ကျောင်းသား ထောင် တော်လှန်ရေးသမား (၁၂)

ဒါပေမယ့် ထောင်ကျတွေအပေါ်ကျတော သဘောထားမပြောင်းဘူး။ နဂိုကတည်းက ထောင်ကျဆိုတာက မသေရုံတမယ် ထားတဲ့ဟာမျိုး။ အဲဒီတော့ ထောင်ထဲမှာ ရိုးရိုးအကျဉ်းသားထဲက သေတာတွေ ထပ်ဖြစ်တယ်။ အဲဒါအပြင် အဲဒီ ၆၇ ခုနှစ် မေလထဲမှာပဲ အမျိုးသမီးထောင်ထဲမှာ အမျိုးသမီးတယောက် ဆုံးသွားတယ်။ အထိန်းသိမ်းခံ အမျိုးသမီး။ ဘယ်သူလဲ ဆိုတော့ ဗမာပြည်ကွန်မြူနစ်ပါတီ မြစ်ဖျားတိုင်းကမိလာတဲ့ အမျိုးသမီးတယောက်။ မမြဦးဆိုတာ ဆုံးသွားရှာရော။ အဲဒါလည်း ရိုးရိုး ဖျားတာ နာတာနဲ့ ဆုံးတာ။

အဲဒီကျတော့ ကျနော် မှတ်မှတ်ရရ ညကြီးပဲ။ ၆၇ ခု၊ မေလ ၆ ရက်နေ့ ညကြီး။ ထောင်မှာက ည ၉ နာရီဆို ထောင်ဝါဒါ တွေက “အိပ်ချိန် … အိပ်ချိန်” လို့ အော်လိုက်ရင် အကုန်လုံး တိတ်ရတာ။ ဘယ်သူမှ စကားမပြောတော့ဘူး။ နဂိုကတော့ စကားတွေပြောကြ၊ တချို့ကတော့ ဘုရားရှစ်ခိုးကြ၊ ပရိတ်ရွတ်ကြနဲ့ အင်မတန် ဆူညံနေတာ။ သီချင်းဆိုတဲ့ လူ ဆို။ အဲဒီ ၉ နာရီကျော်လို့ရှိရင် “အိပ်ချိန် အိပ်ချိန် အိပ်ချိန်” ဆိုပြီး အကုန်လုံး ဝါဒါတွေက လိုက်အော်လိုက်၊ အကုန် တိတ်ဆိတ်ငြိမ်သွားတာ။

အဲ … အဲလို အိပ်ချိန်နောက်ပိုင်းကြမှ ဒီ အမျိုးသမီးထောင်ဘက်က နေပြီးတော့ ကြွေးကြော်သံတွေ ကြားရတာ။ အင်မတန် စိတ်လှုပ်ရှားစရာကောင်းတယ်။ အမျိုးသမီးတွေကနေ ဒီဘက်ကို လှမ်းအော်ပြီးပြောတာ။ “ထိန်းသိမ်းဆောင်မှ ရဲဘော်များ ရှင့် … ထိန်းသိမ်းဆောင်မှ ရဲဘော်များရှင့် …” သူတို့က အဲဒီလိုပြောတာ။ နောက်ပြီးကျတော့ သူတို့ အဲဒီမှာ တိုက်ပွဲစဝင်နေပါပြီဆိုတဲ့အကြောင်းကို ပြောတာ။

ဖြစ်ချင်တော့ ထိန်းသိမ်းဆောင်ဆိုတာက အဆောင်က အရှည်ကြီး။ အောက်ထပ်မှာက အကျဉ်းသားတွေ။ အပေါ်ထပ်မှာက နိုင်ငံရေးအကျဉ်းသား ထိန်းသိမ်းတွေ။ အဆောင်အရှည်ကြီးရဲ့ထိပ်နဲ့ ခုနက အမျိုးသမီးဆောင်နဲ့ အနီးဆုံးဖြစ်တဲ့ထိပ်မှာက (အပေါ်ခန်းက) သံဃာတွေဖြစ်နေတယ်။ သံဃာတွေကို ထားတာ။ သံဃာအပါး ၃-၄ဝ ရှိမယ် ထင်တယ်။ ကျနော် မရောက်ဖူးလို့ အတိအကျတော့ မသိဘူး။ အဲဒီတော့ ပထမဦးဆုံးကြားတာက သံဃာတွေ၊ နောက် … ဟိုဘက်ကို ပြန်စကားပြောဖို့၊ ပြန်ဆက်သွယ်ဖို့ ဒီလိုပဲ အော်ပြီးပြောရမှာကိုး။ အဲဒါလည်း ဒီသံဃာတွေဘက်ကပဲ အဆင်ပြေတာ။ အဲဒီတော့ သူတို့ကပဲ ပြောတာ။

အဲဒီတော့ အမျိုးသမီးဆောင်ဘက်ကလည်း ဒီဘက်က ပြောနေတာ သံဃာတွေမှန်း မသိဘူး။ သူတို့ကလည်း “တပည့်တော်မတို့”တို့ ဘာတို့ မပြောတတ်ဘူး။ “အရှင်ဘုရားတို့”လို့ မပြောတတ်ဘူး။ သူတို့ သိမှမသိဘဲ။ “ကျမတို့” ပဲ။ အဲ … ဒီဘက်က သံဃာတော်များကလည်း “ကျုပ်တို့က ကိုယ်တော်တွေပါ၊ သံဃာတော်တွေပါ” ဆိုပြီး ထုတ်ပြောလို့လည်း မတော်ဘူးလေ။

ထောင်အာဏာပိုင်တွေ ကြားတဲ့အကြားက ဗြောင်ဆက်သွယ် နေရတာ။ နောက်ပြီး သူတို့က ဟိုဘက်ကလူတွေ ရှက်သွားမှာ၊ အရှိန်တုန့်သွားမှာ ငဲ့ရတယ် ထင်ပါတယ်။ သူတို့ကလည်း “ခင်ဗျား ကျနော်” နဲ့ပဲ ပြန်ပြောရတယ်။ အဲကျနော်တို့ ဘေးကကြားနေတဲ့လူတွေက အားလုံးသိနေကြတော့ ထူးတော့ ထူးဆန်းနေတာပေါ့ဗျာ။

ဒါပေမယ့် အင်မတန် စိတ်လှုပ်ရှားစရာကောင်းတဲ့ တိုက်စိတ် ခိုက်စိတ်တွေ၊ အားမာန်တွေ ပြည့်ဖြိုးနေတဲ့အချိန် ဖြစ်တော့ ချက်ချင်းပဲ ကျနော်တို့ ဒီဘက်က တုန့်ပြန်လိုက် တယ်။ ကျနော်တို့ပါလိုက်ပြီး သူတို့ကြွေးကြော်သံတွေ လိုက်အော်တယ်။ အင်မတန် သမိုင်းမှာ ထူးခြားတယ်။ အမျိုးသမီးထောင်က စလိုက်တယ်။ ဒါ … ထောင်အပြင်က ထောင်တခုက စလိုက်တာဖြစ်တယ်။ အဲဒါ ကျနော်တို့ ဒီဘက်က အကုန်လုံး လိုက်ပါကြတယ်။ လိုက်ပါပြီးတော့ နောက်တနေ့ကျတော့ ကျနော်တို့အားလုံး ဘယ်သူမှ အပြင်မထွက်ရတော့ဘူး။ ရေချိုးတောင် မထုတ်တော့ဘူး။ အဆောင်ပေါ်ကလူတွေက ရေချိုးတယ်ဆိုရင် အောက်မှာ ရေကန်မှာသွားပြီး ချိုးရတယ်။ အဲဒီ ရေချိုးမထုတ် တော့ဘူး၊ အကုန်လုံး ပိတ်ထားလိုက်တယ်။

အဲလိုပိတ်ထားတဲ့အခါ ကျနော်တို့ တိုက်ထဲကလူတွေကတော့ မလုပ်နိုင်ဘူးပေါ့လေ။ အဆောင်ပေါ်မှာရှိတဲ့ ပုဂ္ဂိုလ်တွေက သူတို့အဆောင်အောက်မှာအိပ်နေတဲ့ အကျဉ်းသားတွေကို စည်းရုံးတယ်။ ဒီတိုက်ပွဲထဲမှာ ပါလာ အောင် စည်းရုံးတယ်။ အကျဉ်းသားတွေကလည်း ပါလာရော၊ အဲဒီမယ် ဒုတိယညကစပြီး အကျဉ်းသားတွေရော အော်တာ၊ အော်တော့ ကြွေးကြော်သံတွေက ဟိန်းနေတာပဲ။ တအုံးအုံးနဲ့ အော်နေတာ၊ အခန်းလိုက် အခန်းလိုက် အလှည့်နဲ့အော်နေသလိုပဲ၊ ထောင်အပြင်ကနေ ကောင်းကောင်းကြားရတယ်။ မန္တလေး နန်းမြို့ဦးအပြင်က တောင် ကြားရလောက်တယ်လို့ ထင်တယ်။ (၁၂)နာရီ (၁)ချက် ည။

အဲဒီလို ကျနော်တို့ တိုက်ပွဲတွေဝင်နေကြရင်း မေလ ၇ ရက်နေ့အထိ ကျနော်တို့ တိုက်နေကြတာ။ အဲဒီမှာကျတော့ စစ်တပ် တပ်ခွဲတခွဲလောက် ရှိမယ်ထင်တယ်။ G-3 တွေနဲ့ ဝင်ချလာရော။

ဒီနေရာမှာ မှတ်လောက်သားလောက်တခု ပြောရဦးမယ်။ ကျနော့်ကို ထောင်ထဲကိုသွင်းလာတဲ့အခါကျတော့ လိုက်ပို့တဲ့ MI တွေမှာ အမြဲတမ်း ခြောက်လုံးပြူးလေးတွေ၊ ပစ္စတိုလေးတွေပါတယ်။ အဲ … ထောင်မှာက ထောင်ဗူး မှာ ရေးထားတယ် … ‘မည်သည့်လက်နက်မှ ယူဆောင်မလာရ’ ဆိုတာ ရှိတယ်။ အဲဒီ MI တို့ ဘာတို့ဆိုတာ ကျနော့်ရှေ့တင်ပဲ ထောင်ထဲလည်း ရောက်ရော အဲဒီဗူးမှာတင် သူတို့ခါးမှာပါတဲ့ သေနတ်တွေကို ဖြုတ်ပြီး ပေးရတယ်။

အဲ … အခုကျတော့ တပ်တတပ်လုံး ဝင်လာတာ G-3 တွေနဲ့။ ‘မည်သည့်လက်နက်မှ ယူမလာရ’ ဆိုတဲ့ ဆိုင်းဘုတ် ကြီးအောက်ကမှ ဝင်ချလာကြတာ။ အဲဒီတော့ ကျနော့် ခေါင်းထဲမှာပေါ်လာတာ “သြော် … ဗြိတိသျှအစိုးရ လက်ထက်ကစပြီး သတ်မှတ်ခဲ့တဲ့ အစိုးရအဆက်ဆက် သတ်မှတ်အတည်ပြုထားခဲ့တဲ့ ဥပဒေတွေဟာ ဒီ စစ်အစိုးရလက်ထက်ကြတော့ ချိုးဖျက်တာခံရပါလား” လို့ သွားတွေးမိတယ်။

ဆက်လက်ဖော်ပြပါမယ်။