ဒီနေ့ ဖတ်စရာ သတင်းများ ( ဧပြီလ ၁၆ ရက် ) မဟာသင်္ကြန် အတက်နေ့

ကဒါဖီ မထွက်မချင်း နေတိုးမဟာမိတ်တပ်တွေ ဆက်တိုက်မည်

အညတရ သူရဲကောင်း ၃ ဦး

အမေရိကန်အမတ်တွေ ဒေါ်စုတွေ့ဖို့ မြန်မာပြည်သွားမည်

မြန်မာနိုင်ငံဆိုင်ရာ အထူးကိုယ်စားလှယ်အဖြစ် Derek Mitchell ကို အိုဘားမားအဆိုပြု

စုံစမ်းရေး ကော်မရှင်ပေါ်ပေါက်ရေး အမေရိကန် ဦးဆောင်ဖို့ ဆွေးနွေး

လူ့အခွင့်အရေး ပညာပေး စာစောင် ဖြန့်ချိနိုင်ရန် HRDP ပြင်ဆင်

NLD လူငယ်များ၏ စတုဒီသာအလှူ ဧည့်ပရိသတ်စည်ကား

နယူးယောက် လေလံပွဲတွင် မြန်မာ့ပတ္တမြား ဒေါ်လာ တစ်သန်းကျော်ဖြင့် စံချိန်တင်

ကဒါဖီမထွက်မချင်း နေတိုးမဟာမိတ်တပ်တွေ ဆက်တိုက်မည်

ကြာသပတေး, 14 ဧပြီ 2011 

ကဒါဖီ အာဏာက ဆင်းသွားရတဲ့အထိ နေတိုးမဟာမိတ်တွေက ဆက်လက် တိုက်ခိုက်မယ်လို့ ဗြိတိန်၊ ပြင်သစ်နဲ့ အမေရိကန်တို့က ပြောလိုက်ကြပါတယ်။ ဒီအတောအတွင်းမှာပဲ ကဒါဖီအပေါ် သစ္စာရှိတဲ့ တပ်တွေက မစ်ရာတာ (Misrata) မြို့အနီးမှာ ကြာသပတေးနေ့က တိုက်ခိုက်ခဲ့တဲ့အတွက် အနည်းဆုံး လူ ၂၃ ယောက် သေဆုံးခဲ့ရတယ်လို့ သူပုန်ပြောရေးဆိုခွင့်ရှိသူက ပြောပါတယ်။

နေတိုး စစ်လေယာဉ်ပျံတွေ ပျံသန်းပြီးမကြာခင်မှာပဲ လစ်ဗျားနိုင်ငံ ထရီပိုလီမြို့ ၀န်းကျင်ဒေသမှာ ပေါက်ကွဲမှုတွေ ကြာသပတေးနေ့က ဆက်တိုက်ဖြစ်ခဲ့တယ်လို့ မျက်မြင်သက်သေတွေက ပြောပါတယ်။
ဒီအတောအတွင်းမှာပဲ အစိုးရတပ်တွေကို ဆန့်ကျင်တိုက်ခိုက်ရာမှာ နေတိုးက ပံ့ပိုးမှု မပေးခဲ့ဘူးဆိုရင် အနောက်ပိုင်းက မစ်ရာတာမြို့မှာ လူတွေ အစုလိုက်အပြုံလိုက် သတ်ပွဲ ဖြစ်လိမ့်မယ်လို့ သူပုန်တွေက သတိပေးလိုက်ပါတယ်။

လစ်ဗျားမှာ နေတိုးက လေကြောင်းစွမ်းရည် အပြည့်နဲ့ ဆက်လက် တိုက်ပွဲဝင်နိုင်မယ်လို့ အမေရိကန်က ယုံကြည်မြဲ ယုံကြည်ကြောင်း အမေရိကန် နိုင်ငံခြားရေးဝန်ကြီး ဌာန ယာယီ ပြောရေးဆိုခွင့်ရှိသူ မတ်ခ် တိုနာ က ၀ါရှင်တန်မှာ ပြောကြားပါတယ်။ အမေရိကန်က လေကြောင်းတိုက်ခိုက်မှုတွေ ပြန်လုပ်ဖို့ ပြင်သစ်က တောင်းဆိုခဲ့ပြီးတဲ့နောက် ခုလို သူက ပြောတာပါ။

ဘာလင်မှာကျင်းပတဲ့ နေတိုး အစည်းအဝေးမှာ ပြင်သစ်က အဲဒီလို တောင်းဆိုခဲ့တာ ဖြစ်ပါတယ်။ လစ်ဗျား နိုင်ငံက တိုက်သင့်တိုက်ထိုက်တဲ့ ပစ်မှတ်တွေကို တိုက်ရှိန်မြင့်မြင့်မားမားနဲ့ နေတိုးတပ်ဖွဲ့တွေက ဆက်လက် တိုက်ခိုက်နေနိုင်ပါတယ်လို့ နေတိုး အကြီးအကဲ Anders Fogh Rasmussen က အဖွဲ့ဝင် နိုင်ငံတွေကို ပြောပါတယ်။ ပိုပြီး ပစ်မှတ်ကို တိတိကျကျ ပစ်နိုင်တဲ့ လေယာဉ်တွေကိုတော့ နေတိုးက လိုအပ်နေပါတယ်လို့ သူက ဆိုပါတယ်။

လစ်ဗျားနဲ့ပတ်သက်တဲ့ နောက် ညီလာခံတရပ်ကိုတော့ ကိုင်ရိုမြို့မှာ ကျင်းပခဲ့ပါတယ်။ လစ်ဗျားအတွက် ရေရှည် ခိုင်မာမယ့် အဖြေတရပ်ကို ညီညီညွတ်ညွတ်နဲ့ ရှာဖွေဖို့ အာဖရိက၊ အာရပ် နဲ့ ဥရောပ ကိုယ်စားလှယ် တွေက သဘောတူခဲ့ကြပါတယ်လို့ ကုလသမဂ္ဂ အတွင်းရေးမှူးချုပ် ဘန်ကီမွန်းက ပြောပါတယ်။

လစ်ဗျား အတိုက်အခံကို ငွေကြေး အရရော၊ နိုင်ငံရေး အရပါ ပံ့ပိုးဖို့ ပြီးခဲ့တဲ့တရက်က ဒိုဟာမှာကျင်းပတဲ့ နိုင်ငံတကာ ဆက်သွယ်ရေးအုပ်စု အစည်းအဝေးမှာ သဘောတူခဲ့ကြပြီး နောက်တရက်မှာ ဘာလင်နဲ့ ကိုင်ရို အစည်းအဝေးတွေကို ကျင်းပခဲ့ကြတာပါ။ လစ်ဗျား အစိုးရ တရားမ၀င်တော့တဲ့အတွက် ကဒါဖီ နုတ်ထွက် ပေးဖို့ ဒီအုပ်စုရဲ့ နောက်ဆုံး ကြေညာချက်မှာ တောင်းဆိုထားပါတယ်။

အညတရ သူရဲကောင်း ၃ ဦး

By မသင်းသီရိ သောကြာ, 15 ဧပြီ 2011 

မြန်မာနိုင်ငံမှာ ယုံကြည်ချက်အပြည့်နဲ့ ကိုယ်ကျိုးစွန့်ပြီး ဒီမိုကရေစီနဲ့ လူ့အခွင့်အရေးအတွက် ဆောင်ရွက်ရင်းနဲ့ နှစ်ရှည် ထောင်ချခံထားရသူတွေထဲက ၃ ယောက်ကို အညတရ သူရဲကောင်းတွေအဖြစ် ဆုပေးဖို့ ဂျပန်ရောက် မြန်မာတွေက ရွေးချယ်ထားကြပါတယ်။ ဂျပန်နိုင်ငံမှာ နေထိုင်နေကြတဲ့ မြန်မာနိုင်ငံသားတွေက လူမသိသူမသိ အနစ်နာခံနေကြတဲ့သူတွေကို ဆုပေးဖို့အတွက် ပထမဆုံးအကြိမ် စီစဉ်တာလည်း ဖြစ်ပါတယ်။ ဒီဆုပေးပွဲကို နှစ်ဆန်း ၁ ရက်နေ့ကျရင် ရန်ကုန် NLD ရုံးချုပ်မှာ ပြုလုပ်မှာဖြစ်ပါတယ်။ အကြောင်းစုံကို မသင်းသီရိက တင်ပြထားပါတယ်။

ပထမဆုံးအကြိမ်အဖြစ် ရွေးချယ်ချီးမြှင့်တဲ့ အညတရ သူရဲကောင်းဆုကို လားရှိုးထောင်မှာ အကျဉ်းကျနေတဲ့ မဂ္ဂင်ဆရာတော် ဦးအိန္ဒက၊ အင်းစိန်ထောင်မှာ ပြစ်ဒဏ်နှစ် ၂၀ နဲ့ အကျဉ်းချခံထားရတဲ့ ဘိုးတော်ခင်ဝင်း (ခ) ဦးခင်ဝင်းနဲ့အတူ မအူပင်ထောင်က ထောင်ဒဏ် ၁၄ နှစ် ချမှတ်ခံထားရတဲ့ ကိုသန်းနိုင်တို့ ၃ ဦးကို ရွေးချယ်ထားတာပါ။ မဂ္ဂဇင်ဆရာတော် ဦးအိန္ဒကဟာ ၁၉၈၈ လူထုလှုပ်ရှားမှုအတွင်း ပါဝင်ခဲ့ဖူးပြီး ထောင်ကျခဲ့ဖူးတဲ့ သံဃာတပါးဖြစ်သလို ၂၀၀၇ ရွှေဝါရောင် သံဃာ့လှုပ်ရှားမှုတွင်း ပြန်လည် ဖမ်းဆီးခံရတဲ့ ရဟန်းတပါး ဖြစ်ပါတယ်။ ဦးခင်ဝင်း (ခ) ဘိုးတော်ခင်ဝင်း ကလည်း ၁၉၈၈ နဲ့ ၂၀၀၀ ပြည့်နှစ်တွေက အကျဉ်းကျခံရဖူးတဲ့ နိုင်ငံရေးလှုပ်ရှားသူတဦး ဖြစ်ပါတယ်။ မအူပင်ထောင်မှာ အကျဉ်းချခံထားရတဲ့ ကိုသန်းနိုင် ကလည်း နိုင်ငံရေး အကျဉ်းသားဟောင်း တဦးဖြစ်ပါတယ်။

ဒီဆုဟာ ဂျပန်နိုင်ငံရောက်နေတဲ့ မြန်မာနိုင်ငံသားတွေက စုပေါင်းချီးမြှင့်တဲ့ ဂုဏ်ပြုဆုတခု ဖြစ်သလို ဆုပေးပွဲအခမ်းအနားကိုတော့ လာမယ့် ဧပြီလ ၁၇ ရက် နှစ်ဆန်း ၁ ရက် တနင်္ဂနွေနေ့ကျရင် ဗဟန်း ရွေဂုံတိုင်မှာရှိတဲ့ NLD ရုံးချုပ်မှာ ကျင်းပမှာ ဖြစ်ပြီး ဒေါ်အောင်ဆန်းစုကြည် ကိုယ်တိုင် ဆုချီးမြင့်မှာလည်း ဖြစ်ပါတယ်။
ဒီဆုဟာ ထင်ရှားကျော်စောခြင်းမရှိ၊ လူမသိသူမသိ ဘ၀တွေနဲ့ မြန်မာနိုင်ငံ ဒီမိုကရေစီနဲ့ လူ့အခွင့်ရေးတွေ အတွက် ယုံကြည်ချက်အပြည့်နဲ့ နှစ်ရှည်အကျဉ်းသားဘ၀တွေနဲ့ ဖြတ်သန်းနေကြသူတွေ အားလုံးကို နှစ်စဉ် ဂုဏ်ပြုသွားဖို့ အစီအစဉ်ဖြစ်ပြီး ဒီနှစ် ပထမဆုံးအကြိမ် အဖြစ် ၃ ဦးကို ရွေးချယ်ထားတာ ဖြစ်တယ်လို့ NLD လူမှုထောက်ကူပြု အဖွဲ့က မဖြူဖြူသင်းက ပြောပါတယ်။

“အဓိက ကတော့ အကုန်စုပြီးတော့ ပေးကြတာပါ။ မြန်မာပြည်တွင်းမှာရှိနေတဲ့၊ တကယ့်ကို နိုင်ငံရေး လုပ်ကိုင်ဆောင်ရွက်နေတဲ့ လူမသိသူမသိပေါ့နော်၊ တလျှောက်လုံး လုပ်လာခဲ့တဲ့သူတွေ အများကြီးပါပဲ။ ဒီ ၃ ယောက်ဆိုတာက အားလုံး အကုန်လုံး စုပေါင်းပြီးတော့ ပေးကြတာပေါ့နော်။ ဂျပန်မှာရှိနေတဲ့သူတွေရော၊ မြန်မာပြည်က သူတွေရော အကုန်လုံး စုပြီးတော့ ရွေးလိုက်တာပါ။ ဒါပေမဲ့ ပြည်တွင်းမှာ အများကြီး ရှိပါသေးတယ်၊ ဒီလို လူမသိသူမသိနဲ့ ထောင်ထဲမှာ အများကြီး ကျနေတာ ရှိပါတယ်။ နံမည်လည်း ထွက်မလာဘူး။ တကယ့်ကိုလည်း အနစ်နာခံပြီး ထောင်ထဲမှာ နေနေတဲ့သူတွေ အများကြီး ရှိပါသေးတယ်။ ဒီ ၃ ယောက်မှ မဟုတ်ပါဘူး။ ဒါကတော့ သူတို့ စတင်ပြီးတော့ သူတို့ လုပ်ဆောင်လိုက်တာပါ။”

ဒီဆုကို NLD ပါတီကရော၊ ဂျပန်ရောက် မြန်မာတွေကပါ စုပေါင်းရွေးချယ်ခဲ့ကြတာပါ။ ဆုကြေးငွေက တဦးကို မြန်မာကျပ်ငွေ ဆယ်သိန်း ချီးမြှင်ဖို့လည်း စီစဉ်ထားပါတယ်။ မြန်မာနှစ်ဆန်း ၁ ရက်နေ့တိုင်း NLD ရုံးချုပ်မှာ ကျင်းပနေတဲ့ သက်ကြီးပူဇော်ပွဲနဲ့အတူ ပူးတွဲ ကျင်းပသွားမယ်လို့လည်း ဆိုပါတယ်။ မနေ့ သင်္ကြန်အကျနေ့နဲ့ ဒီကနေ့ အကြတ်နေ့တွေမှာလည်း NLD ရုံးမှာ စတုဒီသာကျွေးပွဲ ပြုလုပ်ခဲ့ပါတယ်။

“နှစ်ဆန်း ၁ ရက်နေ့ကတော့ ကျမတို့ ဒီမှာ လုပ်နေကျ ပုံစံအတိုင်းပဲပေါ့။ ပရိတ်တရားနာတာ ရှိမယ်။ နောက်ပြီးတော့ သက်ကြီးပူဇော်ပွဲ ရှိတယ်။ လူကြီးတွေကို ကန်တော့မယ်။ ရုံးချုပ်မှာရှိတဲ့ လူငယ်တွေ စုပြီးတော့ အလှူလုပ်တာပေါ့နော်။ စတုဒီသာ ကျွေးတယ်။ လူတွေကတော့ များတယ်။ ဒီနှစ်ကတော့ သင်္ကြန်က အရင်နှစ်တွေကလောက် သိပ်မစည်ဘူး။ ဒါပေမဲ့ တော်တော်များများ လာကြပါတယ်။ တချို့ဆိုလည်း ဒီနေ့ဆိုရင် ရုံးထဲကို ၀င်ကြတယ်။ တချို့က အရင်က မရောက်ဖူးကြဘူးလေ။ အဲဒီလိုမျိုးတွေ လာကြသွားကြတာတွေ ရှိပါတယ်။”

NLD လူငယ်အဖွဲ့က မဖြူဖြူသင်း ပြောပြခဲ့တာပါ။ ဒီ အညတရ သူရဲကောင်းဆုကို ချီးမြှင့်ဂုဏ်ပြုဖို့ စီစဉ်ထားအပြီး ဂျပန်နိုင်ငံမှာ ပြီးခဲ့တဲ့ မတ်လ ၁၁ ရက်နေ့က လှုပ်ခတ်ခဲ့တဲ့ ငလျင်နဲ့ ဆူနာမီ ရေလှိုင်းတွေကြောင့် ဆုပေးဖို့အစီအစဉ် နှောင့်နှေးသွားခဲ့တယ်လို့ ဆုပေးပွဲစီစဉ်သူတွေက ပြောပါတယ်။

အမေရိကန်အမတ်တွေ ဒေါ်စုတွေ့ဖို့ မြန်မာပြည်သွားမည်

သောကြာ, ၁၅ ဧပြီ ၂၀၁၁

အမေရိကန် ကွန်ဂရက်လွှတ်တော် ကိုယ်စားလှယ်အဖွဲ့ တဖွဲ့ဟာ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို တွေ့ဆုံနိုင်ဖို့အတွက် မြန်မာနိုင်ငံကို မကြာခင်သွားဖို့ စီစဉ်နေပါတယ်။

ဒီခရီးစဉ်ကို အမေရိကန် ကွန်ဂရက် နိုင်ငံခြားရေးရာ ကော်မတီဥက္ကဌနဲ့ ကယ်လီဖိုးနီးယားပြည်နယ် ရီပါပလစ်ကန် အမတ် ဒေနာ ရိုရ်ဘက်ကာ (Dana Rohrabacher) က စီစဉ်တာဖြစ်ပါတယ်။

လွှတ်တော်ကိုယ်စားလှယ်တွေရဲ့ အရှေ့တောင်အာရှနဲ့ အရှေ့အလယ်ပိုင်းဒေသကို ၂ ပတ်တာသွားမယ့် ခရီးစဉ်မှာ မြန်မာနိုင်ငံကို ဒုတိယမြောက် နိုင်ငံအဖြစ် ၀င်ဖို့ စီစဉ်ထားတာ ဖြစ်ပါတယ်။ ဖိလစ်ပိုင်နိုင်ငံကို ပထမသွားမှာ ဖြစ်ပြီးတော့ မြန်မာနိုင်ငံကို ၀င်ပြီးရင်တော့ ကူဝိတ်ကို လွှတ်တော်အမတ်အဖွဲ့ဟာ ဆက်သွားမယ်လို့ ၀ါရှင်တန်ပို့စ် သတင်းစာကြီးထဲမှာ ဖော်ပြထားပါတယ်။

မြန်မာနိုင်ငံဆိုင်ရာ အထူးကိုယ်စားလှယ်အဖြစ် Derek Mitchell ကို အိုဘားမားအဆိုပြု

ကြာသပတေး, ၁၄ ဧပြီ ၂၀၁၁

မြန်မာနိုင်ငံဆိုင်ရာ မူဝါဒညှိနှိုင်းရေးမှူးနဲ့ သမ္မတရဲ့ အထူးကိုယ်စားလှယ်အဖြစ် ဒဲရက်မစ်ချဲလ် (Derek Mitchell) ကို ခန့်ထားဖို့ သမ္မတ အိုဘားမားက အထက်လွှတ်တော်ကို အဆိုပြုလိုက်ပါတယ်။

အထက်လွှတ်တော်က အတည်ပြုလိုက်တာနဲ့ မစ္စတာ ဒဲရက် မစ်ချဲလ် ဟာ အမေရိကန် နိုင်ငံခြားရေး ၀န်ကြီးဌာနရဲ့ သံအမတ်ကြီး အဆင့်တာဝန်ကို တာဝန်ထမ်းဆောင်ရမှာ ဖြစ်ပါတယ်။ ခုလို မြန်မာနိုင်ငံဆိုင်ရာ အထူးကိုယ်စားလှယ် တစ်ယောက် ခန့်အပ်ဖို့ ၂၀၀၈ ခုနှစ်မှာ ကွန်ကရက်လွှတ်တော်က ပြဌာန်းခဲ့တာပါ။

မစ္စတာ မစ်ချဲလ် ဟာ တရုတ်ရေးရာ ကျွမ်းကျင်သူ ဖြစ်ပြီး အာရှ အတွေ့အကြုံ ကောင်းကောင်း ရှိတဲ့သူ ဖြစ်ပါတယ်။ မစ္စတာ မစ်ချဲဟာ ကာကွယ်ရေး ၀န်ကြီးဌာန အာရှနဲ့ ပစိဖိတ်ဒေသ လုံခြုံရေးရာ ဒု လက်ထောက် ကာကွယ်ရေးဝန်ကြီး အဖြစ် လောလောဆယ်မှာ တာဝန် ထမ်းဆောင်နေပါတယ်။ သူ အလုပ်စ၀င်ခါစက နိုင်ငံခြားရေး မူဝါဒဆိုင်ရာ လက်ထောက်တစ်ယောက်အဖြစ် ဒီမိုကရက် လွှတ်တော်အမတ် အက်ဒ်ဝပ် ကနေဒီ ဆီမှာ တာဝန်ထမ်းဆောင်ခဲ့ဖူးပြီး အဲဒီနောက်မှာတော့ ထိုင်ဝမ် သတင်းစာ China Post မှာ အလုပ်လုပ် ခဲ့ပါတယ်။ မဟာဗျူဟာနဲ့ နိုင်ငံတကာ လေ့လာရေးအဖွဲ့ အပါအ၀င် ၀ါရှင်တန် အခြေစိုက် မူဝါဒရေးရာ အဖွဲ့အစည်းတွေမှာလည်း သူ အလုပ်လုပ်ခဲ့ဖူးပါတယ်။

မြန်မာနိုင်ငံဆိုင်ရာ အထူးကိုယ်စားလှယ် အဖြစ် မစ္စတာ မစ်ချဲလ်ဟာ အစိုးရနဲ့ရော မြန်မာ အတိုက်အခံတွေ နဲ့ပါ စကားပြောရမှာပါ။ လွန်ခဲ့တဲ့ ၁၈ လ အတွင်းမှာ အိ်ုဘားမား အစိုးရဟာ မြန်မာနိုင်ငံကို အထီးကျန် ဖြစ်စေတဲ့ မူဝါဒကနေ ထိတွေ့ဆက်ဆံမယ့် မူဝါဒအဖြစ် ပြောင်းလဲခဲ့ပေမဲ့ ပိတ်ဆို့အရေးယူရေး မူဝါဒကိုတော့ ဆက်လက် ကိုင်စွဲထားခဲ့ပါတယ်။ မြန်မာနိုင်ငံမှာ လူ့အခွင့်အရေး ချိုးဖောက်မှုတွေနဲ့ ဒီမိုကရေစီရေးအတွက် ပိတ်ဆို့အရေးယူရေး မူဝါဒကို ဆက်လက် ကျင့်သုံးတာဖြစ်တယ်လို့ အမေရိကန် အစိုးရက ပြောပါတယ်။

မြန်မာနိုင်ငံရဲ့ အိမ်နီးချင်းနိုင်ငံတွေနဲ့ အရှေ့တောင်အာရှ နိုင်ငံတွေက ပိတ်ဆို့ အရေးယူထားတာကို ရုပ်သိမ်းဖို့ တောင်းဆိုထားကြပါတယ်။ အင်္ဂါနေ့တုန်းကတော့ ဥရောပ သမဂ္ဂက လက်ရှိ အစိုးရရဲ့ အရပ်သား ၀န်ကြီးတွေအပေါ်မှာ ဗီဇာပိတ်ပင်မှာ မဟုတ်သလို နိုင်ငံခြားရေးဝန်ကြီးကိုလည်း သွားလာ ဆက်ဆံရေး လွယ်ကူအောင် ဗီဇာ ပိတ်ပင်ရေး မူဝါဒကနေ ချွင်းချက်အဖြစ် သတ်မှတ်ကြောင်း ကြေညာခဲ့ပါတယ်။

အမေရိကန်ကတော့ ပိတ်ဆို့ အရေးယူထားတာကို ရုပ်သိမ်းဖို့ စောသေးကြောင်း ပြောပါတယ်။ နိုင်ငံရေး အကျဉ်းသား ၂,၀၀၀ ကျော်ကို လွှတ်ပေးဖို့ အမေရိကန် အစိုးရက တိုက်တွန်းထားပါတယ်။ မြောက်ကိုရီးယားနဲ့ မြန်မာနိုင်ငံတို့ကြား လက်နက် ရောင်းဝယ်မှုနဲ့ နျူကလီးယာ ဆိုင်ရာ ဆက်သွယ် ဆက်ဆံရေးတွေ အပေါ်လည်း အမေရိကန်က ရတက်မအေး ဖြစ်နေပါတယ်။

စုံစမ်းရေး ကော်မရှင်ပေါ်ပေါက်ရေး အမေရိကန် ဦးဆောင်ဖို့ ဆွေးနွေး

2011-04-15 RFA

ဆွစ်ဇာလန်နိုင်ငံ ဂျီနီဗာအခြေစိုက် ကုလသမဂ္ဂ လူ့အခွင့်အရေး ကောင်စီ ဆိုင်ရာ အမေရိကန် သံအမတ်ကြီး မစ္စ အိုင်လင်း ဒိုနာဟိုးနဲ့ အဖွဲ့ဟာ မြန်မာနဲ့ အီရန်နိုင်ငံက ဒီမိုကရေစီနဲ့ လူ့အခွင့်အရေး လှုပ်ရှားသူတွေကို ဖိတ်ခေါ်ပြီး ကုလသမဂ္ဂ လူ့အခွင့်အရေး ကောင်စီမှာ အမေရိကန်ရဲ့ အခန်းကဏ္ဍ ဆိုတဲ့ ခေါင်းစဉ်နဲ့ ဝါရှင်တန်ဒီစီ မြို့တော် အောက်လွှတ်တော် အဆောက်အဦမှာ ဆွေးနွေးပွဲတရပ် ဧပြီ ၁၄ ရက် မနေ့က ကျင်းပခဲ့ပါတယ်။

အဲဒီဆွေးနွေးပွဲမှာ မြန်မာနိုင်ငံနဲ့ ပတ်သက်လို့ ကုလသမဂ္ဂ စုံစမ်းရေးကော်မရှင်တရပ် ဖွဲ့စည်းနိုင်ရေး အမေရိကန်က ဦးစီးလုပ်ဆောင်သွားဖို့ သူတို့အနေနဲ့ တိုက်တွန်းခဲ့ကြောင်း NCGUB အဝေးရောက် ညွန့်ပေါင်းအစိုးရ ကုလသမဂ္ဂဆိုင်ရာ ကိုယ်စားလှယ် ဒေါက်တာသောင်းထွန်းက ပြောပါတယ်။

“ဒီလုပ်ရတဲ့ ရည်ရွယ်ချက်ကတော့ အမေရိကန်နိုင်ငံက လူ့အခွင့်အရေး ဝင်ရောက် ဆောင်ရွက်လာတာ ဘာများ ထူးခြားမှုတွေ ရှိသလဲပေါ့နော်။ ထူးခြားမှုတွေ ဆိုတာက အခု ဒီနှစ်ပိုင်းအတွင်းမှာပေါ့၊ ၂၀၁၁ ခုနှစ် စပြီးတော့ အခုထိမှာ ဆိုရင် ကျွန်တော်တို့ ဗမာပြည်ကိစ္စနဲ့ ပတ်သက်လာလို့ ရှိရင် Universal Periodic Review ရှိတယ်၊ နောက် ဒီမတ်လမှာ လုပ်တဲ့ လူ့အခွင့်အရေး ကောင်စီ အစည်းအဝေးမှာ မြန်မာနိုင်ငံနဲ့ ပတ်သက်လို့ ဆုံးဖြတ်ချက်တွေ ရှိတယ်။ ဆိုတော့ အဲဒီကိစ္စတွေမှာ ကျွန်တော်တို့ရဲ့ သဘောထားတွေပေါ့။ Commission of Inquiry ဖွဲ့တဲ့နေရာမှာ အမေရိကန်နိုင်ငံက အလားတူ အားထုတ်မှုမျိုးတွေ လုပ်ဖို့ပေါ့နော်၊ ဆွေးနွေးတာ ဖြစ်ပါတယ်။”

အမေရိကန်နိုင်ငံဟာ ကုလသမဂ္ဂ လူ့အခွင့်အရေး ကောင်စီရဲ့ လုပ်ဆောင်ချက်တချို့ကို မကျေနပ်တာကြောင့် အစောပိုင်းမှာ ကောင်စီက နုတ်ထွက်ထားခဲ့ပြီး၊ ၂၀၀၉ ခုနှစ်မှာမှ ကောင်စီအဖွဲ့ဝင် နိုင်ငံအဖြစ် ပြန်လည် ဝင်ရောက်ခဲ့ပါတယ်။

မနေ့က ကျင်းပတဲ့ ဆွေးနွေးပွဲမှာ အမေရိကန်အစိုးရရဲ့ လူ့အခွင့်အရေးဆိုင်ရာ လုပ်ဆောင်ချက်တွေကို ပြန်လည် သုံးသပ် ဆွေးနွေးခဲ့ကြသလို၊ ပြည်ပအခြေစိုက် မြန်မာနဲ့ အီရန်အတိုက်အခံအဖွဲ့တွေရဲ့ လိုလားချက်တွေကိုလည်း ကြားနာခဲ့ကြောင်း သိရပါတယ်။

အခုလိုဆွေးနွေးပွဲဖြစ်မြောက်အောင် OSI အဖွဲ့ Freedom House အဖွဲ့နဲ့ Democracy Coalition အဖွဲ့တွေက စုပေါင်း စီစဉ်ပေးခဲ့ကြောင်း သိရပါတယ်။

ဒီအကြောင်းနဲ့ ပတ်သက်ပြီး NCGUB ကုလသမဂ္ဂဆိုင်ရာ ကိုယ်စားလှယ် ဒေါက်တာသောင်းထွန်းကို RFA မှ ကိုဉာဏ်ဝင်းအောင်က ဆက်သွယ်မေးမြန်း ထားပါတယ်။

လူ့အခွင့်အရေး ပညာပေး စာစောင် ဖြန့်ချိနိုင်ရန် HRDP ပြင်ဆင်

2011-04-15 RFA

လာမဲ့နှစ်သစ်မှာ လူ့အခွင့်အရေး လုပ်ငန်းတွေ တိုးမြှင့် ဆောင်ရွက်နိုင်ဖို့ လူ့အခွင့်အရေး မြှင့်တင်သူများ ကွန်ရက် (HRDP) အနေနဲ့ ပြင်ဆင် လုပ်ဆောင်နေကြောင်း HRDP တာဝန်ရှိသူတွေက ဧပြီ ၁၅ ရက် ဒီကနေ့ မဟာသင်္ကြန် အကြတ်နေ့မှာ ထုတ်ဖော် ပြောကြားလိုက်ပါတယ်။

နိုင်ငံသားများရဲ့ နိုင်ငံရေးဆိုင်ရာ အခွင့်အရေးနဲ့ ပတ်သက်ပြီး၊ ကုလသမဂ္ဂ ပြဌာန်းချက်ပါ နိုင်ငံတကာ သဘောတူညီချက်တွေကို ကိုးကား ဖော်ပြထားတဲ့ စာမျက်နှာ ၄၀ ကျော်ပါ လူ့အခွင့်အရေး ပညာပေးရေး လက်ကမ်း စာစောင် တခုကိုလည်း ဖြန့်ဝေနိုင်ဖို့ ဒီရက်ပိုင်းအတွင်း ပြင်ဆင်နေပါတယ်။
အဲဒီ စာစောင်ပါ အချက်အလက်တချို့နဲ့ ပတ်သက်ပြီး HRDP အဖွဲ့ခေါင်းဆောင်တဦးဖြစ်တဲ့ ဦးမောင်မောင်လေးက အခုလို ရှင်းပြပါတယ်။

“ဟုတ်ကဲ့ နိုင်ငံသားတဦးစီရဲ့ အခွင့်အရေး အရဆိုရင်တော့ အခြေခံလေးက စလို့ပေါ့လေ၊ လွတ်လပ်စွာ ရောင်းဝယ်ပိုင်ခွင့် ဆိုတာတွေ၊ လွတ်လပ်စွာ စီးပွားရှာဖွေပိုင်ခွင့် ဆိုတာတွေ၊ လွတ်လပ်စွာ ပညာသင်ကြားပိုင်ခွင့် ဆိုတာတွေကနေ စလို့ပေါ့လေ၊ နိုင်ငံတော်ရဲ့ အစိုးရတရပ်ကို ဖြုတ်ချပိုင်ခွင့်၊ လွတ်လပ်စွာ ရွေးချယ်တင်မြှောက်ပိုင်ခွင့် ဆိုတဲ့ အဆင့်အထိကို ကျွန်တော်တို့ ကျယ်ကျယ်ပြန့်ပြန့် ပါပါတယ်။ နိုင်ငံသား တယောက်ချင်းရဲ့ အခွင့်အရေး။”

“နောက်တချက်မှာဆိုရင် ကျွန်တော်တို့ နိုင်ငံရေးဆိုင်ရာ အခွင့်အရေးများဆိုတာ ပါပါတယ်။ နိုင်ငံရေးပါတီတခုအနေနဲ့ ဘယ်လို ရပ်တည်ပိုင်ခွင့် ရှိတယ်၊ ဘယ်လို ဆောင်ရွက်ပိုင်ခွင့် ရှိတယ်၊ ဘယ်လို လွတ်လွတ်လပ်လပ် စည်းရုံး ဆောင်ရွက်ပိုင်ခွင့် ရှိတယ်၊ ထုတ်ပြန်ပိုင်ခွင့် ရှိတယ်၊ အစိုးရများရဲ့ လိုအပ်ချက်များကို အကြံပြုခြင်း၊ ဝေဖန်ခြင်းတွေ လုပ်ဆောင်နိုင်တယ် ဆိုတာ နိုင်ငံရေးဆိုင်ရာ အခွင့်အရေးတွေ အပါအဝင်ပေါ့လေ၊ ကျွန်တော်တို့ ဒီ နိုင်ငံသားနဲ့ နိုင်ငံရေးဆိုင်ရာ အခွင့်အရေး စာချုပ်ဆိုတာကို ပြင်ဆင်နေတာပါခင်ဗျ။”

လာမဲ့ နှစ်သစ်အတွင်း နိုင်ငံသားများရဲ့ နိုင်ငံရေးနဲ့ နိုင်ငံသား အခွင့်အရေးဆိုင်ရာ လူ့အခွင့်အရေးတွေကို မြှင့်တင်နိုင်ရေး ဦးတည်ဆောက်ရွက်သွားမှာ ဖြစ်ကြောင်း ဦးမောင်မောင်လေးက RFA ကို အခုလို ရှင်းပြပါတယ်။

“ဒေသအသီးသီးမှာ ရှိတဲ့ HRDP အဖွဲ့ဝင်တွေရော၊ နိုင်ငံသူ နိုင်ငံသားတွေ အားလုံးမှာလည်းပေါ့လေ နှစ်သစ်ကူးကာလ ဆင်နွှဲနေတဲ့ အချိန်ဖြစ်ပါတယ်။ ဒါပေမဲ့ ကျွန်တော်တို့က နှစ်သစ်ကူးကာလ ဟိုဖက် ဧပြီလ ကျော်သွားတာနဲ့ တခါတည်းမှာပဲ ကျွန်တော်တို့က ဒီ လူ့အခွင့်အရေး ကိစ္စရပ်တွေကို တိုးမြှင့်ဆောင်ရွက်ဖို့ ကျွန်တော်တို့ အနေနဲ့ ဒီမှာ အစီအစဉ်လေးတွေ လုပ်နေတာ ရှိပါတယ်ခင်ဗျ။”

“ကျွန်တော်တို့ အရင်နှစ် သင်္ကြန်ကဆိုရင် ကျွန်တော်တို့ လူ့အခွင့်အရေး အခြေခံဖြစ်တဲ့ပေါ့နော်၊ အပြည်ပြည်ဆိုင်ရာ လူ့အခွင့်အရေး ကြေညာစာတမ်းပါ အချက် ၃၀ ကိုသာလျှင် ကျွန်တော်တို့ အဓိက အားထား ဆောင်ရွက်ခဲ့တာ ဖြစ်ပါတယ်။ ဒီနှစ် နှစ်သစ်ကူးကာလမှာတော့ ကျွန်တော်တို့ မြန်မာနိုင်ငံရဲ့ လိုအပ်ချက်အရပေါ့လေ ကျွန်တော်တို့ နိုင်ငံသားနဲ့ နိုင်ငံရေးဆိုင်ရာ အခွင့်အရေးများ စာချုပ်ပေါ့နော်၊ အဲဒီ စာချုပ် စာမျက်နှာ ၄၀ လောက် ပါပါတယ်။ အဲဒီ စာအုပ်ကို ကျွန်တော်တို့ ပြင်ဆင်နေပါတယ်။”

မြန်မာနိုင်ငံမှာ စစ်အစိုးရက ၂၀၁၀ ခုနှစ်အတွင်း ရွေးကောက်ပွဲလုပ်ခဲ့ပြီး အရပ်သားပုံသဏ္ဌာန် အစိုးရပြောင်း လဲခဲ့တဲ့နောက်ပိုင်း၊ မြန်မာနိုင်ငံအတွင်းလူ့အခွင့်အရေးအခြေအနေတွေ၊ တိုးတက် ကောင်းမွန်လာအောင် ဆောင်ရွက်နိုင်ခွင့် ရနိုင်မလားဆိုတာကို ပြည်တွင်း လူ့အခွင့်အရေး လှုပ်ရှားသူတွေ အနေနဲ့ မျှော်လင့်နေသလို၊ ကုလသမဂ္ဂနဲ့ နိုင်ငံတကာ လူ့အခွင့်အရေး အဖွဲ့အစည်းတွေကလည်း စိတ်စားနေကြကြောင်း HRDP တာဝန်ရှိသူတွေက ပြောဆိုခဲ့ကြပါတယ်။

HRDP ကို၂၀၀၁ ခုနှစ်ကတည်းက စတင် တည်ထောင်ခဲ့ပြီး၊ လူ့အခွင့်အရေး ပညာပေးမှုတွေကို မြန်မာနိုင်ငံအနှံ့ လိုက်လံဆောင်ရွက်ခဲ့ပါတယ်။

အခုအချိန်အထိ စတင် တည်ထောင်သူတဦး ဖြစ်တဲ့ ဦးမြင့်အေးအပါအဝင် လူ့အခွင့်အရေး မြှင့်တင်လှုပ်ရှားသူ စုစုပေါင်း ၂၃ ယောက်ကျော်ဟာ စစ်အစိုးရရဲ့ အကျဉ်းထောင်တွေအတွင်း ဖမ်းဆီး ထောင်ချခံထားရပါတယ်။

NLD လူငယ်များ၏ စတုဒီသာအလှူ ဧည့်ပရိသတ်စည်ကား

2011-04-14 RFA

အမျိုးသား ဒီမိုကရေစီအဖွဲ့ချုပ်က ရန်ကုန်မြို့ ဗဟန်းမြို့နယ်က ရုံးချုပ်ရှေ့မှာ မြန်မာ့ရိုးရာအတာ သင်္ကြန် ပွဲတော်အဖြစ် စတုဒီသာကျွေးတဲ့ ပွဲတခု ဒီနေ့ ဧပြီ ၁၄ ရက် သင်္ကြန် အကျနေ့ မနက်က ကျင်းပခဲ့ပါတယ်။

ဒီအလှူကို NLD ဗဟိုလူငယ်အဖွဲ့က ဦးဆောင် ကျင်းပခဲ့တာပါ။ ပွဲမှာ မုန့်လက်ဆောင်းကျွေးပြီး နောက်ပိုင်းမှာ ဖျော်ရည်အအေး တိုက်တယ်လို့ NLD လူငယ်ခေါင်းဆာင် ကိုမျိုးညွန့်က အခုလို ပြောပါတယ်။

“ကျွန်တော်တို့ အမျိုးသား ဒီမိုကရေစီ အဖွဲ့ချုပ် လူငယ်တွေကနေ စတုဒီသာ ကျွေးတယ်။ ဒီနေ့ ကျွေးတာက မုန့်လက်ဆောင်းပေါ့။ ညနေကျရင် မုန့်လုံးရေပေါ် ကျွေးမယ်။ ကျွေးတဲ့အခါကျတော့ ကျွန်တော်တို့ အဖွဲ့က လူတွေလည်း လာတယ်၊ နောက် လမ်းကပေါ့၊ ဝယ်တဲ့လူတွေပေါ့၊ ကားတွေက ရပ်ရပ်ပြီးတော့ လာသောက်ကြတယ်ပေါ့၊ အဲလိုမျိုးပေါ့။ ပါဆယ်ပေးရင်လည်း ပေးလိုက်တယ်။ လာပြောသွားတဲ့လူက ဒါမှ ငါတို့အမေ၊ ဒါ ငါတို့အမေ ဆိုပြီး ပြောကြတာ ရှိတယ်။”

လူငယ်တွေရဲ့ စတုဒီသာကျွေးပွဲကို NLD ဒုဥက္ကဋ္ဌ ဦးတင်ဦးနဲ့ ဗဟို အလုပ်အမှုဆောင်တွေ ဖြစ်တဲ့ ဦးဝင်းတင်နဲ့ ဦးဟံသာမြင့်တို့လည်း သွားရောက်ခဲ့ပါတယ်။

မနက်ဖြန်မှာလဲ NLD လူငယ်တွေက စတုဒီသာကျွေးဖို့ ပြင်ဆင်ထားပြီး နှစ်ဆန်းတရက်နေ့မှာတော့ ပရိတ်ရွတ်ပွဲနဲ့ သက်ကြီးဝါကြီးတွေကို ပူဇော်တဲ့ပွဲ ကျင်းပမယ်လို့ သိရပါတယ်။

ရန်ကုန်သင်္ကြန်က မနှစ်က ဗုံးကွဲထားတဲ့ အရှိန်ကြောင့် ဒီနှစ်မှာ လုံခြုံရေး တင်းကျပ်ထားသလို စည်စည်ကားကား မရှိဘူးလို့ သိရပါတယ်။

နယူးယောက် လေလံပွဲတွင် မြန်မာ့ပတ္တမြား ဒေါ်လာ တစ်သန်းကျော်ဖြင့် စံချိန်တင်

April 15, 2011 FNG

နယူးယောက်မြို့ ရှိ နာမည် ကျော် Doyle လေလံပွဲ တွင် ၆.၂၉ ကာရက်ရှိ မြန်မာ့ပတ္တမြား(Ruby) ကို လေလံစွဲသူ တစ်ဦးက အမေရိကန် ဒေါ်လာ ၁.၃၂ သန်း ကျော်ပေး၍ လေလံစွဲသွားသည်ဟု သတင်း ရရှိသည်။

ယခု လေလံစွဲသည့် ဈေးနှုန်းမှာ ပတ္တမြား သတ်မှတ်ကာရက်ပေါက် ဈေးနှုန်းထက်ပိုမိုမြင့်မား သည့် စံချိန်တင် ဈေးရရှိခဲ့ကာ မူလကြမ်းခင်းဈေးမှာ ဒေါ်လာ ၆၀,၀၀၀ နှင့် ၈၀,၀၀၀ ကြားသာ ရှိသည်။
အဆိုပါ ပတ္တမြားသည် ကာတီယား စိန်တိုက်ထုတ်ဖြစ်ပြီး မူလပိုင်ရှင်မှာ အမေရိကန် သမ္မတ လင်ကွန်း ၊ ၀ီလျှံ မက်ကင်ဟေး နှင့် သီရိုဒို ရူစဗဲ့တို့၏ ကိုယ်ရေးအတွင်းဝန်ဖြစ်ခဲ့ဖူးသည့် ဂျွန်ဟေး ၏ ချွေးမဖြစ်သူ အဲလစ် အဲပယ်(လ)တန် ဟေး (Hay Collection) ပိုင်ဆိုင်သည်။

မြန်မာ့ကျောက်မျက်ရတနာများမှာ ကမ္ဘာကျော်ပြီး ယခုနှစ် မေလက မြန်မာစစ်အစိုးရမှ ကျင်းပပြုလုပ်သည့် ကျောက်မျက် ရတနာပြပွဲတွင် ဒေါ်လာ ၂.၈ ဘီလျှံဖိုး ရောင်းချခဲ့ရသည်။

၁၉၉၀ ပြည့်နှစ်က မြန်မာ စစ်အစိုးရက ရှာဖွေတွေ့ရှိသည်ဆိုသည့် န၀တ ပတ္တမြားကြီးမှာ ၄၉၆ ကာရက်ရှိပြီး၊ မြန်မာ့ ပတ္တမြားကြီးမှာမူ ၂၁၄၅၀ ကာရက်( 4.29 Kg) ရှိကာ ကမ္ဘာတွင် အကြီးဆုံး ဖြစ်သည်။ ယခု အဆိုပါ ပတ္တမြားကို Max အချိုရည် လုပ်ငန်းပိုင်ရှင် ဦးဇော်ဇော် က ပိုင်ဆိုင်သည်ဟု ဆိုသည်။

ဗမာ့သွေး ပေးပို့သည်။