ဆရာ နိုင်ဝင်းဆွေ ကွယ်လွန်ခြင်း ၁၅ နှစ်ပြည့် အမှတ်တရ

နိုင်ဝင်းဆွေ (၁၉၄၀-၁၉၉၅)

စာရေးဆရာ နိုင်ဝင်းဆွေသည် မဟူရာမေတ္တာ ဝတ္ထုဖြင့် ၁၉၆၀ ပတ်ဝန်းကျင်းခန့်က မြန်မာစာပေလောကတွင် ထင်ရှား ကျော်ကြားလာခဲ့သည်။ ၁၉၇၈ ခုနှစ်တွင် သူ၏ကဗျာနှင့် ဆောင်းပါးများကို ပုံနှိပ်ထုတ်ဝေပြီးနောက် စစ်အစိုးရမှ လိုက်လံဖမ်းဆီးမှုကြောင့် တိမ်းရှောင်ခဲ့ပြီး ဗမာပြည်ကွန်မြူနစ်ပါတီသို့ လွတ်မြောက်ရေးတိုက်ပွဲများ ဆင်နွှဲရန်ရောက်ရှိခဲ့သည်။

၁၉၉၁ ခုနှစ်တွင် မာနယ်ပလော တော်လှန်ရေးဗဟိုဌာနချုပ်သို့ ရောက်ရှိလာသည်။ ၁၉၉၁ ခုနှစ်တွင် စာပေနှင့် အနုပညာ ကလပ် (လွတ်မြောက်နယ်မြေ) ဒု ဥက္ကဋ္ဌအဖြစ် တာဝန်ယူခဲ့ပြီး စာပေနှင့်အနုပညာကလပ်မှ ထုတ်ဝေသော သစ္စာရီဗျူး (အမှတ် ၁၊ ၂၊ ၃) အား အယ်ဒီတာချုပ်အဖြစ် တာဝန်ယူ ထုတ်ဝေခဲ့သည်။

သစ္စာရီဗျူး၊ သနူထူး၊ ဒေါင်းအိုးဝေ၊ လူ့ဘောင်သစ် စာစောင်များတွင် ကဗျာများ၊ ဝတ္ထုများ၊ ဆောင်းပါးများ၊ နိုင်ငံရေးစစ်တမ်းများ၊ တော်လှန်ရေးအဖွဲ့အစည်း မိတ်ဆက်များ၊ ဆောင်းပါး ၄ စောင် နှင့် သုံးဖက်မြင် အနုပညာစစ်တမ်းကြီးကို ရေးသားခဲ့သည်။

၁၉၉၅ ခုနှစ် ဖေဖော်ဝါရီလတွင် မာနယ်ပလောဌာနချုပ်အနီး ဟွေးဖောလူရွာတွင် သူချစ်သော လွတ်မြောက်နယ်မြေ၊ တော်လှန်စာပေ အနုပညာလောနှင့် ရဲဘော်ရဲဘက်များကို ခွဲခွာသွားခဲ့သည်။ ကျဆုံးစဉ်တွင် ဇနီး ဒေါ်ကျုံ (ဝ တိုင်းရင်းသူလေး) နှင့် သား မောင်ဆန်းတို့ ကျန်ရစ်ခဲ့ပါသည်။

အချစ်ညနေရီ

*

မိုးမှုန်
နှင်းငွေ့
တိမ်
အလင်းပြေး ကလေးတွေ
သူတို့ နိမ့်ဆင်းလို့လာလိုက်
သူတို့ ပြန့်ကျဲလို့ ပျယ်လွင့်သွားလိုက်
ကာဝိုင်းတောင်မကြီးထိပ်ပေါ်မှာ
တိမ်ထဲက ဒိုင်နယ်ရုံးကလေးရှေ့မှာ

အဲဒီတုန်းကပေါ့
ရင်ထဲမှာတော့
နောက်တော့လည်း ပျောက်ပျယ်လွင့်သွားအုံးမယ့်
အချစ်မီးလေးတခဲ
တွဲလွဲခိုလို့

သည်အချစ်ကလည်း
ငါ့ကိုနှောင်ဖွဲ့ဆဲလေ …

*
ဟုတ်ပါတယ်
အချစ်ကို ချစ်တယ်
အမှန်တရားကို ချစ်တယ်
အလှတရားကို ချစ်တယ်
အနုပညာကို ချစ်တယ်၊

*
ဟုတ်တာပေါ့
မုန်တိုင်းနီကို ချစ်
တိုက်ပွဲမီးပြင်းကို ချစ်
မီးရှို့ဖျက်ဆီးခြင်းများကို ချစ်
သူရသတ္တိရဲ့အလင်းရောင်ကို ချစ်
ယုံကြည်ချက် ပြင်းပြသူတွေကို ချစ်

ဓားတစင်း မြင်းတစီးနဲ့
တကိုယ်တော် ခရီးသည်ကို ချစ်တယ်။

သူဟာ
မုန်တိုင်းကို ဖောက်ထွက်လို

သူက
လောကအတွက်
ခွန်အားတွေ ပေးဆက်သွားတယ်။

*
ဟုတ်တာပေါ့
ဝေဝေ ဆိုတဲ့ ကောင်မလေးကို
ကျနော် ချစ်ခဲ့တာပေါ့။

ကွန်မြူနစ်လောကရဲ့ ကုန်ရောင်းဈေးကွက်မှာတော့
အနာဂတ်မဲ့ အနုပညာသမား
တနေ့မှာ သေဒဏ်အပေးခံရမယ့် အတိုက်အခံသမား
ခြောက်ချားစရာလူ
အပစ်ပယ်ခံလူ

ယမ်းငွေ့ထဲမှာ
လမ်းကွေ့ထဲမှာ
မြူထဲမှာ
အမှောင်ထဲမှာလေ …

*
မှန်ပါတယ်လေ …
အချစ်ရဲ့ ချစ်သူ
အမှန်တရားရဲ့ ချစ်သူ
အလှတရားရဲ့ ချစ်သူ
အနုပညာရဲ့ ချစ်သူ
လူမိုက်များရဲ့ ချစ်သူ။ ချစ်တဲ့လူ

ကျနော့်ရှေ့က
နေခြည်အလင်းကွက်ကလေးထဲမှာ
ခွေးသူငယ်လေးတကောင်ဟာ
ခုန်ပေါက်ရောက်လာ ကနေတယ်
ကျနော့်ကို တိုးလိုက် ဝှေ့လိုက် မြူးလို့ …

ကျနော်လေ
ဒီခွေးသူငယ်လေးကိုလည်း ချစ်တယ်။

အချစ်ကို ချစ်
အမှန်တရားကို ချစ်
အလှတရားကို ချစ်
အနုပညာကို ချစ်
ခွေးကလေးရဲ့ မြူးတူးကနေတဲ့
သန့်ရှင်းတဲ့ ပျော်ရွှင်မှုကလေးကိုလည်း ချစ်
အချစ်ကြောင့်ပဲ
ကွန်မြူနစ်လည်း ဖြစ်လာတယ်။


နိုင်ဝင်းဆွေ

၁၉၈၂၊ ဇွန်လ ဝ တောင်ခရိုင် ပန်ဆန်း အထူးမြို့နယ် ကာဝိုင်းဒိုင်နယ်၊ ဒိုင်နယ်ရုံးတွင် ရေးခဲ့သည်။