တင်ရှိန်က ပထမဆုံး ဗမာပြည်ထဲက ပါတီခေါင်းဆောင်တွေနဲ့ ရဲဘော်တွေ တရုတ်ပြည်ထဲ ဘယ်လိုဝင်ကြတယ် ဆိုတာ စ ပြောပါတယ်။ တဖြည်းဖြည်း ရုပ်လုံးဖော်လာပါတယ် သခင်သန်းထွန်း နောက်ဆုံးနေ့များ ၂ တွဲစလုံး ဖတ်ထားပြီးမို့ အသစ်အဆန်း မပါ။ သူ ပြောလို့ အရှိန်ရပြီဆိုတာနဲ့ “နေဦး” လို့ ကျနော်က လက်ပြပြီးတားပါတယ်။
“ကျနော်သိတာ ကြားတာက ခင်ဗျားပြောသလို မဟုတ်ဘူး” ပီကင်းရေဒီယိုက ဘယ်လို ပြောတယ်၊ ပြည်သူ့ အသံက ဘယ်လို ပြောတယ်၊ ပဲခူးရိုးမရောက်ဖူးတဲ့ရဲဘော်တွေက ဘယ်လိုပြောတယ် ဆိုပြီး သူ့စကားကို ချေဖျက်ပါတယ်။
“ပြည်သူ့အသံ ဆိုတာလဲ တရုတ်အသံပဲ၊ တရုတ်ပြည်ထဲက လွှင့်နေတာ …”
“မဟုတ်ဘူး၊ ကြူကုတ်က လွှင့်နေတာ”… ကျနော်က ဘယ်ကသိထားတဲ့ အချက်အလက်မှန်း မသိ ချေဖျက်ရပြီးရော ရမ်းတုတ်လိုက်ပါတယ်။
အဆောင်ထောင့် ကျွန်းသားတိုင်ကြီးပေါ်မှာ ခဲဆံနဲ့ မှိန်ဖျော့ဖျော့လေး ရေးခြစ်ထားတဲ့ ‘ကြူကုတ်ကို ပါတီက ၆၈ ခုနှစ်မှာ သိမ်းလိုက်ပြီ’ဆိုတဲ့ စာတမ်းလေးကြောင့်လား?။ ကျွန်းတုန်းက တယောက်ယောက်ရဲ့ ခန့်မှန်းပြောဆိုချက်ကြောင့်လား မသိ။ (ခု ဒီစာရေးနေစဉ်မှာတော့ ပြုံးမိပါတယ်။)
ဒီနေရာမှာ အချက်အလက် ခိုင်မာတိကျဖို့ ပြိုင်နေတာမဟုတ်။ ရပ်တည်ချက်ချင်း ပြိုင်နေတာဖြစ်လို့ ပြဿနာ မရှိ။
သူကတော့ အတော် ရှုံ့သွားပါတယ်။ သို့သော် ဆက်လက်ကြိုးစားပြီး အချက်အလက်တွေ တင်ပါတယ်။
ယဉ်ကျေးမှုတော်လှန်ရေးကာလမှာပဲ သခင်ဗသိန်းတင် ခေါင်းဆောင်တဲ့အစုက သခင်သန်းမြိုင်ကို သေဒဏ်ပေးပြီး အဆုံးစီရင်လိုက်ပြီဖြစ်ကြောင်း ပြောပြန်တယ်။ (တလောကမှ သခင်သန်းမြိုင်တယောက် ဖျားနာသေဆုံးသွားကြောင်းသိရလို့ ဒီ စာရေးနေစဉ်မှာ ဒုတိယံပိ ပြုံးမိပြန်ပါတယ်။)
ထားပါတော့ ဘခက်အလှည့်ကို ဆက်လိုက်ပါဦးမယ်။
ဘခက်က ချောင်းသံပေးလိုက်ပြီး။ “ခင်ဗျားက ဗမာပြည်ကွန်မြူနစ်ပါတီအပေါ်အမြင်ဆိုတဲ့ မေးခွန်းနံပါတ် ၁ ကို ‘ဗမာပြည်၏ တခုတည်းသော ပစ္စည်းမဲ့လူတန်းစားပါတီ’ လို့ ဖြေထားတယ်။ အရင်ကတော့ ဟုတ်ခဲ့တယ်။ အခု မဟုတ်တော့ဘူးဗျ”ဆိုပြီး ‘နောက်ဆုံးနေ့များ’ထဲက အချက်အလက်တွေ ရွတ်ဖတ်သရဇ္ဈယ်ပါတော့တယ်။
ကျနော်ကလည်း ထုံးစံအတိုင်း ရေးလိုက်မှတ်လိုက် ပြုံးလိုက်။ သူ အရှိန်တက်လာတာနဲ့ တားလိုက် ချေဖျက်လိုက် လုပ်နေပါတယ်။
သူက တော်တော်နဲ့ မရပ်၊ ပါတီဗဟို ရုံးအုပ်လုပ်လာသူဆိုတော့ လမ်းစဉ်အမှားတွေအကြောင်း၊ ဗဟိုကော်မတီတွေအကြောင်း၊ ဖြုတ် ထုတ် သတ် ကိစ္စတွေအကြောင်း စာအုပ်လွတ် တတွတ်တွတ် ရွတ်ပြလို့ ကောင်းနေပါတယ်။
“ ဗန်းမော်တင်အောင်နဲ့လည်း တွေ့ပြီးပါပြီ။ ဖြုတ် ထုတ် သတ် ကိစ္စတွေပြောပြတော့ ‘ဟုတ်ရဲ့လား ကိုမြရယ်’ လို့ စုတ်တသတ်သတ် ဖြစ်သွားတယ်။ ခင်ဗျားတို့ ကျွန်းမှာ နောက်ဆုံးတိုက်ပွဲတိုက်တော့ ‘အလဟဿ သေကုန်တော့မှာပဲ၊ ကျနော်တို့ ကိုကိုးကျွန်းသွားချင်တယ်။ ပဲခူးရိုးမ ဖြုတ် ထုတ် သတ် ကိစ္စတွေ ရှင်းပြပြီး ရဲဘော်တွေ အသက်ကယ်ပေးချင်တယ်၊ ခွင့်ပြုပါ’ … လို့ ဗိုလ်မှူးကြီး တင်ဦး (မျက်မှန်)ဆီ တင်ပြပါသေးတယ်။ သူက နောက်မှသွားကြတာပေါ့၊ ပြောတာနဲ့ မလာဖြစ်တာ ကိုယ့်ရဲဘော်တွေပဲဗျာ” … ဆိုပြီး လူတန်းစားမေတ္တာ တွေ ထုတ်ပြနေပါသေးတော့တယ်။ (တောက် … လာလိုက်လို့ကတော့ ပွဲကြီးပွဲကြီးကောင်း ဖြစ်သွားမယ်။)
“ခင်ဗျားဖြေတဲ့အထဲမှာ တော်လှန်ရေးကောင်စီနဲ့ပတ်သက်ပြီး ဖောက်ပြန်တဲ့စစ်အုပ်စုလို့ အကဲဖြတ်တယ်။ ကျနော်တို့က ဒီလိုမထင်ဘူး။ သူတို့ဟာ ဆိုရှယ်လစ်လမ်းစဉ်ကို ရိုးရိုးသားသား ယုံကြည်လုပ်ကိုင်နေသူတွေပဲ၊ မလုပ်တတ် မကိုင်တတ်တာတွေ ရှိချင်ရှိမယ်။ သူတို့အထဲမှာ ဖောက်ပြန်တဲ့အပိုင်းလည်း ရှိချင်ရှိမှာပေါ့။ ဒါတွေကို ပါတီတွင်းတိုက်ပွဲနဲ့ ပြောင်းလဲပစ်နိုင်တယ်လို့ ယုံ … (ကျနော် ပြုံးလိုက်တာ မြင်လိုက်ဟန်တူပါတယ် ယုံရဲ့နောက်မှာ ‘ကြည်’ လိုက်မလာဘဲ) ထင်တယ်” (အင်း … ရမယ် … ရမယ်)
“နောက်တခု မဆလ ကို ဆိုရှယ်လစ် အတုအယောင်လို့ ဖြေတယ်။ ဒါလည်း ကျနော်တို့နဲ့ ကွဲတယ်” … ဆိုပြီး သိဒ္ဓွိတင်တာတွေ လုပ်လာပြန်တယ်။ နေကလည်းစောင်း နားကလည်းညည်းလာပြီမို့ …
“ကဲ … ခင်ဗျား ရှင်းလင်းချက်တွေလည်း အတော်ရှည်လှပါပြီ။ ဒါပေမယ့် ကျနော့်ထင်မြင်ချက်တွေလည်း တချက်တလေတောင် ပြောင်းမသွားပါဘူး” … ဆိုပြီး ဘရိတ်အုပ်ပစ်လိုက်ပါတယ်။
“တခြားပြောချင်တာရှိသေးလား?” လို့လည်း မေးလိုက်ပါတယ်။ သူလည်း အတော်တော့ မောနေပုံရပါတယ်။
“အေးဗျာ ကျနော်လည်း ခင်ဗျားလို ငယ်ငယ်လေးကတည်းက ယုံကြည်ချက်နဲ့ တော်လှန်ရေး လုပ်လာတာပါ၊ မိဘမေတ္တာ ဆွေမျိုးသားချင်းမေတ္တာတွေ မျက်ကွယ်ပြုခဲ့တယ်။ ခု ကျနော် အိမ်ထောင်ကျပြီး သားသမီးရလာမှ မိဘမေတ္တာဆိုတာ ဒီလောက်အထိတောင်ပါပဲလားလို့ သိလာတယ်။ ခင်ဗျားကိုလည်း အိမ်က လာတွေ့သွားပြီမဟုတ်လား? သူတို့မေတ္တာကို ခင်ဗျားခံစားမိမှာပါ။ မကြာခင် အမြန်ဆုံစည်းပါတော့မယ်။ ကဲ … နောက်ဆုံးအနေနဲ့ ကျနော်တို့ သိချင်တာလေးတခုတော့ ဖြေသွားဗျာ”
( အင်း … ခုမှပဲ ကျနော် စောင့်နေတဲ့အကွက် ရောက်လာပါတော့တယ်)
“ကျနော်တို့ အလင်းဝင် ရဲဘော်တွေထဲကို ၃ မျိုး ၃ စားခွဲနိုင်တယ် ထင်ပါတယ်။ နံပါတ်တစ် အမျိုးအစားက နိုင်ငံရေးလည်းစွန့်လွှတ် လူမှုရေးလည်း ဖောက်ပြန်ကြတယ်။ နောက်တမျိုးကျတော့ မာ့က်စ်ဝါဒ လီနင်ဝါဒကို မစွန့်လွှတ်၊ ဒါပေမယ့် လူမှုရေးကျတော့ ဖောက်ပြန်တာရှိတယ်။ နောက်ဆုံး အမျိုးအစားက မာ့က်စ်ဝါဒ လီနင်ဝါဒကို ဆက်လက်ကိုင်စွဲ တိုက်ပွဲဝင်နေကြပြီး လူမှုရေးဘက်မှာလည်း မှဲ့တပေါက်မစွန်းအောင်နေတဲ့သူလို့ တွေ့ရတယ်။ ကျနော်တို့ကို ဘယ်လိုအမျိုးအစားထဲကလို့ သတ်မှတ်ချင်ပါသလဲ?”။
ဆက်လက်ဖော်ပြပါမယ်။
No comments:
Post a Comment