နိုင်ငံရေးအကြားမှ စာပေအနုပညာ
ထိန်လင်း
စာပေအနုပညာသမားတွေဟာ သူတို့ဖြတ်သန်းကြတဲ့ခေတ်တွေကို ထင်ဟပ်စေတဲ့ပုဂ္ဂိုလ်တွေဖြစ်သလို အဲဒီခေတ်တွေရဲ့ အခြေအနေ အဖြစ်အပျက်တွေကို ရင်ဆိုင်ဖြတ်သန်းရသူတွေ ဖြစ်ပါတယ်။ ဒီလိုဖြတ်သန်းရတဲ့အခါ အဖြစ်အပျက်တွေ အထူးသဖြင့် ကြမ်းတမ်းတဲ့အနေအထားတွေကို ကြံ့ကြံ့ခံ ရင်ဆိုင်ခဲ့သူတွေရှိသလို အလိုက်သင့်မျောပါသူတွေ၊ နေသာသလို နေသူတွေလည်း အများကြီးရှိပါတယ်။ ဘယ်သူဟာ ဘယ်လိုပုဂ္ဂိုလ်မျိုးလဲ ဆိုတဲ့အဖြေကိုတော့ ဆိုးဝါးတဲ့ နိုင်ငံရေးအခြေအနေတွေအောက်မှာ ကွက်ကွက်ကွင်းကွင်း ပေါ်လွင်စေပါတယ်။
မြန်မာပြည်ဟာ အင်္ဂလိပ်ရဲ့လက်အောက်၊ ဂျပန်လက်အောက်၊ မြန်မာအမျိုးသား အာဏာရှင်တွေရဲ့ လက်အောက်ကို အဆင့်ဆင့်ကျရောက်ခဲ့တာ အားလုံးသိပြီးဖြစ်ပါတယ်။ ဒီအခါ မျိုးချစ်စိတ်ဓာတ်ဆိုတာတွေ၊ မျိုးချစ်ပုဂ္ဂိုလ်ဆိုတာတွေလည်း သမိုင်းရဲ့လိုအပ်ချက်နဲ့အညီ ထွက်ပေါ်လာတာပါပဲ။ စာပေအနုပညာဘက်က ဆိုရင်လည်း တခြားနယ်ပယ်တွေထက် နောက်မကျဘဲ အမြဲတမ်း ခေတ်ရဲ့လိုအပ်ချက်ကို ဖြည့်ဆည်းနိုင်ခဲ့ကြတာချည်းပါပဲ။ ဒါပေမယ့် နိုင်ငံရေးလွတ်လပ်ရင် လွတ်လပ်သလောက်၊ အခွင့်အလမ်းရရင် ရသလောက် တိုင်းပြည်အတွက်၊ ပြည်သူအတွက် တာဝန်ကျေတဲ့ စာပေအနုပညာသမားတွေရှိသလို ခေတ်ဆိုးရင် ဆိုးသလောက် ပြည်သူဘက်က ရပ်တည်ဖို့ မဝံ့ရဲသူတွေလည်း ရှိပါတယ်။ ဘယ်လိုပဲဖြစ်ဖြစ် သမိုင်းဆိုတာက မြစ်ရေလိုပဲ အမြဲတမ်းစီးဆင်းဖြစ်ပေါ်နေတာမို့ ခေတ်ကိုဖြတ်သန်းကြသူတွေအနေနဲ့ ဘယ်ပုံဘယ်နည်း ဖြတ်သန်းကြတယ်ဆိုတာ အချိန်ကမှတ်တမ်းတင်နေမှာ ဖြစ်ပါတယ်။
လွတ်လပ်ရေးရပြီးလို့ ကိုယ့်အမျိုးသားအစိုးရ တက်လာပေမယ့် စာပေအနုပညာရှင်တွေအပေါ် ဖိနှိပ်မှုတွေတော့ ရှိတာပါပဲ။ ဆရာ ဗန်းမော်တင်အောင်၊ လူထုဦးလှ၊ ဂျာနယ်ကျော်မမလေး တို့ဟာ ဖဆပလခေတ်မှာ အဖမ်းခံခဲ့ရသူတွေဖြစ်ပြီး အကျဉ်းထောင် လွတ်လပ်ခွင့်ရှိခဲ့တဲ့အတွက် ထောင်ထဲမှာ စာအုပ်တွေ ရေးသားခဲ့သူတွေဖြစ်ပါတယ်။ စာပေပညာရှင်ဆိုတာ ဘယ်လိုအခြေအနေမျိုးပဲဖြစ်ဖြစ် ကိုယ့်ရဲ့ကလောင်ကို ရှင်သန်နေစေရမယ်ဆိုတဲ့သဘော ပြသခဲ့တာဖြစ်ပါတယ်။
အိမ်စောင့်အစိုးရကနေ၊ တော်လှန်ရေးကောင်စီ၊ အဲဒီကနေ မဆလခေတ် အားလုံး တဆင့်ပြီးတဆင့် နိုင်ငံရေးဖြစ်စဉ်နဲ့ ဖြတ်သန်းလာသလိုပဲ နိုင်ငံရေးစာပေ၊ နိုင်ငံရေးနဲ့ဆက်နွယ်ပတ်သက်တဲ့ အနုပညာတွေအားလုံးက အာဏာပိုင်တွေရဲ့ စောင့်ကြည့်မှုအောက်မှာ တွန်းထိုးရှင်သန်လာခဲ့ရပါတယ်။ ဒီလိုကာလတွေအတွင်းမှာပဲ စာပေစိစစ်ရေး၊ ရုပ်ရှင် ဆင်ဆာအဖွဲ့၊ ဗီဒီယိုဆင်ဆာအဖွဲ့တွေ ပေါ်ပေါက်လာပြီး စာတစ်လုံး၊ စကားတစ်ခွန်းက အစ လိုက်လံအပြစ်ရှာတာတွေ၊ ပြင်တာ ဖြုတ်တာတွေ လုပ်ခဲ့ပါတယ်။ ရုပ်ရှင်ကားတစ်ခုရဲ့ ဇာတ်ညွှန်းခွင့်ပြုဖို့ အကြိမ်ကြိမ် တင်ပြခဲ့ရတာတွေရှိတဲ့အပြင်၊ နိုင်ငံရေးနဲ့ ဘာမှမဆိုင်တဲ့အရာတွေကိုလည်း ဖြုတ်ပစ်တာတွေရှိခဲ့တဲ့အကြောင်း ဒါရိုက်တာ ဝင်းဖေက ပြောပြဖူးပါတယ်။
ဂီတ ဆိုရင်လည်း ဒီလိုပါပဲ။ သီချင်းစာသားတွေကို ခွင့်ပြုချက်တင်ရပြီး သီချင်းထဲမှာပါတဲ့ အသုံးအနှုန်းတွေကို ပုံနှိပ်ဖော်ပြတဲ့အခါ တခြားစကားလုံးနဲ့ အစားထိုးပြီး ရိုက်နှိပ်စေတာမျိုးတောင် ရှိပါတယ်။ ဥပမာအားဖြင့် ကျော်ဟိန်းရဲ့ သီချင်းတစ်ပုဒ်မှာ ‘ဒိုးရတော့မယ် အချစ်ရယ်’ လို့ ‘ဒိုးတယ်’ဆိုတဲ့ ဘန်းစကားကို ထည့်ပြီးဆိုထားပေမယ့် သီချင်းစာသားမှာတော့ ‘ဒိုးရတော့မယ်’ အစား ‘သွားရတော့မယ် အချစ်ရယ်’ လို့ ဖော်ပြရပါတယ်။ ဒီလိုပဲ ကိုင်ဇာရဲ့ သီချင်းတစ်ပုဒ်မှာ ‘အသည်းကွဲ တိုးရစ်စ်ကြီး’ လို့ ထည့်ပြီးဆိုထားပေမယ့် စာသားထဲမှာ ‘အသည်းကွဲ ခရီးသည်ကြီး’လို့ ပုံနှိပ်ရပါတယ်။
၈၈ ဒီမိုကရေစီအရေးတော်ပုံပြီးလို့ စစ်တပ်ရဲ့ အုပ်ချုပ်မှုအောက်ကို ရောက်တဲ့အခါမှာတော့ စာပေအနုပညာသမားတွေရဲ့ အဖိနှိပ်ခံရမှုဟာ ပိုပြီးကြီးထွားခဲ့ပါတယ်။ ရုပ်ရှင်သရုပ်ဆောင်များဖြစ်တဲ့ မင်းသားကြီး ထွန်းဝေ၊ အကယ်ဒမီ အေးအေးသင်း၊ ဟာသမယ် မသန်းရွှေ တို့ကို အနုပညာဖန်တီးခွင့် ပိတ်ပင်ခဲ့သလို စာပေ၊ ဂီတနယ်ပယ်ကသူတွေကိုလည်း မထင်ရင်မထင်သလို နာမည်ဖော်ပြခွင့်တောင် ပိတ်ပင်ပစ်တတ်ပါတယ်။ မင်းသားကြီး ဦးထွန်းဝေဟာ ၂ဝဝ၅ ခုနှစ် သြဂုတ်လ ၁၃ ရက်နေ့မှာ ကွယ်လွန်ခဲ့ပါတယ်။ ၂ဝဝ၆ ခုနှစ်မှာထုတ်ဝေတဲ့ မြန်မာ့စွယ်စုံကျမ်းနှစ်ချုပ်ရဲ့ ‘ကွယ်လွန်သူ ထင်ရှားသောပုဂ္ဂိုလ်များ’ ကဏ္ဍမှာ ၁ နှစ်အတွင်း နာမည်ကြီး ကွယ်လွန်သူတွေရဲ့စာရင်း ထည့်ပေးထားပြီး အဲဒီထဲမှာ ဦးထွန်းဝေ နာမည်ကို ဖော်ပြထားပါတယ်။ ဒါပေမယ့်လည်း လူပုဂ္ဂိုလ်တစ်ဦးချင်းရဲ့ အတ္ထုပ္ပတ္တိကို ဖော်ပြတဲ့နေရာမှာတော့ တခြားသူတွေရဲ့အကြောင်းသာ ဓာတ်ပုံတွေနဲ့တကွ ပြည့်ပြည့်စုံစုံဖော်ပြထားပြီး ဦးထွန်းဝေအကြောင်းကိုတော့ ချန်လှပ်ထားခဲ့ပါတယ်။ ဒါဟာ လူထုဘက်က ရပ်တည်ခဲ့သူတွေအတွက် စစ်အစိုးရရဲ့ ဒါမှမဟုတ် စစ်အစိုးရဘက်တော်သားတွေရဲ့ ကလဲ့စားချေမှုတွေပါပဲ။
၂ဝဝ၁ ခုနှစ်လောက်တုန်းက စစ်အစိုးရရဲ့ ပြန်ကြားရေး ဒုဝန်ကြီးဆိုတဲ့ စစ်အရာရှိကြီးတစ်ယောက်က စာနယ်ဇင်းသမားတွေ၊ ပုံနှိပ်ထုတ်ဝေသူတွေနဲ့ တွေ့ဆုံပါတယ်။ သူက စာပေသမားတွေနဲ့ တရင်းတနှီး ဆွေးနွေးချင်လို့ ဒီလို စီစဉ်တဲ့အကြောင်းကိုပြောပြီး လိုအပ်ချက်တွေ အခက်အခဲတွေကို ပြောပါလို့ ဆိုလာပါတယ်။ အဲဒီအခါ တစ်ယောက်ပြီး တစ်ယောက်ပြောကြတဲ့ လိုအပ်ချက်တွေက အများကြီးပါ။ အဲဒီအထဲမှာ စာအုပ်တိုက်တစ်ခုက ပိတ်ထားတဲ့ သူ့ရဲ့ ထုတ်ဝေခွင့်ကို ပြန်ချပေးဖို့တောင်းဆိုပြီး၊ အတ္ထုပ္ပတ္တိ စာရေးဆရာကြီး တစ်ယောက်ကတော့ ထုတ်ဝေခဲ့ဖူးတဲ့ ရဲဘော်သုံးကျိပ်နဲ့ပတ်သက်တဲ့ သူ့စာအုပ်ကို ပြန်လည်ထုတ်ဝေခွင့်ပေးဖို့ တင်ပြပါတယ်။ ဒီအခါ စာပေသမားတွေကို ရင်းရင်းနှီးနှီး ဆက်ဆံချင်ပါတယ်ဆိုတဲ့ အဲဒီလူကြီးမင်းက အားလုံး မကြာခင် အဆင်ပြေမယ့်အကြောင်း ဖြေကြားပါတယ်။ အခုဆိုရင် ၈ နှစ်နီးပါး ရှိသွားပါပြီ။ ဒါပေမယ့် အဲဒီတောင်းဆိုချက် ၂ ခုလုံး ဘာမှဖြစ်မလာပါဘူး။
အမျိုးသားဒီမိုကရေစီအဖွဲ့ချုပ် (အန်အယ်ဒီ) က ထုတ်ဝေတဲ့ စာဆိုတော်နေ့အမှတ်တရ ကဗျာစာအုပ်မှာ စာမူပါခဲ့လို့ ကလောင်အပိတ်ခံခဲ့ရတဲ့ ကလောင်ရှင်တွေ၊ ဒေါ်အောင်ဆန်းစုကြည်ရဲ့ခြံထဲမှာ အနုပညာ တင်ဆက်ခဲ့လို့ ဖမ်းဆီးထောင်ချပြီး အပြင်မှာ အနုပညာလုပ်ကိုင်ခွင့် ပိတ်ပင်ခံခဲ့ရတဲ့ လူရွှင်တော်ပါပါလေး တို့လို အနုပညာသည်တွေ၊ အန်အယ်ဒီ ရုံးမှာ စာပေဟောပြောခဲ့လို့ ကလောင်အပိတ်ခံရတဲ့ ဆရာ နန်းညွန့်ဆွေ၊ ဆရာ ကြည်အောင်၊ ဆရာ ကိုလေး (အင်းဝဂုဏ်ရည်) တို့လို စာပေပညာရှင်တွေဟာ လက်ရှိစစ်အစိုးရ လက်ထက်မှာ များပြားလှပါတယ်။ ဒီအချက်က နိုင်ငံရေးအခြေအနေ အကောင်းအဆိုးတွေအောက်မှာ စာပေနဲ့ အနုပညာသမားတွေ ဘယ်လိုရှင်သန်နေရတယ်ဆိုတာ ထင်ရှားစေတဲ့အချက်ပဲဖြစ်ပါတယ်။ ဘယ်လိုပဲဖြစ်ဖြစ် ဒီလို ပုဂ္ဂိုလ်တွေဟာ ဆိုးဝါးတဲ့အခြေအနေတွေကို အံတုရင်း သူတို့ကိုယ်တိုင် သမိုင်းမှတ်တိုင် စိုက်ထူနေသူတွေပဲ ဖြစ်ပါတယ်။ ။
၁၇၊ ၁၂၊ ၂ဝဝ၈
No comments:
Post a Comment