ကမ္ဘာလုံးဆိုင်ရာ ဗုဒ္ဓညီလာခံကို အိန္ဒိယနိုင်ငံ နယူးဒေလီမြို့မှာ နိုဝင်ဘာ ၂၇ ရက် နေ့မှ ၃၀ ရက်နေ့အထိ ကျင်းပခဲ့ရာ ဒီကနေ့မှာ ပြီးစီးသွားပြီ ဖြစ်ပါတယ်။
ဒီညီလာခံမှာ အိန္ဒိယ၊ မြန်မာ၊ တရုတ်၊ ထိုင်း၊ ဗီယက်နမ်၊ သီရိလင်္ကာ၊ နီပေါ၊ ဂျပန်၊ ကိုရီးယား စသည့် နိုင်ငံပေါင်း ၄၆ နိုင်ငံက ဗုဒ္ဓဘာသာဝင် ဘုန်းတော်ကြီးတွေ၊ သီလရှင်တွေနဲ့ ကျမ်းတတ် ပုဂ္ဂိုလ် ၉၀၀ ကျော်တို့တက်ရောက်ပြီး ဘာသာ၊ သာသနာရေးဆိုင်ရာများ ဆွေးနွေး ပြောဆိုကြတယ်လို့ သိရပါတယ်။
မြန်မာပြည်က ရွှေကျင်သာသနာပိုင် ဝါဆို ဆရာတော်ဘုရားကြီးနဲ့ သီတဂူဆရာတော် ဦးဉာဏိဿရ အပါအဝင် ဆရာတော် အပါး ၄၀ လောက် တက်ရောက်ခဲ့ပါတယ်။
တိဘက် ဘာသာရေးခေါင်းဆောင် ဘုန်းတော်ကြီး ဒလိုင်းလားမားက ဝါဆို ဆရာတော်ဘုရားနဲ့ သီတဂူ ဆရာတော်တို့ကို သီးခြားတွေ့ဆုံခဲ့ပြီး ထေရဝါဒနဲ့ မဟာယာန ပူးပေါင်းဆောင်ရွက်နိုင်မယ့်နည်းလမ်းတွေကို ဆွေးနွေးခဲ့ကြတယ်လို့ သီတဂူ ဆရာတော်ကြီးက ဘီဘီစီကို မိန့်ပါတယ်။
တိဘက် ဘုန်းတော်ကြီး ဒလိုင်းလားမား တက်ရောက်မိန့်ခွန်းပြောကြားမယ်ဆိုတာကြောင့် တရုတ်အစိုးရက အိန္ဒိယအစိုးရကို ကန့်ကွက်ခဲ့လို့ မူလက ညီလာခံဖွင့်ပွဲကို တက်ရောက်ဖို့စီစဉ်ထားတဲ့ အိန္ဒိယ သမ္မတနဲ့ ဝန်ကြီးချုပ်တို့ဟာ ဖွင့်ပွဲအခမ်းအနား တက်ရောက်ခြင်းမရှိခဲ့ဘူးလို့ အိန္ဒိယသတင်းတွေမှာ ရေးသားထားပါတယ်။
သတင်း - ဘီဘီစီ
ဓာတ်ပုံ - ရိုက်တာ
No comments:
Post a Comment