နိုင်ငံရေးအကျဉ်းသားတွေကို တရားဥပဒေနဲ့အညီ စစ်ဆေး အရေးယူတာမျိုးမလုပ်ဘဲ ထောင်ချတာဟာ တရားဥပဒေ စိုးမိုးမှုမရှိတာကို ပြတယ်လို့ ဒေါ်အောင်ဆန်းစုကြည်က ဥပမာ ပေးခဲ့ပါတယ်။
အန်အယ်ဒီ ရုံးချုပ်မှာ သောကြာနေ့က ကျင်းပခဲ့တဲ့ ၁၉၉၀ ရွေးကောက်ပွဲ အောင်နိုင်ခဲ့တဲ့ ၂၁ နှစ်မြောက် နှစ်ပတ်လည်နေ့ အခမ်းအနားမှာ သူက ပြောခဲ့တာပါ။
ဒေါ်အောင်ဆန်းစုကြည်က အကျဉ်းထောင် တွေကနေ ပြန်လွတ်လာတဲ့ နိုင်ငံရေး အကျဉ်းသားတွေကိုလည်း ကြိုဆိုရင်း ကိုယ့်ယုံကြည်ချက်အတိုင်း ခိုင်ခိုင်မာမာ စွဲကိုင်ပြီး ဆက်လက် အလုပ်လုပ်ကြဖို့ တိုက်တွန်းသွားပါတယ်။
ဒေါ်အောင်ဆန်းစုကြည်က အခုလို ပြောင်ပြောင်တင်းတင်း ဝေဖန်ပြောဆိုတာဟာ မြန်မာပြည် အခြေအနေ တိုးတက်မှု မရှိတဲ့အပေါ် စိတ်လက်မရှည်တာကို ဖော်ပြတာဖြစ်သလို အစိုးရက သူ့ကို ဘယ်လောက် လွတ်လွတ်လပ်လပ် လှုပ်ရှားခွင့် ပေးမလဲဆိုတာကို စမ်းသပ်လိုက်တာလည်းဖြစ်တယ်လို့ ပြောနိုင်ကြောင်း ဘီဘီစီ မြန်မာပိုင်း အစီအစဉ်ရဲ့ ဌာနမှူး ဒေါ်တင်ထားဆွေက သုံးသပ်ပါတယ်။
မြန်မာအစိုးရဘက်ကလည်း ဒေါ်အောင်ဆန်းစုကြည်ရဲ့ မိန့်ခွန်းကို အသေးစိတ် လေ့လာပြီး အန်အယ်ဒီကိုရှေ့ဆက် ဘယ်လိုကိုင်တွယ်ရမလဲဆိုတာ စဉ်းစားလိမ့်မယ်လို့ သူက ခန့်မှန်းပါတယ်။
ဒေါ်အောင်ဆန်းစုကြည်ဟာ မကြာခင်ကာလအတွင်း ရန်ကုန်မြို့ ပြင်ပကိုထွက်ဖို့ အစီအစဉ်ရှိတယ်လို့ အန်အယ်ဒီ ပါတီက ပြောပေမယ့် အစီအစဉ် အသေးစိတ်နဲ့ ရက်အတိအကျကိုတော့ ထုတ်ဖော် ပြောဆိုခြင်း မရှိသေးပါဘူး။
သတင်း - ဘီဘီစီ
Photos: AP, Reuters
No comments:
Post a Comment