နှစ်ပေါင်း အတော်ကြာကြာ စွန့်ခွာခဲ့သော အမိမြေကို တဖန်ပြန်လည်အခြေချနေထိုင်လိုသော အတွေးတွေက လွှမ်းမိုးနေခဲ့သည်။ တိုင်းပြည်အခြေအနေအရပ်ရပ်ကလည်း ကောင်းမွန်တိုးတက်လာခဲ့သလို အတိုက်အခံ အဖွဲ့အစည်းများနှင့် ပလူးပလဲ အပေးအယူမျှနေသော ကာလကြီးလည်းဖြစ်သည်။
ဘာလုပ်လို့ ဘာကိုင်ရမှန်းမသိ။ စိတ်တို့က တိမ်တိုက်များကဲ့သို့ လွင့်မျောနေသည်။ မွန်းကျပ်နေသော စိတ်တို့ကို ဖြေလျှော့ရန်အတွက် ထုံးစံအတိုင်း အိမ်နံဘေးရှိ လက်ဖက်ရည်ဆိုင်လေးသို့ ထွက်ခွာလာခဲ့သည်။ ဆိုင်ထဲတွင် စာစောင်များဖတ်ရင်း အတွေးဝင်နေခိုက် နောက်ဘက်စားပွဲဝိုင်းမှ စကားသံတို့ကြောင့် မင်တက်မိစွာ နားထောင်နေလိုက်မိသည်။
တယောက်က စပြောသည်...။ “နိုင်ငံရေးအခြေအနေအရ အခုပြည်ပမှာ ရပ်တည်ဖို့ မလွယ်တော့ဘူး။ ရေစီးကြောင်းတွေက ပြောင်းပြန်ဖြစ်ကုန်ပြီ။ ဒါကြောင့် ပြည်တော်ပြန်ဖို့ ခင်ဗျားတို့ စဉ်းစားကြပြီလား” ဟု ကောက်ကာငင်ကာ ပြောလိုက်သည်။
ထိုအခါ နောက်တယောက်က “ခင်ဗျားက သိပ်စိတ်ကူးယဉ်တတ်တာပဲ မဖြစ်နိုင်ဘူးဗျ”
ပထမလူ… “ဘာလို့ မဖြစ်နိုင်ရမှာလဲ စိတ်ကူးယဉ်တာမဟုတ်ဘူး၊ ဒါ တကယ်ဖြတ်ကျော်ရမယ့် ပြဿနာပဲ”
ဒုတိယလူ... “ဟုတ်ပါပြီ၊ ခင်ဗျား ပြည်တွင်းပြန်မယ်ဆိုပါစို့… တော်လှန်ရေးကို ထွက်လာတုန်းက ခင်ဗျား တယောက်တည်းရယ်။ အခု ခင်ဗျားမှာ ဇနီးနဲ့ ကလေး ၃ ယောက်... ဘယ်သွားမှာလဲ...? ဘာတွေ လုပ်စားမှာလဲ... ကလေးတွေ အနာဂတ်ကို ဘယ်လို ဖန်တီးတည်ဆောက်မလဲ…? ဥပမာ ပညာရေး၊ ကျန်းမာရေး လူမှုရေးကအစ အားလုံးဟာ ခင်ဗျား ခေါင်းပေါ်မှာ ရှိနေမှာနော်”
ပထမလူ… “အေးဗျ၊ ခင်ဗျားပြောသလိုဆိုရင် နေသားကျနေတဲ့ ဘဝကိုဖျက်ပြီး အစကပြန်စရမှာဆိုတော့ တိမ်မယောင်နဲ့နက်၊ လွယ်မယောင်နဲ့ခက်ပြီပေါ့… ဟုတ်တော့လည်း ဟုတ်သားဗျာ...”
ဒုတိယလူ… “မိဘဆွေမျိုးသားချင်းဆိုတာကလည်း သူတို့ဘဝနဲ့သူတို့ နေသားကျနေကြပြီ။ ခဏတာ အလည်အပတ်ခရီးက ပြဿနာမရှိပေမယ့်… ရေရှည်ရပ်တည်ရေးမှာတော့ ပြဿနာရှိလာနိုင်တယ်။ နွေးထွေးမှု သံယောဇဉ်ဆိုတာကလည်း အနေအနီးအဝေးနဲ့ ဆိုင်သေးတယ်ဗျ။ ကျုပ်တို့က ဆွေမျိုးသားချင်းတွေကိုတောင် ယုံကြည်မှု ပြန်တည်ဆောက်ယူရမယ့်ဘဝမျိုးတွေ ဖြစ်နေပြီ။ တဆက်တည်းပြောမယ်ဗျာ အရေးကြီးဆုံးက ခင်ဗျားဖြစ်ချင်တာတွေအားလုံး စိတ်တိုင်းကျ ဖြစ်စေချင်ရင်တော့ အခရာအကျဆုံးက ‘အထုပ်’ ရှိဖို့တော့ လိုလိမ့်မယ်”
ပထမလူ… “ခင်ဗျား ဘာကိုဆိုလိုတာလဲဗျ… ဘာအထုပ်ကို ပြောနေတာတုန်း…”
ထိုအခါ ဒုတိယလူက စိတ်အချဉ်ပေါက်လာသည့် ပုံစံဖြင့် ….
“ခင်ဗျားကလည်းဗျာ ပြောရတာ ဒုန်းဝေးလိုက်တာ … ငွေထုပ်ဗျ ငွေထုပ်... မှတ်ထား။ အဲဒါမပါလို့ မဖြစ်ဘူး။ အများစု စိတ်ဝင်စားနေတာ ငွေပဲ။ တော်လှန်ရေးလုပ်ခဲ့တာ၊ အနစ်နာခံခဲ့တာ၊ တိုင်းပြည်ချစ်တာတွေနဲ့တိုင်းနေကြတာ မဟုတ်တော့ဘူးဗျို့... ခင်ဗျားကို ဥပမာတခုပြောပြမယ်… ကျနော့်မိတ်ဆွေ တော်လှန်ရေးသမားကြီး တိုင်းပြည်နဲ့ လူမျိုးကိုလည်း ချစ်တယ်။ သမာသမတ်လည်း ကျတယ်။ အသိပညာ အတတ်ပညာ ဗဟုသုတလည်း ပြည့်စုံတယ်။ ဒါပေမယ့် ပြည်တွင်းရောက်တော့ လူရာသွင်းမခံရဘူးဗျာ။ အဲဒါလည်း အထုပ်ပြဿနာပေါ့။ ကောင်းကင်ပေါ်ကကျလာတဲ့ ကိုယ်တော်ချောတွေကျတော့ ကြိုဆိုမယ့်လူ… ပန်းစည်းကမ်းမယ့်လူ… အင်တာဗျူးချင်တဲ့လူတွေနဲ့ ပြည့်လျှံနေတာပဲ။ ဟိုက ဖိတ်လိုက်… ဒီက ဖိတ်လိုက်နဲ့ တခမ်းတနားပဲဗျာ။ ထူးခြားတာက သူတို့မှာ ကိုယ်ပိုင်အထုပ်တွေ ရှိနေကြတယ်”
“သူတို့ ဒီဘက်မှာ ဘယ်လိုရပ်တည် လုပ်ဆောင်သွားတယ်ဆိုတာ ခင်ဗျားတို့ ကျနော်တို့ အားလုံးအသိပဲ မဟုတ်လား။ ဒါပေမယ့် အဲဒါတွေ ခုတော့ မှေးမှိန်သွားပြီ။ သူတို့မှာပါသွားတဲ့ အထုပ်တွေက အားလုံးကို ဖုံးဖိနိုင်စွမ်းရှိနေသလားလို့တောင် တွေးမိတယ်။ တော်လှန်ရေးကာလမှာ တာဝန်ထမ်းဆောင်ကြတာချင်း တူပေမယ့်... မတူညီတဲ့အချက်တွေရှိနေတယ်ဆိုတာ မြင်တတ်ဖို့ လိုတယ်ဗျာ…” ဟု အားငယ်တိုးလျှသောအသံဖြင့် ပြောလိုက်သော စကားသံကြောင့် ပြည်တော်ပြန်အတွေးဖြင့် စိတ်ကူးယဉ်အိပ်မက် မက်နေမိသည့် ကျနော်သည်ပင် ရုတ်တရက်ဆိုသလို အတွေးကမ္ဘာမှ လန့်ဖျတ်နိုးထသွားသလို ဖြစ်မိလေတော့သည်။
အိမ်ပြန်တော့မည်ဟု ဆိုင်အပြင်သို့ထွက်ကာ ကောင်းကင်ယံကို မော့ကြည့်လိုက်တော့ မိုးသားတိမ်လိပ်တို့အကြား ထူးထူးခြားခြား တောက်ပလင်းလက်နေသော ကြယ်တာရာတချို့ကို တွေ့မြင်လိုက်ရသည်။ စကြာဝဠာကြီးတခုလုံး အနည်းငယ်သော ထိုကြယ်စင်များကသာ အလင်းရောင် ဆောင်ကြဉ်းပေးထားသည့်နှယ်။
လက်ရှိ မြန်မာပြည်၏ရာသီခွင်မှာ အထုပ်ပိုက်ပြီး အိမ်ပြန်လာသူများနှင့် အထုပ်နောက်လိုက်ရင်း အိမ်ပြန်ရောက်သူတို့ ဇာတာတိုင်ထိပ် ရောက်နေ၏။
မိုးရိပ်တိမ်လွှာ မကင်းစင်နိုင်သေးသော ညဥ့်ကာလဝယ် ရေတွက်ခြင်းငှာ မစွမ်းနိုင်သော အဝေးရောက်နယ်မှ ကြယ်တာရာတို့ အရောင်မွဲမှေးမှိန် ညှိုးလျသိမ်ငယ် မျက်ကွယ်ပြုခံရခြေပြီတကား။ ။
အုပ်ကြီးဖေ
၂၃- ၂- ၂၀၁၃
No comments:
Post a Comment