နောက်တခုက ရေဒီယို။ ကျနော်တို့ကို ထောင်အာဏာပိုင်တွေက အဲဒီတုန်းက ခေတ်စားတဲ့ ‘ကြံ့ခိုင်ရေး’ ရေဒီယို လိုဟာမျိုး ဆိုနီရေဒီယိုတလုံး ပေးထားတယ်။ ဓာတ်ခဲသုံး ရေဒီယို။ ဒါပေမယ့် အဲဒီရေဒီယိုကို သူတို့က ဗမာ့အသံပဲ ဖမ်းပေးလိုက်တယ်။ ဖမ်းပေးပြီး ကျန်တဲ့ဟာတွေကို မဖမ်းနိုင်အောင်လို့ ရေဒီယိုကို သုံးထပ်သား သေတ္တာနဲ့ ရိုက်ပြီးတော့ ကျနော်တို့ဆီ ပို့ပေးတယ်။ ရေဒီယိုပါ ထောင်ချထားတာ။ လူတွေတင်မကဘူး ရေဒီယိုပါထောင်ချပြီး ကျနော်တို့ကို ပေးတယ်။ပေးတဲ့အခါကျတော့ ဝါဒါက ညမှာလာပို့တယ်။ သူတို့ ဗမာ့အသံပြီးချိန် ည ၉ နာရီခွဲမှာ ပြန်ပြီးလာယူတယ်။ အဲဒီတော့ ကျနော်တို့က ကိုယ့်ဆီရောက်လာပြီဆိုလို့ရှိရင် ရေဒီယိုကို သံချောင်းတချောင်းမှာ ပလာစတာတွေ ကပ်ပြီးတော့ အဲဒီရေဒီယိုကို ကြားကနေ ထိုးတယ်။ ပလာစတာကပ်ထားတာကတော့ မနာအောင်လို့။ မနာအောင်လို့ဆိုတာထက် လက်သည် မပေါ်အောင်လို့ပါ။ အဲလိုနည်းနဲ့ ရေဒီယိုမျိုးစုံကို ကျနော်တို့ နားထောင်နေရတာ။ နောက်ပိုင်းကျတော့ ထောင်အာဏာပိုင်တွေလည်း ဘာမှမတတ်နိုင်တော့တဲ့အခါကျတော့ ရေဒီယိုကို သုံးထပ်သားသေတ္တာနဲ့ သော့ခတ်တာတောင် မလုပ်တော့ပါဘူး။ ရေဒီယိုဟာ ပြောင်ပဲ၊ ကျနော်တို့ကြိုက်တာ ဖွင့်နေကြတော့တာပဲ။
အဲဒီလိုနဲ့ တနေ့ကျတော့ ကျနော်တို့ အဲဒါ ကျွန်းပေါ်ရောက်ပြီးတော့ လပိုင်းပဲရှိသေးတယ်။ ပထမဆုံးတိုက်ပွဲ တခုဖော်ဖို့ အခြေအနေကြုံလာတယ်။ အဲဒါက ဘာဖြစ်တာလဲဆိုတော့ … ဒီ ကိုကိုးကျွန်းနဲ့ ရန်ကုန်က မိုးတွင်းဆိုလို့ရှိရင် ဆက်သွယ်ရေး သိပ်ခက်တယ်။ အထူးသဖြင့် ဆက်သွယ်ရေးတာဝန်ယူတဲ့ ရေတပ်ကဖြစ်စေ၊ သင်္ဘောလိုင်းတွေကပဲဖြစ်စေ မုန်တိုင်းများတဲ့ကာလမှာ ဖြစ်နိုင်ရင်မသွားချင် မလာချင်။ နောက်ပြီးတော့ ကိုကိုးကျွန်းကို ကပ်ရတာလည်း နည်းနည်းခက်တယ်။ အဲဒါ သူတို့က အဲဒီအချိန်ကျရင် အဆက်အသွယ်ကို လုံးဝ မရှိသလောက်ပဲ။ အဲဒီတော့ မိုးတွင်းမရောက်ခင် ပို့စရာရှိတာတွေ အကုန်လုံး ကျွန်းကိုပို့ထားတယ်။ မိုးတွင်းကျရင် ရပ်။ မိုးကုန်မှ တခါပြန်ပြီးတော့ ဟိုက သင်္ဘောတွေလာတယ်။ အဲလို လုပ်တာ။ အဲဒီတော့ ဘာဖြစ်လဲဆိုတော့ ကျနော်တို့ကိုပေးတဲ့ ငါးပိဟာ တနေ့ကျတော့ ကြည့်လိုက်တော့ ငါးပိက ချိုးတွေနဲ့ အပုပ်တွေ အနံ့တွေသိပ်ဆိုးတာ အဲဒါတွေ ဖြစ်နေတာ။
အဲဒါ ကျနော်တို့က ထောင်အာဏာပိုင်ကို သွားပြောတယ်။ “ဟာ … ဒါတွေတော့ ကျနော်တို့ ကျွေးလို့ ဘယ်ဖြစ်မလဲ။ ဒါတွေ ကျနော်တို့စားရင် ကျနော်တို့အကုန်လုံး ကျန်းမာရေးထိခိုက်မှာပေါ့” ဆိုတော့ ထောင်အာဏာပိုင်က “တခြားမရှိဘူး၊ ဒါပဲရှိတယ် ယူ” ဆိုပြီးပြောတော့ ပြတ်ပြတ်ပဲပြောတယ်။
အဲဒီတော့ ကျနော်တို့အားလုံး တိုင်ပင်ကြတယ်။ တိုင်ပင်ကြပြီးတော့ “ဒါဟာ ပထမဆုံး ငါတို့ကိုအညွှန့်ချိုးဖို့ သူတို့ပြောလေ့ရှိတဲ့ ပေးတာယူ ကျွေးတာစား စကားမများနဲ့ဆိုတဲ့မူကို စ စမ်းကြည့်တာပဲ ဖြစ်တယ်။ တို့ ဒါကိုသာ လက်ခံလိုက်လို့ရှိရင် ဦးကျိုးသွားမှာ။ နောင် ဘယ်တော့မှ သူတို့ကို ပြန်ပြောလို့ရမှာ မဟုတ်တော့ဘူး။ ဒါကို လက်ခံလို့မဖြစ်ဘူး” ဆုံးဖြတ်ကြတယ်။
အဲလို ဆုံးဖြတ်ကြပြီးတော့ ထောင်အာဏာပိုင်တွေကို ပြောတယ်။ “ကျနော်တို့ကို ငါးပိအကောင်းပေး။ မပေးရင် ကျနော်တို့ အစာငတ်ခံ တိုက်ပွဲဝင်မယ်” လို့ ပြောတယ်။ ဒီတော့ ထောင်အာဏာပိုင်ကလည်း “တိုက်” ဒီတခွန်းပဲ။ အဲဒါ ကျနော်တို့ ပထမဆုံးတိုက်ပွဲ စတိုက်ကြတယ်။ ငါးပိတိုက်ပွဲ။
အဲဒီတော့ ဒါဟာ တောင်းဆိုတဲ့ကိစ္စဟာ ဘာမှ ကြီးကြီးမားမားမဟုတ်ဘူး။ ဒါပေမယ့် ဒါဟာ ကိုကိုးကျွန်းမှာ ပထမဆုံး တိုက်ရတဲ့တိုက်ပွဲဖြစ်တော့ တဖက်နဲ့တဖက်လည်း အခြေအနေ ကောင်းကောင်း မသိကြသေးဘူး။ အတော်ကို စမ်းတဝါးဝါးနဲ့ တိုက်ရတာဖြစ်တဲ့အတွက် အင်မတန်ခက်ခဲမယ်လို့ ကျနော် တွက်ထားတယ်။ ခက်ခဲမယ်ဆိုတာ အောင်ပွဲရဖို့ ခက်ခဲတယ်ဆိုတာထက် ကျနော်တို့အတွက် အတွေ့အကြုံစုဆောင်းရတာ၊ နောက်ပြီးကျတော့ အချင်းချင်းညှိနှိုင်းရတာ အဲဒါတွေအတွက် အခက်အခဲရှိနိုင်တယ်လို့ ကျနော်တို့ တွက်ထားတာ။ ဘယ်လိုပဲဖြစ်ဖြစ် ဒီတိုက်ပွဲကို ပေါ့လို့မရဘူးဆိုပြီး ကျနော်တို့ အဲဒီလိုတွက်ပြီးတော့ တိုက်တယ်။
အစာငတ်ခံတိုက်ပွဲတိုက်တော့ ကျနော်တို့ခေါင်းဆောင်တွေက “ရဲဘော်တို့ ရှေ့ကတက်ကြ” ဆိုပြီးတော့ သူတို့က နောက်ကနေခဲ့တာ မဟုတ်ဘူး။ သူတို့ကိုယ်တိုင် ရှေ့ဆုံးတိုက်တာ။ ဆရာ ရာဂျန် ပါတယ် ပထမ။ ဒါပေမယ့် ဆရာ့ခမျာမှာ ၂ ရက်လောက် ၃ ရက်လောက်ရှိသေး နားကိုထိုင်းသွားရှာတာ။ သူ့ကျန်းမာရေးက မကောင်းဘူး။ အသက်ကလည်း ကြီးပြီ။ ဒါပေမယ့် အဲဒီ နားမကောင်းရက်နဲ့ဘဲ ဒီတိုက်ပွဲကို အစအဆုံး သူ ပါဝင်တိုက်သွားတာ။ နောက် … ကျနော် မှတ်မိနေသလောက်ဆိုရင် တခြား ပြည်သူ့တိုးတက်ရေးပါတီက ဦးလေး ဦးခင်မောင်မြင့်လည်း ပါတယ်။ ပြည်သူ့ရဲဘော်ထဲက ဗိုလ်မျိုးချစ်တို့လည်း ပါတယ်။ လူအတော်များများ ပါတယ်ခင်ဗျ။
အဲဒီတော့ ဒီတိုက်ပွဲဟာ ကျနော်တို့ဘက်က အချက်အလက်အရ အင်မတန် ပိုင်နိုင်နေတယ်ဆိုတော့ တိုက်လို့တော့ ကောင်းတယ်။ ရန်သူ့ဘက်က အမှားချည်းပဲ။ အာဏာပိုင်တွေဘက်က အမှားချည်းပဲ။ အဲဒီလိုဖြစ်တော့ ကျနော်တို့က ပြောလို့လည်း ကောင်းတယ်။ တိုက်လို့လည်း ကောင်းတယ်။ ကိုယ့်အထဲထဲကိုလည်း စည်းရုံးလို့ ကောင်းတယ်။
နောက် … ကျနော်တို့ဆီမှာက အဲဒီလို တိုက်ပွဲတခုလုပ်ပြီ၊ အစာငတ်ခံပြီဆိုလို့ရှိရင် ကျန်တဲ့သူတွေ အားလုံးက တိုက်ပွဲမှာ မပါတဲ့လူတွေ၊ မပါကြပေမယ့် ဒီတိုက်ပွဲကို ထောက်ခံတဲ့အနေနဲ့ ဒီအဆောင်ထဲကနေပြီးတော့ အပြင်ကို မထွက်ကြတော့ဘူး။ ဒီဝင်းကြီးထဲကနေ အပြင်ကို မထွက်ကြတော့ဘူး။ ဝင်းကြီးထဲမှာပဲ နေတယ်။ အပြင်ထွက်ပြီး ရေခတ်၊ ထင်းခုတ်တောင် မလုပ်ကြတော့ဘူး။ ကျနော်တို့ အဲဒီကျတော့ ရေတွင်းတွေ ကိုယ့်အဆောင်ထဲမှာ တူးပြီးနေပြီ။ အဲဒီတော့ အပြင်ထွက် ရေလည်း မခတ်ကြတော့ဘူး။ တောင်ယာလည်း မလုပ်ဘူး။ တောင်ယာလည်း အဆုံးခံတယ်။ သစ်သီးတွေဘာတွေ စိုက်ထားတာရှိရင် ငှက် အထိုးခံတယ်။ ကျနော်တို့သွားပြီး မယူတော့ဘူး။
အဲလိုနဲ့ တိုက်ပွဲဝင်လို့ ၅ ရက်လောက်ရှိတဲ့အခါကျတော့ ထောင်အာဏာပိုင်တွေက ပြောတယ်။ “ဆရာဝန်ကို မေးမယ်” ကျနော်တို့က သဘောတူလိုက်တယ်။ အဲဒါနဲ့ ထောင်ဆရာဝန်ကို အဆုံးအဖြတ်ပေးစေတယ်။ ထောင်ဆရာဝန်က အဲဒီတုန်းက ဦးဖေစိန်။ ထောင်ဆရာဝန်ကိုယ်တိုင်က ကြည့်ပြီးတော့ ပြောတယ်။ “ဒီ ငါးပိမျိုး စားလို့မဖြစ်ဘူး” လို့ပြောတာနဲ့ အာဏာပိုင်တွေ ကွဲထွက်သွားတယ်။
အဲဒီတိုက်ပွဲ ကျနော်တို့ နိုင်လိုက်တယ်။ နိုင်လိုက်တယ်ဆိုတာကသူတို့ ငါးပိ ပေးစရာ မရှိဘူး။ ဒါကို ကျနော်တို့ မယူဘူး။ အကြွေးထားပြီး နောင် သင်္ဘောလာတဲ့အခါမှာ ကျနော်တို့ကို အကြွေးပြန်ဆပ်ပေးရတယ်။ အဲဒီတော့ ဒီတိုက်ပွဲ နိုင်လိုက်တာဟာ ကျနော်တို့ထဲမှာ အကုန်လုံး အကြီးအကျယ် အားတက်သွားတယ်။
နောက်ပြီးကျတော့ ထောင်အာဏာပိုင်တွေလည်းနည်းနည်းလေးတော့ ရိုကျိုးသွားတာပေ့ါ။ ဒါပေမယ့် ဒါဟာ အသေးလေးတခုပဲ ရှိသေးတယ်ဆိုတာ အားလုံးသိတယ်။ ဒါ နောင်လာမယ့်ဟာတွေအတွက် ဇာတ်တိုက်တာ သာသာတာ ရှိသေးတယ်ဆိုတာ ဒါ အားလုံး သဘောပေါက်ကြတယ်။
ဆက်လက်ဖော်ပြပါမယ်။
No comments:
Post a Comment