လျှာတဖက်ကုို အပေါင်ထားခဲ့ရသည့်အတွက် ... ပါးစပ်တပေါက်အတွက် ... အရသာခံစရာ လျှာမရှိတော့ ...။ မတတ်နုိုင် ... သူ ခဏ .... ကုိုယ် ခဏ အသုံးပြုမှရမည် ...။ ထုို့ထက် အရေးကြီးသည်ကား နှလုံးသားတစုံ အပေါင်မဆုံးရန် ဖြစ်သည်။ လျှာမရှိပေမယ့် နှလုံးသားဖြင့်ခံစား၍ ရနုိုင်သေးသည် ...။
ခုတလော အပေါင်ဆုိုင်တွေ တုိုးလာသည် ...။ အပေါင်ခံသူတုို့သည် နှလုံးသားကုို ပေါင်နှံမည်ဆုိုလျှင် ... ကောင်းကောင်း မကောင်းကောင်း လက်ခံကြသည်။ သုံးဖန်များလွန်းသည့် ဦးနှောက်အားလည်း မလုိုချင်ကြ ...။ တခြားအရာတုို့ကုိုကား သုံးပြီးသားဆုို မလုိုချင်ကြ ...။ ထုို့အတွက် လမ်းမပေါ်တလျှောက် ... ရထားဘူတာ၊ ကားဆိပ်တလျှောက် ပေါင်နှံသူတုို့၏ နှလုံးသားနေရာသည် ဟာလာဟင်းလင်းဖြင့် ...။ နှလုံးသားမရှိသည့်အတွက် ဦးနှောက်သည်ပင် ကောင်းစွာ အလုပ်မလုပ် ...။
တချို့ ကား နှလုံးသားမရှိ ...
တချို့ကား ဦးနှောက်မရှိ ....
တချို့ကား ပါးစပ်နှစ်ပေါက်နှင့် ...
တချို့ကား လျှာ နှစ်ထပ်နှင့် ...
တချို့ကား မျက်လုံးလေးဖက်နှင့် ...
တချို့ကား နားခြောက်ဖက်နှင့် ...
အပေါင်ဆုိုင် ပုိုင်ရှင်သည် အပေါင်ဆုံးပစ္စည်းတွေကုို လမ်းဘေးတွင် ချရောင်းနေလေသည် ...။ သူကုိုယ်တုိုင်ကား ဦးနှောက်နှစ်ထပ် ..နှလုံးသား နှစ်ထပ် ... ပါးစပ်နှစ်ပေါက် ... လျှာ နှစ်ထပ် ... မျက်လုံးလေးထပ် ... နားခြောက်ဖက်နှင့် ...
ဝယ်သူတုို့သည် အလုအယက် ..အတုိုးအဝှေ့ ...။ လမ်းဘေး အပေါင်ဆုံးချရောင်းဆုိုင်တွင် ... အင်ဂျင်နီယာ၏ ဦးနှောက်သည် ပွစိစိ ...၊ လေးခန်းမှာ နှစ်ခန်းလောက်ပျက်နေသည့် ဆရာဝန်၏ နှလုံးသားသည် ခုန်ဆွ ခုန်ဆွ ..။ ဝယ်သူတုို့သည် တုိုးကြဝှေ့ကြနှင့် ပေါပေါပဲပဲနှင့် ပြန်ထုတ်ရောင်းသည့် အပေါင်းဆုံးပစ္စည်းများကုို သူ့ထက်ငါ အလုအယက်တုိုးဝှေ့ကြကုန်၏ ...။
တနေရာတွင် .. ဦးနှောက်တစ်စုံသည် မလှုပ်မယှက် ...။ နောက်တနေရာတွင် ... နှစ်လုံးသားတစ်စုံသည် မလှုပ်မယှက် ...။ ကျိန်းသေသည် ဝယ်သူတွေကုို ဆွဲဆောင်မှုမရှိအောင် ... သူတုို့ သေချင်ဟန်ဆောင်နေကြသည် ...။
နောက်တနေ့ အပေါင်ဆုိုင်သုို့ရောက်ဖြစ်ခဲ့ရင် ... ဦးနှောက်နှင့် နှလုံးသားကုို မသိမသာ အကဲခတ်ကြည့်ခဲ့လုိုက်မည် ...။ ။
ဆောင်းလူ
အောက်တိုဘာ ၁၆၊ ၂၀၁၃
No comments:
Post a Comment