ဦးအုန်းမြင့်သည် သတ္တိကောင်းလွန်းလို့ အဲသလိုပြောသည်ဟု မထင်။ နောက်ကွယ်မှာ ထောက်ခံထားသူတို့ အရှိန်အဝါနဲ့ပြောတာ ဖြစ်ပေလိမ့်မည်။ ဗိုလ်ချုပ်ဘဝတုန်းက သေနတ်ကိုင်ထားပြီး လက်နက်မရှိသူတွေကို ပါးတွေ တဖြန်းဖြန်းရိုက်ခဲ့သလို လုပ်ချင်တာတွေလည်း လုပ်ခဲ့သည့်သူများဖြစ်သည်။ အခု အမှန်တကယ် သတ္တိရှိရင် လက်နက်မပါဘဲ တယောက်ထဲ လမ်းပေါ်ထွက်၍ စိန်ခေါ်ရဲသလော။ သူတို့ခေတ် ဗိုလ်ချုပ်ဆိုတာမျိုးက လက်ထဲမှာ လက်နက်မရှိရင် ရွာသိမ်ရွာမွှားက ရွာလူမိုက်လောက်တောင် စွာရဲတာမှ မဟုတ်တာ။
ဦးအုန်းမြင့်ကို ပြောလိုတာ ရှိပါသည်။ ခင်ဗျား သတ္တိထက်မနည်း ဗမာတိုင်း သတ္တိကောင်းပါသည်။ ခင်ဗျားတို့ စစ်တပ်က ရဲဘော်တယောက် ကျည်ဆံ ခွန်ရှယ် ရှစ်ဆယ်လောက်နဲ့ ရှေ့တန်းထွက်ရဲသလား။ မေးပါရစေ။ ကျည်ဆံ အဲသလောက်နဲ့ ကချင်ကို သွားတိုက်ရဲသလား။ ဝအဖွဲ့ကို ခင်ဗျားတို့ မတို့ရဲ မထိရဲ ဖြစ်နေတာကို လူတိုင်းသိတယ်ဗျ။ ဖင်ခေါင်းကျယ်တာ ရိုးရိုးကျယ်ပါ။ ကန့်လန့်ကြီး မကျယ်ပါနဲ့။ ကျုပ်တို့ သည်ဘက်က တော်လှန်ရေး အဖွဲ့အစည်းတွေဟာ ရှိသလောက် လက်နက်ခဲယမ်းနဲ့ ခင်ဗျားတို့ နိုင်ငံအဆင့် စစ်တပ်ကြီးကို တွန်းလှန်တိုက်ခဲ့တာ နှစ်ပေါင်း မနည်းတော့ပါ။
ပြည်သူတွေ မွဲငတ်နေသည်။ ဗိုလ်ချုပ်တွေ ချမ်းသာနေသည်။ ချမ်းသာနေရင်းက အေးအေးမနေ လူတွေကို စော်ကားမော်ကား ပြောသေးသည်။ ဝက်သားဟင်းနဲ့ ချဉ်ပေါင် လဲရတော့မည့်အခြေအနေ ရောက်ကောင်းရောက်နိုင်သည်။ ကိုယ်က ချဉ်ပေါင်၊ သူတို့က ဝက်သားဟင်း ဘာမှ မလဲရဲစရာမရှိ။ သည်ဝက်သားဟင်းနဲ့ ချဉ်ပေါင် လဲရဲတယ်ဆိုတဲ့ စကားဟာလည်း သူတို့ စစ်တပ်တွင်းမှာ ပေါ်ခဲ့တာဖြစ်သည်။ ဖိနှိပ်ဆိုးဝါးသည့် အရာရှိများကို အောက်ခြေရဲဘော်များက စိန်ခေါ်သည့်စကားဖြစ်သည်။ စစ်သားစစ်ဗိုလ်တိုင်း ဒီစကားစုကို နားလည်သည်။ အရာရှိဆိုး နောက်ကျည်ဆံထိမယ်လို့ ပြောတာဖြစ်သည်။ အရာရှိဆိုးကို ပစ်သတ်ပြီးရင် အဲသည့် ရဲဘော်ဟာ ကိုယ့်ကိုကိုယ်သတ်သေချင်သတ်၊ သို့မဟုတ်ပါက ထွက်မပြေးဘဲ အေးအေးသက်သာ အဖမ်းခံထောင်ကျခံဖို့ပဲ ဖြစ်သည်။ အဲတာကို ဝက်သားဟင်းနဲ့ ချဉ်ပေါင်လဲတယ်လို့ တပ်ထဲမှာ ပြောခြင်းဖြစ်သည်။
ဝန်ကြီး ဦးအုန်းမြင့် စော်ကားမော်ကားပြောနေသည့်စကားများသည် မကြာတော့သည့် အနာဂတ်မှာ သူတို့ ဘယ်လမ်းကို ဘယ်လိုလျှောက်မည်ဆိုသည့် အချက်ပေးသံပင်ဖြစ်သည်။ ဒီလိုလူစားမျိုးတွေကို ဘယ်သူတွေက ကျေကျေနပ်နပ်နဲ့ နောက်တခါ မဲထပ်ထည့်မည်နည်း။ အရင်ကလည်း မဲခိုးလို့ ရွေးကောက်ပွဲ နိုင်ခြင်းဖြစ်သည်။ သူတို့ကိုယ်တိုင်လည်း ဒါကို နားလည်ပုံရသည်။ ဒါကြောင့် မဲခိုးတာ၊ မဲလိမ်တာ ညစ်တာတွေ၊ တခြားပါတီက အမတ်လောင်းတွေကို အပြစ်ရှာကြံပြီး ရွေးကောက်ပွဲကနေ ကန်ထုတ်မှာမျိုး စတာတွေကို ၂ဝ၁၅ မှာ သေချာပေါက် တွေ့ရဦးမည်။
ဦးအုန်းမြင့် အခုလို ပြောင်ကျကျ စော်ကားမော်ကားပြောသည့်အပေါ် အဘဦးဝင်းတင်၏ ထောင်ကျမှာ ဂရုမစိုက်ဆိုသော တုံ့ပြန်မှုကို ကြိုဆိုသည်။ နောက်ထပ် အနည်းငယ်သော နိုင်ငံရေးသမားများ၏ မှတ်ချက်များကိုလည်း ကြိုဆို မှတ်တမ်းတင်ပါသည်။ ချောင်ပိတ်ရိုက်ပါက အလှမွေး ခွေးကလေးပင် ပြန်ကိုက်တတ်သည်။ ကျနော်တို့သည် ယဉ်ကျေးသော လူသားများ ဖြစ်သည်။ အဟိတ်တိရိစ္ဆာန်မဟုတ်။ ဒါကြောင့် ဖိနှိပ်လာပါ အသိဉာဏ်ရှိရှိ တွန်းလှန်သွားမည့်သူများ ဖြစ်သည်။ ဦးအုန်းမြင့် ခင်ဗျားတို့ တရုတ်ဗိုလ်ကျနေတာကို ကြိတ်ခံနေတာ နိုင်ငံသားတိုင်း သိသဗျ။ သတ္တိရှိရင် တရုတ်ဆန့်ကျင်ရေးလေး နည်းနည်းလောက် ပြောသင့်သည်။ လူတွေသဘောကျလို့ နောက်တပတ် ရွေးကောက်ပွဲမှာတောင် အမတ်ပြန်ဖြစ်နိုင်သည်။
ယနေ့နိုင်ငံရေး အခြေအနေသည် အကဲဆတ်သည်၊ မာယာများသည်ဟူသော အကြောင်းပြချက်ဖြင့် ငြိမ်သက်နေသော အားကောင်းမောင်းသန်အရွယ် နိုင်ငံရေးလှုပ်ရှားသူများကိုတော့ အားမရပါ။ ပွင့်ပွင့်လင်းလင်း ပြောခြင်းဖြစ်သည်။ အခုချက်ခြင်း လမ်းပေါ်တက်၍ ဆန္ဒပြရမည်ဟုမဆိုလိုပါ။ ဆိုရေးရှိကဆို ပြောရေးရှိက ပြောဆိုတဲ့ အဆင့်လောက်ကိုတောင် မလုပ်လိုတော့ဘူးလား။ ကိုယ့်လူတွေ ပရောဂျက် ပရိုပိုဆယ်တွေမှာ ပျော်မွေ့နေကြပြီလော။ ဒါမှမဟုတ် တည်ရှိနေသော ကွန်ဖော့ဇုံလေး ပျက်စီးသွားမှာကို စိုး၍လော။ ကာယကံရှင်များသာ သိပေလိမ့်မည်။
ယူနီဖောင်းမဝတ်တော့သော်လည်း စစ်ဗိုလ်ချုပ်စိတ် မကုန်သေးသော ဦးအုန်းမြင့်၏ ဗိုလ်ကျလွန်းသော မိုက်ရိုင်းလွန်သော ပြောဆိုမှုအပေါ် ဖေ့စ်ဘွတ်ခ်သုံးနေသော သံဃာတော်များထံမှ ဘာမှတ်ချက်မှ လောက်လောက်လားလား ထွက်မလာသေးတာကိုလည်း သတိထားမိသည်။ တလောက မျိုးစောင့်ဖို့ မန္တလေးမှာ သံဃာတော် အပါးပေါင်း သုံးသောင်း တက်ရောက်ခဲ့သည်။ အခု ဦးအုန်းမြင့်ကိစ္စမှာ အနည်းဆုံး သံဃာတော် သုံးပါးလောက်ထံမှ ရပ်တည်ချက် ကောင်းကောင်းဖြင့် မှတ်ချက်ပေးတာမျိုးလောက်တော့ ဖြစ်သင့်သည်။
ဦးပဉ္ဇင်းတို့ လောကီကိစ္စတွေမှာ ပါမည်ဆိုပါကလည်း တရားတဲ့ဘက်က ထဲထဲဝင်ဝင်ပါကြပါဟု တိုက်တွန်းလိုသည်။ ဖိလစ်ပိုင် ခရစ်ယာန်ဘုန်းတော်ကြီးတွေ ဒီမိုကရေစီအတွက် အသက်ပါ စွန့်လွှတ်ခဲ့တာတွေ ရှိသည်။ ဒါတွင်မကသေးပါ တောင်အမေရိကတိုက်က နိုင်ငံတွေမှာလည်း အရေအတွက် မနည်းလှသော ခရစ်ယာန်ဘုန်းတော်ကြီးတွေ အာဏာရှင်တွေကိုဆန့်ကျင်ရင်း အသက်ပေါင်းများစွာ ပေးဆပ်ခဲ့သည်။ မြန်မာနိုင်ငံမှာ ရွှေဝါရောင်တုန်းက ပါဝင်ခဲ့သော ထောင်ကျခံခဲ့ရသော အသတ်ခံခဲ့ရသော သံဃာတော် အရှင်သူမြတ်များကို လေးစားပါသည်။
သို့သော် တဖက်မှာလည်း ဘာမှ ကျားကုတ်ကျားခဲ့မလုပ်ဘဲ လောကီအသိုင်းအဝိုင်းတွင် လောကီကိစ္စများကို ဝင်စွက်ဖက်ရင်း နာမည်ကြီးလိုတဲ့ သံဃာတော်များကို တွေ့ရတော့လည်း စိတ်ပျက်မိသည်။ လူတွေထဲတွင်သာမဟုတ် သံဃာလောကမှာလည်း ကွန်ဖော့ဇုံလို့ ပြောရမယ့် သက်တောင့်သက်သာ အရပ်မျိုး၌နေရင်း ထင်ပေါ်ကျော်ကြားလိုသည့် ဦးပဉ္ဇင်း အရေအတွက်ကလည်း မြင့်တက်လာသည်ဟု ဆိုနိုင်သည်။ နိုင်ငံတကာကနေ အကယ်၍ ဒီလိုဖြစ်နေတာတွေကို တွေ့မြင်ရ၍ မင်းတို့ မြန်မာပြည်က ထေရဝါဒဘုန်းတော်ကြီးတွေကလည်း တိဗက်ဘုန်းတော်ကြီးတွေရဲ့ အကျင့်အကြံကိုတောင် မမီပါ့လားလို့ အပြောအဆို ခံရနိုင်သည်။ အခုလို ဦးအုန်းမြင့်ကိစ္စမျိုး၊ ၂ဝဝ၈ ဖွဲ့စည်းပုံကို ပြင်ဆင်မှာမျိုး၊ မြေယာသိမ်းခံ တောင်သူများရဲ့တိုက်ပွဲ၊ တရုတ်က မြစ်ဆုံဆည်ပြန်ဆောက်ဖို့ အကဲစမ်းနေတာမျိုးကို တန်ပြန်ဖို့ စသဖြင့် အဲတာမျိုးတွေမှာ ဝင်ရောက်ပူးပေါင်းဆောင်ရွက်မဲ့ သံဃာတော်မျိုး မြန်မာပြည်မှာရှိသေးရဲ့လားလို့ စဉ်းစားမိသည်။ အမျိုးစောင့်မယ့်ဆရာတော်များ နောက်ပိုင်းမှာ ဦးသန်းရွှေ၊ ဦးအောင်သောင်း၊ ဦးသိန်းစိန်၊ ဦးအုန်းမြင့်တို့ရဲ့ နောက်လိုက်များဖြစ်နေမယ်ဆိုရင်တော့ ထင်ထားတာနဲ့ မကွာလှတာမို့ နှမြောတသခြင်းတော့ ဖြစ်လိမ့်မည်မဟုတ်ပါ။
ပြည်ထောင်စုဝန်ကြီးအဆင့်က အဲသလို အဆင့်အတန်းမရှိ ပြောတာကို လက်ရှိအစိုးရက အရေးယူဖို့လိုသည်။ ဝန်ကြီးနေရာနဲ့ မတန်သောကြောင့် ဖယ်ရှားသင့်သည်။ ဦးဌေးဦးက သူ့လူကိုသူ ကာကွယ်တဲ့စကားပြောသည်။ ဒီလို ကာကွယ်တာဟာ နိုင်ငံရေးမှာ သူခိုး ဓားရိုးကမ်းတာပဲလို့ ဆိုရလိမ့်မည်။ အဲသလို ပြောချင်တိုင်းပြော လွှတ်ထားပေးမယ်ဆိုရင် နောင်မှာ မလိုလားအပ်တဲ့ သည့်ထက် ကြီးမားတဲ့ပြဿနာတွေကို ရင်ဆိုင်ရလိမ့်မည်။
ဒီစာကို ဒေါသဖြစ်လို့ ရေးတာဖြစ်သည်။ ဒေါသနဲ့ ရေးတာကြောင့် မှားတာ ကြမ်းတာ ပါလိမ့်မည်။ သို့သော် ထိုမှားတာ ကြမ်းတာတွေကို ကျနော် ပြန်မပြင်ပါ ပြန်မနုတ်ပါ။ တခါတလေ ဒေါသနဲ့ ရေးထားတာကို အရှိအရှိအတိုင်း လူတွေဖတ်စေချင်၍ပင် ဖြစ်သည်။ လောကုတ္တရာကိစ္စတွေကိုဆောင်ရွက်ရမယ့် သာသနာ့ဝန်ထမ်း ဦးပဉ္ဇင်းတွေတောင် ဖေ့စ်ဘွတ်ကနေ ထင်တာတွေ မြင်တာတွေ ရေးတင်နေတာ၊ ကျနော့်လို လူသာမာန် ဒေါသဖြစ်၍ ရေးတင်သောစာသည် မည်သူ့ကိုမှ အဆိပ်အတောက်ကြီးစွာဖြစ်လိမ့်မည်မဟုတ်ဟု ယူဆသည်။ ။
ဇော်မင်း
၂ ရက် ဖေဖော်ဝါရီလ၊ ၂ဝ၁၄ ခုနှစ်
ရွက်မွန် မှ ပြန်လည်ကူးယူ ဖော်ပြပါတယ်။
No comments:
Post a Comment