ရဲဘော် ဌေးလှ၊ မြစ်ဖျားတိုင်းက မမြဦး
အဲဒီခေတ်အခါကထောင်နဲ့ ဒီနေ့ခေတ်အခါကထောင် မတူတာ ကျနော်ပြောပြဦးမယ်။ ကျနော်တို့ အဖမ်းခံရတဲ့ ခေတ်တုန်းက သူတို့ အာဏာသိမ်းပြီးတော့ ဘာမှမကြာသေးဘူး၊ ၄ နှစ်ပဲရှိသေးတာ။ အဲဒီကျတော့ အရင်အရှိန်တွေ မကုန်သေးဘူး။ အရင်အရှိန်ဆိုတာ B ကလပ်ထားတဲ့အရှိန်တွေ မကုန်သေးဘူး။ အဲဒီတော့ အရမ်းကြီး တုံးတိကြီး ဖြတ်ပစ်လို့ မရသေးဘူး။ အဲဒီတော့ B ကလပ် အခွင့်အရေးလည်း သူတို့ မပေးချင်တော့ဘူး၊ မပေးနိုင်တော့ဘူး။
နောက်တခုက ဖြတ်မရသေးတဲ့အကြောင်းတခုက ဒီတခါအာဏာသိမ်းလို့ ဖမ်းထားတဲ့အထဲမှာ သူတို့နဲ့ လုပ်ဖော် ကိုင်ဖက်တွေ၊ မကင်းရာမကင်းကြောင်းတွေ ပါနေတာ။ ဟိုအရင် ဝန်ကြီးချုပ်တွေ ပါတယ်၊ အရင်သမ္မတတွေ ပါတယ်။ အဲ … အဲဒါတွေကျတော့လည်း ထောင်သားလိုကျွေးလို့ မဖြစ်ဘူး။ အဲဒီတော့ နည်းနည်း အကျွေးအမွေးကအစ အခုနဲ့စာရင် အများကြီးကောင်းတယ်လို့ ပြောရလို့ရတယ်။
ကျနော်တို့ အဲဒီတုန်းက နေ့တိုင်း အသားတနပ် စားရတယ်။ မနက်ထမင်းမှာတော့ ထောင်သားလိုပဲ ပဲနဲ့ ငပိနဲ့ စားရတယ်။ နေ့ခင်းမှာ ကော်ဖီတခွက်တိုက်သေးတယ်။ နို့ဆီခွက်နဲ့ တခွက်။ အဲဒီတော့ အခုခေတ်နဲ့ဘာမှ မနှိုင်းသာဘူးလို့ ပြောလို့ ရတယ်ပေါ့။ ဒါပေမယ့် အဲဒီတုန်းက အမှုစစ်တယ်ဆိုတာ မရှိဘူး။
ထိန်းသိမ်းလိုက်တယ်ဆိုလို့ရှိရင် ရက်အကန့်အသတ် မရှိဆိုတဲ့ဟာ နောက်ပြီးကျတော့ ထောင်ဝင်စာဆိုတာ မရှိဘူး။ အပြင်က ပစ္စည်းပို့ခွင့်ဆိုတာ နောက်ပိုင်းကျမှ တလ တခါလောက် အဲလို ပို့လာတာရှိတယ်။
အဲဒီတုန်းက (ကျနော်တို့ မန္တလေးထောင်ပေါ့လေ… တခြားနေရာတော့ ကျနော်မပြောလိုဘူး။) မန္တလေးထောင်မှာ အဲဒီ ထမင်းချက်တဲ့ ထိန်းသိမ်းဖိုဆိုတာ သပ်သပ်ရှိတယ်။ ကျနော်တို့ နိုင်ငံရေးအကျဉ်းသားတွေကို “ထိန်းသိမ်း” တွေလို့ ခေါ်တာပေါ့။ ထိန်းသိမ်းဖိုဆိုတာ သပ်သပ်ရှိတယ်။ အဲဒီထိန်းသိမ်းဖိုမှာ ထမင်းချက်တာကတော့ ထောင်သားတွေက လာချက်ပေးတယ်။ ထောင်ကျတွေက ချက်ပေးတယ်။ ကွပ်ကဲတာ၊ ကြီးကြပ်တာကျတော့ အဆောင်တွေက ကိုယ်စားလှယ်တွေက ကြီးကြပ်တယ်။ အဆောင်တဆောင် ကိုယ်စားလှယ် ၂ ယောက် ၃ ယောက် အဲဒီလို။
အဆောင်က ၄ ဆောင်ရှိတယ်။ တိုက်က ၃ တိုက်၊ တိုက်ကတော့ ကိုယ်စားလှယ်လုပ်လို့မရဘူး။ တိုက်ကလူကတော့ အပြင် သူတို့ မထုတ်ဘူး။ အဲဒီတော့ ကိုယ့်ကိုယ်စားလှယ်တွေက ချက်တဲ့ပြုတ်တဲ့နေရာမှာ အမြဲတမ်းသွားကြည့်တယ်။ ဈေးဝယ်တာ သူတို့စစ်တယ်။ ထောင်ကဝယ်လာတဲ့ဟာကို သူတို့ စစ်ပြီးလက်ခံတယ်။
အဲဒီလိုနဲ့ ၁၉၆၇ ခုနှစ် ဖေဖော်ဝါရီလမှာ ညကြီးမှာ စောစောက ကျနော်ပြောခဲ့တဲ့ MI က ထွက်ပြေးဖို့ကြိုးစားတဲ့ ရဲဘော်ဋ္ဌေးလှဟာ ငှက်ဖျားနဲ့ ဆုံးသွားတယ်။ သူ ငှက်ဖျားရောဂါ တော်တော်လေး ဆိုးဆိုးဝါးဝါးဖြစ်ပြီးတော့ ကျနော်တို့ အဲဒီအရင် ၂ ရက် ၃ ရက်ကတည်းကကြိုပြီး သတင်းကကြားနေတယ်။ တကယ်ကျတော့ ငှက်ဖျားဆိုတာ မန္တလေးလိုနေရာမျိုးမှာ ကုလို့မရတဲ့ဟာ မဟုတ်ပါဘူး။ သူတို့ သေသေချာချာကုပေးရင် ရတာပဲ။ ထောင်မှာလည်း ဆရာဝန်တွေ ရှိတာပဲ။ သူတို့က ကရော်ကမည် ကုတယ်။ ရောဂါဆိုးလာတဲ့အခါကျတော့ တကယ်ပြင်းထန်လာတဲ့အခါကျတော့ အပြင်ဆေးရုံကို ပို့မပေးဘူး။ အဲဒီလိုနဲ့ ထောင်ထဲမှာ သူတို့ပိတ်ပြီးတော့ သူတို့ထင်သလို လျှောက်လုပ်ကြရင်းကနေ ရဲဘော်ဋ္ဌေးလှဟာ ဆုံးသွားရော။
ဒီတော့ ရဲဘော်ဋ္ဌေးလှ ဆုံးသွားတယ်။ သူ့ကိုထားတာက ၂ တိုက်ထဲမှာ ထားတယ်။ ၂ တိုက်ဆိုတာ ကျနော့်ကို ထားတဲ့ ၁ တိုက်နဲ့ဆိုလို့ရှိရင် မီတာ ၂ဝဝ လောက် ဝေးမယ်ထင်တယ်။ အဲ … ၂ တိုက်ကစပြီးတော့ အဲ တိုက်ပွဲဖော်တာပဲ။
တိုက်ပွဲဖော်တယ်ဆိုတာ ကြွေးကြော်သံတွေ အော်တာပေါ့ဗျာ။ ဖျားရင်နာရင် ဆေးရုံပို့ရမယ်၊ ထောင်ထဲမှာ အသေမခံနိုင်ဘူးဆိုတဲ့အကြောင်း။ ဒီတော့ သူတို့ရဲ့ကြွေးကြော်သံတွေနဲ့ တိုက်ပွဲကို အဆောင်ပေါ်က ထိန်းသိမ်းထားတဲ့ လူတွေအားလုံးက လက်ခံပါဝင်ကြတယ်။ သူတို့လည်း လိုက်အော်တယ်။ ကျန်တဲ့တိုက် ၃ တိုက်ကလည်း (ကျနော်တို့ရော) လိုက်အော်ကြတယ်။
အဲဒါအပြင် ကျနော်တို့မန္တလေးထောင်နဲ့ မျက်နှာချင်းဆိုင်မှာ အမျိုးသမီးထောင်ရှိတယ်။ အပြင်ဘက်မှာ၊ ညမှာ ကြွေးကြော်သံတွေတိုင်တာဆိုတော့ အမျိုးသမီးထောင်ကလည်း ကြားရတယ်။ အမျိုးသမီးထောင်ဆိုတာ ညမို့လို့ ကြားရတာ၊ အတော့်ကိုလှမ်းတဲ့နေရာ။ ဒီအဆောင်ကြီးနဲ့ဆိုလို့ရှိရင် မီတာ ၃-၄ဝဝ လောက် ဝေးမယ်ထင်တယ်။ သူတို့ကလည်း စပြီး ဝင်ပါတယ်။
ကျနော်တို့ ၂ ညလောက် ဆက်ပြီးအော်လိုက်ကြတာ ကြွေးကြော်သံတိုင်ပြီး တိုက်လိုက်ကြတော့ ထောင်အာဏာပိုင်တွေ သူတို့အပြစ်လည်း ဖြစ်နေတဲ့အခါကျတော့ ခေါ်ပြီးဆွေးနွေးတယ်။ ခေါ်ဆွေးနွေးတော့ ခုန အဆောင်ကိုယ်စားလှယ်တွေကိုပဲ ခေါ်ဆွေးနွေးတယ်။ ကျနော်တို့ တိုက်ကလူတွေကတော မပါဘူး။ ခေါ်ဆွေးနွေးပြီး သူတို့က နောင်မဖြစ်စေရပါဘူး။ နောက်လိုအပ်ရင် ဆေးရုံတင်ပေးပါ့မယ်ဆိုပြီးတော့ အာမခံတယ်။ သူတို့ အလျှော့ပေးသွားတယ်ပေါ့လေ။
တကယ်လည်း နောက် ပို့ပေးတာတွေ ဘာလေးတွေရှိတော့ ဆရာဝန်တွေလည်း နည်းနည်း ဂရုတစိုက် ကုလာတာ ရှိပါတယ်။ အမှန်ကတော့ ဆရာဝန်က မကုတာမဟုတ်ပါဘူး။ သူတို့ထောင်က နောက်က ထောင်အာဏာပိုင်တွေက ချုပ်ထားလို့ ဆရာဝန်တွေရဲ့စေတနာနဲ့ မဆိုင်ဘူး။ ဆရာဝန်လာလို့ရှိရင်ဘေးမှာ ထောင်အာဏာပိုင်အကြိုက် စာရင်းလိုက်လုပ်နေတဲ့ သတင်းပေးလိုကောင်တကာင်က အမြဲပါနေတဲ့ဟာပဲ။ ဝါဒါတကောင် အမြဲတမ်းပါနေတာ။ အဲဒီတော့ ဆရာဝန်တွေက အဲဒီလိုကုလာတော့ အတော်လေးတော့ အခြေအနေ ပြောင်းလာသလိုမျိုးရှိတယ်။
ဆက်လက်ဖော်ပြပါမယ်။
No comments:
Post a Comment