မြန်မာနိုင်ငံကို ၅ ရက်ကြာခရီးစဉ်အဖြစ် ရောက်ရှိနေတဲ့ ကုလသမဂ္ဂရဲ့ မြန်မာနိုင်ငံ လူ့အခွင့်အရေးဆိုင်ရာ အထူးကိုယ်စားလှယ် မစ္စတာ သောမတ် အိုဟေး ကင်တားနားဟာ ဗုဒ္ဓဟူးနေ့ နေ့လယ်က ဒေါ်အောင်ဆန်းစုကြည်နဲ့ တွေ့ဆုံပြီး လူ့အခွင့်အရေး အခြေအနေကို ဆွေးနွေးခဲ့ကြပါတယ်။
မစ္စတာ ကင်တားနားဟာ ဒေါ်အောင်ဆန်းစုကြည်နဲ့ နာရီဝက်ကြာ သီးသန့်ဆွေးနွေးပြီးတဲ့နောက် အန်အယ်လ်ဒီ ဗဟို အလုပ်အမှုဆောင်အဖွဲ့နဲ့ တွေ့ဆုံခဲ့ပါတယ်။
အန်အယ်လ်ဒီ ဗဟိုအလုပ်အမှုဆောင်တွေနဲ့ တွေ့ဆုံကြရာမှာ မစ္စတာ ကင်တားနားက မြန်မာနိုင်ငံ လူ့အခွင့်အရေးနဲ့ပတ်သက်ပြီး အာဏာပိုင်တွေကို သူ အကြံပေးတင်ပြခဲ့တဲ့အချက်တွေနဲ့ သူ လေ့လာသိရှိခဲ့တဲ့ အခြေအနေတွေကို ရှင်းလင်းပြောပြခဲ့သလို အန်အယ်လ်ဒီဘက်ကလည်း မြန်မာနိုင်ငံ လူ့အခွင့်အရေး မြှင့်တင်နိုင်ရေးအတွက် သူတို့ လုပ်ဆောင်နေတာတွေကို ပြန်လည်ပြောပြလိုက်တယ်လို့ အဲဒီ တွေ့ဆုံပွဲမှာ ပါဝင်တဲ့ အန်အယ်လ်ဒီ ဗဟိုအလုပ်အမှုဆောင်အဖွဲ့ဝင် ဦးအုန်းကြိုင်က ဘီဘီစီကို ပြောပါတယ်။
မစ္စတာ ကင်တားနားရဲ့ ခရီးစဉ်နောက်ဆုံးနေ့ဖြစ်တဲ့ ကြာသပတေးနေ့မှာ သတင်းစာရှင်းလင်းပွဲပြုလုပ်ပြီး သူ့ခရီးစဉ်နဲ့ ပတ်သက်တဲ့အကြောင်းတွေကို ကိုယ်တိုင်ရှင်းပြပါလိမ့်မယ်လို့ပြောဆိုပြီး အန်အယ်လ်ဒီနဲ့ မစ္စတာ ကင်တားနားတို့ကြား အပြန်အလှန်ဆွေးနွေးခဲ့မှု အသေးစိတ်ကို ရှင်းပြဖို့ ဦးအုန်းကြိုင်က ငြင်းဆိုခဲ့ပါတယ်။
ဒေါ်အောင်ဆန်းစုကြည်ရဲ့နေအိမ်မှာ တွေ့ဆုံအပြီး သတင်းထောက်တွေရဲ့အမေးကို မစ္စတာ ကင်တားနားနဲ့ ဒေါ်အောင်ဆန်းစုကြည်တို့က ဖြေဆိုခဲ့ကြပါတယ်။
မစ္စတာ ကင်တားနားနဲ့ တွေ့ဆုံမှုကို အားရကျေနပ်မိတယ်လို့ ဒေါ်အောင်ဆန်းစုကြည်ကပြောကြောင်း ဦးအုန်းကြိုင်က ပြန်ပြောပါတယ်။
မစ္စတာ ကင်တားနားဟာ မြန်မာနိုင်ငံမှာ လူ့အခွင့်အရေး အခြေအနေတွေ တိုးတက်ကောင်းမွန်စေလိုတဲ့ စိတ်စေတနာနဲ့ ကြိုးပမ်းလုပ်ဆောင်နေပြီး လူ့အခွင့်အရေးဆိုင်ရာကိစ္စကို ကျွမ်းကျင်သူဖြစ်တာကြောင့် မြန်မာ့လူ့အခွင့်အရေးအတွက် အောင်မြင်အောင် လုပ်ဆောင်နိုင်မယ့်သူအဖြစ် ဒေါ်အောင်ဆန်းစုကြည် မြင်တဲ့အကြောင်းကို သတင်းထောက်တွေကို ပြောခဲ့ပါတယ်။
အင်းစိန်က အကျဉ်းသားတွေနဲ့လည်း တွေ့ဆုံ
အန်အယ်လ်ဒီ ခေါင်းဆောင်တွေနဲ့မတွေ့ခင် မစ္စတာ ကင်တားနားက အင်းစိန် အကျဉ်းထောင်တွင်းမှာရှိတဲ့ အကျဉ်းသား တချို့ကို ဗုဒ္ဓဟူးနေ့ မနက်ပိုင်းက သွားရောက်တွေ့ဆုံခဲ့ပါတယ်။
မစ္စတာ ကင်တားနားက တွေ့ချင်တယ်လို့တောင်းဆိုတဲ့အတွက် တွေ့ခွင့်ရခဲ့သူ နိုင်ငံရေးအကျဉ်းသား ၇ ယောက်စလုံးကို တယောက်ချင်း သီးခြားစီ လွတ်လွတ်လပ်လပ် တွေ့ခွင့်ရခဲ့တယ်လို့ ရန်ကုန်က ကုလသမဂ္ဂရုံး တာဝန်ခံ ဦးအေးဝင်းက ဘီဘီစီကို ပြောပါတယ်။
တွေ့ခွင့်ရခဲ့သူတွေကတော့ ဦးအောင်သိန်း၊ ဒေါက်တာ တင်မင်းထွတ်၊ မခင်ခင်နု၊ ကိုဖြိုးဝေအောင်၊ ကိုဝင်းဇော်နိုင်၊ ကိုစည်သူဇေယျ နဲ့ ကိုညီညီထွန်းတို့ ဖြစ်တယ်လို့လည်း သူက ပြောပါတယ်။
သတင်း - ဘီဘီစီ
Photos: - AP, Reuters, Getty Images
No comments:
Post a Comment