တံခါးပိတ်ပြီး လက်ယပ်ခေါ်နေသော လွှတ်တော် (မောင်မောင်ဝမ်း)

အမျိုးသားဒီမိုကရေစီအဖွဲ့ချုပ်ဟာ ကြားဖြတ်ရွေးကောက်ပွဲမှာ လွှတ်တော်ကိုယ်စားလှယ်တွေ အများစု အနိုင်ရရှိခဲ့တယ်ဆိုတာ … အားလုံးအသိ ဖြစ်ပါတယ်။ သို့သော် လွှတ်တော်တက်ခါနီးဆဲဆဲမှာ ကျမ်းသစ္စာကျိန်ဆိုခြင်း စာသားနဲ့ပတ်သက်လို့ အငြင်းပွားစရာကိစ္စက ဖြစ်လာတယ်။ ဒီကိစ္စဟာ သာမန်ကြည့်မယ်ဆို … အသေးဖွားလေးလိုလို … ကျော်လွှားသွားရင်ပဲ ဖြစ်တော့မယောင်ယောင် ပြောဆိုနေတဲ့ ခပ်ညံ့ညံ့ လွှတ်တော်ကိုယ်စားလှယ်ဆိုသူများရဲ့ အင်တာဗျူးများကိုလည်း နားထောင်လိုက်ရပါတယ် …။

လွှတ်တော် ကိုယ်စားလှယ်တဦးဖြစ်တဲ့ ဦးခင်ရွှေ ကဆို … ၂၀၀၈ ဖွဲ့စည်းပုံအခြေခံဥပဒေထဲမှာ ပါဝင်တဲ့ ကျမ်းသစ္စာ ကတိပြုချက် (အင်္ဂလိပ်လို) ဟာနဲ့ တလွဲ ဒီမိုကရေစီဖွံ့ဖြိုးနေတဲ့ ... နိုင်ငံတွေက ကျမ်းသစ္စာ ကျိန်ဆိုချက်တွေကို မဆီမဆိုင် ကိုးကားပြီးပြောသွားလေရဲ့ … ပြောသွားတော့လည်း အင်္ဂလိပ်လို တလွဲတွေချည်းပဲ … သူပြောသွားတာက … … …


အမေရိကန်မှာ ဆိုရင် - I will support to defend of the constitution.

ဂျာမနီမှာ ဆိုရင် - Defend of the visit law.

ဂျပန်မှာ ဆိုရင် - I will protect of the defend of the national chatter.

ဂရိမှာလည်း ဒီတိုင်းပဲ ...

အိန္ဒိယမှာ ဆိုရင် - Will to the best of the ability of the protect of the defend.

ဖိလစ်ပိုင်မှာ ဆိုရင် - Defend of the constitution.

စင်္ကာပူမှာ ဆိုရင် - l will preserve, protect of the defend of the Constitution of the Republic of Singapore.

ဒီလိုမျိုး သစ္စာဆိုပြီးမှသာလျှင် လွှတ်တော်ထဲ ဝင်လို့ရတယ်။ ဒါကြောင့်မို့လို့ ဘယ်လိုပဲဖြစ်ဖြစ် ဟောင်း အဲ့ဘား ပြည်သူတစ်ယောက်နဲ့နေမယ်ဆိုရင်တော့ ရီစပက် ဆိုတဲ့ စကားလုံးနဲ့ နေလို့ရတယ်။ လွှတ်တော်ထဲ ဝင်မယ်ဆိုရင်တော့ ဒီဖန့်ဆိုတဲ့ စကားလုံးနဲ့မှ ဝင်လို့ရတယ်။ DBV နဲ့ အင်တာဗျူးမှာ ဒေါက်တာခင်ရွှေ ပြောသွားတဲ့ စကားအချို့ပါ။ မေးတာနဲ့ ဖြေတာ တလွှဲစီဖြစ်ရတဲ့အထဲ အဓိပ္ပာယ်မသိဘဲ ရွတ်ပြသွားတာ တော်တော်ဆိုးတယ်။ (facebook မှာ တယောက်တင်ထားတဲ့ဟာပါ)

၂၀၀၈ ဖွဲ့စည်းပုံအခြေခံဥပဒေ ကျမ်းသစ္စာကျိန်ဆိုချက်မှာ အင်္ဂလိပ်လို သူပြောသွားတဲ့အထဲက (defend) ကာကွယ်ပါမည်ဆိုတာ တလုံးမှ မပါဘူး။ မဆီမဆိုင်တွေ ငါ့စကားနွားရ ပြောသွားတယ်။ ဒါက ၂၀၀၈ ဖွဲ့စည်းပုံထဲက ကျမ်းကျိန်ချက် …

SCHEDULE FOUR 

Form of Oaths or Affirmation 

(Refer to Section 125) 

I ................ do solemnly and sincerely promise that as an elected representative of the Pyithu Hluttaw/ the Amyotha Hluttaw/ the Region or State Hluttaw, I will uphold and abide by the Constitution of the Union. I will be loyal to the Republic of the Union of Myanmar and citizenry and hold always in esteem non-disintegration of the Union, non-disintegration of national solidarity and perpetuation of sovereignty. In addition, I will carry out the responsibilities uprightly to the best of my ability.

အမျိုးသားဒီမိုကရေစီအဖွဲ့ချုပ် လွှတ်တော်ထဲမဝင်ဘဲ ဆိုင်းငံ့နေမှုသည် ဝေါဟာရပြဿနာ မဟုတ်ပါ၊ ယုံချက်ချက် ပြသနာဖြစ်သည်။ ဒီကိစ္စကို ပေါ့ပေါ့သဘောထားမရပါ။ အစိုးရဘက်က ပြဌာန်းထားသော ကျမ်းသစ္စာဆိုချက်တွင် အင်္ဂလိပ်လို uphold ဆိုတာကို ရှင်းပြချင်ပါသည်။ အဓိပ္ပာယ်က (To maintain or affirm against opposition - မဆန့်ကျင်ဖို့ အတည်ပြုရမည်၊ ထိန်းသိမ်းပါမည်၊ To prevent from falling or sinking - ပျက်စီးမသွားအောင် တားဆီးပါမည်) ... စဉ်းစားကြည့်ပါ။ NLD ရွေးကောက်ပွဲမှာ လူထုကို ကတိပေးထားတာက ၂၀၀၈ ဖွဲ့စည်းပုံ ပြင်မယ်ဆိုတာ အဓိကမူ။ ဒီကိစ္စကို လွယ်လွယ်လေး ခပ်ပေါ့ပေါ့လုပ်လိုက်ရင် လူထုကို ပေးထားတဲ့ကတိ ဖျက်ရာမရောက်ဘူးလား။ NLD လုပ်ရပ်မှန်တယ်။ ဒီကိစ္စဟာ လူထုဆန္ဒကို ရွေးကောက်ပွဲအပြီးမှာ ထပ်ဆင့်ဖော်ဆောင်တာ ...။

အရပ်ထဲ ရွာထဲမှာ ပြောသလို ရမ်းတုတ် ရမ်းပြော ရမ်းလုပ်လို့ ရတဲ့အရာမဟုတ်။ အရေးကြီးပါတယ်။ လွှတ်တော်ထဲမှာ ဖြေရှင်းတယ်ဆိုတာ … တရားရုံးတရုံးမှာ ထုချေရသလိုဖြစ်ပါတယ်။ အချက်အလက်တွေ အထောက်အထားတွေ ယုတ္တိသဘောတရားတွေ လက်ခံနိုင်မှုတွေနဲ့ ပေါင်းစပ်ကြိုးစားရတဲ့အမျိုးပါ။ ကိုယ်ထင်တာ မြင်တာတွေနဲ့ ရမ်းပြောလို့မရ။ ဥပမာပြောမယ်ဆိုရင်တောင်မှ ဒေါ်အောင်ဆန်းစုကြည်ဟာ လူထုခေါင်းဆောင်ဖြစ်တယ်။ (မင်းပြောမှလား ငါတို့ သိတယ်လို့ ခွန်းတုံ့မပြန်ပါနဲ့ဦး) ဆက်ရှင်းပါမယ်… အရင်ပြောနေတဲ့ လူထုခေါင်းဆောင်ဆိုတာ လူထုက သတ်မှတ်ပေးထားတဲ့ ခေါင်းစဉ် … အခု လူထုခေါင်းဆောင်ဆိုတာ ဥပဒေအရပါ (Legally) လူထုခေါင်းဆောင် ဖြစ်သွားတယ်…။

တခါ (defend) ကာကွယ်ပါမည် ဆိုတဲ့စကားလုံး သုံးရအောင်လည်း ၂၀၀၈ ဖွဲ့စည်းပုံ အခြေခံဥပဒေဟာ ဒီမိုကရေစီ အင်္ဂါရပ်များနဲ့ညီညွတ်အောင် ဆောင်ရွက်ထားတဲ့အရာမဟုတ်။ ဒီစကားလုံးကို ဒီမိုကရေစီ ဖွံ့ဖြိုးတိုးတက်နေတဲ့နိုင်ငံ၊ လူ့အခွင့်အရေးဖွံ့ဖြိုးတဲ့နိုင်ငံများမှာ ပြင်စရာမလိုလောက်တဲ့ အနေထားမို့ သုံးတာ …။

အမေရိကန်ပြည်ထောင်စုမှာ ကိုယ်စားလှယ်တွေကို လူထုက ရွေးချယ်တင်မြှောက်အပြီး … ကွန်ဂရက်မစခင် ကျမ်းသစ္စာ ကျိန်ဆိုရပါတယ် (နိုင်ငံတော်တော်များများလည်း ဒီအတိုင်းပါပဲ) …။

A solemn affirmation or declaration, made with an appeal to God for the truth of what is affirmed. The appeal to God in an oath, implies that the person imprecates his vengeance and renounces his favor if the declaration is false, or if the declaration is a promise, the person invokes the vengeance of God if he should fail to fulfill it. A false oath is called perjury.”

ဆိုလိုရင်းအနှစ်ကို ဆီလျှော်အောင် တင်ပြပါမယ် …။ ကျမ်းသစ္စာ ကျိန်ဆိုတယ်ဆိုတာ အတည်ပြု ပြဌာန်းထားချက်များသည် အမှန်များဖြစ်ပါသည် ဒီအတိုင်း လိုက်နာပါမည်ဆိုတာကို ဘုရားသခင်ဆီ လျှောက်ထား ကတိပြုလိုက်တာ …။ ဒါတွေကို ကတိပြုပြီးရင် လိုက်နာရမည် ... သို့မဟုတ်က ... (လူသား မဆိုထားဘိ) ဘုရားသခင်ကတောင် ဒဏ်ခတ်မည်။ ကတိသစ္စာပြုပြီး … လိုက်နာရန်ပျက်ကွက်ခြင်းကို မုသားသက်သေခံခြင်းလို့ ခေါ်တယ်။

ဒီလိုကိစ္စမျိုးကို ပေါ့ပေါ့ဆဆ ကျော်လွှားသွားသင့်ပါသလား …။ ပြင်စရာ မလိုလောက်အောင်နီးပါးရှိနေသော ဖွဲ့စည်းပုံ အခြေခံဥပဒေအတွက် အကြောင်းမဟုတ်လှပေမယ့် … ပြင်စရာ အများကြီးနဲ့ ပြည့်နှက်နေသော ၂၀၀၈ ဖွဲ့စည်းပုံ အခြေခံဥပဒေကို … လွယ်လွယ်ကူကူနဲ့ ဒို့ကတော့ လူထုက တရားဝင်ရွေးချယ်တင်မြှောက်လိုက်တဲ့ လွှတ်တော် ကိုယ်စားလှယ်တွေဖြစ်ပြီ …။ လွှတ်တော်ထဲ ဝင်ကြစို့ဆို လုပ်လို့မရ။ လွှတ်တော် တံခါးဝမှာ ဆီးပိတ်ထားသော ကျမ်းသစ္စာကျိန်ဆိုခြင်းဆိုတဲ့ အရာကြီးရှိနေပါတယ် …။ ဒီတံခါးနောက်ကနေ လက်ယပ်ခေါ်နေမှုများကို လူပြိန်းဆန်သည်ဟု ပြောချင်ပါသည်။

အမျိုးသားဒီမိုကရေစီအဖွဲ့ချုပ်ဟာ ဘာ့ကြောင့် နဂိုက ဒီကိစ္စကို စမလုပ်တာလဲ 

လွှတ်တော်တွင်းကိစ္စကို နဂိုက ကြိုတင်ပြင်ဆင်ပြီးလုပ်ဆောင်ရန် ဘောင်မဝင်နိုင်ပါ။ ယခင်က အမျိုးသားဒီမိုကရေစီအဖွဲ့ချုပ်ဟာ တရားဝင်မှတ်ပုံတင်ထားတဲ့ ပါတီတောင်မှ မဟုတ်ပါ …။ မှတ်ပုံတင်ပြီးသည့်တိုင်အောင်လည်း … လူထုက ရွေးချယ်တင်မြှောက်အပ်နှင်းထားတဲ့ (Mandate) ပါဝါ မရှိသေးပါ …။ ယခုအချိန်ကာလသည် ထိုကဲ့သို့သောကိစ္စများကို ထောက်ပြပြောဆိုရန် ဥပဒေပါ အခွင့်အရေးများနှင့်အညီ ကိုက်ညီနေပြီဖြစ်သောကြောင့် ဖွင့်ဟညွှန်ပြလိုက်ခြင်းဖြစ်သည်ဟု ယုံကြည်မိပါတယ်။ (၁၉၉၀ ခုနှစ်က အကြောင်းအရာများနဲ့ အငြင်းပွားမယ်ဆိုရင်တော့ … အဓိပ္ပာယ်တွေ အများကြီးထွက်နိုင်ပါတယ်။ သို့သော် ဒေါ်အောင်ဆန်းစုကြည်ကိုယ်တိုင်က လိုလိုလားလား တဆစ်ချိုးပြောင်းလဲ ဦးတည်သွားခြင်းကိုတော့ မျက်ချည်မပြတ်မိဖို့ လိုကောင်း လိုပါလိမ့်မည်)

ယခု အငြင်းပွားဖွယ်ဖြစ်နေသော ကျမ်းသစ္စာကျိန်ဆိုခြင်း (Oaths or Affirmation) သည် အမျိုးသားဒီမိုကရေစီအဖွဲ့ချုပ်မှ ရွေးကောက်ပွဲတွင် ပြည်သူအား ပေးထားသောကတိကို စတင်အကောင်ထည်ဖော်ခြင်းပင် ဖြစ်ပေသည်။ လွှတ်တော်တွင်းမှာ အမျိုးသားဒီမိုကရေစီအဖွဲ့ချုပ်အနေနဲ့ ဝင်ရောက်ဆောင်ရွက်ရန် အခြေအနေမပေးသော်လည်း … လွှတ်တော်တွင်းရှိနေသော … ပါတီအသီးသီး၊ တသီးပုဂ္ဂလိက အသီးသီးကနေ ဒီကိစ္စကို စတင် တင်ပြဆွေးနွေးခြင်းဖြင့် စတင်နိုင်မယ်လို့ ထင်ပါတယ် …။ လွှတ်တော်ပြင်ပမှာရှိနေတဲ့ ပြည်တွင်း ပြည်ပ ဒီမိုကရေစီအင်အားစုများမှလည်း … ဝိုင်းဝန်း ဖိအားပေးကြိုးစားလုပ်ဆောင်ဖို့ လိုပါလိမ့်မည်။

ယခုကိစ္စသည် အမျိုးသားဒီမိုကရေစီအဖွဲ့ချုပ်အနေဖြင့် (ဈေးသည်စကားနဲ့ ပြောရရင်) ဈေးဦးဖောက်ဖြစ်ပါတယ် …။ ဈေးဦးဖောက်မှာ … အလားအလာမကောင်းရင် ဈေးရောင်းမကောင်းတတ်ဆိုတဲ့ ဗမာတွေ အယူအဆလိုဖြစ်သွားမှာ စိုးရိမ်မိပါတယ်…။ အောင်မြင်ခဲ့မယ်ဆိုရင် … ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေ၏ ပထမဆုံးပြင်ဆင်ချက် (First Amendment) အဖြစ် သမိုင်းတွင်နေပါလိမ့်မယ် …။ အမေရိကန်ပြည်ထောင်စုရဲ့ ပထမဆုံး အခြေခံဥပဒေပြင်ဆင်ချက် (Bill of Right) ဟာ လူသန်းပေါင်းများစွာကို နှစ်ပေါင်းများစွာ စောင့်ရှောက်သွားနိုင်သလို မြန်မာနိုင်ငံရဲ့ (Oaths or Affirmation amendment ) ဟာလည်း ဒီမိုကရေစီ ပြတင်းပေါက်ကို စတင်ဖွင့်လှစ်ပြီး အာဏာရှင် တံတိုင်းကြီးကို စတင်ရိုက်ချိုးမယ့် အစဦးဖြစ်ပါလိမ့်မယ်။

အားလုံးကို လေးစားစွာဖြင့်

မောင်မောင်ဝမ်း