ဝါရင့် သတင်းစာဆရာ လူထုဦးစိန်ဝင်းနှင့် တွေ့ဆုံခြင်း

“သူတို့ ဆရာနဲ့တွေ့တဲ့အချိန်ကျတော့ ဆရာတို့နဲ့ တစ်သဘောတည်း ကိုက်ညီနေတာပဲ။ ပြန်ရေးတဲ့အခါကျမှ အစိုးရက ပွင့်လင်းလာပါပြီ။ ဒီမိုကရေစီ လမ်းစကိုတော့ ခြေလှမ်းနင်းနေပါပြီ။ လျှောက်လှမ်းနေတာ ကျွန်တော်တို့ တွေ့နေရပါပြီ။ ဒါတွေ ပြောတာပဲ။ ဆရာတို့နဲ့ တွေ့တဲ့အခါကျတော့ ဒါတွေ သူတို့ လုံးဝ မယုံဘူးတဲ့။ အပြောင်းအလဲတွေ လုံးဝ မယုံပါဘူး။ ဒီမိုကရေစီလမ်းစ မြင်တယ်ဆိုတာလည်း လုံးဝ သူတို့ မမြင်ပါဘူးလို့ သူတို့ ပြောတာပဲ။ ဒါဟာ သူတို့ ဒီမှာလာပြီးတော့ လုပ်ခွင့်သာဖို့အတွက် အခွင့်အရေး မျှော်ကိုးပြီးတော့ လာပြီးတော့ ရောယောင်နေကြတာပဲ။ ဂျာနယ်လစ် စစ်စစ်တွေ မဟုတ်ပါဘူး …”

ပြန်ကြားရေးဝန်ကြီးဌာနနှင့် ကုလသမဂ္ဂ ပညာရေး၊ သိပ္ပံနှင့် ယဉ်ကျေးမှုအဖွဲ့ (UNESCO) တို့ ပူးပေါင်းပြီး Conference on Media Development in Myanmar အလုပ်ရုံ ဆွေးနွေးပွဲကို မတ်လ ၁၉ ရက်နှင့် ၂၀ ရက်နေ့တွင် ရန်ကုန်မြို့ရှိ ချာထရီယမ် ဟိုတယ်၌ ပြုလုပ်ခဲ့ပါသည်။ အဆိုပါ အလုပ်ရုံ ဆွေးနွေးပွဲအပေါ် အမြင်များနှင့် အစိုးရမှ ရေးဆွဲပြဋ္ဌာန်းရန် ပြင်ဆင်နေသော ပုံနှိပ်မီဒီယာဥပဒေနှင့် ပတ်သက်ပြီး ဝါရင့် သတင်းစာဆရာ လူထုဦးစိန်ဝင်းအား မေးမြန်းထားခဲ့သည်များကို ဖော်ပြလိုက်ပါသည်။ 

မေး - မတ်လ ၁၉၊ ၂၀ မှာ Conference on Media Development in Myanmar အလုပ်ရုံဆွေးနွေးပွဲကို ရန်ကုန်မှာ လုပ်ခဲ့ပါတယ်။ လုပ်တဲ့အခါမှာ ပြည်တွင်းက လူတချို့ကို ခေါ်တယ်။ ပြည်ပက လူတချို့ကို ခေါ်တယ်။ ပြန်ကြားရေး ဝန်ကြီးဌာနနဲ့ UNESCO တို့ ပူးပေါင်းပြီး လုပ်ခဲ့တယ်။ နိုင်ငံတကာ မီဒီယာ ထောက်ပံ့ရေးအဖွဲ့ (IMS) လည်း ပါတယ်လို့ သိရပါတယ်။ တပ်ထားတဲ့ ခေါင်းစဉ်ကတော့ Media Development in Myanmar လို့ ဆိုပါတယ်။

သတင်းတော်တော်များများမှာ ဖော်ပြခဲ့တာကတော့ ဆွေးနွေးပွဲက ရလာတဲ့ အကြံပြုချက်တွေကို ပုံနှိပ်မီဒီယာ ဥပဒေအတွက် ဒုတိယမူကြမ်း ရေးဆွဲတဲ့နေရာမှာ ထည့်သွင်းမယ်လို့ ဖော်ပြထားကြပါတယ်။ အခု ပုံနှိပ်မီဒီယာ ဥပဒေအတွက် ဒုတိယမူကြမ်း ရေးဆွဲတဲ့အခါမှာ ပိုပြီးပြည့်စုံအောင် ပြည်တွင်း၊ ပြည်ပကလူတွေကို ဖိတ်ခေါ်ပြီး အခုလိုမျိုး Conference လုပ်တာ ဖြစ်တယ် လို့ ပြန်ကြားရေးဝန်ကြီးက မဇ္ဈိမသတင်းဌာန အင်တာဗျူးမှာ ဖြေထားတာ ဖတ်ရပါတယ်။ ဆရာ့ အမြင်ကရော ဘယ်လိုရှိပါသလဲ။ 

ဖြေ - ဆရာလည်း ဒီဟာကို ဖတ်ကြည့်လိုက်တယ်။ ဖတ်ကြည့်လိုက်တော့ Conference ခေါင်းစဉ်က ဘာလဲဆိုတော့ Media Development in Myanmar၊ မြန်မာ မီဒီယာလောက ဖွံ့ဖြိုးတိုးတက်ရေး ဆိုတဲ့ခေါင်းစဉ်နဲ့ လုပ်တာဖြစ်တယ်။ လာပြီးတော့ ဖတ်ကြားတဲ့ ပြည်ပက ပုဂ္ဂိုလ်တွေကလည်း မီဒီယာဖွံ့ဖြိုးတိုးတက်ရေးအတွက်ပဲ ပြောသွားကြပါတယ်။ Media Law ဆိုတာက အစိုးရဘက်ကဖတ်တဲ့ စာတမ်းတွေမှာပဲ သွားပါတယ်။ အဲဒီတော့ ဒီ Conference ဟာ ရောင်တော်ပြန်နဲ့ ရောတဲ့ Conference လို့ပဲ ဆရာက သတ်မှတ်တယ်။ မီဒီယာ ဥပဒေတွေ၊ ဥပဒေအမျိုးမျိုးနဲ့ သူတို့က ထိန်းချုပ်ဖို့ လုပ်ကိုင်ကြတယ်။ ဥပဒေဆိုတဲ့ သဘောကိုက ထိန်းချုပ်ဖို့ပဲ။ ပြည်သူတွေရဲ့ လွတ်လပ်ခွင့်တွေ၊ ထိန်းချုပ်ဖို့အတွက် တည်ဆဲအစိုးရ တည်တည်ငြိမ်ငြိမ်နဲ့ရှိဖို့၊ သူတို့ အာဏာတည်မြဲဖို့အတွက် နောက် ပြည်သူလူထုကို ချုပ်ကိုင်ထားဖို့ ဖိနှိပ်ထားဖို့လုပ်တဲ့ ဥပဒေတွေ ဖြစ်တယ်။ ဥပဒေတွေဟာ မရှိလည်း မကောင်း၊ ရှိလည်း မကောင်း သဘောဆောင်တယ်။ မရှိလို့လည်း မဖြစ်ဘူး။ သို့သော် ရှိရင်လည်းပဲ လိုတာထက်ပိုပြီး များလာရင်လည်း မကောင်းဘူး။ ဥပဒေအနည်းဆုံး ရှိတဲ့ နိုင်ငံဟာ အေးချမ်းသာယာမှာပဲ။ ဥပဒေ အများဆုံးရှိတဲ့နိုင်ငံဟာ ဘယ်တော့မှ အေးချမ်းသာယာမှု မရှိဘူး။

ပြန်ကြားရေး ဝန်ကြီးဌာနအနေနဲ့က သူတို့ပြောသလို မီဒီယာ ဖွံ့ဖြိုးတိုးတက်စေချင်တယ်။ စတုတ္ထမဏ္ဍိုင် ကြံ့ခိုင်စေချင်တယ်ဆိုရင် မီဒီယာဖွံ့ဖြိုးတိုးတက်အောင် လုပ်နိုင်ကိုင်နိုင်တဲ့ အခြေအနေကို ဝန်ကြီးဌာနအနေနဲ့က ဖန်တီးပေးဖို့ပဲ ဖြစ်တယ်။ မီဒီယာတွေကို ထပ်ပြီးတော့ ချုပ်ကိုင်ဖို့ မလုပ်သင့်ဘူး။ ဘာကြောင့်မလုပ်သင့်လဲဆိုတော့ ရှိတဲ့ ဥပဒေတွေကိုက သိပ်များနေပါပြီ။ အသရေဖျက်မှု၊ အစိုးရကို အကြည်ညိုပျက်စေမှု၊ ဆူပူအောင် လှုံ့ဆော် စည်းရုံးမှု၊ အီလက်ထရောနစ် အက်ဥပဒေ၊ ရုံးတော်ကို အကြည်ညိုပျက်စေမှု စသည်အားဖြင့် ဥပဒေတွေက အများကြီး ရှိပါတယ်။ အဲဒီ ဥပဒေတွေကို လိုချင်သလို ဆွဲဆန့်လို့လည်း ရတယ်။ ကြိုက်သလို ကျယ်အောင် ပုံကြီးချဲ့လို့လည်း ရတယ်။ အဲဒီလို လုပ်ခဲ့ကြလို့လည်းပဲ ရှေးခေတ်အဆက်ဆက်ကလည်းပဲ သတင်းစာတွေ အသရေဖျက်မှုနဲ့ တရားစွဲခံရတာတွေ၊ ပုဒ်မ ၅ နဲ့ ချိတ်ပိတ်ခံရတာတွေ၊ အဖမ်းခံရတာတွေ အများကြီး ရှိခဲ့တယ်။ တကယ်တန်း သတင်းလွတ်လပ်ခွင့်ရှိမှ စတုတ္ထမဏ္ဍိုင်ဟာ ကြံ့ခိုင်မယ်။ သတင်းလွတ်လပ်ခွင့် မရှိဘူး၊ အမှန်တရားကို ဖော်ထုတ်လို့ မရဘူးဆိုရင် စတုတ္ထမဏ္ဍိုင် ဆိုတာလည်းပဲ အပြောပဲရှိမယ်။ လက်တွေ့ ဘာမှမရှိဘူး။

လူတိုင်း လွတ်လပ်စွာ ပြောကြားခွင့်၊ လွတ်လပ်စွာ ရေးသားခွင့်၊ မိမိယုံကြည်ချက်ကို လွတ်လပ်စွာ ကိုင်စွဲထားခွင့်၊ လွတ်လပ်စွာ စည်းရုံးလှုံ့ဆော်ခွင့်ဆိုတာတွေကို အခြေခံဥပဒေကနေ အာမခံချက် ပေးထားပြီးသား။ လူသားတိုင်း ခံစားရမယ့် အခြေခံ လူ့အခွင့်အရေးဖြစ်တယ်။ အခု မီဒီယာဥပဒေတွေလုပ်ခြင်းဟာ ဒီအခြေခံဥပဒေကို ဆန့်ကျင်ရာလည်း ကျတယ်။ အခြေခံဥပဒေက ပေးထားတဲ့ အခွင့်အရေးကို တခြားဘယ်သူကမှ ပိတ်ပင်တားဆီးလို့ မရဘူး။ အခြေခံဥပဒေဟာ တိုင်းပြည်မှာ အာဏာအရှိဆုံး ဖြစ်တယ်။ အခြေခံဥပဒေက ပေးထားတဲ့ဟာကို ပိတ်ပင် တားဆီးလုပ်လို့ရှိရင် ပိတ်ပင်တားဆီးခံရသူတွေက တရားစွဲလို့ ရတယ်။ ဒါ အခြေခံဥပဒေကို မလေးစား မလိုက်နာမှု နိုင်ငံသားတွေရဲ့အခွင့်အရေးကို ချိုးဖောက်ရန် ကြံစည်မှုနဲ့ တရားစွဲလို့ရတယ်။ 

မေး - ပြန်ကြားရေးဝန်ကြီး ပြောသွားတဲ့အထဲမှာတော့ အသစ် ပြန်လည်ရေးဆွဲနေတဲ့ ပုံနှိပ်မီဒီယာဥပဒေဟာ စာနယ်ဇင်းလွတ်လပ်ခွင့်ကို ပိတ်ပင်တားဆီးဖို့ မဟုတ်ဘူး၊ စာနယ်ဇင်း လွတ်လပ်ခွင့်ကို မှန်မှန်ကန်ကန် သုံးနိုင်ဖို့ လုပ်နေတာလို့ ပြောပါတယ်။ နောက်ပြီး မီဒီယာဥပဒေကို စတင်ကန့်ကွက်စဉ်က မီဒီယာဥပဒေသမားတွေ ပြောခဲ့ကြတဲ့ နိုင်ငံတကာ လူ့အခွင့်အရေး ကြေညာစာတမ်း Article 19 ပါ အခွင့်အရေးတွေအတိုင်းလုပ်ဖို့ ပြောခဲ့တာတွေကိုလည်း ပြန်လည် ချေပခဲ့တာ ဖတ်ရပါတယ်။ ဥပမာ Article 19 ကို သုံးတဲ့အခါ Article 29 မှာ ဖော်ပြထားတဲ့အချက်ကို သတိထားဖို့ ဆိုပြီး ပြောလာပါတယ်။ ဒီလိုပြောလာတဲ့ အပေါ်မှာရော ဆရာ့အမြင်က ဘယ်လိုရှိပါသလဲ။ 

ဖြေ - လွတ်လပ်စွာ ထုတ်ဖော်ပြောကြားခွင့် ဆိုကတည်းက စကားလုံးက ရှင်းနေပြီလေ။ ဒါ လွတ်လပ်ခွင့်ပဲ။ အဲဒီ လွတ်လပ်စွာ ပြောကြားခွင့်ကို ထိန်းချုပ်တယ်ဆိုကတည်းကိုက ဒီထိန်းချုပ်တဲ့ ဥပဒေဟာ မှားနေပြီ။ ဖွဲ့စည်းအုပ်ချုပ်ပုံ အခြေခံဥပဒေကို ချိုးဖောက်ရာ ကျတယ်။ မလေးစားရာ ကျတယ်။ လက်တစ်လုံးခြားလုပ်ပြီးတော့ ကိုယ်လိုချင်ရာ ဆွဲတဲ့သဘော ရောက်တယ်။ ဆရာ့အနေနဲ့ကတော့ ဒါကို လုံးဝလက်မခံဘူး။ ဒါဟာ လုံးဝ ဖွဲ့စည်းပုံအခြေခံဥပဒေကို ကျူးကျော်စော်ကားမှုလို့ပဲ သတ်မှတ်တယ်။ မီဒီယာသမားတစ်ယောက်အနေနဲ့ကတော့ မီဒီယာကို ချုပ်ကိုင်ဖို့လုပ်တဲ့ စည်းကမ်းဥပဒေ မှန်သမျှကို ဆန့်ကျင်ရမှာပဲ။ ဒီလို ဆန့်ကျင်တာ ဘာကြောင့်လဲဆိုရင် စတုတ္ထမဏ္ဍိုင် ပီသစေချင်လို့။ စတုတ္ထမဏ္ဍိုင် ပီပီသသထွန်းကားမှ အဲဒီတိုင်းပြည်ဟာလည်းပဲ အေးအေးချမ်းချမ်း သာသာယာယာနဲ့ ထွန်းကား တိုးတက်လာနိုင်တယ်။ 

စတုတ္ထမဏ္ဍိုင် မှောင်ချသွားပြီဆိုရင် တိုင်းပြည်တစ်ခုလုံး မှောင်ချတာနဲ့ အတူတူပဲ။ ဒါကြောင့် စတုတ္ထမဏ္ဍိုင်ကို မှောင်ချတဲ့ ဥပဒေမှန်သမျှကို ဆရာကတော့ ကန့်ကွက်တယ်။ 

အဲဒီတော့ သတင်းမီဒီယာတွေကို မချုပ်ကိုင်ရဘူးလားလို့ မေးစရာ ရှိတယ်။ မဟုတ်ပါဘူး။ ချုပ်ကိုင်ရမယ်။ စစ်သားတွေမှာလည်း စစ်သားတွေ လိုက်နာဖို့ စည်းကမ်း ဥပဒေတွေနဲ့ ချုပ်ကိုင်တယ်။ ဆရာဝန်တွေမှာလည်း ဆရာဝန်တွေ လိုက်နာဖို့ စည်းကမ်း ကျင့်ဝတ်တွေ ရှိတယ်။ အလားတူပဲ ကျောင်းဆရာတွေမှာလည်း ကျောင်းဆရာ ကျင့်ဝတ်တွေနဲ့ ချုပ်ကိုင်တယ်။ သတင်း မီဒီယာသမားကိုလည်း သတင်းမီဒီယာ ကျင့်ဝတ်တွေ အများကြီးရှိပါတယ်။ နိုင်ငံအသီးသီးမှာ ကိုယ့်နိုင်ငံနဲ့ လိုက်လျောညီထွေဖြစ်တဲ့ သတင်းစာဆရာ ကျင့်ဝတ် ဥပဒေတွေ၊ နိုင်ငံတိုင်း နိုင်ငံတိုင်းမှာ ရှိတယ်။ အဲဒီကျင့်ဝတ်တွေက သတင်းမီဒီယာတွေကို ထိန်းချုပ်ပါတယ်။ မလုပ်သင့်တာတွေ မလုပ်ဖို့၊ မမှန်မကန်တာတွေ မလုပ်ဖို့၊ အကျင့် စာရိတ္တတွေ မဖောက်ပြားဖို့၊ ဒါတွေကို ထိန်းချုပ်ပါတယ်။ အဲဒီ ထိန်းချုပ်တဲ့ ကျင့်ဝတ်၊ စည်းကမ်းတွေကို သတင်းမီဒီယာသမားတွေကသာလျှင် ရေးဆွဲရပါတယ်။ ဆရာဝန်တွေရဲ့ ကျင့်ဝတ်ကို မြန်မာနိုင်ငံ ဆရာဝန်အသင်းကပဲ ရေးဆွဲတယ်။ ပြည်ထဲရေးဝန်ကြီးဌာနက ဝင်ဆွဲလို့ မရဘူး။ ဥပဒေဌာနက ဝင်ဆွဲလို့ မရဘူး။ ဆရာဝန်တွေရဲ့ သဘောသဘာဝကို ဆရာဝန်တွေမှ သိတယ်။ ဒါကြောင့်မို့ ဆရာဝန်တွေအတွက် ကျင့်ဝတ် စည်းကမ်းတွေကို ဆရာဝန်တွေကပဲ ချမှတ်ရတယ်။ အလားတူပဲ သတင်းမီဒီယာသမားတွေရဲ့ သဘောသဘာဝကို ရှေ့နေချုပ်ရုံးက ဘာမှ နားမလည်ဘူး။ ပြည်ထဲရေးဝန်ကြီးဌာနဆိုရင် နကန်းတစ်လုံး မသိဘူး။ 

ပြန်ကြားရေးဝန်ကြီးဌာနလည်း မသိပါဘူး။ ပြန်ကြားရေးဝန်ကြီးဌာနသိတာက သတင်းတွေကို ဘယ်လို ချုပ်ကိုင်ရမလဲ ဆိုတာပဲ သိတယ်။ သတင်းမီဒီယာ ဖွံ့ဖြိုးအောင် ဘာလုပ်ရမလဲဆိုတာ သူတို့ မသိဘူး။ ဒါက သတင်း မီဒီယာသမားမှ သိမယ်။ သတင်း မီဒီယာသမားကသာလျှင် ဒီကျင့်ဝတ်တွေ၊ စည်းမျဉ်းတွေကို ရေးဆွဲရမယ်။ ဒီဟာကို ပြင်ပကလူတွေ လာရေးဆွဲတာကို လုံးဝ လက်မခံဘူး။ ဒီလိုအဖွဲ့အစည်းမှာ ပြင်ပ ပုဂ္ဂိုလ်တွေပါလည်း လက်မခံဘူး။ သတင်းမီဒီယာဟာ လွတ်လပ်တဲ့ သတင်းမီဒီယာသမားတွေပဲ ဖြစ်ရမယ်။ အစိုးရ သတင်းစာဆရာတွေ ပါလာတာ လက်မခံဘူး။ 

မေး - Conference ဖွင့်ပွဲနေ့မှာပဲ ပြန်ကြားရေးဝန်ကြီးက ပြောခဲ့ပါတယ်။ မီဒီယာ ပြုပြင်ပြောင်းလဲမှုတွေအတွက် အဆင့်သုံးဆင့်ခွဲပြီး လုပ်နေတယ်။ ပထမအဆင့်က ဖြေလျော့ပေးမယ်။ ဒုတိယ အဆင့်က ၁၉၆၂ ပုံနှိပ်ထုတ်ဝေ ဥပဒေကို ဖျက်သိမ်းပြီး ပုံနှိပ်မီဒီယာ ဥပဒေရေး ဆွဲမယ်။ တတိယအချက်က ပုံနှိပ်မီဒီယာ ဥပဒေ ပြဋ္ဌာန်းပြီး စာနယ်ဇင်းတွေ လွတ်လပ်မှုနဲ့ တာဝန်ယူမှု၊ လွတ်လပ်မှုနဲ့ ဆင်ခြင်တုံတရား ဟန်ချက်ညီအောင် ပြန်ကြားရေးဝန်ကြီးဌာနက ကူညီပံ့ပိုး ဆောင်ရွက်ပေးမယ်ဆိုတော့ သူပြောခဲ့တာအပေါ် ဆရာ့အနေနဲ့ရော ဘယ်လို မှတ်ချက်ပေးချင်ပါလဲ။ 

ဖြေ - ခုနက ပြောသလိုပဲ။ ဒါဟာ ထိန်းချုပ်မှုပဲ။ ထိန်းချုပ်မှု မှန်သမျှကို ဆန့်ကျင်တယ်။ ဘယ် သတင်း မီဒီယာသမား စစ်စစ်၊ ဘယ် Professional မဆို ကိုယ့်လည်ပင်းကိုစွပ်မယ့် ကြိုးကွင်းကို ဘယ်သူမှဝင်ပြီးတော့ ကျစ်မပေးဘူး။ အဲလိုဆိုရင် အဲဒီလူဟာ Professional သတင်းသမားစစ်စစ် မဟုတ်တော့ဘူး။ ဒါကို ဝင်ပြီးတော့ ကြိုးကျစ်တဲ့အထဲမှာ ဝင်ပါတဲ့သူတွေဟာ ခေတ်ပျက်ဂျာနယ်လစ်တွေ၊ သူတို့ အခွင့်အရေးကို မျှော်ကိုးပြီးတော့၊ သူတို့ အကျိုးစီးပွားတစ်ခုအတွက် ဒီထဲမှာ ရောယိမ်းလိုက် ဘသားယိမ်းလိုက် ဝင်ယိမ်းကြတာဟာ ခေတ်ပျက် ဂျာနယ်လစ်တွေပဲ ဖြစ်တယ်။ Professional ဂျာနယ်လစ်တွေ မဟုတ်ဘူး။ 

မေး - ဒါပေမယ့် အဲဒီ Conference မှာ ပြည်ပအခြေစိုက် မီဒီယာ (exile media) တွေလည်း ပါဝင် ဆွေးနွေးခဲ့ကြပါတယ်။ သူတို့ ပြန်ရေးကြတဲ့ သတင်းတွေအရ Conference အပေါ် အကောင်းမြင်ရှုထောင့်က ရေးခဲ့တာ ဖတ်ရပါတယ်။ မတ်လ ၁၉ ရက်နေ့တုန်းက DVB၊ ဧရာဝတီ အပါအဝင် ပြည်ပအခြေစိုက် မီဒီယာ ၁၁ ခုက အစိုးရရေးဆွဲနေတဲ့ မီဒီယာဥပဒေနဲ့ သတင်းမီဒီယာ လွတ်လပ်ခွင့်အတွက် တင်းကြပ်တဲ့ ဥပဒေတွေ ဖျက်သိမ်းပေးဖို့ ကြေညာချက်တစ်ခု ထုတ်ခဲ့ပါတယ်။ ဆရာလည်း သူတို့ ဝက်ဘ်ဆိုက်တွေကို မပြတ်ဖတ်နေတဲ့သူဆိုတော့ ဒီအပေါ်မှာ ဘယ်လို သုံးသပ်ချင်ပါသလဲ။ 

ဖြေ - တချို့တွေက ဆရာနဲ့တွေ့တဲ့အချိန်မှာ ပြောတဲ့စကားက တစ်မျိုးပဲ။ သူတို့ ဝက်ဘ်ဆိုက်မှာ ပြန်ရေးတဲ့အခါကျတော့ တစ်မျိုးပဲ။ သူတို့ ဆရာနဲ့တွေ့တဲ့အချိန်ကျတော့ ဆရာတို့နဲ့ တစ်သဘောတည်း ကိုက်ညီနေတာပဲ။ ပြန်ရေးတဲ့အခါကျမှ အစိုးရက ပွင့်လင်းလာပါပြီ။ ဒီမိုကရေစီ လမ်းစကိုတော့ ခြေလှမ်းနင်းနေပါပြီ။ လျှောက်လှမ်းနေတာ ကျွန်တော်တို့ တွေ့နေရပါပြီ။ ဒါတွေ ပြောတာပဲ။ ဆရာတို့နဲ့ တွေ့တဲ့အခါကျတော့ ဒါတွေ သူတို့ လုံးဝ မယုံဘူးတဲ့။ အပြောင်းအလဲတွေ လုံးဝ မယုံပါဘူး။ ဒီမိုကရေစီလမ်းစ မြင်တယ်ဆိုတာလည်း လုံးဝ သူတို့ မမြင်ပါဘူးလို့ သူတို့ ပြောတာပဲ။ ဒါဟာ သူတို့ ဒီမှာလာပြီးတော့ လုပ်ခွင့်သာဖို့အတွက် အခွင့်အရေး မျှော်ကိုးပြီးတော့ လာပြီးတော့ ရောယောင်နေကြတာပဲ။ ဂျာနယ်လစ် စစ်စစ်တွေ မဟုတ်ပါဘူး။ 

မေး - တစ်ချို့ exile media တွေကို သူတို့ အခြေစိုက်ထားတဲ့ နိုင်ငံက အဲဒီနိုင်ငံထဲမှာ မနေစေချင်တော့ဘဲ မြန်မာပြည်ကိုပြန်ဖို့ တွန်းအားပေးတာတွေ ရှိတယ်လို့ သိရပါတယ်။ ဒါ့အပြင် တစ်ချို့တွေဆိုရင်လည်း ထောက်ပံ့ထားတဲ့ အဖွဲ့အစည်းတွေက အထောက်အပံ့ပေးတာတွေ ရပ်ဆိုင်းလိုက်တယ်။ ထပ်ပြီး ရပ်ဆိုင်းခံရမယ့် အခြေအနေတွေ ရှိနေတယ်လို့လည်း သိနေရပါတယ်။ နောက်ပြီး အခုလုပ်ခဲ့တဲ့ Conference ကို နော်ဝေအစိုးရက ထောက်ပံ့ ကူညီပေးတယ်ဆိုတဲ့ အသံတွေလည်း အပြင်မှာ ကြားရပါတယ်။ ဘယ်လိုပဲဖြစ်ဖြစ် ဒီလပိုင်းတွေမှာ မြန်မာနိုင်ငံထဲ ပြန်ဝင်ဖို့ လုပ်လာတဲ့ exile media တွေနဲ့ပတ်သက်ပြီး သုံးသပ်မှုတွေကတော့ လှုပ်လှုပ်ခတ်ခတ် ရှိခဲ့ပါတယ်။ exile media တွေနဲ့ နှစ်ပေါင်းများစွာ ထိတွေ့ ပြောဆိုမှုတွေရှိနေခဲ့တဲ့ ဆရာ့ဆီမှာရော ဘယ်လိုအမြင်မျိုး ရှိနေမလဲ။ 

ဖြေ - ဒီလူတွေက ဒီမှာ အစိုးရ၊ အခု ပြန်ကြားရေးဝန်ကြီးဌာနနဲ့ ပေါင်း၊ ပြန်ကြားရေးဝန်ကြီးဌာနရဲ့ ခွင့်ပြုချက်နဲ့ သတင်းဌာနတွေ ထူထောင်မယ်၊ သတင်းစာတွေ ထုတ်ခွင့်တောင်းမယ်ဆိုခဲ့ရင် ဒါဟာ သူတို့ကလည်း အခွင့်အရေး မျှော်ကိုးပြီးလုပ်တဲ့ သတင်းသမားလို့ပဲ သတ်မှတ်ရမှာပေါ့။ ပြည်တွင်းမှာတောင်မှ ဘယ်သူမှ လွတ်လွတ်လပ်လပ် သတင်းစာတွေ ထုတ်ခွင့် မပေး၊ ဂျာနယ်တွေ ထုတ်ခွင့်မပေးတာကို သူတို့က ဒီအခွင့်အရေးကို ရအောင်ယူချင်တယ် ဆိုတာကိုက ဒါဟာ မမှန်ကန်တဲ့လုပ်ရပ်ပဲ။ သိက္ခာရှိသတင်းသမားဆိုရင် ဒါမျိုးဘယ်တော့မှ မလုပ်ဘူး။ ကောင်းတဲ့ ဂျာနယ်လစ်တွေ ရှိပါတယ်။ ကောင်းတဲ့ နိုင်ငံရေးသမားတွေလည်း ရှိပါတယ်။ သတင်းသမား ပီသအောင် ကြိုးစားနေတဲ့ လူငယ်တွေလည်း ရှိပါတယ်။ မရှိဘူးလို့ မဟုတ်ဘူး။

မေး - DVB မှာ ဖော်ပြခဲ့တဲ့ အင်တာဗျူးမှာတော့ မြန်မာနိုင်ငံထဲကို ပြည်ပမီဒီယာတွေ လာခွင့်ပေးပြီး အခုလုပ်နေတဲ့ လုပ်ငန်းစဉ်တွေမှာ ပါတနာအနေနဲ့ ပါလာတာဟာ တိုးတက်မှုတစ်ခု ဖြစ်တယ်။ ဒီပါတနာဆိုတဲ့ကိစ္စရပ်ကို ပြန်ကြားရေး ဝန်ကြီးဌာန ညွှန်ကြားရေးမှူးချုပ် ဦးရဲထွဋ်က သူပြောတဲ့အထဲမှာ ထည့်ပြောသွားတယ်လို့ ဖော်ပြခဲ့ပါတယ်။ ဆရာကရော တိုးတက်မှုလို့ ယူဆပါသလား။ 

ဖြေ - တိုးတက်မှုလို့ မယူဆပါဘူး။ တစ်ဖက်က ဒီမိုကရေစီနိုင်ငံ တည်ဆောက်နေပြီလို့ ပြောလာခဲ့တာ တစ်နှစ်ရှိပြီ။ ဒီမိုကရေစီနိုင်ငံ တည်ဆောက်နေတယ်ဆိုရင် လူတွေ လွတ်လပ်စွာ ဝင်ထွက်သွားလာ လုပ်ကိုင်နေခြင်းဟာ အဆန်းမဟုတ်ပါဘူး။ ဘာတိုးတက်မှုမှ မဟုတ်ပါဘူး။ 

မေး - နှစ်ငါးဆယ်လုံးလုံး အလွန်အကျွံ ဖြစ်ခဲ့မှုတွေကို ရှောင်ကြဉ်လိုကြောင်း ဦးရဲထွဋ်က Conference မှာပြောခဲ့တယ်လို့ မဇ္ဈိမသတင်းမှာ ရေးထားပါတယ်။ လက်ရှိဖြစ်နေတဲ့ အနေအထားတွေအရ နှစ်ငါးဆယ်လုံး အလွန်အကျွံ ဖြစ်ခဲ့တာတွေကို ပြန်ကြားရေး ဝန်ကြီးဌာနက ရှောင်ကြဉ်သွားမယ်ဆိုတာ ဖြစ်နိုင်ပါ့မလား။ 

ဖြေ - လုံးဝ မဖြစ်နိုင်ပါဘူး။ နှစ် ၅၀ အတွေ့အကြုံ၊ နှစ် ၅၀ အတွေ့အကြုံအရ လုံးဝ မဖြစ်နိုင်ပါဘူး။ 

မေး - ဘာ့ကြောင့်လို့ ဆရာထင်သလဲ။ 

ဖြေ - ဘာကြောင့်လဲဆိုရင် ဦးရဲထွဋ်က ဘယ်သူလဲ။ စစ်ဗိုလ်က လာတဲ့လူ၊ ပြန်ကြားရေးဝန်ကြီးက ခိုင်းလို့ဆိုရင် ခိုင်းတဲ့အတိုင်း လုပ်မှာပဲ။ ပြန်ကြားရေးဝန်ကြီးက ဘယ်သူလဲ။ ခိုင်းရင် ခိုင်းတဲ့အတိုင်း လုပ်မှာပဲ။ သူယုံတာ လုပ်လို့ မရဘူး။ သူယုံကြည်ရာ ပြောလို့ မရဘူး။ ဒီသဘာဝတရားကြီးက ပျောက်မသွားပါဘူး။ အခု လက်ရှိအတိုင်းလည်း ရှိနေတာပဲ။ ရှိနေတဲ့အတွက် ဒီအစိုးရ ဒီပုံစံအောက်မှာ လုံးဝ မဖြစ်နိုင်ဘူး။

အမေရိကန်နိုင်ငံတို့၊ အင်္ဂလန်နိုင်ငံတို့ ဒီမိုကရေစီ နိုင်ငံကြီးတွေမှာ ပြန်ကြားရေး ဝန်ကြီးဌာနဆိုတာ လုံးဝ မရှိဘူး။ မီဒီယာ ဥပဒေဆိုတာ မပြောနဲ့တော့။ ပြန်ကြားရေး ဝန်ကြီးဌာနဆိုတာကို မရှိဘူး။ စင်ကာပူလိုနိုင်ငံမှာ ထိုင်ဝမ်လိုနိုင်ငံမှာတော့ ရှိမှာပေါ့။ စင်ကာပူလိုနိုင်ငံက ဒီမိုကရေစီနိုင်ငံမှ မဟုတ်တာပဲ။ ဒီမိုကရေစီ နိုင်ငံစစ်စစ်တွေမှာ ပြန်ကြားရေး ဝန်ကြီးတောင် မရှိပါဘူး။ မီဒီယာ ဥပဒေရှိဖို့ဆိုတာ ထားတော့။ ရုပ်ရှင်ဆင်ဆာဆိုတာ ရုပ်ရှင်သမားတွေက သူတို့ဖာသာသူတို့ ဖွဲ့ထားတဲ့ အဖွဲ့အစည်းကနေပြီးတော့ rating သတ်မှတ်ပြီးတော့ ပေးတာပဲ ရှိတယ်။ ဆင်ဆာလုပ်တယ်ဆိုတာ မရှိဘူး။

မေး - အီလက်ထရောနစ် ဥပဒေဟာ မီဒီယာသမားတွေအတွက် အန္တရာယ်အရှိဆုံး ဥပဒေ ဖြစ်နေပါတယ်။ ဒီနေ့ခေတ်မှာ အိုင်တီနဲ့ ကင်းနိုင်တဲ့သူလည်း မရှိပါဘူး။ ဒီလို ဥပဒေကို မဖျက်ဘဲ မီဒီယာ ဥပဒေပါ ထပ်လုပ်လာတော့ ပိုပြီးကြပ်ဖို့ဆိုတဲ့ အမြင်တွေ ရှိပါတယ်။ အီလက်ထရောနစ် ဥပဒေအပေါ်မှာ ဆရာ ဘယ်လိုမြင်လဲ။ 

ဖြေ - ဆရာလုပ်ခဲ့ဖူးတော့ ဆရာ့တပည့်တွေက ကမ္ဘာအနှံ့ ရှိတယ်။ ရှိနေတော့ တပည့်တွေနဲ့ ဆရာနဲ့က အီးမေးလ်နဲ့ စကားပြောကြတာ ရှိတယ်။ အီးမေးလ် ပို့ကြတယ်။ တစ်ယောက်နဲ့တစ်ယောက် အပြန်အလှန်၊ သူတို့ ဖတ်စေချင်တဲ့ ဆောင်းပါးတစ်ပုဒ်တွေ့ရင် အဲဒီဆောင်းပါးကို အီးမေးလ်က ပို့ပေးလိုက်တယ်။ သူတို့ကလည်း သူတို့ဖတ်စေချင်တဲ့ ဆောင်းပါးလေးတွေ ဆရာဖတ်ဖို့ဆိုပြီး ပို့ပေးတယ်။ ဒါတွေကိုပဲ အီလက်ထရောနစ်ဥပဒေနဲ့ အရေးယူလို့ ရတယ်။ လက်ရှိ တည်ဆဲ ဥပဒေအရ၊ ရှေ့မှာလည်း ဒါတွေနဲ့ အရေးယူခံခဲ့ရသူတွေ ရှိတယ်။ အဲတာကြောင့် ဒီဥပဒေ မှန်သမျှကို ဆရာက ဆန့်ကျင်တယ်။ ဥပဒေဆိုတာ ဘယ်ဥပဒေမှကို မကောင်းဘူး။ ကောင်းတဲ့ ဥပဒေဆိုတာ ရှိကို မရှိဘူး။ ပြည်သူလူထုကို တိုင်းသူပြည်သားကို ချုပ်ကိုင်ဖို့ပဲ။ သို့သော်လည်း မရှိမဖြစ်တဲ့အတွက် မရှိမဖြစ်တာတွေကိုတော့ ထားရမယ်။ ဒါဟာ ထားရမယ်။ 

ပြည်သူလူထုကို ကာကွယ်စောင့်ရှောက်ဖို့ထားတာပဲ ဖြစ်ရမယ်။ ပြည်သူလူထုကို ဖိနှိပ်ချုပ်ချယ်ဖို့ ထားတာ မဖြစ်စေရဘူး။ အခုရှိနေတဲ့ မီဒီယာဥပဒေ အပါအဝင် အီလက်ထရောနစ် ဥပဒေတို့ ဘာတို့ အစိုးရကို အကြည်ညိုပျက်စေတဲ့တို့ စတဲ့ ဥပဒေတွေ အားလုံးကတော့ ပြည်သူတွေကို ဖိနှိပ်ချုပ်ချယ်တဲ့ ဥပဒေတွေ ဖြစ်တယ်။ ဒါကြောင့် လုံးဝကို ကန့်ကွက်တယ်။ တကယ်တန်း ဒီမိုကရေစီနိုင်ငံဖြစ်ချင်လို့ဆိုရင် ပြန်ကြားရေး ဝန်ကြီးဌာနပါ ဖျက်ပစ်လိုက်ပါ။ ဒါမှ ဒီမိုကရေစီ နိုင်ငံစစ်စစ် ဖြစ်မယ်။ ပြန်ကြားရေး ဝန်ကြီးဌာနဆိုတာ ရှိနေသရွေ့ကို ဒီမိုကရေစီနိုင်ငံလို့ မခေါ်နိုင်ဘူး။ 

မေး - ပြီးခဲ့တဲ့ နှစ်ရက်မှာ ပြုလုပ်ခဲ့တဲ့ Conference နဲ့ ပတ်သက်လို့ ဘာများဖြည့်စွက် ပြောချင်ပါသေးလဲ ဆရာ။ 

ဖြေ - ဒီပေါ်မှာတော့ အသေးစိတ်တွေတော့ မသိရဘူးပေါ့။ ဒီအစည်းအဝေးလည်း မတက်ရဘူး။ ဘာတွေ ဆွေးနွေးတယ် ဆိုတာကိုလည်း အသေးစိတ် မကြားရဘူး၊ မသိရဘူး။ အသေးစိတ်တွေတော့ မပြောချင်ဘူး။ သို့သော် ယေဘူယျ ခြုံပြောရမယ်ဆိုလို့ရှိရင် ဒီ Conference မှာ ပြည်ပကနေလာပြီး စာတမ်းဖတ်တဲ့ နိုင်ငံခြားသားတွေနဲ့ တွေ့ရတာလည်း ရှိပါတယ်။ ခြုံပြီးတော့ပြောမယ်ဆိုရင်တော့ ခေါင်းစဉ်က Media Development in Myanmar၊ စာတမ်းဖတ်သွားတဲ့ ပုဂ္ဂိုလ်တွေကလည်း Media Development in Myanmar ဆိုတဲ့အကြောင်းပဲ ဖတ်သွားကြတာပဲ။ အဲဒီတော့ ဒီမီဒီယာ ဥပဒေဆိုတဲ့ဟာက ပြန်ကြားရေး ဝန်ကြီးဌာနက နောက်ဖေးပေါက်က ဆွဲသွင်းလာတဲ့ဟာပဲ။ ပြောရလို့ရှိရင်တော့ ဝက်ခေါင်းချိတ်ပြီး ခွေးသားရောင်းတဲ့ပုံမျိုးဖြစ်နေတယ်။ ဒါကြောင့် ဒါ ဝက်ခေါင်းမှန်း၊ ခွေးသားမှန်း သိတဲ့အတွက် ဒီ ခွေးသားကို လုံးဝ မဝယ်နိုင်ဘူး။ 

တစ်ခွန်းပဲ ပြောချင်တယ်လေ။ မီဒီယာ ဖွံ့ဖြိုးတိုးတက်စေချင်တဲ့စေတနာ ပြန်ကြားရေးဝန်ကြီးမှာ အမှန်တကယ်ရှိလို့ဆိုရင် ရှိနေတဲ့ဥပဒေတွေကိုပဲ ရုတ်သိမ်းပေးလိုက်ပါ။ နောက်ထပ် မလုပ်ပါနဲ့တော့။ ဒီထက်ပိုပြီးတော့ ဒီမိုကရေစီ နိုင်ငံစစ်စစ်အဖြစ်နဲ့ အခေါ်ခံချင်လို့ရှိရင် ပြန်ကြားရေးဝန်ကြီးဌာနပါ ဖျက်သိမ်းပစ်လိုက်ပါ။ ဒါ နောက်ဆုံးပေးချင်တဲ့ အကြံဉာဏ်ပါ။

Eleven Media Group မှ ပြန်လည်ကူးယူ ဖော်ပြပါတယ်။