“ပြည်သူလူထုဟာ တပ်မတော်ရဲ့ အမိ၊ တပ်မတော်ရဲ့ အဖ ဖြစ်တယ်။ ပြည်သူလူထုအပိုင်းမှာ တပ်မတော်သားတွေကို ပြန်ပြီး ချစ်ခင်ကြည်ညို ယုံကြည်လာအောင် လုပ်တဲ့နေရာမှာ တပ်မတော်သားတွေကလည်း ပြည်သူသည်အမိ ပြည်သူသာအဖဆိုတဲ့ အတွေးအခေါ် ပြန်ဝင်အောင်လုပ်ဖို့ အဲဒါတွေကိုပဲ လုပ်ဖို့ပဲ။ ကျနော်က အသက်အရွယ်ရလာပြီမို့လို့ ဝင်ပြီးအရွေးခံတော့မှာ မဟုတ်ပါဘူးခင်ဗျ …”
အမျိုးသားဒီမိုကရေစီအဖွဲ့ချုပ်က ၂၀၁၁ နိုဝင်ဘာ ၁၈ ရက်နေ့စွဲနဲ့ အထူးကြေညာချက်အမှတ် ၁/၁၁/၁၁ကို ထုတ်ပြန်ခဲ့တာမှာ အမျိုးသားဒီမိုကရေစီအဖွဲ့ချုပ်ဟာ နိုင်ငံရေးပါတီများ မှတ်ပုံတင်ခြင်းဥပဒေနဲ့အညီ မှတ်ပုံတင်ပြီးတော့ နောင်လာမယ့် ရွေးကောက်ပွဲတွေမှာ ပါဝင်ယှဉ်ပြိုင်မယ်လို့ ဖော်ပြပါရှိပါတယ်။
အမျိုးသားဒီမိုကရေစီအဖွဲ့ချုပ်နဲ့ ညီနောင် ပါတီဖြစ်တဲ့ အမျိုးသားဒီမိုကရေစီပါတီတို့ရဲ့ အလားအလာတချို့နဲ့ပတ်သက်ပြီး အဖွဲ့ချုပ်ရဲ့ ဒုတိယဥက္ကဋ္ဌ အငြိမ်းစား ဗိုလ်ချုပ်ကြီး သူရဦးတင်ဦးကို ဆက်သွယ်မေးမြန်းပြီး ဒီသီတင်းပတ် တပ်မှူးတပ်သား ပြောစကားကဏ္ဍမှာ ဆွေးနွေး တင်ဆက်ထားပါတယ်။
ဦးရော်နီညိမ်း ။ ။ ဒီကနေ့ အမျိုးသားဒီမိုကရေစီအဖွဲ့ချုပ်က အထူးကြေညာချက်အမှတ် ၁/၁၁/၁၁ကို ထုတ်ပြန်ခဲ့တော့ အန်ကယ့်အနေနဲ့ အဖွဲ့ချုပ်ရဲ့ ဒုတိယဥက္ကဋ္ဌအနေနဲ့ ပြောသင့်ပြောထိုက်တာ ပြောနိုင်တာလေးတွေကို ပြောပြပေးဖို့ ရှေးဦးစွာ မေတ္တာရပ်ခံလိုပါတယ်။ ပထမဦးဆုံး သိချင်တာက ဒီကနေ့ ကျင်းပတဲ့ ဗဟိုဦးစီးအဖွဲ့ရဲ့ အစည်းအဝေးကို၊ ဥက္ကဋ္ဌကြီး ဦးအောင်ရွှေ တက်ရောက်ပါသလား ခင်ဗျ။
ဦးတင်ဦး ။ ။ သူ့ကိုတော့ ဖိတ်ကြားပါတယ်။ ဒါပေမယ့် သူက အသက်က ကြီးမားနေပြီးတော့ ကျန်းမာရေးက ချို့တဲ့နေတာကြောင့် သူက အခုလို ဖိတ်တာကို အင်မတန် ကျေးဇူးတင်ဝမ်းမြောက်ကြောင်း သို့သော် ကျန်းမာရေးအရ မတက်နိုင်ခြင်းကို ခွင့်ပြုဖို့အကြောင်း အခု လက်ရှိဆောင်ရွက်နေတဲ့ နောင်ဆောင်ရွက်မယ့်ကိစ္စတွေကို ဆွေးနွေးမယ့် ဗဟိုဦးစီး အဖွဲ့ဝင်တွေရဲ့ အစည်းအဝေးကို ထမြောက်အောင်မြင်အောင် လုပ်ဆောင်နိုင်တာနဲ့ ဒေါ်အောင်ဆန်းစုကြည် ရှေ့ဆက်လုပ်မယ့် ကိစ္စအဝဝအတွက် ဆုမွန်ကောင်းတောင်းတယ်ဆိုတဲ့ သ၀ဏ်လွှာကိုတော့ ပေးပို့ပါတယ်။
ဦးရော်နီညိမ်း ။ ။ အဲဒီတော့ ဗဟိုဦးစီးအဖွဲ့က ဒီလောက်အရေးကြီးပြီး ဒီကနေ့ ဆုံးဖြတ်မယ့်ကိစ္စကိုကော အဖွဲ့ချုပ်ရဲ့ တာဝန်အရှိဆုံးဥက္ကဋ္ဌအနေနဲ့ သူ့ရဲ့ဆန္ဒကိုကော ကြိုတင်ပေးပို့ထားတာ ရှိပါသလား ခင်ဗျ။
ဦးတင်ဦး ။ ။ အဲဒီလို မရှိပါဘူးခင်ဗျာ။ သူကလည်းပဲ အနားယူတာလိုဖြစ်နေပြီးတော့ ရှိသမျှကိစ္စအဝဝကို ဆောင်ရွက်စရာရှိတာကို ကျနော်ကပဲ ညှိနှိုင်းပြီးတော့ အဖွဲ့ချုပ်မှာ ဆောင်ရွက်နေတာတွေကို ကျနော်က သူ့ကို ပြောပြပါတယ်။ သူကတော့ ဘာမှ ဘယ်လို လုပ်ကိုင်ဆောင်ရွက်ပါဆိုတာကို မပြောတော့ပါဘူး။ အဲဒါကြောင့် အခုလို ဖိတ်တာကို ဝမ်းမြောက်ကြောင်းနဲ့ ဆက်လုပ်မယ့်ကိစ္စအဝဝတွေ အောင်မြင်ဖို့ ဆုမွန်ကောင်း တောင်းတယ်ဆိုတဲ့ သဝဏ်လွှာကို ပို့လိုက်တာပါ။
ဦးရော်နီညိမ်း ။ ။ ဒီလိုပါ၊ အန်ကယ်တို့ NLD က ဒီကနေ့ထုတ်တဲ့ ကြေညာချက်ထဲမှာ၊ အားလုံးပေါင်း ကိုယ်စားလှယ် ၁၁၆ ဦးရှိတဲ့အထဲက ၁၀ ဦး ပျက်ကွက်တဲ့အထဲမှာ ဦးအောင်ရွှေလည်းပါနေတော့ တာဝန်ရှိ ပါတီဥက္ကဋ္ဌအနေနဲ့ ဒီနေ့ ဗဟိုဦးစီးအဖွဲ့အစည်းအဝေးမှာ သူသည် ဒီကနေ့ ဆုံးဖြတ်ချက်ကို ကန့်ကွက်သလား၊ သဘောတူသလား (သို့မဟုတ်) ကြားနေသလားဆိုတာကို မသိရလို့ပါ။
ဦးတင်ဦး ။ ။ သူက အဖွဲ့ချုပ် ရပ်တည်ရေးဆိုတာကို၊ ဟိုးနဂိုမူလတုန်းကတည်းက စေတနာရှိခဲ့ပါတယ်။
ဦးရော်နီညိမ်း ။ ။ သူကနေ ဗဟိုဦးစီးအဖွဲ့ရဲ့ ဒီကနေ့ဆုံးဖြတ်ချက်ကို မကန့်ကွက်ဘူးလို့၊ ယူဆလို့ရတယ်ပေါ့။
ဦးတင်ဦး ။ ။ မရှိပါဘူး၊ သူက ဘာမှ မကန့်ကွက်ပါဘူး။
ဦးရော်နီညိမ်း ။ ။ အန်ကယ်တို့ ဒီကနေ့ ဆုံးဖြတ်ချက်ချလိုက်တဲ့အပေါ်မှာ ၁၉၉၀ ရွေးကောက်ပွဲတုန်းက အန်ကယ်တို့ရဲ့ NLD ပြီးရင် ဒုတိယမဲအများဆုံးရခဲ့တဲ့ တိုင်းရင်းသားပါတီလည်းဖြစ်တဲ့ ရှမ်းအမျိုးသား ဒီမိုကရေစီအဖွဲ့ချုပ် SNLD နဲ့ တခြားတိုင်းရင်းသားပါတီတွေပဲ ဖြစ်ဖြစ်၊ နိုင်ငံရေးသမား လူပုဂ္ဂိုလ်တွေကိုပဲ ဖြစ်ဖြစ်၊ ထပ်ပြီးတော့ ရှင်းပြဖို့ ရှိပါသလား ခင်ဗျ။
ဦးတင်ဦး ။ ။ ဒီဥစ္စာကို မလုပ်ခင်ကတည်းက၊ ဖြစ်ပေါ်လာမယ့် ကိစ္စဝဝကို ဒေါ်အောင်ဆန်းစုကြည်က SNLD က ဥက္ကဋ္ဌနဲ့ အတွင်ရေးမှူး မရှိကြပေမယ့်လည်း ဒုတိယအကြီးဆုံးပုဂ္ဂိုလ်ကိုခေါ်ပြီးတော့ ပြောပြတာ ရှိတယ်။ နောက် ရခိုင်အမျိုးသားဒီမိုကရေစီအဖွဲ့ချုပ်က ဦးအေးသာအောင်တို့၊ ဇိုမီးအမျိုးသားကွန်ဂရက်က ပုဂ္ဂိုလ်တွေကိုခေါ်ပြီးတော့ ကြေကြေလည်လည် ပြောဆိုဆွေးနွေးတာတွေ ရှိပါတယ်ခင်ဗျ။ SNLD က ရွေးကောက်ပွဲကို မဝင်ဘူး၊ ပါတီကို ပြန်ပြီး မှတ်ပုံမတင်ဘူး ဆိုတာဟာ သူတို့လည်း မှန်ပါတယ်။ ဘာလို့လည်းဆိုတော့ သူတို့ခေါင်းဆောင်တွေ ခွန်ထွန်းဦးတို့ စိုင်းညွန့်လွင်တို့က အင်မတန်ကြီးလေးတဲ့ ထောင်ဒဏ်တွေနဲ့ နှစ်ရှည်ကျနေကြတဲ့အပေါ်မှာ မူတည်နေတာကိုး။ ကျနော်တို့ NLD အရင်တုန်းက ဖြစ်သလိုပေါ့။ ကျနော်တို့ ခေါင်းဆောင်ကိုတော့ ချုပ်ထားပြီးတော့ ရွေးကောက်ပွဲကျတော့ ဝင်ခိုင်းတယ်ဆိုတော့ ကျနော်တို့မှာ ဒီလို လုပ်ဖို့ရာ ဘယ်လာပြီး စိတ်သန့်မလဲဗျာ။ သူတို့ SNLD မှာ အခုလည်း အဲဒီလို ဖြစ်နေတာကို ကျနော်တို့က စာနာတယ်၊ ကိုယ်ချင်းစာ သဘောပေါက်တယ်။ ဒီကိစ္စအပေါ်မှာ သူတို့ဟာသူတို့ ဆုံးဖြတ်နိုင်ပါတယ်။ ဘာလို့လဲဆိုတော့၊ ပါတီမှတ်ပုံတင်ရင် အနည်းဆုံး မဲဆန္ဒနယ်သုံးနေရာမှာ ဝင်ပြိုင်ရမယ်ဆိုတော့ မှတ်ပုံတင်ပြီဆိုရင်တော့ မဲဆန္ဒနယ်တွေ ဝင်နိုင်သမျှ ဝင်ရတော့မယ်ဆိုတဲ့သဘောပေါ့။ ရွေးကောက်ပွဲ မဝင်ဘူးဆိုရင် ဘာလို့ မှတ်ပုံတင်တော့မလဲ။ ရွေးကောက်ပွဲ မဝင်ရင် ပါတီမှတ်ပုံတင်တာ ပျက်ပြယ်မယ်ဆိုပြီး ချိတ်ဆက်ထားတာကိုးဗျ။
ဦးရော်နီညိမ်း ။ ။ နောက်တစ်ခုက အန်ကယ်တို့ ဒီနေ့ထုတ်ပြန်တဲ့ အထူးကြေညာချက်မှာပါတဲ့ NLD ရဲ့ ညီနောင်ပါတီ အမျိုးသားဒီမိုကရေစီပါတီ (National Democracy Party) ကို ကျနော်တို့ မှတ်မိတာကတော့၊ ၁၉၉၀ ရွေးကောက်ပွဲ ဝင်စဉ်က အမျိုးသားဒီမိုကရေစီအဖွဲ့ချုပ်ကို အဲဒီအချိန်က စစ်အစိုးရက အရမ်းကို ဖိနှိပ်ချုပ်ချယ်နေတဲ့အတွက် အမျိုးသားဒီမိုကရေစီအဖွဲ့ချုပ်ဟာ မတရားသင်းကြေညာခံခဲ့ရရင် အမျိုးသားဒီမိုကရေစီအဖွဲ့ချုပ်ဝင်တွေ အဲဒီပါတီလေးထဲ ပြောင်းပြီးဝင်ကြဖို့ ရည်ရွယ်ချက်နဲ့ ဖွဲ့ထားတာလို့ သိရပါတယ်။ အဲဒီ အမျိုးသားဒီမိုကရေစီပါတီရဲ့ဥက္ကဋ္ဌ ဖြစ်တဲ့ ဒေါက်တာစိန်ဝင်းကော နောက်ထပ် အဲဒီ ပါတီလူကြီးတွေဖြစ်ကြတဲ့ အငြိမ်းစား ဒုတိယဗိုလ်မှူးကြီး ဦးအေးမြင့် (ကျောင်းသားတပ်မတော် ABSDF ၏ နည်းပြမှူးချုပ် တာဝန်ထမ်းဆောင်ခဲ့သူ)၊ အငြိမ်းစားဗိုလ်ကြီး ဦးစိန်သောင်း၊ စတဲ့သူတွေဟာ ပြည်ပကို ရောက်နေကြတော့ သူတို့ ကို ဘယ်လိုစဉ်းစားထားတာ ရှိပါသလဲခင်ဗျ။ သူတို့ကို ပြန်လာကြဖို့ ဖိတ်ခေါ်ဖို့ ရှိပါသလား ခင်ဗျ။
ဦးတင်ဦး ။ ။ သူတို့ကို ပြည်ပရောက်နေတယ်ဆိုပြီး သူတို့ကို ကျနော်တို့က မပစ်ပယ်ပါဘူး။ စိတ်ချင်းကတော့ ပေါင်းနေကြတာပဲလေ။ နဂိုမူလရည်ရွယ်ချက်ကတော့ မှန်ပါတယ်၊ ခင်ဗျားပြောတဲ့အတိုင်း အဲဒီတုန်းက မတော်တဆများ အဖွဲ့ချုပ်ကို အကြောင်းတစ်ခုခုကြောင့် တစ်ခုခုများ ဖြစ်မှာစိုးတဲ့အတွက် အမျိုးသားဒီမိုကရေစီပါတီဆိုပြီး သပ်သပ်ထောင်ထားတာ ဟုတ်ပါတယ်။
ဦးရော်နီညိမ်း ။ ။ ဟုတ်ကဲ့ အခုတော့ အဝေးရောက်နေကြတဲ့ အမျိုးသားဒီမိုကရေစီပါတီရဲ့ လူကြီးတွေ ဒေါက်တာစိန်ဝင်းတို့၊ ဗိုလ်မှူးကြီးအေးမြင့်တို့ကို ပြန်လာပြီး ပါတီတာဝန်တွေထမ်းဆောင်ကြဖို့ ဖိတ်ခေါ်ဖို့ အစီအစဉ် ရှိပါသလားလို့ သိချင်ပါတယ်။
ဦးတင်ဦး ။ ။ ခင်ဗျားပြောတာကို အကြောင်းပြုပြီးတော့ ကျနော်တို့မှာ စဉ်းစားစရာ ဖြစ်လာတယ်။ ကျနော်တို့က ကျနော်တို့ဆီမှာ စာရင်းပေါက်ထားပြီးသား ဒေါက်တာစိန်ဝင်းက အစ အကုန်လုံးပါတယ်၊ သူတို့ဟာ ပြည်ပမှာ ရောက်နေကြတယ်၊ ဒါကြောင့် ဒီနေ့ကျင်းပတဲ့ ဗဟိုဦးစီးအဖွဲ့အစည်းအဝေးမှာ သူတို့ မလာနိုင်ဘူးလို့ ကျနော်တို့ သတ်မှတ်ထားတဲ့သဘော ရှိပါတယ်။
ဦးရော်နီညိမ်း ။ ။ ကျနော်က ဒီနေ့အစည်းအဝေးကိုပြောတာ မဟုတ်ပါဘူးခင်ဗျ။ အနာဂတ် မြန်မာ့နိုင်ငံရေးမှာ ပါဝင်ကြဖို့အတွက် ပြန်လာကြဖို့ မဖိတ်ခေါ်တော့ဘူးလားလို့ မေးတာပါ။
ဦးတင်ဦး ။ ။ အနာဂတ်လည်း ဒီလိုပါပဲ။ သူတို့က စာရင်းပေါက်ထားပြီးသား။ ကျနော်တို့က ပြန်လည်ဖွဲ့စည်းတဲ့အခါမှာ ဘယ်လိုပုံစံဖြစ်လာဦးမလဲ မပြောနိုင်သေးဘူး။ အဲဒါတွေက တပေါင်းထဲပေါ့၊ လုပ်ကြရမှာက။
ဦးရော်နီညိမ်း ။ ။ နိုင်ငံတော်သမ္မတ ဦးသိန်းစိန်ကလည်း ပြန်လာချင်တဲ့သူတွေ ပြန်လာနိုင်တယ်လို့ ဖိတ်ခေါ်ထားတော့ ဥပမာ - ၁၉၉၀ ရွေးကောက်ပွဲအနိုင်ရ အမတ်တစ်ဦးဖြစ်တဲ့ ဦးပီတာလင်းပင်ဆိုရင် ပြန်သွားပြီ။ ဒေါက်တာစိန်ဝင်းတို့ ဗိုလ်မှူးကြီးအေးမြင့်တို့၊ ဗိုလ်ကြီးစိန်သောင်းတို့ အမျိုးသားဒီမိုကရေစီပါတီရဲ့လူကြီးတွေ ပြန်လာပြီး ပါတီတာဝန်တွေ ထမ်းဆောင်ပါလို့ ဖိတ်ခေါ်ဖို့ အန်ကယ်တို့မှာ စဉ်းစားထားချက် ရှိပါသလားလို့ပါ။
ဦးတင်ဦး ။ ။ ရှိပါတယ်ခင်ဗျ။ ဘာဖြစ်လို့လဲဆိုတော့ ပါတီနဲ့ကင်းကွာသွားတဲ့သူတွေအားလုံးကို ကျနော်တို့က မပစ်ပယ်ဘူးလေ။ ဒီနေ့လုပ်တဲ့ အစည်းအဝေးက အင်မတန် အားရစရာကောင်းတယ်။ ဝမ်းလည်း ဝမ်းသာမိတယ်။ အရင်တုန်းက ပါတီနဲ့ကင်းကွာသွားတဲ့သူတွေကို ကျနော်တို့က ကင်းကွာသွားသူတွေလို့ ကျနော်တို့က မမှတ်ယူဘူး၊ အခြေအနေတွေအရ ဒီလိုကင်းကွာသွားကြရပေမယ့် အခုလိုအချိန်အခါမျိုးမှာ ကျနော်တို့က ဗဟိုဦးစီးအဖွဲ့အစည်းအဝေးကို ပြည့်စုံအောင် အရင်ကတည်းက ဗဟိုဦးစီးအဖွဲ့ဝင် စာရင်းပေါက်ပြီးသားသူတွေကို ဖိတ်လိုက်တဲ့အတွက် အကုန်လုံး လာကြတယ်ခင်ဗျ။ ဒါကြောင့် ကျနော်တို့က ဖိတ်မန္တကပြုနိုင်တဲ့သူမှန်သမျှကိုဖိတ်ပြီး ပါဝင်ဆောင်ရွက်နိုင်ကြရင် ဆောင်ရွက်ကြပါလို့ နှိုးဆော်ထားတဲ့ အနေအထား ရှိပါတယ်ခင်ဗျ။
ဦးရော်နီညိမ်း ။ ။ သူတို့သဘောနဲ့သူတို့ ပြန်လာကြမယ်ဆိုရင် အမျိုးသားဒီမိုကရေစီပါတီမှာ ဒီပုဂ္ဂိုလ်တွေကို ပြန်လည် တာဈန်ထမ်းဆောင်ခွင့်ပြုမယ်ပေါ့။
ဦးတင်ဦး ။ ။ ဟုတ်ကဲ့၊ အခု ပြန်လည်ဖွဲ့စည်းတဲ့အခါမှာလည်း အခု အခြေအနေအတိုင်းဆိုရင် နှစ်ပါတီ ခွဲထားစရာမလိုဘဲ ရှိနေတဲ့အင်အားစုတွေအားလုံး တပေါင်းထဲတစည်းထဲ ဖွဲ့စည်းမယ့်ပုံသဏ္ဍာန်မျိုးလည်း ပေါ်ပေါက်ချင် ပေါ်ပေါက်လာလိမ့်မယ်။
ဦးရော်နီညိမ်း ။ ။ နောက်တစ်ခုက အမျိုးသားဒီမိုကရေစီအဖွဲ့ချုပ်ဟာ ပါတီမှတ်ပုံတင်ပြီး ရွေးကောက်ပွဲဝင်မယ်ဆိုရင် သူ့ပါတီ (အမျိုးသားဒီမိုကရေစီသစ်ပါတီ - New National Democracy Party) ကိုဖျက်ပြီး အန်ကယ်တို့ အမျိုးသားဒီမိုကရေစီအဖွဲ့ချုပ်အောက်မှာ ပြန်လာပြီးပေါင်းပါမယ်လို့ ၁၉၉၀ ရွေးကောက်ပွဲမှာ ရန်ကုန်တိုင်း သင်္ကန်းကျွန်းမြို့နယ် အမှတ်(၁)မဲဆန္ဒနယ်၊ အမျိုးသားဒီမိုကရေစီအဖွဲ့ချုပ်ကနေ အနိုင်ရခဲ့တဲ့ အမတ်ဦးသိန်းညွန့်က ကြေညာထားတာ ရှိပါတယ်။ တကယ်ပဲ ဦးသိန်းညွန့်က သူ့ပါတီကိုဖျက်ပြီး အမျိုးသားဒီမိုကရေစီအဖွဲ့ချုပ်အောက်မှာ ပြန်လာပြီးပေါင်းရင် အန်ကယ်တို့ ဘယ်လိုသဘောထားရှိပါသလဲ။
ဦးတင်ဦး ။ ။ အဲဒီဟာကတော့ သူ အမျိုးသားဒီမိုကရေစီအဖွဲ့ချုပ်ကနေ ထွက်ခွာသွားစဉ်တုန်းက ဖြစ်ပျက်ခဲ့တဲ့ အခြေအနေပေါ်မှာ ပြန်လည်လေ့လာပြီးရင် အဲဒါနဲ့ပတ်သက်လို့ ကြေကြေလည်လည် စဉ်းစားရမယ့်သဘော ရှိပါတယ်။ ဘာလို့လဲဆိုတော့ (၂၀၁၀ မတ်လမှာ ပါတီကို ပြန်လည်မှတ်ပုံတင်ရေး မတင်ရေး၊ ၂၀၁၀ ရွေးကောက်ပွဲ ဝင်ရေး မဝင်ရေး) ကို ဆွေးနွေးခဲ့ကြစဉ်က အားလုံးက CEC (ဗဟိုအလုပ်အမှုဆောင်အဖွဲ့) ကော၊ CC (ဗဟိုကော်မတီ) အဖွဲ့ဝင်တွေကော၊ ပါတီကိုမှတ်ပုံမတင်ဘူး ၂၀၁၀ ရွေးကောက်ပွဲကို မဝင်ဘူးလို့ အားလုံးသဘောတူ ညီညီညွတ်ညွတ်နဲ့ ဆုံးဖြတ်ပြီးမှ သူက ခွဲထွက်သွားတယ်ဆိုတော့ သူ သွားစဉ်အခါတုန်းက ပါတီကနေ လွင့်စင်ထွက်သွားတဲ့သဘောပေါ့။ သူ့ကိစ္စက တခြားကိစ္စတွေနဲ့ နှိုင်းယှဉ်ပြောရင် မတူဘူးပေါ့။ အဲဒီသဘောတော့ ရှိနေတယ်။ အဲဒါကို စည်းလုံးညီညွတ်ရေးကို အကြောင်းပြုပြီးတော့ ဒါကို ရှေ့ဆက်ပြီးဆွေးနွေးတဲ့အခါမှာ အတူပါဝင်ပြီးလုပ်ကိုင်တဲ့အနေအထားနဲ့ပဲ တူရာတူရာ ဆောင်ရွက်ကြရာမှာ တယောက်နဲ့တယောက်ကို ပူးပေါင်းဆောင်ရွက်ညှိနှိုင်းသွားတဲ့ ပုံစံသဘောမျိုးတွေ ဖြစ်ချင်လည်း ဖြစ်လာမှာပဲလို့ ထင်ပါတယ် ခင်ဗျ။။
ဦးရော်နီညိမ်း ။ ။ နောက်တစ်ခုက (အမျိုးသားဒီမိုကရေစီအဖွဲ့ချုပ်မှ ခွဲထွက်သွားခဲ့သော) အမျိုးသားဒီမိုကရေစီ အင်အားစု (National Democracy Force) ပါတီက ခေါင်းဆောင် ဦးခင်မောင်ဆွေတို့က အန်ကယ်တို့ NLD က ကမ်းလှမ်းရင် သူတို့ကလည်း ပြန်လာဖို့ရှိတယ်လို့ ပြောထားပါတယ်။
ဦးတင်ဦး ။ ။ အဲဒါကလည်း နေပါဦး ခင်ဗျာ။ စောပါသေးတယ်။ ပြန်လည်ဖွဲ့စည်းပြီးတဲ့နောက်ပိုင်းမှာ လုပ်ဖို့ ကိုင်ဖို့ကိစ္စတွေထဲမှာ ခင်ဗျားပြောတဲ့ issue တွေကို ပြောဆိုဆွေးနွေးကြရမှာ ဖြစ်တယ်။ သို့သော် ဘယ်လို outcome (ရလဒ်အဖြေ) ထွက်လာမလဲဆိုတာ မသိဘူးပေါ့။
ဦးရော်နီညိမ်း ။ ။ နောက်တစ်ခုက အခု ပါတီမှတ်ပုံတင်ဖို့ ရွေးကောက်ပွဲဝင်ဖို့ ဆုံးဖြတ်ချက်ချပြီးသွားတော့ နောက်ထပ် ဆုံးဖြတ်ချက်တွေ ဆက်တိုက်လာဖို့ရှိပြီးတော့ အခုတော့ အန်ကယ်တို့ ဆုံးဖြတ်ကြဦးမှာ မဟုတ်သေးဘူး။ လာမယ့် ကြားဖြတ်ရွေးကောက်ပွဲမှာ ဘယ်နှစ်နေရာ ဝင်ရောက်ယှဉ်ပြိုင်မယ်တို့၊ ဘယ်သူတွေက ကိုယ်စားလှယ်လောင်းတွေအဖြစ် အန်ကယ် အပါအဝင် ဝင်မလား မဝင်ဘူးလား ဆိုတဲ့ကိစ္စတွေက ဆုံးဖြတ်လို့ရမှာ မဟုတ်သေးဘူးဆိုတော့ နောက်ဆုံး တစ်ချက်အနေနဲ့ အန်ကယ့်ရဲ့ ကိုယ်ပိုင်သဘောထား တစ်ချက်ကိုပဲ မေးကြည့်ချင်ပါတယ်။ အခု တပ်မတော်နဲ့ အမျိုးသားဒီမိုကရေစီအဖွဲ့ချုပ်နဲ့ ဆက်ဆံရေးက အထူးကောင်းမွန်လာပြီ၊ အမေရိကန်လိုနိုင်ငံက သမ္မတကတောင် ဒါကို အသိအမှတ်ပြုနေပြီ။ ဒါကို တကမ္ဘာလုံးကလည်း ဝိုင်းပြီး အသိအမှတ်ပြုနေကြပြီဆိုတော့ အဲဒီလိုအခြေအနေမျိုးမှာ အန်ကယ်ဟာ တပ်မတော်ရဲ့ ကာကွယ်ရေးဦးစီးချုပ်တာဝန်ကို ထမ်းဆောင်ခဲ့တယ်၊ တပ်မတော်က ကြည်ညိုတဲ့ ပုဂ္ဂိုလ်ဖြစ်တယ်၊ ပြည်သူလူထုကလည်း ကြည်ညိုတဲ့ပုဂ္ဂိုလ်ဖြစ်တာကြောင့် အခု ကြားဖြတ်ရွေးကောက်ပွဲမှာ ဝင်ရောက်ယှဉ်ပြိုင် အရွေးခံပါလို့ အန်ကယ့်ကို NLD က တာဝန်ပေးအပ်လာရင်၊ အန်ကယ်က ဒီတာဝန်ကို ယူဖို့ ဆန္ဒရှိပါသလား၊ ငြင်းပယ်ဖို့ ဆန္ဒရှိပါသလား ခင်ဗျ။
ဦးတင်ဦး ။ ။ ကျနော်ကတော့ ဒီတာဝန်ကိုယူဖို့ ဆန္ဒမရှိတော့ဘူး ခင်ဗျ။ အခု ကျနော့်အသက်က ၈၅ နှစ်ဆိုတော့၊ ရှေ့ဆက်ပြီး သိပ်တက်တက်ကြွကြွလုပ်နိုင်မှာ မဟုတ်ဘူး။ ကျနော်က ဒီလိုလုပ်ပါမယ်။ ကျနော်က နဂိုမူလကတည်းက တပ်မတော်ကို သံယောဇဉ်ရှိတာကိုးဗျ။ ဒီတပ်မတော်ကြီးကို ပြည်သူလူထုက ပြန်ပြီး အင်မတန်မှ လေးစားကြည်ညို ချစ်ခင်တဲ့ တပ်မတော်ကြီး ပြန်ပြီးဖြစ်စေချင်တာပဲလေ။ အဲဒါကြောင့် ဒီလို ပြန်ဖြစ်လာအောင် လုပ်ဖို့က၊ ပြည်သူလူထုရဲ့ အခန်းကဏ္ဍက ကြီးမားတယ်ခင်ဗျ။ ပြည်သူလူထုဟာ တပ်မတော်ရဲ့ အမိ၊ တပ်မတော်ရဲ့ အဖ ဖြစ်တယ်။ ပြည်သူလူထုအပိုင်းမှာ တပ်မတော်သားတွေကို ပြန်ပြီး ချစ်ခင်ကြည်ညို ယုံကြည်လာအောင် လုပ်တဲ့နေရာမှာ တပ်မတော်သားတွေကလည်း ပြည်သူသည်အမိ ပြည်သူသာအဖဆိုတဲ့ အတွေးအခေါ် ပြန်ဝင်အောင်လုပ်ဖို့ အဲဒါတွေကိုပဲ လုပ်ဖို့ပဲ။ ကျနော်က အသက်အရွယ်ရလာပြီမို့လို့ ဝင်ပြီးအရွေးခံတော့မှာ မဟုတ်ပါဘူးခင်ဗျ။
ဦးရော်နီညိမ်း ။ ။ ဒါပေမယ့် အန်ကယ်က လွှတ်တော်ထဲမှာ ပါဝင်ဆောင်ရွက်ရင်၊ လက်ရှိ တပ်မတော် အဖွဲ့အစည်းတွေနဲ့ ပိုပြီး ထိထိရောက်ရောက် ရှိမလားလို့ နိုင်ငံအတွက်ပေါ့။
ဦးတင်ဦး ။ ။ ထိထိရောက်ရောက်ရှိမှာ မဟုတ်ဘူး။ ရှိနိုင်တော့မှာ မဟုတ်ဘူး။ အလှမ်းတော်တော် ဝေးသွားပြီခင်ဗျ။ သို့သော်လည်း အားလုံးကို ကျနော်တို့က လွှတ်တော်ရဲ့အပြင်ဘက်က ပြည်သူလူထုရဲ့ အင်အားနဲ့ပဲ ပြည်သူလူထုထဲမှာ ဖြစ်ပေါ်လာတဲ့ တရားသဖြင့်ဆန္ဒတွေကိုရရှိအောင် ဆောင်ရွက်နိုင်ခြင်းအားဖြင့် ဆောင်ရွက်သွားနိုင်အောင်လုပ်ဖို့၊ ဆိုတဲ့ဟာတွေကိုပဲ ပြေလည်ရာပြေလည်ကြောင်းဖြစ်အောင် ကျနော့်အနေနဲ့ လုံးပမ်းလုပ်ကိုင်သွားဖို့ရှိတယ်လို့ပဲ ကျနော် မြင်တော့တယ် ခင်ဗျ။
ဦးရော်နီညိမ်း ။ ။ ဟုတ်ကဲ့၊ ကျေးဇူးတင်ပါတယ်။ ၂၀၁၁ နိုဝင်ဘာ ၁၈ ရက်နေ့စွဲနဲ့ အမျိုးသားဒီမိုကရေစီအဖွဲ့ချုပ်က အထူးကြေညာချက်အမှတ် ၁/၁၁/၁၁ကို ထုတ်ပြန်ပြီး နိုင်ငံရေးပါတီများ မှတ်ပုံတင်ခြင်းဥပဒေနဲ့အညီ အမျိုးသား ဒီမိုကရေစီအဖွဲ့ချုပ်ကို မှတ်ပုံတင်ပြီးတော့ နောင်လာမယ့် ရွေးကောက်ပွဲတွေမှာ ပါဝင်ယှဉ်ပြိုင်မယ်လို့ ကြေညာခဲ့တာနဲ့ပတ်သက်ပြီး အမျိုးသားဒီမိုကရေစီအဖွဲ့ချုပ်ရဲ့ ဒုတိယဥက္ကဋ္ဌ အငြိမ်းစားဗိုလ်ချုပ်ကြီး သူရဦးတင်ဦးကို ဆက်သွယ်မေးမြန်း တင်ဆက်ခဲ့တာပါ ခင်ဗျာ။ ကျနော် ရော်နီညိမ်းပါ။
ဗွီအိုအေ မြန်မာပိုင်း အစီအစဉ်မှ ပြန်လည်ကူးယူ ဖော်ပြပါတယ်။
No comments:
Post a Comment