တော်လှန်ရေးသမားကိုယ်ထူကိုယ်ထ
အဲဒီတော့ ဒီ ကိုယ်ထူကိုယ်ထဆိုတာဟာ ဗမာပြည်ထောင်သမိုင်းမှာ အသစ်ပဲ။ ဗမာပြည်ထောင်သမိုင်း၊ ဗမာပြည်နိုင်ငံရေးသမိုင်းမှာ အသစ်ဆန်းဆုံးသော အရာလို့ ပြောလို့ရတယ်။ နိုင်ငံရေးအကျဉ်းသားတွေကို B ကလပ်ကနေပြီးတော့ ဖြုတ်၊ အဆင့်အမျိုးမျိုး လျှော့ချလိုက်ပြီး အခုဟာက သာမန်အကျဉ်းသားတွေထက် ပိုဆိုးတဲ့အဆင့်ကို ပို့လိုက်တာဖြစ်တယ်။
ကျနော်တို့တတွေဟာ ကိုယ့်ထမင်းကိုယ် ချက်ရရုံမက ကိုယ့်ထင်း ကိုယ်ရှာရမယ်။ ကိုယ့်ရေ ကိုယ်ခပ်ရမယ်။ ကိုယ့်သီးနှံ ကိုယ်စိုက်ရမယ်။ ဒီလို စည်းကမ်းသတ်မှတ်တဲ့ ထောင်မျိုးကို ပြည်မမှာ လုပ်လို့မရဘူး။ သူတို့ ဒါသိတယ်။ ပြည်မမှာလုပ်ရင် ဒါဟာ နိုင်ငံတကာကလည်း သိသွားမယ်။ ပြည်တွင်းကလည်း သိကုန်မယ်။ နောက်တခါ နောက်ပိုင်းမှာ ကျနော်ပြောပါမယ်။ ပြည်မမှာ လုပ်လို့မရတဲ့ အပိုင်းတွေ ထွက်ပြေးကုန်ကြမှာ။ အဲဒီတော့ ကျွန်းပို့မှ လုပ်လို့ရတာ။ အဲဒီအတွက် သေသေချာချာကို စီစဉ်ပြီးတော့ စီမံကိန်းတခုနဲ့ လုပ်တယ်ဆိုတာ နောက်ပိုင်းမှာလည်း ထပ်ပြီးတွေ့ရလိမ့်ဦးမယ်။
စောစောတုန်းက ကျနော်ပြောတဲ့သင်္ဘောပေါ်က လှမ်းမြင်ရတယ်ဆိုတဲ့ အိမ်တွေက လယ်ကျေးရှင်းက အိမ်တွေ။ မြေကျေး ရှင်းလုပ်သားတွေ ဒီမှာရှိတယ်။ အုန်းပင်နဲ့ပတ်သက်တဲ့ဟာတွေ။ နောက်ပြီးကျတော့ အထဲနည်းနည်းဝင်လာတော့ ထောင်အမှုထမ်းတွေရဲ့ တန်းလျားတွေ။ ထောင်အမှုထမ်းတွေရဲ့တန်းလျား ဆိုတော့ ထောင်အမှုထမ်းတွေလည်း သူတို့ဇနီးတွေ ဘာတွေ ခေါ်လာရတာ မဟုတ်ဘူး။ ဟို … ထောင်ပိုင်ကအစ အကုန်လုံး ဒီမှာ အမျိုးသမီးတယောက်မှ မရှိဘူး။
အဲဒီ တန်းလျားတွေကျော်လာ၊ နောက် ကမူလေးတခုကိုကျော်လိုက်တော့မှ အဲဒီလမ်းရဲ့ဘယ်ဘက် ညာဘက် နှစ်ဖက် စလုံးမှာ သံဆူးကြိုး နှစ်ထပ်ကန့်ထားတဲ့ ဝင်းကြီး ၃ ဝင်းကို လှမ်းတွေ့ရတယ်။ ဧရာမ ဝင်းကြီးတွေ၊ အထဲမှာ အဆောင်တွေ နဲ့။ အဲဒါ ကျနော်တို့ကိုထားမယ့် အဆောင်တွေပဲ။ ကျနော်တို့အားလုံးကို ဝင်းကြီးတဝင်းထဲမှာပဲ ထည့်လိုက်တယ်။ ကျန်တဲ့ ဝင်းကြီး ၂ ဝင်းက လွတ်နေသေးတယ်။ ကျနော်တို့လိုပဲ အလားတူကြီးတဲ့ ဝင်းကြီးတွေ။ တဝင်းကဆို ကျနော်တို့ထက်တောင် ပိုကြီးသေးတယ်။
ဝင်းတဝင်းထဲမှာ ထည့်လိုက်တယ်။ ထည့်လိုက်တာက လူ ၂၃၃ ယောက်။ အဆောင်တွေမှာ ခပ်ချောင်ချောင်ပဲ ပိုတောင်နေသေးတယ်။ နောင်မှ ကျနော်တို့ ပြန်တွက်ကြည့်တာ ဝင်း ၃ ဝင်းလုပ်ထားတာ ဒီစခန်းထဲမှာ လူအပြည့် ခပ်ကျပ်ကျပ် ထည့်နိုင်မယ်ဆိုလို့ရှိရင် ဒီဝင်း ၃ ဝင်းဆိုလို့ရှိရင် လူ ၁၀၀၀ လောက်ကို ပို့နိုင်တယ်။ နိုင်ငံရေးအကျဉ်းသား ၁၀၀၀ ကိုကိုးကျွန်းပို့ဖို့ဆိုတဲ့ အစီအစဉ်။ ဘယ်လောက် ကြောက်စရာကောင်းလိုက်သလဲ။ ဘယ်လောက် ရက်စက် ယုတ်မာလိုက်တယ်ဆိုတာ စဉ်းစားလို့ရတယ်။
အဲဒီတော့ကျနော်တို့တတွေ အဆောင်ထဲဝင်သွားတယ်ဆိုတော့ နေရတာက ဘားတိုက်လိုဟာတွေ။ စစ်တန်းလျား ဘားတိုက်လိုဟာတွေ၊ အဲဒီမှာ ကုတင် မရှိဘူး။ ကွပ်ပျစ်လိုအဆောင် ဘားတိုက်အပြည့် ရိုက်ထားတဲ့ဟာတွေ ရှိတယ်။ အဲဒီအလယ်မှာ လူသွားလမ်းက အုတ်စီ ကွန်ကရစ်နဲ့။ အဲဒီကုတင် တွေရဲ့အောက်မှာတော့ သဲတွေပဲ။ ကျနော်တို့ရောက်သွားတော့ ကျနော်တို့နေတဲ့အဆောင်တွေထဲမှာကိုပဲ ဝင်ကစွပ်တွေ၊ ဂဏန်းအသေးလေးတွေ သွားလာနေကြတုန်းရှိသေးတယ်။ ဆိုလိုတာ ဒီစစ်အစိုးရဟာ ထောင်တွေ တိုးချဲ့ခြင်းအားဖြင့် သဘာဝပတ်ဝန်းကျင်ကိုပါ အကြီးအကျယ် ထိခိုက်စေတယ်။ ဒီလို ကျနော်တို့ ထင်းခုတ်၊ တောင်ယာခုတ်နဲ့ ပိုကိုထိခိုက်သွားတာ။
အဲဒီတော့ ဒီတခါပို့လိုက်တဲ့လူကို ကြည့်လိုက်တော့ ကျောင်းသားလူငယ်က ရာခိုင်နှုန်း ၇ဝ-၈ဝ လောက်ရှိတယ်။ အဲဒီအထဲက ကျောင်းသားချည်းကိုက တဝက်ကျော် (ရာခိုင်နှုန်း ၅ဝ ကျော်) လောက်ရှိလိမ့်မယ်။ ကျနော်တို့ သေသေချာချာတော့ အဲလိုစာရင်းတော့ တွက်မကြည့်ဘူးပေါ့လေ။ သေချာတာတော့ ရာခိုင်နှုန်း ၅ဝ အထက်မှာပဲ။ ၆ဝ တောင်ကျော်လောက်တယ် ထင်တယ်။ အဲဒီတော့ ပြန်စဉ်းစားလိုက်တော့ ၅၈ ခုနှစ် ကိုကိုးကျွန်းပို့တုန်းက ကျောင်းသားက နည်းနည်းလေး။ အဲဒီတုန်းက ကျောင်းသားဟာ ကိုကိုးကျွန်းပို့တဲ့ အရေအတွက်ထဲမှာ ၁ဝ ခိုင်နှုန်းတောင် မရှိဘူး။ ဒီတခါကျတော့ ရာခိုင်နှုန်းက ၅ဝ-၆ဝ အဲလိုဖြစ်နေတယ်။
ကျနော်ထောက်ပြချင်တာက ကျနော် အထက်ကပြောခဲ့တဲ့ စစ်အစိုးရရဲ့ ကျောင်းသားတွေအပေါ်ထားတဲ့ အာဃာတ အငြိုး၊ အဲဒါကို ထပ်ပြီးပြောချင်လို့ပါ။ ဒီတခါ ပို့လိုက်တဲ့အထဲမှာ ကျနော်တို့ ပြန်စစ် ကြည့်လိုက်တော့(ဗကသ)က ပါတယ်။ ရန်ကုန်တက္ကသိုလ်ကျောင်းသားသမဂ္ဂ ပါတယ်။ ရန်ကုန်ခရိုင် ကျောင်းသားများ သမဂ္ဂ ပါတယ်။ မန္တလေးတက္ကသိုလ် ကျောင်းသားများသမဂ္ဂ ပါတယ်။ မန္တလေးခရိုင် (ဗကသ)က လူငယ့်တပ်ဦး။ နောက် … မြန်မာနိုင်ငံ အလုပ်သမား ညီညွတ်ရေးပါတီ၊ ပြည်သူ့ရဲဘော်၊ အလံနီပါတီ၊ ABKO ၊ ရခိုင်လူငယ် … စတဲ့ဟာတွေပါတယ်။ ဖဆပလ၊ ပထစ တယောက်မှ မပါဘူး။ အကုန်လုံး ထောင်တွေထဲမှာ ကျန်နေခဲ့တယ်။ လွှတ်လည်း မလွှတ်သေးဘူး။ အဲဒီတုန်းက အရင်ကျွန်းရောက်ဖူးသူတွေ လည်း ၃-၄ ယောက်ပါတယ်။ အရင်တခါ ကျွန်းပါပြီးသား ဗိုလ်အုန်းမောင် အပါအဝင်ပေါ့လေ။
အဲဒီတော့ နိုင်ငံရေးနဲ့ မပတ်သက်သူ၊ လက်ဝဲနဲ့ မပတ်သက်သူရယ်လို့ ဒီ ဒေသ ဆိုင်ရာအာဏာပိုင်တွေ (အဲဒီတုန်းကတော့ လဝကတို့၊ မဝကတို့ အဲဒီ ကောင်တွေပေါ့။) သူတို့က သူတို့နဲ့မတည့်လို့ ညစ်ပြီးထည့်လိုက်တဲ့ ဘယ်လိုမှ နိုင်ငံရေးမလုပ်တဲ့၊ မပတ်သက်တဲ့ တခါမှ မလုပ်ဘူးတဲ့လူတွေ ၄-၅ ယောက် လောက် ပါလာတယ်။ ဥပမာ … မန္တလေးကပါလာတဲ့ ဒေါက်တာ ကူးမားတို့လို ပုဂ္ဂိုလ်တွေ။ ကျန်တာကတော့ ကျောင်းသားနဲ့ လက်ဝဲတွေကြီးပဲ။
ကျနော်တို့နေရတဲ့ ဟို ဝိုင်းထဲမှာအဆောင် ၁၂ ဆောင် ရှိတယ်။ အဲဒီ ၁၂ ဆောင် ထဲက အဆောင် ၂ ဆောင်ကို လှပ်ထား လိုက်တယ်။ တဆောင်ကို ဆန်ဂိုဒေါင် လုပ်တယ်။ တဆောင်ကို ဆေးရုံအဆောင်ဆိုပြီးတော့ လှပ်ထား လိုက်တယ်။ အဲဒီ ကျန်တဲ့ ၁ဝ ဆောင်မှာ ကျနော်တို့ ၂၃၃ ယောက် မျှနေကြတာ။ ကျနော်တို့နေတဲ့ဟာရဲ့ အရှေ့ဘက်အဆုံးမှာ ကျနော်တို့ က သူနဲ့ အရှေ့ဘက်ဖျားဆိုတော့ အရှေ့ဘက်အစွန်မှာ ရိက္ခာရုံ အကြီးကြီး ရှိတယ်။ အဲဒီ ရိက္ခာရုံအကြီးကြီးမှာ မီးဖိုအကြီး နှစ်ခု ရှိတယ်။ နောက် … ထမင်းစားခန်းကြီး ရှိတယ်။ ကျနော်တို့နေတာက ကျွန်းရဲ့တောင်ဘက်အဖျား။ တောင်ဘက် အဖျားမှာဆိုတော့ ကျွန်းက အဖျားရှူးတဲ့အပိုင်းကို ရောက်နေပြီ။ ကျနော်တို့ တောင်ဘက်နားမှာ နည်းနည်းပဲ ကျန်တော့တယ်။
ကျနော်တို့နေတဲ့နေရာမှာ ကျွန်းက အရှေ့နဲ့ အနောက်ဘက်ဆိုလို့ရှိရင် မီတာ ၄ဝဝ မီတာ ၅ဝဝ လောက်ရှိတယ်။ ကျွန်းရဲ့ တောင်ဘက်ဖျားမှာကျတော့ သူတို့ ရေတပ် တို့၊ လေယာဉ်ပျံကွင်းတို့၊ အုန်းဆံကြိုးစက်တို့၊ မြေကျေးရှင်းတို့ အဲဒါတွေ ရှိတယ်။ ကျနော်တို့ရဲ့ ရိက္ခာရုံကနေပြီးတော့ အဲဒီ အရှေ့ဘက်ကို လှမ်းကြည့်လိုက်ရင် သင်္ဘောပျက်ကြီးတခု လှမ်းတွေ့ရတယ်။ သင်္ဘောပျက်ကြီးက ဘာမှ မဝေးဘူး။ ဒီရေကျချိန်ဆိုလို့ရှိရင် လမ်းလျှောက်သွား အဲဒီ ရေစပ်ရောက်လို့ ရှိရင် ရေထဲ ဆင်း။ အဲ ရေကူးစရာရှိရင် နောက်ထပ် ကိုက် သုံးလေးဆယ် ရေကူးလိုက်ရင် အဲဒီသင်္ဘောကြီးကို ရောက်သွားရော။ ဆန်တင်သင်္ဘောကြီး။ ကျနော်က အဲဒီသင်္ဘောကြီးကို အိုနာဆစ်လို့ နာမည် ပေးထားတယ်။ ဂရိသင်္ဘော သူကြွယ်ကြီး အိုနာဆစ်။ ကြားဖူးတာက ဒါ … ဂရိ သင်္ဘောတစင်းလို့ ကျနော်တို့ကြားဖူးတယ်။
ဟုတ်လည်းဟုတ်ပါတယ်။ နောင်မှ ကျနော်တို့ သင်္ဘောပေါ် တက်ကြည့်ကြတဲ့ အခါကျတော့ ဂရိစာတွေ ဘာတွေ တွေ့တယ်။ ဒါပေမယ့် အိုနာဆစ်သူဋ္ဌေးရဲ့ သင်္ဘောဟုတ် မဟုတ်ဆိုတာတော့ မသေချာဘူးလေ။ အဲဒီဟာက ဒီသင်္ဘောရဲ့သမိုင်းကလည်း ဒီလို …။
ဗမာပြည်မှာ ၁၉၆၇ ခုနှစ်၊ ဆန်တွေ ပြတ်လပ်တဲ့အခါကျတော့ စစ်အစိုးရဟာ (အဲဒီတုန်းက မဆလအစိုးရပေါ့) သူတို့က ပြည်သူလူထုမသိအောင် တိတ်တိတ်ကလေး ဆန်တွေကို နိုင်ငံခြားကိုထုတ်ရောင်းတာ။ ဒီသင်္ဘောမှာတင်ပြီး လွှတ်လိုက်တာ။ ဖြစ်ချင်တော့ ဒီသင်္ဘောက ဒီနားမှာရောက်တော့ မီးလောင်တာ။ သင်္ဘောမီးလောင်တာနဲ့ နောက်ဆုံး ကျွန်းနားကို ရေတိမ်တဲ့နေရာ အတင်း ထိုးပြီးတော့ သင်္ဘောထိုးတက်လိုက်ပြီး လူတွေအကုန်လုံး ဆင်းပြေးရတာ။ အဲဒီသင်္ဘောကြီးက ဒီအတိုင်း ကျန်နေခဲ့တာ။ သင်္ဘောပေါ်မှာ မီးလောင်ထားတဲ့ ဟာတွေ အများကြီး။ ကျနော်တို့ တက်ရှာတဲ့အခါကျတော့ သင်္ဘောပေါ်မှာ ဆန်အိတ်အပုပ်တွေ၊ ဆန်အိတ်တွေက ပုပ်ပြီးနံနေပြီ။ လက်နှိပ်စက်အပျက်တွေ၊ တခြားတန်ဖိုးရှိတဲ့ပစ္စည်းတော့ ဘာမှမရှိပါဘူး။ ဒါပေမယ့် နောင်မှာကျတော့ ဒီသင်္ဘောကြီးနဲ့ အဲဒီ တန်ဖိုးမရှိတဲ့ပစ္စည်းတွေကပဲ ကျနော်တို့အတွက် အင်မတန်တန်ဖိုးရှိတဲ့ အဓိက ကုန်ကြမ်း အရင်းအမြစ်တွေ ဖြစ်တာ ကျနော် ဆက်ပြောပြပါမယ်။
ဆက်လက်ဖော်ပြပါမယ်။
No comments:
Post a Comment