို မီးရှို့ဖျက်စီးခဲ့တယ်လို့လည်း သိရှိရပါတယ်။ တိုက်ပွဲဖြစ်ချိန် ဟာ ၂ နာရီလောက်ကြာခဲ့ပြီး အတည်ပြုမရတဲ့ သတင်းအရ တိုက်ပွဲမှာပါတဲ့ အဖွဲ့တဖွဲ့မှာ အဖွဲ့ဝင် သုံးဦး ထိခိုက်သေ ဆုံးခဲ့တယ်လို့လည်း ကြားသိရပါတယ်။

မြိုင်ကြီးငူမှာဖြစ်တဲ့အခြေအနေကို ရွှေကုက္ကို နယ်ခြားစောင့်တပ်စခန်းမှ အမည်မဖေါ်လိုတဲ့ (ယခင် ဒီကေဘီအေ ၉၉၉) တပ်မှူးတဦး ပြောပြတာက ….

“ဟုတ်တယ် မနေ့က ညနေဘက် မြိုင်ကြီးငူမှာဖြစ်တာ သုံးယောက်ကျတယ်ကြားတယ် ဘယ်ဘက်ကမှန်းမသိဘူး ကျနော်တို့ ကြားတာကတော့ အကုန်မီးရှို့သွားတယ်လို့တော့ ကြားတာပဲ။ လက်နက်တိုက်လဲ ပါသွားတယ်။ မြိုင်ကြီးငူ စခန်းက ကမမောင်းမြို့နဲ့ သံလွင်မြစ် ဟိုဘက်ကမ်း ဒီဘက်ကမ်းပဲ မြိုင်ကြီးငူက အရှေ့ဘက်ကမ်းမှာ။ ကျနော်တို့ သိ သလောက်တော့ နယ်ခြားစောင့် စလုပ်ကတည်းက အချင်းချင်းကြားမှာ မကျေနပ်တာတွေ ရှိနေကြတာ အဲဒါတွေ ကြောင့်လို့တော့ ကြားတာပဲ” လို့ ပြောပြသွားပါတယ်။

ဒီကေဘီအေတပ်ဖွဲ့ဝင်တွေရဲ့ မြိုင်ကြီးငူ ဌာနချုပ်စခန်းဟာ ၁၉၉၅ ခုနှစ်တုန်းက ကေအန်ယူ မှ ခွဲထွက်ကာ မြိုင်ကြီးငူ ဆရာတော် ဦးသုဇန ဦးစီးမှုနဲ့ ဒီကေဘီအေ အဖွဲ့တည်ထောင်ပြီး နအဖ နှင့် အပစ်ရပ်ခဲ့စဉ်ကာလများက ဌာန ချုပ် လုပ်ခဲ့တဲ့ နေရာ ဖြစ်ခဲ့ပါတယ်။

မြိုင်ကြီးငူဆရာတော်ဟာ ၂၀၀၉ ခုနှစ် အောက်တိုဘာလ ၁၉ ရက်နေ့မှာ ကေအန်ယူနဲ့ ဒီကေဘီအေ အပစ်ရပ်ဖို့အ တွက် ကေအန်ယူနဲ့ တွေ့ဆုံဆွေးနွေးတာတွေ လုပ်ဆောင်ခဲ့ပြီး၊ နအဖ က ဖိအားပေးလာတဲ့ ဒီကေဘီအေကို နယ် ခြားစောင့်တပ်အဖြစ် အသွင်ပြောင်းရေးကိစ္စမှာ နောက်ဆုံးရက်အဖြစ် သတ်မှတ်ထားတဲ့ ၂၀၁၀ သြဂုတ်လ ၁၉ ရက် နေ့ မတိုင်မီအထိ ဆရာတော်ဟာ ဒီကေဘီအေ ကို နယ်ခြားစောင့်တပ် အသွင်ပြောင်းဖို့ လက်ခံခြင်းမရှိ ဘူးလို့ သိရှိခဲ့ရပါတယ်။

မနေ့က တိုက်ပွဲတွေဖြစ်နေတဲ့ အချိန်မှာ ဆရာတော်ဟာ မြိုင်ကြီးငူဒေသမှာ သီတင်းသုံးနေခြင်း မရှိဘဲ။ ထိုင်းနိုင်ငံမှာ ကျန်မာရေးအရ ဆေးကုသမှုကို ခံယူပြီး ခေတ္တသီတင်းသုံးနေတဲ့ အချိန်လည်း ဖြစ်ပါတယ်။

မလေးရှားမှာ မြန်မာအလုပ်သမားတွေ ဆန္ဒပြ

2011-04-23 RFA

မလေးရှားနိုင်ငံ ဂျိုဟိုးပြည်နယ်က ကြွေထည်ပစ္စည်း ထုတ်လုပ်တဲ့ INNO CERAMITEC စက်ရုံက မြန်မာ အလုပ်သမားတွေဟာ မတရား ခိုင်းစေခံရမှု၊ အလုပ်သမား အခွင့်အရေး ဆုံးရှုံးမှုတွေနဲ့ ပတ်သက်ပြီး အလုပ်မဆင်းဘဲ ငြိမ်းချမ်းစွာ ဆန္ဒပြခဲ့ကြရာမှာ အာဏာပိုင်တွေက အကြမ်းဖက်ဖြိုခွဲပြီး ဆန္ဒပြခေါင်းဆောင် ၂ ဦးကို ဖမ်းဆီးခဲ့တယ်လို့ သိရပါတယ်။

စက်ရုံမှာ လုပ်အားနဲ့ လုပ်ခလစာ မမျှတတာ၊ ကျန်းမာရေး စောင့်ရှောက်မှု ညံ့ဖျင်းတာတွေအပေါ် အလုပ်သမား အခွင့်အရေး တောင်းဆိုချက် ၅ ချက် တင်ပြပြီး ဧပြီလ ၁၉ ရက်ကနေ ၂၁ ရက်နေ့အထိ မြန်မာအလုပ်သမား ၆ဝ အပါအဝင် လူမျိုးစုံ စုစုပေါင်း အင်အား ၁၂ဝ လောက် ဆန္ဒပြခဲ့ကြပါတယ်။

ဒီ ဖြစ်ရပ်နဲ့ ပတ်သက်လို့ အလုပ်သမားတွေဘက်က လိုက်ပါ ဆောင်ရွက်ပေးနေတဲ့ NLD- LA မလေးရှားဌာနခွဲက ဦးဥာဏ်လင်းက ပြောပြပါတယ်။

“လုပ်အားနဲ့ လစာမမျှတာ၊ ပြီးတော့ တခြား အခွင့်အရေးတွေ ရဖို့အတွက် သူဌေးကို တောင်းဆိုတာ။ သူဌေးက ပြန်ပြီးတုန့်ပြန်တဲ့နေရာမှာ သူတိုရဲ့ အဆောင်တွေမှာ ရေဖြတ်တာတွေ လုပ်တယ်။ သူတို့က အလုပ်မဆင်းဘဲ ဆန္ဒပြတော့ သူဌေးက ရဲကိုခေါ်ပြီး အလုပ်ပြန်ဆင်းခိုင်းဖို့လုပ်တာကနေပြီး ဆန္ဒပြခေါင်းဆောင်လို့ ယူဆတဲ့ နီပေါတယောက်နဲ့ မြန်မာတယောက် ဖမ်းသွားတယ်။ ခုထက်ထိ ပြန်လွှတ်မပေးသေးဘူး”

အလုပ်သမားတွေက လုပ်အားခ မလေးရှားရင်းဂစ် ၂၅ ရင်းဂစ် အထိ တိုးပေးဖို့ တောင်းဆိုတာကို ၂၂ ရင်းဂစ် ပေးမယ့်အကြောင်းနဲ့ သောကြာနေ့ ၂၂ ရက်နေ့မှာ အလုပ်ပြန်ဆင်းဖို့ မြန်မာအေးဂျင့်က လက်မှတ်ထိုးခိုင်းခဲ့ပါတယ်။ ဒါပေမယ့် အလုပ်သမားတွေက လက်မှတ်ထိုးမပေးဘူးလို့လည်း သိရပါတယ်။ ၂၁ ရက်နေ့မှာ အလုပ်သမားတွေရှိတဲ့ အဆောင်ကို ရဲတွေရောက်လာပြီး မြန်မာအလုပ်သမား ကိုအောင်ကျော်နဲ့ နီပေါ အလုပ်သမားတဦးကို ဖမ်းသွားပါတယ်။

“သူတို့ကို အတင်းအကြပ် ဖိအားပေးတော့ နောက်ဆုံးပိတ် လက်မှတ်ထိုးလိုက်ရတယ်။ သူတို့နေတဲ့ အဆောင်အောက်ထပ် အခန်းတွေကို ရဲက ဝင်ပြီး အိပ်နေတဲ့သူတွေကို ရဲတွေ အမြဲဆောင်နေတဲ့ ငြုပ်ကောင်း စပရေးဗူးတွေနဲ့ ပက်သွားတယ်။ လူတွေက လည်ပင်းတွေနာ၊ မျက်လုံးတွေနာပြီး ကျန်နေခဲ့တယ်။ အဲဒီတော့ အားလုံးက အဲလိုဖိအားပေးခံရတော့ ကြောက်ပြီးတော့ လက်မှတ်ထိုးရတာ၊ စာချုပ်တော့မဟုတ်ဘူး။ လောလောဆယ် လုပ်တဲ့လူတွေထဲမှာ ဘယ်သူပါသလဲဆိုတာကို”

တောင်းဆိုချက်တွေကို အလုပ်ရှင်ဘက်က တစုံတရာ ဆွေးနွေးတာမရှိဘဲ အဓမ္မ အလုပ်ဆင်းခိုင်းတဲ့အတွက် သောကြာနေ့ကတော့ အလုပ်သမားတွေ အလုပ် ပြန်ဆင်းနေကြတယ်လို့ သိရပါတယ်။

အမှုနဲ့ ပတ်သက်လို့ တရားမျှတမှု ဖြစ်ပေါ်ဖို့နဲ့ မတရား အဖမ်းခံရသူတွေ လွတ်မြောက်ရေးအတွက် မလေးရှား အခြေစိုက် အလုပ်သမားအရေး ကူညီပေးနေတဲ့ NGO အဖွဲ့တွေနဲ့ NLD –LA Malaysia အလုပ်သမား ရေးရာဌာနက ဆက်လက် လိုက်ပါ ကူညီဆောင်ရွက် ပေးနေတယ်လို့ သိရပါတယ်။

ငါးနှစ်အတွင်း မိုဘိုင်းဖုန်း အဆ ၃၀ နီးပါး တိုးပွားအောင်လုပ်မည်ဟုဆို

မိုးမခ အထောက်တော်၊ ရန်ကုန်
ဧပြီ ၂၃၊ ၂၀၁၁

ယမန်နေ့က နေပြည်တော် သမ္မတရုံးတွင် ကျင်းပသည့် အထူးစီမံကိန်းများ အကောင်အထည်ဖေါ်ရေး အဖွဲ့၏ ညှိနှိုင်း အစည်းအဝေးတွင် ဆက်သွယ်ရေး ၀န်ကြီးက လာမည့် ငါးနှစ်အတွင်း မိုဘိုင်းဖုန်း လိုင်းပေါင်း သန်း ၃၀ ဖြစ်အောင် လုပ်မည်ဟု ပြောဆိုလိုက်သည်။

မြန်မာနိုင်ငံတွင် ယမန်နှစ် နှစ်လည်ထုတ်ပြန်သည့် စာရင်းဇယားများ အရ မိုဘိုင်းဖုန်း လိုင်းပေါင်း ၁.၃ သန်း ကျော်သာရှိသေးပြီး အထက်ပါ အစည်းအဝေးတွင် တင်ပြချက်အရ လာမည့် ငါးနှစ်အတွင်း တစ်နှစ်လျင် အနည်းဆုံး ၄သန်းမှ အများဆုံး ၈ သန်းအထိ တိုးချဲ့သွားမည်ဟု ဆက်သွယ်ရေး ၀န်ကြီး ဦးသိန်းထွန်းက ပြောဆိုသည်။

ထိုသို့မိုဘိုင်းဖုန်းလိုင်း အဆ ၃၀ နီးပါး တိုးပွားအောင်လုပ်ဆောင်ရာတွင် ပုဂ္ဂလိကကုမ္ပဏီများနှင့် ပူးပေါင်းဆောင်ရွက်သွားမည်ဟု ဖေါ်ပြထားပြီး မြန်မာနိုင်ငံပိုင် ဆက်သွယ်ရေး ဂြိုဟ်တုတလုံးပါ လွှတ်တင်ရန် အဆိုပြုထားခဲ့သည်။

မြန်မာနိုင်ငံလူဦးရေ ၅၅ သန်းကျော်ရှိသည့်အတွက် မိုဘိုင်းဖုန်းလိုင်း သန်း ၃၀ ရှိလာမည်ဆိုပါက လူ ၂ဦးလျင် မိုဘိုင်းဖုန်းလိုင်း တလိုင်းနှုန်း ဖြစ်လာမည်ဖြစ်ပြီး ယခုလက်ရှိ မြန်မာနိုင်ငံ၏ ဖုန်းသိပ်သည်းဆမှာ ၅ ရာခိုင်နှုန်း (လူ ၂၀ လျင်ဖုန်းလိုင်း ၁ လိုင်းနှုန်း) သာရှိသေးသည်ဟုလည်း ဆက်သွယ်ရေး ၀န်ကြီး၏ ပြောဆိုချက်အရ သိရသည်။

ယခုလို မိုဘိုင်းဖုန်းများပြားလာမည့် သတင်းအပေါ် ရန်ကုန်မှ ပွဲစားတဦးဖြစ်သူ ဦးထိန်ဝင်းက “ကောင်းတာပေါ့၊ များလာမယ်ဆိုရင် ဖုန်းဆင်းကဒ် ဈေးနှုန်းတွေ ကျလာမယ် ထင်တယ်။ အခုတလော ပွဲစားတွေ ပြောနေကြတယ်။ ငါးသောင်းနဲ့ ၀ယ်နိုင်မယ်လို့ ပြောနေကြတယ်၊ ဖြစ်လာမှာက ကောင်းပါတယ်။ ၀န်ဆောင်မှုလည်း ကောင်းဖို့လိုတယ်လို့ မြင်တယ်။ ဘာလို့ဆို အခုတောင် ဂျီအက်စ်အမ်တွေက လိုင်းမကောင်း၊ ၀န်ဆောင်မှုမကောင်းတာ နေ့စဉ်ကြုံနေရတယ်။ နောက်တချက်က ပြောဆိုခ လည်းအပြိုင်အဆိုင်နဲ့ သက်သာလာဖို့ လိုသေးတယ်လို့ ထင်တယ်” ဟုပြောသည်။

၂၀၀၄ ခုနှစ်ဝန်းကျင်က ဂျီအက်စ်အမ် နှင့် စီဒီအမ်အေ မိုဘိုင်းဖုန်းလိုင်းများ ပြင်ပပေါက်ဈေး အမြင့်ဆုံး ကျပ်သိန်း ၅၀ (အမေရိကန်ဒေါ်လာ ၅၀၀၀ ကျော် ခန့်) ၀န်းကျင်ထိ မြင့်တက်ခဲ့ပြီး ၂၀၀၆ ၀န်းကျင်တွင် သိန်း ၂၀ (အမေရိကန် ဒေါ်လာ ၂ ထောင်ကျော်ခန့်) အထိပြန်လည်ကျဆင်းလာခဲ့သည်။

လွန်ခဲ့သည့် နှစ်အနည်းငယ်အထိ ဖုန်းလိုင်း တလိုင်းဆက်သွယ်ခွင့်ရဖို့ရာ တရားဝင် ပေးသွင်းငွေ၊ သက်ဆိုင်ရာ ခွင့်ပြုချက်အတွက် လာဘ်ထိုးရငွေ တို့ကို ပေါင်းလိုက်ပါက ကျပ်ငွေသိန်း ဆယ်ဂဏန်းအထိ ကုန်ကျခံကြရသည်။ ၂၀၁၀ ခုနှစ် နှစ်ဆန်းတွင် ငါးသိန်းဖုန်းစတင်ရောင်းချသည့် နောက်ပိုင်း မိုဘိုင်းဖုန်းလိုင်း ၁ လိုင်းအတွက် ကျပ်ငါးသိန်း ၀န်းကျင်ထိ (အမေရိကန်ဒေါ်လာ ၆၀၀ ခန့်) ကျဆင်းလာခဲ့သည်။

ထိုကဲ့သို့ မိုဘိုင်းဖုန်း လိုင်း ၁ လိုင်းအတွက် ကုန်ကျစရိတ်ကျဆင်းလာသော်လည်း ဖုန်းပြောဆိုခမှာမူ ၂၀၀၂ ခုနှစ်ဝန်းကျင်တွင် တမိနစ် ၅ ကျပ်မှ ၂၅ ကျပ်သို့၎င်း ယခုနောက်ဆုံး တမိနစ် ၅၀ ကျပ်အထိ မြင့်တက်လာခဲ့သည်။

အိမ်နီးချင်းနိုင်ငံများတွင် မိုဘိုင်းဖုန်းလိုင်း ၁ လိုင်းအတွက် ကျပ် ၁၀၀၀ မှ အများဆုံး ကျပ် ၅၀၀၀ ၀န်းကျင်အထိသာရှိသည့် အချိန်တွင် မြန်မာနိုင်ငံတွင် ဒေါ်လာ ၆၀၀ ၀န်းကျင်အထိ ရှိနေသေးသည်ကိုတွေ့ရသည်။

ဗမာ့သွေး ပေးပို့သည်။