ကျောင်းသား ထောင် တော်လှန်ရေးသမား (၅)

အဲဒီတုန်းက မဆလနဲ့စစ်တပ်က အတူတူပဲကိုး။ စစ်တပ်ပါတီကလွဲပြီး တခြား ဘယ်သူမှ နိုင်ငံရေးလုပ်ခွင့် မရဘူး။ ဗမာပြည်မှာ စစ်တပ်နိုင်ငံရေးပဲ ရှိတယ်။ တခြား ဘယ်အသွေးအရောင် နိုင်ငံရေးမှ မရှိစေရဘူးဆုံးဖြတ်ချက် အဲဒီမှာ အပြတ်ချလိုက်တာ။ အဲဒီတော့ အဲဒီဟာကို ဘယ်လိုအကောင်အထည်ဖော်လဲ။

သူတို့ အကုန်လုံး လိုက်ဖမ်းတယ်။ ထောင်ထဲ ထည့်တယ်။ ထောင်ထဲထည့်မရလို့ ထွက်ပြေးတဲ့လူကို တောထဲရောက်အောင် မောင်းပို့တယ်။ တောထဲရောက် သွားလို့ရှိရင် လိုက်တိုက်ပြီး သတ်တယ်။ စစ်တပ်နဲ့ လိုက်သတ်တယ်။ သူလျှိုထည့်လွှတ်ပြီး သတ်တယ်။ နည်းမျိုးစုံနဲ့ သတ်တယ်။ အဲဒါဟာ ၆၃ က စခဲ့တာ ဒီနေ့အထိပဲ။

၈၈ တုန်းကလည်း ဒီအတိုင်းပဲ လုပ်ကြတာ။ ကျောင်းသားတွေကို တောထဲမောင်းပို့တာပဲ။ “မြေပေါ်မှာတော့ မင်းတို့ အူကြောင်ကြောင်မလုပ်ကြနဲ့ တောထဲပဲသွား၊ မြေပေါ်မှာဆိုရင် ထောင်ထဲမှာ နေလို့ရမယ်၊ ထောင်အပြင်မှာ နေလို့မရဘူး။” အဲ … တောထဲမှာသွား တောထဲရောက်ရင် လိုက်သတ်မှာပဲ။ စစ်တပ်လွှတ်သတ်မှာ။ ဒါ … ဒီနေ့အထိ စစ်အစိုးရမှာထားရှိတဲ့ ဒီမိုကရေစီနဲ့ပတ်သက်တဲ့ အခြေခံသဘောတရားဟာ အဲဒါပဲ။

ဒီနေရာမှာ မန္တလေးတက္ကသိုလ်အပိတ်ခံရပုံကို ပြောပြချင်သေးတယ်။ ရန်ကုန်တက္ကသိုလ်မှာ တကသ က ရွေးကောက်ပွဲ ကျင်းပဖို့ တကယ်တမ်းလုပ်တာ အရှိန်အဟုန်က မြင့်သည်ထက်မြင့်လာတော့ စစ်အစိုးရက စောင့်ကြည့် မနေနိုင်တော့ဘဲ တက္ကသိုလ်ကိုပိတ်လိုက်ကြောင်း ကြေညာပြီး ခေါင်းဆောင်တွေကို အတင်းလိုက်ဖမ်းတာပဲ။ သိုးကိုစားချင်တဲ့ ဝံပလွေ ပေးတဲ့ “နင်မဟုတ် နင့်အဖေပဲ” ဆိုတဲ့ ဆင်ခြေလိုပဲ။ သူတို့က မခိုင်လုံတဲ့ အကြောင်းပြချက်တခု ပြတယ်။ ဒါပေမယ့် သိပ်ရှင်းနေတယ်။ ဒါဟာ ဗမာပြည်သမိုင်းမှာ ဒုတိယအကြိမ် တက္ကသိုလ်တွေကို ပိတ်တာ။ (ပထမ တခါက ၇ ဇူလိုင်ပေါ့)။

ရန်ကုန်တက္ကသိုလ်ကို ဒီလို အကြောင်းမဲ့ ပိတ်လိုက်တယ်ဆိုတော့ ကျနော်တို့က လက်ပိုက်ကြည့်မနေနိုင်ဘူး။ ဒီလို လုပ်နည်းမျိုး ကိုယ့်ဆီကို လုပ်လာနိုင်တယ်ဆိုတာလည်း သတိထားမိတယ်။ ဒါကြောင့် မန္တလေး တကသ က ရန်ကုန် တက္ကသိုလ်ပိတ်ပစ်တာကို ဆန့်ကျင်တဲ့အကြောင်း ဖော်ပြတဲ့အနေနဲ့ ဆန္ဒပြကြတယ်။ တက္ကသိုလ်ပရဝုဏ်ထဲမှာပဲ Main Hall ကို ပတ်ဆန္ဒပြကြတာပါ။

ဒီအခါမှာ ကျောင်းသားတွေဟာ သိပ်ဒေါပွနေကြတယ်။ အစိုးရဟာ သူတို့အပေါ် ဆက်တိုက် အကြောင်းမဲ့ဖိနှိပ်နေတယ်ဆိုတာကို သဘောပေါက်နေကြတယ်။ ကျောင်းထဲမှာ အခြေအနေဟာ သိပ်မတည်ငြိမ်ဘူး။ မန္တလေးတက္ကသိုလ်ကိုလည်း စစ်တပ်နဲ့ဝိုင်းမယ်၊ လူတွေဖမ်းလိမ့်မယ်ဆိုတဲ့သတင်း ပျံ့နေတယ်။ ဒါကြောင့် ကျနော်လည်း အိမ်ပြန်မအိပ်ဘူး။ ကျောင်းဝင်းထဲမှာနေရင် ပိုစိတ်ချရတယ်လို့ တွေးခဲ့တာ မှန်သွားတယ်။

ဒီလိုနဲ့ အဲဒီည၊ မှတ်မှတ်ရရ။ ၁၉၆၃ ခုနှစ် ဒီဇင်ဘာလ ၁ ရက်နေ့ညမှာ ကျနော်နဲ့တပ်ဦးက ခေါင်းဆောင်တချို့ ရယ် ကျောင်းဝင်းထဲမှာ ပတ်လျှောက်နေကြတယ်။ အိပ်မရကြဘူး။ နောက်တနေ့မှာ တခုခုဖြစ်တော့မယ်ဆိုတာ သိနေသလိုလိုပဲ။ အဲဒီလိုနဲ့ ကျောင်းသားတချို့ အမှိုက်ပုံးကြီးတွေ လှိမ့်သွားတာ တွေ့မိတယ်။ လိုက်ကြည့်တော့ ကျနော်နဲ့ St.Peter တုန်းက ကျောင်းနေဖက် စိုးစိုးနဲ့ သူတို့ ရွှေဘိုက ကိုသန်းထွန်းတို့ဖြစ်နေတယ်။ သူတို့က “မနက်ဖြန်မှာ စစ်တပ်တွေ ကျောင်းထဲအဝင်မခံနိုင်ဘူး၊ လမ်းပိတ်မလို့ …” လို့ ပြောပြတယ်။

တချို့ကျောင်းသားတွေကလည်း သစ်ကိုင်း သစ်ခက်တွေ သယ်သွားတာ တွေ့ရတယ်။ ကျနော်တို့က သူတို့ကို မတားပါဘူး။ သူတို့စိတ်ဓာတ်ကို နားလည်နေတာပဲ။ သူတို့ လမ်းပိတ်ဖို့လုပ်နေတဲ့ မန္တလေးတက္ကသိုလ်အဝင် (မင်္ဂလာလမ်းက အဝင်) တံတားနားကို သွားကြည့်မိတယ်။ ကျောင်းသားတွေ အတော့်ကို တက်တက်ကြွကြွနဲ့ အတားအဆီး ဆောက်နေကြတာတွေ့ရတယ်။

အဲဒီညမှာ ရဲတွေလာဖမ်းနေပြီဆိုလို့ ကျနော်တို့ရှောင်ရတာ၊ တိမ်းရတာဖြစ်လိုက်သေးတယ်။ အခြေအနေက တလှုပ်လှုပ်နဲ့ ကျနော်တို့လည်း တညလုံးနီးပါး မအိပ်လိုက်ဘူး။ လင်းခါနီးမှ အဆောင်နေ သူငယ်ချင်းတယောက် အခန်းမှာ တိုးခွေ့အိပ်လိုက်ရတယ်။ ခဏပဲ။ မနက်စောစောထပြီး မနေ့ညက ကျောင်းအဝင်နေရာကို သွားကြည့်တယ်။ ကျောင်းသားထုက သူတို့ဖာသာ တိုက်ပွဲကြေညာနေပြီ။ သမဂ္ဂက လှုံဆော်ဖို့တောင် မလိုဘူး။ အဲဒီနေ့က ကျောင်းမပိတ်ဘူး။ ဒါကြောင့် နေ့ကျောင်းသားတွေ ကျောင်းလာတက်တော့ သူတို့လည်း စာအုပ်ဘေးချိတ်ပြီး တိုက်ပွဲထဲ ဝင်ပါကြတယ်။ သစ်တို သစ်စ တွေ၊ အမှိုက်ပုံးတွေနဲ့ တည်ဆောက်ထားတဲ့ ယာယီအတားအဆီး အမြင့်ကြီးပေါ်မှာ ခွပ်ဒေါင်းအလံတွေ ဝဲလို့။

အဲဒီအချိန်မှာ ဆရာ ဆရာမတွေရောက်လာတယ်။ တော်တော်များတယ်။ သူတို့အားလုံးရဲ့မျက်နှာပေါ်မှာ စိုးရိမ်ပူပန်မှုတွေ အတိုင်းသားမြင်နေရတယ်။ ကျနော်မှတ်မိသလောက်ဆိုရင် သင်္ချာက ဆရာကြီး ဦးနက်၊ ဒေါက်တာ ဗကြည်၊ ဓာတုဗေဒက ဆရာကြီး အတ္တာဆင်း၊ စိုက်ပျိုးရေးက ဆရာကြီး ဦးသန်းထွန်း (အဲဒီတုန်းက စိုက်ပျိုးရေးတက္ကသိုလ် ရယ်လို့ သီးခြား မရှိသေးဘူး) နောက်ပြီး ရုက္ခဗေဒက ဒေါက်တာသန်းထွန်း၊ မြန်မာစာဌာနက ဒေါ်စီစီဝင်း၊ ဒေါ်မိမိလေးတို့ သူတို့က ကျောင်းသားတွေကို လာဖျောင်းဖျတာ။

သူတို့ပြောတာက ကျောင်းသားတို့ ဆန္ဒပြတာကို တားမြစ်တာမဟုတ်ဘူး။ ဒါပေမယ့် ခုလို အတားအဆီးတွေ လုပ်ထားခြင်း အားဖြင့် သက်ဆိုင်ရာတွေက ဒါကို အကြောင်းပြပြီး အင်အားသုံးလာ ရင် မလိုလားအပ်တာတွေ ဖြစ်ပေါ်လာမယ်။ ဒါကြောင့် ဒီအတားအဆီးတွေကိုတော့ ဖျက်ပေးပါလို့ ပြောတာ။ ဆရာကြီး တွေပြောတာ မှန်တယ်။ ဒါကြောင့် သမဂ္ဂခေါင်းဆောင်တွေက ဆရာကြီးတွေဘက်ကရပ်ပြီး အတားအဆီးတွေကို ဖျက်ပေးဖို့ နားချတယ်။

ကျနော်လည်း သစ်ကိုင်းတွေပေါ်တက်ရပ်ပြီး ဖျက်ပေးဖို့ မိန့်ခွန်းလိုလိုပြောခဲ့တာ မှတ်မိနေတယ်။ ကျောင်းသားတွေက လက်မခံဘူး။ အထူးသဖြင့် တညလုံး ပင်ပင်ပန်းပန်း လုပ်ထားရတဲ့သူတွေပေါ့။ ဆရာကြီးတချို့က (ကျနော်မှတ်မိတာ စိုက်ပျိုးရေးက ဦးသန်းထွန်း တို့ဆိုရင်) မျက်ရည်တောင် ကျကြရှာတယ်။

ဒီလိုနဲ့ နောက်တော့ ကျောင်းသားတွေက “အဲဒီ ရဲတွေ၊ စစ်သားတွေ ကျုပ်တို့ကျောင်းဝင်းထဲဝင်လာရင် ဘယ်လိုလုပ်မလဲ” လို့ မေးကြတယ်။ ကျနော်တို့ ကျောင်းသားခေါင်းဆောင်တွေက “မဝင်အောင် ကျနော်တို့ အစွမ်းကုန် လုံးပမ်းပါ့မယ်” လို့ အာမခံကြတယ်။ ဒီအခါမှာ ကျောင်းသားတချို့က မကျေနပ်နိုင်ကြဘဲ “လမ်းပေါ်မှာ ခင်ဗျားတို့ကိုယ်တိုင် လှဲအိပ်ပြီး လမ်းပိတ်ပေးရမယ်” လို့ တောင်းဆိုကြတာနဲ့ ကျနော်တို့ကလည်း အာမခံလိုက်တယ်။

အဲဒီတော့မှ အတားအဆီးတွေကို ဝိုင်းဖယ်ရှားလို့ရတယ်။ ဆရာကြီးတွေနဲ့ ဆရာမတွေလည်း ဝင်ကူကြလို့ ကျနော်တို့က “မလုပ်ကြပါနဲ့” လို့ တောင်းပန်ရသေးတယ်။ အားလုံး ဖယ်ပြီးပြီဆိုတော့မှ ဆရာတွေအားလုံး ပြန်သွားကြပါတယ်။ ရှေ့ဆက်ဖြစ်တဲ့ တိုက်ပွဲမှာ သူတို့ဝင်မရှုပ်ဘူးဆိုတဲ့ အဓိပ္ပာယ်ပေါ့။

ဆက်လက်ဖော်ပြပါမယ်။