ကဗျာဆရာ လှသန်း

(၁၉၆၃ - ၂၀၁၁)

ရန်ကုန်မြို့ မွေးဖွား

၂၂ ရက်၊ အောက်တိုဘာလ၊ ၂၀၁၁ ခု ည ၉ နာရီ၊ ၂၀ မိနစ်တွင် ရန်ကုန်ဆေးရုံကြီး၌ ကွယ်လွန်သည်။

လက်မရွံ့ကဗျာဆရာသို့

မြေဝသုန်ရေ...
ဂုဏ်ပြုထိုက်တဲ့ ဧည့်သည်တစ်ယောက်ကို
လက်ခံယူပါတော့
ဝီလျှံယိစ်ကို အနားယူလဲလျောင်းစေပါလော့ ...
(ဝဟ-အော်ဒင်)

ငါတို့ကောင်းကင်ကြီးပြာလွင်ရဲ့လား ...?
ကောင်းကင်ကို အရောင်ပြောင်းချင်သူတစ်ယောက်
လူ့ပြည်ကို
လူပီသစွာ ရောက်ခဲ့တယ်။


အမှောင်ထဲမှာ ငါတို့မွေးဖွားခဲ့ကြ
မဆလ တစ်ပါတီအာဏာရှင်စနစ်ဆိုး
ရိုက်ချိုးဖို့
မင်းစိုက်ပျိုးခဲ့တဲ့ ကလောင်
မိုးကြိုးမီးလျှံလို ဂုဏ်ရောင်ပြောင်ခဲ့တယ်။

၈၈ - လူထုအရေးအခင်း
ကျားထက်ဆိုးတဲ့ ရှင်ကြီးတွေ
လူ့အခွင့်အရေးကို ပျက်ရယ်ပြုကြတယ်။
မင်းပုခုံးပေါ်က သမိုင်းတွေ
မင်းတာဝန်ကျေပွန်ပါရဲ့။

ဒီပဲယင်းအရေးအခင်း မင်းရဲ့ကဗျာ
အာဏာရှင်တွေ
သွေးပျက်ခြောက်ခြား
မင်းရဲ့နာမည်ကိုဖျောက်ဖို့
သူတို့ကြိုးစားတယ်။

ရွှေဝါရောင်တော်လှန်ရေး
မင်းလက်မနှေးပါဘူး လှသန်း
အနက်ရောင် ကတ္တရာလမ်းမပေါ်က
သင်္ကန်းရောင်သွေးတွေ
မင်းလက်မောင်းသွေးလို နီစွေးစေတယ်
နာဂစ် မွှေတော့
မင်းလည်း မနေနိုင်ပါဘူး။
ငါတို့တစ်တွေဟာ မြစ်ဝကျွန်းပေါ်
ဒုက္ခသည်တွေကို ဖေးမကူညီကြတော့
မင်း ... မျက်ရည်ဝေဝေ အံကိုကြိတ်
ကြိတ်မနိုင်ခဲမရ ဖြစ်ခဲ့ရတယ်
လူပီသတဲ့ ကဗျာဆရာလေ။
လှသန်း
မင်းကိုသူတို့ အငြိုးနဲ့မုန်းကြတယ်
လှသန်းကို သတ်တော့
နိမိတ်ထွန်းသန်း
နိမိတ်ထွန်းသန်းကို သတ်တော့
..........................................
..........................................
ကြည်မောင်သန်း
ကြည်မောင်သန်းကို သတ်တော့
လှသန်း
လှသန်း
မင်းဟာ ဖိနစ်ငှက်လိုလှပစွာ မီးလျှံထဲက
ရှင်သန်ထမြောက်ခဲ့တယ် မဟုတ်လား။

လှသန်း
မင်းဟာ လက်မရွံ့ကဗျာဆရာ ...။
လှသန်း
မင်းဟာ တော်လှန်စိတ်နဲ့သွေးဆူနေတဲ့
ကဗျာဆရာ ...။
လှသန်း
မင်းဟာ ပြည်သူထဲမှာမွေး
ပြည်သူ့သွေးနဲ့ရေးတဲ့ ကဗျာဆရာ ...။
လှသန်း
မင်းဟာ လူ့သမိုင်းကို
မရိုင်းအောင် ပြုပြင်လိုတဲ့ ကဗျာဆရာ ...။
လှသန်း
မင်းဟာ ဟောင်းမြင်းတဲ့ အစဉ်အလာတွေ
ရိုက်ချိုးတဲ့ ကဗျာဆရာ ...။
လှသန်း
မင်း ရန်ကုန်မှာဆုံးတော့
ငါက အဝေး မန္တလေးမှာ
ငါ့နှလုံးသားကို စတေးပြီး
မီးပူဇော် ဦးညွှတ် အလေးပြုလိုက်ရဲ့။
လှသန်း
မင်းဟာ ဘယ်တော့မှမသေတဲ့
မဟာအမတ ကဗျာရှည်ဖြစ်တယ်။

(၂၂ ရက်၊ အောက်တိုဘာ ည ၉ နာရီ၊ ၂၀ မိနစ်မှာ ကွယ်လွန်သွားတဲ့ ကဗျာဆရာ လှသန်းသို့ ...)

အောင်ဘညို

23.10.2011
ခေတ္တ
i-mass
မန္တလေးတက္ကသိုလ်