မြန်မာအဖွဲ့ တရုတ်ပြည် သွား တောင်းပန်
ကိုးကန့်တပ်တွေနဲ့တိုက်နေတဲ့ မြန်မာ့တပ်မတော်ဘက်က ယူနန်ပြည်နယ်မှာ မတ်လ ၁၃ ရက်က ဗုံး မတော်တဆကျခဲ့လို့ တရုတ်နိုင်ငံသားတွေ ထိခိုက် သေဆုံးတာတွေရှိခဲ့တဲ့အတွက် မြန်မာဘက်က နိုင်ငံခြားရေးဝန်ကြီးနဲ့ စစ်ဘက် အရာရှိကြီးတွေပါတဲ့ အဆင့်မြင့်ကိုယ်စားလှယ်အဖွဲ့ တရုတ်နိုင်ငံ ပေကျင်းမြို့တော်မှာ ဧပြီလဆန်းက သွားပြီး တောင်းပန်ခဲ့ပါတယ်။
ဒီလိုတောင်းပန်တာဟာ ၂ နိုင်ငံအဆင့် ဆွေးနွေးမှုတွေလုပ်မှဖြစ်မှာမို့ သွားတာဖြစ်ပြီး ပြည်နယ်အဆင့်က ဆွေးနွေးလို့ မရနိုင်ကြောင်း လက်ရှိဖြစ်ပွားနေတဲ့ ကိုးကန့်စစ်ပွဲတွေကြောင့် နယ်စပ်မှာသွားပြီး ညှိနှိုင်းခဲ့တဲ့ သမ္မတရုံး အထူးကိုယ်စားလှယ်နဲ့ တရုတ် သံအမတ်ဟောင်း ဦးစိန်ဝင်းအောင် က ပြောပါတယ်။
နယ်စပ်ဒုက္ခသည်တွေ ကူညီရေး အပါအဝင်ကိစ္စတွေမှာ ၂ နိုင်ငံ လက်တွဲဆောင်ရွက်နေပြီး ဒီအတွက် တရုတ် မြန်မာ ဆက်ဆံရေး အပြောင်းအလဲ မရှိနိုင်ဘူးလို့လည်း ပြောပါတယ်။
ဒုက္ခသည်တွေနဲ့ရောပါလာတဲ့ ကိုးကန့် လက်နက်ကိုင်တွေကို တရုတ်ဘက်က လက်မခံကြောင်း သူ့ကို ရှင်းပြတယ်လို့လည်း ဆိုပါတယ်။
ကွမ်လုံက ကုန်းကြမ်းသွားတဲ့ ဆက်သွယ်ရေးလမ်းကြောင်းကို လက်နက်ကိုင်တွေ လာနှောင့်ယှက်နေရလို့ တိုက်ထုတ်နေတာဖြစ်ကြောင်း၊ ကိုးကန့်တပ်တွေအနေနဲ့ အမှားတွေစွန့်ပယ်ပြီး အလင်းဝင်ကြဖို့စာတွေ ဒီသီတင်းပတ်မှာ ဖြန့်ဝေခဲ့တယ်လို့လည်း ဦးစိန်ဝင်းအောင်က ပြောပါတယ်။
ကိုးကန့်လက်နက်ကိုင်အဖွဲ့က ပြောခွင့်ရ ဦးထွန်းမြတ်လင်းကတော့ အလင်းဝင်ဖို့ လေယာဉ်ပေါ်က စာတွေချတာရှိတယ်လို့ ပြောကြားပါတယ်။ ။
သတင်း၊ ဓာတ်ပုံ - ဘီဘီစီ
No comments:
Post a Comment