ဒေါ်အောင်ဆန်းစုကြည်ရဲ့ Reith Lectures 4

ဒေါ်အောင်ဆန်းစုကြည်က ဘီဘီစီ Radio 4 ရဲ့ ၂၀၁၁ ခုနှစ် Reith Lectures အစီအစဉ်မှာ ဟောပြောချက် နှစ်ရပ် ပြုလုပ်ခဲ့ပါတယ်။ အဲဒီ အင်္ဂလိပ်လို ဟောပြောချက်တွေကို မြန်မာပိုင်း အစီအစဉ်က ဘာသာပြန်ဆိုပြီး အပိုင်းလိုက် တင်ဆက်ပေးသွားမှာ ဖြစ်ပါတယ်။

အခု အစီအစဉ်မှာတော့ လွတ်လပ်ခွင့်အကြောင်း ဟောပြောချက် စတုတ္ထပိုင်းကို နားဆင်နိုင်ကြပါတယ်။

ကမ္ဘာတဝှမ်း လူသားတွေရဲ့ လွတ်လပ်ချင်တဲ့ လိုအင်ဆန္ဒကို အရှေ့အလယ်ပိုင်းဒေသမှာ ဖြစ်ပေါ်တဲ့ စိတ်လှုပ်ရှားဖွယ်ရာ အခြေအနေတွေက ကျွန်မတို့ကို ပြလိုက်ပါပြီ။

မြန်မာပြည်သူတွေပါ တခြား တိုင်းပြည်တွေက ပြည်သူတွေလိုပဲ ဒီအခြေအနေ အဖြစ်အပျက်တွေကြောင့် စိတ်လှုပ်ရှားကြပါတယ်။

ကျွန်မတို့ရဲ့စိတ်ဝင်စားမှုက အထူးသဖြင့် ထက်သန်ပါတယ်။ ဘာဖြစ်လို့လဲဆိုတော့ Tunisia နိုင်ငံမှာဖြစ်ခဲ့တဲ့ ၂ဝ၁ဝ ဒီဇင်ဘာ တော်လှန်ရေးနဲ့ ကျွန်မတို့ရဲ့ ၁၉၈၈ အုံကြွမှု ဒီနှစ်ခုမှာ မှတ်သားလောက်စရာ တူညီချက်တွေရှိနေလို့ ဖြစ်ပါတယ်။ နှစ်ခုစလုံးဟာဖြစ်တဲ့အချိန်မှာ အသေးအဖွဲ အရေးမကြီးလို့ထင်ရတဲ့ အဖြစ်အပျက်တွေက စခဲ့ပါတယ်။

Tunisia နိုင်ငံက မြို့တမြို့မှာ သစ်သီးရောင်းတဲ့ဈေးသည်တယောက်ဟာ အခြေခံ လူ့အခွင့်အရေးတွေရဲ့ အရေးကြီးပုံကို မေ့နိုင်လောက်စရာမရှိအောင် ပြသခဲ့တာ ကမ္ဘာတဝှမ်းက မသိခဲ့ပါဘူး။ သာမန် ယောက်ျားတစ်ယောက်ကလည်းပဲ သူ့ရဲ့ လူ့ဂုဏ်သိက္ခာ ပိုင်ဆိုင်ခွင့်ဟာ သူ့အဖို့ အသက်ထက်ပင်လျှင် ပိုပြီး တန်ဖိုးရှိကြောင်းကို တလောကလုံး သိအောင် ပြသခဲ့ပါတယ်။

ဒီကိစ္စဟာ တော်လှန်ရေးကြီးတခုလုံး ဖြစ်ပေါ်လာစေတဲ့ အကြောင်းရင်း ဖြစ်ခဲ့ပါတယ်။

မြန်မာနိုင်ငံမှာ ရန်ကုန်မြို့က လက်ဖက်ရည်ဆိုင်တဆိုင်မှာ တက္ကသိုလ် ကျောင်းသားတွေနဲ့ ရပ်ကွက်ထဲက လူတွေ ရန်ပွဲဖြစ်တဲ့ကိစ္စမှာ ကျောင်းသားတွေရဲ့ အမြင်အားဖြင့် မတရားဘူးလို့ယူဆတဲ့ နည်းလမ်းတွေကိုသုံးပြီး ရဲအဖွဲ့က ပြဿနာကို ကိုင်တွယ်ခဲ့ပါတယ်။

ဒါကို အကြောင်းပြုပြီး ဆန္ဒပြပွဲတွေပေါ်ပေါက်ခဲ့ရာမှာ (ဖုန်းမော်) အမည်ရှိတဲ့ ကျောင်းသားတယောက် သေဆုံးရတဲ့ အဖြစ်ထိအောင် ရောက်သွားခဲ့ပါတယ်။ ဒီအဖြစ်အပျက်ဟာ မြန်မာ့ဆိုရှယ်လစ်လမ်းစဉ်ပါတီရဲ့ အာဏာရှင်စနစ်ကို ကန့်ကွက်တဲ့ ပြည်လုံးကျွတ် ဆန္ဒပြပွဲတွေကို ပေါ်ပေါက်စေခဲ့တဲ့ အကြောင်းရင်း ဖြစ်ပါတယ်။

တခါတုန်းက မိတ်ဆွေတယောက် ပြောဖူးတာ ရှိပါတယ်။ ကုလားအုတ်ရဲ့ကျောရိုးကို ကျိုးစေခဲ့တဲ့ ကောက်ရိုးဟာ သည်းမခံနိုင်လောက်အောင် လေးလံလာခဲ့တယ်ဆိုတာ၊ ကုလားအုတ်ကြီးက မှန်ထဲမှာ သူ့ကိုသူ မြင်သွားလို့ဖြစ်မယ်လို့ သူ ထင်တဲ့အကြောင်း ပြောပါတယ်။ သယ်ပိုးနေရတဲ့ ဝန်ထုပ်ဝန်ပိုးကြီးဟာ လက်မခံနိုင်လောက်အောင် ကြီးမားနေတယ် ဆိုတာကို ကုလားအုတ်ကြီး သိမြင်သွားလို့ ဖြစ်မယ်၊ သူ ခွေလဲသွားတယ်ဆိုတာကလည်း အမှန်မှာ ဒါလောက် လေးလံလွန်းလှတဲ့ ဝန်ထုပ်ဝန်ပိုးကြီးကို ဆက်လက်ပြီးတော့ သယ်ပို့နေဖို့ ငြင်းဆန်လိုက်တဲ့သဘောဖြစ်မယ်လို့ သူ ထင်တဲ့ အကြောင်း ပြောပါတယ်။

Tunisia မှာရော၊ မြန်မာနိုင်ငံမှာရော လူထုခံစားနေရတဲ့ မတရား မမျှတမှုနဲ့ ဖိနှိပ်ချုပ်ချယ်မှု ဝန်ထုပ်ဝန်ပိုးကြီးတွေဟာ ခံနိုင်စွမ်းမရှိအောင် ဘယ်လောက်ကြီးမားနေတယ်ဆိုတာ ပြည်သူတွေ သိမြင်သွားအောင် ဘယ်လောက်ကြီးမားနေတယ် ဆိုတာ ပြည်သူတွေ သိမြင်သွားအောင် လူငယ်နှစ်ယောက်တို့ရဲ့ သေဆုံးမှုတွေက မှန်ထောင်ပြီး ပြသခဲ့ပါတယ်။

လူငယ်တွဟော လွတ်လပ်မှုကို အလွန်အမင်း လိုချင်ကြတယ်ဆိုတာ သဘာဝတရား ဖြစ်ပါတယ်။ စုံလင်လာတဲ့ အတောင်သစ်တွေကို ဖြန့်ချင် ဆန့်ချင်တဲ့ ဆန္ဒဟာ သူ့အလိုလို ဖြစ်ပေါ်လာတာနဲ့အမျှ ခွန်အားလည်းပဲ ကြီးမားပါတယ်။ Tunisia တော်လှန်ရေးမှာ လူငယ်တွေ ရှေ့တန်းကထွက်ကြတယ်ဆိုတာ မြန်မာနိုင်ငံက ကျွန်မတို့အဖို့ အံ့သြဖွယ်ရာ မဖြစ်ပါဘူး။ သူတို့ရဲ့ ဘဝနေထိုင်မှု ပုံသဏ္ဍာန်ကို သူတို့ဖာသာ ဆုံးဖြတ်ခွင့်ပေးပါဆိုပြီး တောင်းဆိုခဲ့ကြသူတွေအထဲမှာ ပရိသတ်ကြိုက်တဲ့ Rap အဆိုတော်တယောက် ထင်ထင်ရှားရှား ပါဝင်ခဲ့တယ်ဆိုတာကလည်း အံ့သြဖွယ်ရာ မဖြစ်ပါဘူး။

ဒီနေ့မြန်မာနိုင်ငံမှာ Rap အဆိုတော် လူငယ်တွေဟာ (Generation Wave) မျိုးဆက်သစ် လူငယ်အဖွဲ့ရဲ့ အဓိက မဏ္ဍိုင် ဖြစ်ပါတယ်။ ဒီအဖွဲ့ဟာ ဒီမိုကရေစီနဲ့ လူ့အခွင့်အရေးအတွက် ထက်ထက်သန်သန် ဦးတည်ဆောင်ရွက်နေပြီး ပါတီ သဏ္ဍာန်မဟုတ်တဲ့ အဖွဲ့တခု ဖြစ်ပါတယ်။ သူတို့အထဲက တချို့ဟာ ရဟန်း သံဃာတော်တွေရဲ့ ရွှေဝါရောင် တော်လှန်ရေး နောက်ပိုင်းမှာ ထောင်သွင်း အကျဉ်းချခံခဲ့ရပါတယ်။

သူတို့အထဲက ၁၅ ယောက်လောက်ဟာ ဒီကနေ့ ထောင်ထဲမှာရှိနေဆဲ ဖြစ်ပါတယ်။ မြန်မာအာဏာပိုင်တွေဟာ အခု ဖြုတ်ချခံခဲ့ရတဲ့ Tunisia အစိုးရလိုဘဲ စိတ်နေစိတ်ထားပြင်းပြတဲ့ ရိုးရာဓလေ့ မလိုက်နာဘဲ လူငယ်တွေကို မကြိုက်ပါဘူး။

ကျွန်မတို့ရဲ့နိုင်ငံမှာ သူတို့ချမှတ်ပေးချင်တဲ့ စံနစ်ပုံစံကို ဒီလူငယ်တွေက အန္တရာယ်ပေးမှာလို့ အာဏာပိုင်တွေက မြင်ပါတယ်။

လွတ်လပ်မှုကို ယုံကြည်သူတွေအဖို့ကတော့ Rap အဆိုတော် လူငယ်တွေဟာ အယူသည်း အစွဲအလမ်းတို့၊ အာဏာပြပြီး ချမှတ်တဲ့ စည်းမျဉ်း စည်းကမ်းတို့၊ ဖိနှိပ်ချုပ်ချယ်မှုတို့၊ မတရား မမျှတမှုတို့ရဲ့ အနှောင်အဖွဲ့ ကင်းရှင်းတဲ့ အနာဂတ်ကို ပိုင်ဆိုင်သူတွေ ဖြစ်ပါတယ်။

Tunisia နဲ့ မြန်မာနိုင်ငံတို့ရဲ့ တူညီချက်တွေဟာ လွတ်လပ်မှုကို တမ်းတကြတဲ့ ကမ္ဘာတဝှမ်းလုံးက ပြည်သူတွေကို အညီအညွတ်ဖြစ်စေတဲ့ တူညီချက်တွေ ဖြစ်ပါတယ်။

ပထမဆုံး မတူညီတဲ့အချက်က Tunisia စစ်တပ်ဟာ သူတို့ရဲ့ပြည်သူတွေကို သေနတ်နဲ့ မပစ်ခတ် မနှိမ်နင်းခဲ့ခြင်း၊ မြန်မာ စစ်တပ်ကတော့ ပစ်ခတ်နှိမ်နင်းခဲ့ခြင်းဆိုတဲ့အချက် ဖြစ်ပါတယ်။

ဒုတိယလည်းဖြစ် ရေရှည်မှာ ပိုပြီး အရေးကြီးဖွယ်ရာလည်းရှိတဲ့အချက်က Tunisia တော်လှန်ရေးဟာ ဆက်သွယ်မှု တော်လှန်ရေးရဲ့ အကျိုးကျေးဇူးကို ခံစားခဲ့ရခြင်း ဖြစ်ပါတယ်။ ဒီအချက်ကြောင့် သူတို့ဟာ သူတို့ရဲ့ဖွဲ့စည်းလှုပ်ရှားမှုတွေကို ပိုပြီး ခရီးရောက်အောင် စည်းရုံးဆောင်ရွက်တာတို့ ညှိနှိုင်းဆောင်ရွက်တာတို့ကို လုပ်နိုင်ခဲ့ရုံမျှ မကသေးဘဲနဲ့ ကမ္ဘာ တဝှမ်းလုံးရဲ့ အာရုံကလည်း ဘယ်လိုမှ မလွင့်ဘဲ သူတို့ရဲ့အပေါ်မှာ စူးစိုက်နေခဲ့ပါတယ်။

သေဆုံးမှုတခုဖြစ်တိုင်းသာလျှင် မဟုတ်ပါဘူး။ ဒဏ်ရာရမှုတခုဖြစ်တိုင်းပင်လျှင် အဖြစ်အပျက်ကို မိနစ်ပိုင်းအတွင်း ကမ္ဘာသိအောင် ဆောင်ရွက်နိုင်ပါတယ်။ 

Libya နိုင်ငံမှာရော Syria နိုင်ငံမှာရော အခုဆိုလို့ရှိရင် Yemen နိုင်ငံမှာရော တော်လှန်ရေးသမားတွဟော အာဏာ ရှိသူတွေရဲ့ ရက်စက်တဲ့ အပြုအမူတွေကို ကမ္ဘာသိအောင် အသိပေးနေပါတယ်။

Syria နိုင်ငံမှာ အသက် ၁၃ နှစ် ယောက်ျားကလေးတယောက် သေသွားတဲ့အထိ ညှင်းပမ်းနှိပ်စက်ခံရတဲ့ပုံကို မြင်ရသူတွေမှာ ဒေါသအမျက်ခြောင်းခြောင်း ထွက်ကုန်ကြတဲ့အတွက် ကမ္ဘာ့ခေါင်းဆောင်ကြီးတွေကိုယ်တိုင် ပြစ်တင် ရှုတ်ချတဲ့စကားကို ပြောခဲ့ကြရပါတယ်။

ဆက်သွယ်ရေးစံနစ်ဟာ လူချင်းအဆက်အသွယ်ကို ဖြစ်စေပါတယ်။ အရှေ့အလယ်ပိုင်းဒေသက တော်လှန်ရေးတွေနဲ့ ဆက်စပ်ပြီး ပြောရမယ်ဆိုရင် အဲဒီ အဆက်အသွယ်ဟာ လွတ်လပ်မှုအတွက် အဆက်အသွယ် ဖြစ်ခဲ့ပါတယ်။

Tunisia နဲ့ Egypt နိုင်ငံတွေက ပြည်သူတွေကို ကျွန်မတို့ အားကျပါသလားလို့မေးရင် ဟုတ်ကဲ့ သူတို့ဆီမှာ လျှင်လျှင်မြန်မြန် ငြိမ်းငြိမ်းချမ်းချမ်းနဲ့ အပြောင်းအလဲတွေ ဖြစ်ကုန်တာကို ကျွန်မတို့ အားကျပါတယ်။

ဒါပေမယ့် အားကျစိတ်ထက် ပိုတာက စည်းလုံးတဲ့ စိတ်လည်း ဖြစ်ပါတယ်။ ကျွန်မတို့ဆောင်ရွက်နေတဲ့ နိုင်ငံ အရေးအတွက် အားသစ်လောင်းပြီး သစ္စာပြုတဲ့စိတ်လည်း ဖြစ်ပါတယ်။ ဒီအရေးဟာ လူသားရဲ့ ဂုဏ်သိက္ခာနဲ့ လွတ်လပ်မှုကို တန်ဖိုးထားကြတဲ့ အမျိုးသမီး အမျိုးသားအားလုံးတို့ရဲ့အရေး ဖြစ်ပါတယ်။

ကျွန်မတို့ဟာ လွတ်လပ်မှုကို ရှာဖွေတဲ့အခါမှာ လွတ်လပ်တဲ့စိတ်ကို မွေးမြူတတ်လာပါတယ်။

ကျွန်မတို့ဟာ လွတ်လပ်မှုကို ယုံကြည်ပြီး ယုံကြည်တဲ့အတိုင်း ပြုမူနေထိုင်ရပါတယ်။ ဒါဟာ Vaclav Havel ရဲ့ Living in Truth (အမှန်တရားနှင့်အညီ နေထိုင်ခြင်း) လမ်းစဉ် ဖြစ်ပါတယ်။

လွတ်လပ်မှုမရှိတဲ့ နိုင်ငံတနိုင်ငံမှာ လွတ်လပ်မှုရှိတဲ့ ပြည်သူတွေကဲ့သို့ နေထိုင်ကြည့်ခြင်းအားဖြင့် ကြုံတွေ့ရနိုင်တဲ့ အန္တရာယ်တွေရှိသော်လည်းပဲ ကျွန်မတို့ဟာ မိမိသဘော မိမိဆန္ဒအတိုင်း မိမိတို့ရဲ့တာဝန်တွေကို ထမ်းဆောင်ကြပါတယ်။

ကျွန်မတို့ဟာ မှန်ကန်တယ်လို့ ကျွန်မတို့ယူဆတဲ့အရာကို လုပ်ကိုင်ဖို့ရွေးချယ်ခြင်းအားဖြင့် ကျွန်မတို့ရဲ့ လွတ်လပ်စွာ ရွေးချယ်ပိုင်ခွင့်ကို သုံးစွဲပါတယ်။ အဲဒီလို ရွေးချယ်မှုကြောင့် တခြား လွတ်လပ်ခွင့်တွေကို ကန့်သတ်ချုပ်ချယ်ခြင်းခံရတဲ့အထိ ရောက်သွားသည်တိုင်အောင်ပင်လျှင် ဒီရွေးချယ်ပိုင်ခွင့်ကို သုံးစွဲတာပါ။

ဘာကြောင့်လဲဆိုတော့ လွတ်လပ်မှုဟာ နောက်ထပ် လွတ်လပ်မှုတွေကို ဖြစ်ပေါ်စေတယ်လို့ ကျွန်မတို့ ယုံကြည်လို့ ဖြစ်ပါတယ်။

NLD အမျိုးသားဒီမိုကရေစီအဖွဲ့ချုပ်ဌာနချုပ်မှာ အခကြေးငွေမရဘဲ လာရောက်ပြီး အလုပ်လုပ်ကိုင်ပေးကြတဲ့ အဖွားအို အမယ်အိုတွေနဲ့ လူငယ်လူရွယ်တွေဟာ လွတ်လပ်မှုဆီကိုသွားရာ လမ်းကြမ်းကြီးကို ရွေးချယ်ခွင့်ဆိုတဲ့ သူတို့ရဲ့ အခွင့်အရေးကို သုံးစွဲနေကြတာပါ။

အခု မိတ်ဆွေတို့ကို ကျွန်မ စကားပြောနေတဲ့အခါမှာ ကျွန်မဟာ လွတ်လပ်စွာ ဆက်သွယ်ခွင့်ဆိုတဲ့ ကျွန်မရဲ့ အခွင့်အရေးကို သုံးစွဲနေတာပါ။ နောက်ပြီး ဒီအခွင့်အရေးကို ကျွန်မ သုံးစွဲနေတယ်ဆိုတဲ့အချက်ကိုကပင်လျှင် ကျွန်မရဲ့ စိတ်မှာ အများကြီး ပိုပြီး လွတ်လပ်တဲ့ လူတယောက်အဖြစ်ကို ခံစားရစေပါတယ်။

နိုင်ငံရေးဟာ လုပ်ကိုင်သူရဲ့ စိတ်နေစိတ်ထားနဲ့သင့်လျှော် လျှောက်ပတ်လို့ လုပ်ကိုင်ရတဲ့ အလုပ်မျိုးဖြစ်တယ်ဆိုတဲ့ Max Reber ရဲ့ အယူအဆအတိုင်း ပြောရမယ်ဆိုရင် အစိုးရဝါဒ သဘောမတူတဲ့လုပ်ငန်းဟာ အဲဒီအလုပ်မျိုး ဖြစ်ပါတယ်။

ကျွန်မတို့ဟာ လွတ်လပ်ခွင့်အကျိုးကို မျှော်ကိုးပြီးတော့ အစိုးရဝါဒ သဘောမတူတဲ့အလုပ်ကို လုပ်ကိုင်ကြပါတယ်။

ကျွန်မတို့ဟာ တချို့သူတွေအဖို့ မဖြစ်နိုင်ဘူးဆိုတဲ့ အသွင်ပေါက်နိုင်တဲ့ ရည်မှန်းချက်ကို ရောက်ဖို့အတွက် အရေးကြီးနဲ့ အရေးမကြီးတာ ခွဲခြားဉာဏ်ရှိရှိနဲ့ရော ထပ်ခါတလဲလဲ ကြိုးစားအားထုတ်ဖို့ အသင့်ရှိပါတယ်။

ကျွန်မတို့ဟာ ကျွန်မတို့လိုချင်တဲ့ လွတ်လပ်မှု ရည်မှန်းချက်ကို လက်တွေ့ အကောင်အထည်ဖြစ်လာအောင် ဆောင်ရွက်ဖို့ အတွက် ရင်ဆိုင်ရမယ့် အခြေအနေတွေကို မြင်နေလျက်နဲ့ ခက်ခက်ခဲခဲ ကြိုးပမ်းနေကြတာ ဖြစ်ပါတယ်။

ကျွန်မ ဒီဟောပြောချက်ကို Kipling ရဲ့ကဗျာထဲက ကျွန်မ အကြိုက်ဆုံး စာကြောင်း ကလေးတွေနဲ့ နိဂုံးချုပ်ပါရစေ။ ဒီစာကြောင်းကလေးတွေကို ကျွန်မအတွက် ရှာဖွေပေးတဲ့ Tim Garton-Ash ကိုလည်း ကျေးဇူး အများကြီးတင်ပါတယ်။

ဧကရာဇ် တပါး အခန်းနေရာ

ငါပေးအပ်မည် မဟုတ်ပါ။

ဘုရင်တပါး ကြွမြန်း အလာ

ငါ့လမ်းငါ သိမ်းပိုက်ထားမှာ။

သရဖူ သုံးဆင့် အရှင်ကြီး

ငါဦးညွတ်မည် မဟုတ်သတည်း။

သို့ရာတွင် ယခု ဤအရာ

ခြားနားလှပေတာ

အာဘော်လေသံ စွမ်းပကား

သူနှင့်ငါ ရန်မပွား။

အစောင့်အကြပ် တံခါးမှူး

သူ့ကိုဝင်ခွင့် ပေးပါအထူး။

တံတားအရှင် မြှောက်၍ထား

အောက်သို့ချပေး လိုက်ပါလား။

သူကား ငါတို့ အားလုံး၏ သခင်

အိပ်မက်မှန် မက်ခဲ့သည့် အိမ်မက်ရှင်။

ဆက်လက်ဖော်ပြပါမယ်။

သရုပ်ဖော် ကောက်ကြောင်းပန်းချီ - မင်းကျော်ခိုင်