NLD ရဲ့ ၂၂ နှစ်တာ နိုင်ငံရေးခရီး

မေလ ၆ ရက်နေ့ဟာ အမျိုးသားဒီမိုကရေစီအဖွဲ့ချုပ် (NLD) ပါတီက စစ်အစိုးရကျင်းပမယ့် ရွေးကောက်ပွဲအတွက် မှတ်ပုံမတင်တဲ့အတွက် တရားဝင်ရပ်တည်ခွင့် ကုန်ဆုံးတော့မယ့် နောက်ဆုံးနေ့ ဖြစ်ပါတယ်။

၁၉၈၈ ခု စက်တင်ဘာလ ၂၇ ရက်နေ့က စတင်ဖွဲ့စည်းခဲ့တဲ့ NLD ၂၂ နှစ်တာ ဖြတ်သန်းလျှောက်လှမ်းခဲ့တဲ့ နိုင်ငံရေးခရီးလမ်းကြောင်းမှာ ဘယ်လို အချိုးအကွေ့၊ အနိမ့်အမြင့်တွေကို ကြုံတွေဖြတ်သန်းခဲ့ရပါသလဲ။

၁၉၉၀ ရွေးကောက်ပွဲမှာ ပြတ်ပြတ်သားသား အနိုင်ရခဲ့ပုံ၊ ပါတီခေါင်းဆောင်တွေ ဖြစ်တဲ့ ဦးတင်ဦးနဲ့ ဒေါ်အောင်ဆန်းစုကြည်တို့ အကြိမ်ကြိမ် အချုပ်အနှောင်ခံရပုံ၊ ပါတီရုံးတွေပိတ်ခံခဲ့ရပုံ၊ ဒီကြားထဲကပဲ ကြံ့ကြံ့ခံရင်း နှစ်ပေါင်း ၂၀ ကျော် ဖြတ်သန်းလာခဲ့ပုံနဲ့ အခုနောက်ဆုံး ပါတီရပ်တည်ခွင့်ကို စတေးပြီး ရွေးကောက်ပွဲမဝင်ဖို့၊ ပါတီမှတ်ပုံမတင်ဖို့ ဆုံးဖြတ်တဲ့အခြေအနေအထိ ရောက်လာပုံတွေအကြောင်း NLD ဗဟိုအလုပ်အမှုဆောင် အဖွဲ့ဝင်တွေ၊ ရွေးကောက်ခံကိုယ်စားလှယ်တွေ ပြန်ပြောပြချက်တွေကို ဦးမင်းထက်က တင်ဆက်ပေးထားတာ ဖြစ်ပါတယ်။

ဒီမိုကရေစီ ရရှိရေး … (တို့အရေး၊ တို့အရေး)
ကျောင်းသားသမဂ္ဂဖွဲ့စည်းရေး (တို့အရေး၊ တို့အရေး)
ပါတီစုံစနစ် ရရှိရေး (တို့အရေး၊ တို့အရေး)

၁၉၈၈ ခုနှစ် သြဂုတ်လထဲမှာ တနိုင်ငံလုံး ဒီမိုကရေစီရေး အုံကြွတောင်းဆိုမှုတွေ ဖြစ်လာခဲ့တော့ ဒီတိုက်ပွဲတွေကြားကပဲ ခေါင်းဆောင်တွေလည်း ပေါ်လာပါတယ်။

“ဒီအရေးအခင်းဟာ တတိုင်းတပြည်လုံးနဲ့ဆိုင်တဲ့ အရေးအခင်းဖြစ်နေပါတယ်”

ဒီအထဲမှာ အထင်ရှားဆုံးဖြစ်လာသူတဦးကတော့ လွတ်လပ်ရေးဖခင် ဗိုလ်ချုပ်အောင်ဆန်းရဲ့သမီး ဒေါ်အောင်ဆန်းစုကြည်ပါ။

“ဒီအရေးအခင်းကြီးဟာ တကယ်တော့ ဒုတိယ လွတ်လပ်ရေးလူထုတိုက်ပွဲကြီးလို့ဆိုရင်လည်း ဖြစ်ပါတယ်”

တပါတီအာဏာရှင်စနစ်ရဲ့ ၂၆ နှစ်တာ ဖိနှိပ်အုပ်ချုပ်မှုတွေကြားမှာ ဆိတ်သုဉ်းခဲ့တဲ့ ဒီမိုကရေစီကို ပြန်ရချင်သူတွေ၊ အာဏာရှင်ကို ဆန့်ကျင်ချင်စိတ်ရှိသူ ခေါင်းဆောင်တွေ ဒီတိုက်ပွဲမှာ စုဝေးမိခဲ့ကြပါတယ်လို့ NLD ဒုတိယ ဥက္ကဋ္ဌ ဗိုလ်ချုပ်ကြီးဟောင်း သူရဦးတင်ဦးက အခုလိုဆိုပါတယ်။

“မျိုးချစ်ကနေ ကျနော်တို့ကနေ လှုပ်ရှားတယ်ပေါ့ဗျာ၊ လှုပ်ရှားရင်းနဲ့ ဒီဘက်က ဒေါ်အောင်ဆန်းစုကြည်တို့ဘက်ကလည်းပဲ ဦးဝင်းတင်တို့၊ တတ်သိပညာရှင်အပိုင်းကပုဂ္ဂိုလ်တွေတို့ အဲဒီအုပ်စုတစုက ဒေါ်အောင်ဆန်းစုကြည်အိမ်မှာလည်း စုစည်းတယ်ဗျ၊ အုပ်စုတစုကလည်း ဘယ်မှာလဲဆိုတော့ ဦးအောင်ကြီးအိမ်မှာလည်း သူ့ရဲ့လုပ်ဖော်ကိုင်ဖက်တွေနဲ့ စုစည်းတာပေါ့ဗျာ၊ အဲတော့ ၃ ဖွဲ့ဖြစ်နေတယ်။ အဲဒီ ၃ ဖွဲ့ ဖြစ်နေတာကို ပေါင်းမှဖြစ်မယ်ဆိုပြီးတော့ ကျနော်တို့ ညှိနှိုင်းပြီး ပေါင်းလိုက်ကြတယ်။ ပေါင်းလိုက်တဲ့ အဖွဲ့ကိုတော့ ခင်ဗျားတို့ ကင်ပွန်းတပ်တာကတော့ အောင်၊ စု၊ တင် ဆိုပြီးတော့ အောင်စုတင်ပေါ့ဗျာ”

ဦးတင်ဦး (ဓာတ်ပုံ - daylife.com)

ဗိုလ်မှူးချုပ်ဟောင်း ဦးအောင်ကြီး၊ ဒေါ်အောင်ဆန်းစုကြည်နဲ့ ဗိုလ်ချုပ်ကြီး သူရဦးတင်ဦးတို့ရဲ့ အောင်၊ စု၊ တင် အဖွဲ့ဟာ NLD ရဲ့သန္ဓေအဖွဲ့လည်းဖြစ်ခဲ့ပါတယ်။ စက်တင်ဘာလမှာ စစ်တပ်ကအာဏာသိမ်းပြီး ရွေးကောက်ပွဲတွေ ကျင်းပမယ်လို့ ကြေညာတော့ တော်လှန်ရေးကို ပါတီပုံသဏ္ဍာန်နဲ့ ဆက်လှုပ်ရှားသွားဖို့ ခေါင်းဆောင်တွေက ဆုံးဖြတ်ခဲ့ပါတယ်။ အဲဒီမှာ အမျိုးသားဒီမိုကရေစီအဖွဲ့ချုပ် (NLD) မွေးဖွားခဲ့တာပါ။


“အမျိုးသားဒီမိုကရေစီအဖွဲ့ချုပ်ပေါ်လာတာဟာ ၈၈ ကျောင်းသားများရဲ့လှုပ်ရှားမှုကြောင့် ပေါ်လာတာဖြစ်တဲ့အတွက် ကျောင်းသားတွေကို ဂုဏ်ပြုတဲ့အနေနဲ့ အလံတော်မှာ အခုမြင်တဲ့အတိုင်း ခွပ်ဒေါင်းကို ထည့်လိုက်တာပေါ့၊ တော်လှန်ရေးဆိုတဲ့ အလင်းရောင်တခုအနေနဲ့ လွတ်လပ်ရေး၊ ဒီမိုကရေစီရေး၊ လူ့အခွင့်အရေး အဲဒီဟာတွေအတွက် မီးရှူးတန်ဆောင်အဖြစ် ကြယ်ပေါ့၊ ကျောင်းသားတွေရဲ့ကျေးဇူးကို အဓိကထားပြီးတော့ အလံတော်ကို ကျနော်တို့က ယူလိုက်တယ်”

ဗိုလ်ချုပ်ကြီးဟောင်း သူရဦးတင်ဦးပါ။ NLD ဟာ ဖွဲ့ပြီးစမှာပဲ ခေါင်းဆောင်တွေထဲမှာ အက်ကြောင်းကြီး ထင်ခဲ့ရပါတယ်။ ဥက္ကဋ္ဌတာဝန်ယူတဲ့ ဦးအောင်ကြီးက ဒေါ်အောင်ဆန်းစုကြည်ရဲ့ တတ်သိပညာရှင်များအဖွဲ့မှာ ပါဝင်သူတွေကို ကွန်မြူနစ်တွေပါလို့စွပ်စွဲပြီး ထုတ်ပယ်ရာကနေ ပါတီအတွင်းမဲခွဲတော့ ဦးအောင်ကြီးရှုံးပြီး သူပဲ ထွက်သွားခဲ့ရပါတယ်။ ပါတီစည်းရုံးရေးကာလမှာ ဒေါ်အောင်ဆန်းစုကြည် ခေါင်းဆောင်တဲ့ NLD ဟာ တိုင်းပြည်တနံတလျား သွားလေရာမှာ လူထုထောက်ခံမှု အများဆုံးဖြစ်ခဲ့ပါတယ်။

ဒေါ်အောင်ဆန်းစုကြည် … ကျန်းမာပါစေ၊ ချမ်းသာပါစေ။
ဒေါ်အောင်ဆန်းစုကြည် … ကျန်းမာပါစေ၊ ချမ်းသာပါစေ။

ဒေါ်အောင်ဆန်းစုကြည်ရဲ့ လူကြိုက်များမှုကို ရွံ့ကြောက်လာတဲ့ အာဏာပိုင်တွေက ပါတီဖွဲ့လို့ ၁၀ ပဲအကြာမှာ ဒေါ်အောင်ဆန်းစုကြည်နဲ့ ဥက္ကဋ္ဌ ဦးတင်ဦးတို့ကို နေအိမ်အကျယ်ချုပ်ချထားလိုက်ပါတယ်။ ဒါပေမယ့် NLD ဟာ ဒေါ်အောင်ဆန်းစုကြည်ရဲ့ ခေါင်းဆောင်မှုအောက်မှာရှိနေတယ်ဆိုတာ နားလည်တဲ့လူထုကြီးအတွက် ပါတီဟာ ရွေးကောက်ပွဲအတွက် မဲဆွယ်စရာမလိုအောင် စည်းရုံးရေးအားကောင်းခဲ့ပါတယ်လို့ NLD သထုံမြို့နယ်က ရွေးကောက်ခံ ကိုယ်စားလှယ် ဦးခွန်မြင့်ထွန်းက အဲဒီတုန်းက အတွေ့အကြုံကို အခုလိုပြောပြပါတယ်။

ဦးခွန်မြင့်ထွန်း (ဓာတ်ပုံ - daylife.com)

“အဲဒီတုန်းကဆိုရင် ကျနော်တို့ သွားလေရာတွေမှာ ကျနော်တို့ကိုပြောတဲ့စကားရှိတယ်၊ နင်တို့က ငါတို့ကို စည်းရုံးစရာ မလိုတော့ဘူးတဲ့၊ ငါတို့က ဒေါ်အောင်ဆန်းစုကြည်ကို ထောက်ခံပြီးသား၊ အမျိုးသားဒီမိုကရေစီ အဖွဲ့ချုပ်ဆိုတာ ငါတို့က လက်ခံထားပြီးသား၊ နင်တို့က ငါတို့ကို ထပ်ပြီး စည်းရုံးစရာမလိုတော့ဘူးတဲ့”

ဆက်လက်ဖော်ပြပါမယ်။