ဒီနေ့ ဖတ်စရာသတင်းများ (မေလ ၂ ရက်)

- အလုပ်သမားရေး လှုပ်ရှားမှုအဖွဲ့ NLD ဖွဲ့စည်းမည်
- အလုပ်သမားသမဂ္ဂများ ဖွဲ့စည်းခွင့်ရရေး တောင်းဆို
- ဂျာမဏီမှာ လုပ်မယ့် မြန်မာနိုင်ငံ အပြောင်းအလဲဆိုင်ရာ နိုင်ငံတကာဆွေးနွေးပွဲ
- ဂြိုဟ်တုဆက်သွယ်ရေး အရှိန်မြှင့်ဖို့ မြန်မာအစိုးရ ပြင်ဆင်
- နေတိုးလေကြောင်းစစ်ကြောင့် ဂဒါဖီ သားတဦး သေဆုံး
- ဆီးရီယား ဒါရအာမြို့မှာ အရပ်သား ၆ ဦး ပစ်သတ်ခံရ
- မြန်မာနိုင်ငံတွင်း နိုင်ငံခြား ရင်းနှီးမြှုပ်နှံမှု တိုးများလာ
- လစ်ဗျားရှိ ဗြိတိန်နဲ့ အီတလီ သံရုံးများ တိုက်ခိုက်ခံရ
- ဒေါ်အောင်ဆန်းစုကြည်ကို ကမ္ဘာ့ကလေးများအဖွဲ့ နာယက ခန့်အပ်
- နိုင်ငံရေးအကျဉ်းသား လွတ်မြောက်ရေး လှုပ်ရှားမှု အရှိန်ရ
- ပိတ်ပင်ထားသည့်ကြားမှ သတ္တုရိုင်းများ တရုတ်နိုင်ငံဘက်ပို့
- စုံစမ်းရေးကော်မရှင်ဖွဲ့ဖို့ ဥပဒေမူကြမ်းတင်ရန် အမေရိကန်ကို တိုက်တွန်း

အလုပ်သမားရေး လှုပ်ရှားမှုအဖွဲ့ NLD ဖွဲ့စည်းမည်

By မသိင်္ဂီထိုက် တနင်္ဂနွေ, 01 မေ 2011

အလုပ်သမားတွေ အနေနဲ့ သူတို့ရဲ့ ရပိုင်ခွင့်တွေ အပြည့်အ၀ ရရှိစေဖို့ ဆောင်ရွက်နိုင်မယ့် မြန်မာနိုင်ငံလုံးဆိုင်ရာ အလုပ်သမား အစည်းအရုံး အဖွဲ့ချုပ် ဖွဲ့စည်းနိုင်ဖို့ မြန်မာနိုင်ငံတွင်းက လူ့အခွင့်အရေးနဲ့ ဒီမိုကရေစီရေး လှုပ်ရှားသူတွေ ပြင်ဆင်နေကြပါတယ်။ မြန်မာနိုင်ငံမှာ အလုပ်သမားတွေအတွက် လွတ်လပ်စွာ သင်းပင်းဖွဲ့စည်းခွင့် မရှိခဲ့တာဟာ နှစ်ပေါင်းများစွာ ကြာခဲ့ပြီ ဖြစ်တာကြောင့်လည်း အခုချိန်မှာ ကြိုးပမ်းနေကြတာ ဖြစ်ပါတယ်။ မြန်မာနိုင်ငံလုံးဆိုင်ရာ အလုပ်သမား အစည်းအရုံး အဖွဲ့ချုပ် အနေနဲ့ အလုပ်သမား အရေးတွေကို ဘယ်လောက်အထိ ဆောင်ရွက်ပေးနိုင်မလဲ ဆိုတာကို ဆက်သွယ် မေးမြန်းထားတဲ့ မသိင်္ဂီထိုက်က တင်ပြပေးထားပါတယ်။

မေလ ၁ ရက်နေ့မှာ ကျရောက်တဲ့ နိုင်ငံတကာ အလုပ်သမားနေ့မှာပဲ မြန်မာအလုပ်သမားတွေအတွက် နိုင်ငံလုံးဆိုင်ရာ အလုပ်သမား အစည်းအရုံး အဖွဲ့ချုပ်ကို ဖွဲ့စည်း တည်ထောင်သွားမယ်လို့ အမျိုးသား ဒီမိုကရေစီ အဖွဲ့ချုပ်က ကြေညာပါတယ်။ ယာယီ ဗဟိုကော်မတီကို စတင်ဖွဲ့စည်းနိုင်ဖို့ မကြာခင်မှာပဲ ပြည်နယ်နဲ့ တိုင်းအသီးသီးက ကိုယ်စားလှယ်တွေနဲ့ တွေ့ဆုံ ဆွေးနွေးကြမှာ ဖြစ်ပြီးတော့ ဒီ ပြည်နယ်နဲ့ တိုင်းအသီးသီးမှာလည်း ပြည်နယ်၊ တိုင်း အဖွဲ့အစည်းတွေကို ထပ်မံ ဖွဲ့စည်းသွားမယ်လို့ ဆိုပါတယ်။ နိုင်ငံလုံးဆိုင်ရာ အလုပ်သမား အစည်းအရုံး ပေါ်ပေါက်လာရင်တော့ ပါတီနဲ့ ပေါင်းစည်းထားမှာ မဟုတ်ဘဲ အလုပ်သမားတွေရဲ့ အဖွဲ့အစည်းအဖြစ် သီးခြား ရပ်တည်မှာ ဖြစ်ပါတယ်။

ဒီအဖွဲ့ကနေပြီးတော့ လက်ရှိ အစိုးရက နိုင်ငံတကာ အလုပ်သမား ပဋိညာဉ်တွေမှာ လက်မှတ်ထိုးပြီး ပြည်တွင်းမှာ ဥပဒေ ချမှတ်ထားတဲ့ အလုပ်သမားရေးရာ ရပိုင်ခွင့်တွေကို အကောင်အထည် ဖော်နိုင်ဖို့ ဆောင်ရွက်မှာ ဖြစ်တယ်လို့ ပါတီရဲ့ ဗဟိုကော်မတီ အဖွဲ့ဝင် အလုပ်သမားရေးရာအဖွဲ့ တာဝန်ခံ ဦးသန်းထွန်းက ပြောပါတယ်။

“အလုပ်သမား ဥပဒေတွေ ပြဋ္ဌာန်းခဲ့တယ်။ အလုပ်သမား ဥပဒေပေါင်းဆိုရင် မြန်မာပြည်မှာ ပြဋ္ဌာန်းထားတာ ၃၀ လောက်ရှိတယ်။ ဥပဒေပြဋ္ဌာန်းချက်တွေက အရေးအကြီးဆုံးကတော့ လွတ်လပ်စွာ အလုပ်သမားများ ဖွဲ့စည်းနိုင်ခွင့်၊ ပြောဆိုနိုင်ခွင့်၊ ဆွေးနွေးနိုင်ခွင့်၊ နောက် Payment and Wages Act လုပ်ခကြေးငွေ ခံစားနိုင်ခွင့်၊ Leave and Holiday Act အဲဒါတွေ၊ ရပြီးသား အက်ဥပဒေတွေကို ပြန်ပြီးတော့ ရရှိဖို့အတွက် ဆောင်ရွက်မယ်လေ။”

မကြာခင်က ဖျက်သိမ်းလိုက်တဲ့ စစ်အစိုးရ လက်ထက်တုန်းကတော့ အလုပ်သမားတွေ အနေနဲ့ လွတ်လပ်တဲ့ အလုပ်သမား အဖွဲ့အစည်းတွေ ဖွဲ့စည်းခွင့် မရခဲ့ဖူးပါဘူး။

ဒါပမဲ့ အခု အစိုးရသစ် သမ္မတ ဦးသိန်းစိန်ကတော့ နိုင်ငံရဲ့ ကုန်ထုတ်လုပ်ငန်းကဏ္ဍ တိုးတက်အောင် လုပ်ဆောင်ပြီး အလုပ်အကိုင် အခွင့်အလမ်းသစ်တွေ ဖော်ထုတ်ပေးမယ်၊ အလုပ်သမားတွေ ၀င်ငွေတိုးရေး၊ အလုပ်ခွင် ဘေးအန္တရာယ် ကင်းရှင်းရေးနဲ့ လူနေမှု အဆင့်အတန်း မြင့်မားလာရေးအတွက် ကြိုးစား လုပ်ဆောင်သွားမယ်လို့ မေလ ၁ ရက်နေ့ အလုပ်သမားနေ့ သ၀ဏ်လွှာမှာ ဖော်ပြပါတယ်။
အလုပ်သမားအရေး ဆောင်ရွက်လိုတဲ့ အစိုးရသစ် လက်ထက်မှာ အခု ဖွဲ့စည်းဖို့ ပြင်ဆင်နေတဲ့ နိုင်ငံလုံးဆိုင်ရာ အလုပ်သမားများ အစည်းအရုံးကို အောင်အောင်မြင်မြင် ဖွဲ့စည်းဖို့ အစိုးရအနေနဲ့ ကူညီပေးလိမ့်မယ်လို့လည်း အမျိုးသား ဒီမိုကရေစီ အဖွဲ့ချုပ်က ပြောပါတယ်။

လက်ရှိ မြန်မာအလုပ်သမားတွေ အနေနဲ့ကတော့ အလုပ်သမား ရပိုင်ခွင့်တွေ အပြည့်အ၀ မရရှိတာတွေ၊ အခွင့်အရေး ချိုးဖောက်ခံနေရတာတွေ ရှိနေလို့ ဒီအခြေအနေကို ကြားဝင် ဖြေရှင်းနိုင်မယ့် အလုပ်သမားရေးရာ အဖွဲ့အစည်းကြီးတခု လိုအပ်တယ်လို့လည်း ဦးသန်းထွန်းက ပြောပါတယ်။
“အလုပ်သမား အဖွဲ့အစည်း ဖွဲ့ပိုင်ခွင့် မရှိဘူး။ အလုပ်ချိန်နဲ့ ပတ်သက်လို့ရှိရင်လည်း ခိုင်းသလောက် လုပ်ရတယ်၊ လုပ်ခကြေးငွေ ကျပြန်တော့လည်း သူတို့ပေးသလောက် ရတယ်။ ကမ္ဘာ့စံချိန်တို့၊ မြန်မာ့စံချိန်တို့ မရှိဘူး။ ကျန်းမာရေးတို့ ဘာတို့ ဆိုတာတွေကလည်း အများကြီးပဲ။ အဲဒါတွေနဲ့ ပတ်သက်လို့ ရရှိရေးအတွက် ပုဂ္ဂလိက အလုပ်ရှင်ဆိုရင် ပုဂ္ဂလိက အလုပ်ရှင် ပြောမယ်၊ အစိုးရက အလုပ်ရှင်ဆိုရင် အစိုးရကို ပြောရမှာပေါ့။”

မြန်မာအလုပ်သမားတွေမှာ အလုပ်ချိန် ပိုပြီး ခိုင်းစေခံရတာတွေ၊ လုပ်ခ လစာ အပြည့်အ၀ မရရှိတာတွေ၊ လူမှုရေးဆိုင်ရာ ထောက်ပံ့မှု မရရှိတာတွေအတွက် ပြီးခဲ့တဲ့ နှစ်ပိုင်းတွေမှာလည်း စက်မှုဇုန်တွေမှာ အလုပ်သမားတွေရဲ့ ဆန္ဒပြ တောင်းဆိုမှုတွေ ရှိခဲ့ပါတယ်။

ပြည်ပအခြေစိုက် မြန်မာနိုင်ငံ အလုပ်သမား သမဂ္ဂများ အဖွဲ့ချုပ်ကလည်း မေလ ၁ ရက်နေ့မှာ ကျရောက်တဲ့ အပြည်ပြည်ဆိုင်ရာ အလုပ်သမားများနေ့မှာ မြန်မာအစိုးရက အလုပ်သမား အခွင့်အရေး လှုပ်ရှားသူတွေကို ဖမ်းဆီးထားတာတွေကို ပြန်လွှတ်ပေးဖို့ တောင်းဆိုလိုက်ပါတယ်။

အလုပ်သမားသမဂ္ဂများ ဖွဲ့စည်းခွင့်ရရေး တောင်းဆို

2011-05-01 RFA

မြန်မာနိုင်ငံမှာ အလုပ်သမားသမဂ္ဂ တည်ထောင်ခွင့်မရှိတာ နှစ်အတော် ကြာမြင့်နေပြီ ဖြစ်ပြီး ဒီကနေ့အထိ အလုပ်သမား အခွင့်အရေးတွေ ကန့်သတ်ခံနေရကြောင်း ဒီနေ့ ကျရောက်တဲ့ ၁၂၁ ကြိမ်မြောက် ကမ္ဘာ့အလုပ်သမားနေ့ (မေဒေးနေ့) မှာ အလုပ်သမားအရေး လှုပ်ရှားသူတွေက ပြောဆိုလိုက်ပါတယ်။

ကမ္ဘာ့ အလုပ်သမားအဖွဲ့ချုပ် (ILO) နဲ့ သဘောတူ လက်မှတ်ရေးထိုးထားတဲ့ စာချုပ်အတိုင်း အလုပ်သမားတွေရဲ့ အခွင့်အရေး ကာကွယ်ပေးဖို့ မြန်မာအမျိုးသား အလုပ်သမားများသမဂ္ဂ ပေါ်ပေါက်ရေး ကြိုးပမ်းသူများအဖွဲ့ (MNTU) က တောင်းဆိုလိုက်ပါတယ်။ အဖွဲ့ရဲ့ပြောခွင့်ရသူ ဒေါ်အေးမြင့်သန်းက အာအက်ဖ်အေကို အခုလို ပြောပြပါတယ်။

“ကျမတို့ မြန်မာနိုင်ငံမှာလည်းပဲ လွတ်လပ်ပြီး တရားမျှတဲ့ အလုပ်သမား သမဂ္ဂ၊ လယ်သမားသမဂ္ဂတွေကို လွတ်လွတ်လပ်လပ် ဖွဲ့စည်းခွင့် လိုအပ်ပါတယ်။ ဒါ့ပြင် အလုပ်သမားတွေနဲ့ ပတ်သက်တဲ့ ဥပဒေမှာလည်း အလုပ်သမားတွေအတွက် အာမ,ခံနိုင်မယ့်၊ အလုပ်သမားတွေရဲ့ ကောင်းကျိုးတွေကို ရှေးရှုမယ့် ဥပဒေတွေကို ဥပဒေတွေကိုပဲ ပြဋ္ဌာန်းသင့်ပါတယ်။ ဒီနှစ်ခုကိုပဲ မီးမောင်းထိုးပြချင်ပါတယ်”

အရပ်သားအစိုးရသစ် ဖြစ်လာရင် အလုပ်သမားသမဂ္ဂတွေ ဖွဲ့စည်းခွင့် ပြုမယ်လို့ အလုပ်သမား ဝန်ကြီးဌာန တာဝန်ရှိသူတွေ ပြောဆိုထားတဲ့အတိုင်း အလုပ်သမားသမဂ္ဂများ ဖွဲ့စည်းခွင့်ဆိုင်ရာ ဥပဒေကို သမ္မတ ဦးသိန်းစိန် အနေနဲ့ အမြန်ဆုံး ထုတ်ပြန်ပေးဖို့ လိုအပ်ကြောင်းလည်း MNTU ရဲ့ကြေညာချက်မှာ ဖော်ပြထားပါတယ်။

အလားတူ (၁၂၁) ကြိမ်မြောက် ကမ္ဘာ့အလုပ်သမားနေ့ အထိမ်းအမှတ်အနေနဲ့ အလုပ်သမားများ သွေးစည်းညီညွတ်ရေး အဖွဲ့ချုပ် (မြန်မာနိုင်ငံ)၊ ပြည်ပအခြေစိုက် မြန်မာအလုပ်သမား သမဂ္ဂများအဖွဲ့ချုပ် (FTUB)၊ မြန်မာနိုင်ငံ အလုပ်သမား သွေးစည်းညီညွတ်ရေးအဖွဲ့ BLSO တို့ကလည်း ကြေညာချက်တွေ အသီးသီး ထုတ်ပြန်ခဲ့ပါတယ်။

ဒါ့အပြင် ဂျပန်နိုင်ငံမှာလည်း ရင်ဂို (RENGO) ဂျပန် အလုပ်သမားသမဂ္ဂများ အဖွဲ့ချုပ်က စီစဉ်တဲ့ ဂျပန် အလုပ်သမားထု စည်းဝေးပွဲကို တိုကျိုမြို့ ယိုယိုးဂိ ပန်းခြံမှာ ကျင်းပခဲ့ရာမှာ မြန်မာနိုင်ငံ အလုပ်သမားသမဂ္ဂလည်း တက်ရောက်ခဲ့ပါတယ်။

အလားတူ ဒီကနေ့ ကျရောက်တဲ့ နိုင်ငံတကာ အလုပ်သမားနေ့ကို ဂုဏ်ပြု ကြိုဆိုတဲ့အနေနဲ့ ပုသိမ်မြို့ မာတ ရပ်ကွက်အတွင်း အလုပ်သမားတချို့ စုရုံးခဲ့ကြပြီး အလုပ်သမားနေ့ အထိမ်းအမှတ် ပြုလုပ်ခဲ့ကြတယ်လို့ သတင်း ရရှိပါတယ်။

ဒီ အထိမ်းအမှတ် အခမ်းအနားကို တက်ရောက်သူ အများစုဟာ ကာယလုပ်သားတွေ ဖြစ်တယ်လို့ သိရပါတယ်။ အလုပ်သမား အခွင့်အရေး ကာကွယ်ရေးနဲ့ အလုပ်သမားသမဂ္ဂ ပေါ်ထွန်းရေးတွေကို ဆက်လက်ဆောင်ရွက် ဆောင်ရွက်သွားမှာ ဖြစ်ကြောင်း ဦးဆောင် လုပ်ကိုင်သူတွေက ပြောဆိုခဲ့ကြပါတယ်။

မကွေးတိုင်း ရေနံချောင်းမြို့နယ် NLD အမျိုးသားဒီမိုကရေစီ အဖွဲ့ချုပ်ဝင်တွေဟာလည်း ရေစကြိုမြို့နယ် မီးဘေးကယ်ဆယ်ရေး အလှူငွေနဲ့ ရွှေဝါရောင်တော်လှန်ရေးမှာ အဖမ်းဆီးခံရပြီး နှစ်ရှည်ထောင်ဒဏ် ကျခံနေရတဲ့ ဦးဣဿရိယ ခေါ် ဦးပဉ္စင်း ဂျောင်းဂျောင်းရဲ့ မိသားစုကို ထောက်ပံ့ရေး အကူအညီတွေ ဒီကနေ့ ပေးအပ်ခဲ့ပါတယ်။ ရေနံချောင်းမြို့နယ် NLD စည်းရုံးရေးကော်မတီ ဒုတိယ ဥက္ကဋ္ဌ ဒေါ်ခင်စောဌေးအိမ်မှာ မေဒေးနေ့ အထိမ်းအမှတ်အဖြစ် ဒီနေ့ မွန်းလွဲပိုင်းက တွေ့ဆုံပြီး လှူဒါန်းခဲ့တာလို့ NLD အဖွဲ့ဝင် ဦးတင့်လွင်က ပြောပြပါတယ်။

ဂျာမဏီမှာလုပ်မယ့် မြန်မာနိုင်ငံ အပြောင်းအလဲဆိုင်ရာ နိုင်ငံတကာဆွေးနွေးပွဲ

2011-05-01 RFA

မြန်မာနိုင်ငံမှာ အစိုးရသစ် တက်လာတာဟာ အပြောင်းအလဲလား၊ အတုအယောင်လားဆိုတဲ့ ခေါင်းစဉ်နဲ့ မြန်မာ့ ဒီမိုကရေစီရေး နိုင်ငံတကာ ဆွေးနွေးပွဲတခုကို ဂျာမဏီနိုင်ငံ ဘာလင်မြို့မှာ လာမယ့် မေလ ၄ ရက်နေ့မှာ ကျင်းပမယ်လို့ သတင်းရရှိပါတယ်။

ဒီပွဲမှာ မြန်မာနိုင်ငံက လွှတ်တော်မှာ အတိုက်အခံ ဒီမိုကရေစီ အင်အားစုတွေ ပြောရေးဆိုခွင့် ရမရ၊ အမျိုးသားဒီမိုကရေစီ အဖွဲ့ချုပ်ရဲ့ အနာဂတ်၊ မြန်မာနိုင်ငံရဲ့ အလားအလာ၊ အစိုးရအဖွဲ့တွင်းက တိုင်းရင်းသားတွေရဲ့ အခန်းကဏ္ဍ စတဲ့ အကြောင်းအရာတွေကို ဆွေးနွေးကြမှာ ဖြစ်သလို မြန်မာနိုင်ငံအပေါ် ချမှတ်ထားတဲ့ EU ဥရောပသမဂ္ဂရဲ့ စီးပွားရေး ပိတ်ဆို့အရေးယူမှု ဆက်လက် ထားရှိသင့် မသင့်ကိုလည်း ဆွေးနွေးကြမယ်လို့ သိရပါတယ်။

ဒီကိစ္စနဲ့ ပတ်သက်ပြီး တက်ရောက်ဆွေးနွေးဖို့ ဖိတ်ကြားခံထားရတဲ့ အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ) က နိုင်ငံခြားရေးဌာန ကိုယ်စားလှယ် ဦးညိုအုန်းမြင့်က RFA ကို အခုလို ပြောပါတယ်။

“ကျနော်နဲ့ ဧရာဝတီ ဦးအောင်ဇော်ကတော့ လူ့အခွင့်အရေး ရှုထောင့်ဘက်က၊ နောက်တခါ ဒီမိုကရေစီ လှုပ်ရှားတဲ့ အတိုက်အခံ အင်အားစုတွေ ရှုထောင့်ဘက်က ဆွေးနွေးမှာ ဖြစ်ပါတယ်။ ကျန်ပုဂ္ဂိုလ် သုံးဦးကတော့ မြန်မာနိုင်ငံပေါ်မှာ ချမှတ်ထားတဲ့ စီးပွားရေးပိတ်ဆို့မှုမှာ နိုင်ငံရေးအရ မတိုးတက်လာရင် သူတို့အနေနဲ့ စီးပွားရေးပိတ်ဆို့မှုကို ပြန်ပြီး ရုတ်သိမ်းသင့်တယ် ဆိုတဲ့ဘက်က ဆွေးနွေးမယ်လို့ ကျနော်တို့ သိထားပါတယ်”

ဒီပွဲမှာ တက်ရောက်ဆွေးနွေးမယ့် မြန်မာကိုယ်စားလှယ်တွေကတော့ ရွေးကောက်ပွဲဝင်ခဲ့တဲ့ ချင်းတိုးတက်ရေးပါတီက ဦးရှင်ထွန်း၊ မြန်မာအီးဂရက်စ် အဖွဲ့ခေါင်းဆောင် ဒေါက်တာနေဝင်းမောင်၊ Euro-Burma ရုံးက ညွှန်ကြားရေးမှူး ဦးဟန်ညောင်ဝေ၊ ပြည်ပအခြေစိုက် အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ) က နိုင်ငံခြားရေးဌာန ကိုယ်စားလှယ် ဦးညိုအုန်းမြင့်၊ ထိုင်းနိုင်ငံအခြေစိုက် ဧရာဝတီမဂ္ဂဇင်း အယ်ဒီတာ ဦးအောင်ဇော်နဲ့ ဘာလင်အခြေစိုက် Burma Project အဖွဲ့က ဦးခင်မောင်ရင် တို့ ဖြစ်ပါတယ်။

ဒီဆွေးနွေးပွဲကို ဂျာမဏီအခြေစိုက် Burma Initiative Asiahouse အဖွဲ့နဲ့ မြန်မာပရိုဂျက်-ဘာလင် အဖွဲ့က စီစဉ်ကျင်းပမှာ ဖြစ်ပြီး ဂျာမန်လူ့အခွင့်အရေး ကော်မရှင်မင်းကြီးက အဖွင့်မိန့်ခွန်း ပြောမယ်လို့ သိရပါတယ်။

ဂြိုဟ်တုဆက်သွယ်ရေး အရှိန်မြှင့်ဖို့ မြန်မာအစိုးရ ပြင်ဆင်

By ဗွီအိုအေ (မြန်မာဌာန) တနင်္ဂနွေ, 01 မေ 2011

ဆက်သွယ်ရေးဂြိုဟ်တု လွှတ်တင်နိုင်ရေး ကြိုးပမ်းဖို့အတွက် ဗဟိုကော်မတီနဲ့ လုပ်ငန်းအဖွဲ့တို့ကို မြန်မာအာဏာပိုင်တွေက ဖွဲ့စည်းလိုက်ပါတယ်။ ၅ ဦးပါ ဗဟိုကော်မတီကိုတော့ ပို့ဆောင်ရေးနဲ့ စာတိုက်၊ ကြေးနန်းနဲ့ ဆက်သွယ်ရေးဝန်ကြီး အငြိမ်းစား ဗိုလ်ချုပ်ကြီးဟောင်း ဦးသိန်းထွန်းက ဦးဆောင်မှာဖြစ်ပြီး ၇ ဦးပါ လုပ်ငန်းအဖွဲ့ကိုတော့ ကာကွယ်ရေး ၀န်ကြီးဌာန ဆက်သွယ်ရေး ညွှန်ကြားရေးမှူးလည်းဖြစ်၊ ကာကွယ်ရေး ၀န်ကြီးဌာန ဒုတိယ၀န်ကြီးလည်းဖြစ်တဲ့ ဗိုလ်ချုပ် ကျော်ညွန့်က ဦးဆောင်မှာ ဖြစ်တယ်လို့ တရုတ်အစိုးရပိုင် ဆင်ဟွာသတင်းမှာ ကိုးကား ဖော်ပြထားပါတယ်။

ဒီ မြန်မာအစိုးရပိုင် ဆက်သွယ်ရေးဂြိုဟ်တု လွှတ်တင်နိုင်ရေး လုပ်ငန်းတွေ အကောင်အထည် ဖော်နိုင်ဖို့အတွက် ထိုင်းနိုင်ငံနဲ့ မြန်မာအစိုးရကြား ပြီးခဲ့တဲ့ သီတင်းပတ် အစောပိုင်းက နေပြည်တော်မှာ နားလည်မှု စာချွန်လွှာ လက်မှတ်ရေးထိုးခဲ့ကြတယ်လို့ ဆိုပါတယ်။ နားလည်မှု စာချွန်လွှာ လက်မှတ်မရေးထိုးခင် ထိုင်းဂြိုဟ်တု ဆက်သွယ်ရေးကုမ္ပဏီ Thaicom ပုဂ္ဂလိက ကုမ္ပဏီနဲ့ မြန်မာအစိုးရ ကိုယ်စားလှယ်တွေ ဆက်သွယ်ရေးဂြိုဟ်တု ၀န်ဆောင်မှုနဲ့ နည်းပညာဆိုင်ရာ ကိစ္စရပ်တွေကို ၃ ရက်ကြာ ဆွေးနွေးခဲ့ကြတယ်လို့ ဆိုပါတယ်။

ဆက်သွယ်ရေးဂြိုဟ်တု လွှတ်တင်နိုင်ရေး ဗဟိုကော်မတီ အနေနဲ့ အစိုးရပိုင် ဆက်သွယ်ရေးဂြိုဟ်တု လွှတ်တင်နိုင်ရေး ကိစ္စတွေ၊ ဆက်သွယ်ရေးဂြိုဟ်တု လွှတ်တင်ရေးနဲ့ဆိုင်တဲ့ နားလည်မှု စာချွန်လွှာတွေ အတည်ပြုပေးရေးနဲ့ အာကာသ နည်းပညာများ ရရှိရေးဆိုင်ရာ လုပ်ငန်းတွေ ဦးဆောင် လုပ်ကိုင်ပေးသွားဖို့တို့ ဖြစ်တယ်လို့ ဆိုပါတယ်။

မြန်မာနိုင်ငံဟာ ကမ္ဘောဒီးယားနိုင်ငံပြီးရင် Thaicom ပုဂ္ဂလိက ကုမ္ပဏီရဲ့ ၀န်ဆောင်မှု လုပ်ငန်းတွေကို လက်ခံရယူမယ့် ဒုတိယနိုင်ငံ ဖြစ်ပါတယ်။

Myanmar International TV (MITV) နိုင်ငံတကာ ပရိသတ်တွေအတွက် သတင်းနဲ့ မှတ်တမ်းရုပ်ရှင်တွေပါတဲ့ နိုင်ငံတကာ ရုပ်မြင်သံကြား အစီအစဉ်ကို အင်္ဂလိပ်ဘာသာစကားနဲ့ ၂၀၁၀ ခုနှစ် မတ်လ ၃၁ နေ့မှာ စပြီး ဆက်သွယ်ရေး ဂြိုဟ်တုကတဆင့် မြန်မာအစိုးရက ထုတ်လွှင့် ပြသနေခဲ့တာ ဖြစ်ပါတယ်။

နေတိုးလေကြောင်းစစ်ကြောင့် ဂဒါဖီ သားတဦး သေဆုံး

By VOA စနေ, 30 ဧပြီ 2011

နေတိုးတပ်ဖွဲ့ရဲ့ လေကြောင်း တိုက်ခိုက်မှုကြောင့် လစ်ဗျားခေါင်းဆောင် ဂဒါဖီ သားတဦးနဲ့ မြေးသုံးဦး သေဆုံးသွားပါတယ်။

နေတိုးတပ်ဖွဲ့ရဲ့ လေကြောင်းတိုက်ခိုက်မှုကြောင့် လစ်ဗျားခေါင်းဆောင် ဂဒါဖီ သားတဦးနဲ့ မြေးသုံးဦး သေဆုံးသွားပါတယ်။ ဒါပေမယ့် မိုမာဂဒါဖီကတော့ အသက်ရှင် လွတ်မြောက်ခဲ့ပါတယ်။ စနေနေ့ သတင်းစာရှင်းလင်းပွဲအတွင်းမှာတော့ အခုလို ဂဒါဖီသားတဦးနဲ့ မြေးသုံးဦးသေဆုံးတယ်ဆိုတာ လစ်ဗျားအစိုးရပြောခွင့်ရသူ မူဆာ အီဗရာဟင်က အတည်ပြုကြေညာပါတယ်။

အသက် ၂၉နှစ်အရွယ် ဆာရီ အယ် အာရဗ် ဂဒါဖီ နဲ့ ဂဒါဖီရဲ့မြေးတွေဟာ လစ်ဗျားခေါင်းဆောင်ကဒါဖီကို နေတိုးတပ်ဖွဲ့က လုပ်ကြံတိုက်ခိုက်မှုအတွင်းမှာ သေဆုံးသွားရတယ်လို့ သူက ပြောပါတယ်။

မစ္စတာဂဒါဖီနဲ့ သူ့ဇနီးဖြစ်သူဟာ အဲဒီအချိန် သူ့သားနေအိမ်မှာရှိနေပေမယ့် ထိခိုက်ဒဏ်ရာမှု မရှိဘူးလို့ ပြောပါတယ်။ အိမ်ကတော့ အတော်လေး ပျက်စီးသွားတာတွေ့ရပါတယ်။

ဒီမတိုင်ခင်ကတော့ လစ်ဗျားခေါင်းဆောင်ကဒါဖီက လစ်ဗျားပဋိပက္ခအဆုံးသတ်ရေး စေ့စပ်ဆွေးနွေးဖို့ နေတိုးတပ်ဖွဲ့ကို ကမ်းလှမ်းခဲ့ပါတယ်။ နေတိုးတပ်ဖက်ကတော့ ဒါကို လက်မခံ ပယ်ချပါတယ်။

လစ်ဗျားအစိုးရအနေနဲ့ အပြောမဟုတ် လက်တွေ့ လုပ်ပြတာကိုပဲ မြင်လိုတယ်လို့ နေတိုး တာဝန်ရှိသူတွေက စနေနေ့က တုန့်ပြန်ပါတယ်။ လစ်ဗျားအစိုးရပ အပစ်အခတ်ရပ်စဲရေးကို အရင် အကြိမ်ကြိမ် ကြေညာခဲ့ပေမယ့် အရပ်သားတွေကို ဆက်ပြီး တိုက်ခိုက်နေတုန်းပဲလို့ နေတိုးဖက်က ပြောပါတယ်။

လစ်ဗျားမှာ အရပ်သားတွေကို အန္တရာယ်ပေးနေသရွှေ့တော့ နေတိုးမဟာမိတ်တပ်တွေက စစ်ဆင်ရေးတွေ ဆက်လုပ်သွားမယ်လို့ ဆိုပါတယ်။

စနေနေ့ မနက်ပိုင်းက ဂဒါဖီက ရုပ်မြင်သံကြားကနေ ၁ နာရီခွဲကြာ မိန့်ခွန်းရှည်ပြောပြီး၊ နေတိုးဖက်က တိုက်ခိုက်တာတွေ ရပ်ပေးရင် စေ့စပ်ဆွေးနွေးမယ်ဆိုပြီး ကမ်းလှမ်းသွားတာပါ။ ဂဒါဖီ အဲဒီ မိန့်ခွန်းပြောနေချိန်မှာလဲ အဲဒီအနီးကို နေတိုးတပ်ဖွဲ့က ဗုံးကြဲတိုက်ခိုက်တာ လုပ်ခဲ့ပါသေးတယ်။

ဆီးရီယား ဒါရအာမြို့မှာ အရပ်သား ၆ ဦး ပစ်သတ်ခံရ

စနေ, 30 ဧပြီ 2011

ဆီးရီးယားနိုင်ငံ ဒါရအာမြို့မှာ စနေနေ့က စစ်တပ်ရဲ့ လက်ဖြောင့်သေနတ်သမားတွေက အရပ်သားတွေကို ချောင်းမြောင်း ပစ်ခတ်ခဲ့လို့ ၆ ဦးသေဆုံးခဲ့တယ်လို့ ဒီမိုကရေစီရေး လှုပ်ရှားသူတွေက ပြောပါတယ်။ တင့်ကားပေါ်က ပစ်လိုက်တဲ့ ကျည်ဆံက အနားကအိမ်တလုံးကို ထိခဲ့ရာမှာ အိမ်ထဲက အမျိုးသမီးတယောက် နဲ့ သူ့သမီး ၂ ယောက်စလုံး သေဆုံးသွားတယ်လို့ ဆိုပါတယ်။

ဆီးရီးယား အစိုးရဆန့်ကျင်ရေး ဆန္ဒပြသူတွေစုဝေးရာ ဒါရအာမြို့က ဗလီဝတ်ကျောင်းတခုကို လုံခြုံရေး တပ်ဖွဲ့က တိုက်ခိုက်စီးနင်းလိုက်တယ်လို့ မျက်မြင်တွေက ပြောကြပါတယ်။ ဒါရအာမြို့ အိုမာရီဗလီကို စစ်တပ်က တင့်ကားတွေ အပါအ၀င် လုံခြုံရေးတပ်ဖွဲ့က ၀င်စီးခဲ့ပြီး ဗလီတွင်း စခန်းချနေကြတဲ့ ဆန္ဒပြသူတွေကို မောင်းထုတ်ခဲ့တယ်လို့ မျက်မြင်တွေက ပြောပါတယ်။

ဒါရအာမြို့ အပါအ၀င် နိုင်ငံတ၀န်း ဆန္ဒပြပွဲတွေ နှိမ်နင်းရာမှာ ၆၅ ယောက် သေဆုံးခဲ့ရတယ်လို့ ဒီမိုကရေစီရေး လှုပ်ရှားသူတွေက ပြောပါတယ်။ လွန်ခဲ့တဲ့ သီတင်း ၆ ပတ်ကစတင်ခဲ့တဲ့ ဆန္ဒပြပွဲတွေအတွင်း အရပ်သား ၅၆၀ ထက်မနည်း သေဆုံးခဲ့ရတယ်လို့ လူ့အခွင့်အရေး စောင့်ကြည့်တဲ့အဖွဲ့တွေက မှတ်တမ်းတင် ထားပါတယ်။

ဒီမိုကရေစီရေး ဆန္ဒပြသူတွေအပေါ် အင်အားသုံး နှိပ်ကွပ်နေတာကို ကန့်ကွက်တဲ့အနေနဲ့ ဒါရာဒေသက နောက်ထပ် အာဏာရ ဘတ်(သ်) ပါတီဝင် ၁၃၈ ယောက် နုတ်ထွက်လိုက်ကြပါတယ်။ တချိန်တည်းမှာပဲ ဒမတ်စ်ကပ်စ်မြို့မှာ အစိုးရဆန့်ကျင်ရေး ကြွေးကျော် ခဲ့ကြတဲ့ အမျိုးသမီး ၅၀ ခန့်အနက် ၁၁ ယောက် အဖမ်းခံရပါတယ်။

ဆီးရီးယားမှာ အရပ်သားတွေကို အင်အားသုံး နှိပ်ကွပ်တာကြောင့် ကုလသမဂ္ဂ လူ့အခွင့်အရေးကောင်စီကနေ ပြစ်တင် ရှုတ်ချလိုက်ပြီး အကြမ်းဖက် သတ်ဖြတ်မှုတွေနဲ့ပတ်သက်လို့ စုံစမ်းစစ်ဆေးဖို့ သဘောတူလိုက် ကြပါတယ်။

မြန်မာနိုင်ငံတွင်း နိုင်ငံခြား ရင်းနှီးမြှုပ်နှံမှု တိုးများလာ
By မသိင်္ဂီထိုက် တနင်္ဂနွေ, 01 မေ 2011

ဒီနှစ်ထဲ မြန်မာနိုင်ငံမှာ နိုင်ငံခြား ရင်းနှီးမြှုပ်နှံမှုတွေ ၂ ဆကျော် မြင့်တက်လာတယ်ဆိုတဲ့ အစိုးရရဲ့ ထုတ်ပြန်ချက်နဲ့ ပတ်သက်ပြီး စီးပွားရေး ပညာရှင်တချို့က သူတို့ရဲ့ အမြင်တွေကို ပြောပြပါတယ်။ ဒီ နိုင်ငံတကာ ရင်းနှီးမြှုပ်နှံတွေက စွမ်းအင်၊ ရေနံနဲ့ သဘာဝဓာတ်ငွေ့၊ သတ္တုတူးဖော်ရေးဘက်မှာ ပိုတိုးလာပေမဲ့ တကယ်တမ်း နိုင်ငံသားတွေရဲ့ အလုပ်အကိုင် အခွင့်အလမ်းကို ပိုပြီး များလာစေနိုင်တဲ့ ခရီးသွားလုပ်ငန်းလို၊ စိုက်ပျိုးရေးနဲ့ ကုန်ထုတ်လုပ်ရေး လုပ်ငန်းလို ကဏ္ဍတွေမှာ ရင်းနှီးမြှုပ်နှံမှုက တိုးမလာပါဘူး။ မြန်မာနိုင်ငံက နိုင်ငံတကာ ရင်းနှီးမြှုပ်နှံမှု အနေအထား၊ အခြေအနေကိုတော့ မသိင်္ဂီထိုက်က ဆက်သွယ်မေးမြန်းပြီး တင်ပြပေးထားပါတယ်။

နိုင်ငံခြား ရင်းနှီးမြှုပ်နှံမှုဟာ ၂၀၀၉-၂၀၁၀ ဘဏ္ဍာရေးနှစ်မှာ အမေရိကန်ဒေါ်လာ သန်း ၁၆,၀၀၀ ကနေ ၂၀၁၀-၂၀၁၁ ဘဏ္ဍာရေးနှစ်မှာတော့ အမေရိကန်ဒေါ်လာ သန်း ၃၆,၀၀၀ ကျော်အထိ မြင့်တက်လာတယ်လို့ မြန်မာအစိုးရက ထုတ်ပြန်ပါတယ်။ ဒီလို မြင့်တက်လာတဲ့ ရင်းနှီးမြှုပ်နှံမှုတွေက ရေနံနဲ့ သဘာဝဓာတ်ငွေ့၊ စွမ်းအင်နဲ့ သတ္တုတူးဖော်ရေး လုပ်ငန်းတွေမှာ ၂ ဆကျော် မြင့်တက်လာတာ ဖြစ်ပေမဲ့ တခြား စိုက်ပျိုးရေး၊ ကုန်ထုတ်လုပ်မှုနဲ့ ခရီးသွား လုပ်ငန်းတွေမှာတော့ သိသိသာသာ တိုးတက်လာတာ မတွေ့ရပါဘူး။

ရင်းနှီးမြှုပ်နှံမှုတွေမှာလည်း တရုတ်၊ ဟောင်ကောင်နဲ့ ထိုင်း စတဲ့ အာရှနိုင်ငံတွေဘက်က ပိုတိုးလာတာဖြစ်ပြီး အခုလို တိုးလာတာကလည်း အစိုးရသစ် အပြောင်းအလဲကြောင့် ဖြစ်တယ်လို့ စီးပွားရေး ပညာရှင် ဦးခင်မောင်ညိုက ပြောပါတယ်။

“၂ နှစ်ဆက်တိုက်အတွင်းမှာ ရင်းနှီးမြှုပ်နှံမှုတွေ တိုးလာတယ်ပေါ့။ အထူးသဖြင့်ကတော့ ရွေးကောက်ပွဲ နောက်ပိုင်းမှာ အပြောင်းအလဲ တခုခု ဖြစ်မယ်လို့ တွက်ဆပြီး ရင်းနှီးမြှုပ်နှံမှုတွေ များလာတာ တွေ့ရတယ်။”
လျှပ်စစ်၊ စွမ်းအင်၊ ရေနံနဲ့ သဘာဝဓာတ်ငွေ့၊ သတ္တုတူးဖော်ရေး လုပ်ငန်းတွေက ရင်းနှီးမြှုပ်နှံမှု ကြီးမားပြီး အကျိုးအမြတ်ကလည်း များတာကြောင့် နိုင်ငံတကာ ရင်းနှီးမြှုပ်နှံသူတွေက ပိုပြီး စိတ်ဝင်စားကြတာလည်း ဖြစ်တယ်လို့ သူက ပြောပါတယ်။

“ရင်းနှီးမြှုပ်နှံတဲ့ သူကလည်း အဲဒါကို ပိုပြီး စိတ်ဝင်စားတာပေါ့။ လုပ်ငန်းရဲ့ သဘောသဘာဝကိုက အကြီးကြီး မြှုပ်နှံတာဆိုတော့ ပရောဂျက် တခုတခု ၀င်လိုက်ရင် တအား ထိုးတက်သွားတာပေါ့။”

ဒါပေမဲ့ မြန်မာနိုင်ငံသား အများစု အလုပ်လုပ်ကိုင်နေကြတဲ့ စိုက်ပျိုးရေး လုပ်ငန်းနယ်ပယ်၊ မွေးမြူရေး၊ ရေလုပ်ငန်း စတာတွေမှာတော့ နိုင်ငံတကာက ရင်းနှီးမြှုပ်နှံသူတွေ စိတ်ဝင်စား ရင်းနှီးမြှုပ်နှံမှု နည်းပါးနေဆဲ ဖြစ်ပါတယ်။ မြန်မာနိုင်ငံသားတွေ အလုပ်အကိုင် အခွင့်အလမ်းတွေ ပေါ်ပေါက်လာရေးအတွက် စိုက်ပျိုးရေး၊ မွေးမြူရေး၊ ခရီးသွားလာရေး ကဏ္ဍတွေမှာ နိုင်ငံခြား ရင်းနှီးမြှုပ်နှံမှုတွေ ရရှိရေး အတွက်ကတော့ အချိန်ယူ လုပ်ဆောင်ရဦးမှာ ဖြစ်တယ်လို့လည်း ဦးခင်မောင်ညိုက ပြောပါတယ်။

“ရင်းနှီးမြှုပ်နှံမှုလေးတွေက သေးသေးလေးတွေပဲ၊ ဟိုတယ်တို့ ဘာတို့က။ ရေရှည် စိုက်ပျိုးရေးဆိုတဲ့ ဟာကလည်း တကယ်တမ်းကတော့ ချက်ချင်း လက်ငင်းကြီး မဖြစ်ဘူး။ တချို့ဟာတွေက ထိုင်းနဲ့ နယ်စပ်မှာ စိုက်ပျိုးရေးလုပ်ဖို့ စီစဉ်တယ်။ ကုန်ချောထုတ် လုပ်ငန်းကတော့ စက်ရုံဆောက်ဖို့ ဆိုတဲ့ဟာတွေက အခုချိန်ထိ စိတ်ဝင်စားတာ နည်းနေသေးတာ တွေ့ရတယ်။”

ပြီးခဲ့တဲ့ ဘဏ္ဍာနှစ်မှာတော့ တရုတ်နိုင်ငံရဲ့ ရင်းနှီးမြှုပ်နှံမှုက ၅ ဆကျော်အထိ ခုန်တက်လာခဲ့တာ ဖြစ်ပါတယ်။ အရင်က အမေရိကန်ဒေါ်လာ သန်း ၁,၈၀၀ ကျော် ရင်းနှီးမြှုပ်နှံမှု ရှိခဲ့တဲ့ တရုတ်က ပြီးခဲ့တဲ့ ဘဏ္ဍာရေးနှစ်မှာ အမေရိကန်ဒေါ်လာ သန်း ၉,၆၀၀ ကျော်အထိ ရှိလာခဲ့ပါတယ်။ အရင်က ထိုင်းနိုင်ငံက မြန်မာ့ နိုင်ငံခြား ရင်းနှီးမြှုပ်နှံမှု ကဏ္ဍမှာ ထိပ်ဆုံးက ရပ်တည်ခဲ့ပေမဲ့ ပြီးခဲ့တဲ့နှစ်မှာတော့ တရုတ်နိုင်ငံက အများဆုံး ရင်းနှီးမြှုပ်နှံသူ ဖြစ်သွားခဲ့တာပါ။

မြန်မာနိုင်ငံမှာ လာရောက် ရင်းနှီးမြှုပ်နှံ လုပ်ကိုင်နေကြတဲ့ ထိပ်တန်း ၆ နိုင်ငံကတော့ တရုတ်၊ ထိုင်း၊ ဟောင်ကောင်၊ တောင်ကိုရီးယား၊ ဗြိတိန်နဲ့ စင်ကာပူနိုင်ငံတို့ ဖြစ်ကြပါတယ်။

လစ်ဗျားရှိ ဗြိတိန်နဲ့ အီတလီ သံရုံးများ တိုက်ခိုက်ခံရ

By ဗွီအိုအေ (မြန်မာဌာန) တနင်္ဂနွေ, 01 မေ 2011

လစ်ဗျားခေါင်းဆောင် မိုမာ ဂဒါဖီ (Moammar Gadhafi) ရဲ့ သားငယ်နဲ့ မြေး ၃ ယောက်ကို သေဆုံးစေခဲ့တဲ့ နိုင်ငံတကာ နေတိုး (NATO) တပ်ဖွဲ့ရဲ့ ဒုံးကျည် ပစ်ခတ် တိုက်ခိုက်မှုကို လက်စားချေတဲ့ အနေနဲ့ လစ်ဗျားမြို့တော် ထရစ်ပိုလီ (Tripoli) မှာရှိတဲ့ ဗြိတိသျှနဲ့ အီတလီ သံရုံးတွေ အတိုက်အခိုက် ခံခဲ့ရပါတယ်။
ဒါကြောင့် ကုလသမဂ္ဂက သူ့ရဲ့ နိုင်ငံတကာ ၀န်ထမ်းတွေကို ထရစ်ပိုလီကနေ ချက်ချင်း ပြန်လည် ခေါ်ယူခဲ့ပါတယ်။

ဗြိတိသျှသံရုံး အတိုက်အခိုက် ခံခဲ့ရတဲ့အတွက် ဆိုးဆိုးဝါးဝါး မီးလောင်ကျွမ်းမှုတွေ ဖြစ်စေခဲ့တာမို့ ဗြိတိသျှ နိုင်ငံခြားရေးဝန်ကြီး ၀ီလျံ ဟိဂ် (William Hague) က တနင်္ဂနွေနေ့မှာ ရှုတ်ချ ပြစ်တင်လိုက်ပါတယ်။
ဒီလို သံတမန်အဖွဲ့ကို တိုက်ခိုက်မှုဟာ နိုင်ငံတကာ ဗီယင်နာစာချုပ်ကို ချိုးဖောက်တာလို့ ပြောပါတယ်။ ဒါ့အပြင် ဗြိတိသျှ အစိုးရက ဗြိတိန်နိုင်ငံမှာရှိတဲ့ လစ်ဗျား သံအမတ်ကြီးကိုလည်း နှင်ထုတ်ခဲ့ပါတယ်။
ထရစ်ပိုလီမှာရှိတဲ့ သံရုံးအများအပြား အတိုက်အခိုက် ခံခဲ့ရတဲ့ အထဲမှာ အီတလီ သံရုံးလည်း ပါဝင်တယ်လို့ အီတလီ အစိုးရက အတည်ပြုလိုက်ပြီး နိုင်ငံရပ်ခြား သံတမန်တွေကို မစ္စတာ ဂဒါဖီ အစိုးရအဖွဲ့က အကာအကွယ်ပေးဖို့ ပျက်ကွက်ခဲ့တယ်လို့ စွပ်စွဲလိုက်ပါတယ်။

အနောက်နိုင်ငံ အများအပြားက ထရစ်ပိုလီမှာရှိတဲ့ သူတို့သံရုံးတွေက ၀န်ထမ်းတွေကို လွန်ခဲ့တဲ့ သီတင်းပတ်ပေါင်းများစွာ နေတိုးတပ်က စစ်ရေး စတင် မ၀င်ရောက်ခင် ကတည်းက ပြန်ပြီး ခေါ်ယူထားကြတာ ဖြစ်ပါတယ်။

သံရုံး အတိုက်အခိုက် ခံရမှုတွေအတွက် အမေရိကန် နိုင်ငံခြားရေး ၀န်ကြီးဌာန ပြောခွင့်ရ မာ့ခ် တုန်နာ (Mark Toner) က ရှုတ်ချ ပြစ်တင်လိုက်ပြီး လစ်ဗျားမှာရှိတဲ့ အမေရိကန် သံတမန် အဆောက်အဦးတွေကို ပစ်မှတ်ထား တိုက်ခိုက်မယ်ဆိုတဲ့ သတင်းတွေ ရထားတယ်လို့ ဆိုပါတယ်။

အခုလို မစ္စတာ ဂဒါဖီက သံတမန်တွေကို အကာအကွယ် မပေးတာဟာ နိုင်ငံတကာ လိုက်နာရမယ့် စည်းမျဉ်းစည်းကမ်းတွေကို လစ်ဗျားက ချိုးဖောက်တာ နောက်တခု ဖြစ်တယ်လို့လည်း ပြောပါတယ်။
ကုလသမဂ္ဂကတော့ သူ့ရဲ့ နိုင်ငံ ၁၂ နိုင်ငံက ၀န်ထမ်းတွေကို ထရစ်ပိုလီကနေ တူနီးရှားနိုင်ငံဘက်ကို ယာယီ ရွှေ့ပြောင်းထားခဲ့ပါတယ်။ ဒါပေမဲ့ အတိုက်အခံတွေ သိမ်းပိုက်ထားတဲ့ ဘန်ဂါဇီ (Benghazi) ဘက်မှာရှိတဲ့ ၀န်ထမ်းတွေ အတွက်တော့ ပြောင်းရွှေ့စရာ မလိုဘူးလို့ ပြောပါတယ်။

ဒေါ်အောင်ဆန်းစုကြည်ကို ကမ္ဘာ့ကလေးများအဖွဲ့ နာယက ခန့်အပ်

2011-04-30 RFA

ကလေးများ အခွင့်အရေးအတွက် စွမ်းစွမ်းတမံ ဆောင်ရွက်သူတွေကို ဆု ရွေးချယ်ပေးအပ်နေတဲ့ ဆွီဒင်နိုင်ငံ အခြေစိုက် ကမ္ဘာ့ကလေးများအဖွဲ့ က မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကို အဖွဲ့နာယကအဖြစ် ဂုဏ်ပြုခန့်အပ်လိုက်ပါတယ်။

ပြီးခဲ့တဲ့ ကြာသပတေးနေ့က ဆွီဒင်နိုင်ငံ Mariefred မြို့ Gripsholms နန်းတော်မှာ ကမ္ဘာ့ကလေးများအဖွဲ့က ကျင်းပတဲ့ ‘ကလေးအခွင့်အရေးဆိုင်ရာ သူရဲကောင်းဆု’ ဂုဏ်ပြုချီးမြှင့်တဲ့ အခမ်းအနားမှာ ဒေါ်အောင်ဆန်းစုကြည်ကို အဖွဲ့ရဲ့ နာယကအဖြစ် ဂုဏ်ပြုခန့်အပ်ကြောင်း ကြေညာခဲ့ပါတယ်။

ကမ္ဘာ့ကလေးများအဖွဲ့ရဲ့ နာယကအဖြစ် ဒေါ်အောင်ဆန်းစုကြည်ကို အမှတ်တရ ပေးအပ်တဲ့ ဖန်ကမ္ဘာလုံးဆုကို ဆွီဒင်ဘုရင်မ ကိုယ်တိုင် တက်ရောက် ချီးမြင့်ခဲ့တယ်လို့ သိရပါတယ်။

ဒေါ်အောင်ဆန်းစုကြည်က အခုလို ကလေးအခွင့်အရေး သူရဲကောင်းဆု ချီးမြှင့်ရေးအဖွဲ့ရဲ့ နာယကအဖြစ် သူ့ကို ရွေးချယ် ဂုဏ်ပြုလိုက်တာနဲ့ ပတ်သက်ပြီး ကျေးဇူးတင်ရှိပါကြောင်း၊ အခု သူ နေအိမ်အကျယ်ချုပ်ကနေ လွတ်မြောက်လာပြီ ဖြစ်တဲ့အတွက် ကမ္ဘာ့ကလေးများအဖွဲ့ရဲ့ လှုပ်ရှားမှုတွေမှာ ပါဝင် ဆောင်ရွက်နိုင်လိမ့်မယ်လို့ မျှော်လင့်ပါကြောင်း ပြောကြားခဲ့ပါတယ်။

မြန်မာပြည်က ကလေးတွေဟာ လုံလောက်တဲ့ ဆေးဝါးကုသမှုနဲ့ ပညာရေး မပြည့်စုံတာတွေ ကြုံနေကြရတာကိုလည်း အားလုံး သိရှိပြီး ဖြစ်မှာပါလို့လည်း ဒေါ်အောင်ဆန်းစုကြည်က ပြောသွားပါတယ်။

ကလေးအခွင့်အရေးသူရဲကောင်း ဆုရှင်ကို ကမ္ဘာတဝှန်းက ကလေးတွေက ရွေးချယ်တာ ဖြစ်ပါတယ်။ ၂ဝ၁၁ ခုနှစ်အတွက် ကလေးအခွင့်အရေး သူရဲကောင်းဆုကို ကွန်ဂိုနိုင်ငံက Murhabazi ကို ချီးမြှင့်ခဲ့ပါတယ်။ သူဟာ စစ်သားအဖြစ် အဓမ္မ စုဆောင်းခံရတဲ့ ကလေးတွေ၊ ပြည့်တန်ဆာအဖြစ် အသုံးချခံနေရတဲ့ ကလေးတွေရဲ့ လွတ်မြောက်ရေးတွေကို အသက်အန္တရာယ် ကြုံရတဲ့အထိ စွမ်းစွမ်းတမံ ဆောင်ရွက်ခဲ့တာတွေကြောင့် ကမ္ဘာ့ ကလေး ၃ သန်းကျော်က သူ့ကို ရွေးချယ်ခဲ့တာ ဖြစ်ပါတယ်။

အလားတူပဲ ကလေးများ အဓမ္မ အလုပ်ခိုင်းစေခံရမှု၊ လူကုန်ကူးခံရမှုနဲ့ ပြည့်တန်ဆာအဖြစ် ခိုင်းစေခံရတဲ့ မိန်းကလေးငယ်တွေရဲ့ အရေးအတွက် ဆောင်ရွက်ခဲ့သူ ဖိလစ်ပိုင်နိုင်ငံက Cecilia Flores-Oebanda ဆိုသူနဲ့ ဘင်္ဂလားဒေ့ရ်ှနိုင်ငံမှာ ဖြစ်ပွားခဲ့တဲ့ အက်စစ်တွေ၊ ဓာတ်ဆီတွေနဲ့ တိုက်ခိုက်မှုကြောင့် ဒဏ်ရာ ပြင်းပြင်းထန်ထန် ရခဲ့ရသူတွေ၊ အထူးသဖြင့် အမျိုးသမီးငယ်တွေကို အကြောက်အရွံ့ မရှိ ကူညီပေးခဲ့တဲ့ ဘင်္ဂလားဒေ့ရ်ှနိုင်ငံသူ Monira Rahman တို့လည်း ဆု ချီးမြင့်ခံခဲ့ရပါတယ်။

နိုင်ငံရေးအကျဉ်းသား လွတ်မြောက်ရေး လှုပ်ရှားမှု အရှိန်ရ

2011-04-30 , RFA

နိုင်ငံရေးအကျဉ်းသားတွေ ပြန်လွှတ် ပေးဖို့ လက်မှတ်ရေးထိုး တောင်းဆိုတဲ့ လှုပ်ရှားမှုမှာ ပါဝင် လက်မှတ်ရေးထိုးသူ သောင်းဂဏန်းအထိ ရှိနေပြီး မေလ ဆန်းပိုင်းမှာ သမ္မတ ဦးသိန်းစိန်ထံ တင်ပြ တောင်းဆို သွားမယ်လို့ လှုပ်ရှားမှုကို တာဝန်ယူ ဆောင်ရွက်နေ တဲ့ ၈၈ မျိုးဆက် ခေါင်းဆောင်တွေက ပြောပါတယ်။

ဧပြီလကုန်ပိုင်းအထိ ရရှိထားတဲ့ လက်မှတ်တွေထဲမှာ ရန်ကုန်တိုင်း၊ ပဲခူးတိုင်းနဲ့ မကွေးတိုင်းအတွင်းက သာမန် ပြည်သူတွေပါ ပါဝင် လက်မှတ်ရေးထိုးလာကြပါတယ်။ အခုတကြိမ်မှာတော့ အထက်မြန်မာပြည်က လက်မှတ်တွေ အပါအဝင် လက်မှတ် သောင်းချီပြီး သမ္မတ ဦးသိန်းစိန်ရုံးကို ပေးပို့သွားမယ့်အကြောင်း တာဝန်ယူ ကောက်ခံနေသူတဦးဖြစ်တဲ့ ၈၈ မျိုးဆက်ကျောင်းသားများအဖွဲ့က ကိုတိုးကျော်လှိုင်က ပြောပါတယ်။

“အခုဆိုရင် မန္တလေးဘက်က လက်မှတ်တွေ၊ နောက် မကွေး၊ ရေနံချောင်း၊ စကု၊ စလင်း၊ ပွင့်ဖြူ၊ ဆင်ဖြူကျွန်း ဘက်က လက်မှတ်တွေ၊ နောက် ပဲခူးတိုင်းဘက်က လက်မှတ်တွေ၊ ဖြူးမြို့က လက်မှတ်တွေ၊ ရန်ကုန်တိုင်း မြို့နယ်အသီးသီးက လက်မှတ် အတော်များများ ကျနော်တို့ဆီ ပြန်ပြီး ဝင်နေပါပြီ။ စပြီးတော့ နိုင်ငံတော် သမ္မတဆီကို ၂၅ ရက်နေ့က စာတင်လိုက်တဲ့အချိန်မှာ နယ်ပယ်အသီးသီးမှာ ထင်ရှားတဲ့ ပုဂ္ဂိုလ်တွေကို အဓိကထား စီစဉ်ရွေးချယ်ပြီးတော့ လက်မှတ် ၄ဝ၈ ခု ပို့ခဲ့တာပါ”

အဲဒီလက်မှတ် ၄ဝ၈ ခု ရေးထိုးခဲ့သူတွေထဲမှာ အထင်ကရ နိုင်ငံရေးသမားကြီးတွေ၊ စာရေးဆရာတွေနဲ့ ရုပ်ရှင် ဒါရိုက်တာတချို့ပါ ပါဝင် လက်မှတ်ရေးထိုး တောင်းဆိုခဲ့ကြပါတယ်။

ဒါ့အပြင် အမေရိကန် သမ္မတ၊ ဗြိတိန်ဝန်ကြီးချုပ် စသူတွေထံကိုလည်း ထောက်ခံမှုရရှိဖို့အတွက် စာပေးပို့သွားဖို့ ပြင်ဆင်နေတယ်လို့ သိရပါတယ်။ အမေရိကန်၊ ဂျပန်နဲ့ မလေးရှားနိုင်ငံတွေမှာ ရှိတဲ့ မြန်မာနိုင်ငံသား အသိုင်းအဝိုင်းတွေကလည်း နိုင်ငံရေးအကျဉ်းသားတွေ လွတ်မြောက်ရေး တောင်းဆိုဖို့အတွက် လက်မှတ်ရေးထိုးပေးဖို့ ကောက်ခံနေတယ်လို့ သိရပါတယ်။

ပိတ်ပင်ထားသည့်ကြားမှ သတ္တုရိုင်းများ တရုတ်နိုင်ငံဘက်ပို့

2011-04-30

တရုတ်နယ်စပ်မှာ ကုန်စည်တင်ပို့ခွင့် ပိတ်ထားတဲ့ကြားက ကချင်ပြည်နယ်မှာ ထူးကုမ္ပဏီက သတ္တုရိုင်းတွေ တူးဖော်နေပြီး ဝိုင်းမော်မြို့နယ် ရွှေညောင်ပင်ရွာက တဆင့် တရုတ်နိုင်ငံကို တင်ပို့နေတယ်လို့ သိရပါတယ်။
သတ္တုရိုင်းတွေ တူးဖော်တဲ့ နေရာကနေ ကားငယ်တွေနဲ့ သယ်ထုတ်ကြတယ်လို့ အတွင်းသိ ဒေသခံ တယောက်က ပြောပါတယ်။

“ထူး က နာမည်ခံပဲ။ လုပ်တာ တရုတ်တွေက လုပ်တာ။ တောထဲကနေ ကားလေးတွေနဲ့ ထုတ်၊ ကွင်းတွေထဲမှာ ပုံပြီးတော့မှ ဟိုဘက်ကျတော့ တရုတ်ပြည်ကို ကားကြီးတွေနဲ့ ပြန်တိုက်တာ။ ဝိုင်းမော်နဲ့ လိုင်ဇာကြား ကျမှာပေါ့”

မြန်မာ့ သတ္တုတွင်းဝန်ကြီးဌာနနဲ့ ထူးကုမ္ပဏီတို့ အကျိုးတူလုပ်ငန်းဖြစ်ပြီး သတ္တုတွင်းမှာ ဒေသခံ တိုင်းရင်းသားတွေ ဝင်ရောက်လုပ်ကိုင်တာ မတွေ့ရဘဲ တရုတ်နိုင်ငံဘက်က ဝန်ထမ်းတွေသာ လုပ်ကိုင်နေတယ်လို့ ဆိုပါတယ်။ မြန်မာနိုင်ငံဘက်ကနေ တရုတ်နိုင်ငံကို လိုင်ဇာလမ်းကတဆင့် ကုန်စည်တင်ပို့ခွင့် ပိတ်ပင်ထားပေမယ့် တရုတ်နိုင်ငံက ကားတွေနဲ့ သတ္တုရိုင်းတွေတင်ပြီး တရုတ်နိုင်ငံဘက် သွားတာလို့လည်း ပြောကြပါတယ်။

ရွှေညောင်ပင်ဟာ မြစ်ကြီးနားနဲ့ တရုတ်-မြန်မာနယ်စပ် လိုင်ဇာအကြားမှာ ရှိပြီး တရုတ်နိုင်ငံဘက်က လာတဲ့ မော်တော်ကားကြီး အစီး လေးငါးဆယ် တန်းစီ ရပ်စောင့်နေတာ တွေ့ရတယ်လို့ နောက် ဒေသခံတယောက်က ပြောပါတယ်။ ကားနောက်ပိုင်းကို ဖုံးကွယ်ထားတဲ့အတွက် ဘာပစ္စည်းတွေ တင်တယ်ဆိုတာ အလွယ်တကူ မသိနိုင်ပေမယ့် ဒေသခံတွေကတော့ သတ္တုကားတွေလို့ ပြောဆိုနေကြတယ်လို့လည်း ပြောပါတယ်။

စုံစမ်းရေးကော်မရှင်ဖွဲ့ဖို့ ဥပဒေမူကြမ်းတင်ရန် အမေရိကန်ကို တိုက်တွန်း

2011-04-30 RFA

မြန်မာနိုင်ငံကို ကုလသမဂ္ဂ စုံစမ်းရေးကော်မရှင် တရပ် ဖွဲ့စည်း စေလွှတ်နိုင်ရေးအတွက် အမေရိကန် အစိုးရ အနေနဲ့ ကုလသမဂ္ဂ လူ့အခွင့်အရေး ကောင်စီ ညီလာခံမှာ ဥပဒေမူကြမ်းတရပ် အဆိုပြု တင်သွင်းဖို့ အမေရိကန်အခြေစိုက် လူ့အခွင့်အရေး အဖွဲ့ ၁၃ ဖွဲ့က အမေရိကန် နိုင်ငံခြားရေးဝန်ကြီး ဟီလာရီကလင်တန်ကို ပြီးခဲ့တဲ့ တနင်္လာနေ့က စာရေးသား တောင်းဆိုလိုက်ပါတယ်။

မြန်မာနိုင်ငံပေါ် အရေးယူ ဆောင်ရွက်နိုင်ဖို့ မေလ ၃ဝ ရက်နေ့ကနေ ဇွန်လ ၁၇ ရက်နေ့အထိ ဆွစ်ဇာလန်နိုင်ငံ ဂျီနီဗာမြို့မှာ ကျင်းပဖို့ရှိတဲ့ (၁၇) ကြိမ်မြောက် ကုလသမဂ္ဂ လူ့အခွင့်အရေးကောင်စီ ညီလာခံမှာ အမေရိကန်က ဦးဆောင်ပြီး စည်းရုံးလှုပ်ရှားပေးဖို့ အခုလို တိုက်တွန်းလိုက်ကြတာ ဖြစ်တယ်လို့ မြန်မာ့အရေး ဆောင်ရွက်နေတဲ့ ဝါရှင်တန်ဒီစီ အခြေစိုက်U.S Campaign for Burma အဖွဲ့ ခေါင်းဆောင် ဦးအောင်ဒင်က ပြောပါတယ်။

မြန်မာနိုင်ငံကို ကုလသမဂ္ဂ စုံစမ်းရေးကော်မရှင် ဖွဲ့စည်း စေလွှတ်သင့်တယ်လို့ အမေရိကန် အပါအဝင် နိုင်ငံပေါင်း(၁၆) နိုင်ငံက အခုချိန်ထိ သဘောတူ လက်ခံထားပြီးဖြစ်ပါတယ်။

ကုလသမဂ္ဂ လူ့အခွင့်အရေးကောင်စီ ညီလာခံမှာ ပုံမှန်တက်နေကျ (၄၇) နိုင်ငံထဲက နိုင်ငံအများစုကသာ ထောက်ခံမယ်ဆိုရင် မြန်မာနိုင်ငံကို ကုလသမဂ္ဂ စုံစမ်းရေးကော်မရှင် စေလွှတ်နိုင်မှာ ဖြစ်တယ်လို့ သိရပါတယ်။

မြန်မာနိုင်ငံနဲ့ ပတ်သက်တဲ့ ကုလသမဂ္ဂ စုံစမ်းရေးကော်မရှင်တရပ် ဖြစ်ပေါ်လာအောင် အမေရိကန်အစိုးရက ဦးဆောင်ဖို့ တိုက်တွန်းလိုက်တဲ့ အဖွဲ့ (၁၃) ဖွဲ့ထဲမှာ U.S. Campaign for Burma ၊ HRW လူ့အခွင့်အရေး စောင့်ကြည့်အဖွဲ့၊ A.I အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့၊ Democracy Coalition Projectအဖွဲ့၊ Institute for Asian Democracy စတဲ့ အဖွဲ့တွေ ပါဝင်ပါတယ်။

USCB အဖွဲ့က ဦးအောင်ဒင်နဲ့ Democracy Coalition project အဖွဲ့က Ms. Dokhi Fassihian တို့ကို ဆက်သွယ်မေးမြန်းပြီး RFAအဖွဲ့သား ကိုဥာဏ်ဝင်းအောင်က တင်ပြထားတာကို နားဆင်ပါ။