“တကယ်တော့ အနှစ် နှစ်ဆယ်ကျော်မကြာခင်မှာပဲ ဘယ်သူ ဘာလဲ၊ ဘယ်သူ တပ်မှူးလဲ ဆိုသည့်အဖြေက ထွက်သွားချေပြီ။ သမိုင်းကိုဖြင့် လိမ်ညာမရတော့။
သို့တစေ ဝမ်းနည်းစရာကောင်းသည်က ယခု နှစ်အစိတ်တွင် တိုင်းပြည်နှင့် လူမျိုးအပေါ် ရိုးသားစွာ ချစ်ခဲ့ကြသော ဆရာတင်မိုး မရှိတော့၊ ဆရာကြည်အောင် မရှိတော့၊ ဆရာမောင်စွမ်းရည်က ရွှေပြည်ကြီးနဲ့ ဝေးကွာတဲ့နေရာမှာ၊ ဆရာကိုလေး (အင်းဝဂုဏ်ရည်)၏ ကလောင်ကလည်း လွတ်လပ်လာသည်မှာ မကြာသေး …”
“ကန္တာရပြင်
ပန်းပင်ပွင့်စေ
စမ်းရေစီးမြ
ငှက်လှတေးဆို
ပျိုစေ .. သစ်စေ ..
ချစ်နိုင်စေ ..” တဲ့ … ။
ကဗျာဆရာကြီးကြည်အောင်က သူ၏ ‘အရိုင်းလွင်ပြင်’ ကဗျာတွင် ဖွဲ့ဆိုခဲ့သည်။ ကျွန်တော်က ဆရာကြည်အောင်၏ ‘မိခင်မာရသွန်’ ကဗျာစာအုပ်ကို အမှတ်တရပြန်လှန်ဖတ်ရှုရင်း ‘အရိုင်းလွင်ပြင်’ ကဗျာကိုဖတ်ကာ အထက်ပါ စာပိုဒ်လေးရောက်တော့ ကဗျာဆရာကို ဖျပ်ခနဲ လွမ်းဆွတ်သတိရကာ ဖတ်လက်စစာအုပ်လေး ရင်ဘတ်ပေါ်တင်ရင်း စိတ်တွေကလည်း အဝေးဆီသို့ ပျံ့လွင့်သွားတော့သည်။
မိုးဝေက နိုင်ငံရေးနွယ်ပြီး ရှုမဝက စာပေအနုပညာ နွယ်သည်။ မိုးဝေမှာ ကဗျာများက ထိုစဉ်က လှုပ်ရှားယိမ်းထိုးနေသည့် ဗီယက်နမ် ပြည်သူ့လွတ်မြောက်ရေးစစ်ကို အားပေးဂုဏ်ပြုမှုများနှင့် နယ်ချဲ့စစ်ကို ဆန့်ကျင်မှုများ လွှမ်းသည်။ ရှုမဝကဗျာတွေက လူ့သဘောသဘာဝများမှ ပုံရိပ်များကို ထင်ဟပ်နေသည်။ မည်သည့်မဂ္ဂဇင်းက ကဗျာဖတ်ဖတ် အရသာရှိလှသည်။
ဤသို့သော အဆီအဆိမ့်ကဗျာများထဲမှ ၁၉၇၉ ဝန်းကျင်ရောက်တော့ မိုးဝေမဂ္ဂဇင်းထဲမှာ မြန်မာငါးပိရေကျိုလေးကို တမာရွက်နု လတ်လတ်ဆတ်ဆတ်လေးနှင့် တို့ကာမြှုပ်ကာ စားလိုက်ရသည့် အရသာမျိုး ကဗျာကို တွေ့လိုက်ရ၏။ အညာငရုပ်သီးထောင်းလေးနှင့် ပဲနှပ်ချက်လေးစားလိုက်ရသလိုမျိုးလည်း ဖြစ်မှာပေါ့။ ကျေးတောသံ ကဗျာ ၂ ပုဒ်တဲ့။
၁။ သက်ကယ်ပျစ် စ ဆံရစ်ချ
အပျိုဦး မြဆံရစ်
သက်ကယ်ကိုပျစ်။
ပျစ်ဆံက မတိုမရှည်
မိုးယိုမယ်လေ။
ဆံရစ်ခွေ ညီညာချသလို
သက်ကယ်ဆံ တိုရှည်လှအောင်
အပျစ်သင်လက်ရာကျမှ
မယ်မင်းကြီးမ။။
၂။ ကြိုးနဲ့ကြိမ် အိုးနဲ့အိမ်
ရှင်လူထွက် ကြိုးကျစ်လျှင်
လွန်းကြက်ထွန့်ပင်။
ရှင်လူထွက် ကြိမ်သတ်လျှင်
မျှော့ဝမ်းပါးပင်။
ပျိုလေးခင်ရဲ့ သက်လျာလေးရယ်
ကြိုးကြိမ်ပိုင်ဖို့ ခက်ပါသေးတယ်။
အိုးအိမ်နိုင်ဖို့ ရက်သာဝေးတယ်။။
... တဲ့လေ။
ကဗျာဆရာက ‘ကြည်အောင်’ တဲ့။ အလို .. ကျွန်တော်က ဆရာကြည်အောင်ကိုသိသည်က အားကောင်းမောင်းသန် ရဲရဲတောက်ကဗျာဆရာ အဖြစ်လေ။
“.............................
လမင်းတရာ၊ သည်ကမ္ဘာဝယ်
သာလျက်အစဉ်ပါတကား။
သို့တစေလည်း
သူ့ရေမြေပေါ်၊ စစ်ကျူးကျော်သော်
ရွှေလှော်အဆင်း၊ ဖိုးလမင်းသည်
မြစ်တွင်းငုတ်လျှိုးသွားတကား။
မြစ်မရေတွင်း၊ စစ်ကျော်နင်းလျှင်
လမင်းမှုန်ရီ၊ သွေးစွန်းနီကာ
ပီပီ မလင်းနိုင်ရှာပေ။” ... တဲ့။
ဆရာကြည်အောင်က သူ၏ နာမည်ကျော် လမင်းတရာ ကဗျာမှာ ဖွဲ့ဆိုခဲ့သည်။
“အသားမဲ(မည်း)သော ခရစ်တော်” ကဗျာတွင်လည်း ...
“ခရစ်တော်ဓား၊ ပြည်သူ့အားကို
အသားမဲမျိုး၊ နီဂရိုးတို့
မြတ်နိုးယုံကြည်၊ သွေးစည်းသည်ကြောင့်
တိုင်းပြည်လွတ်မြောက်ကြကုန်အံ့။”
ဟုလည်း အတွေးရဲရဲ ရေးစပ်ခဲ့သေးသည်။
ကျွန်တော်တို့သည် ဆရာကြည်အောင်၏ အားမာန်ပါပြီး ခေတ်စနစ်ကိုထင်ဟပ်သော ကဗျာတွေအပေါ် အံကြိတ်ခဲ့ကြ၊ လက်သီးဆုပ်ခဲ့ကြသည်။ ဆရာကြည်အောင်နှင့်ပတ်သက်ပြီး မှတ်မိတာရှိသေးသည်။
သူ၏ လမင်းတရာကဗျာစာအုပ်ထွက်လာတော့ လူထုဒေါ်အမာက လမင်းတရာသာလိမ့်မည် ခေါင်းစီးဖြင့် အမှာစာ ရေးသားသည်။ ဒေါ်ဒေါ်၏ အဆိုပါစာမှ ...
“ဤလှိုင်းတံပိုးကြားတွင် လူဖြစ်လာသည့် လူငယ်များအနက် မန္တလေးတက္ကသိုလ်မှ ဖူးပွင့်လားသည့် တင်မိုး၊ ကြည်အောင်၊ မောင်စွမ်းရည် ဟူသော ကဗျာဆရာလူငယ်သုံးဦးသည် သူများထက် ရဲရဲတွေးပြီး ရဲရဲရေးလာကြသည်။” ဟူသော ရေးသားချက်က အတော်ဂယက်ရိုက်ခက်ခဲ့တာ မှတ်မိသည်။ ငြင်းကြခုန်ကြတာ ဆူညံလို့ပေါ့။
မည်သို့ဆိုစေ ... ထိုစဉ်ကာလက ကျွန်တော်တို့ လူငယ်များအဖို့ ဒေါ်ဒေါ့်အမှာစာတွင် ဆက်လက်ပါရှိသော “ကဗျာတစ်ပုဒ်ဟူ၍ ဖြစ်ပေါ်လာရာ၌ (၁) စာဆိုသူ ဖြတ်သန်းကြီးပြင်းလာခဲ့ရသည့် ဘဝခရီး၊ (၂) စာဆိုသူခံယူသည့် ဘဝ အဘိဓမ္မာနှင့် ဦးတည်ရည်မှန်းချက်၊ သို့မဟုတ်၊ ဘဝနှင့်ပတ်သက်သော သူ့ယုံကြည်ချက်၊ (၃) စာဆိုသူ လက်လှမ်းမီသည့် အသိအမြင် ဗဟုသုတနှင့် ဝေါဟာရတို့အပေါ်တွင် အခြေခံလျက် ကဗျာလည်း ပေါက်ဖွားလျက်ရှိပါသည်။” ဟူသော သဘောထားကို လေးနက်စွာ ခံယူကြသည်။
ဒေါ်ဒေါ်က ဆရာကြည်အောင်ကို သုံးသပ်ပြသည့် “မောင်ကြည်အောင်က အနုပညာသည် အနုပညာအတွက် သက်သက်ဆိုသည်ကို လက်မခံ၊ အလှသည် အလှသက်သက်ပင် ဖြစ်မည်ဆိုလျှင် ထိုအလှ၌ ဘာတန်ဖိုးရှိသနည်း ဟု သူက အောက်မေ့ပုံရသည်။ အလှသည် အကျိုးရှိသော အလှ၊ လူကို အကျိုးပြုသော ကျေးဇူးပြုသော အလှဖြစ်ရမည်ဟုလည်း ကိုင်ဆွဲထားဟန်ရှိသည်။ သူက သူ့ကဗျာကို လှရုံအတွက် သို့မဟုတ် ကာရံပြေရုံအတွက် နားဝင်ပီယံသက်သက်နှင့် မဖွဲ့၊ သူ့ကဗျာသည် တိုလိုက တိုပေမည်၊ ရှည်လိုက ရှည်ပေမည်၊ သို့သော် ထို အတိုအရှည်တို့၌ သူ့ယုံကြည်ချက် တစ်ကွက်ပါလေသည်ချည်း တွေ့ရသည်။” ဟူသော အချက်ကိုလည်း လေ့လာသင်ယူခဲ့ရ၏။
ထို့ကြောင့်လည်း ဆရာကြည်အောင်၏ ဆားတစ်ပွင့်၊ ပျားတစ်ခက်၊ ဓားတစ်လက် ကဗျာကို နှုတ်တက်ရွတ်ဆိုခဲ့ကြသည်။
“ကဗျာထဲမှာ၊ ဆားမပါလဲ
ရသာလွန်စွဲ၊ ငါ့လျှာထဲ။
ကဗျာထဲမှာ၊ ပျားမပါလဲ
ရသာချိုမြဲ၊ ငါ့လျှာထဲ။
ကဗျာထဲမှာ၊ ဓားတော့ပါတယ်
မဟာအောင်ပွဲ၊ ငါ့ရင်ထဲ။” ... တဲ့။
ထို့ပြင် နောက်ထပ် စွဲမက်နေသေးသည့် ဆရာကြည်အောင်၏ ကဗျာတစ်ပုဒ် ရှိပါသေး၏။ ကဗျာခေါင်းစဉ်က ရေတပေါက်ပေါက်၊ မီးတောက်တဟုန်းဟုန်း တဲ့။ အားမာန်ပါလှကြည့်။ ကဗျာကဒီလို ...
၁။ အေးအေးလေးနဲ့
ဆွေးမြည့်ပေါက်ကျိုး
ရေအိုးအောက်ခြေ
“သံကရွတ်ခွေ”။
၂။ တူသံကညံ
မီးလျှံကရဲ
သံခဲထုငှက်
ထက်မြက်အသွား
“သံမဏိဓား”။ .. ဟူလို။
ဆရာကြည်အောင်ဟုဆိုလျှင် အကြောင်းအရာအရသော်လည်းကောင်း၊ စကားလုံးအရသော်လည်းကောင်း အားမာန်အပြည့်ပါသော၊ တိုက်ပွဲဝင်သော ကဗျာများရေးဖွဲ့သူဟု စိတ်ထဲတွင် စွဲထင်ထားသည်။ ယခု ရှုမဝမှာ ဖော်ပြပါရှိသည့် ကဗျာတွေက ကျေးလက်တေးကဗျာတွေ ဖြစ်နေတော့ အံ့သြမိသည်။ အံ့သြသည်က ပြောင်းလဲသွားလို့ မဟုတ်။ ကျေးလက်ကိုရော၊ မြန်မာစာပေကိုရော နိုင်နင်းသူမို့ အခုကဗျာတွေကလည်း ထူးခြားလှပနေတော့သည်။ ကနဦးက ပြောသလို အညာကျေးလက်ထမင်းဝိုင်းမှာ မြိန်ရေယှက်ရေ စားလိုက်ရသလိုမျိုးပေါ့။ အခုလည်း ကြည့်လေ။ ရှုမဝ မဂ္ဂဇင်းမှာ ...
“မြေရိုင်းထွင်ခြင်း ကဗျာ၂ ပုဒ်”
၁။ ဓားမဦးချ လယ်တီစ
လယ်တီဖို့တောထွင်
နွယ်ပင်နဲ့ အိုင်ခွက်။
ဖီးထအောင် ခြင်ရိုင်းကိုက်
ကျွံလိုက်တဲ့ဗွက်။
ကိုက်ပစေလေ
ကျွံပစေ တအားတက်။
ကြင်စဦးမောင်နှံပျိုတို့
ဓားမကို ထက်အောင်သွေးပါလို့
လယ်တီမြေပွားအောင်မွေးမယ်ပေါ့
သားမြေးလက်ထက်။
၂။ ဓားသွေးကျောက်
အာခြောက်လို့ နေနေ
ရေကိုတော့ မသောက်။
သံသွေးသာ သူကသောက်
ဓားသွေးတဲ့ကျောက်။
မြေယာမဲ့ အဖိုးအို
ဓားမကို ထိုင်ကာသွေး။
ယာသစ်ထွင် မျှော်ရည်တွေး
ခွန်အားကိုမွေး။
... တဲ့။
သည့်အရင်ကလည်း ရှုမဝမှာ ကျေးတောသူဖို့ ကဗျာ၂ ပုဒ်၊ ပျိုလေးတို့အိပ်ခန်းသာ ကဗျာ၂ ပုဒ် စတာတွေကိုလည်း ဆက်တိုက် ဖတ်ခဲ့ရသည်။ မြေရိုင်းတွင်ခြင်း ကဗျာ၂ ပုဒ်မတိုင်ခင်လမှာ ရှုမဝဖော်ပြခဲ့သည့် မိခင်မာရသွန် အမည်ရှိ ကဗျာကတော့ အနုပညာအရရော၊ အတွေးအခေါ်အရပါ ထင်ရှားခဲ့သည့်ကဗျာ ဖြစ်သည်။
သားသယ့် အမေ
မိုင်ရှည်တာဝေး
အပြေးသမား။
သားသမီးချစ်
သက်လုံဖြစ်အောင်
ပြောင်းပစ်သလား။ ... တဲ့။
သားသမီးအပူ၊ သားသမီးဇော၊ သားသမီး ပရိဒေဝ စသည့် အတိဒုက္ခများအကြားမှ အမေများစွာကို ကိုယ်စားပြုလိုက်သည့် ကဗျာ ဖြစ်နေသည်။ ကျွန်တော်တို့ဝန်းကျင်မှာ မိခင်မာရသွန်တွေ အများကြီး။ ထိုကဗျာကို ခေါင်းစီးတပ်၍ ဆရာကြည်အောင်၏ ကဗျာလုံးချင်း စာအုပ်တစ်အုပ်ကိုလည်း ၁၉၈၅ ခုနှစ် ဖေဖော်ဝါရီလမှာ လူထုကြီးပွားရေး စာအုပ်တိုက်က ထုတ်ဝေလိုက်သည်။ ဆရာကြည်အောင်၏ ရဲဘော်မိတ်ဆွေ၊ တက္ကသိုလ်မောင်စောလွင်၏ ကဗျာစာအုပ်ပါ အမှာစာကလည်း ဟည်းထ ပွက်လောညံသွားပြန်၏။
ကြည်အောင် - သာနိုး
တင်မိုး - စွမ်းရည်
ကိုလေး (အင်းဝဂုဏ်ရည်) တို့ဟာ ကဗျာစာပေတပ်ဦးက တပ်မှူးတွေဖြစ်တယ်လို့ ရဲရဲကြီး ဆိုလိုက်ပါတယ်ဟု ဗိန်းမောင်းတီး ကန့်လန့်ကာဖွင့်လိုက်သော စာသားတွေကြောင့် ဖြစ်သည်။ ထိုစဉ်က ရိကြ၊ ခနဲ့ကြ၊ ဆော်ကြ၊ ကလော်ကြသည့် ဆောင်းပါးတွေများ ပလူပျံလို့။ တကယ်တော့ အနှစ်နှစ်ဆယ်ကျော် မကြာခင်မှာပဲ ဘယ်သူ ဘာလဲ၊ ဘယ်သူ တပ်မှူးလဲဆိုသည့်အဖြေက ထွက်သွားချေပြီ။ သမိုင်းကိုဖြင့် လိမ်ညာမရတော့။
သို့တစေ ဝမ်းနည်းစရာကောင်းသည်က ယခု နှစ်အစိတ်တွင် တိုင်းပြည်နှင့် လူမျိုးအပေါ် ရိုးသားစွာ ချစ်ခဲ့ကြသော ဆရာတင်မိုး မရှိတော့၊ ဆရာကြည်အောင် မရှိတော့၊ ဆရာမောင်စွမ်းရည်က ရွှေပြည်ကြီးနဲ့ ဝေးကွာတဲ့နေရာမှာ၊ ဆရာကိုလေး (အင်းဝဂုဏ်ရည်)၏ ကလောင်ကလည်း လွတ်လပ်လာသည်မှာ မကြာသေး။
ကျွန်တော်တို့မှာဖြင့် အချင်းချင်းဆုံတွေ့ကြလျှင် ဆရာဂျမ်း (ဆရာတင်မိုး)၊ ဆရာစွမ်း (ဆရာမောင်စွမ်းရည်)နှင့် ဆရာကြည် (ဆရာကြည်အောင်)တို့အကြောင်းကို လွမ်းလွမ်းဆွတ်ဆွတ်ပြောဆိုကာ သတိတရရှိနေကြဆဲ ဖြစ်သည်။ ဆရာတို့တတွေနှင့် ဆုံလေတိုင်း အထူးသဖြင့် ဆရာကြည်အောင်၏ ရိုးသားပွင့်လင်းစွာ တုတ်ထိုးအိုးပေါက် ပြောဆိုဆုံးမသည့် လေသံကိုတော့ လွမ်းဆွတ်နေမိသည်။ အပြောအဆိုပွင်းလင်းမှု၏ နောက်ကွယ်၏ ဆရာ့စေတနာကလည်း ရိုးရှင်းစွာ အထင်းသား မြင်ရပြန်၏။
ယခုလို ဟောပြောပွဲရာသီတွေမှာ သစ်မရှိသည့်ကြား ဝါးပေါင်ကွပ်ဆိုသကဲ့သို့ လူမရှိ၍ မဖြစ်မနေ ကျွန်တော် ဟောပြောပွဲစင်မြင့်ပေါ် တက်ရလေတိုင်း ဆရာကြည်အောင်ကို သတိရသည်။ လွန်ခဲ့သည့် ၁၅ နှစ်ဝန်းကျင်က ဖြစ်မှာပေါ့။ မန္တလေးမြို့ရှိ အထင်ကရ အလွတ်ပညာသင်ကျောင်းကြီးတစ်ကျောင်းမှ စာပေဟောပြောပွဲတွင် ကျွန်တော်က မတန်မရာဖြင့် အင်းဝဆရာနှစ်ပါးနှင့်အတူ ဟောပြောခွင့်ရသည်။ အင်းဝဆရာနှစ်ပါးဆိုတာ ဆရာကြည်အောင် နှင့် ဆရာကိုလေး (အင်းဝဂုဏ်ရည်)တို့ ဖြစ်သည်။ ကျွန်တော်က ပွဲဦးထွက်ပေါ့။ ဝမ်းစာမရှိ၊ အတွေ့အကြုံမရှိတော့ တစ်နာရီစာလောက်ကို စာရွက်တွေ တစ်ရွက်ပြီးတစ်ရွက်ဖတ်ပြီးမှ ကျွန်တော် ဟောပြောသည်။ ကလေးတွေက ငိုက်လို့။
သည်အဖြစ်အပျက်ကိုကြည့်ပြီး ဆရာကြည်အောင်က ကျွန်တော့်ကို ထောက်ပြသည်။ ပိုင်နိုင်သည့်အကြောင်းအရာကို စာရွက်လွှတ်ပြီး အပီအပြင် ဟောပြောနိုင်ဖို့နှင့် အလေးအပေါ့ လေယူလေသိမ်းကစအစ ဂရုစိုက်ဖို့ ပွင့်ပွင့်လင်းလင်း သွန်သင်သည်။ ဆရာ့ကျေးဇူးကြောင့် ယခု လူရိုသေရှင်ရိုသေ အထိုက်အလျောက်လေး ဟောပြောပွဲစင်မြင့်ပေါ် တက်နေရပါ၏။
ကျွန်တော်သည် မိခင်မာရသွန် ကဗျာစာအုပ်ကို ရင်ဘတ်ပေါ်တင်ရင်း အတွေးတွေ အဝေးဆီပျံ့လွင့်ကာ မျက်ရည်တစ်စပင် စို့လာပါသေးသည်။
ဘာပဲပြောပြော ကိုယ့်အပေါ် သွန်သင်ဆုံးမ ထောက်ပြမည့်သူတွေရှိနေလျှင် အလိုလို ကိုယ်က နုပျိုနေသည်။ အခုတော့ ...။
No comments:
Post a Comment