Thursday, July 10, 2014

သတင်းမီဒီယာလောကကို အမြန်ဆုံး ကာကွယ်စောင့်ရှောက်ကြ (ကိုညို)

ဒီကနေ့ ပခုက္ကူတရားရုံးကနေ ယူနတီဂျာနယ်က ဦးတင့်ဆန်း အပါအဝင် သတင်းသမား ၄ ဦးကို အလုပ်ကြမ်းနဲ့ ထောင်ဒဏ် ၁၀ နှစ် အပြစ်ဒဏ်ပေးလိုက်တယ်ဆိုတာ... သတင်းလောကသားတွေအပေါ် အစိုးရက တိတိကျကျ စိန်ခေါ်လိုက်တာ ဖြစ်တယ်။ မင်းတို့သတင်းသမားတွေ သတိထားနေကြ၊ ဘာတတ်နိုင်သလဲ၊ ဒါ နမူနာပဲလို့ နားရွက်တံတွေးဆွတ်ပြီး သွေးတိုးစမ်းလိုက်တာ ဖြစ်တယ်။ 

ဒါကို သတင်းသမားတွေ ငြိမ်ခံနေမယ်ဆို နောက်ပိုင်း ပိုမိုတင်းကြပ်တဲ့ဥပဒေတွေ တခုပြီးတခုထုတ်ပြီး ချောင်ပိတ်ရိုက်လိမ့်မယ်။ ယူနတီသတင်းထောက်တွေက နိုင်ငံတော်လုံခြုံရေးကို ထိပါးနှောက်ယှက်တာ မဟုတ်ဘူး။ အစိုးရရဲ့ ပွင့်လင်းမြင်သာမှုမရှိတဲ့ လုပ်ဆောင်မှုတွေကို ပြည်သူတွေသိအောင် ထောက်ပြညွှန်ပြခဲ့တာ ဖြစ်တယ်။ 


ဒီလို သတင်းစုံစမ်းဖော်ထုတ်လို့ နေ့ချင်းညချင်း တိုင်းပြည်ကြီးပျက်ပြီး စစ်မက်တွေဖြစ်သွားမှာလည်း မဟုတ်။ အစိုးရ အဆောက်အအုံကြီးလည်း ပြိုလဲကျသွားမှာ မဟုတ်။ ဒီလောက်ကြီးလေးတဲ့ ပြစ်ဒဏ်မျိုးချဖို့ မလိုပါဘူး။ တရားမမျှတတဲ့ တရားစီရင်မှုဖြစ်တယ်။ သတင်းလောကသားတွေကို ခြိမ်းခြောက်မှု သက်သက်ဖြစ်တယ်။ တဆက်ထဲမှာပဲ ကျနော်တို့ သတင်းသမားတွေ လိုလားတောင့်တနေတဲ့ သတင်းလွတ်လပ်ခွင့်၊ သတင်းသမားအခွင့်အရေးမျိုး မြန်မာနိုင်ငံမှာ မရနိုင်ဘူးလို့ အဓိပ္ပာယ်ဖွင့်ဆိုလိုက်တာ ဖြစ်တယ်။ 

အများပြည်သူတွေသိကြသလိုပဲ ဒီကနေ့ မြန်မာ့ သတင်းမီဒီယာလောကမှာ အစိုးရအကြိုက် မြှောက်ပင့်ပြီး မင်းအလိုလိုက်၊ မင်းကြိုက်ဆောင် အချောင်မီဒီယာသမားတွေလည်း ခေါင်းပေါင်းစ တလူလူလွှင့်နေတယ်။ ငြိမ်းချမ်းပြီး တရားမျှတတဲ့၊ ဖွံဖြိုးတိုးတက်မှုကို ရှေ့ရှုတဲ့ ဒီမိုကရေစီစနစ်သစ်ကို ပြည်သူတွေနဲ့အတူ ရှေ့ဆောင်သွားကြရမယ့်အစား မီဒီယာလောကကို ကိုယ်လိုရာဆွဲပြီး နည်းအမျိုးမျိုးနဲ့ ပုံဖျက်ဖို့ ကြိုးစားနေတယ်။ 

ပြည်သူတွေအပေါ် နား မျက်စိ ကျယ်ပြီး ပိုမိုသိမြင်ပွင့်လင်းတဲ့ လူ့အဖွဲ့အစည်းဆီ တွန်းတင်နိုးဆော်သွားရမယ့်အစား ပြည်သူတွေ အတွေးအမြင် ဝေဝါးအောင် မပြည့်ဝ မရင့်ကျက်တဲ့ အတွေးအခေါ်နဲ့ ဝါဒမှိုင်းတိုက်မှုတွေ၊ အတုယူမှားစေမယ့်သတင်းမျိုးတွေ၊ အာဏာရှင်စနစ်နဲ့ အတွေးအခေါ်စရိုက်တွေကို ဖုံးကွယ် ကျားကန်ပေးတဲ့ အတွေးအမြင် အလွဲတွေပေးပြီး အာဏာရှင်စနစ်ဆိုး သက်တမ်းရှည်အောင် ဝါဒဖြန့်မှုတွေလုပ်နေတာကို သတင်းစာတချို့နဲ့ ဂျာနယ်တချို့မှာ ဖတ်ရှု တွေ့မြင်နေရတယ်။

ပြည်သူတွေ သတင်းမှန်သိရှိဖို့၊ ပြည်သူ့နစ်နာမှုတွေ တင်ပြဖို့၊ တိုင်းပြည်နဲ့ လူထု အကျိုးစီးပွားကို ဖော်ဆောင်နိုင်မယ့်သတင်းတွေ၊ လွတ်လပ်ပြီး အတွေးအခေါ် ရင့်သန်စေဖို့၊ ဒီမိုကရေစီစိတ်ဓာတ်တွေ ရှင်သန်စေဖို့ အားထုတ်နေတဲ့ သတင်းသမားတွေကို အားပေးမြှင့်တင်ပေးရမယ့်အစား အခုလို ပြည်သူ့အတွက် တက်ကြွပြီး စေတနာထားတဲ့ သတင်းသမားတွေကို ချိုးနှိမ်အကျဉ်းချနေတာဟာ တိုင်းပြည်နဲ့ ပြည်သူလူထုအပေါ် မရိုးမသား လုပ်ဆောင်မှုသက်သက်ဖြစ်တယ်။ သတင်းမီဒီယာလောကသားတွေအပေါ် တစိုးတစိမျှ စေတနာမရှိဘူးဆိုတာ ပေါ်လွင်တယ်။ 

ဒီမိုကရေစီစနစ် ဖွံ့ဖြိုးရှင်သန်ကြီးထွားဖို့နဲ့ သတင်းလောက ကြီးမြတ်လာဖို့ ပြည်သူ့အကျိုးဆောင် သတင်းမီဒီယာသမားတွေ ပေါများလာဖို့ အစိုးရ အာဏာရှိသူတွေက အားပေးလုပ်ဆောင် ကူညီရမယ့်အစား ပြည်သူ့အကျိုးဆောင် သတင်းသမားတွေအပေါ် ရန်သူသဖွယ် ဆက်ဆံနေတာကို ကျနော်တို့ ပြည်တွင်းပြည်ပ သတင်းမီဒီယာသမားတွေက ဝိုင်းဝန်းရှုတ်ချသင့်တယ်။ 

အခုလို ယူနတီ သတင်းသမားတွေအပေါ် မတန်တဆကြီးလေးတဲ့ အပြစ်ဒဏ်ချမှုကို အမြန်ဆုံး ပြန်လည်ပြင်ဆင်ဖို့၊ သတင်းသမားတွေကို အခုလို ခြိမ်းခြောက်အကျပ်ကိုင်မှုတွေ နောက်နောင် မပေါ်ပေါက်ဖို့ တိုင်းချစ်ပြည်ချစ် သတင်းသမားတွေအားလုံး စုစည်းညီညွတ်မှုနဲ့ အရေးပေါ် တုံ့ပြန်ဆောင်ရွက်ကြဖို့ လိုတယ်။ မတရားတဲ့ အပြစ်ဒဏ်ချမှတ်တာကို ပြည်တွင်းက မီဒီယာအဖွဲ့အစည်းတွေက သမ္မတ အပါအဝင် သက်ဆိုင်ရာကို တောင်းဆို တင်ပြမှုတွေ ချက်ချင်းလုပ်သင့်တယ်။ တိုင်းချစ်ပြည်ချစ် မီဒီယာသမားတွေစုပေါင်းပြီး ယခုလုပ်ရပ်အပေါ် သဘောမကျ ဆန့်ကျင်တဲ့အကြောင်း ဆန္ဒပြ၊ သဘောထားဖော်ထုတ်မှုတွေ အမြန်ဆုံးလုပ်သင့်တယ်။ 

ကျနော်တို့ ခေါင်းငုံ့ခံရင် ဖိနှိပ်သူတွေက ပိုတက်ကြွလာလိမ့်မယ်။ အာဏာသက်တမ်း ကုန်ခါနီးချိန် ဒီကာလဟာ အစိုးရနဲ့ အာဏာပိုင် အဖွဲ့အစည်းတွေ ပြည်သူ့ယုံကြည်မှုမရလို့ ခြေမကိုင်မိ လက်မကိုင်မိဖြစ်ပြီး သွေးလေခြောက်ခြားဖြစ်နေတာကို အများပြည်သူကလည်း သတိပြုမိနေကြပြီ။ ဒါကြောင့် သူတို့ မှားပြီးရင်း ထပ်ပြီးမမှားအောင် ပြည်သူတွေအတွက် ထိရောက်မှန်ကန်တဲ့ လမ်းကြောင်းပေါ်ရောက်အောင် မီဒီယာသမားတွေက ဝိုင်းဝန်း ဆုံးမဖို့ အချိန်ကျနေပြီ။ 

ခေတ်အဆက်ဆက် ပြည်သူ့လွတ်လပ်ရေးနဲ့ ဒီမိုကရေစီရေးအတွက် မားမားမတ်မတ်ရပ်တည် လှုပ်ရှားသွားခဲ့ကြတဲ့ ကျနော်တို့ရဲ့ရှေ့က သတင်းစာဆရာ ဆရာမကြီးတွေ၊ သတင်းထောက်ကြီးတွေ၊ စာပေအနုပညာရှင်ကြီးတွေရဲ့ ကျေးဇူးတရားနဲ့ စွမ်းဆောင်မှုတွေကို အစဉ်ဦးညွှတ်တဲ့အနေနဲ့ သူတို့ပြခဲ့တဲ့ သတ္တိ၊ ဗျတ္တိနဲ့ လမ်းညွှန်ခဲ့တဲ့ ပညာအသိကို တန်ဖိုးထားပြီး နောင်လာမယ့် မျိုးဆက်တွေရဲ့ အခွင့်အရေးအတွက်ပါရည်ရွယ်ပြီး လုပ်ဆောင်ကြဖို့ အရေးတကြီး လိုအပ်နေပါပြီ။ 

ဒီတခါ ကျနော်တို့ညံ့ရင် နောက်တကြိမ် ပြန်မတ်မတ်ရပ်နိုင်ဖို့ မမျှော်လင့်ပါနဲ့...။ 

ကိုညို 
၁၀ ဇွန်၊ ၂၀၁၄ 

 

No comments: