ဒီနေရာမှာ ကျနော် အလေးထားပြောချင်တာတခုက ကျနော်တို့ကျောင်းသားတွေနဲ့ ဆရာတွေကြားက ဆက်ဆံရေးပါ။ မှတ်မိကြပါလိမ့်မယ်။ ၇ ဇူလိုင်ဖြစ်တော့ အစိုးရက ကျောင်းသားတွေနဲ့ ဆရာကြီး ဦးကာ ကို ရန်တိုက်ပေးတယ်။ သတင်းစာတွေကနေ အမျိုးမျိုးရေးကြတယ်။
တကယ်က ကျောင်းသားတွေဟာ အထက်ကပြောခဲ့သလိုပဲ ဆရာ ဆရာမတွေရဲ့စကားကို လေးစားကြတယ်။ ဆရာများကလည်း သမဂ္ဂခေါင်းဆောင်တွေ အပါအဝင် ကျောင်းသားတွေကို ကိုယ့်သား ကိုယ့်သမီးလို ချစ်ခင်ကြတယ်။ ကျနော်တို့ မန္တလေးတက္ကသိုလ် ကျောင်းသားသမဂ္ဂဆိုတာ အင်မတန် ဆင်းရဲတာ။ အခမ်းအနားတခုခုလုပ်မယ်ဆိုရင် သမဂ္ဂရုံးနဲ့နီးတဲ့ ဆရာများအိမ်က အကုန်ငှားရတာ။ Tape recorder ကအစ စားပွဲ၊ စားပွဲခင်းအဆုံး ဆရာတွေ အိမ်ကပဲ ငှားရတယ်။ ဆရာတွေက ကြည်ကြည်ဖြူဖြူ ငှားပေးရုံမကဘူး ပျောက်လို့ ရှလို့ရှိရင်လည်း ပြုံးပြုံးပဲ။
ကျောင်းသားသမဂ္ဂရွေးကောက်ပွဲတွေဆိုရင်လည်း ဆရာတွေကပဲ ကြီးမှူးပြီး ကျောင်းသားတွေကလည်း ဆရာများ အဆုံးအဖြတ်ကိုခံတာပဲ။ ဒါ့ကြောင့် ကဗျာဆရာ ကိုတင်မိုးက သူရဲ့ နွယ်သာကီ သံဖြတ် တပုဒ်ထဲမှာ ‘ဆရာတပည့် လက်ညီစွာငယ်၊ ကမ္ဘာသိတဲ့ တက္ကသီလာရယ်’ လို့ ရေးခဲ့တာ။
တိုက်ပွဲအကြောင်း ဆက်ပြောရရင် အတားအဆီးတွေကို ဖယ်ရှားပြီးတယ်ဆိုတာနဲ့ ကျနော်တို့လည်း တခြား ကျောင်းသား တွေနဲ့အတူ ကတ္တရာလမ်းပေါ်မှာ လှဲအိပ်ပြီး လမ်းကိုပိတ်ကြတယ်။ အရင်ညက ကောင်းကောင်းမအိပ်ရ၊ နေကလည်း ပက်လက်လှန်အိပ်နေတဲ့ ကိုယ့်မျက်နှာပေါ် တည့်တည့်ထိုး၊ အတော်ပင်ပန်းတယ်။ အဲဒီလို အခင်းမပါဘဲ လမ်းပေါ်ပိတ်အိပ်နေလို့ ၂ နာရီလောက်ကြာတော့ အဓိကရုဏ်းနှိမ်နှင်းရေး ရဲတွေနဲ့ စစ်တပ်တွေလာနေပြီဆိုတာ ကြားရတော့တာပါပဲ။
ကျောင်းသားတွေက စက်ဘီးနဲ့ပြေးကြည့်ပြီး ဘယ်နေရာကိုရောက်နေပြီဆိုတာ လာသတင်းပို့တယ်။ ဒီလိုနဲ့ ရေနီမြောင်း ကိုရောက်လာပြီဆိုတော့ ကျောင်းသားတွေက “ခေါင်းဆောင်တွေ အဖမ်းခံလို့မဖြစ်ဘူး၊ ဒီနေရာမှာ လှဲမနေပါနဲ့ ရှောင်ကြပါ” လို့ လာပြောကြတယ်။ ဒီအထဲမှာ ကျနော်တို့ကို လမ်းပေါ်မှာ အိပ်ပေးရမယ်လို့ အတင်းတောင်းဆိုတဲ့လူတွေ လည်းပါတာ သတိထားမိတယ်။
ဒါကြောင့် ကျနော်တို့ လစ်ကြတယ်။ ကျနော်ရယ်၊ ကိုအောင်သူရယ်၊ ကိုကျော်ခင်ရယ်၊ ကိုသောင်းရွှေရယ် အတူပြေးကြတယ်။ ကျနော်တို့တတွေ ကျောင်းအရှေ့ဘက်က လယ်ကွင်းတွေကို(အခု မြို့သစ်တည်ထားတဲ့ နေရာတွေပေါ့) ဖြတ်နေချိန်မှာ ကျောင်းဘက်က မျက်ရည်ယိုဗုံးပစ်သံ တဖောင်းဖောင်း ကြားရတယ်။
အဲဒီနောက် မန္တလေးတက္ကသိုလ်ကိုလည်း ရက်အကန့်အသတ်မရှိ ပိတ်လိုက်ကြောင်း ကြေညာပြီး ကျောင်းသား တွေကိုဖမ်း၊ ကျောင်းထုတ်တာတွေ လုပ်တော့တာပဲ။
အဲဒီတော့ ကျနော်တို့လည်း ရှောင်လိုက် ရှားလိုက် အမျိုးမျိုး ပုန်းလိုက် ရှိုးလိုက်။ အဲဒီလို ဖြစ်နေရင်းကနေ တဖြည်းဖြည်း ဗကသလုပ်ငန်းကို ပြန်ဖော်တာပဲ။ ရန်ကုန်မှာလည်း အလားတူဖြစ်လိမ့်မယ်လို့ ကျနော် ထင်တယ်။ ဟုတ်ပါတယ်။ ဒါကြောင့် ကျနော်တို့ ထောင်ထဲရောက်၊ ကိုကိုးကျွန်းရောက်တဲ့အခါကျတော့ ရန်ကုန်က ကျောင်းသားရဲဘော်တွေကို သူတို့နဲ့တွေ့တော့ မေးမိတယ်။ သူတို့လည်း ပြန်ဖော်တာပဲ။ ၆၄ က စဖော်တာ။ ၆၃ ဒီဇင်ဘာမှာ ငြိမ်းချမ်းရေး ဆွေးနွေး ပွဲက ပျက်တယ်။ ၆၄ မတ်လ-ဧပြီလလောက်ကစပြီး ကျနော်တို့ ပြန်ပြီးလုပ်ငန်းတွေ ဖော်ကြတာ။
အဲ … မြေအောက်ပေါ့လေ။ အဲဒီတော့ သမဂ္ဂလုပ်ငန်းဟာ စစ်အစိုးရတက်ကတည်းက ၆၂ ကတည်းက စပြီးတော့ မြေအောက်ရောက်သွားတာ။ ၆၃ ကုန်တော့ ပိုပြီးနက်ရှိုင်းတဲ့ မြေအောက်ကိုရောက်သွားတာ ဒီနေ့အထိပဲ။
အဲဒီတော့ ကျနော်တို့ အထက်ဗမာပြည်မှာ ဗကသလုပ်ငန်း ပြန်ဖော်တယ်။ မန္တလေးကို ဗဟိုပြုပြီးတော့ ပတ်ဝန်းကျင်က မြို့တွေမှာ ဖော်တယ်။ ဖော်ပြီး လုပ်၊ မြေအောက်လုပ်ငန်းလုပ်၊ အဲလိုလုပ်ရင်းနဲ့နောက် ၂ နှစ်လောက်အကြာတော့ ကျနော်တို့အားလုံး အတော်များများပဲ တချီထဲ အဖမ်းခံလိုက်ရတယ်။
ကျနော် မှတ်မိပါတယ်။ အဲဒီနေ့က ၁၉၆၆ ခုနှစ် ဇူလိုင်လ ၄ ရက် ည ၁၂ နာရီကျော်ကျော်။ သန်းခေါင်သန်းလွဲမှာ ကျနော် အိပ်နေတုန်း အဲဒီထောက်လှမ်းရေးက လာပြီးတော့ တံခါးဖွင့်ခိုင်းပြီးတော့ ဖမ်းတာပဲ။ ကျနော့်ကိုဖမ်းတော့ ကျနော့် အိမ်သားတွေအားလုံးက မအိပ်ကြသေးဘူး။ ကျနော့်အမေ (လူထုဒေါ်အမာ) ကဆို ကျနော့်အခန်းတံခါးကို လာခေါက်၊ ထပြီးတော့ သူတို့ပဲ အိပ်ယာလိပ် ထည့်ပေးလိုက်တာ။ ထောက်လှမ်းရေးက ကျနော့်ကို ကားပေါ်တင်၊ မျက်စိပိတ်ပြီး၊ အဲဒီမန္တလေးကျုံးထောင့်က ထောက်လှမ်းရေးရုံးထဲ ခေါ်သွားတာပဲ။
ဆက်လက်ဖော်ပြပါမယ်။
No comments:
Post a Comment