ရက် ၄၀ တိုက်ပွဲအဲဒီလို အခြေအနေ ကောင်းနေတဲ့အခါမှာပဲ မမျှော်လင့်တာတခု ပေါ်လာတယ်။ အဲဒါ ဘာလဲဆိုတော့ အလံနီပါတီနဲ့ အလံနီပါတီနွယ်တဲ့သူတွေက ဖိုတွေ ခွဲပစ်တယ်။ နဂိုက လူတွေအားလုံးက ဖိုတဖိုထဲမှာ စားကြတာ။ အခုကျတော့ အလံနီ ပါတီကလူတွေက သူတို့ရဲ့ မူဝါဒအတိုင်း သူတို့ခေါင်းဆောင် သခင်စိုး ပြောထားတဲ့အတိုင်း ‘ကွဲအက်ရေးမှ ခွဲထွက်ရေးသို့’ ဆိုတဲ့ မူပေါ်လစီအတိုင်း “အချောင်သမားတွေနဲ့ အတူမနေနိုင်ဘူး။ အချောင်သမားတွေနဲ့ အတူတိုက်ပွဲမဝင်နိုင်ဘူး” ဆိုပြီးတော့ ခွဲထွက်တယ်။ ကျနော်တို့ အတန်တန်တားပါတယ်။ “မလုပ်ပါနဲ့။ ရန်သူ အားရပါလိမ့်မယ်” ပြောလို့မရဘူး။
သူတို့ အဆိုမှာသူတို့ ပါတီကလွဲပြီး ကျန်တဲ့လူတွေအားလုံးက အချောင်သမားတွေချည်းပဲ။ အဲလိုမူအရ သူတို့ခွဲထွက်တာ။ တော်တော် ဝမ်းနည်းစရာကောင်းတယ်။ သူတို့ခွဲထွက်တော့ မလညပ၊ ပြည်သူ့ရဲဘော် သူတို့ကလည်း သူတို့လည်းပဲ ပါတီကြီးတခုကိုး။ အဲဒီတော့ သူတို့က ကျန်တဲ့လူတွေနဲ့ တွဲနေလို့ရှိရင် မဖြစ်ဘူး။ သူတို့ပါတီကြီးတခုဖြစ်တဲ့ဟာကို ဖော်ပြဖို့လိုတယ်ဆိုပြီးတော့ သူတို့လည်း ခွဲထွက်တယ်။ အဲဒီလိုနဲ့ ရိက္ခာရုံဟာ အကုန်ကို ကွဲထွက်ကုန်တယ်။
ကျနော်တို့ကို အချောင်သမားလို့ စွပ်စွဲတဲ့သူတွေ အဲဒီကျွန်းပေါ်မှာ ကျနော်တို့နေတုန်းပဲ သူတို့ရဲ့ ခေါင်းဆောင်ကြီး သခင်စိုးဟာ လက်နက်ချလာတယ်။ အဲဒီနောက် အားလုံးသိကြတဲ့အတိုင်း ဗိုလ်နေဝင်းက အရေခွာ အပြတ် သူ့ကို အရှက်ခွဲပစ် တယ်။ တရားရုံးမှာ။ အဲဒီနောက် သူက မဆလကို သဘောတရား အမျိုးမျိုးနဲ့ ထောက်ခံအလုပ်ကျွေးပြုရတယ်။ အဲဒီလိုနဲ့အင်မတန် နာမည်ဆိုးနဲ့ပဲ ဇာတ်သိမ်းသွားရတယ်။
ကျနော့်အနေနဲ့ဆိုရင် အလံနီထဲမှာရော အနွယ်တွေထဲမှာရော ပုဂ္ဂိုလ်ရေး အင်မတန်ရင်းနှီးတဲ့ လူတွေရှိတယ်။ အတူတူ တိုက်ပွဲဝင်ခဲ့တဲ့လူတွေလည်း ရှိတယ်။ ကျနော့်ကိုကူညီခဲ့တဲ့လူတွေလည်း အများကြီးရှိတယ်။ ကျွန်းပေါ်ပါလာသူရော၊ ပါမလာသူရော ထောင်အပြင်မှာ ဆက်ဆံဖူးတဲ့လူတွေ ရှိပါတယ်။ ဒါကြောင့်မို့လို့ ဒါနဲ့ပတ်သက်ပြီး ကျနော် သိပ်အကျယ်ကြီး မပြောချင်ဘူး။
အဲဒီတော့ ဘယ်လိုပဲဖြစ်ဖြစ် ကျနော်ပြောချင်တာက ကျနော်တို့ထဲမှာတော့ အတော်အားနည်းသွားတယ်။ မတတ်နိုင်ဘူး။ ရှိတဲ့အတိုင်းပဲကျနော်တို့ ဆက်သွားတယ်။ ကျွန်းပေါ်က ဆက်လုပ်စရာရှိတဲ့ဟာတွေကို ဒီအကွဲက ဘယ်လိုမှ ဂယက်မရိုက်အောင် ကျနော်တို့ အစွမ်းကုန်ကြိုးစားခဲ့ကြတယ်။
အဲဒီလိုနဲ့ ဘာဖြစ်သလဲဆိုတော့ ၁၉၇ဝ ခုနှစ် နွေဦးပိုင်းမှာ ကျွန်းရောက်ပြီး တနှစ်လောက်မှာ တနေ့ကျတော့ အလံနီထဲ ကပဲ ရဲနီတင်ငြိမ်း (ကိုတင်ငြိမ်းက နဂိုက အစိုးရဆီက ရဲ။ အိမ်ထောင်သည်ပါ။ အဲဒီတုန်းက သူ့အသက်က ၃ဝ နားနီးပါပြီ)။ သူဟာ အသားဝါရောဂါနဲ့ ကွယ်လွန်သွားတယ်။ ကိုတင်ငြိမ်းနေတဲ့အဆောင်က ကျနော်နေတဲ့ အဆောင်နဲ့ဆိုရင် တဆောင်ခြား။ သူက အဆောင်နံပါတ် ၇။ ကျနော်က အဆောင်နံပါတ် ၉။ အဲဒါ …
တညကျတော့ ညကြီးသန်းခေါင် ကျနော်တို့ အိပ်ပျော်နေပြီ။ အဲဒီမှာ အသံနက်ကြီးနဲ့ ဆိုးဆိုးဝါးဝါးကြီး အော်တဲ့ အသံတွေ ကြားရတယ်။ “သမီးရေ …” ဆိုပြီးတော့။ အို … ချောက်ချားစရာ တကယ်ကောင်းတယ်။ ထောင်ကလည်း ထောင်ဗျာ၊ ကျွန်းကလည်းကျွန်း၊ သန်းခေါင်ကလည်း သန်းခေါင်။ အဲလိုအခါမှာ ဒီလိုအသံကြီးကြားရတာ။ တခါတည်း မကဘူး။ ကျနော်မှတ်မိသလောက်ဆိုရင် ၃-၄ ခါ ထင်တယ်။ ကျနော်တို့ ကြားရတယ်။ ကျနော်နိုးပြီးနောက် ကြားရတဲ့ဟာပေါ့လေ။
ဒါနဲ့ ကျနော်တို့အားလုံး လှုပ်လှုပ်ရွရွဖြစ်ပြီးတော့ စနည်းနာ။ အဲဒီတော့ သူများအိပ်ချိန်ကြီး သူများအဆောင်မှာ ဖြစ်တာ အတင်းဝင်သွားမေးလို့လည်း ရိုင်းရာကြမယ်လေ။ မသိတတ်ရာကြမယ်။ ဒါမို့ သူတို့အကြောင်း စနည်းနာပြီးတော့မှ ကိုယ်စားလှယ်လွှတ်ပြီး သွားစုံစမ်းကြည့်တော့ … ကိုတင်ငြိမ်း အခြေအနေ မကောင်းဘူးဆိုပြီးပြော၊ နောက် ‘ကိုတင်ငြိမ်း ဆုံးသွားပြီ’ ဆိုတဲ့သတင်း ချက်ချင်းကြားတာ။
ကျနော်တို့အားလုံး ဆက်အိပ်လို့မရကြတော့ဘူး။ ဒီကိစ္စ သိပ်ကြီးကျယ်သွားပြီ။ ပထမဆုံး ကိုကိုးကျွန်းမှာ လူတယောက် ထောင်ကပေးတဲ့ရောဂါနဲ့ သေဆုံးရတာဖြစ်တယ်။ အဲဒီတော့ ကျနော်တို့ခေါင်းဆောင်တွေက ဒီကိစ္စ ဘာလုပ်ကြမလဲလို့ အစည်းအဝေးထိုင်တယ်။ တိုင်ပင်ကြတယ်။ တိုင်ပင်တော့ ဒီကိစ္စဟာ ကြည့်နေလို့ မရဘူး။ တခုခုတော့ လုပ်မှဖြစ်မယ်လို့ ကျနော်တို့သဘောရတယ်။ ဒါပေမယ့် ဖြစ်ချင်တော့ ကာယကံရှင်က ကျနော်တို့ မဟုတ်ဘူး။ ကာယကံရှင်က အလံနီပါတီနဲ့ ဆိုင်နေတယ်။
အဲဒီတော့ ကျနော်တို့က ကိုယ်စားလှယ်လွှတ်ပြီးသွားဆွေးနွေးတယ်။ ဒီကိစ္စဟာ သာမန်ကိစ္စမဟုတ်ဘူး။ နောင်လည်း အစဉ်လာဖြစ်မယ့် ကိစ္စဖြစ်တယ်။ အဲဒီတော့ ပထမဆုံး ရဲနီတင်ငြိမ်းရဲ့အလောင်းကိုပြည်မ ပြန်ပို့ပေးရေး၊ သူ့မိသားစုဆီ ပြန်ပို့ပေးရေး။ ဒါ သိပ်အရေးကြီးတယ်။ အဲဒီအတွက် ကျနော်တို့တိုက်ပွဲဝင်ရမယ်၊ တောင်းဆိုရမယ်လို့ပြောတော့ အလံနီကလည်း သဘောတူတယ်။
အဲဒီတော့ သဘောတူတာနဲ့ ကျနော်တို့ နောက်နေ့မှာ အားလုံး ကိုယ်စားလှယ်တွေ ရွေးပြီးတော့ ထောင်အာဏာပိုင်တွေကို တွေ့တယ်။ တွေ့ပြီးတော့ ကိုတင်ငြိမ်း ကွယ်လွန်တဲ့အကြောင်း၊ ကိုတင်ငြိမ်းရဲ့ အလောင်းကို ပြည်မပြန်ပို့ပေးဖို့ သူ့မိသားစု လက် ပြန်အပ်ပေးဖို့ ပြောတယ်။ အဲဒီတော့ ထောင်အာဏာပိုင်တွေ က အထက်ကိုမေးပြီး ပြန်ပြောတာက “မဖြစ်နိုင်ဘူး။ ကျွန်းပေါ်မှာပဲ သင်္ဂြိုလ်ရမယ်” လို့ ပြန်ပြောတယ်။ အဲဒီတော့ ကျနော်တို့နဲ့က ထိပ်တိုက်ရင်ဆိုင်ရတဲ့ပြဿနာ ဖြစ်လာတယ်။ ကျနော်တို့ကလည်း ဒီလိုဆို ကျွန်းမှာသင်္ဂြိုလ်ဖို့ဆိုရင် ကျနော်တို့ ဒီအလောင်း မပေးနိုင်ဘူး။ ပြည်မ ပြန်ပို့မယ်ဆိုရင်ပေးမယ်ဆိုပြီးတော့ အလောင်းမပေးဘဲ ထားတယ်။
အလောင်းမပေးဘဲထားတယ်ဆိုတာက ဒီလို …။ အလောင်းကို ကျနော်တို့ ခေါင်းသွင်းတယ်။ ခေါင်းသွင်းတယ် ဆိုတာ သွပ်ပြားတွေနဲ့ ခေါင်းလုပ်တာပေါ့။ အပြင်ကတော့ သစ်သားအခေါင်းပေါ့။ သစ်သားခေါင်းအတွင်းမှာ သွပ်ပြားခံတယ်။ အဲတော့ အခြားဆောင်တွေမှာရှိတဲ့ အဆောင်တွေက ခေါင်မိုးသွပ်ပြားတွေကို ဆွဲချလာတာပဲ။ ခေါင်းရိုက်ပြီးတော့ ခေါင်းထဲမှာထားတယ်။ ထားပြီးတော့ ဒီကျနော်တို့စခန်းရဲ့ အရှေ့တောင်ထောင့်မှာ ကုလားဖျဉ်းလေးလိုထိုးပြီးတော့ ကျနော်တို့ အဲဒီမှာထားတယ်။
အဲဒီတော့ အဲဒီနောက်မှာကလည်း ထောင့်ဆိုတော့။ စခန်းထောင့်မှာ ဝါဒါတွေရဲ့ ကင်းစခန်းလေးရှိတယ်။ အမြင့်လေးနဲ့သူက။ အပေါ်မှာ ဆလိုက်မီးလည်း ရှိတယ်။ အဲဒီတော့ ကျနော်တို့ အောက်မှာက အောက်လင်းဓာတ်မီးတွေ ထွန်းပြီးတော့ စောစောက ကိုတင်ငြိမ်းအလောင်းထားတယ်။ ဟိုအပေါ်မှာက ဝါဒါအစောင့်။ ဝါဒါက တယောက်ပဲစောင့်တာ။ ဟိုဘက်က လှိုင်းတွေက တဝေါဝေါနဲ့ ညဆိုရင် မှန်မှန်ကြီး လှိမ့်တက်နေတာ။ အသံမြည်နေတာ။ ၂ ရက် ၃ ရက်နေတော့ အဲဒီ ဝါဒါဟာ မနေရဲလို့ ဆင်းပြေးရော။ ဝါဒါ အစောင့် မရှိတော့ဘူး။
ဒီအချိန်မှာ ကျနော်တို့ဘက်က စဉ်းစားတယ်။ “ဟ ! ငါတို့တတွေ ဒီအလောင်းကြီးပိုက်ပြီး ငုတ်တုတ်ထိုင်နေလို့ မပြီးဘူး။ ကိုယ့်ဘက်က သိပ်ပြီးတော့ ခံစစ်ကြီးလို ဖြစ်နေလို့ရှိရင် လက်ဦးမှုဆုံးပြီးတော့ ကိုယ်ပဲခံရလိမ့်မယ်” ဆိုပြီးတော့ စဉ်းစား တယ်။ ဒါ့အပြင် ကျနော်တို့မှာ စောစောက ပြောခဲ့တဲ့ ငါးပိတိုက်ပွဲအရှိန်ကလည်း ရှိနေတာ။ အောင်ပွဲရဲ့ အရှိန်ကလည်း ရထားတော့ ကိုယ်ကထိုင်ပြီး ခံစစ်လိုစောင့်နေတာထက် ထိုးစစ်ကို လုပ်ဖို့ စဉ်းစားကြတယ်။ လုပ်ရမယ်လို့လည်း မြင်ကြ တယ်။ အဲဒီမှာ ကျနော်တို့ညှိတယ်။ ဘယ်တောင်းဆိုချက်တွေနဲ့ တိုက်ပွဲဝင်မလဲလို့ ညှိကြတဲ့အခါကျတော့ ကျနော်တို့ တောင်းဆိုချက် ၅ ခု တင်လိုက်တယ်။
ဆက်လက်ဖော်ပြပါမယ်။
No comments:
Post a Comment